ವಾಜ್,

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕವಿತಾಝರ್

     ಪರತ್ ಜಲ್ಮೊನ್ ಯೇ

ಉಬ್ಲಿಂ ವರ್ಸಾಂ ಸ ಅನಿ ದೋನ್ ಹಜಾರ್
ಸರ್ಗಾಥಾವ್ನ್ ಸಂಸಾರಾಕ್ ಸೊಮ್ಯಾ ತುವೆಂ ದೆಂವೊನ್
ಭಂವ್ತಿಂ ದೆಖ್ತಾಂ ಮತ್ ವಿರಾರ್ ಮನಾಂತ್ ಬೆಜಾರ್
ಗೆಲೊಯ್ ಕಿತ್ಯಾಕ್ ಇತ್ಲ್ಯೆವೆಗ್ಗಿಂ ಸರ್ಗಾಕ್ ಪಾಟಿಂ ಧಾಂವೊನ್

ಮನ್ಶಾಕ್ ರಚುನ್ ಮೊಗಾನ್ ಪೊಸುನ್ ಮೆಳ್ಳೆಂ ತರೀ ಕಿತೆಂ
ತೊಚ್ಚ್ ಆಬ್ಲೇಸ್ ತೆಂಚ್ ಖೊಟೆಂ ಆಜೂನ್ ಕರ್ತಾ ರಾಜ಼್
ಪೊಕೊಳ್ ದವ್ಲತ್ ಗರ್ವ್ ಹಂಕಾರ್ ಮನ್ಶಾ ಕಾಳಿಜ್ ರಿತೆಂ
ಪರತ್ ಬಾಳ್ಕಾ ಜಲ್ಮೊನ್ ಯೇ ಬಾಳ್ಶೆಂ ಜಾವುನ್ ಆಜ್

ಲಿಪವ್ನ್ ದೇವ್‌ಪಣ್ ಬದ್ಲುನ್ ವೇಸ್ ಜಾಲೊಯ್ ಮನಿಸ್ ಸಾದೊ
ಧನ್ಯಾಂಕ್-ರಾಯಾಂಕ್ ಮೆಳಾನಾಸ್ತಾಂ ಗೆಲೊಯ್ ತಾಂಕಾಂ ಚುಕೊನ್
ಗೊವ್ಳ್ಯಾಂಕ್ ಸಾದ್ಯಾ ರಾಯಾಂಕ್ ಖಾಲ್ತೊ ಜಾಲ್ಲೊ ಸಂತೊಸ್ ಕೆದೊ
ಗರ್ವಿ ಶಿಕ್ಪಿ ಬುದ್ವಂತ್ ಲೆಕ್ಚೊ ರಾಕ್ತಾ ಅಜೂನ್ ಥಕೊನ್

ಆವಯ್-ಬಾಪಯ್ ಭುರ್ಗಿಂ ಮೆಳೊನ್ ಮಾಗ್ತಾಂವ್ ದುಖಾಂ ಗಳವ್ನ್
ಜಿಯೆಂವ್ಕ್ ಕಷ್ಟ್ ಆಯ್ಚಾ ಸಂಸ್ರಾಂತ್ ದಿಸಾನಾಸ್ತಾಂ ವಾಟ್
ನೆಕೆತ್ರ್ ತುಜೆಂ ಪರತ್ ಉದೆಂವ್ ಕಾಳ್ಜಾಕ್ ಕಾಳಿಜ್ ಮೆಳೊನ್
ಪರತ್ ಬಾಳ್ಕಾ ಜಲ್ಮೊನ್ ಯೇ ದಾಕವ್ನ್ ಖರಿ ವಾಟ್

ದುಬ್ಳಿಂ-ದಾಕ್ಟಿಂ ಪೊಟಾಕ್ ನಾಸ್ತಾಂ ಕಿತ್ಲಿಂ ಕಂಗಾಲ್ ಜಾಲ್ಯಾಂತ್
ನೀತ್ ನಾಸ್ತಾಂ ನಿರಪ್ರಾದಿ ಜಯ್ಲಾಂತ್ ಕಿತ್ಲೆ ಕುಸ್ತಾತ್
ಅತ್ಯಾಚಾರಾಕ್ ವಳಗ್ ಜಾವುನ್ ನೆಂಟಿಂ ಕಿತ್ಲಿಂ ಮೆಲ್ಯಾಂತ್
ಪರ್ವಾನಾಸ್ತಾಂ ಗರೀಬಾಂಚಿ ವಡಿಲ್ ಪಾಟಾರ್ ಬಸ್ತಾತ್

ಕೆದ್ನಾಂ ಪಾವ್ಸ್ ಕೆದ್ನಾಂ ಆವ್ರ್ ಆಮ್ಚಾನ್ ಸಾಂಗೊಂಕ್ ಜಾಯ್ನಾ
ಕಾಂಪ್ತಾ ಭುಂಯ್ ಪಡ್ತಾತ್ ಬಾಂದ್ಪಾಂ ಪ್ರಥ್ವಿಚ್ ಜಾಲ್ಯಾ ರಾಗಿಷ್ಟ್
ಕಾಳಿಂ ಕುಪಾಂ ದರ್ಯಾ ಲಾರಾಂ ಉಚಾಂಬಳಾಯ್ ತಡ್ವುಂಕ್ ಕಾಂಯ್ ನಾ
ಪರತ್ ಬಾಳ್ಕಾ ಜಲ್ಮೊನ್ ಯೇ ಘುಂವ್ಡಾವ್ನ್ ಮನ್ಶಾ-ದೀಷ್ಟ್

ವಾಡಾ ಚಡಾ ಆದೇಶ್ ತುಜೊ ಭರಾ ಸಗ್ಳೊ ಸಂಸಾರ್
ಭರ್ಲ್ಯಾತ್ ರಸ್ತೆ ಶಹರಾಂ ಹಳ್ಳ್ಯೊ ವಿದ್ರೂಪ್ ಜಾಲ್ಯಾ ಸ್ಟೃ
ಮನಿಸ್ ಬೊಲ್ಪೊ ಜಾಲಾ ಕುರ್ಡೊ ಧರ್ಮಾ ನಾಂವಾನ್ ದೆಂವ್ಚಾರ್
ನಾ ಶಾಂತಿ, ಝಗ್ಡೆಂ ಖುನಿ, ರಾಜ್-ನೀತ್ ಖರಿಚ್ ಭ್ಟೆ

ಆಯ್ಚಾ ಸಂಸ್ರಾಕ್ ಜಾಯ್ ತುಂ ಜಾಯ್ ದೈವೀಕ್ ತುಜಿಂ ಮೊಲಾಂ
ಮೋಗ್ ಶಾಂತಿ ಭರ್ವಸ್ ಕಾಳ್ಜಾಂತ್ ಕುಟ್ಮಾಂತ್ ಸಂತೊಸ್ ಖರೊ
ನವಿ ಸಮಾಜ್ ಬಾಂಧುಂಕ್-ರಾಕೊಂಕ್ ಪಾಟಯ್ ತುಜಿಂ ತೆಲಾಂ
ಪರತ್ ಬಾಳ್ಕಾ ಜಲ್ಮೊನ್ ಯೇ ಕರುನ್ ಮಾಕಾಯ್ ಮನಿಸ್ ಬರೊ 

ಕವಿತಾಝರ್ - 188

- ಸಿರಿಲ್ ವಾಜ್, ಬೆಂಗ್ಳುರ್

ಕವಿ ಜೆದ್ನಾಂ ಅಪ್ಲ್ಯಾ ಬರ್ಪಾಂನಿ ಅಸ್ಕತ್ ಮನ್ಶ್ಯಾಂಚೊ ತಾಳೋ ಜಾತಾ, ತವಳ್ ಉದೆಂವ್ಚೆಂ ಕವಿತಾ ಜಿಣ್ಯೆಲಿಸಾಂವ್ ಜಾಂವ್ಕ್ ಸಕ್ತಾ ಮ್ಹಣ್ಚ್ಯಾಕ್ ಹೆಂ ಕವಿತಾ ಗೊವಾಯ್.

ಕವಿತಾಝರ್ ಪಾನಾಕ್

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications