ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತವಳ್ ತವಳ್
ಹೆಂ ವಾರ್ಜಿಕ್ ಹರ್ಶೆಂಚೆಂ, ಕಾಲ್ಚೆಂ, ಆಯ್ಚೆಂ, ಫಾಲ್ಯಾಂಚೆಂ, ತವಳ್ತವಳ್ ಮತಿಚಾ ಪಡ್ದ್ಯಾಚೆರ್
ಖಂಚೊನ್ ಯೆಂವ್ಚೆಂ ಲಿಸಾಂವ್, ಬೆಸಾಂವ್ ಯಾ ತೆಸಾಂವ್...
ತವಳ್ತವಳ್ - 2 . ಉಜ್ವಾಡ್
ಮೆಲ್ವಿನ್ ಜೆ. ವಾಸ್
ಉಜ್ವಾಡ್...!
ಮನಿಸ್ ಆಪ್ಲ್ಯಾ ಜಿವಿತಾಚೆಂ ಹರ್ಯೆಕ್ ಮೇಟ್ ಉಜ್ವಾಡಾಂತ್ಚ್ ಕಾಡುಂಕ್ ಕಿತ್ಯಾಕ್ ಪೆಚಾಡ್ತಾ? ಬಹುಶಃ ಹೆಂ ವಯ್ಲ್ಯಾಬಾರ್ ಪಳೆಯ್ಲ್ಯಾರ್ ಪಿಶೆಂಪಣಾಚೆಂ ಸವಾಲ್. ಜಶೆಂ ತುಂ ಕಿತ್ಯಾಕ್ ಕಾಜಾರ್ ಜಾತಾಯ್ ಮ್ಹಣೊನ್ ವಿಚಾರ್ಲ್ಲ್ಯಾ ಪರಿಂ. ಹಾಚಿ ಜವಾಬ್ಯಿ ನಿತಳ್. ಮ್ಹಜೊ ಬಾಬ್ ಕಾಜಾರ್ ಜಾಲಾ ತಶೆಂ ಹಾಂವ್ಯೀ ಜಾತಾಂ. ಅಶೆಂಚ್ ಹರ್ಯೆಕ್ಲೊ ಕಾಳೊಕಾಂತ್ ದಾಂಟೊನ್ ಪಡ್ತಾ ದೆಕುನ್ ಉಜ್ವಾಡ್ ಆಶೆತಾ. ಉಜ್ವಾಡಾಂತ್ ಜಿಯೆಂವ್ಕ್ ಆಶೆತಾ. ಕಾಳೊಕಾಕ್ ಜಾತಾ ತಿತ್ಲ್ಯಾ ಪಯ್ಸ್ ದವರುಂಕ್ ಅಪೇಕ್ಷಿತಾ.
ಕಿತ್ಲ್ಯಾ ಪಯ್ಸ್?
ಘರಾ ಥಾವ್ನ್ ಭಾಯ್ರ್, ಯಾ ಕೊಣಾಚಾ ದೊಳ್ಯಾಂ ಭಾಯ್ರ್...? ದುಸ್ರ್ಯಾಚಾ ದೊಳ್ಯಾಂ ಭಾಯ್ರ್ಯಿ ಉಜ್ವಾಡ್ ಆಸಾ. ಬಹುಶಃ ಮ್ಹಾಕಾ ತೊ ಕಾಳೊಕ್ ದಿಸ್ತಾ. ಉಜ್ವಾಡ್ ಆನಿಕ್ ಕಾಳೊಕ್ ಮ್ಹಾಕಾ ಮಾತ್ರ್. ಉಜ್ವಾಡಾನ್ ಕೆದಾಳಾಯ್ ಕಾಳೊಕಾಕ್ ಪಳೆಯ್ಲಾ ತರ್ ಕಾಳೊಕ್ ಆಸಾ ಮ್ಹಣೊನ್ ಕಶೆಂ ಸಾಂಗ್ಚೆಂ?
ಉಜ್ವಾಡಾಲಾಗಿಂ ಹಾಂವ್ ಸಾಂಗೊ ತರ್ ತುಜೊ ದುಸ್ಮಾನ್ ಕಾಳೊಕ್ ಆಸಾ ಮ್ಹಳ್ಯಾರ್ ತೊ ಹಾಸೊಂಕ್ ಆಸಾ. ಜಶೆಂ ಆತಾಂ ತುಂ ಹಾಸ್ತಾಯ್. ಉಜ್ವಾಡಾಂತ್ ಉಜ್ವಾಡಾಚಿ ಪಿಂರ್ಗೊಣಿ ಕೊಣೆಂಯ್ ಆಯ್ಕಾಲ್ಯಾ? ಉಜ್ವಾಡಾಂತ್ ಉಜ್ವಾಡ್ ಪಿಂರ್ಗಾತಾ ಜಶೆಂ ರಾವ್ಳೆರಾ ಭಿತರ್ ಪೊಸ್ಲೊಲೊ ಕೀರ್ ರಡ್ತಾ. ರಾವ್ಳೆರಾ ಭಿತರ್ ಸಗ್ಳೆಂ ಆಸಾ ತರ್ಯೀ ತೊ ಥಂಯ್ಸರ್ ಖೈದ್ ಜಾವ್ನ್ ಆಸಾ. ತೊ ಭಾಯ್ಲ್ಯಾ ತಾಚ್ಯಾ ಸ್ವಾತಂತ್ರ್ಯಾಚಾ ಸಂಸಾರಾಕ್ ಆಶೆತಾ. ಬಹುಶಃ ಹೊಚ್ಚ್ ಕೀರ್ ಪಯ್ಲೊ ರಾವ್ಳೆರಾ ಭಾಯ್ರ್ ಆಸ್ತಾನಾ ರಾವ್ಳೆರಾಂತ್ಲೆಂ ಸುಖ್ ಆಶೆತಾಲೊ ಜಾಂವ್ಕ್ ಪುರೊ. ಪಯ್ಲೆಂ ಥಂಯ್ಸರ್ ಖೈದಿ ಆಸ್ಲ್ಲೊ ತೊ ಆತಾಂ ರಾವ್ಳೆರಾಂತ್ ಖೈದ್. ಮನ್ಶ್ಯಾ ಸೈಂಭ್ಯಿ ಅಶೆಂಚ್...! ದಿಸಾಚಾ ಉಜ್ವಾಡಾಂತ್ ಕಾಳೊಕ್ ಆನಿಕ್ ಕಾಳ್ಕಾಯೆಂತ್ ಉಜ್ವಾಡ್...!
ಅಶೆಂ ಕಿತ್ಯಾಕ್?
ಉಜ್ವಾಡ್ ಆನಿಕ್ ಕಾಳೊಕ್ ವಿವಿಂಗಡ್ ಕಾಂಯ್ ನಹಿಂ. ಉಜ್ವಾಡಾ ಥಾವ್ನ್ಚ್ ಕಾಳೊಕ್ ಉಬ್ಜಾತಾ. ಕಾಳೊಕ್ ಜಾವ್ನಾಸಾ ಉಜ್ವಾಡಾಚಿ ಸಾವ್ಳಿ. ಉಜ್ವಾಡ್ ನಾಸ್ತಾನಾ ಕಾಳೊಕ್ ಜಲ್ಮೊಂಚೊ ತರ್ಯಿ ಖಂಯ್ ಥಾವ್ನ್? ದೇವ್ ಉಜ್ವಾಡ್ ಜಾವ್ನ್ ಆಸ್ಲ್ಲೊ ಆನಿಕ್ ತಾಣೆಂ ಮ್ಹನ್ಶ್ಯಾಕ್ ರಚ್ಲೊ. ದೆವಾನ್ ಮ್ಹನ್ಶ್ಯಾಕ್ ತಾಚಾ ಸಾವ್ಳೆಂತ್ ರಚುಂಕ್ ನಾತ್ಲ್ಲೆಂ ಬಗಾರ್ ತಾಚ್ಯಾ ಸಾರ್ಕ್ಯಾಚೆಂ ರಚ್ಲ್ಲೆಂ. ತರ್ ಉಜ್ವಾಡಾಚೆಂ ರಚ್ನೆಂ ಖಂಡಿತ್ ಉಜ್ವಾಡ್ಚ್.
ತರ್ ಕಾಳೊಕ್ ಕಿತ್ಯಾಕ್...?
ಉಜ್ವಾಡಾನ್ ತಾಚಿ ಸಾವ್ಳಿ ಕಿತ್ಯಾಕ್ ಪಾಟ್ಲ್ಯಾನ್ ಸೊಡ್ಲಿ? ಆಪ್ಲೆಂಚ್ ಜಲ್ಮ್ ದಿಲ್ಲ್ಯಾ ಸಾವ್ಳೆ ಖಾತಿರ್ ಉಜ್ವಾಡ್ ಆಜ್ ರಡ್ತಾ ಕಿತ್ಯಾಕ್? ಜರ್ ಹಾಂವ್ ಉಜ್ವಾಡಾಕ್ ಲಾಗಿಂ ಲಾಗಿಂ ವೆತಾಂ ತೆದ್ನಾಂ ಮ್ಹಜಿ ಸಾವ್ಳಿ ಪಾಟ್ಲ್ಯಾನ್ ಲಾಂಬ್ ಲಾಂಬ್ ಜಾವ್ನ್ಂಚ್ ವೆತಾ. ಉಜ್ವಾಡಾಕ್ ಲಾಗಿಂ ಜಾಂವ್ಚ್ಯಾಕ್ ಆನಿಕ್ ಸಾವ್ಳಿ ಲಾಂಬ್ ಜಾಂವ್ಚ್ಯಾಕ್ ಮತ್ಲಾಬ್ ಕಿತೆಂ? ಸಂಸಾರಾಂತ್ಲ್ಯಾ ಹರ್ಯೆಕಾ ರಚ್ನೆಂ ಥಾವ್ನ್ ಮನಿಸ್ ಲಿಸಾಂವ್ ಶಿಕ್ತಾ. ಮನ್ಶ್ಯಾಚಾ ಲಿಸಾಂವಾ ಖಾತಿರ್ಚ್ ಸಗ್ಳೆ ರಚ್ನೆಂ ರಚನ್ ಜಾಲಾಂ, ಅಶೆಂಚ್ ಕಾಳೊಕ್ಯಿ. ಕೆದ್ನಾಂ ಹಾಂವ್ ಉಜ್ವಾಡಾಕ್ ಲಾಗಿಂ ಜಾತಾಂ, ಜೆದ್ನಾಂ ಮ್ಹಾಕಾ ಉಜ್ವಾಡಾಚಿ ಪಿಂರ್ಗೊಣಿ ಆಯ್ಕೊಂಕ್ ಯೆತಾ. ಹಾಂವ್ ಉಜ್ವಾಡಾಕ್ ಕಿತ್ಲೆ ಲಾಗಿಂ ಲಾಗಿಂ ಜಾತಾಂ ತಿತ್ಲೆ ಚಡ್ ತಿ ಆಯ್ಕಾತಾ. ಉಜ್ವಾಡಾಕ್ ಲಾಗಿಂ ಜಾಂವ್ಚಾಕ್ ಆನಿಕ್ ಚೊವೀಸ್ ವೊರಾಂಯ್ ಉಜ್ವಾಡಾಂತ್ ರಾಂವ್ಚ್ಯಾಕ್ ವ್ಯತ್ಯಾಸ್ ಕಿತೆಂ?
ಉಜ್ವಾಡಾಕ್ ಲಾಗಿಂ ಜಾಂವ್ಚೊ ಉಜ್ವಾಡಾಂತ್ಚ್ ಆಸ್ಲ್ಲೊ, ಪೂಣ್ ತೊ ಉಜ್ವಾಡಾಕ್ ನೆಣಾಂ ಆಸ್ಲ್ಲೊ. ತಾಕಾ ಉಜ್ವಾಡಾಚಿ ವಳಕ್ ನಾತ್ಲ್ಲಿ. ತಾಚ್ಯೆ ಸಂಗಿಂ ಸಂಬಂಧ್ ನಾತ್ಲ್ಲೊ. ನಾತ್ಲ್ಲ್ಯಾ ಸಂಬಂಧಾಂತ್ ಮೋಗ್ ಖಂಯ್ ಥಾವ್ನ್ ಉದೆಂವ್ಚೊ? ನಾತ್ಲ್ಲ್ಯಾ ಮೊಗಾಂತ್ ಪಿಂರ್ಗೊಣಿ ಕಶಿ ಆಯ್ಕೊಂವ್ಚಿ? ಆಜ್ ಹ್ಯಾ ಕುವೇಯ್ಟಾಚಾ ವ್ಹಡ್ಲ್ಯಾ ವ್ಹಡ್ಲ್ಯಾ ಇಮಾರಾತೆಚಿಂ ಮೆಟಾಂ ಚಡ್ತಾಂ ಚಡ್ತಾಂ ಹಿ ಪಿಂರ್ಗೊಣಿ ಆಯ್ಕಾತಾ. ಹ್ಯಾಚ್ ಖಾತಿರ್ ಮನಿಸ್ ಆಪ್ಲ್ಯಾ ಭೊವ್ತಿಂ ಚ್ಯಾರ್ಯಿ ಕುಶಿಂನಿ ವೊಣೊದ್ ಬಾಂದುನ್ ತ್ಯಾ ಲಿಪ್ಟಾ ದ್ವಾರಿಂ ವಯ್ರ್ ಪಾವ್ತಾ. ಪಿಂರ್ಗೊಣಿ ಥಾವ್ನ್ ಪಯ್ಸ್. ಪೂಣ್...ಉಜ್ವಾಡಾ ಥಾವ್ನ್ ನಹಿಂ...! ಆಮಿಂ ಉಜ್ವಾಡಾಚಿಂ ಭುರ್ಗಿಂ ಮ್ಹಣೊನ್ ಉಣ್ಯಾ ಖರ್ಚಾರ್ ಕುವೇಯ್ಟಾಂತ್ ಕಿತ್ಲಿಯೀ ವೀಜ್ ಸಕತ್ ಝಳವ್ಯೆತ್, ದೆಕುನ್ ಆಖ್ಖಿ ರಾತ್ ಭರ್ ದಿವೆ ಝಳವ್ನ್ ಹಾತ್ ವಯ್ರ್ ಘಾಲುನ್ ಬೋಬ್ ಮಾರ್ಲ್ಯಾರ್ ಉಜ್ವಾಡಾಕ್ ಆನಿಕ್ ಮ್ಹಾಕಾ ಸಂಬಂಧ್ ಉದೆಲೊ?
ವೀಜ್ ದಿವೆ ಪುಕ್ಕ್ ಕರುನ್ ಪಾಲ್ವಾಲ್ಲ್ಯಾ ಪರಿಂ ಹೊ ಸಂಬಂಧ್ಯಿ ಪಾಲ್ವಾಲೊ. ತರ್ ದೊಳ್ಯಾಂ ಮುಕ್ಲ್ಯಾ ಉಜ್ವಾಡಾಕ್ ಹಾಂವ್ ಥಂಯ್ ಹಾಂಗಾ ಕಿತ್ಯಾಕ್ ಸೊಧ್ತಾಂ? ಹಾಂವ್ ಸೊಧ್ತಾಂ ಕಿತ್ಯಾಕ್ ಮ್ಹಳ್ಯಾರ್ ಮ್ಹಾಕಾ ಉಜ್ವಾಡ್ ಮೆಳೊಂಕ್ ನಾ. ಅಶೆಂಚ್ ಸೊಧುನ್ ಸೊಧುನ್ ಮ್ಹಜಿ ಸಾವ್ಳಿ ಲ್ಹಾನ್ ಲ್ಹಾನ್ ಜಾವ್ನ್ ಯೇವ್ನ್ ಏಕ್ ದೀಸ್ ಸಗ್ಳೊ ಉಜ್ವಾಡ್ಚ್ ಜಾತಾನಾ ಮ್ಹಜ್ಯಾ ಅತ್ಮ್ಯಾಚಾ ದಾರಾರ್ ಮಾತ್ರ್ ಕಾಳ್ಬಾಣ್ ದಿಸ್ತೆಲಿ. ಉಜ್ವಾಡಾಕ್ ವೆಂಗುಂಕ್ ಮ್ಹಜೊ ಅತ್ಮೊ ಸಕ್ಚೊನಾಂ.
ತರ್....!
ಉಜ್ವಾಡಾಕ್ ಪಾರ್ಕುಂಚೆಂ ಆನಿಕ್ ಹಾಂವ್ ಹಾಸ್ತಾನಾ ಕೊಣಾಯ್ಚೆ ರಡ್ಣೆಂ ಆಯ್ಕೊಂವ್ಚೆಂ ಮ್ಹಜ್ಯಾ ಪಾಟ್ಲ್ಯಾ ಸಾವ್ಳೆಕ್ ಹಾವೆಂ ದಿಂವ್ಚಿ ವಾಡಾವಳ್. ಮ್ಹಳ್ಯಾರ್ ಹಾಂವ್ ಉಜ್ವಾಡಾಕ್ ಲಾಗಿಂ ಜಾತಾಂ....!!
ಮ್ಹಾಕಾ ಮ್ಹಜಿಂ ಬಾಯ್ಲ್ ಭುರ್ಗಿಂ ಸಾಂಗಾತಾ ಜಾಯ್ ದೆಕುನ್ ಗಾಂವಾಂತ್ ಮ್ಹಜ್ಯಾ ಆವಯ್ ಬಾಪಾಯ್ಕ್ ತಾಂಚಾ ಮಾತಾರ್ಪಣಾರ್ ಎಕ್ಸುರೆಂ ಕರುನ್ ಯಾ ತಾಂಕಾಂ ಮಾತಾರ್ಯಾಂಚಾ ಆಸ್ರ್ಯಾಂತ್ ದವರುನ್ ತಾಂಚಾ ಖರ್ಚಾಚಾ ಪಯ್ಶ್ಯಾಂಚಿ ವಿಲೆವಾರಿ ಕೆಲ್ಯಾರ್ ಜಾಲೆಂ ಮ್ಹಣೊನ್ ಚಿಂತ್ಚೊ ಹಾಂವ್ ತಾಂಚೆಂ ರಡ್ಣೆಂ ಕಶೆಂ ಆಯ್ಕೊಂಕ್ ಸಕ್ತಲೊಂ?
ರಡ್ಣೆಂ ಆಯ್ಕೊಂಕ್ ಸಕನಾತ್ಲ್ಲೊಂ ಹಾಂವ್ ಹ್ಯಾ ಕರೆಜ್ಮಾಚಾ ಕಾಳಾರ್ಯಿ ತ್ಯಾ ವೀಜ್ ದಿವ್ಯಾಚಾ ಉಜ್ವಾಡಾಂತ್ ಖರ್ಯಾ ಉಜ್ವಾಡಾಕ್ ಭಾಯ್ರ್ ದವರುನ್ ಪಾರ್ಟೆಚಾ ನಾಂವಾರ್ ಆಪ್ಲಿ ಸಾವ್ಳಿ ನಿತ್ಳಾಂವ್ಚ್ಯಾ ಉಜ್ವಾಡಾಕ್ ಕಶೆಂ ವೊಳ್ಕಾತಾಲೊಂ. ಕಾಂಟೊ ಕಿತ್ಲೊ ಚಡ್ ತೊಪ್ತಾ ತಿತ್ಲಿ ದೂಖ್ ಚಡ್...! ಪೂಣ್ ಹಾಂಗಾ ಕಾಂಟೊ ತೊಪುಂಕ್ ಕೋಣ್ ಆಶೆತಾ? ಕೊಣ್ಚ್ ನಾಂ. ಪುಣ್ ಕಾಂಟೆ ಘೆವ್ನ್ ತ್ಯಾ ಕರೆಜ್ಮಾತಿಕ್ ಸಾಂಜೆರ್ ಸಗ್ಳಿ ರಾತ್ ಬೋಬ್ ಮಾರುಂಕ್ ಹಾಂವ್ ಕಿತ್ಯಾಕ್ ಆಶೆತಾಂ?
ಹ್ಯಾಚೆ ಬದ್ಲಾಕ್ ತೆಚ್ಚ್ ಕಾಂಟೆ ಹಾಂವೆಂ ಮ್ಹಜ್ಯಾ ಕುಡಿಕ್ ತೊಪುನ್ ಬೋಬ್ ಮಾರ್ಲ್ಯಾರ್...? ಹೆಂ ಕಶೆಂ ಜಾಂವ್ಚೆಂ? ಅಶೆಂ ಜಾಲ್ಯಾರ್ ಹಾಂವ್ ಸಂಸಾರಾಂತ್ಲೊ ಸಾಂತ್ ಕಸೊ ಜಾತಲೊಂ? ವರ್ಸಾಕ್ ಏಕ್ ಪಾವ್ಟಿಂ ಯೆಂವ್ಚಾ ನವಿಂ ಪಾಳಾಂ ಫಳಾಂ ಖಾಂವ್ಚ್ಯಾ ಫೆಸ್ತಾಚಾ ದಿಸಾ ಪಾಸೊನ್ ಹಾಂಗಾಚಿ ಆವಯ್ ಸಾಂಗ್ತಾ
"ಮ್ಹಜ್ಯಾ ಭುರ್ಗ್ಯಾಂಕ್ ಮಾಸ್ ಕಬಾಬ್ ನಾಸ್ತಾನಾ ಜೆವಾಣ್ ಜೇಂವ್ಕ್ ಜಾಯ್ನಾಂಯಾ"
ಮಾಸಾಂ ಖಾವ್ನ್ಂಚ್ ಜಿಯೆಂವ್ಚಿ ಮ್ಹನ್ಶ್ಯಾಂ ವಿಣ್ಗ್ಯಾ ಕುಡಿರ್ ಭುಖೆಕ್ ಉರ್ಡೊಂಚೆಂ ಕಶೆಂ ಪಳೆಂವ್ಕ್ ಸಕ್ತೆಲಿಂ. ಹೆಂ ಪಳೆಂವ್ಕ್ ಸಕಾನಾತ್ಲ್ಲೆಂ ಕಶೆಂ ಆಪುಣ್ ಉಜ್ವಾಡಾಂತ್ ಆಸಾಂ ಮ್ಹಣೊನ್ ಸಾಂಗ್ತೆಲಿಂ. ಉಜ್ವಾಡ್ ಹಾಂಚಾ ಕುಜ್ನಾಂತ್ ಕಳ್ಶೆ ಪಂದಾ ಖೈದ್ ಜಾಲಾ...!
ಉಜ್ವಾಡಾಕ್ ಆನಿಕ್ ಮ್ಹನ್ಶ್ಯಾಕ್ ರಗ್ತಾಚೊ ಸಂಬಂಧ್ ಆಸಾ ಮ್ಹಣ್ಯೆತ್. ರಗಾತ್ ತರ್ ರಾವ್ಲೆಂ, ಉಜ್ವಾಡ್ ಉಬ್ಲೊ. ಉಬ್ಚಾ ಉಜ್ವಾಡಾಕ್ ಮನಿಸ್ ಉಬೊಂಕ್ ಕಶೆಂ ಸೊಡ್ತಲೊ, ಹಾಂವ್ ತರ್ಯಿ ಖಂಡಿತ್ ನಾಂ. ನವ್ಯಾ ಇಗರ್ಜೆಚಾ ಭಾಂದ್ಪಾಚ್ಯಾ ಭಿತರ್ಲ್ಯಾ ಮಾರ್ಬಲ್ ಫಾತ್ರಾರ್ ಮ್ಹಜೆಂ ನಾಂವ್ ಕೋಣ್ ಪುಸ್ತಾಲೊ? ತ್ಯಾ ಮೈಕಾಚೆರ್ ನಾಂವ್ ಕಾಡ್ನ್ ಹಾಂವೆಂ ದಾನ್ ದಿಲ್ಲೆಂ ಆನಿಕ್ ಸ್ಮಾರಕ್ ಬುಕಾಂಚಾ ಪಾನಾಂನಿ ಪಿಂತ್ರಾಯಿಲ್ಲೆಂ ಮ್ಹಜೆಂ ನಾಂವ್ ಕೋಣ್ ಪಿಂದುಂಕ್ ಸಕ್ತಾ?
ಹ್ಯಾ ಉಜ್ವಾಡಾಂತ್ ಹಾಂವೆಂ ಮ್ಹಜ್ಯಾ ನಾಂವಾಕ್ ಬರೆಂಚ್ ಪರ್ಜಳಾಯ್ಲಾಂ. ಆನಿಕ್ ದುಸ್ರೆಂ ಕಿತೆಂ ಜಾಯ್?
ಇತ್ಲೊ ಬರೊ ಮನಿಸ್ ಹಾಂವ್ ಮ್ಹಾಕಾ ಜರ್ ಕೊಣೆಯ್ ಉಜ್ವಾಡಾವಿಶಿಂ ಸವಾರ್ ಕೆಲ್ಯಾರ್ ತಿ ಖಂಡಿತ್ ತಾಚಿ ಚೂಕ್. ತರ್ ಹಾಂವ್ ಉಜ್ವಾಡಾಂತ್ ಆಸಾಂ? ಹಾಂವ್ ಉಜ್ವಾಡಾಂತ್ ಆಸ್ಲ್ಲೊಂ ತರ್ ಮ್ಹಜಿ ಸಾವ್ಳಿ ಖಂಯ್ ಗೆಲಿ? ಹಾಂವ್ ಉಜ್ವಾಡಾಕ್ ಚಡ್ ಆನಿ ಚಡ್ ಲಾಗಿಂ ಆಸ್ಲ್ಲೊಂ ತರ್ ತಿ ಮ್ಹಜಿ ಚಡ್ ಆನಿ ಚಡ್ ಲಾಂಬ್ ಸಾವ್ಳಿ ಖಂಯ್ ಗೆಲಿ? ಹಾಂಗಾ ಸಾವ್ಳಿ ನಾಂ ಮ್ಹಳ್ಯಾರ್ ಹಾಂವ್ ಉಜ್ವಾಡಾಂತ್ ನಾಂ. ಹಾಂವ್ ಉಜ್ವಾಡಾಂತ್ ನಾಂ ತರ್ ಖಂಯ್ ಆಸಾಂ? ಕಾಳೊಕಾಂತ್? ಕಾಳೊಕ್ ಖಂಯ್ ಆಸಾ? ಕಾಳೊಕಾಕ್ ಹಾಂವೆಂ ಮ್ಹಜೆ ಲಾಗಿಂ ಯೇಂವ್ಕ್ ಸೊಡುಂಕ್ ನಾತ್ಲ್ಲೆಂ, ಜಶೆಂ ಹಾತಾಂತ್ಲೆಂ ಕೋಂತ್ ಗಳ್ಯಾಂತ್ ಆನಿಕ್ ಗಳ್ಯಾಂತ್ಲೆಂ ಕೋಂತ್ ಹಾತಾಂತ್...!
ಇತ್ಲ್ಯಾ ಉಜ್ವಾಡಾಂತ್ ಆಸ್ಲ್ಲೊಂ ಹಾಂವ್. ಕಾಳೊಕ್ ಕಿತೆಂ ಹಾಂವ್ ನೆಣಾಂಚ್ ಆಸ್ಲ್ಲೊಂ. ತರ್ ಆಜ್ ಹ್ಯಾ ರೆಂವೆಚ್ಯಾ ಕಣಾ ಕಣಾನಿಂ ಉಜ್ವಾಡಾಚಿ ಪಿಂರ್ಗೊಣಿ ಕಶಿ ಆಯ್ಕಾತಾ? ಉಜ್ವಾಡಾಕ್ ಕೊಣೀ ವಿರೋಧಿ ನಾಂ ತರ್ ಉಜ್ವಾಡ್ ಕಿತ್ಯಾ ಖಾತಿರ್ ಪಿಂರ್ಗಾತಾ. ಪಿಂರ್ಗೊಣಿ ಖೈದ್ ಜಾಲ್ಲ್ಯಾಂಚಿ ವಾ ಸಗ್ಳ್ಯಾಂನಿ ಸಾಂಡುನ್ ಘಾಲ್ಲ್ಯಾಂಚಿ....!
ಉಜ್ವಾಡಾಕ್ ಕೊಣೆ ಖೈದ್ ಕೆಲಾಂ? ತಾಕಾ ಕೊಣೆಂ ಸಾಂಡುನ್ ಘಾಲಾಂ? ಕೊಣಾಯ್ಕಿಯ್ ಹಾಂವ್ ಸವಾಲ್ ಕಿತ್ಯಾಕ್ ವಿಚಾರುಂ? ಮ್ಹಜ್ಯಾ ಪಾಕ್ಯಾ ಭಿತರ್ ಕಿತ್ಲೊ ಜಾತಾ ತಿತ್ಲೊ ಉಜ್ವಾಡ್ ಹಾಂವೆಂ ಖೈದ್ ಕೆಲಾ. ಮ್ಹಜ್ಯಾ ಪಾಕ್ಯಾ ಭಾಯ್ರ್ ಜಾತಾತಿತ್ಲೆಂ ತಾಕಾ ಹಾಂವೆಂ ಸಾಂಡುನ್ ಘಾಲಾಂ. ಘರಾಕ್ ಉಜ್ವಳ್ಚೊ ದೊವೊ ಪೇಂಯ್ಟ್, ಚೊವೀಸ್ ವೊರಾಂಯಿ ಉಜ್ವಾಡ್ ವೀಜ್ ದಿವ್ಯಾಂಚೊ, ನೀಜ್ ನಿತಳ್ ಉಜ್ವಾಡಾಕ್ ಖೈದ್ ಕರುನ್ ದವರ್ಲ್ಲೊ. ಘರಾ ಭಾಯ್ರ್ ಹಾಂವೆಂ ನ್ಹೆಸ್ಚೆಂ ಧೊವೆಂ ಪರ್ಜಳ್ಚೆಂ ನ್ಹೆಸಾಣ್ ಆನಿಕ್ ಮ್ಹಜ್ಯಾ ಮಾತ್ಯಾ ವಯ್ಲಿ ಸಾವ್ಳೆಚಿ ಸತ್ರಿ,
ಮ್ಹಜ್ಯಾ ಕಾನಾಂಕ್ ಲಾಯಿಲ್ಲೆಂ ಹೆಡ್ಪೋನ್ ಆನಿಕ್ ದೊಳ್ಯಾಂಕ್ ಸೊಭೊಯಿಲ್ಲ್ಯಾ ವೊಕ್ಲಾಂನಿ ತ್ಯಾ ಉಜ್ವಾಡಾಕ್ ಹಾಂವೆಂ ಸಾಂಡುನ್ ಘಾಲ್ಲೆಂ. ಬಹುಶಃ ಹಾವೆಂ ಮ್ಹಜ್ಯಾ ಕುಡಿರ್ ಶೆಣಾಂವ್ಚ್ಯಾ ಸುಗಂಧ್ ದ್ರವ್ಯಾನ್ ತ್ಯಾ ಉಜ್ವಾಡಾಚೊ ಗಳೊ ಬಾಂದ್ತಾ ಆಸ್ತಲೊ. ಆನಿಕ್ ಹ್ಯಾಚ್ ಖಾತಿರ್ ತೊ ತ್ಯಾ ಇಮಾರಾತೆಂಚಾ ಲಿಪ್ಟಾಂಕ್ ಸೊಧುನ್ ತ್ಯಾ ಮೆಟಾಂ ವಯ್ರ್ ಬಸೊನ್ ಪಿರ್ಗಾಂತಾ. ಅಶೆಂ ಜಾಂವ್ಕ್ಯೀ ಪುರೊ ತಾಚಿ ನಿಮಾಣಿ ಆಶಾ ತಾಚೊ ಪ್ರಾಣ್ ತುಟಯ್ನಾ ಆಸ್ತಲೊ. ಆನಿಕ್ ತೊ ಮ್ಹಾಕಾ ತಾಚಿ ಆಶಾ ಸಾಂಗೊಂಕ್ ತ್ಯಾ ಮೆಟಾಂ ವಯ್ರ್ ರಾಕೊನ್ ಬಸ್ಲಾ ಆಸ್ತಲೊ. ಹಾಂವ್ ತಾಕಾ ಸೊಧುಂ ಯಾ ತೊ ಮ್ಹಾಕಾ ಸೊಧ್ತಲೊ? ಹಾಂವ್ ಮೆಟಾಂ ಚಡೊಂ ಯಾ ತೊ ಮೆಟಾಂ ದೆಂವ್ತಲೊ? ಮೆಟಾಂ...!
ಜಿವಿತಾಚಾ ಹರ್ಯೆಕಾ ಸಂಗ್ತಿಕ್ ಏಕ್ ಮೇಟ್ ಖಂಡಿತ್ ಆಸಾ. ಆನಿಕ್ ಹ್ಯಾ ಮೆಟಾಂನಿಂ ಹಾಂವೆಂ ಶಿಕ್ಚೆಂ ಲಿಸಾಂವ್ ಮ್ಹಸ್ತ್ ಆಸಾ. ಮೇಟ್ ಮ್ಹಳ್ಯಾರ್ಚ್ ಏಕ್ ಲಿಸಾಂವ್. ಮೆಟಾಂಚಿ ಚಡ್ಣಿ ಆನಿ ಮೆಟಾಂಚಿ ದೆಂವ್ಣಿ ಆಪ್ಲ್ಯಾ ಜಾಗ್ಯಾರ್ಯಿ ಏಕ್ ನವೆಂ ಲಿಸಾಂವ್. ತರ್ ಮೇಟ್ ಮ್ಹಳ್ಳ್ಯಾ ಉತ್ರಾಂತ್ ಕಿತ್ಲೊ ಉಜ್ವಾಡ್ ಆಸಾನಾಕಾ? ಆನಿಕ್ ಹ್ಯಾ ಉಜ್ವಾಡಾಚಿ ವಳಕ್ ಕಿತ್ಲಿ ಮಹತ್ವಾಚಿ ಜಾಯ್ನಾಕಾ? ಖರ್ಯಾ ಉಜ್ವಾಡಾಕ್ ಸಂಬಂಧ್ ವಾಡಯ್ತಾನಾ ಮ್ಹಜಿ ಸಾವ್ಳಿ ಲಾಂಬ್ ಖಂಡಿತ್ ಜಾತೆಲಿ.
ಪೂಣ್ ತ್ಯಾ ಸಾವ್ಳೆಕ್ ಹಾಂವ್ ಪಳೆಂವ್ಕ್ ಸಕ್ತಲೊಂ ಆನಿಕ್ ಪಳೆಲ್ಲ್ಯಾ ಸಾವ್ಳೆಕ್...... ಪಳೆಲ್ಲ್ಯಾ ಸಾವ್ಳೆಕ್ ಪಾಟ್ಲ್ಯಾನ್ ಸೊಡ್ನ್ ಉಜ್ವಾಡಾಚೆಂ ನಿಮಾಣೆಂ ಮೇಟ್ ಚಡ್ತಾನಾ ಹಾಂವ್ ಪಾಟಿಂ ಘುವೊಂನ್ ಪಳೆಂವ್ ಜಾಲ್ಯಾರ್ ಪಾಟ್ಲ್ಯಾನ್ ಸಾವ್ಳಿ ಖಂಡಿತ್ ಆಸ್ಚಿನಾಂ. ಸಾವ್ಳಿ ನಾಂ ತರ್ ಉಜ್ವಾಡಾಚಿ ಪಿಂರ್ಗೊಣಿ ಆಯ್ಕೊಂವ್ಚಿ ನಾ.....!
ಉಜ್ವಾಡಾಚಿ ಪಿಂರ್ಗೊಣಿ ನಾಂ ತರ್........?
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
