ಕೊಂಕ್ಣಿ ವರ್ತುಲಾಂತ್ ಜೆರಿ ರಾಸ್ಕಿಞ್ ಮ್ಹಳ್ಳೆಂ ನಾಂವ್ ಫಾಮಾದ್ ಜಾಲಾಂ ’ಕಾರ್ಯೆಂ ನಿರ್ವಾಹಣ್’ ಕರ್ಚ್ಯಾಂತ್ ಮಾತ್ರ್ ಮ್ಹಣ್ ಲೆಖ್ತೆಲ್ಯಾಂಕ್ ಅಜ್ಯಾಪ್ ಜಾಂವ್ಕ್ ಪುರೊ, ಹೊ ಏಕ್ ಗೂಂಡ್ ಚಿಂತ್ಪಿ, ಅಪುರ್ಭಾಯೆಚೊ ಕಾಣ್ಯೆಗಾರ್, ಲೇಖಕ್, ನಾಟಕಿಸ್ತ್, ನಟ್ ಆನಿ ಹ್ಯಾ ಸರ್ವಾಂಚ್ಯಾಕೀ ವ್ಹಡ್ - ವಾಚ್ಪಿ. ಕೊಂಕ್ಣೆಶಿವಾಯ್, ಕಾನಡಿ, ಇಂಗ್ಲಿಶ್ ಭಾಸೆಂತ್ಲೆಂ ಸಾಹಿತ್ಯ್ ವಾಸ್ಚಿ ಸವಯ್.
ಪ್ರಸ್ತುತ್ ಕೊಂಕ್ಣಿ ವರ್ತುಲಾಂತ್ ಕಾರ್ಯಾಳ್ ಜಾವ್ನಾಸ್ಚ್ಯಾ ಹಾಕಾ ಖರೊಚ್ ಕೊಂಕ್ಣಿ ಭಾಸೆಚೆರ್, ಕೊಂಕ್ಣಿ ಸಾಹಿತಾಚೆರ್ ಹುಸ್ಕೊ ಆನಿ ಅಭಿಮಾನ್ ಆಸಾ ದೆಕುನ್ ತಾಚಿ ಸಮ್ಜೊಣಿ, ತಾಚೆ ವಿಚಾರ್ ದಾಯ್ಜ್.ಕೊಮ್ ವಾಚ್ಪ್ಯಾಂ ಖಾತಿರ್ ದಿಂವ್ಚ್ಯಾಕ್ ಸುರ್ವಾತ್ ಕೆಲ್ಲೆಂಚ್ ಜಾವ್ನಾಸಾ ಹೆಂ ಅಂಕಣ್ - ಭಿಲ್ಕುಲ್ ಹಾಕಾ ’ಭಗ್ಲ್ಲೆಂ ಭಗ್ಲ್ಲೆ ಪರಿಂ’. ಕೊಂಕ್ಣಿ ಸಾಹಿತ್ಯಾಕ್ ಲಗ್ತಿ ಜಾಲ್ಲ್ಯಾ ವಿಚಾರಾಂಚೆರ್ ತೊ ಅರ್ಸೊ ಧರ್ತಲೊ ಮಾತ್ರ್ ನ್ಹಯ್, ಆಮಿ ಸರ್ವಾಂ ಎಕ್ವಟಿತ್ ರಿತಿನ್ ಕೊಂಕ್ಣಿ ಸಾಹಿತ್ಯಾಚ್ಯಾ ಬರೆಪಣಾ ಪಾಸೊತ್ ವಾವ್ರ್ ಕರ್ಚೊ ಉಲೊ ತೊ ದಿತಾನಾ, ಹ್ಯಾ ಉಲ್ಯಾಕ್ ಪಾಳೊ ದಿವುನ್, ಆಮಿಂಯೀ ತಾಚೆ ವಿಚಾರ್/ಸಮ್ಜೊಣಿ ಆಯ್ಕೊವ್ಯಾಂ. ವಾಚ್ಪ್ಯಾಂಚ್ಯಾ ಪ್ರಭುದ್ದ್ ಪ್ರತಿಕ್ರಿಯೆಕ್ ಉಗ್ತೊ ಸ್ವಾಗತ್ ಆಸಾ.
1. ವಾಸ್ಚೆಂ ಬರಂವ್ಚೆಂ ಆನಿ ಶೆಣ್ ಮ್ಹಳ್ಳಿ ಜಾಗ್ವಣ್.
ರಾತಿಂ ಭರ್ತಿ ಧಾ ಜಾತಾನಾ
ಬೆಡ್ಲ್ಯಾಂಪ್ ಪೆಟವ್ನ್ ಹಾಂವ್ ವಾಚಾಪ್ ಸುರು ಕರ್ತಾಂ.
ಖಟ್ಲ್ಯಾಚಾ ಬಗ್ಲೆನ್ ಏಕ್ ರಾಸ್ ಬೂಕ್, ರಾಸ್ ಪಡ್ಲ್ಯಾತ್.
ಸಕ್ಕಡೀ ಬೂಕ್ ವಾಚಿಜಯ್ ಮ್ಹಳ್ಳಿ ಆಶಾ. ಥೊಡೆ ಪಾವ್ಟಿಂ
ನಿದೊಂಕ್ ವೆತಾನಾ ಹಾಂವ್ ಧಾ ಬಾರಾ ಬೂಕ್ ವಿಂಚುನ್ ವೆಚೆಂ
ಪಳೆವ್ನ್ ಮ್ಹಜ್ಯಾ ಬಾಯ್ಲೆನ್ ಮಾರ್ಮಿಕ್ ಹಾಸೊ
ಹಾಸ್ಚೊ ಆಸಾ. ತರೀ ಬೂಕ್ ಮ್ಹಳ್ಯಾರ್ ಮ್ಹಾಕಾ ಮೊಗ್ಚ್.
ಆಯ್ಲೆವಾರ್ ಎಸ್. ಎಲ್. ಭೈರಪ್ಪಾಚೆ ತೀನ್ ಬೂಕ್ ಹರ್ಬೊಸ್
ಧರ್ಲ್ಲೆಪರಿಂ ವಾಚುನ್ ಕಾಡ್ಲೆ. ಪಯ್ಲೊ ‘ಆವರಣ’, ತಾಚೆ
ಉಪ್ರಾಂತ್ ‘ನಾಯಿ ನೆರಳು’, ಫಾಟಫಾಟ್ ‘ಧರ್ಮಶ್ರೀ’.
ಹಾಚೆ ಫುಡೆಂ ಆಮಿ ಹೆಗ್ಗೋಡು ‘ನಿನಾಸಂ’ಕ್ ಭೆಟ್ ದೀಂವ್ಕ್
ಗೆಲ್ಲೆ ವೆಳಿಂ ಉಗ್ಡಾಸಾಕ್ ಮ್ಹಣ್ ಘೆತ್ಲ್ಲೊ ಯು. ಆರ್.
ಅನಂತಮೂರ್ತಿಚೊ ‘ಎರಡು ದಶಕದ ಕತೆಗಳು’ ಬೂಕ್ಯೀ
ವಾಚೊನ್ ಕಾಡ್ಲೊ. ಹ್ಯಾ ಬುಕಾಂತ್ಲಿ ‘ಮೌನಿ’ ಕಾಣಿ ಭಾರಿಚ್
ಮೆಚ್ವಾಲಿ.
ಕಾನಡಿಂತ್ ವಾಚ್ತಾನಾ ಮ್ಹಾಕಾ ಜಾಯ್ತೊ ಸಂತೊಸ್ ಜಾತಾ.
ಕಿತ್ಲೆಂಯ್ ಜಾಲ್ಯಾರೀ ಮಾವ್ಶಿಭಾಸ್. ಹಾಂವೆ ಸಾಹಿತಿಕ್ ಅಭಿರುಚ್
ವಾಡಯಿಲ್ಲಿಚ್ ಕಾನಡಿ ಸಾಹಿತ್ಯದ್ವಾರಿಂ. ಹೆ ಸಾಹಿತ್ಯಾನ್ ಸಾಹಿತ್ಯಾಚಿ
ರೂಚ್ ಮ್ಹಜೆ ಥಂಯ್ ವಾಗಯಿಲ್ಲಿ. ಉಪ್ರಾಂತ್ ಕೊಂಕ್ಣಿ ಸಾಹಿತ್ಯ್
ವಾಚ್ಲ್ಲೆಂ. ಸಾಂಗಾತಾ ಇಂಗ್ಲಿಶ್ ಸಾಹಿತ್ಯ್ ವಾಚುಂಕ್ ಪ್ರಾರಂಭ್
ಕೆಲೆಂ. ಇಂಗ್ಲಿಶಾಂತ್ ಹಾಂವೆ ವಾಚ್ಲ್ಲೊ ಪಯ್ಲೊ ಬೂಕ್ ‘ಗಾಡ್ಫಾದರ್’.
ಇಂಗ್ಲಿಶ್ ಸಾಹಿತ್ಯಾಂತ್ ಮ್ಹಾಕಾ ಚಡ್ ಪ್ರಭಾವಿತ್ ಕೆಲ್ಲೊ
ಬೂಕ್ ‘ದ ಅನ್ಟಚೆಬಲ್’. ಮುಲ್ಕ್ರಾಜ್ ಆನಂದ್ ಹಾಣೆಂ ಬರಯಿಲ್ಲೊ
ಹೊ ಬೂಕ್ ದುಸ್ರೆ ಪಿಯುಸಿಂತ್ ಪಠ್ಯ್ ಬೂಕ್ ಜಾವ್ನಾಸ್ಲ್ಲೊ.
ಹಾಂತ್ಲೊ ಪ್ರಮುಖ್ ಪಾತ್ರ್ ‘ಭಾಕಾ’ ಆಜುನೀ ಮ್ಹಜಾ ಕಾಳ್ಜಾಂತ್
ವಸ್ತಿ ಕರ್ನ್ ಮ್ಹಜೆಲಾಗಿಂ ನಿರಂತರ್ ಸಂಭಂದ್ ದವರ್ನ್
ಆಸಾ. ತಾಕಾ ವಿಚ್ರೊಂಕ್ಚ್ ಸಾಧ್ಯ್ ನಾ.
ವಾಚ್ಪಾನ್ ಮ್ಹಾಕಾ ಬರವ್ಣ್ಯೆಕ್ ಪ್ರೇರಣ್ ದಿಲೆಂ ವ್ಹಯ್
ಪುಣ್ ಹಾಂವ್ ಕಸಲ್ಯಾಯ್ ರಿತಿಚೊ ವ್ಹಡ್ ಬರವ್ಪಿ ಜಾವ್ನಾಂ
ಮ್ಹಳ್ಳಿ ಗಜಾಲ್ ಖರಿ. ಹೆ ವಿಶಿಂ ಮ್ಹಾಕಾ ನಿಜಾಯ್ಕೀ ಸಂತೊಸ್ಚ್.
ಹಾಂವ್ ಕೆದ್ನಾಂಯ್ ಬರಂವ್ಚೆ ಖಾತಿರ್ ಬರಯ್ನಾಂ ಕಿತ್ಯಾಕ್
ಮ್ಹಳ್ಯಾರ್ ತಸಲೆ ಬರವ್ಣೆಂತ್ ಜೀವ್ ಆಸಾನಾ. ಮ್ಹಾಕಾ
ಕಠಿಣ್ ರಿತಿನ್ ಪ್ರಭಾವ್ ಘಾಲ್ಲೊ ಅಂಕಣ್ಕಾರ್ ಮಾಲ್ಘಡೊ
ಸಾಹಿತಿ ಕುಶ್ವಂತ್ ಸಿಂಘ್! ‘ವಿದ್ ಮೆಲಯ್ಸ್ ಟವರ್ಡ್ಸ್ ಆಲ್’
ಅಂಕಣ್ ಮ್ಹಾಕಾ ಭಾರಿಚ್ ಮೊಗಾಚೆಂ. ಹ್ಯಾ ಮನ್ಶಾಚಿ ಜಾಣ್ವಾಯ್,
ಪಂಕ್ತ್ಯೊ ವೊಳ್ಚಿ ತಾಂಕ್, ಇಂಗ್ಲಿಶ್ ಭಾಶೆಚೆರ್ ತಾಕಾ ಆಸ್ಲ್ಲಿ
ಪ್ರಬುದ್ಧತಾ ದಿಗಂತಾಕ್ ಮಿಕ್ವಲ್ಲಿ.
ಅಸಲ್ಯಾ ಹ್ಯಾ ಕಾಳಾರ್ ಕೊಂಕ್ಣಿ ಸಾಹಿತ್ಯಾಂತ್ ‘ಶೆಣ್’ ಚಳ್ವಳ್
ಸುರುಜಾಲ್ಲಿ ನಿಜಾಯ್ಕೀ ವ್ಹಡಾ ಸಂತೊಸಾಚಿ ಗಜಾಲ್(ಹಾಂಗಚರ್
ಹಾಚೊ ಉಲ್ಲೇಖ್ ಫಕತ್ ಹ್ಯಾ ಚಳ್ವಳೆಚೆ ಬರೆ ಗೂಣ್
ಗುಮಾನಾಂತ್ ದವರ್ನ್ ಮಾತ್ರ್ ಹಾಂವ್ ಕರ್ತೆತ್ ಆಸಾಂ).
ಅಸಲಿ ಏಕ್ ವಾಡಾವಳ್ ಭಾರಿಚ್ ಗರ್ಜ್ ಆಸ್ಲ್ಲಿ. ಶೆಣ್ ಘಾಲ್ಲ್ಯಾ
ರೆಡ್ಯಾಂ ಪಯ್ಕಿ ಹಾಂವೀ ಎಕ್ಲೊ ಮ್ಹಣ್ ಸಾಂಗೊಂಕ್ ಮ್ಹಾಕಾ
ಕಸಲಿಚ್ ಲಜ್ ದಿಸಾನಾ. ಹರ್ಯೇಕಾ ಭಾಶೆಂತ್ ಏಕ್ ರೆನಯ್ಸನ್ಸ್
ಗರ್ಜ್ ಆಸಾ. ಆನಿ ಆಬ್ಳೆ ಹೊ ಕಾಳ್ ಉದೆಲೊ ತಿ ಸಂತೊಸಾಚಿ ಗಜಾಲ್.
ಕೊಂಕ್ಣೆಂತ್ ಸಾಹಿತ್ಯ್ ಆಸಾಜೆ ಮ್ಹಳ್ಳೆ ಖಾತಿರ್ ಖಂಡಿತ್ ಸಾಹಿತ್ಯ್
ಆನಿ ಮುಖಾರ್ ಉದೆಂವ್ಚೆಂ ನ್ಹಾಕಾ. ಸಾಹಿತ್ಯ್ ಫಕತ್ ಮನೋರಂಜನಾಕ್
ಜಾಯ್ನಾಸ್ತಾಂ, ತಾಚೆ ಸಂಗೀ ಸಮಾಜಿಕ್ ಧರ್ಲ್ಲೊ ಆರ್ಸೊಯ್
ಜಾಯ್ಜಯ್. ವಾಚ್ಪ್ಯಾಕ್ ಬರ್ಪಾನ್ ಚಿಂತ್ಪಾಕ್ ಲಾಯ್ಜಯ್.
ಸಮಾಜಿಂತ್ಲ್ಯಾ ರೀತ್ ರಿವಾಜಿಂಕ್, ಜಾತ್ ಧರ್ಮಾಂಕ್ ಬಿಂಬಿತ್ ಕರ್ಚೊ
ಆರ್ಸೊ ಜಾಯ್ಜಯ್. ತೆದ್ನಾಂ ಸಾಹಿತ್ಯಾನ್ ಜೆಂ ಕಿತೆಂ ಆಪ್ಣೆಂ
ಕರಿಜಯ್ ಆಸ್ಲ್ಲೆಂ ತೆಂ ಕರ್ತವ್ಯ್ ಪರಿಪೂರ್ಣ್ ಕೆಲ್ಲೆ
ಬರಿ ಜಾತಾ.
ಸಾಹಿತಿ ಸಮಾಜಿಕ್ ಹುಸ್ಕೊ ಆಸ್ಲ್ಲೊ ವೆಕ್ತಿ ಜಾಯ್ಜಯ್.
ಯು.ಆರ್. ಅಂನತಮೂರ್ತಿಚೆಂ ಸಾಹಿತ್ಯ್ ಉಂಚ್ಲೆಂ ತರೀ, ಅನಂತಮೂರ್ತಿಚೆರ್
ಬುದ್ವಂತ್ ಲೊಕಾಕ್ ಚಡ್ ಬರೀ ಅಭಿಪ್ರಾಯ್ ನಾ. ತರೀ ಹ್ಯಾ
ಸಾಹಿತಿನ್ ಇಗರ್ಜಾಂ ವಯ್ರ್ ಜಾಲ್ಲ್ಯಾ ಹಲ್ಲ್ಯಾಕ್ ಪ್ರತಿಭಟನ್
ಜಾವ್ನ್ ಆಪ್ಲಿ ಅಭಿಪ್ರಾಯ್ ಉಚಾರ್ಲಿ. ಹೆಂ ಸಾಹಿತಿನ್ ಕರಿಜಯ್
ಜಾಲ್ಲೆಂ ಭೋವ್ ಗರ್ಜೆಚೆಂ ನಯ್ತಿಕ್ ಕಾಮ್. ಆನ್ಯೇಕ್
ಸಾಮಾಜಿಕ್ ಹುಸ್ಕೊ ಆಸ್ಚಿ ಸಾಹಿತಿ ಮ್ಹಳ್ಯಾರ್ ಆರುಂಧತಿ
ರೋಯ್-‘ಗೊಡ್ ಆಫ್ ಸ್ಮಾಲ್ ಥಿಂಗ್ಸ್’ ಹಾಚಿ ಲೆಖಿಕಾ. ಅಶೆಂ
ಎಕಾ ಮಾಪಾನ್ ಕೆದ್ನಾಂ ಸಾಹಿತಿ ಆಪ್ಣೆಂ ಕರ್ಚ್ಯಾ ಸರ್ವಯ್
ಕಾಮಾಂನಿ ಸಾಮಾಜಿಕ್ ಹುಸ್ಕೊ ದಾಕಯ್ತಾಗಿ ತೆದ್ನಾಂ ಮಾತ್ರ್
ಸಾಹಿತಿ ಸಾಹಿತಿ ಜಾತಾ. ಫಕತ್ ಕಿತೆಂಗೀ ಕಾಲೆಂಗೀ ಬರಂವ್ಚೆ ವರ್ವಿಂ
ನ್ಹಯ್!
ಹಾಂವ್ ಹೆ ಮಟ್ಟಾಕ್ ವಾಡೊಂಕ್ ಸಕ್ಲೊನಾ ತೆಂ ಮ್ಹಜೆಂ
ದುರಾದೃಶ್ಟ್! ಹಾಕಾ ಪ್ರಮುಖ್ ಕಾರಣ್ ಹಾಂವೆ ಸೊರ್ಯಾ
ಸಂಗೀ ಕರ್ಚಿಲ್ಲಿಂ ಮ್ಹಜ್ಯಾ ಜಿಣಿಯೆಚಿ ವರ್ಸಾಂ. ಸೊರೊ ಪಿಯೆಂವ್ಕ್
ಸುಲಭ್ ಸೊಡುಂಕ್ ಕಶ್ಟ್! ಸೊಡ್ಲ್ಯಾ ಉಪ್ರಾಂತ್ ಜಿಣಿ
ಸುಖಿ ತರೀ ಬೂದ್ ನಶ್ಟ್! ಆಸೊಂ ಕೊಣೆಂಯ್ ಕಿತೆಂಯ್
ಜಾಂವ್ಚೆ ತಾಂಚ್ಯಾ ತಾಂಚ್ಯಾ ಜಿಣಿಯೆರ್ ಹೊಂದೊನ್ ಆಸ್ತಾ. ಆಮಿ
ಮುಖಾರ್ ಧವರ್ಚಿಂ ಮೆಟಾಂ ಆಮ್ಚಿ ಜಿಣಿ ರುಪಿತ್ ಕರ್ತಾತ್.
ಶೆಣ್ ಚಳ್ವಳೆನ್ ಜಾಯ್ತೆ ವಾದ್ ವಿವಾದ್ ಉಟಯ್ಲ್ಯಾತ್.
ಬೂದ್ ಕೆದ್ನಾಂಯ್ ಸಾಣ್ಯಾಕ್ ಧರಿಜೆ ಜಾಲ್ಲಿಚ್ ವಸ್ತ್. ಜರ್
ವಿಟ್ಚ್ ಅಳ್ನಿ ಜಾಲೆಂ ತರ್ ಕಿತೆಂ ಫಾಯ್ದೊ? ದೆಕುನ್ ಆಜ್ ಕೊಂಕ್ಣಿ
ಸಾಹಿತಿನ್ ಜಾಗೆ ಜಾಂವ್ಚಿಂ ಗರ್ಜ್ ಆಸಾ. ಹಿ ಗರ್ಜ್ ಶೆಣ್ ಚಳ್ವಳೆನ್
ಜರೂರ್ ದಾಖವ್ನ್ ದಿಲ್ಯಾ. ಆತಾಂ ಸವಾಲ್ ಸಾಹಿತ್ಯ್ ಶೆತಾಂತ್
ಉಂಚ್ಲ್ಯಾ ಸಾಹಿತ್ಯಾಚೆಂ ಬೆಳೆಂ ವಾಡೊಂವ್ಕ್ ಕೋಣ್ ಮುಖಾರ್
ಯೆತಾಗೀ ಮ್ಹಳ್ಳೆಂ! ಜಾಂವ್ ಆಮ್ಚೆ ಸಾಹಿತ್ಯ್ ಶೆತ್ ಸಮೃದ್ಧ್
ಜಾಂವ್.
ಆಜ್ ಅಂತರ್ಜಾಳ್ ಸಾಹಿತ್ಯಾಚೆಂ ಸಾತೆಂ ಜಾಲ್ಲಿ ಗಜಾಲ್ ವ್ಹಡಾ
ಸಂತೊಸಾಚಿ. ಆತಾಂ, ಬರಂವ್ಕ್ ಮ್ಹಾಕಾಯ್ ತಿಂತೆರ್, ಕಾಗ್ದಾಚಿ
ಗರ್ಜ್ ನಾ. ಬರಯ್ಲೆಂ ಇ-ಟಪ್ಪಾಲ್ ಕೆಲೆಂ. ಖಂಚ್ಯಾಯ್ ಪತ್ರಾಕ್,
ಗಾಂವಾಕ್, ರಾಶ್ಟ್ರಕ್ ವಚೊನ್ ಪಾವ್ತಾ. ಬರೆಂ ಸಾಹಿತ್ಯ್,
ಅಂಕಣಾ, ಕವಿತೆನ್ ಕೊಂಕ್ಣಿಂ ಸಾಹಿತ್ಯ್ ಅಭಿವೃದ್ದಿ ಜಾಂವ್. ಬುದ್ವಂತ್ಬರವ್ಪಿ
ಲಿಖ್ಣಿ ಹಾತಿಂ ಘೆಂವ್. ಕೊಂಕ್ಣಿ ಸಾಹಿತ್ಯ್ ಶೆತ್ ಜಾಗೊಂ ಮ್ಹಣ್
ಆಶೆತಾಂ.
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
