ಕಾಣ್ಯೊ
ಸಾಹಿತಿಕ್ ಸ್ಪರ್ಧೊ 2004
ಕಥಾಪಾಠ್
ಅಂಕಣಾಂ
ಸಾಹಿತಿಕ್ ಸ್ಪರ್ಧೊ 2005
ಕವಿತಾಂ
ಸಾಹಿತಿಕ್ ಸ್ಪರ್ಧೊ 2006
ದಾಯ್ಜ್ ಶಿಭಿರ್ 2006
ವಿಡಂಬನಾಂ
ದಾಯ್ಜ್ ಶಿಭಿರ್ 2007
ಕಥಾಮೃತ್
ವಿಮರ್ಶೆ
ಕಥಾದಾಯ್ಜ್ - 21
ಪವಿತ್ರ್ ಉಷ್ಟೆಂ
ಜೊ.ಸಾ.ಆಲ್ವಾರಿಸ್
ನಾಂವ್: ಜೊಕಿಮ್ ಸಂತಾನ್ ಆಲ್ವಾರಿಸ್ಲಿಖ್ಣೆಂ
ನಾಂವ್: ಜೊ.ಸಾ.ಆಲ್ವಾರಿಸ್
ವಳೊಕ್:
ಚಿಂತಾಪ್: ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಮಾತ್ರ್ ನ್ಹಯ್, ಕೊಂಕ್ಣಿ ಸಾಹಿತ್ಯಾಂತ್ ಸಯ್ತ್ ಜೊ.ಸಾ.ಅಲ್ವಾರಿಸ್ ಏಕ್ ಭಳಿಶ್ಟ್ ನಾಂವ್. ಜಿ ಕೊಂಕ್ಣಿ ಭಾಸೆಚಿ ಸೊಭಾಯ್ ಹಾಚ್ಯಾ ಕಾಣ್ಯಾಂನಿ ವಾಚುಂಕ್ ಮೆಳ್ತಾ, ತಿ ಹೆರಾಂಚ್ಯಾ ಸಾಹಿತಾಂತ್ ಮೆಳಾನಾ. ಹಿ ಕಾಣಿ ಕಾಂಯ್ ಚಾಳಿಸ್ ವರ್ಸಾಧಿಂ ಲಿಖ್ಲ್ಲಿ, ತರ್ಯೀ ಹಾಂತುಂ ವಾಪಾರ್ಲ್ಲಿ ಭಾಸ್, ಆಯ್ಚ್ಯಾ ಕಾಳಾರ್ ಬದ್ಲಲ್ಲ್ಯಾ ಸಂಸ್ಕೃತೆಕ್ ಧಾಖಯ್ತಾ. ಇತ್ಲೆಂಚ್ ನ್ಹಯ್, ಸಾಮಾಜಿಕ್ ಕಾಣ್ಯಾಂನಿ ಜಾಲ್ಲ್ಯಾ ಬದ್ಲಾವಣೆಕ್ ಸಯ್ತ್ ಪಿಂತ್ರಾಯ್ತಾ.
- ವಲ್ಲಿ ಕ್ವಾಡ್ರಸ್
ಕಥಾದಾಯ್ಜ್ - 21. ಪವಿತ್ರ್ ಉಷ್ಟೆಂ
ಶಹರಾ ಥಾವ್ನ್ 10 ಮೈಲಾಂ ಪೈಸ್, ರಾಜ್ ರಸ್ತ್ಯಾಚೇ ದೆಗೆನ್ ಆಸಾ ತೆಂ ಲ್ಹಾನ್ ಬಿಡಾರ್. ’ತಾಂತುಂಚ್ ರಸ್ತ್ಯಾಕ್ ಫುಡ್ ಕರುನ್ ಆಸಾ ಏಕ್ ಘುಡಾ-ಮಟ್ಟಾಚಿ ದುಬ್ಳಿ ಆಂಗಡ್, ತ್ಯಾ ದಿಸಾ, ತಾಂತುಂ ಸಿಸಿಲ್ ಬಸೊನ್ ವಿಕ್ರೊ ಕರ್ತಾಲಿ. 23 ವರ್ಸಾಂಚಿ, ದೊಗಾಂ ಭುರ್ಗ್ಯಾಂಚಿ, ತರ್ನಿ ವಿಧವ್ ಸ್ತ್ರೀ ತೀ, ದರ್ನಾಪಾ ಲಾಗ್ಚೊ, ಸ್ಡೆ-ಇಕ್ರಾಂಚೊ ವೇಳ್ ಜಾಲಾ, ತಿಚಿಂ ಭುರ್ಗಿಂ, 5 ವರ್ಸಾಂಚೆಂ ಬುಲ್ಲಾ ಆನಿ ತೀನಾಂಚೊ ಬಾಬ್ಲಿ - ಆಂಗ್ಣಾ ದೆಗೇಚ್ಯಾ ರುಕಾ ಮುಳಿಂ ಆಸುನ್, ತಿ-ತೀನ್ ಫಾತ್ರಾಂಚಾ ತೀನ್ ಲಾನ್ಶಾ ರಾಂದ್ಣ್ಯಾಂವೈರ್ ಕಟ್ಟಿಯೊ ದವರುನ್ ತಾಂತುಂ ಚಿಂಚಾರೆ ಫಾತರ್, ಶಿಂದ್ಲ್ಲೊ ಪಾಲೊ, ಇತ್ಯಾದಿ, ಘಾಲುನ್, ರಾಂದ್ಪಾಚೊ ಖೆಳ್ ಖೆಳ್ತಾಲಿಂ: ಸಾಂಗಾತಾಚ್, ಫೆಸ್ತಾಚಾ ಜೆವ್ಣಾಕ್ ಯೇಂವ್ಕ್ ಆಸ್ಚಾ - ತಾಂಚಾ ಪರಿಚಯಾಚಾ - ಸೈರ್ಯಾಂಚಿಂ ನಾಂವಾಂ ಉಡಾಸ್ ಕರುನ್ ಉಲೈತಾಲಿಂ.
ಆತಾಂ, ರಸ್ತ್ಯಾವೈಲೊ ಎಕ್ಲೊ ಸಾಧೆಂ ಪೆಂಟ್ ಆನಿ ಶರ್ಟ್ ನ್ಹೆಸ್ಲಲೊ, 25 ವರ್ಸಾಂಚೊ ದಿಂಡ್ಡೊ ತರುಣ್ ಆಡ್ ಗುಂವ್ಲೊ. ಆಂಗ್ಣಾಚಾ ಆಕೊಡ್ಯಾಚಿ ತಟ್ಟಿ ವೊಂದಾವ್ನ್ ಭಿತರ್ ಆಯ್ಲೊ. ತಾಕಾ ಏಕಡ್ಚಾನ್, ಆಂಗ್ಣಾಚಾ ಪೊಂತಾರ್ ಸಾಂಕ್ಳೇಕ್ ಆಸ್ಲ್ಲೊ ಪೆಟೊ ಘೊಂಕ್ಲೊ; ದುಸ್ರ್ಯಾನ್, ಭುರ್ಗಿಂ ಕಾವ್ಜೆವ್ನ್, ತಾಕಾಚ್ ಚೊಯಿತ್ತ್ ತಟಾಸ್ತ್ ಜಾಲಿಂ; ತಿಸ್ರ್ಯಾನ್, ಸಿಸಿಲಾನ್ ಆಂಗ್ಡಿಚಾ ಜನೆಲಾಂತ್ಲ್ಯಾನ್ ಆಂಗ್ಣಾಕಡೆ ತಿಳ್ಳೆಂ. ತಿಕಾ, ತರುಣಾಚಿ ಪರಿಚಯ್ ಜಾಲಿನಾ. ತರೀ ಆತ್ವೊ ಸೈರೊ ಮ್ಹಳ್ಳಿ ಖಾತ್ರಿ ಜಾಲಿ. ತಿಣೆ ಆಂಗ್ಡಿಚೆಂ ಬಾಗಿಲ್ ಧಾಂಪುಂಕ್ ತಯಾರಿ ಕೆಲಿ. ಸೈರೊ ಭುರ್ಗ್ಯಾಂಕಡೆ ಚಮ್ಕಾಲೊ. ಬಾಬ್ಲಿನ್ ಭೈಣಿಕಡೆ, "ತೊಣ್ ಬಾಯೆ, ದೊ? ಚೋಂವ್ಕ್ ಆಯ್ಯೊಗೀ?" ಮ್ಹಣುನ್ ವಿಸಾರ್ಲೆಂ. "ಮ್ಹಾಕಾ ಗೊತ್ತುನಾ. ತೊ ಸೈರೊ ನಾಕಾ ಆಮ್ಕಾಂ. ಆಮ್ಚೆಂ ಜೆವಾಣ್ ತಾಕಾ ಪಾವ್ತಾಗೀ?" ಮ್ಹಣ್ ಬುಲ್ಲಾನ್ ಗುಣ್ಗುಣಾಯ್ಲೆಂ.
"ಆಯೆ-ಗೊ, ತೊ ಆಂಗಾತಾ’ ಯ್ಯೊ!" ಮ್ಹಣುನ್ ಉದ್ಗಾರುನ್ ಚೆರ್ಕೊ ರುಕಾ ಪಾಟ್ಲ್ಯಾನ್ ಲಿಪ್ಲೊ. ತರುಣ್, ಹಾಸ್ಕುರ್ಯಾ ಮುಖಾನ್ ಬುಲ್ಲಾಲಾಗಿಂ ಪಾವ್ಲೊ ಆನಿ, "ಜಾಲೆಂಗೀ ರಾಂದಾಪ್? ಮ್ಹಾಕಾ ಬೋ....ರಿ ಭುಕ್ ಲಾಗ್ಲ್ಯಾ! ವಾಡ್ತಾತ್ಗೀ?" ಮ್ಹಣಾಲೊ. ಚೆಡುಂ, "ಛೆ! ಸೈರ್ಯಾಲಾಗಿಂ ಉಲೈನಾಂತ್ಗಿ? ಮ್ಹಜಿ ವಳಕ್ ನಾಂಗಿ ತುಮ್ಕಾಂ? ಹಾಂವ್ ಕೊಡ್ಯಾಳ್ಚೊ ಎಗ್ಗಿ ಮಾಮ್ ನೈವೆ? ಹೆ-ಹೆ-ಹೆ-ಹೆ! ಮಾಯ್ ನಾಂವೇ, ಬಾಯ್ಯೋ?" ಮಾಮಾನ್ ರುಕಾ ಪಾಟ್ಲ್ಯಾನ್ ತಿಳುನ್ ವಿಸಾರ್ಲೆಂ.
"ತೀ ಆಂಗ್ಡೆಂತ್ ಆಸಾ" ಮ್ಹಳೆಂ ಬುಲ್ಲಾನ್.
"ಓ! ತಿ ಆಂಗಡ್ ತುಮ್ಚಿಗಿ?" ಉದ್ಗಾರ್ಲೊ ಎಗ್ಬರ್ಟ್, ತೆದಾಳಾಚ್. ಆಂಗ್ದೇಚಾ ಜನೆಲಾಂತ್ಲ್ಯಾನ್, ಗಾಜ್ಲೆಂ ಸಿಸಿಲಾಚೆಂ ಸವಾಲ್, - ಕೊಣ್ಗೊ ಬುಲ್ಲಾ ತೊ?"
ಆತಾಂ ಭುರ್ಗ್ಯಾಂಕ್ ದೈರ್ ಜಾಲೆಂ. "ಗೊತ್ತುನಾ! ತುಂ ಯ್ಹೆ ಆಂಗಾ, ಯೆಗ್ಗಿಂ ಯ್ಹೆ !!" ಕಿಂಕ್ರಾಟ್ಲೆಂ ಬುಲ್ಲಾ, ಆಡೊಸಾ ಥಾವ್ನ್ಂಚ್.
"ಆಯ್ಲಿಂ, ಆಯ್ಲಿಂ, ತುಮಿಂ ಥೈಂಚಿಂ ಭಿತರ್ ಯೆಯಾ!"
ತಿಂ ರಪ್ಪಾನ್ ಆಂಗ್ಣಾಂತ್ಲ್ಯಾನ್ ಬಿಡಾರಾಕ್ ಧಾಂವ್ಲಿಂ. ಎಗ್ಗಿಯೀ ಬಾಗ್ಲಾಚಾ ಮೆಟಾಂಕಡೆ ವೊಸುನ್, ಭಾಯ್ರ್ಚ್ ಉಭೊ ರಾವ್ಲೊ. ಅನ್ಯೆಕಾ ನಿಮಿಷಾನ್ ಸಿಸಿಲ್ ಭಿತರ್ಲ್ಯಾನ್ಚ್ ಯೇವ್ನ್ ದಾರಾರ್ ದಿಷ್ಟಿ ಪಡ್ಲಿ, ಭುರ್ಗಿಂ, ತಿಚಾ ದೊನ್ಯೀ ಕುಶಿಂನಿ, ತಿಕಾ ಚಿಡೊನ್ಶೆಂ ಆಸುನ್, ಸೈರ್ಯಕ್ಚ್ ಪಳೆಂವ್ಕ್ ಲಾಗ್ಲಿಂ.
ಸೈರ್ಯಾನ್ ಹಾತ್ ಜೊಡುನ್, "ದೇವ್ ಬೊರೊ ದೀಸ್ ದಿವೊಂ!" ಮ್ಹಳೆಂ ಹಾಸ್ಕುರ್ಯಾಂಚ್.
ತಿಣೆಂಯೀ ತಾಕಾ ತೆಂಚ್ ಮ್ಹಳೆಂ, ಪುಣ್ ತಿ ಹಾಸ್ಲಿನಾ, ಕಾರಾಣ್, ತಿಕಾ ತೊ ಪರಿಪೂರ್ಣೊ ಪರ್ಕೊ ದಿಸ್ಲೊ. ಸ್ವಭಾವಿಕ್ಪಣಿ ತೀ ಪಾದ್ದೆಲಿ ಆನಿ, "ಕೊಣ್ ಜಾಯ್ ತುಮ್ಕಾಂ?" ಮ್ಹಣಾಲಿ ಘನಾನ್ಶೆಂ.
"ಮ್ಹಜಿ ವಳಕ್ ಪಾರ್ಕುಂಕ್ ತುಂ ಸಕ್ಲಿನಾಂಯ್ ಮ್ಹಣ್ತಚ್ ಹಾಂವೆಂಚ್ ಸಾಂಗುಂಕ್ಜಾಯ್. ತ್ಯಾ ಪಾಸ್ವತ್ ಹಾಂವೆಂ ಭಿತರ್ ಯೆವ್ಯೆತ್-ಮೂ?" ತೀ ತಾಕಾ ಪ್ರವೇಶ್ ದೀಂವ್ಕ್ ನಾರ್ಗಾಲಿ. "ತುಂವೆಂ ತಶೆಂ ನಾರ್ಗೊಂಚೆಂ ವಾಜ್ಬೆಂ, ಹ್ಯಾ ದುಷ್ಟಾ ಕಾಳಾರ್ ಪರ್ಕ್ಯಾ ತರುಣಾಚಿ ಪರಿಚಯ್ ರುಜು ಜಾಲ್ಯಾ ಖರಿತ್, ತಾಕಾ ಘರಾಂತ್ ರೀಗ್ ದಿಂವ್ಚೆಂ ಆಪಾಯಾಚೆಂ. ತುಕಾ ಮ್ಹಜಾಕಡೆ ಉಲಂವ್ಕ್ ಭ್ಯೆಂ ದಿಸ್ತಾ ತರ್, ಆಂಗ್ದೆಂತ್ ಸಾಕ್ಶೆಂತ್ ಉಲಯಾಂ."
ಹಾಂವೆಂ ತಿ ಬಂದ್ ಕೆಲಿ. ಹ್ಯಾ ದನ್ಪಾರ್ಚಾ ಸಮಯಾಂತ್ ಗ್ರಾಯ್ಕ್ ಯೆನಾಂತ್. ತ್ಯಾ ಶಿವಾಯ್, ಭುರ್ಗ್ಯಾಂಕ್ ಜೆವಾಣ್ ವಾಡ್ಚೊ ವೇಳ್ ಜಾಲೊ. ರಾಂದಾಪ್ ಕರುಂಕ್ ಆಸಾ." ಮ್ಹಣಾಲಿ ತಿ ಅತಾಂ ಧೈರಾಚೇ, ಸುಡ್ಸುಡೇ ಭಾಷೆನ್. ಕಿತ್ಯಾ ತೊ ಮ್ಹನಿಸ್ ದುಷ್ಟೊ ನಹಿಂ ಮ್ಹಳ್ಳೆಂ ತಾಚಾ ಯೆದೊಳ್ಚ್ಯಾ ಉಲವ್ಣ್ಯಾನ್ ತಿಕಾ ಸುಸ್ತಾಲ್ಲೆಂ. "ಯ್ಹೆ. ವೈರ್; ಯೆವ್ನ್, ತುಜಿ ಗರ್ಜ್ ಕಿತೆಂ ತಿ ವೆಗ್ಗಿಂ ಸಾಂಗುನ್ ಸೊಡ್."
ತೊ ವ್ಹಾಣೊ ಭಾಯ್ರ್ ಸೊದುನ್ ಮೆಟಾಂ ಚಡ್ಲೊ, ಅನಿಂ ತಿಣೆ ದಾಕೈಲ್ಲ್ಯಾ ಕದೆಲಾರ್ ಬಸ್ಲೊ, ತೀ ಆನಿ ಭುರ್ಗಿಂ ಪಾಟಿಂ. ಪಯ್ಸ್ ಸರುನ್ ಬಸ್ಲಿಂ.
"ಆತಾಂ, ಮ್ಹಜೊ ಗರ್ಜ್ ಸಾಂಗ್ಚಾ ಪಯ್ಲೆಂ, ವಳಕ್ ಸಾಂಗ್ಚೆಂ ಚಡ್ ಅವಶ್ ಆಸಾ, ಒಮ್ಜೂರ್ ಫಿರ್ಗಜೆಂತ್ಲ್ಯಾ, ಬೊಂಡಂತಿಲ ಗ್ರಾಮಾಂತ್, ಪಿಯಾದ್ ಶೇಟ್ ಆಸುಲ್ಲೊ. ತಾಚಿ ವಳಕ್ ಆಸಾಗಿ ತುಕಾ?"
"ತಾಚಿ ವಳಕ್ ಬೊರಿ ಆಸಾ, ತೊ ಮ್ಹೊಜಾ ದಾಕ್ಟ್ಯಾಬಾಚೊ ಪೊದೊರ್ನ್."
"ತಿತ್ಲಿ ಮಾತ್ರ್ ಜಾಣಾಂಯ್?"
"ಚಡಿತ್ ಇಲ್ಲೆಂ ಜಾಣಾ ಕಿತೆಂ ಮ್ಹಳ್ಯಾರ್, ಹಾಂವ್ 9 ವರ್ಸಾಂಚೆಂ ಆಸ್ತಾನಾ, ಪೊದೊರ್ನ್ ತಿ ಹಳ್ಳಿ ಸೊಡ್ನ್, ಕುಟ್ಮಾ ಸಮೇತ್ ಕೊಡ್ಯಾಳ್ ವೊಸೊನ್ ರಾವುಲ್ಲೊ. ತಶೆಂ ಗೆಲ್ಯಾ ಉಪ್ರಾಂತ್ ತಾಣೆಂ ಆಮ್ಗೇರ್ ಆಮಿಂ ತಾಂಗೇರ್ ವೆಚೆಂ ಯೆಂವ್ಚೆಂ ಬಂದ್ ಜಾಲ್ಲೆಂ. ಪೊದೊರ್ನ್ ದುಸ್ರ್ಯಾಚ್ ವರ್ಸಾ ಸರ್ಲ್ಲೊ.
"ತೊ ಆಸ್ಲ್ಲೊ ಜಾಲ್ಯಾರ್, ವರ್ಸಾಂತ್ ಏಕ್ ಪಾವ್ಟ್ ಫೆಸ್ತಾಚಾ ನೀಬಾನ್ ಪುಣಿ ಯೇವ್ನ್ ವೆತೊ, ಪುಣ್, ಮೊದೊರ್ನೆನ್ ಆನಿ ಭುರ್ಗ್ಯಾಂನಿ ಆಮ್ಕಾಂ ವಿಸ್ರೊನ್ಂಚ್ ಸೊಡ್ಲೆಂ. ಆಮಿಂ ಫೆಸ್ತಾಚಾ ನಿಬಾನ್ ವೆತ್ಯಾಂ ಮ್ಹಳ್ಯಾರ್, ಕೊಡ್ಯಾಳಾಂತ್ ಫೆಸ್ತ್ ರದ್ ಕೆಲಾಂ. ತಿಚಿಂ ಭುರ್ಗಿಂ ಸಕ್ಡಾಂ ಯೆದೊಳ್ ಕಾಜಾರ್ ಜಾಲ್ಯಾಂತ್ ಆಸ್ತೆಲಿಂ, ಪುಣ್ ಮೊದೊರ್ನೆನ್ ಎಕ್ಲ್ಯಾಚಾಯೀ ಕಾಜಾರಾಕ್ ಆಮ್ಕಾಂ ಆಪೈಲೆಂನಾ. ಮ್ಹಜಾ ದಾಕ್ಟ್ಯಾ ಬಾಚಾ ಕಾಜಾರಾಕ್ ತೊ ಖುದ್ ವೊಸೊನ್ ಆಪವ್ನ್ ಆಯಿಲ್ಲೊ, ಜಾಲ್ಯಾರೀ ಕೊಣ್ಂಚ್ ಆಯ್ಲೆಂನಾ. ಅಸೆಂ ಆಮಿಂ, 16-17 ವರ್ಸಾಂ ಥಾವ್ನ್ ಎಕಾಮೆಕಾಕ್ ಪರ್ಕ್ಯಾಂ ಜಾವ್ನ್ ಗೆಲ್ಯಾಂವ್."
"ಮೊದೊರ್ನೆಚಾ ಪಾಡ್ತಿನ್ ಹಾಂವೆಂ ವಕಾಲಾತ್ ಉಲಂವ್ಚಿ ಜಾಲ್ಯಾರ್, ತಿಕಾ ತುಮ್ಚೊ ಸಂಪರ್ಕ್ ಸಂಬಂಧ್ ಬಂದ್ ಕರುಂಕ್ ವಾಜ್ಬಿಂ ಕಾರಾಣಾಂ ಆಸ್ಲ್ಲಿಂ. ಪಾಂಚ್ ಭುರ್ಗ್ಯಾಂಚಿ ಆವೈ ತರ್ನೇ ಪ್ರಾಯೆರ್ಚ್ ವಿದವ್ ಜಾಲ್ಲಿ ಜಾಲ್ಲ್ಯಾನ್, ತಿಕಾ ತ್ಯಾ ೫ ಭುರ್ಗ್ಯಾಂಕ್ ಪೋಸ್ಚ್ಯಾಕಡೆ ಆಸ್ಲ್ಲೆ ಕಷ್ಟ್ ಆನಿ ಪುರ್ಸತೆಚಿ ಅಡ್ಚಣ್ ಕಿತ್ಲಿ ತಿ, ತುಕಾ ಥೊಡೊ ಪುಣಿ ಅನ್ಬವ್ ಆಸ್ತೊಲೊ." - ಎಗ್ಬರ್ಟ್ ಆಪ್ಲ್ಯಾ ಆವಯೇಪಕ್ಷೇನ್ ಉಲಯ್ಲೊ.
"ಆಸಾ ಹಾಬಾ; ಥೊಡೊಚ್ ನಹಿಂ, ಮೊಸ್ತು ಆಸಾ. ತ್ಯಾ ವಿಶಾಂತ್ ಕಿತ್ಲೆಂ ಸಾಂಗ್ಲ್ಯಾರೀ ಮುಗ್ದೊಂಚೆಂನಾ. ಮ್ಹಾಕಾ, ಹ್ಯಾ ನಾಡಾಂತ್, ಹ್ಯಾ ದೊಗಾಂ ಭುರ್ಗ್ಯಾಂಚೆಂ ಪೊಸಾಪ್ ಕರ್ತಾನಾ, ಖರಸ್ ಯೆತಾ, ಮೊದೊರ್ನೆನ್, ತ್ಯಾ ಶಹರಾಂತ್, 5 ವಾಡ್ಲೆಲ್ಯಾ ಭುರ್ಗ್ಯಾಂಕ್ ಕಶೆಂ ಪೊಸ್ಲೆಂ ತೆಂ. ವೊಡ್ ಅಜಾಪ್ಚ್ ಮ್ಹಣಾಜಯ್. ಆತಾಂ ತೆಂ ಸೊಡ್ಯಾಂ. ಮ್ಹಜೆ ಮೊದೊರ್ನೆಕ್ ಆನಿ ತುಕಾ ಕಾಂಯ್ ಸಂಬಂದ್ ಆಸಾಗೀ?" - ಸಿಸಿಲಾಚೆಂ ಸವಾಲ್.
"ತ್ಯಾ ಬಾಬುಕ್ ಆನಿ ತುಕಾ ಕಸಲೊ ಸಂಬಂಧ್ ಆಸಾಗಿ, ತಸಲೊಚ್ ಆಸಾ" ತೊ ಹಾಸ್ಲೊ.
"ಉಟ್ ತುಂ! ಲೊಟ್ಟೆ ಸೊಡಿನಾಕಾ!! ತುಂ ಮೊದೊರ್ನಿಚೊ ಪೂತ್?"
"ಪೊದೊರ್ನಿಚೊಯೀ"
"ಕಿತೆಂ ಆಯ್ಕತಾಂ, ಕಿತೆಂ ದೆಕ್ತಾಂ ಹಾಂವ್?! ತುಜೆಂ ನಾಂವ್?"
"ತುಂಚ್ ಪಾರ್ಕುನ್ ಸಾಂಗ್?"
"ಮ್ಹಾಕಾ ಆಲ್ಬರ್ಟಾಚೆಂ ಆನಿ ಬ್ರಿಜಿತಾಚೆಂ, ಹ್ಯಾ ದೋನ್ ನಾಂವಾಂಚೊ ಮಾತ್ರ್ ಉಡಾಸ್ ಆಸಾ. ಬಾಕಿ ತೆಗಾಂ ಪುತಾಂಚಿಂ ನಾಂತ್; ವಿಸ್ರೊನ್ ಗೆಲ್ಯಾಂತ್."
"ಮ್ಹಜೆಂ ವಿಸರ್ಲ್ಯಾರ್ಯ್ ತೂಂ? ಏ ತುಜ್ಯಾ!! ಆಮಿ ತುಮ್ಗೆರ್ ಆಯ್ಲ್ಯಾರ್ ಚಡ್ಡ್ ಪ್ರೀತಿನ್ ಆನಿ ಸಳ್ಗೇನ್, ಉಡ್ಕಾಣಾಂ ಮಾರ್ನ್ ಖೆಳ್ತಾಲಿಯ್ ತುಂ ಕೊಣಾ ಸಾಂಗಾತಾ?"
ಆತಾಂ ತೀ ಉಡಾಸ್ ಜಿವಾಳುನ್ ಚಿಕ್ಕೆ ಲಜ್ಲಿ ಆನಿ. "ತೊಚ್ಗೀ ತುಂ? ತುಜಾ ನಾವಾಚೊ ಅನಿಕಿ ಉಡಾಸ್ ಜಾಯ್ನಾಮೂ ಮ್ಹಾಕಾ!" ಮ್ಹಣುನ್ ಹಾಸ್ಲಿ.
’ಎಗ್ಬರ್ಟ್, ಮೊಟ್ವೆಂ, ಎಗ್ಗಿ-ಎಗ್ಗಿ, ವೆಗ್ಗಿಂ ಯೆ: ಲಾಗ್ಗಿಂ ಬಸುನ್ ಮಾಗ್ಗಿ ಶಿಕಯ್’ ಮ್ಹಣ್ತಾಲಿಯ್: ಹಾಚಿಯೀ ವಿಸರ್ ಪಡ್ಲಿ ತುಕಾ?"
ತವಳ್ಚಿ ಸಳ್ಗಿ ತಿಚೇ ಮತಿಕ್ ಯೆತೆಚ್. ಲಜ್ ಮಾಯಾಕ್ ಜಾಲಿ.
"ಏ ಕಣ್ಣೋಜಾ!! ತೊಚ್ ಪೊಕ್ರಿ ಎಗ್ಗಿ-ಗಿ ತೂಂ? ಕಿತ್ಲೊ ಬದಲ್ಲಾಯ್!!" ಮ್ಹಣುನ್ ಹಾಂಕ್ರೆಲಿ ತೀ. ತಾಕಾ ವೈರ್ ಸಕ್ಲಾ ಚೊಯಿತ್ತ್ ಆನಿ ಹಾಸತ್ತ್. "ಮ್ಹಾಕಾ ಸತ್ ಮಾಂದುಂಕ್ ಜಾಯ್ನಾ ಹಾಬಾ!"
ಆನಿ ತೂಂಯೀ ತವಳ್ಚ್ಯಾ ಪ್ರಾಸ್ ಕಿತ್ಲಿ ಚಡ್ ಸೊಭಿತ್ ಜಾಲ್ಯಾಯ್, ಸಿಸಿಲಾ! ತೊಯೀ ಅಭಿಮಾನಾನ್ ಉದ್ಗಾರ್ಲೊ.
ತೀ ಎಕಾಚ್ಚಾಣೆ ಸಾವ್ಳೆಲಿ ಆನಿ, "ಮ್ಹಜೆ ಸೊಭಾಯೆಕ್ ಮಾತ್ತಿ ಘಾಲ್" ಮ್ಹಣಾಲಿ ನಕ್ಲಿ ಹಾವ್ ಭಾವ್ ಕರುನ್, ಆತಾಂ ತುಜಿ ಪರಿಪೂರ್ಣ್ ವಳಕ್ ಜಾಲಿ ಜಾಲ್ಲ್ಯಾನ್ ೧೭ ವರ್ಸಾಂನಿ ತುಕಾ ಹ್ಯಾ ದರಿದ್ರೆಕಡೆ ಕಸಲೇ ಗರ್ಜೆನ್ ಹಾಡ್ಲೆಂ? ಸಾಂಗೊನ್ ಸೊಡ್. ರಾಂದಾಪ್ ಕರುಂಕ್ ಆಸಾ ಮ್ಹಾಕಾ."
"ಗರ್ಜ್.. ತುಜೆಂ ಸುಖ್-ದುಖ್ ಆಯ್ಕೊಂಚಿ."
"ದುಖಾಚೆಂ ಜಾಯ್ ಜಾಲ್ಯಾರ್ ಸಾಂಗೊಂಕ್ ಮೊಸ್ತು ಆಸಾ: ಸುಖಾಚೆಂ ಎಕೀ ನಾ, ದುಖಾಚ್ಯೊ ಸಂಕ್ತಿ, ಅಪ್ರೂಬ್ ಆಯ್ಲೆಲ್ಯಾಕ್ ತುಕಾ ಸಾಂಗ್ಲ್ಯಾರ್, ಜಾಂವ್ಚೊ ಸಂತೊಸ್ ಕಿತೆಂ? ಹಾಂವ್ ಸಾಂಗಾನಾ. ತುಂ ಅರ್ಧೆಂ ವೊರ್ಭರ್ ಬಸ್, ತುರ್ತಾನ್ ಇಲ್ಲೆಂ ರಾಮ್ದುನ್ ವಾಡ್ತಾಂ. ಜೆವ್ತಾನಾ ಸಂತೊಸ್ ಜಾತೊಲೊ" ಅಶೆಂ ಮ್ಹಣುನ್ ತೀ ಉಟ್ತನಾ.-
"ಬಸ್, ಬಸ್: ತುಜ್ಯೊ ಬೊರ್ಯಾ ವಾಯ್ಟಾಚ್ಯೊ ಏಕ್ ದೋನ್ ಸಂಗ್ತ್ಯೊ ಪುಣಿ ಸಾಂಗ್ಲ್ಯಾ ಬಗಾರ್ ತುಂ ಮೊಜೆ ಪಾಸ್ವತ್ ರಾಂದಿನಾಕಾ. ರಾಂದ್ಚೆಂ ಯಾ ನಾಕಾ. ಹಾಂತ್ಲೆಂ ಏಕ್ ತುಕಾ ಮಾಗಿರ್ ಸಾಂಗ್ತಾಂ."
"ರಾಂದ್ಚೆಂ ನಾಕಾ ತರ್, ಮ್ಹಜಿ ವಾಂವ್ಟ್ ಉರ್ಲಿ. ಮ್ಹಜೆ ಕಷ್ಟ್-ಗೀಷ್ಟ್ ತುಕಾ ಸಾಂಗ್ಲ್ಯಾ ಉಪ್ರಾಂತ್, ತುಂ ಮ್ಹಾಕಾ ’ರಾಂದಾಪ್ ಕರ್’ ಮ್ಹಣ್ಚೊನಾಂಯ್; ಉಟೊನ್ ಚಲ್ತಲೊಯ್. ಹೆರಾಂನಿ ಕೆಲಾಂಯೀ ತಶೆಂಚ್. ದೆಕುನ್, ಮ್ಹಜೆಂ ಹಾಂವ್ ಸಾಂಗಾನಾಂ. ತುಜಿ ಕಿತೆಂ ಬೊರಿ ಬೊರೀ ಖಬಾರ್ ಆಸಾ. ಸಾಂಗ್ ಮ್ಹಾಕಾ?"
"ವಿಸಾರ್: ಹಾಂವ್ ಜವಾಬಿ ದಿತಾಂ."
"ತುಜೊ ಹೊ ಸಾದೊ ವೇಸ್ ದೆಕ್ತಾನಾ, ತುಂ ಕಾಮಾರ್ ನಾಂಯ್. ಸೊ ದಿಸ್ತಾಯ್, ಖರೆಂಮೂ?"
"ಖರೆಂ ನೈಂ. ಹಾಂವ್ ಅರ್ಬಿ ಗಾಂವಾಂತ್ ಬೊರ್ಯಾ ಕಾಮಾರ್ ಆಸಾಂ."
"ಫಟ್.. ನಂ ವನ್ನ್, ಥೈಂ ಆಸ್ಚೊ ಕೊಣ್ಯಿ ಪುತ್, ಇತ್ಲೆಂ ಸಾದೆಂ ವಸ್ತುರ್ ನ್ಹೆಸಾನಾ, ಮ್ಹಜೇ ಆಂಗ್ಡೆಕ್ ಬಿಡ್ಯೊ ಹಾಡ್ತಾ ತೊ ಕೊಂಕ್ಣ್ಯಾಂಪಿಲೊ ಚಡ್ ಬೊರೆಂ ನ್ಹೆಸ್ತಾ. ಪೊರೆನ್ಗಾರಾಂಚೆಂ ಫೆಶನ್ ಪಳೊವ್ನ್ ವೊಳ್ಸಾಲ್ಯಾಂ. ತಾಂಚಾ ನ್ಹೆಸ್ಪಾಚೊ ಝಳಪ್ ಆನಿ ಪರ್ಮಳ್, ತಿಂ ಆಂಗ್ಡಿ ಮುಖ್ಲ್ಯಾ ರಸ್ತ್ಯಾನ್ ಚಲ್ತಾನಾ, ಮ್ಹಜೇ ಆಂಗ್ಡೇ ಭಿತರ್ ಮಾರ್ತಾ"
"ಖರೆಂ. ಪುಣ್ ಹಾಂವ್, ಹೆರಾಂ ಕರ್ತಾತ್ ತಶೆಂ ಹ್ಯಾ ಗಾಂವಾಂಕ್ ಕರಿನಾ. ಮ್ಹಾಕಾ ಹೆಂಚ್ ಸಾದೆಪಣ್ ಚಡ್ ವರ್ಗಾತಾ"
"ತುಕಾ ಕಾಜಾರ್ ಜಾವ್ನ್ ಕಿತ್ಲಿ ವರ್ಸಾಂ, ಆನಿ ಕಿತ್ಲಿಂ ಭುರ್ಗಿಂ ಜಾಲಿಂ?"
"ಲೊಟ್ಟೊ ನಂ. ಟು, ತುಜಾ ಪ್ರಾಯೆಚಾ ಫೊರಿನ್ಗಾರಾಕ್, ಯೆದೊಳ್ ಪರ್ಯಾಂತ್, ಅಂಕ್ವಾರ್ ಉರೊಂಕ್ ಸೊಡ್ತಾತ್ ಕೊಣ್ ಆಜ್ಕಾಲ್?"
"ಹಾಂವ್ ಅಜೂನ್ ಉರ್ಲಾಂ ಮ್ಹಣುನ್ ಪರ್ಮಾಣಾಖಾಲ್ ಸಾಂಗ್ತಾಂ."
"ತರ್, ಕಾಜಾರಾಚಿ ತಯಾರಿ ಜಾಲ್ಯಾ’ಸ್ತೆಲಿ. ಮ್ಹಾಕಾ ವ್ಹೊಳಿಕ್ ಸಾಂಗುಂಕ್ ಆಯ್ಲಾಯ್ಮೂ?"
"ನಹಿಂ, ಕಾಜಾರಾಚಿ ತಯಾರಿ ಹಾಂಗಾ, ತುಮ್ಗೇರ್ ಥಾವ್ನ್ ಕರುಂಕ್ ಆಯ್ಲಾಂ"
"ವ್ಹಯ್-ವೇ? ಫಟ್ ನಂ. ತ್ರೀ, ನೈಂ-ಮೂ?"
"ಖರೆಂಚ್ ನೈಂ, ಮ್ಹಾಕಾ ಸೈರಿಕ್ ತುವೆಂ ಗಾಂಟಾಂವ್ಕ್ ಜಾಯ್."
"ಶಹಭಾಸ್! ಹಾಂವ್ ಗಾಂಟಾಯ್ತಾಂ, ಪೈಲ್ಯಾನ್ ಪೈಲೆಂ ಮ್ಹಜಿಚ್ ಭೈಣ್, ಬಿಬಿಲ್ ಆಸಾ, ಬಿ.ಎಡ್. ಪಾಸ್ ಜಾವ್ನ್, ಚಲಿಯಾಂಚೆ ಕೊಲೆಜಿಂತ್ ಶಿಕಯ್ತಾ. ಹಜಾರಾವೈರ್ ಸಾಂಬಾಳ್ ಜೋಡ್ತಾ. ತುಕಾ ದಾದೊಶಿ ದೋತ್ ದಿತೆಲೆಂ. ಆನಿ ಭಾರೀ ಸೊಭೀ...ತ್ ಆಸಾ. ತೆ ಫೊರೆನ್ಗಾರ್ಚ್ ಜಾಯ್ ಮ್ಹಣ್ ಹಟಾನ್ ರಾವ್ಲಾಂ."
"ಮ್ಹಾಕಾ ತುಮ್ಚಿ ಸಗ್ಳಿ ಖಬರ್ ಆಸಾ, ಬೊಂಬೈ ನಟರಾಜ್ ಹೊಟೆಲಾಂತ್ ಕಾಮಾರ್ ಆಸ್ಚ್ಯಾ ತುಜಾ ಬಾಪುಲ್ ಭಾವಾನ್ ಧಾನಿಎಲಾನ್ ಸಾಂಗ್ಲ್ಯಾ. ದೆಕುನ್ ಹಾಂವ್ ಪೈಲ್ಯಾನ್ ಪೈಲೆಂ ಹಾಂಗಾ ಆಯ್ಲಾಂ."
"ಬೊರೆಂ ಕೆಲೆಂಯ್. ಬಿಬಿಲಾಕ್ ಬೊರೆಂ ನಶಿಬ್ ಆಸಾ. ಆತಾಂ ಹಾಂವ್ ತುರ್ತಾನ್ ಇಲ್ಲೆಂ ರಾಂದ್ತಾಂ. ಜೇವ್ನ್, ಮಾಗಿರ್ ತುಕಾ ಸಿಬಿಲಾಗೆರ್, (ಮ್ಹಜಾ ಕುಳಾರಾ) ಪಾಂವ್ಕ್ ಯೆತಾಂ."
"ರಾಂದ್, ಪುಣ್ ಸಿಬಿಲಾಗೆರ್ ವೆಚಿ ಗರ್ಜ್ ನಾ."
"ಕಿತ್ಯಾ? ತೂಂಚ್ ವೊಸೊನ್, ಸೈರಿಕ್ ಘಟ್ ಕರ್ನ್ ಆಯ್ಲೊಯ್ ದಿಸ್ತಾ? ತೀ ಹಾಸ್ಲಿ.
"ನಾ. ಸಿಬಿಲ್ ಮ್ಹಾಕಾ ನಾಕಾ."
"ಸಿಬಿಲ್ ನಾಕಾ?" ಆಕ್ಲಾಸ್ಲಿ ತೀ ಅಜಾಪೊನ್, ಆನಿ ತೊಂಡಾರ್ ಶಿಣ್ ದಾಕವ್ನ್, "ತುಕಾ ಕಿತೆಂ ಆಯ್ಬ್ ಆಸಾ?"
"ಕಾಂಯ್ ನಾ. ಅಪುಟ್ ಸು-ಲಕ್ಷಣಾಂಚೆಂ ಮಾಣಿಕ್. ಪುಣ್, ಮ್ಹಾಕಾ ತೆಂ ಪಸಂದ್ ನಾ."
"ತುಮ್ಕಾಂ ಶಹರಾಂತ್ಲ್ಯಾಂಕ್ ನಾಡಾಂತ್ಲಿಂ ಚೆಡ್ವಾಂ ನಾಕಾತ್. ಶಹರಾಂತ್ಲ್ಯಾ ಲಾಕ್ಪತ್ಯಾಂಚ್ಯೊ ಧುವೊ ಜಾಯ್. ಪರ್ದೆಶಾಂತ್ ಹಜಾರಾಂನಿ ಸಾಂಬಾಳ್ ಜೋಡ್ಚ್ಯಾ ತರ್ನಾಟ್ಯಾಂನಿ ತಾಂಕಾಂಚ್ ಖಾಯ್ಸ್ ಕರ್ಚೆಂ. ಆನಿ ಗ್ರೇಸ್ತಾಂಚಿಂಚ್ ಘರಾಂ ಆನಿ ಖಜಾನಾಂ ಭರ್ಚಿಂ ಆಜ್ಕಾಲ್. ಗರೀಬ್, ಬಾಡ್ಕಾರೇ ಚಲಿಯೇ ಸಂಗಿಂ ಕಾಜಾರ್ ಜಾವ್ನ್, ತಿಚಾ ಘರ್ ಕುಟ್ಮಾಕ್ ವೈರ್ ಚಡೊಂವ್ಚೊ ಹುಸ್ಕೊಚ್ ನಾ!" ಅಶೆಂ ಖಡಾಖಡಿಂ ದುರ್ಸೊನ್ಂಚ್ ಉಲೈಲಿ ಸಿಸಿಲ್. ಆತಾಂ ತೊ ಉಲೈಲೊ.-
"ಮ್ಹಜಾ ಮನಾಂತ್ಲೆಂ ವಾಚ್ಲೆಲ್ಯಾ ಬರಿಚ್ ತುಂ ಉಲೈಲಿಯ್, ಸಿಸಿಲಾ, ಮ್ಹಜಾ ತೆಗಾಂ ವ್ಹಡ್ ಭಾವಾಂನಿ ಕೆಲಾಂ ತುವೆಂ ಮ್ಹಳ್ಳಲೆಂಚ್ - ಗ್ರೇಸ್ತಾಂಚಾ ಧುವಾಂಸಂಗಿಂ ಎಕ್ವಟುನ್, ತಾಂಚಿಂ ಘರಾಂ ಭರ್ಲ್ಯಾಂತ್; ಲಾಕ್ಪತ್ ಮಟ್ಟಾಥಾವ್ನ್ ಮಿಲಿಯಾಪತಿಂಚಾ ಊಂಚಾಯೆಕ್ ಚಡೈಲ್ಯಾಂತ್; ಪುಣ್ ಮ್ಹಜೊ ಇರಾದೊ ತೊ ನಹಿಂ; ತುವೆಂ ಮ್ಹಳ್ಳೆಲ್ಯಾಬರಿಂ ಗರೀಬ್ ಪುಣ್ ಮ್ಹೊಜೊ ಇರಾದೊ ತೊ ನಹಿಂ; ತುವೆಂ ಮ್ಹಳ್ಳೆಲೆಬರಿ ಗರೀಬ್ ಕುಟ್ಮಾಕ್ ವೈರ್ ಉಕಲ್ಚೊ. ಹೆಣೆ ಮ್ಹಾಕಾ ತುಜಿ ಸಹಾಯ್ ಜಾಯ್"
"ದೆಕುನ್ಂಚ್ ಹಾಂವೆಂ ತುಕಾ ಸಿಬಿಲ್ ಜಾಯ್ತ್ ಮ್ಹಳೆಂ."
"ಹಜಾರಾವೈರ್ ಸಾಂಬಾಳ್ ಜೊಡ್ಚಿ, ದಾದೊಶಿ ದೋತ್ ದೀಂವ್ಕ್ ಸಕ್ಚಿ ಸಿಬಿಲ್. ಗರೀಬ್ ನಹಿಂ. ದುರ್ಗತೆಂತ್ ಆಸ್ಚಿ ಕೊಣ್ ಆಸಾ ತರ್ ತಿ ಜಾಯ್."
"ತಸಲಿ ಮ್ಹಜೇ ವಳ್ಕೇಂತ್ಲಿ ಕೊಣ್ ಆಸಾ ಹಾಬಾ. ಹ್ಯಾ ನಾಡಾ ಹಳ್ಳೆಂತ್..?" ಅಶೆಂ ಮ್ಹಣುನ್, ಸಕ್ಲಾ ಪಳೆವ್ನ್ ಚಿಂತಾನಾ-
"ತುಂ ತೆಣೆ ಕಾಂಯ್ ಚಿಂತ್ಚಿ ವಾಂವ್ಟ್ ಕಾಡ್ನಾಕಾ, ಹಾಂವೆಂ ತಿಕಾ ಪಳೆವ್ನ್ ಆನಿ ಪಸಂದ್ ಕರುನ್ ಜಾಲಾಂ. ತಿಣೆ ಮ್ಹಾಕಾ ಕಬ್ಲಾತ್ ದೀ-ಶೆಂ, ತುಂ ತಿಕಾ ಭುಲೈಶಿ ಜಾಲ್ಯಾರ್, ಮ್ಹಜಿ ಅಪೇಕ್ಷಾ ಜಾರಿ ಜಾಯ್ತ್."
"ಕೊಣ್ ತೀ? ಖಂಯ್ಚಿ? ನಾಂವ್ ಸಾಂಗ್ ತಿಚೆಂ?"
"ತಿಚೆಂ ನಾಂವ್ ಆಸಾ ಸಿಸಿಲ್" - ತೊ ಹಾಸ್ಕುರ್ಯಾಂ ಮ್ಹಣಾಲೊ.
"ಸಿಸಿಲ್? ತ್ಯಾ ನಾಂವಾಚೇ ಚಲಿಯೆಕ್ ಹಾಂವ್ ಹ್ಯಾ ಸಗ್ಳ್ಯಾ ವಾಡ್ಯಾಂತ್ ಪಳೇವ್ನ್ ನೆಣಾಂಮೂ! ಕಿತೆಂ ತಮಾಷಾಂಚೆ ಲೊಟ್ಟೆ ಉಲೈತಾಯ್ ತೂಂ?"
"ತುಂ, ತುಕಾಚ್ ನೆಣಾಂಯ್ಗೀ, ಸಿಸಿಲಾ? ತೂಂಚ್ ಆಸಾಯ್ ತೀ ಚಲಿ, ಹಾಂವೆಂ ಪಸಂದ್ ಕೆಲ್ಲಿ."
ಸಿಸಿಲ್ ಎಕಾಚ್ಚಾಣೆ ಕುಚುಲ್ಯೊ ಜಾಲ್ಲ್ಯಾ ಜಿನ್ಸಾರ್ ಹಾಸ್ಲಿ ಆನಿ ಹಾಸುನ್ಂಚ್ ಅಶೆಂ ಉಲೈಲಿ.
"ತುಂ ತಕ್ಲೆಂತ್ ಸಾರ್ಕೊ ಆಸಾಯ್ಮೂ, ಎಗ್ಗೀ? ಹಾಂವ್ ಚಲಿ? ಖಂಚಾ ಜಲ್ಮಾಂತ್ಲಿ ಚಲಿ? ಧಾನುನ್ ತುಕಾ ಆಮ್ಚಿ ಪುರಾ ಖರಿ ಪರಿಸ್ಥಿತಿ ಸಾಂಗ್ಲ್ಯಾ ಮ್ಹಣಾಲೊಯ್. ಹೊಯೀ ಲೊಟ್ಟೊ ನಂ. ಫೋರ್. ನೈಂ-ಮೂ? ಸಿಸಿಲ್ ಅನಿಕೀ ಅಂಕ್ವಾರೀಚ್ ಆಸಾ. ತಿಚಾ ಸಾಂಗಾತಾಕ್ ಆಸಾತ್ ತಿಂ ೨ ಭುರ್ಗಿಂ ಎಕಾ ಪರ್ಕ್ಯಾಚಿಂ. ತೀ ತಾಂಚಿ ಪೊಸ್ಕಿ ’ಆಯಾ’ ಆಸೊನ್ ತಾಂಕಾಂ ವಾಗೈತಾ. ಅಶೆಂ ಮ್ಹಣೊನ್, ತಾಣೆ ತುಕಾ ಫಟವ್ನ್ ಹಾಂಗಾ ಧಾಡ್ಲಾ ಪುಣಿಂಗೀ?" ಆನಿ ತೀ ಅನಿಕಿ ಹಾಸ್ಲಿ.
ಎಗ್ಗಿ ಚೂರ್ ಸೈತೀ ಹಾಸ್ಲೊನಾ. ತಾಚಿ ಪ್ರತಿಕ್ರಿಯಾ ಗಂಭೀರಾಯೆಚಿ ಜಾಲಿ. ತಿಣೆ ಉಸಾರ್ಲೆಲೆ ಅಭಿಪ್ರಾಯ್ ಸತ್ ಮ್ಹಳ್ಳೊ ಅರ್ಥ್ ಜಾತಾ. ದೆಕುನ್, ಘನಾಚಾ ಸ್ವರಾನ್ಂಚ್ ತಾಣೆ ಅಸೊ ಪ್ರತಿಪಾವ್ ಕೆಲೊ,-
"ತಾಣೆಂ ಮ್ಹಾಕಾ ಖರಿಂ ಸತಾಂ ಸಾಂಗ್ಲ್ಯಾಂತ್, ಸಿಸಿಲಾ, ದೆಕುನ್ಂಚ್ ಹಾಂವ್ ಸೀದಾ ಹಾಂಗಾಚ್ ಆಯ್ಲಾಂ. ತುಕಾ ಹಾಂವೆಂ ಏಕ್ ಪಾವ್ಟ್ ಸಾಂಗ್ಲಾಂ, ಹಾಂವ್ ಹೆರಾಂ ಕರ್ತಾತ್ ತಸೆಂ ನಕಲ್ ಕಾಡಿನಾಂ, ಮ್ಹಣುನ್, ಹಾಂವ್ ಮ್ಹಜಿಂ ಸ್ವಂತ್ ಧೋರಣಾಂ ಆನಿ ರಿತಿ ಪಾಳೀತ್ ಆಸಾಂ; ಧಾಕ್ಲ್ಯಾಕ್, ಹಾಂವ್ ದವ್ಲತೆಚಾ ಫೆಶನಾಂಚೆಂ, ಪರ್ಮಳಾಂಚೆಂ ನ್ಹೆಸಾಪ್ ಹ್ಯಾ ಗಾಂವಾಂತ್ ನ್ಹೆಸಾನಾಂ; ಶಹರಾಂತ್ಲ್ಯಾ ಚಲಿಯೆಕ್ ಪಸಂದ್ ಕರಿನಾಂ; ದೋತ್ ದೆಣೆ ಘೆನಾಂ; ಆಂಕ್ವಾರಿ ಚಲೀಚ್ ಜಾಯ್ ಮ್ಹಣಾನಾಂ. (ಆತಾಂ ಚ್ಯೊ ಚಡಾವತ್ ಚಲಿಯೋ ಅಪುಟ್ಯೊ ಅಂಕ್ವಾರ್ಯೊ ಮ್ಹಣ್ಚಿ ಖಾತ್ರಿ ನಾ) ಮ್ಹಾಕಾ ಮ್ಹಜೇ ಪ್ರಾಯೆಕ್ ಜೊಕ್ತಿ, ಅನುಭವಿ ವಿಧವ್ ಸ್ತ್ರೀ ಜಾಯ್. ತಸಲಿ ಆಸಾಯ್ ತೀ ತೂಂಚ್, ಸಿಸಿಲಾ; ತುಕಾಚ್ ಹಾಂವೆಂ ಪಸಂದ್ ಕೆಲಾಂ; ತೂಂಚ್ ಜಾಯ್ ಮ್ಹಾಕಾ. ದೆಕುನ್, ಹೆಣೆಂ ತುಂ ತುಕಾಚ್ ಭುಲಯ್ ಆನಿ, ಹಾಂವೆಂ ಉಸಾರ್ಲಿ ತಿ ಮೊಜಿ ಅಪೇಕ್ಷಾ, ಖುಶೇಚೇ ಕಬ್ಲಾತೆನ್, ಮಂಝೂರ್ ಕರ್. ಮಾಗಿರ್ ತುವೆಂ ರಾಂದುಂಕ್ ಭಿತರ್ ವೊಸ್ಯೆತ್."
ಸಿಸಿಲ್ ತಿರ್ಕಾಸ್ ಗುಂವೊನ್ ಬಸೊನ್, ಪಾಲ್ವಾಚೆಂ ಪೋಂತ್ ಹಾತಾಂನಿ ಚಿಡ್ಡಿತ್ತ್, ಮುಡ್ಡಿತ್ತ್, ನಿಮಿಷ್ಭರ್ ಚಿಂತೇಸ್ತಿಣ್ ಜಾಲಿ. ತಿಕಾ ಕಿತೆಂ-ಕಶೆಂ ಉಲವ್ನ್ ಮನಾ ಜೊಕ್ತಿ ಜವಾಬ್ ದಿಂವ್ಚಿ ತಿ ಕಳ್ಳಿನಾ. ತಿಚೆ ಕಿತೆಂ-ಕಶೆಂ ಉಲವ್ನ್ ಮನಾ ಜೊಕ್ತಿ ಜವಾಬ್ ದಿಂವ್ಚಿ ತಿ ತಿಕಾ ಕಳ್ಳಿನಾ, ತಿಚೆ ಪಕ್ಷೇನ್ ಉಲಂವ್ಚೆಂ ಕೊಣೀ ನಾ’ಸ್ಲ್ಲ್ಯಾನ್ ತಿಕಾ ಆತ್ವೆ ಉಬ್ದೇಸ್ ಭೊಗ್ಲೆ. ಮಾಗೀರ್, ’ಹಾಂ-ಹೂಂ’ ಮ್ಹಣಾನಾಸ್ತಾಂ ಜಪ್ಪಾನ್ ಉಟ್ಲಿ ಆನಿ ಸೀದಾ ಸಾಲಾ ಭಿತರ್ ಗೆಲಿ; ಥೈಂ ಆಡೊಸಾಂತ್ ರಾವೊನ್ ಆವಾಜಾ ವಿನಃ ರಡ್ಲಿ.
ಹಾಂತುಂ ಭುರ್ಗ್ಯಾಂಕ್ ಅರ್ಥ್ ಜಾಲೊ. ತೀ ಆತಾಂ ಆಜಾಳಾ (ಕುಳಾರಾ) ವೆತಾ ಮ್ಹಳ್ಳೊ. "ಆಮಿಂ ಯೆತಾಂ-ಮಾ. ಆಮ್ಕಾಂಯೀ ವ್ಹರ್-ಮಾಂ" ಮ್ಹಣತ್ತ್ ತಿಂ, ತಿಚಾ ಪಾಟ್ಲ್ಯಾನ್ಂಚ್ ಗೆಲಿಂ ಆನಿ. ತಿಕಾ ಘಟ್ ವೆಡ್ಕೊಳುನ್ ರಾವ್ಲಿಂ.
ಆತಾಂ ಎಗ್ಬರ್ಟ್ಯೀ ಉಟ್ಲೊ, ಪಾರ್ಕೊಸೊ ಭಿತರ್ ತಾಂಚಾಂ ಕಡೆ ಗೆಲೊ. ಆನಿ ಥೈಂ ಚಿಕ್ಕೆ ಪಯ್ಸ್ ಉಭೊ ಆಸುನ್ ಮ್ಹಣಾಲೊ- "ಸಿಸಿಲಾ, ತುಕಾ ಮನಾಂತ್ಲೆಂ ಸುಟಾವೆಂ ಉಲಂವ್ಕ್ ಭಾಂದ್ಪಾಸ್ ಜಾತಾತ್ ತೆಂ, ಮ್ಹಾಕಾ ಸಮ್ಜಾತಾ. ತುಜೇ ಪಾಡ್ತಿನ್ ಹಾಂವ್ಂಚ್ ಉಲಯ್ತಾಂ, ಎಕೇ ಅಂಕ್ವಾರೇ ಚಲಿಯೆಚಿ ಸೈರಿಕೆಕ್ ಕಬ್ಲಾತ್ ’ತೀ ಹಾಸ್ತಾನಾ ಕಳ್ತಾ’ ಮ್ಹಳ್ಳಿ ಗಾದ್ ಆಸಾ, ತಶೆಂಚ್, ಎಕೇ ವಿಧ್ವೇಚಿ ಕಬ್ಲಾತ್ ’ತೀ ರಡ್ತನಾ ಕಳ್ತಾ’ ಮ್ಹಳ್ಳಿ ವೆಗ್ಳಿಚ್ ಗಾದ್ ಆಸಾ ಮ್ಹಣ್ ದಿಸ್ತಾ. ಅಶೆಂ, ತುಜಿ ಕಬ್ಲಾತ್ ಮ್ಹಾಕಾ ಕಳ್ಳಿ. ಪುರೊ: ಚಡಿತ್ ರಡಾನಾಕಾ, ಆತಾಂ ತುವೆಂ ರಾಂದ್ಪಾಕ್ ಲಾಗ್ಚೆಂ, ಮ್ಹಾಕಾ ಭುಕ್ ಲಾಗ್ಲ್ಯಾ"
"ತುಂ ಮ್ಹಜಾ ರಡ್ಣ್ಯಾಚೊ ಉಲ್ಟೊ ಅರ್ಥ್ ಸಮ್ಜಾನಾಕಾ. ಎಗ್ಗೀ"
ಮ್ಹಣಾಲಿ ತೀ ರಡ್ಕುರ್ಯಾ, ಕಾಂಪೆರ್ಯಾ ಸ್ವರಾನ್. "ಮ್ಹಾಕಾ ತುಜಾ ಸಂಗಿಂ ದುಸ್ರ್ಯಾಪಣಾಕ್ ಕಾಜಾರ್ ಜಾಂವ್ಕ್ ಖುಶಿ ನಾ; ಯೋಗ್ಯತಾ ತ್ಯಾ ಪೈಲೆಂ ನಾ, ಹಾಂವ್ ಆಸಾಂ ಮ್ಹನಾ ಸರ್ಲೆಲ್ಯಾ ಪತಿನ್ ಸಾಂಡ್ಲೆಲೆಂ ಉಷ್ಟೆಂ. ತುಕಾ ಮ್ಹಜೊ ಕಾಂಟಾಳೊ ಭೊಗ್ತಲೊ."
"ಭಿಲ್ಕುಲ್ ನಾ, ಸಿಸಿಲಾ, ತುಂ ಉಷ್ಟೆಂ ಆಸಾಯ್ ತೆಂ ಖರೆಂ, ಪುಣ್ ನಿರ್ಮಳೆಂ ಉಷ್ಟೆಂ-ಎಕಾ ಥರಾಚೆಂ ಪವಿತ್ರ್ ಉಷ್ಟೆಂ: ವ್ಯಭಿಚಾರಾಚೆಂ ಅಥವಾ ಅತ್ಯಾಚಾರಾಚೆಂ ನಹಿಂ; ಮ್ಹಜಾಚ್ ಭಾವಾ ಸಾರ್ಕ್ಯಾ ತರುಣಾನ್, ದೆವಾಚೆ ಪರ್ವಣೆನ್ ಆನಿ, ಸಾಕ್ರಾಮೆಂತಾಚಾ ಆಶೀರ್ವಾದಾನ್ ಉಷ್ಟೆಂ ಘಾಲುನ್, ಮ್ಹಜೇ ಪಾಸ್ವತ್ ಸೊಡ್ಲೆಲೆಂ, ಪವಿತ್ರ್ ಉಷ್ಟೆಂ ಆಸಾಯ್ ತುಂ. ದಾನ್ಯೆಲಾನ್ ಮ್ಹಾಕಾ ಸಾಂಗ್ಲೆಲ್ಯಾ ವಿವರಾ ಆನಿ ಅಭಿಪ್ರಾಯಾಂ ಪ್ರಕಾರ್ ಹಾಂವ್ ಸಮ್ಜಾಲಾಂ ಕೀ, ತುಜೊ ಪತಿ ಆಸಾ. ಪೊರುಂಚ್ ಸಾಂತ್ ಮ್ಹಣೊನ್ ಸನ್ಮಾನಿತ್ ಜಾಲೆಲ್ಯಾ ಫಾದರ್ ಕೋಲ್ಬೇಚೆಂ ಪ್ರತಿರೂಪ್. ಎಕೇ ಆಂಕ್ವಾರೇ ಚಲಿಯೆಚೊ ಮಾನ್ ಆನಿ ಪ್ರಾಣ್. ದುಶ್ಕರ್ಮಿಯಾಂಚಾ ಆಕ್ರಮಣಾಂತುನ್ ಬಚಾವ್ ಕೆಲೆಲ್ಯಾ ಸಾಧನಾಂತ್ ಆಪ್ಲೊ ಜೀವ್ ಬಲಿದಾನ್ ದಿಲ್ಲೊ ಶ್ರೇಷ್ಟ್ ವೀರ್. ತಿ ಚಲಿ ಆಜ್ ಜಿವಂತ್ ಆಸಾ ಆನಿ ಬಹುತೇಕ್ ಮಝೇನ್ ಜಿಯೆತಾ’ಸ್ತೆಲಿ. ಪುಣ್ ನಿರ್ಗತೆಕ್ ಶೆವ್ಟಾಲೆಲೇ ತುಕಾ ಆಧಾರುಂಕ್ ಕೊಣ್ ತರುಣ್ ಫುಡೆಂ ಸರ್ಲೊ? ತುಜಾ ನಿಸ್ವಾರ್ಥಾ ಪತಿಕ್ ಸಾಂತಾಂಚೊ ಮಾನ್ ಭೆಟಂವ್ಕ್ ಕೊಣ್ ಉರ್ಭೆಸ್ತ್ ಜಾಲೊ? ಭಾರತಾಚೊಚ್ ಏಕ್ ಕಾರ್ಡಿನಾಲ್ ರೊಮಾಂತ್ಲೊ ಪಾಪಾ ಜಾಯ್ತ್ ಜಾಲ್ಯಾರೀ, ತೊ ಹೆಣೆ ಅಪ್ಲಿ ಲಕ್ಷಾ ದೀತ್ಗೀ? ನಾ. ಪುಣ್ ಹಾಂವ್, ಹೊಚ್ ಮಾನ್ ತುಕಾ ಮ್ಹಜಾ ಕಾಳ್ಜಾ ಪೂರ್ವಕಿಂ ಭಕ್ತೇನ್ ಭೆಟೈತಾಂ ಆನಿ, ತಾಣೆ ಸೊಡ್ಲೆಲೆಂ ಪವಿತ್ರ್ ಉಷ್ಟೆಂ ಮ್ಹಜೆಂಚ್ ಕರುನ್ ಘುಂವ್ಚೆಂ ತೆಂ ಭಾಗ್ ವೊರ್ತೆಂ ಮ್ಹಣ್ ಸತ್ ಮಾಂದುನ್, ತುಕಾ ಘೆತಾಂ."
ಸಿಸಿಲಾಚೆಂ ದುಃಖಾಳೆಂ ರಡಾಪ್ ಆತಾಂ ಅಪಾಪಿಂಚ್ ಸಂತೊಸಾಚಾಂತ್ ಪರಿವರ್ತನ್ ಜಾಲೆಂ. ತರೀ ತೀ ಅಪ್ಲಿ ಕಬ್ಲಾತ್ ಖುಶೇನ್ ಉಸಾರ್ಚಾಕಡೆ ಆನಿಕೀ ನಾರ್ಗೊನ್, ಘಳಾಯ್ ಕರುನ್ ವೊಗಿಚ್ ಉರ್ಲಿ. ಎಗ್ಗಿಕ್ ಹಾಂತುಂ ಇಲ್ಲೊ ಸಂಶಯ್ ಭೊಗ್ಲೊಕೀ ಅಪುಣ್ ತಿಕಾ ಪಸಂದ್ ಜಾಂ ಗಾಯ್ ಮ್ಹಳ್ಳೊ. ದೆಕುನ್ ತೊ ಪರಿಹಾರ್ ಕರ್ಚೇ ಉದೇಶಿಂ ತಾಣೆ ವಿಸಾರ್ಲೆಂ,-
"ಅನಿಕೀ ತಿತ್ಯಾ ನಾರ್ಗಾತಾಯ್, ಸಿಸಿಲಾ? ತುಕಾ ಹಾಂವ್, ತುಕಾ ಸರ್ಲೆಲ್ಯಾ ಪತಿ ಸಾರ್ಕೊ, ಆಕರ್ಷಿತ್ ದಿಸಾನಾ ಪುಣಿಂವೇ?" ಸತ್ ಉಚಾರ್?"
ತೀ ಎಕಾಚ್ಚಾಣೆ ಹುರುಪಿತ್ ಜಾಲಿ ಆನಿ ಮ್ಹಣಾಲಿ. - "ಮ್ಹಜಾ ಲ್ಹಾನ್ಪಣಾ ಲಾಗಾಯ್ತ್ ಮ್ಹಾಕಾ ಅಧಿಕ್ ಆಕರ್ಷಿಕ್ ಆನಿ ಪ್ರೀತಿಚೊ ಆಸುಲ್ಲೊಯ್ ತುಂ, ಆತಾಂ ಕಸೊ ಉಲ್ಟೊ ದಿಸ್ತಲೊಯ್? ಹಾಂವ್ ನಾರ್ಗಾಲಿಂ ಕಿತ್ಯಾ ಮ್ಹಳ್ಯಾರ್, ತುಕಾ ದೋತಿ ತರ್ಫೆನ್ ದೀಂವ್ಕ್, ಸರ್ಲೆಲ್ಯಾ ಪತಿನ್ ಧನಾನ್ ಯಾ ಬದ್ಕಾನ್ ಯಾ ದಿರ್ವ್ಯಾನ್ ಸೊಡ್ಲೆಲೆಂ, ಮ್ಹಜಾಲಾಗಿಂ ಕಾಂಯ್ ನಾ-ಮೂ, ಮ್ಹಳ್ಳೆಂ ಚಿಂತುನ್."
"ಏ ಸಿಸಿಲಾ! ಕಾಂಯ್ ನಾ ಮ್ಹಣೊನ್ ಕಿತ್ಯಾ ತಸೆಂ ನೆಗಾರ್ ಕೆಲೆಂಯ್? ಹಿಂ ದೋನ್ ಮಾಣ್ಕುಲಿಂ ಬಾಳಾಂ ಆಸಾತ್ ತಿಂ ಕಿತೆಂ ಮ್ಹಣುನ್ ಸಮ್ಜಾಲ್ಯಾಯ್? ಹಾಂಕಾಂ ದುಡ್ವಾಚ್ಯಾ ಮೊಲಾನ್ ತಾಳ್ ಕರುಂಕ್ ಜಾಂವ್ಚೆಂ ಧನ್ ಯಾ ದಿರ್ವೆಂ ಯಾ ಬದಿಕ್ ಸಂಸಾರಾರ್ ದುಸ್ರೆಂ ಕಿತೆಂ ಆಸಾ? ಧೋತಿ ಬದ್ಲಾಕ್ ತುಂ ಹಾಂಕಾಂ ಉಕ್ಲುನ್ ಮ್ಹಾಕಾ ದೀ. ಇತ್ಲೆಂಚ್ ಪುರೊ. ಧನ್, ದಿರ್ವೆಂ, ಘರ್ ಆನಿ ಸುಖಾಳೊ ಫುಡಾರ್ ತುಕಾ ಹಾಂವ್ ದಿತಾಂ, ದರಬಸ್ತ್ ಮಾಪಾನ್."
ಹಾಂವ್ ಸಿಸಿಲ್ ಉದ್ವೇಗಾನ್ ಫುಲ್ಲಿ. ಗಾಲಾಂನಿ ಹಾಸ್ಲಿ ಆನಿ, ಎಗ್ಬರ್ಟಾಕ್ ಫುಡ್ ಕರುನ್ ಮ್ಹಣಾಲಿ.-
"ಇತ್ಲೆಂಚ್ ಪುರೊ ತರ್, ತುಜಿ ಹಿ ವಿಚಿತ್ರ್ ಅಪೇಕ್ಷಾ ಮ್ಹಜ್ಯಾಕಡೆ ಜಾರಿ ಜಾಂವ್. ಮ್ಹಜಾ ಸರ್ಲೆಲ್ಯಾ ಪತಿಚಾ ಅತ್ಮ್ಯಾಕ್ ಸರ್ಗಾರ್ ಚಡ್ ಆನಂದ್ ಜಾಂವ್. ಆತಾಂ, ತುಂ ಹಾಂಕಾಂ ಪೈಲೆಂ ಘೆ". ಆನಿ ತಿಣೆ ಪೈಲ್ಯಾನ್ ಬಾಬ್ಲಿಕ್, ದುಸ್ರ್ಯಾನ್ ಬುಲ್ಲಾಕ್ ಉಕ್ಲುನ್, ಎಗ್ಗಿಚಾ ಎಕೆಕಾ ಬಾವ್ಳ್ಯಾಚಾ ವೆಡ್ಕೊಳಾಂತ್ ದಿಲೆಂ.
"ಆತಾಂ’ಮಿಂ ಆಬಾಗೆರ್ ಯಾ" ಮ್ಹಣಾಲೊ ಬಾಬ್ಲಿ ಸಂತೊಸಾನ್ ಉಳ್ವುಳೊನ್. ಹೆರಾಂ ಸಕ್ಡಾಂ ದಾದೊಶಿ ಹಾಸ್ಲಿಂ.
"ಲಗ್ನಾ ಆಧಿಂಚ್ ದೊಗಾಂ ಆಂಜಾಳ್ಯಾ ಭುರ್ಗ್ಯಾಂಚೊ ಆಂಕ್ವಾರೊ ಬಾಪ್ ಜಾಲೊಂ ಹಾಂವ್" ಮ್ಹಣಾಲೊ ಎಗ್ಗಿ. ಭುರ್ಗ್ಯಾಂಚೆಂ, ಎಕ್ಲ್ಯಾ ನಂತರ್ ದುಸ್ರ್ಯಾಚೆ ಉಮೆ ಚಿಂವುನ್, ಆನಿ ಉಲ್ಲಾಸಾಚೆ ನಾಚ್ ನಾಚೊನ್.
********
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
