ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[2006 ಇಸ್ವೆಚಾ ಸಪ್ತೆಂಬರ್ 23 ತಾರಿಕೆರ್ ಅಪ್ಲೊ 41ವೊ ಜಲ್ಮಾದಿವಸ್ ಆಚರಣ್ ಕರ್ಚಾ ಆಂಡ್ರು ತುಕಾ ಹೆಂ ಅಂಕಣ್ ಅರ್ಪಣ್]
ಸತಾಂ ಆನಿ ಖತಾಂ - 23. ವೇಳ್ಘಡಿ
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಎಕಾ ತೆಂಪಾರ್, ದರ್ಯಾ ಮಧೆಂ ಆಸ್ಚಾ ಎಕಾ ಲ್ಹಾನ್ ಭುಮಿಯೆಚೆರ್ ಸರ್ವ್ ಭಗ್ಣಾಂ ಜಿಯೆವ್ನ್ ಆಸ್ಲ್ಲಿಂ. ಸುಃಖ್, ನಿರಾಶಾ, ಜಾಣ್ವಾಯ್ ಆನಿ ಹೆರ್ ಭಗ್ಣಾಂ - ಮೋಗ್ ಸಯ್ತ್. ಎಕಾ ದಿಸಾ ಥಂಯ್ಸರ್ ಅಶಿ ಏಕ್ ಕಳವ್ಣಿಂ ಆಯ್ಲಿಕೀ, ತಿ ಭುಮಿ ಸುವಾತ್ ವೆಗಿಂಚ್ ಬುಡ್ಚಾರ್ ಆಸಾ ದೆಕುನ್ ಥಂಯ್ ಥಾವ್ನ್ ವೆಚಾಂನಿ ವಚ್ಯೆತ್ ಮ್ಹಣೊನ್.
ಹಿ ಕಳವ್ಣಿಂ ಆಯ್ಕತಚ್ಚ್ ಸರ್ವಾಂನಿ ಹಿ ಸುವಾತ್ ಸೊಡ್ನ್ ದರ್ಯಾಚಾ ತಡಿಕ್ ವೆಚಾಕ್ ಆಪ್ಲ್ಯೊ ದೊಣ್ಯೊಂ ಸಾರ್ಕ್ಯೊ ಕರುಂಕ್ ಧರ್ಲೆಂ.
ಮೊಗಾನ್ ಎಕಾ ಸೊಭಿತ್ ವಸ್ತುಕ್ ವಾವವ್ನ್ ವರ್ಚಾ ’ಗರ್ವ್’ ಲಾಗಿಂ ವಿಚಾರ್ಲೆಂ ;"ಗರ್ವಾ, ದಯಕರ್ನ್ ಮ್ಹಜಿ ಕುಮೊಕ್ ಕರ್ ಆನಿಂ ತುಜೆಸವೆಂ ಆಪವ್ನ್ ವ್ಹರ್". ಗರ್ವಾನ್ ಜಾಪ್ ದೀವ್ನ್ ಮ್ಹಳೆಂ "ಮೊಗಾ, ಮ್ಹಜಾನ್ ಜಾಯ್ನಾ. ತುಂ ಭಿಜ್ಲಾಯ್ ಆನಿಂ ಮ್ಹಜಿ ದೊಣ್ ಭಿಜೊನ್ ಪಾಡ್ ಜಾಂವ್ಕ್ ಆಸಾ" ತಾಚಿ ಜಾಪ್ ಆಯ್ಕೊನ್ ಮೋಗ್ ಏಕ್ ಘಡಿ ದುಃಖೇಸ್ತ್ ಜಾಲೊ.
ತವಳ್ ಲಾಗಿಂ ಆಸ್ಚಾ ನಿರಾಶಾಲಾಗಿಂ ವಿಚಾರ್ಲೆಂ "ನಿರಾಶಾ, ದಯಕರ್ನ್ ಮ್ಹಾಕಾ ತುಜೆಸವೆಂ ವ್ಹರ್", ನಿರಾಶೆನ್ ಜಾಪ್ ದಿಲಿ "ಮೊಗಾ, ಹಾಂವ್ ಇತ್ಲೊಂ ನಿರಾಸ್ ಮ್ಹಳ್ಯಾರ್ ಮ್ಹಾಕಾ ಎಕ್ಸುರೊಚ್ ರಾವೊಂಕ್ ಮನ್ ಜಾಲಾಂ, ದೆಕುನ್ ಮ್ಹಾಕಾ ಎಕ್ಸುರೊಚ್ ಸೊಡ್"
ತವಳ್ ಸಂತೊಸ್ ಮೊಗಾಕ್ ಪಾಶಾರ್ ಕರ್ನ್ ಗೆಲೊ. ಪುಣ್ ತೊ ಸಂತೊಸ್ ಇತ್ಲ್ಯಾ ಸಂತೊಸಾನ್ ಆಸ್ಲ್ಲೊಕೀ ತಾಕಾ ಮೊಗಾಚೊ ಉಲೊಚ್ ಆಯ್ಕಾಲೊನಾ.
ತವಳ್ ಏಕ್ ಮಾಲ್ಘಡೊ ತಾಳೊ ಸಾದ್ಲೊ, "ಯೇ ಮೊಗಾ, ಹಾಂವ್ ತುಕಾ ಮ್ಹಜೆಸವೆಂ ವರ್ತಾಂ". ಮೊಗಾಕ್ ಆತಾಂ ಇತ್ಲೊ ಸಂತೊಸ್ ಜಾಲೊ ಮ್ಹಳ್ಯಾರ್ ತ್ಯಾ ಮಾಲ್ಘಡ್ಯಾಚೆಂ ನಾಂವ್ ವಿಚಾರುಂಕ್ ಸಯ್ತ್ ಮೊಗಾಕ್ ವಿಸರ್ ಪಡ್ಲಿ. ಆನಿ ಮೊಗಾಕ್ ಶಾಬೀತಾಯೆನ್ ದರ್ಯಾಚಾ ತಡಿಕ್ ಪಾವವ್ನ್ ತೊ ಮಾಲ್ಘಡೊ ಆಪ್ಲಿ ವಾಟ್ ಧರುನ್ ಗೆಲೊ.
ತವಳ್ ಥಂಯ್ ಆಸ್ಚಾ ಅನ್ಯೇಕಾ ಮಾಲ್ಘಡ್ಯಾಲಾಗಿಂ, ಮ್ಹಣ್ಜೆ ಜಾಣ್ವಾಯೆಲಾಗಿಂ ವಿಚಾರ್ಲೆಂ "ಮ್ಹಾಕಾ ಮಾಫ್ ಕರ್, ಮ್ಹಾಕಾ ಆತ್ತಾಂ ತಡಿಕ್ ಪಾವಯಿಲ್ಲ್ಯಾಚೆಂ ನಾಂವ್ ವಿಚಾರುಂಕ್ ಮ್ಹಾಕಾ ವಿಸರ್ ಪಡ್ಲಿ, ದೆಕುನ್ ಮ್ಹಾಕಾ ಕೊಣೆಂ ಕುಮೊಕ್ ಕೆಲ್ಲಿ ಮ್ಹಳ್ಳೆಂ ತುಂ ಪುಣೀಂ ಮ್ಹಾಕಾ ಸಾಂಗ್ಶಿಗೀ?". ತವಳ್ ತ್ಯಾ ಮಾಲ್ಘಡ್ಯಾನ್ ಮ್ಹಣ್ಜೆ ಜಾಣ್ವಾಯೆನ್ ಜಾಪ್ ದಿಲಿ
"ವೇಳ್ಘಡ್ಯೆನ್".
"ವೆಳ್ಘಡಿ?" ಮೊಗಾನ್ ಪಾಟಿಂ ಸವಾಲ್ ಕೆಲೆಂ.
ಆತಾಂ ಜಾಣ್ವಾಯೆನ್ ಹಾಸೊನ್ಶೆಂ ಜಾಪ್ ದಿಲಿ "ಕಿತ್ಯಾಕ್ ಮ್ಹಳ್ಯಾರ್ ಫಕತ್ ವೆಳಾಕ್ ಮಾತ್ರ್ ಎಕಾ ಮೊಗಾಂತ್ ಆಸ್ಚಿ ಗುಂಡಾಯ್ ಮೆಜ್ಚಿ ಶ್ಯಾಥಿ ಆಸಾ".
ಸಂದೇಶ್: ’ಹರ್ಯೆಕಾ ಸವಾಲಾಂಚೊ ಜಾಪಿ ಜೊಕ್ತಿ ವೇಳ್ಘಡಿಚ್ ದಿತಾ’ ಮ್ಹಳ್ಳಿ ಮಾಲ್ಘಡ್ಯಾಂಚಿ ಸಾಂಗ್ಣಿ ಕಿತ್ಲಿ ಸತ್ ನ್ಹಯ್ಗೀ? ಖಂಚೇಂಯ್ ಬರೆಂ ತರ್ ತೆಂ ಕಿತ್ಲೆಂ ಬರೆಂ? ಆನಿ ವಾಯ್ಟ್ ತರ್ ತೆಂ ಕಿತ್ಲೆಂ ವಾಯ್ಟ್ ಮ್ಹಳ್ಳೆಂ ಕಳಾಜಯ್ ತರ್ ಖಂಡಿತ್ ಜಾವ್ನ್ ತೆಂ ವೆಳಾನ್ಚ್ ದಾಖವ್ನ್ ದೀಜಯ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
