ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಮೊಂತಿ ಫೆಸ್ತ್ ಆನಿ ಮಿರ್ನ್ಯಾಮ್
ವಲ್ಲಿ ವಗ್ಗ: ಕೊಂಕ್ಣೆಂತ್ ಉಂಚ್ಲ್ಯೊ ಮಟ್ವ್ಯೊ ಕಾಣ್ಯೊ ಬರಂವ್ಚಾಂತ್ಲೊ ಎಕ್ಲೊ ಜಾವ್ನಾಸಾ ವಲ್ಲಿ ವಗ್ಗ. ಹೊ ಕೊಂಕ್ಣಿ ಮಾತ್ರ್ ನ್ಹಂಯ್, ಕಾನಡಿ ಭಾಸೆಂತ್ಯ್ ಕಾಣ್ಯೊ ಬರಂವ್ಚಾಂತ್ ಫಾಮಾದ್ ಜಾಲಾ. ಕಾನಡಿ ಭಾಸೆಂತ್ ರಾಜ್ಯ್ ಮಟ್ಟಾರ್ ಪಯ್ಲೆಂ ಇನಾಮ್ ಜೊಡ್ಲೆಲ್ಯಾ ಕಾಣ್ಯೆಚೆಂ (ಹೆಗಲಿಗೆ ಶಿಲುಬೆ) ಕೊಂಕ್ಣೆಚೆಂ ಅನುವಾದ್ ಹಿ ಕಾಣಿ ವಾಚ್ತಾಂ ವಾಚ್ತಾಂ ಹ್ಯಾ ಕಾಣ್ಯೆಚಿ ತಶೆಂಚ್ ಕಾಣ್ಯೆಗಾರಾಚಿ ತಾಂಕ್ ತುಮ್ಕಾಂ ಸಮ್ಜೊಂಕ್ ಪುರೊ.
ವಲ್ಲಿ ವಗ್ಗಚ್ಯೊ ಹೆರ್ ಮಟ್ವ್ಯೊ ಕಾಣ್ಯೊ: ಖಾಂದಿ ಖುರಿಸ್
ವಲ್ಲಿ ವಗ್ಗ
ಸರ್ಜಿಕಲ್ ವಾರ್ಡ್.
ಕಾಂಪ್ಚೆ ಪಾಂಯ್ ಸಾಂಭಾಳ್ನ್ ಎಕ್ವೀಸ್ ನಂಬ್ರಾಚೆ ಖಾಟ್ಯೆ ಸರ್ಶಿಂ ಹಾಂವ್ ಪಾವ್ಲೊಂ.
ಗೊಮ್ಟೊಭರ್ ಧವೆಂ ವಸ್ತುರ್ ಪಾಂಗ್ರುನ್ ಆಸ್ಚ್ಯಾ ಮಿರ್ನ್ಯಾಮಾಚ್ಯಾ ಮುಖಮಳಾರ್ ಮ್ಹಜಿ ದೀಷ್ಟ್ ಪಡ್ತಾನಾ, ಅವೆಕ್ತ್ ರಿತಿನ್ ಮ್ಹಜೆಂ ಕಾಳಿಜ್ ದುಖ್ಲೆಂ!
"ಅಳೆ ಆನಾ, ಹೆರಿ ಆಯ್ಲಾ" ಮೆಲ್ವಿನ್ ಆಪ್ಲ್ಯಾ ಬಾಪಾಯ್ಚ್ಯಾ ಕಾನಾಂತ್ ಪುಸ್ಪುಸ್ಲೊ.
ದೋನ್, ತೀನ್ ಪಾವ್ಟಿಂ ತಿಂಚ್ ಉತ್ರಾಂ ತಾಣೆಂ ಉಚಾರ್ತಚ್, ತಾಣೆಂ ದೊಳೆ ಉಘಡ್ಲೆ.
"ಮಿರ್ನ್ಯಾಮಾ.." ಕಾಂಪೆರೆ ಸಬ್ದ್ ಹಾಂವೆಂ ಘಡ್ಸಿಲೆ. "ತುಂ ಕಸೊ ಆಸಾಯ್..?"
ತಾಣೆಂ ಮ್ಹಾಕಾ ಸಂತೊಸಾಚ್ಯಾ ಉಮಾಳ್ಯಾಂನಿ ಭರೊನ್ ಮ್ಹಳ್ಳೆಬರಿ, ಮೊಗಾಭರಿತ್ ದಿಷ್ಟಿನ್ ಚೊಯ್ಲೆಂ.
"ತುಂ ಆಯ್ಲೊಯ್ ಪುತಾ?"
"ವ್ಹಯ್ ಮಿರ್ನ್ಯಾಮಾ"
"ತೆದ್ನಾಂ ತುಂ ಬಾರಾ ವ ತೆರಾ ವರ್ಸಾಂಚೊ ಭುರ್ಗೊ. ಮೊಂತಿ ಸಾಯ್ಬಿಣಿಚ್ಯಾ ಫೆಸ್ತಾ ದಿಸಾ.."
"ತ್ಯಾ ವಿಶಿಂ ಮ್ಹಾಕಾ ಬರೊ ಉಡಾಸ್ ಆಸಾ. ತೆಚ್ಚ್ ಖಾತಿರ್ ತುವೆಂ ಮ್ಹಾಕಾ ಆಪಂವ್ಕ್ ಧಾಡ್ಲೊಯ್?"
"ರಾಗ್ ಕರಿನಾಸ್ತಾಂ ದಯಾಕರುನ್ ಮ್ಹಾಕಾ ಸಮ್ಜೊಂಕ್ ಪ್ರೇತನ್ ಕರ್ ಪುತಾ. ತಿ ಚೂಕ್ ಮ್ಹಜಿಚ್!"
"ನಾ ಮಿರ್ನ್ಯಾಮಾ" ಖತ್ಕತ್ಯಾ ಪಶ್ಚಾತಾಪಾನ್ ಹಾಂವೆಂ ಮ್ಹಳೆಂ.
"ತೆದ್ನಾಂ ಹಾಂವ್ ಪೊಕ್ರಿ ಆನಿ ಹಟ್ಟಿ ಭುರ್ಗೊ ಜಾವ್ನಾಸ್ಲ್ಲೊಂ. ಪೂಣ್ ಆತಾಂ ಮ್ಹಾಕಾ ಪಂಚ್ವೀಸ್ ವರ್ಸಾಂ ಭರ್ಲ್ಯಾಂತ್. ಮ್ಹಾಕಾ ಆತಾಂ ಮ್ಹಜಿ ಚೂಕ್ ಸಮ್ಜತಾ."
******
ಮೊಂತಿಚೆಂ ಫೆಸ್ತ್!
ಚಡ್ ಕರುನ್, ಸರ್ವ್ ಭುರ್ಗ್ಯಾಂಕ್ ವರ್ತ್ಯಾ ಸಂತೊಸಾಚೊ ದೀಸ್!
ಹಾಂವ್ಯಿ ತ್ಯಾ ದಿಸಾ ಭುರ್ಗ್ಯಾಪಣಾಚೆ ಉಮೆದಿನ್ ’ಸಕ್ಡಾಂಪ್ರಾಸ್ ಚಡ್ ನವೆಂ ಘೆತಲೊಂ’ ಮ್ಹಳ್ಳಿಂ ಚಿಂತ್ನಾಂ ಆಟವ್ನ್, ಮಿಸಾಕ್ ಗೆಲೊಂ.
ಸಗ್ಳಿ ಪವಿತ್ರ್ ಸೆರೆಮನಿ ಸಂಪ್ತಚ್, ಲೊಕಾಕ್ ನವೆಂ ವಾಂಟ್ಚಿ ಸರ್ತಿ ಯೆತಾನಾ, ಮ್ಹಜಿ ಪೊಕ್ರಿ ಆಶಾ ಘೆವ್ನ್, ಹಾಂವ್ ಮುಕಾರ್ ಧಾಂವ್ಲೊಂ.
ಮಿರ್ನ್ಯಾಮ್ ಆನಿ ಹೆರ್ ಥೊಡೆ ಮಾನೆಸ್ತ್ ಲೊಕಾಕ್ ನವೆಂ ವಾಂಟ್ತಾಲೆ.
ಮ್ಹಾಕಾ ಎಕ್ಲ್ಯಾನ್ ದೋನ್ ಕಣ್ಶ್ಯೊ ದಿಲ್ಯೊ. ಪೂಣ್ ತಿತ್ಲ್ಯಾರ್ ಹಾಂವ್ ತೃಪ್ತಿ ಜಾಲೊಂನಾ. ತ್ಯೊ ಕಣ್ಶ್ಯೊ ದಾವ್ಯಾ ಹಾತಾಕ್ ಬದ್ಲುನ್, ಉಜ್ವೊ ಹಾತ್ ಫಿರ್ಗಜೆಚ್ಯಾ ಮಿರ್ನ್ಯಾಮಾ ಕುಶಿನ್ ವೊಡ್ಡಾಯ್ಲೊ.
ಆಪ್ಲ್ಯಾ ಹಾತಿಂ ಆಸ್ಚ್ಯಾ ಮೂಟ್ಭರ್ ಕಣ್ಶ್ಯಾಂ ಪಯ್ಕಿ, ದೋನ್ ತೀನ್ ವಿಂಚುನ್, ಮ್ಹಾಕಾ ದಿತಾಂ ಮ್ಹಣ್ತಾನಾ, ತಾಚಿ ದಿಷ್ಟ್ ಮ್ಹಜ್ಯಾ ದಾವ್ಯಾ ಹಾತಾಚೆರ್ ಪಡ್ಲಿ.
ನವೆಂ ಘೆಂವ್ಕ್ ಒದ್ದಾಡ್ಚ್ಯಾ ಭುರ್ಗ್ಯಾಂಚೆಂ ಉರ್ಡೊಣೆ ನಿಮ್ತಿಂ, ತೊ ಪಯ್ಲೊಚ್ ಗರಮ್ ಆಸ್ಲ್ಲೊ ಜಾವ್ಯೆತ್.
"ತಿತ್ಲಿಂ ಆತಾಂ ತುಕಾ ಪಾವಾನಾಂತ್ವೆರೆ? ತಾಚಿ ರಾಗಿಷ್ಟ್ ದಿಷ್ಟ್ ದೆಕೊನ್ ಹಾಂವ್ ಭಿಯೆಲೊಂ ನಾ.
"ಮ್ಹಾಕಾ ಅನಿಕ್ಯಿ ಜಾಯ್" ಧಯ್ರಾನ್ ಮ್ಹಳೆಂ ಹಾಂವೆಂ.
ತಿತ್ಲ್ಯಾರ್ ತಾಚೊ ಉಜ್ವೊ ಹಾತ್ ಮ್ಹಜ್ಯಾ ಕಾನಾಚೆರ್ ಬಸ್ಲೊ ಆನಿ ತಾಣೆಂ ಮ್ಹಜೊ ಕಾನ್ ವೊಳಾಯ್ಲೊ!
ಮ್ಹಾಕಾ ಚಡ್ ದುಖೊಂಕ್ ನಾ ತರ್ಯಿ, ಮ್ಹಜ್ಯಾ ಗರ್ವಾಕ್ ದುಖ್ಲೆಂ!
ಮ್ಹಜೊ ಪಪ್ಪಾ, ಕಾಪ್ಯೆ ತೊಟಾಚೊ ಸಾವ್ಕಾರ್ ಆನಿ ಹಾಂವ್ ತೆಗಾಂ ಭಯ್ಣಿಂಕ್ ನಿಮಾಣೊ ಎಕ್ಲೊಚ್ ಕೊಂಡಾಟ್ಯಾಚೊ ಭಾವ್!
ಚುಕೊನ್ ತರ್ಯಿ, ಘರಾ ಮ್ಹಾಕಾ ಎಕ್ಚ್ಚ್ ಏಕ್ ಮಾರ್ ಪಡ್ಲ್ಲೊ ನಾ.
ರಾಗಾನ್ ಹಾಂವ್ ತಾಂಬ್ಶೆಲೊಂ.
ಹಾತಾಂತ್ಲ್ಯೊ ಕಣ್ಶ್ಯೊ ಧರ್ಣಿರ್ ಉಡವ್ನ್, ಅನಿಕ್ಯಿ ಮ್ಹಜ್ಯಾ ಕಾನಾಕ್ ಧರುನ್ ಆಸ್ಚೊ ಮಿರ್ನ್ಯಾಮಾಚೊ ಹಾತ್ ಹಾಂವೆಂ ಪಾಪುಡ್ನ್ ಕಾಡ್ಲೊ.
"ಬೆಂಜಾರ್ ಭಾತ್ ಧರ್ಣಿರ್ ಶಿಂಪ್ಡಾಯ್ತಾಯ್ರೆ ಚೊರಾ?" ಮಿರ್ನ್ಯಾಮಾನ್ ವಯ್ಲ್ಯಾ ವಯ್ರ್ ದೋನ್ ಚಾರ್ ಕುಟಿ ಮ್ಹಜೆ ತಕ್ಲೆರ್ ಬಸಯ್ಲ್ಯೊ.
ಮ್ಹಜ್ಯಾ ಭುರ್ಗ್ಯಾಪಣಾಕ್ ಹಾಂವ್ ವಿಸರ್ಲೊಂ. ರಾಗಾ ಆನಿ ಸ್ವಹಂಕಾರಾಚ್ಯಾ ಪ್ರಭಾವಾನ್, ಹಾಂವೆಂ ಕಿತೆಂ ಕೆಲೆಂ ಮ್ಹಣ್ ಮ್ಹಾಕಾಚ್ ಕಳ್ಳೆಂನಾ.
ಮಿರ್ನ್ಯಾಮಾಚ್ಯಾ ಉಜ್ವ್ಯಾ ಬಾವ್ಳ್ಯಾಕ್ ಪಾಟಾಪಾಟ್ ದೋನ್ ತೀನ್ ಮಾರ್ ಹಾಂವೆಂ ಬಸಯ್ಲೆ.
ಮಿರ್ನ್ಯಾಮ್ ರಾಗಾನ್ ಕಾಂಪ್ಲೊ!
ಥಂಯ್ಸರ್ ಜಮೊ ಆಸ್ಲ್ಲೊ ಲೋಕ್ ಹೆಂ ಘಡಿತ್ ಪಳೆವ್ನ್, ಶೆರ್ಮೆತಾನಾ ಮಿರ್ನ್ಯಾಮಾನ್, ಮ್ಹಾಕಾ, ವಿಗಾರಾಚ್ಯಾ ಘರಾ ಕುಶಿನ್ ಬುರ್ಬುರ್ಯಾಂ ವೊಡುನ್ ವ್ಹರುನ್ ಝಡ್ತೆಕ್ ಉಬೊ ಕೆಲೊ.
ಮ್ಹಜಿ ಬರಿಚ್ ಝಡ್ತಿ ಜಾಲಿ!
ಫಿರ್ಗಜೆಚ್ಯಾ ಲೊಕಾ ಸಾಮ್ಕಾರ್ ಪಾದ್ರ್ಯಾಬಾನ್ ಮ್ಹಜಿ ಝಡ್ತಿ ಕೆಲಿ. "ತುಂ ಕಿತೆಂ ಗೊಲಿಯಾತ್ವೆರೆ?" ಮ್ಹಣ್ ಗೊರೊಜ್ ಮಾರುನ್ ಬರೊಚ್ ಏಕ್ ಮಾರ್ ಬಸಯ್ಲೊ.
ದಾಂರ್ ಚಾಬೊನ್ ಧರುನ್, ಉಸ್ಮಡ್ಲೊಂ ಹಾಂವ್. ವಿಗಾರಾಚ್ಯಾ ಮಾರಾನಿಮ್ತಿಂ, ರಾಗಾನ್ ತಾಂಬ್ಡೊ ಜಾಲೊಂ.
ವಿಚಿತ್ರ್ ಉದ್ವೇಗಾಂನಿ ಹಾಂವ್ ಫುಮಾರ್ ಜಾಲೊಂ. ಮ್ಹಜೆಂ ರಗತ್ ಶಿಜ್ತಾಶೆಂ ಮ್ಹಾಕಾ ಭಗ್ಲೆಂ. ಚೂಕ್ ಮ್ಹಜಿಚ್ ವ್ಹಯ್, ತರ್ಯಿ, ತಿ ವಳ್ಕೊಂಕ್ ಹಾಂವ್ ಕಬೂಲ್ ಜಾಲೊಂನಾ.
ಚಡ್ ಕರುನ್, ಹ್ಯಾ ಘಡಿತಾಕ್ ಪ್ರಥಮ್ ಕಾರಣ್ ಜಾವ್ನಾಸ್ಚ್ಯಾ ಮಿರ್ನ್ಯಾಮಾಚೆರ್ ಫಾರಿಕ್ಪಣಾಚಿಂ ಚಿಂತ್ನಾಂ ಮ್ಹಜೆ ಥಂಯ್ ರೂಪಿತ್ ಜಾಲಿಂ.
"ತೊ ಮಿರ್ನ್ಯಾಮ್ ಆಸ್ತಾ ಪರ್ಯಾಂತ್ ಹಾಂವ್ ಆನಿ ಇಗರ್ಜೆಕ್ ವೆಚೊಂನಾ" ಘರಾ ಪಾವ್ತಚ್, ಮಾಂಯ್ಚೆ ವೆಂಗೆಂತ್ ರಿಗೊನ್ ಹಾಂವ್ ರಡ್ಲೊಂ. "ತಾಚೆ ಲಾಗಿಂ ಥೊಡ್ಯೊಚ್ ಕಣ್ಚ್ಶೊ ಹಾಂವೆಂ ವಿಚಾರ್ಲೆಲ್ಯಾಕ್, ಪಾದ್ರ್ಯಾಬಾ ಕರ್ನಾ ತಾಣೆಂ ಮ್ಹಾಕಾ ಮಾರಯ್ಲೆಂ!"
*****
ಆಯ್ತಾರ್ ಉದೆತಾನಾ, ನಿಜಾಕ್ಯಿ ಆಮ್ಚ್ಯಾ ಘರ್ಚಿಂ ಸರ್ವಾಂ ಮ್ಹಜ್ಯಾ ಹಠಾ ಥಂಯ್ ಅಜ್ಯಾಪ್ ಪಾವ್ಲಿಂ.
ಕಶೆಂ ಕಶೆಂ ಸಮ್ಜಾಯ್ಲ್ಯಾರ್ಯಿ, ಸಮಧಾನಾನ್ ಫುಸ್ಲ್ಯಾಯ್ಲ್ಯಾರ್ಯಿ, ಹಾಂವ್ ಇಗರ್ಜೆಕ್ ವಚೊಂಕ್ ತಯಾರ್ ಜಾಲೊಂ ನಾ. ಮಾರ್ಲ್ಯಾರ್ಯಿ ಹಾಂವ್ ಆಯ್ಕಲೊಂನಾ.
ತೆ ಸಾಂಜೆರ್ ವಿಗಾರ್ ಆಮ್ಚ್ಯಾ ಘರಾ ಆಯ್ಲೊ. ಪಪ್ಪಾನ್ ತಾಕಾ ಮ್ಹಜಿ ಗಜಾಲ್ ಸರ್ವ್ ವಿವರಿಲಿ ಮ್ಹಣ್ ದಿಸ್ತಾ.
"ಹೆರಿ, ಹಾಂಗಾ ಯೇ ಪುತಾ!" ತಾಣೆಂ ಮ್ಹಾಕಾ ಮೊಗಾನ್ ಆಪಯ್ಲೊ. ಹಾಂವ್ ಗೆಲೊಂ.
"ತುಂಂ ಆಜ್ ಮಿಸಾಕ್ ಯೇಂವ್ಕ್ ನಾಂಯ್"
"ನಾ"
"ಪುಣ್ ಕಿತ್ಯಾಕ್?"
"ತೊ ಮಿರ್ನ್ಯಾಮ್ ಆಸ್ತಾ ಪರ್ಯಾಂತ್ ಇಗರ್ಜೆಕ್ ಹಾಂವ್ ಯೆಂವ್ಚೊಂ ನಾ"
"ಮಿರ್ನ್ಯಾಮ್ ಬರೊ ಮನಿಸ್ ಪುತಾ. ತಾಣೆಂ ತುಕಾ ಕಾಂಯ್ ಕರುಂಕ್ ನಾ ನ್ಹಂಯ್ಗಿ? ಹಾಂವೆಂ ಜಾಲ್ಯಾರ್ ತುಕಾ ಮಾರ್ಲಾಂ"
ಹಾಂವ್ ವಗೊಚ್ ರಾವ್ಲೊಂ
"ಯೆಂವ್ಚ್ಯಾ ಆಯ್ತಾರಾ ಖಂಡಿತ್ ಯೆತಾಯ್ಮೂ?"
ಥೊಡೆ ವೇಳ್ ಹಾಂವ್ ಚಿಂತುಂಕ್ ಪಡ್ಲೊಂ.
"ನಾ"
ಕೋಣ್ಚ್ ಮ್ಹಜೆಂ ಹಟ್ ಬದ್ಲುಂಖ್ ಸಕ್ಲೆನಾಂತ್!
ಪಪ್ಪಾ ಮ್ಹಾಕಾ ಮಾರುಂಕ್ ಉಟ್ತಾನಾ ಪಾದ್ರ್ಯಾಬಾನ್ ಆಡಾಯ್ಲೆಂ.
"ಭುರ್ಗ್ಯಾಂಚಿ ಗಜಾಲ್ ನ್ಹಂಯ್ಗಿ" ತೊ ಮ್ಹಣಾಲೊ. "ತೆ ಆತ್ತಾಂ ಕಿತೆಂ ಕರ್ತಾತ್, ಉಲಯ್ತಾತ್, ಅನ್ಯೇಕ್ ಘಡಿಯೆ ಬೊಲ್ತೆಂಚ್ ತಾಂಚೆಂ ರಾಜಾಂವ್. ಹೆರಿ ಬದ್ಲಾತೊಲೊ!"
ಪೂಣ್ ಹಾಂವ್ ಬದಲ್ಲೊಂ ನಾ.
"ತೊ ಮಿರ್ನ್ಯಾಮ್ ಆಸ್ತಾ ಪರ್ಯಾಂತ್ ತೆ ಇಗರ್ಜೆಕ್ ಪಾಂಯ್ ದವರ್ಚೊನಾ. ತಾಣೆಂ ಕಿತ್ಲೆಶ್ಯಾ ಲೊಕಾ ಮುಕಾರ್ ಮ್ಹಜೊ ಕಾನ್ ವೊಳಾಯ್ಲಾ" ಮ್ಹಜೊ ನಿಚೆವ್ ಹಾಂವೆಂ ಥಿರ್ ಕೆಲೊ.
ಮ್ಹಜೆಂ ಹಟ್ ಸಬಾರಾಂಕ್ ತಕ್ಲೆ ಫಡಾಫಡಿಚೆಂ ಜಾಲೆಂ. ಕಿತ್ಲೆಶೆ ಜಣ್ ಮ್ಹಜೊ ನಿಚೆವ್ ಬದ್ಲುಂಕ್ ಪ್ರೇತನ್ ಕರುನ್ ಸಲ್ವಾಲೆ.
ಮಿರ್ನ್ಯಾಮಾ ವಿಶಿಂ ಚಿಂತ್ತಾನಾ ರಾಗಾನ್ ಹಾಂವ್ ಕಾಂಪ್ತಾಲೊಂ. ತಶೆಂ ಕಿತ್ಯಾಕ್ ಹಾಂವ್ ತಾಕಾ ಕಾಂಟಾಳ್ತಾಂ ಮ್ಹಣ್ ತಜ್ವೀಜ್ ಕರುಂಕ್ ಸಯ್ತ್ ಮ್ಹಾಕಾ ಖುಶಿ ನಾತ್ಲ್ಲಿ.
ದೋನ್, ತೀನ್ ಮಹಿನೆ ಉತರ್ಲೆ ಆನಿ ಹೆ ಆವ್ದೆಂತ್ ಹಾಂವ್ ಎಕಾ ಆಯ್ತಾರಾ ಪುಣ್ಯಿ ಮಿಸಾಕ್ ಗೆಲೊಂನಾ.
ಘರ್ಚ್ಯಾಂನಿಯ್ ಮ್ಹಾಕಾ ಮಾರ್ಚೆಂ ರಾವಯ್ಲೆಂ.
ಆನಿ ಆತಾಂ ಮಿಸಾಕ್ ವಚನಾಸ್ತಾಂ ರಾಂವ್ಚೆಂ ಮ್ಹಳ್ಯಾರ್, ಮ್ಹಾಕಾ ಸದಾಂಚಿ ಸವಯ್ ಜಾವ್ನ್ ಗೆಲಿ.
ಪೂಣ್ ತ್ಯಾ ಆಯ್ತಾರಾ, ಸಕಾಳಿಂ ಉಟ್ಲ್ಲೊಚ್ ಪಪ್ಪಾ ಮ್ಹಜೆ ಸರ್ಶಿಂ ಆಯ್ಲೊ.
"ಆಜ್ ತುಂವೆಂ ಇಗರ್ಜೆಕ್ ಯೇಂವ್ಕ್ ಆಸಾ" ತಾಣೆಂ ಮ್ಹಳೆಂ
ವ್ಹಯ್ ಮ್ಹಾಕಾ ಇಗರ್ಜೆಕ್ ವಚೊಂಕ್ ಆಸ್ಲ್ಲೆಂ.
ಮಿರ್ನ್ಯಾಮ್ ಆಪ್ಲೆ ಸ್ವಂತ್ ಖುಶೆನ್ ಘರ್ದಾರ್ ಸಮೇತ್ ದುಸ್ರೆ ಫಿರ್ಗಜೆಕ್ ಗೆಲ್ಲೊ ಆನಿ ಥಂಯ್ಚೊ ಹಾಂಗಾ ಆಯಿಲ್ಲೊ.
*******
ಮ್ಹಜಿ ಪ್ರಾಯ್ ತೆರಾ ಥಾವ್ನ್ ಪಂಚ್ವೀಸಾಂಚೆರ್ ಪಾವ್ಲಿ.
ಹ್ಯಾ ಆವ್ದೆಂತ್ ತವಳ್ ತವಳ್, ತ್ಯಾಚ್ ಮಿರ್ನ್ಯಾಮಾ ವಿಶ್ಯಾಂತ್ಲಿಂ ಚಿಂತ್ನಾಂ ಮ್ಹಾಕಾ ಧೊಸ್ತಾಲಿಂ.
ಚಡ್ ಕರುನ್ ವರ್ಸಾ ವರ್ಸಾ ಧಾಂವೊನ್ ಯೆಂವ್ಚ್ಯಾ ಮೊಂತಿ ಮಾಯೆಚ್ಯಾ ಫೆಸ್ತಾ ದಿಸಾ ತೆಂ ಭುರ್ಗ್ಯಾಪಣಾಚೆಂ ಮ್ಹಜೆಂ ಹರ್ ಆನಿ ಗರ್ವ್ ಮ್ಹಾಕಾ ದಗ್ದಿತಾಲೆಂ. ಆತಾಂ ತ್ಯಾ ಮಿರ್ನ್ಯಾಮಾಕ್ ಸೊದುನ್ ತಾಚೆ ಲಾಗ್ಚೆಂ ಭೊಗ್ಸಾಣೆಂ ಮಾಗಾಜೆ ಮ್ಹಣ್ ಹಾಂವ್ ಆಶೆತಾಲೊಂ.
ಪೂಣ್ ತಿ ಆಶಾ ಜ್ಯಾರಿ ಕರುನ್ ಘೆಂವ್ಚೆ ತಿತ್ಲೆಂ ಧಯ್ರ್ ಮ್ಹಾಕಾ ನಾತ್ಲ್ಲೆಂ. ತರ್ಯಿ ಅಸಲೊ ಏಕ್ ಸಂದರ್ಭ್ ಮ್ಹಾಕಾ ಸೊದುನ್ ಆಯ್ಲೊ.
ತ್ಯಾ ದಿಸಾ ಆಮ್ಚ್ಯಾ ತೊಟಾಕ್ ವಚೊನ್ ಪಾಟಿಂ ಆಯ್ಲ್ಲೊಂ ಹಾಂವ್, ಪುರಾಸಾಣೆನ್ ಮೇಟ್ ಚಡ್ತಾನಾ,
ಎಕ್ಲೊ ತರ್ನಾಟೊ ಮ್ಹಾಕಾ ರಾಕೊನ್ ಆಸ್ಲ್ಲೊ. ಮಮ್ಮಾ ತಾಚೆಲಾಗಿಂ ಉಲವ್ನ್ ಬ್ವಸ್ಲ್ಲಿ.
"ಹಾಚಿ ವಳೊಕ್ ಮೆಳ್ಳಿವೆರೆ ತುಕಾ?" ತಿಣೆ ವಿಚಾರ್ಲೆಂ.
"ಖಂಯ್ಗಿ ಪಳೆಲ್ಲೆ ಬರಿ ಜಾತಾ!"
"ತುಜೊ ತೊ ಮಿರ್ನ್ಯಾಮ್ ಆಸ್ಲ್ಲೊ ಪಳೆ ತಾಚೊ ಪೂತ್ ಮೆಲ್ವಿನ್"
"ಓ...! ಮೆಲ್ವಿನ್? ಆಮಿ ಪಯ್ಲೆಂ ಎಕಾಚ್ ಕ್ಲಾಶಿಂತ್ ಶಿಕ್ತಲ್ಯಾಂವ್" ಹಾಂವ್ ಏಕ್ ಕದೆಲ್ ವೊಡುನ್ ತಾಚೆ ಸಾಮ್ಕಾರ್ ಬಸ್ಲೊಂ.
"ತುಜೊ ಆನ್ ಕಸೊ ಆಸಾ?"
"ತೊ ಆಸ್ಪತ್ರೆಂತ್ ಆಸಾ" ತಾಚೊ ತಾಳೊ ಮೋವ್ ಜಾಲೊ.
"ಆಸ್ಪತ್ರೆಂತ್..?"
"ವ್ಹಯ್.. ಆನಾಕ್ ಕೆನ್ಸರ್. ಆನಿ ತೊ ತೆ ಪಿಡೆಂತ್ ಎಕಾ ವರ್ಸಾ ಥಾವ್ನ್ ವೊಳ್ವಳ್ತಾ"
ಕಿತೆಂಚ್ ಉಲಂವ್ಕ್ ಮ್ಹಜೆ ವೊಂಟ್ ಉಗ್ತೆ ಜಾಲೆನಾಂತ್"
"ತೊ ಆತಾಮ್ ತುಕಾ ಪಳೆಂವ್ಕ್ ಆಶೆತಾ. ತುಜೆ ಲಾಗ್ಚೆಂ ತಾಕಾ ಭೊಗ್ಸಾಣೆಂ ಮಾಗೊಂಕ್ ಆಶಾ ಕಂಯ್."
ತಾಚಿಂ ತಿಂ ಉತ್ರಾಂ ಮ್ಹಜೆಂ ಕಾಳಿಜ್ ಶಿಂದುಂಕ್ ಪಾವ್ಲಿಂ.
"ನಾ ಮೆಲ್ವಿನ್.. ತಾಣೆಂ ಮ್ಹಜೆಲಾಗ್ಚೆಂ ಭೊಗ್ಸಾಣೆಂ ಮಾಗ್ಚೆಂ ನ್ಹಂಯ್, ಹಾಂವೆಂ ತಾಚೆಲಾಗಿಂ ಮಾಫಿ ಮಾಗೊಂಕ್ ಆಸಾ’ ತ್ಯಾ ವೆಳಾ ಮ್ಹಜ್ಯಾ ದೊಳ್ಯಾಂನಿ ದುಖಾಂ ಭರ್ಲಿಂ. "ಚಲ್ ಯಾ, ಆತಾಂಚ್ ಮ್ಹಾಕಾ ತುಜ್ಯಾ ಆನಾಕ್ ಪಳೆಜೆ."
*****
ಸರ್ಜಿಕಲ್ ವಾರ್ಡಾ ಮುಕಾರ್, ಕಾರ್ ಹಾಂವೆಂ ರಾವಯ್ಲೆಂ. ಮೆಲ್ವಿನ್ ದೆಂವ್ತಚ್, ದಡ್ದಡ್ಯಾ ಕಾಳ್ಜಾಸವೆಂ ತಾಚೊ ಹಾಂವೆಂ ಪಾಟ್ಲಾವ್ ಕೆಲ್ಲೊ.
"ಥೊಡ್ಯೊಚ್ ಕಣ್ಶ್ಯೊ ತುಜೆ ಆನಿ ಮ್ಹಜೆ ಮಧೆಂ ಏಕ್ ಪಾಗೊರ್ ಜಾವ್ನ್ ಉಭ್ಯೊ ಜಾಲ್ಲ್ಯೊ."
"ತಶೆಂ ಮ್ಹಣಾನಾಕಾ ಮಿರ್ನ್ಯಾಮಾ, ಕಣ್ಶ್ಯೊ ನ್ಹಂಯ್, ಬಗರ್ ಮ್ಹಜೆಂ ಹಟ್ಚ್ಚ್ ಆಮ್ಚೆ ಮದೆಂ ತಲ್ವಾರ್ ಜಾವ್ನ್ ಉಬಿ ಜಾಲ್ಲಿ. ಆನಿ ಆತಾಂ ಹಾಂವ್ ತೆ ಮ್ಹಜೆ ಚುಕಿ ಖಾತಿರ್ ಖರ್ಯಾ ಕಾಳ್ಜಾನ್ ಪಶ್ಚಾತ್ತಾಪ್ ಪಾವ್ತಾಂ.."
"ತೊ ಮಿರ್ನ್ಯಾಮ್ ಆಸ್ತಾ ಪರ್ಯಾಂತ್, ಹಾಂವ್ ಇಗರ್ಜೆಕ್ ವೆಚೊಂನಾ ಮ್ಹಣ್ ತುವೆಂ ಹಟ್ ಧರ್ಲ್ಲೆಂಯ್. ತ್ಯಾ ದೆಕುನ್ ತುಮ್ಚಿ ಫಿರ್ಗಜ್ ಹಾಂವೆಂ ಸಾಂಡ್ಲಿ. ಆನಿ ಆತಾಂ ಹಾಂವೆಂ ಜೊ ಸಂಸಾರ್ ಸಾಂಡ್ಚಿ ವೇಳ್ಘಡಿ ಲಾಗಿಂ ಪಾವ್ಲ್ಯಾ."
"ತಶೆಂ ಉಲಯ್ನಾಕಾ ಮಿರ್ನ್ಯಾಮಾ, ತಶೆಂ ಉಲಯ್ನಾಕಾ" ಕಾಳ್ಜಾಚೆ ಗುಂಡಾಯೆ ಥಾವ್ನ್ ತಿಂ ಉತ್ರಾಂ ಹಾಂವೆಂ ಉಚಾರ್ಲಿಂ.
"ತುಂ ವಾಂಚ್ತಲೊಯ್, ಖಂಡಿತ್ ಜಾವ್ನ್ ವಾಂಚ್ತಲೊಯ್."
*****
ಮಿರ್ನ್ಯಾಮಾಕ್ ’ತುಂ ವಾಂಚ್ತಲೊಯ್’ ಮ್ಹಣ್ ಹಾಂವೆಂ ಮ್ಹಳೆಂ.
ಪುಣ್ ಕೆನ್ಸರ್ ಪಿಡೆನ್ ತಾಕಾ ಗ್ರಾಸುನ್ ಸೊಡ್ಲೊ ಆನಿ ಸಂಸಾರಾಕ್ ಅಂತರ್ಲೊ.
ಹಾಂವ್ ಮಾತ್ ಹಟ್, ರಾಗ್, ಜಿದ್ದ್ ಆನಿ ಫಾರಿಕ್ಪಣ್ ಸಾಂಡುನ್ ಸಾದೊ ಬೊಳೊ ಜಾಲಾಂ.
ಸದಾಮ್ಚ್ ಮ್ಹಳ್ಳೆಪರಿಂ ಮಿರ್ನ್ಯಾಮಾಚೊ ಹಾಂವ್ ಉಡಾಸ್ ಕಾಡ್ತಾಂ. ಮೊಂತಿ ಸಾಯ್ಭಿಣಿಚೆಂ ಫೆಸ್ತ್ ಆಯ್ಲೆಂ ಮ್ಹಣ್ತಾನಾ, ಹೊ ಉಡಾಸ್ ಚಡ್ ಧೊಸ್ತಾ ಆನಿ ಕಾಳಿಜ್ ಮ್ಹಜೆಂ ಪಶ್ಚಾತ್ತಾಪಾನ್ ಶಿಜ್ತಾ!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
