ಕವಿತಾकविताPoem
’ಉಜೊ
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತಿಂತೆರಾಂತ್ ಪಿಂತುರ್
ಪಿಂತುರ್ - 4
ವಿಶಯ್: ಉಜೊ ಆನಿ ಕಾಳೊಕ್
ಪಿಂತುರ್, ತಿಂತೆರ್ ಆನಿ ಪ್ರೇರಣಾಂ
’ಉಜೊ ಆನಿ ಕಾಳೊಕ್’ ಹಾಂತುಂ ಪೆಟ್ಲ್ಲ್ಯಾ ಉಜ್ಯಾಚಿ ಧಾವ್ ಇತ್ಲಿ ಆಸತ್ ಮ್ಹಣ್ ಕೊಣೆಂಯ್ ಚಿಂತ್ಲ್ಲೆಂ ಆಸಾ? ಹಾವೆಂ ತರ್ಯ್ ಸ್ವಪ್ಣಾಂತ್ಯೀ ಲೆಕ್ಲ್ಲೆಂನಾ. ಆಧ್ಲ್ಯಾ ಮಯ್ನ್ಯಾಂತ್ ಎಕ್ವೀಸ್ ಕವಿತಾ ಆಯಿಲ್ಲಿಂ ಆನಿ ತಾಂತ್ಲಿಂ ವಿಂಚ್ಣಾರ್ ಕವಿತಾ ಆಮಿಂ ಪರ್ಗಟ್ ಕೆಲ್ಲಿಂ. ಹ್ಯಾ ಪಾವ್ಟಿಂ ಆಯಿಲ್ಲಿಂ ಕವಿತಾ ಉಣಿಂ ತರ್ಯೀ ಮಯ್ನ್ಯಾಚೆಂ ಕವಿತಾ ಜಾವ್ನ್ ವಿಂಚುಂಕ್ ಖರೆಂಚ್ ಸಲೀಸ್ ನ್ಹಯ್. ಮಾತ್ಸಿ ಕಾಕುಳ್ತ್ ಆಮಿಂ ನವ್ಯಾ ಕವಿಂಕ್ ಧಾಖಯ್ಜೆ ಪಡ್ಲ್ಯಾ ದೆಖುನ್ ದಾಯ್ಜ್ ಪಂಗ್ಡಾಚಾ ಕವಿಂಕ್ ತಶೆಂ ಎದೊಳ್ ಇನಾಮ್ ಜಿಕ್ಲ್ಲ್ಯಾಂಕ್ ಹಾಂಗಾ ಬಗ್ಲೆಕ್ ದವರ್ಲಾಂ ಮ್ಹಳ್ಳೆಂ ತಾಂಚಾ ಕವಿತಾಂಚಿ ಗುಂಡಾಯ್ ಪಳೆತಾನಾ ತುಮ್ಕಾಂಚ್ ಗೊಮ್ತೆಲೆಂ.
ಚಡ್ತಾವ್ ಕವಿಂಚಿ ನದರ್ ಹ್ಯೇ ಪಾವ್ಟಿಂ ಗುಂಡಾಯೆಕ್ ಪಾವೊಂಕ್ ಸಕ್ಲ್ಯಾ ತೆಂ ಭೋವ್ ಧಾದೊಸ್ಕಾಯೆಚೆಂ. ಕವಿತಾಂಚಿಂ ತಕ್ಲೆನಾಂವಾಂ ವಾಚ್ತಾನಾ ತುಮ್ಕಾಂಚ್ ತೆಂ ಗೊಮ್ತೆಲೆಂ. ಕವಿತಾಕ್ ಲಾಂಭಾಯ್-ರುಂದಾಯ್ ನಾ ಖರೆಂ ತರ್ಯ್ ಮೀತ್ ಮಿರ್ವೊನ್ ಲಾಂಬ್ ಜಾಲೆಂ ತರ್ ಗಾಗ್ರ್ಯಾಚಾಕೀ ಚಡ್ ಲಾಂಬ್ ಬಾಜು ಆಸ್ಚೆಪರಿಂ ಜಾಯ್ತ್ ದೆಖುನ್ ಕವಿತಾಂನಿ ಚಿಂತ್ಪಾಕ್, ಇಮಾಜಿಂಕ್, ವಿಚಾರಾಂಕ್ ಮಹತ್ವ್ ಆಸೊಂ ಶಿವಾಯ್ ಸಬ್ಧಾಂಚಾ ರಾಶಿಕ್ ನ್ಹಯ್ - ಹಿ ಏಕ್ ಖಾಲ್ತಿ ವಿನತಿ ಕವಿಂಲಾಗಿಂ.
ಹ್ಯಾ ಪಾವ್ಟಿಂಚಾ ಕವಿತಾಂಪಯ್ಕಿ ಚಡ್ತಾವ್ ಕವಿತಾಂ ಕಾಳ್ಜಾಕ್ ಲಾಗ್ಚೆ ತಸಲಿಂ. ಕವಿ ಆಸ್ಟಿನಾಚಾ ಕವಿತಾಂತ್ ಕವಿನ್, ಆಪ್ಲ್ಯಾ ಖುಶೆಚಿ ವಿಚಾರ್ ಕರಿನಾಸ್ತಾಂಚ್ ಹ್ಯಾ ಸಂಸಾರಾಕ್ ಲೊಟುನ್ ಘಾಲ್ಲ್ಯೆ ಅಪ್ಲೆ ಆವಯ್ಚೆರ್ ತೀಕ್ ಸವಾಲಾಂ ಕರುನ್, ಆವಯ್-ಬಾಪಾಯ್ಚಾ ಬೇಜವಾವ್ಭಾರೆಚೆರ್ ಸವಾಲಾಂ ಉಭಿಂ ಕರ್ಚಿಂ ದಿಸೊನ್ ಯೆತಾತ್, ತಶೆಂಚ್ ಕವಿ ಆಸ್ಟಿನಾಚಾ ದುಸ್ರ್ಯಾ ಕವಿತಾಂತ್ ಮನ್ಶಾಪಣ್ ದಿಂಬ್ಯೆರ್ ಗಳೊನ್ ರುದಾನ್ ಕರ್ಚೆಂ ದಿಸೊನ್ ಯೆತಾ. ಕವಯತ್ರಿ ನಿರ್ಮಲಾಚಾ ಕವಿತೆಂತ್ ಹೊ ಉಜೊ ಮನ್ಶಾಜಿಣ್ಯೆಂತ್ ಸಭಾರ್ ಸಂದರ್ಭಾಂನಿ ಪೆಟ್ಚೊ ವೆವೆಗ್ಳೊ ಉಜೊ ಕಶೆಂ ದಿಸ್ತಾನಾ ಕವಿತಾರಸಿಕಾಂಕ್ ಖರೆಂಚ್ ಕವಿತಾ ಕಾಳ್ಜಾಕ್ ಲಾಗ್ತಾ. ಕವಿ ವಿನ್ಸಿ ಮೆಲ್ಕಾರಾಚಾ ಕವಿತೆಂತ್ ಕವಿಕ್ ಹೊ ಉಜೊ ಯೆಮ್ಕೊಂಡಾಚಾ ಉಜ್ಯಾಪರಿಂ ದಿಸ್ತಾ ತಶೆಂಚ್ ಸಂಸಾರಿಂ ಪೆಟ್ಚಾ ಹ್ಯಾ ಉಜ್ಯಾಂನಿ ಕರ್ಪಂವ್ಚೆಂ ಮನ್ಶಾಪಣ್ ಝಳ್ಕತಾ.
ಕವಯತ್ರಿ ಪ್ರಿಯಾಚಾ ಕವಿತೆಂತ್ ಹೊ ಸಂಸಾರ್ಚ್ ಎಕಾ ಉಜ್ಯಾಪರಿಂ ದಿಸ್ತಾನಾ ಹಾಂಗಾಸರ್ ಜಿಯೆಂವ್ಚಾ ಮನ್ಶಾನಿಂ ಹೊ ಉಜೊ ಪಾಲ್ವಂವ್ಕ್ ಪ್ರೇತನ್ ಕೆಲ್ಲೆಂ ತರ್ ಕಿತ್ಲೆಂ ಬರೆಂ ಆಸ್ತೆಂ ಮ್ಹಣ್ ಭೊಗ್ತಾನಾ ಕವಿ ಮೆಲ್ವಿನ್ ಪೆರ್ನಾಲಾಚಾ ಕವಿತೆಂತ್ಲೊ ಕವಿ ಹ್ಯಾ ಸಂಸಾರಾಂತ್ ಅಪ್ಲಿ ಜಿಣಿ ಏಕ್ ಉಜೊ, ಅನಿ ತ್ಯಾ ಉಜ್ಯಾಂತ್ ಝಳೊಂಕ್ ಮ್ಹಣ್ ಜಲ್ಮ್ ಘೆತ್ಲ್ಲಿ ಜಿಣಿ ಅಪ್ಣಾಚಿ ಮ್ಹಳ್ಳೆಂ ಚಿಂತಾಪ್ ಉಟಯ್ತಾನಾ ಎಕೆಕಾ ಕವಿಂಚಾ ಚಿಂತ್ಪಾಚಿ ವೈವಿಧ್ಯತಾ ಖರಿಚ್ ಜಾವ್ನ್ ಆಂವಡ್ತಾ.
ಕವಯತ್ರಿ ವಾಯ್ಲೆಟ್ ಪಿರೇರಾ ಹರ್ಶೆಂಚೆಪರಿಂ ಎಕಾಪ್ರಾಸ್ ಚಡ್ ಕವಿತಾಚೆಂ ಪ್ರೇರಣ್ ಜೊಡುಂಕ್ ಪಾವ್ಲ್ಯಾ, ಹಿಚೆಂ ’ಉಜೊ ಆನಿ ಕಾಳೊಕ್’ ಕವಿತೆಂತ್ ರಾಷ್ಟ್ರಾಂಚೆಂ ಎಕಾಮೆಕಾ ಮಧೆಂ ಆಸ್ಚೆಂ ಹಗೆಂ, ದುಸ್ಮಾನ್ಕಾಯ್ ತಶೆಂಚ್ ಝಗ್ಡಿಂ-ಝುಜಾಚೊ ಉಜೊ ದಿಸೊನ್ ಯೆತಾನಾ, ’ಸ್ವಪಾಣ್’ ಕವಿತೆಂತ್ ಮೊಗಾಂತ್ ನಿರಾಶಿ ಜಾಲ್ಲ್ಯಾ ಎಕಾ ಪ್ರೇಮಿಕಾಚಿಂ ಭಗ್ಣಾಂ ದಿಸೊನ್ ಯೆತಾತ್.
ಕವಿ ಬಾಪ್ ಜೋರ್ಜ್ ಒಲಿವೆರಾಕ್ ಹೊ ಕಾಳೊಕ್ ಆನಿ ಹ್ಯಾ ಕಾಳೊಕಾಕ್ ದುರ್ಸೊಂವ್ಚೆಂ ಸೊಸಾನಾ ದೆಖುನ್ ತಸಲ್ಯಾಂಕ್ ಏಕ್ ವಾತ್ ಪೆಟಂವ್ಕ್ ಉಲೊ ದಿತಾ. ಕವಿ ರೆಮ್ಸಿ ಫೆರ್ನಾಂಡಿಸಾಚಾ ಕವಿತಾಂತ್ ಜಾಲ್ಲಿ ವ್ಹಾಡಾವಳ್ ಧಾದೊಸ್ಕಾಯೆಚಿ. ಕವಿಕ್ ಹ್ಯಾ ಪಿಂತುರಾಂತ್ ಅಸ್ಕತ್ ಮನ್ಶಾಪಣಾಚೆಂ ರುದಾನ್ ಕರ್ಚಾ ಎಕಾ ನಿರಾಶ್ರಿತಾಚೊ ಉಲೊ ದಿಸ್ತಾ.
ಕವಿ ಮೆಲ್ವಿನ್ ವಾಸ್ ಹರ್ಶೆಂಚೆಪರಿಂ ಎಕೆಕಾ ವೊಳಿಂನಿ ಪಿಂತುರಾಂಚಿ ರಾಸ್ ಉಭಿ ಕರೀತ್ ವೆತಾ, ಹ್ಯಾ ಸಂಸಾರಾಂತ್ ಝಳ್ಚಾ ವೆವೆಗ್ಳ್ಯಾ ಪ್ರಕಾರಾಚಾ ಉಜ್ಯಾಂತ್ ಝಳೊನ್ ಆಸ್ಚಿ ಜಾತ್ ಜೆದ್ನಾಂ ’ಊಂಚ್-ನೀಚ್’ ಮ್ಹಳ್ಳ್ಯಾ ಪ್ರಕಾರಾಂ ಮಧೆಂ ಅಡ್ಚೊನ್ ಮನ್ಶಾಪಣಾಚಿ ಬೋಬ್ ಜಾತಾನಾ, ತಾಚಾ ಅಖೇರ್ಚಾ ಪಂಗ್ತೆಂನಿ ಹಿ ಬೋಬ್ ಕಾಂಯ್ ಸರ್ಗಾಕ್ ಪಾವತ್ ಕೊಣ್ಣಾ. ಜೆದ್ನಾಂ ಭುಕೆಲ್ಲೊ ಎಕ್ಲೊ ಮಾರಾಂಚೊ/ಕೊರ್ಗ್ಯಾಂಚೊ ಚೆರ್ಕೊ ಜೆದ್ನಾಂ ತಾಚಾ ಪೊವ್ಲೆಂತ್ ಉಶ್ಟೆಂ ಮೆಳ್ತಾನಾ ತ್ಯಾ ಉಶ್ಟ್ಯಾಚಾ ಹಕ್ಕ್ದಾರ್ ಕಾವ್ಳ್ಯಾಂಕ್ ಧಾಂವ್ಡಾಂವ್ಚೆಂ ಚಿಂತಾಪ್ ಭೋವ್ ಮಾರ್ಮಿಕ್ ರಿತಿನ್ ವ್ಹಾಳಯ್ತಾ.
ಮ್ಹಾಕಾ ಕಿತ್ಯಾಕ್ಗೀ ಸಂಸಾರಾಚಾ ಹರ್ಯೆಕಾ ಕೊನ್ಶಾರ್ ಪಡೊನ್ ಆಸ್ಚೊ ಪಾವ್ಸ್, ಆನಿ ಹ್ಯಾ ಪಾವ್ಸಾಂತ್ ವ್ಹೊಳೊನ್ ವೆಚೆಂ ದಿಸ್ತಾ. ಖಂಯ್ಸರ್ ರಾಗಾಚೊ ಪಾವ್ಸ್ ತರ್ ಖಂಯ್ಸರ್ ಧ್ವೇಷಾಚೊ, ಫಾರಿಕ್ಪಣಾಚೊ, ಅನೀತ್-ಅನ್ನ್ಯಾಯಾಚೊ, ಜಿದ್ದಾಚೊ, ಸ್ವಾರ್ಥಾಚೊ, ಮೊಸ್ರಾಚೊ ಆನಿ ಅವ್ಮಾನಾಚೊ ಪಾವ್ಸ್. ದೆಖುನ್ ಉಜೊ ಪೆಟಂವ್ಚೊ ಭೋವ್ ಗರ್ಜೆಚೊ ಜಾಲಾ. ಮೊಗಾಚೊ ಉಜೊ!
ಕವಿ ಮ್ಯಾಕ್ಸಿಮ್ ಅಪ್ಲ್ಯಾ ಅಪುರ್ಭಾಯೆಚಾ ಕವಿತೆಂತ್ ಅಸ್ಕತ್ಯಾಂಚೆರ್ ಭಳ್ವಂತಾಂಚಿ ರಾಜ್ವಟ್ಕಿ ಕಶಿ ಚಲ್ತಾ ಮ್ಹಳ್ಳೆಂ ಸಾಂಗೊನ್ ಭೋವ್ಶಾ ಹೊ ಉಜೊ ಪರ್ನೆಂ ಲಾಸುಂಕ್ ಜಾಯ್ಜಯ್ ಮ್ಹಣ್ತಾ ತರ್ಯ್ ತರ್ನೆಂ ಹ್ಯಾ ಉಜ್ಯಾಂತ್ ಫುಟೊನ್ ಯೇಂವ್ದಿ ಮ್ಹಳ್ಳೊ ಆಶಾವಾದ್ ಪಾಚಾರ್ತಾನಾ ತಾಚಾ ಚಿಂತ್ಪಾಸಕ್ತೆಚೆಂ ತ್ರಾಣ್ ತರ್ಯ್ ಕಿತ್ಲೆಂ ಪಳೆಯಾ.. ವಾ!.. ಫುಡ್ಲ್ಯಾ ಕವಿಂಕ್ ಅಪುರ್ಭಾಯೆಚೆಂ ಪ್ರೇರಣ್ ದಿಂವ್ಚಾಂತ್ ಹೆಂ ಕವಿತಾ ಮುಖ್ಲಿ ಪಂಗತ್ ಘೆತಾನಾ ವ್ಹಳೂ ಏಕ್ ಕವಿತಾಮೊತಿಂ ಘೆವ್ನ್ ಯೆತಾ ವಿಲ್ಸನ್ ಕಟೀಲ್, ಹ್ಯಾ ಉಜ್ಯಾಂತ್ ಲಾಸುಂಕ್ ಅಪುಣ್ ಏಕ್ ಇಂಗ್ಳೊ ಜಾಲ್ಲೊಂ ತರ್ ಹ್ಯಾ ಉಜ್ಯಾನ್ ಭಸ್ಮುಂವ್ಚಾ ಬದ್ಲಾಕ್ ಮಾಯಾಮೊಗಾನ್ ಭರುಂಕ್ ಪಾವ್ತೊಂ ಮ್ಹಳ್ಳೊ ಸಂದೇಶ್ ದಿಂವ್ಚೆಂ ಅಪುರ್ಭಾಯೆಚೆಂ ಕವಿತಾ ಖರೆಂಚ್ ಕವಿತಾರಸಿಕಾಕ್ ಪಿಶ್ಯಾರ್ ಘಾಲ್ತಾ. ಆನಿ ಖರೆಂಪಣಿ ಮಯ್ನ್ಯಾಚೊ ಕವಿ ಜಾವ್ನ್ ವಿಲ್ಸನ್ ಕಟೀಲ್ ವಿಂಚೊನ್ ಯೆತಾ..
[ವಾಂಟೆಲಿ ಜಾಲ್ಲಿಂ]
3. ಮೆಲ್ವಿನ್ ಜೆ. ವಾಸ್, ಕೆಲರಾಯ್/ಕುವೇಯ್ಟ್
4. ನಿರ್ಮಲಾ ಗೋವಿಯಸ್ ಬೆಂದುರ್/ಮಸ್ಕತ್
5. ಪ್ರಿಯಾ ಸಿಕ್ವೇರಾ, ಫೆರಾರ್/ಕುವೇಯ್ಟ್
7. ಮೆಲ್ವಿನ್ ಕ್ಯಾಸ್ತಲಿನೊ, ಪೆರ್ನಾಲ್
8. ವಾಯ್ಲೆಟ್ ಜೆ. ಪಿರೇರಾ, ದುಭಾಯ್
9. ವಾಯ್ಲೆಟ್ ಜೆ. ಪಿರೇರಾ, ದುಭಾಯ್
10. ಮಾ|ಜೋರ್ಜ್ ಒಲಿವೆರಾ, ಬೆಂಗ್ಳುರ್
12. ರೆಮ್ಸಿ ಫೆರ್ನಾಂಡಿಸ್, ದುಭಾಯ್
13. ಆಸ್ಟಿನ್ ಡಿ’ಸೋಜ್ ಪ್ರಭು, ಚಿಕಾಗೊ
14. ಆಸ್ಟಿನ್ ಡಿ’ಸೋಜ್ ಪ್ರಭು, ಚಿಕಾಗೊ
1. ಇಂಗ್ಳೊ [ಮಯ್ನಾಚೆಂ ಕವಿತಾ]
ವಿಲ್ಸನ್ ಕಟೀಲ್
ಏಕ್ ಮಧ್ಯಾನೆ ರಾತಿಂ
ಕೊಣಾಚ್ಯಾಗೀ ರಾಂದ್ಣಿಕ್ ಹಿಂವ್ ಲಾಗೊನ್
ತೆಂ ಸುಟಂವ್ಚಾಕ್
ಕೊಣಾಚೆಂಗೀ ಕೊಲಿತ್ ಝಳೊನ್
ರೂಪ್ ಘೆತ್ಲ್ಲೊ ಇಂಗ್ಳೊ ಹಾಂವ್
ಪುರ್ತಿ ಊಬ್ ಚರ್ಚಾ ಆದಿಂ
ಶೆಳೆಂ ವೊತ್ಲ್ಲ್ಯಾನ್, ಪಾಲ್ವೊನ್
ಮ್ಹಜಿಚ್ ಸಾವ್ಳಿ ಜಾಲೊಂ
ಫಾಂತ್ಯಾರ್ ಫುಟ್ಲ್ಲೆ ಅಮಾಸೆಚಿ
ಏಕ್ ಖೊಂವ್ಚಿ ಮ್ಹಜೆಂ ಕಾಳಿಜ್
ರಾಕೊನ್ ಬಸ್ಲಾಂ
ಕೊಣ್ ತರ್ಯೀ ಪಿರ್ಲುಕ್ ಘೆವುನ್ ಯೇತ್
ಫುಂಕುನ್ ವಾದಾಳ್ ಉಟವ್ನ್
ಆಳ್ಸಾಯೆ ಗೊಬೊರ್ ಸುಟಯ್ತ್
ಕಾಳ್ಜಾಂತ್ ಚಾನ್ನೆಂ ಪೆಟಯ್ತ್
ಥೊಡೆಪಾವ್ಟಿಂ ಥೊಡ್ಯಾ ರಾಂದ್ಣಿಂನಿ
ಪೇಜ್ ಶಿಜೊನ್ ವೊತ್ತಾನಾ
ಸುಕೆಂ ಭಾಜೊನ್ ಪರ್ಮಳ್ ಉಟ್ತಾನಾ
ದೂದ್ ಖತ್ಕತೊನ್ ವೊಮ್ತೊತಾನಾ
ಮ್ಹಜೆಯಿತ್ಲ್ಯಾಕ್ ಚುರ್ಚುರ್ತಾಂ
ಛೆ!
ತ್ಯಾ ರಾಂದ್ಣಿಂನಿ
ಹಾಂವ್ ಆಸ್ಲ್ಲೊಂ ತರ್..
ಥೊಡೊ ವೇಳ್ ಪುಣೀ
ಮೊಗಾನ್ ಲಾಸ್ಲ್ಲೊಂ ತರ್..
2. ಹಿ ರಾತ್ [ಮ್ಯಾಕ್ಸಿಮ್ ಲೋಬೊ]
ಹೊ ಅಮಾಸ್ ಧಾಡ್ ಘಾಲ್ತಾ
ಕೊವ್ಳಾವ್ನ್ ಪುನ್ವ್ಯಾ ಚಂದಿರಾ
ಹಿವ್ಳಾವ್ನ್ ಕಾಳ್ಜಾ ಮಂದಿರಾ
ಸಾವ್ಳೆವ್ನ್ ಜ್ನಾನ್ ಬಂಡಾರಾ
ಹೊ ಅಂದ್ಕಾರ್ ಶೆಳೆಪಣ್
ನಾಡ್ತಾ
ವಿಕಾಸ್ ದಾವ್ಲೆನಿಂ ಶೂನ್ಯತೆರ್
ಆಕಾಸ್ ಮೊಳ್ಬಾನಿಂ ಖಿನ್ನತೆರ್
ವಿಳಾಸ್ ನಾಸ್ ಸ್ವ-ಭಿರ್ಮತೆರ್
ಹೊ ಕಾಳ್ಕೊ ಕಾಳೊಕ್ ಶಿಂದುನ್
ಕಾಳಿಜ್ ಸಾಮ್ಕೆ ಬಾಜುನ್
ಪೆಟ್ಲಾ ಉಜೊ ಪೆಟಂವ್ಕ್
ದಿಶಾ ಉಗ್ತಾಡಾಂವ್ಚಿ ದಿವ್ಟಿ
ಹಾಚಿ ಧಾವ್ ಕಿಟಾಳಾಂ ಉಟಯ್ತಾ
ಫುಂಕುನ್ ಹಾಡಾನಿಂ ಶಿರ್ಶಿರಾಂ
ಖೊಂಕುನ್ ದಿಷ್ಟೆನಿಂ ತಸ್ವಿರಾಂ
ದೊಂಕುಳ್ನ್ ಶಿರಾನಿಂ ಕಂತಾರಾಂ
ಹಿ ರಾತ್, ನಿತ್ಳಾಂವ್ಚಿ ರೀತ್
ಹಿ ರಾತ್ ಏಕ್ಚ್ ವಾಟ್
ಪರ್ನೆ ಲಾಸೊನ್ ಮರೊಂಕ್
ನವೆಂ ಪುಟೊನ್ ಉಟೊಂಕ್.
3. ಚೆರ್ಕೊ [ಮೆಲ್ವಿನ್ ಜೆ. ವಾಸ್]
ಶೆತಾ ರಾಕ್ವಣೆಕ್ ವಿಣ್ಗೊ ಪುತ್ಳೊ ದಗ್ಲ್ಯಾರ್ ಸೊಭ್ತಾ
ನೆಣ್ತೊ ಚೆರ್ಕೊ ಉಗ್ತ್ಯಾ ಲಜೆಕ್ ಸಾಂಡುನ್ ಹಾಸ್ತಾ
ಬೊಲ್ಯಾ ಪಾಟ್ಲ್ಯಾನ್ ದೋನ್ ಟಗರಾಂ ಮುಖಾಮುಖಿ ರಾವ್ತಾತ್
ಬಾಮುಣಾಚಾ ಘರಾ ಕಾಯ್ಲಿರ್ ಪಾನ್ಪಳೆ ತೆಲಾಂತ್ ಫುಲ್ತಾತ್
ತರ್ನಿ ಹೊಕಾಲ್ ಆರ್ಶ್ಯಾ ಮುಖಾರ್ ಮಿರಿಯೊ ಖೊವಯ್ತಾ
ಶೆತಾ ಕೊನ್ಶ್ಯಾರ್ ಭಾಟ್ಕಾರ್ ಉಭೊ ಗಾಡ್ ಧಾಖಯ್ತಾ
ರಸ್ತ್ಯಾ ಪೊಂತಾರ್ ಗಾಯ್ ಏಕ್ ಘಡಿಯೊ ಮೆಜ್ತಾ
ಚೆರ್ಕ್ಯಾಚಾ ಆಂಗ್ಣಾಂತ್ ಫೆಸ್ತ್ ಧೊಲ್ ಗುಮಾಟ್ ವಾಜ್ತಾ
ಬೊಲ್ಯಾ ಪಾಟ್ಲ್ಯಾನ್ ದೋನ್ ಟಗರಾಂ ಹಾತ್ ಮೆಳಯ್ತಾನಾ
ಭಾಟ್ಕಾರಾ ಘರಾಂತ್ ಭಾಸ್ಮತಿ ತಾಂದುಳ್ ತೊಂದೊರಾಂತ್ ಶಿಜ್ತಾ
ರಸ್ತ್ಯಾ ಪೊಂತಾವಯ್ಲ್ಯಾ ಗಾಯೆಕ್ ಮಾತಿಯೆಕ್ ಪಾವಯ್ತಾನಾ
ಧೊಲ್ ಗುಮ್ಟಾಚೆಂ ಪಾತಳ್ ಚಾಮ್ಡೆಂ ಎರೆವ್ನ್ ಪಿಂಜ್ತಾ
ಚೆರ್ಕೊ ನೆಣ್ತೊ ಫಾಂತ್ಯಾ ಹಿಂವಾಂತ್ ಉಜ್ಯಾ ಧಾವೆಕ್ ಸೊಧ್ತಾ
ಪೊವ್ಲೆರ್ ವೊತ್ಲೆಲ್ಯಾ ಉಸ್ಟ್ಯಾಕ್ ಘೆವ್ನ್ ಕಾವ್ಳ್ಯಾಂಕ್ ಧಾಂವ್ಡಾಯ್ತಾ
4. ಉಜೊ ಆನಿ ಕಾಳೊಕ್ [ನಿರ್ಮಲಾ ಗೋವಿಯಸ್]
ಮೊಡಾ ಕಾಳೊಕಾಮಧೆಂ ತಿಳ್ತಾ ಝಗ್ಲಾಣ್ಯಾ ಉಜ್ಯಾ ಝಳಕ್
ಸಂಗಿಂ ಘೆವುನ್ ವಾರ್ಯಾರ್ ವ್ಹಾಜತ್ ಪಿರ್ಲುಕ್
ಸ್ವಾಗತ್ಸುನ್, ಮೊಡಾಮಧೆಂ ವೊತ್ತಾ ಪಾವ್ಸಾ ವ್ಹಾಳೊ
ಶಿರಾಂಧಾರಿಂ ವ್ಹಾಳ್ಳೊ ತರ್, ಮನ್ಶಾ ಜೀವನ್ ಬೆಸಾಂ ಶಿಳೊ
ಉಜೊ, ಉಜೊ ಸೊಸುಂಕ್ ನಜೊ
ಉಜೊ ನಾಂ ತರ್ ಹಿಂವ್ ಅನಿ ಕಾಳೊಕ್ ಧಾಂವತ್ ಕಸೊ?
ಉಜೊ ಲೇಕ್ ಮಿರ್ವೊನ್ ಪೆಟ್ಲೊ ತರ್ ಮಾರೆಕಾರ್
ಪೆಟ್ಲೊನಾಂ ತರ್ ಭುಕೆಸ್ತ್ ದೊಳ್ಯಾ ಕಾಳೊಕಾಸಂಗಿಂ
ಪಡಾತ್ ಮಾರ್ಗಾರ್...
ವಾತ್ ಕರ್ಗಾತ್, ಧಾಂವ್ಡಾವ್ನ್ ಕಾಳೊಕ್ ಉಜ್ಯಾ ರುಪಾರ್
ಉಜ್ವಾಡ್ ಪಾಚಾರ್ನ್ ಭಂವಾರಿಂ
ಹಿ ಜಿಣ್ ವಾತಿಪರಿಂ
ಪ್ರಕಾಸ್ಲ್ಯಾರ್ ಕರ್ಗೊನ್ ಮೆಣಾಬರಿ
ಉಜ್ವಾಡ್ ಪ್ರಕಾಸ್, ಕಾಳೊಕ್ ನಪಂಯ್ಚ್ ಹ್ಯಾ ಸಂಸಾರಿಂ
ಉಜ್ಯಾ ಝಳಕ್ ನಾಂತರ್ ಮೊಡಾಕಾಳೊಕ್ ಪಾಚಾರ್ನ್ ಪಾವ್ಸ್ ವ್ಹಾಳತ್?
ಸುರ್ಯೊ ತಿಳ್ಳೊನಾಂ ತರ್ ಕಾಳೊಕ್ ಧಾಂವ್ಡಾವ್ನ್, ಫುಲಾತ್ ಸಾಳಕ್?
ಉದ್ಕಾವೀಣ್ ಮನ್ಶಾಜೀಣ್, ಸುರ್ಯಾವೀಣ್ ಸಾಳ್ಕಾಜೀಣ್
ಮೊನಿ ಕೊಗುಳ್ ಸುಮಧುರ್ ಗಾನಾವಿಣ್
5. ಉಜೊ [ಪ್ರಿಯಾ ಸಿಕ್ವೇರಾ, ಫೆರಾರ್]
ಹಾಂಗಾ ಪಳೆ ಲಾಸ್ತಾತ್!!
ಲಾಸ್ತಾತ್ ಭುಕೆಚಾ ದಾವೆನ್
ಲಿಪೊಂಕ್ ಅಶೆತಾತ್ ಗೊಬ್ರಾಂತ್
ಪಾಲ್ವಂಕ್ ನಾಕಾ ವಾರ್ಯಾ ವಾದಾಳಾಕ್
ಸ್ವಪ್ಣೆತಾತ್ ಶಾಶ್ವತ್ ರಾಂದ್ಣಿಕ್
ಆಶೆಂ ಸದಾಂಚ್ ಪೆಟ್ತಾತ್
ದುಬ್ಳಿಕಾಯೆಚಾ ಉಜ್ಯಾಂತ್
ಲಾಸ್ತಾತ್ ಪಯ್ಶಾಂಚಾ ದಾವೆನ್
ಲಾಸ್ತಾತ್ ಅಸ್ಕತ್ ಜಿವಾಂಕ್
ದಾಗ್ ದಿತಾತ್ ಹುನೊನಿ ಕೊಲಿತಾನ್
ಉಟೊಂಕ್ ಸೊಡಿನಾಂತ್ ಉಜ್ಯಾಚ್ಯಾ ಅಗ್ಟ್ಯಾಥಾವ್ನ್
ಆಶೆಂ ಸದಾಂಚ್ ಪೆಟ್ತಾತ್
ಗ್ರೇಸ್ತ್ಕಾಯೆಚಾ ಉಜ್ಯಾಂತ್
ಲಾಸ್ತಾತ್ ಹಾತಿಂ ಘೆವ್ನ್ ಉಜೊ
ಲಾಸೊನ್ ಅಸಾತ್ ಜಾತಿಚಾ ಮೊಸ್ರಾನ್
ಜೀವ್ ಘೆತಾತ್ ನಿರಾಪ್ರಾದ್ಯಾಂಚೊ
ಪೆಟವ್ನ್ ಉಜೊ ರಾಷ್ಟ್ರಾಂನಿ
ಆಶೆಂ ಸದಾಂಚ್ ಪೆಟ್ತಾತ್
ಫಾರಿಕ್ಪಣಾಚಾ ಉಜ್ಯಾಂತ್
ಏ ದೆವಾ
ತುಜೊ ಸೊಸ್ಣಿಕಾಯೆಚೊ ಕಾಟ್ ತುಟೊನ್
ರಾಗಾಚೊ ಉಜೊ ವೊಂಕ್ಚಾ ಪಯ್ಲೆಂ
ಮಾಫ್ ಕರ್ ಆಮ್ಕಾಂ!
ಸಾಧ್ಯ್ ಆಸೊನ್ಯ್
ಹ್ಯಾ ಉಜ್ಯಾಚೆಂ ಅಂತ್ಯ್ ನ್ಹಯ್ ತರಿ
ಪಾಲ್ವಂವ್ಚೆಂ ಪ್ರಯತ್ನ್ಯ್ ಕರಿನಾತ್ಲ್ಯಾಕ್!
6. ಉಜೊ ಆನಿ ಕಾಳೊಕ್ [ವಿನ್ಸಿ, ಮೆಲ್ಕಾರ್]
ಉಜೊ ಆಸ್ಲ್ಯಾರ್ ಉಜ್ವಾಡ್
ಉಜ್ವಾಡ್ ಆಸ್ಲ್ಯಾರ್ ಕಾಳೊಕಾಕ್ ರೂಪ್
ಕಾಳೊಕ್ ಆಸ್ಲ್ಯಾರ್ ಜಿವನಾಚಿ ದೆಸ್ವಾಟ್
ತರ್ ಉಜೊ ಆನಿ ಕಾಳೊಕ್ ಕಿತ್ಯಾಕ್..?
ಉಜೊ ’ಜಾಯ್’ ಹ್ಯಾ ’ನಾಕಾ’
ಉಜ್ವಾಡಾಚ್ಯಾ ಸೊಧ್ನೆಂತ್
ಕಾಳೊಕಾಚ್ಯಾ ಸೊಧ್ನೆಂತ್
ಕಶ್ಟೊಂಚ್ಯಾ ಜಿವಾಕ್
ಉಜೊ ವ ಕಾಳೊಕ್ ಆಧಾರ್..?
ಜೆದ್ನಾಂ ಇಜ್ಯಾಚಾ ಕಿರ್ಣಾಂತ್ ಸುರ್ಯೊ
ಉಜ್ವಾಡ್ ದಿತಾ
ತೆದ್ನಾಂ ಕಾಳೊಕ್ ನಪಂಯ್ಚ್ ಜಾತಾ
ಖಂತಿನ್ ಬೆಜಾರಾಯೆನ್ ಬುಡ್ಲ್ಲ್ಯಾ ಕಾಳ್ಜಾಕ್
ಫಕತ್ ಕಾಳೊಕ್ ಎರ್ಂವೊಡ್ ಮಾರ್ತಾ
ಜಿವಿತಾಚ್ಯಾ ಕಷ್ಟಾಂತ್
ಉಜೊ ಉಜ್ವಾಡ್ ಆಧಾರ್ ಜಾಯ್ತ್ಗಿ..?
ಉಜ್ಯಾಚ್ಯಾ ಧಾವೆಂತ್ ಉಕಡ್ನ್ ಸಲ್ವಾಲ್ಲ್ಯಾ
ಮನ್ಶಾಕ್
ಹೊ ಉಜೊ ಕಾಳೊಕ್ ಹಾಡಯ್ತ್ಗೀ..?
ಭುಕೆಚ್ಯಾ ಆಕ್ಲಾಸಾಕ್ ಪೊಟಾಂತ್
ಯೆಂವ್ಚ್ಯಾ ಉಜ್ಯಾಕ್
ಉಜ್ಯಾವಯ್ರ್ ದವರ್ಲೆಲಿ ಪೇಜ್ಚ್ ಗತ್
ಹಿಂವಾಂತ್ ಕಾಂಪ್ಚಾ ಆಸ್ಚ್ಯಾ ಜಿವಾಕ್
ಹ್ಯಾ ಉಜ್ಯಾಚಿ ಧಾವ್ಚ್ ಗತ್
ಹ್ಯಾ ಸಂಸಾರಿಂ ಜಿವಿತಾಚ್ಯಾ ಪಾತ್ಕಾವರ್ವಿಂ
ಮೆಳಾತ್ ಯೆಮ್ಕೊಂಡಾಚೊ ಉಜೊ?
ಪರ್ತ್ಯಾನ್ ಜಲ್ಮೊನ್ ಆಯ್ಲ್ಯಾರ್ ಭುಮಿಂತ್
ಕಾಳೊಕ್ ಸದಾಂಯ್ ರೆಂವೊಡ್ ಘಾಲಿತ್
7.ಉಜೊ ಆನಿ ಕಾಳೊಕ್ [ಮೆಲ್ವಿನ್, ಪೆರ್ನಾಲ್]
ಖಾಣ್ ಉಕ್ಡುಂಕ್ ಆಸಾ ಉಜೊ,
ಕಾಳೊಕ್ ಧಾಂವ್ಡಾಂವ್ಕ್ ಜಾಯ್ ಉಜ್ವಾಡ್
ಹಿಂವ್ ಪಯ್ಸ್ ಕರುಂಕ್ ಹುನ್ಸಾಣ್ ಆಸ್ತಾನಾ,
ವದನಾರ್ ಕಿತ್ಯಾಕ್ ಆನಾಥಾಚಿ ಖಂತ್..?
ಉಜ್ಯಾಕ್ ಮುಖಾರ್ ಕಿತೆಂಚ್ ನಾ,
ಭುಕೆಕ್ ಖಾಣಾಶಿವಾಯ್ ಹೆರ್ ಜಾಯ್ನಾಂ,
ಉಜ್ಯಾಚಿ ದಾವ್, ಪಾಕ್ವಾನಾಂಚೊ ಸ್ವಾದ್..
ಭುಜಯ್ತ್ ಪೊಟಾಚ್ಯಾ ಭುಕೆಕ್ ತುಜ್ಯಾ..?
ಹಾಂವ್ ಆನಿ ತುಂ ಸಂಸಾರಾಚೊ ಝಳೊವ್
ಆಮಿ ಝಳ್ತಾನಾ ಕಿತೆಂಗೀ ಶಿಜ್ತಾ.
ಹೆರಾಂಚಿ ತಾನ್ ಥಾಂಬಂವ್ಕ್ ಆಮಿ ಗೊಬೊರ್.
ಗರ್ಜ್ ಸಂಪ್ಲ್ಲ್ಯಾ ಉಪ್ರಾಂತ್ ಕೊಣ್ ವಳ್ಕಾತಾ..?
8. ಉಜೊ ಆನಿ ಕಾಳೊಕ್ [ -ವಾಯ್ಲೆಟ್ ಜೆ. ಪಿರೇರಾ]
ಅಳೆ! ಪೆಟ್ತಾ ಥಂಯ್ಸರ್ ಉಜೊ ಫಾರಿಕ್ಪಣಾಚೊ
ಎಕಾಮೆಕಾಚೆರ್ ಉಪ್ರಾಟ್ಚಾ ದುಸ್ಮಾನ್ಕಾಯೆಚೊ
ಝುಜಾಚ್ಯಾ ಮೊಡಾಂನಿ ಭರೊನ್ ಪಡ್ಲಾ ಕಾಳೊಕ್
ಪೆಟೊಂಕ್ ಸುರು ಜಾಲ್ಯಾರ್ ಪಾವ್ತೊಲೊ ನಾಸಾಕ್
ವೊತ್ಲೊ ಪಾವ್ಸ್ ಇರಾಕಾಂತ್ ಝುಜಾಚ್ಯಾ ಉಜ್ಯಾಚೊ
ಅಮೇರಿಕಾಚ್ಯಾ ಹಟ್ಟಿ ಇರಾದ್ಯಾಚೊ
ಭಸ್ಮಲೆ ನೆಂಟೆ ಹಜಾರಾಂನಿ ತ್ಯಾ ಉಜ್ಯಾಂತ್
ಸಾಂಡುನ್ ಗೆಲೆ ನಿರಾಪ್ರಾಧಿ ಅಪ್ಲ್ಯಾಂಚೊ ಸಾಂಗಾತ್
ಆತಾಂ ದೊಳೊ ದವರ್ಲಾ
ಸಭಾರ್ ದೇಶಾರ್
ಝುಜಾಕ್ ಆಯ್ತೆ ಜಾಲ್ಯಾತ್ ಕಿತ್ಲೆಗೀ ಸೊಜೆರ್
ಪಡ್ತೊಲೊ ಕಾಳೊಕ್ ಎಕ್ ದೀಸ್ ಸಂಸಾರಾರ್
ನಾಸ್ ಜಾತೆಲೆ ಅಪ್ಣಾನ್ಂಚ್ಚ್ ಪೆಟಯಿಲ್ಲ್ಯಾ ಉಜ್ಯಾಂತ್
ರಾಷ್ಟ್ ರಾಷ್ಟಾಂ ಘೆವ್ನ್ ರಾವ್ಲ್ಯಾಂತ್
ಹಾತೆರಾಂ
ಚಲೊಂವ್ಕ್ ಎಕಾಮೆಕಾಚೆರ್ ಅಪ್ಲಿಂ ದಳ್ಬಾರಾಂ
ಅಣ್ವಸ್ತ್ರಾಂ ಜಾಲ್ಯಾಂತ್ ಹಾಂಚಿಂ ಕಾಂತಾರಾಂ
ದೇಶಾಖಾತಿರ್ ಬಲಿ ಜಾತಾತ್ ತಿಂ ಕಿತ್ಲಿ ಸೊಜೆರಾಂ
ಫಾರಿಕ್ಪಣಾಚೊ ಉಜೊ ಕರ್ತಲೊ
ಸರ್ವ್ ನಾಸ್
ವೆಳಾರ್ ಪಾಲ್ವೆನಾಂವ್ ತರ್ ಪಡ್ತೆಲಿ ಮೊಡ್ಯಾಂಚಿ ರಾಸ್
ಉಜೊ ಆಸ್ಚೊ ಉಜ್ವಾಡ್ ಫಾಂಕಂವ್ಕ್ ಸಂಸಾರಾಂತ್
ಖೆಳೊನ್ ಮಸ್ತಿನಾಕಾತ್ ಪಡ್ಶ್ಯಾತ್ ಕಾಳೊಕಾಂತ್
9. ಸ್ವಪಾಣ್ [ -ವಾಯ್ಲೆಟ್ ಜೆ. ಪಿರೇರಾ]
ಅಮಾಸ್ಯೆಚ್ಯಾ ಕಾಳ್ಕಾಯೆ ರಾತಿಂ
ಪೆಟಯ್ಲ್ಯೊ ಹಾಂವೆ ಮೊಗಾಚ್ಯೊ ವಾತಿ
ಪಡ್ಲಿಂ ಮೊಗಾರ್ ತ್ಯಾ ಚಂದ್ರಾಚ್ಯಾ
ಸೊಭಿತ್ ಸುಂದರ್ ತ್ಯಾ ರುಪ್ಣ್ಯಾಚ್ಯಾ
ನೆನಾಸ್ಲಿಂ ಹಾಂವ್ ಮುಕಾರಿಚೊ ಪರಿಣಾಮ್
ಕೆಲೆಂ ಅಪ್ಣಾಕ್ಚ್ಚ್ ತಾಚ್ಯಾ ಅಧೀನ್
ವಿಸ್ರಾಲಿಂ ಸಂಸಾರ್ ತಾಚ್ಯಾ ಮೊಗಾಂತ್
ಭಾಸಾಯ್ಲೊ ತಾಣೆಂ ಮ್ಹಾಕಾ ಸರ್ಗ್
ಉಭ್ಲಿಂ ಹಾಂವ್ ವಾರ್ಯಾರ್ ಸಗ್ಳಿಂಚ್ಚ್
ದಾಕಯ್ಲೊ ಮ್ಹಾಕಾ ತಾಣೆ ಸೊಭಿತ್ ಸಂಸಾರ್
ಮ್ಹಣಾಲೊ ಸಂಸಾರಾಂತ್ಲೆ ಸರ್ವ್ ತುಜೆಂಚ್ಚ್
ಕೆಲಿಂ ಮ್ಹಾಕಾ ತಾಣೆ ರಾಣಿ ತಾಚ್ಯಾ ಜಿಣ್ಯೆಚಿ
ದಿಲಿಂ ಮ್ಹಾಕಾ ಫಳಾಂ ತಾಚ್ಯಾ ಮೊಗಾಚಿ
ಜಾಲಿಂ ಯೆಜ್ಮಾನ್ ತಾಚ್ಯಾ ಘರಾಚಿ
ದೀಸ್ ವೆತಾಲೆ ವರ್ತ್ಯಾ ಮಜೆನ್
ತಿತ್ಲ್ಯಾರ್ ಪೆಟ್ಲೊ ಉಜೊ ಆಮ್ಚಾ ಮೊಗಾಂತ್
ಜಾಂವ್ಕ್ ಲಾಗ್ಲೆ ದೀಸ್ ತೆಂ ಕರಾಳ್
ಪಡ್ಲೊ ಕಾಳೊಕ್ ಆಮ್ಚ್ಯಾ ಮೊಗಾಂತ್
ಎಕಾಮೆಕಾಚಿ ಸಮ್ಜೊಣಿ ಜಾಲಿ ಮಾಯಾಕ್
ಜಾತಾಲೊ ಪಯ್ಸ್ ಮ್ಹಜೆ ಥಾವ್ನ್ ಚಂದ್ರ್ ಸೊಭಿತ್
ಆಶೆತಾಲಿಂ ರಾವೊಂಕ್ ಸದಾಂ ತಾಚ್ಯಾ ವೆಂಗೆಂತ್
ಧಾಂವ್ಲೊ ಕಾಳೊಕ್ ಅತೀ ವೇಗಾನ್
ಫಾಂಕ್ಲೊ ಉಜ್ವಾಡ್ ಹ್ಯಾ ಮ್ಹಜ್ಯಾ ಗಾಂವಾಂತ್
ಚಂದ್ರ್ ತೊ ಖಂಚಾನ್ಗೀ ಲಿಪ್ಲೊ ಕುಪಾಂತ್
ಸಕಾಳಿಂ ಉಟ್ತಾನಾ ಸಗ್ಳೆಂ ಜಾಲ್ಲೆಂ ಮಾಯಾಗ್
ಸುರ್ಯಾನ್ ಫಾಂಕಯ್ಲೊ ಅಪ್ಲೊ ಉಜ್ವಾಡ್
ನಿರಾಶಿ ವದನ್ ತೆಂ ಜಾಲ್ಲೆಂ ಸಗ್ಳೆಂ ಥಂಡ್
ಸುರ್ಯಾಚ್ಯಾ ಕಿರ್ಣಾಂನಿ ಸುಟ್ಲ್ಲೊ ತೊಂಡಾರ್ ಘಾಮ್
10. ವಾತ್ ಪೆಟಯ್ [ -ಮಾ|ಜೋರ್ಜ್ ಒಲಿವೆರಾ]
ಅಶೀಯ್ ಏಕ್ ಗಾದ್,
ಕಾಳೊಕಾಕ್ ದುರ್ಸೊಂಚಾ ಬದ್ಲಾಕ್
ಏಕ್ ವಾತ್ ಪೆಟಯ್.
ಕಾಳೊಕ್ ಆನಿ ನಾಸ್ತಿಕ್ಪಣ್!
ಏಕ್ ಉಣೆಂಪಣ್, ಏಕ್ ದುರ್ಸೊಣೆಂ-
ಉಜ್ವಾಡಾ ವಿರೋಧ್!
ಉಜೊ! ಪವಿತ್ರ್ ಗೃಂಥಾಂತ್ಲಿಂ
ಪ್ರಥಮ್ ದೆವಾಚಿ ಆಸ್ತ್
ದೆವಾಕ್ ತಿ ಬರಿ ದಿಸ್ಲಿ..
ಉಜೊ ಆನಿ ಉಜ್ವಾಡಾ ಉಪ್ರಾಂತ್
ದೆವಾಕ್ ಸರ್ವ್ ಬರೆಂ ದಿಸ್ಲೆಂ.
ಮನ್ಶಾ ಜಿವಿತಾಂತ್ ಉಜೊ ಗರ್ಜ್..
ಉಜೊ ಭಾವಾರ್ಥಾಚೊ, ಭರ್ವಶ್ಯಾಚೊ-
ಆನಿ ಮಾಯಾಮೊಗಾಚೊ - ಶಾಂತೆಚೊ.
ಉಜೊ ಏಕ್ ಆಸ್ತ್ - ಬರೆಂಪಣಾಂಚೊ,
ನಾ-ಆಸ್ತ್ ವಾಯ್ಟಾಚೊ.
ಕಾಳೊಕ್ ಏಕ್ ಖುಣ್ - ಭಿರಾಂತೆಚೆಂ -
ಭಿರಾಂತ್ ಸತಾ-ನಿತಿವಿಶಿಂ.
ಕಾಳೊಕ್ ಏಕ್ ಅವ್ಗುಣ್ - ಕಾವ್ಜೆಣೆಚೆಂ -
ಕಾವ್ಜೆಣಿ - ಬರೆಂಪಣ್ ನೆಸಂವ್ಕ್.
ಉಜೊ ಪಾಲ್ವತಾನಾ ಕಾಳೊಕ್ -
ಚೊರಾಭಾಶೆನ್ ಭಿತರ್ ಸರ್ತಾ,
ಮತಿಭಿತರ್ ಅಂತರಂಗಾಂತ್,
ಮತಿಭಾಯ್ರ್ ಪರಿಸರಾಂತ್.
ಕಾಳೊಕಾಕ್ ಲಬ್ದೊಂವ್ಚೆಂ -
ಉಣೆಂಪಣ್, ಪುಣ್ ಉಜ್ವಾಡಾಕ್,
ವೆಂಗ್ಚೆಂ ಗ್ರೇಸ್ತ್ಪಣ್.
ಕಾಳೊಕಾಕ್ ದುರ್ಸೊಂಚಾ ಬದ್ಲಾಕ್
ಏಕ್ ವಾತಿಕ್ ಉಜೊ ಪೆಟಯ್.
11. ಉಜೊ ಪೆಟಯ್ [ -ವಲ್ಲಿ ಕ್ವಾಡ್ರಸ್]
ಪಡ್ಲ್ಯಾ ಪಳೆ ಕಾಳ್ಯಾ ಮೊಡಾಂಚಿ ಧಾಡ್
ಪಡೊನ್ ಆಸಾ ಪಾವ್ಸ್ ಚಡ್ಲ್ಯಾ ಉದ್ಕಾಚಿ ಗಡ್
ದರ್ಯೊ ಸ್ವಾರ್ಥಿ ದೆಖುನ್ ವಿಸ್ತಾರ್ತಾ ಅಪ್ಲಿ ತಡ್
ವ್ಹಾಳೊನ್ ವೆತಾತ್ ರೂಕ್ ಆನಿಂ ಕೊಣಾಚೆಂ ಝಡ್
ಪಡ್ಲಾಂತ್ ತುಟ್ಲಾ ಪಾವ್ಸಾ ಕಾಟ್
ಮುಡ್ಲಾಂತ್ ಸಗ್ಳೆಂ ವ್ಹೊಳೊನ್ ಗೆಲಾಂ
ತೆನ್ಕಾತ್ ಅಶ್ಯೋಯ್ ಝರಿ ಫುಟ್ಲ್ಯಾತ್
ಬಡ್ಗಾಂತ್ ಸಯ್ತ್ ರೊಂಬೊಂಕ್ ಲಾಗ್ಲಾಂ
ಘರಾಂ ಪಡ್ಲಿಂ ಭಾಂದ್ಪಾಂ ಕೊಸಾಳ್ಳಿಂ
ಮನ್ಶಾಂ ಮೆಲಿಂ ಗೊರ್ವಾಂ ಗೆಲಿಂ
ಸಂಬಂಧ್ ತುಟ್ಲೆ ಮನ್ಶಾಪಣ್ ಲುಟ್ಲೆಂ
ಸಂಸಾರ್ ಬದ್ಲೊನ್ ಯೆಮ್ಕೊಂಡ್ ಜಾಲೆಂ
ಸಗ್ಳ್ಯಾನಿತ್ಲ್ಯಾಂನಿ ಭರ್ಲ್ಲ್ಯಾ ಹ್ಯಾ ಕಾಳೊಕಾಂತ್
ಸಕ್ಕಡ್ಯೀ ದಿಸ್ತಾ ರೂಪ್ ರೂಪ್ ಕಾಳೆಂ
ಖಂಚೆಂಚ್ ನಾ ಧವೆಂ ತಾಂಬ್ಡೆಂ ನಿಳೆಂ
ಸಗ್ಳೆಂ ದಿಸ್ತಾ ಎಕ್ಚ್ ಮೆಳೆಂ!
ಕಾಳ್ಜಾಂ ಆತಾಂಯ್ ಲಾಸ್ಚಿಂ ರಾವಯ್
ಗೆಲ್ಲೆಂ ವಚೊಂ ಆಸ್ಚೆಂ ಉರಯ್
ಧ್ವೇಷ್ ಸಾಂಡುನ್ ಮೋಗ್ ಪಾಟಯ್
ಆಬ್ಳೆ ಮಾಯಾಮೊಗಾಚೊ ಉಜೊ ಪೆಟಯ್
12. ನಿರಾಶ್ರಿತ್[ -ರೆಮ್ಸಿ ಫೆರ್ನಾಂಡಿಸ್]
ನ್ಹಯ್ ಹಾಂವ್ ಮಂಥಾನಾಂತ್ಲೊ
ನ್ಹಯ್ ಹಾಂವ್ ಗ್ರೇಸ್ತ್ ಕುಟ್ಮಾಂತ್ಲೊ
ಖೊಟೆಂ ನಶಿಬ್ ಘೆವ್ನ್,
ದುಬ್ಳಿಕಾಯೆನ್ ಜಲ್ಮೊನ್,
ದೇವ್ ಭಿರಾಂತಿನ್ ಚಲೊನ್,
ಅನಾಥ್ ಜಾವ್ನ್ ಜಿಯೆವ್ನ್,
ಜೀವನ್ ಸಾರ್ಚೊ, ಏಕ್ ಸಾದೊ ಮನಿಸ್..
ನ್ಹಯ್ ಹಾಂವ್ ನೆಗಾರಿ ಪೆದ್ರುಚೆಂ ರೂಪ್
ನಾಂ ಸಂಸಾರಾರ್ ಘೆವ್ನ್ ಆಯ್ಲಾಂ ಶಿರಾಪ್
ರಸ್ತ್ಯಾ ದೆಗೆರ್ ನಿದೊನ್,
ಭಿಕ್ ಮಾಗೊನ್ ಖಾವ್ನ್,
ಆಯ್ಚ್ಯಾಂತ್ ಸಂತೊಸ್ ಭೊಗುನ್
ಫಾಲ್ಯಾಂಚಿಂ ಚಿಂತ್ನಾಂ ಸಾಂಡುನ್
ಜೀವನ್ ಸಾರ್ಚೊ, ಏಕ್ ಸಾದೊ ಮನಿಸ್..
ಏಕ್ ಮಹಾನ್ ನಾಗರಿಕ್ ವಾ ಏಕ್ ವಿಗ್ಯಾನಿ,
ಜಾತೊಂ, ಜರ್ ಸಾಂಡಿನಾತ್ಲೆಂ ತರ್ ಮ್ಹಜ್ಯಾನಿಂ,
ಬಸ್ ಸ್ಟ್ಯಾಂಡಾಚ್ಯಾ ಪಾಕ್ಯಾ ಪಂದಾ ನಿದೊನ್,
ಝಳ್ಚ್ಯಾ ಉಜ್ಯಾ ಧಾವೆಚಿ ಧಗ್ ಘೆವುನ್
ಪಾವ್ಸ್ ಆನಿ ಹಿಂವಾಳೊ ಕಾಳ್ ಪಾಶಾರ್ ಕರುನ್
ನಿರಾಶಿ ಜೀವನಾಂತ್, ಭರ್ವಾಶ್ಯಾಚೊ ಹಾಸೊ ಸೊಧುನ್
ಜೀವನ್ ಸಾರ್ಚೊ, ಏಕ್ ಸಾದೊ ಮನಿಸ್..
13. ಮಾಯ್, ತುಂ ಖಂಯ್ ಆಸಾಯ್? [-ಆಸ್ಟಿನ್ ಪ್ರಭು]
ಸಗ್ಳ್ಯಾಂಕ್ ಆವಯ್ ಮ್ಹಣೊನ್
ಮ್ಹಾಕಾಯ್ ಏಕ್ ಮೆಳ್ಳಿ ತುಂ
ತುಜೆಂ ರೂಪ್ ವಿಕಾರ್, ಸದಾಂ ರಾಗ್ ನಾಕಾರ್
ಸಾರ್ಕಿ ಗತ್ ನಾಸ್ಚ್ಯಾ, ಮತಿಹೀನ್ ಬಾಯ್ಲೆಕ್
ಭುರ್ಗಿಂ ಜಾಯ್ ಆಸ್ಲಿಂ ಕಿತ್ಯಾ?
ಮ್ಹಜೊ ಬಾಪ್ ಕೋಣ್, ಹೆಂ ತುಕಾಚ್ಚ್ ಕಳಿತ್ ನಾ!
ಅಸೆಂ ಸರ್ವ್ ಆಸ್ತಾಂ, ತುಂ ಮತಿರ್ ನಾಸ್ಲಿ ಮಣ್ಚ್ಯಾಕ್
ಆನಿ ಕಾಂಯ್ ವಕೀಲ್ ಜಾಯ್?
ಕೊಣ್ ಮ್ಹಜೊ ಬಾಪ್?
ಸಾಂಗ್ ತರೀ ತುಂ ಮ್ಹಾಕಾ!
ಹಾಂವ್ ಲ್ಹಾನ್ ಆಸ್ತಾಂ
ಸದಾಂಚ್ ಮ್ಹಾಕಾ ಹಾತಿಂ ಧರುನ್
ಬಸ್ಸ್ ಸ್ಟ್ಯಾಂಡಾಲಾಗಿಂ ರಾವ್ತಾಲಿಯ್
ಆಯಿಲ್ಲ್ಯಾ-ಗೆಲ್ಲ್ಯಾಂಚೆ ಹಾತ್ ಆಪಡ್ನ್
ಮ್ಹಜ್ಯಾ ನಾಂವಿ ಭಿಕ್ ಮಾಗ್ತಾಲಿಯ್
ತ್ಯಾ ಕಠೀಣ್ ವೊತಾ ದಾವೆಕ್
ತಶೆಂ ಪಾವ್ಸಾಕ್ ಹಾಂವ್ ಭಿಜ್ತಾನಾ
ಪಾನೊ ದೀಂವ್ಕ್ ಸುದಾಂ ವಿಸ್ರಾಲಿಯ್
ಉಗ್ಡಾಸ್ ಆಸಾ ತುಕಾ ಆತಾಂ?
ತುಜ್ಯಾ ಕುಡಿಚಿ ಖರಾಯ್
ತುಂವೆ ಜಿರಯ್ಲಿಯ್ ಆನಿ
ಮ್ಹಾಕಾ ಹ್ಯಾ ಸಂಸಾರಿಂ
ಮ್ಹಜಿ ಪರ್ವಣ್ಗಿ ನಾಸ್ತಾಂಚ್
ತುವೆಂ ಮ್ಹಾಕಾ ಜೀವ್ ದಿಲೊಯ್
ಆನಿ ಆತಾಂ ಹಾಂವ್ ವಾಡ್ಲಾಂ
ಕೊಡು ಉಗ್ಡಾಸಾಂನಿ ಕಡ್ಲಾ
ದೀಸ್ ಆನಿ ರಾತ್ ರಡ್ಲಾಂ
ರಸ್ತ್ಯಾರ್ ಹಾಂವ್ ಪಡ್ಲಾಂ
ದೆಂವ್ಚಾರಾನ್ ಮ್ಹಾಕಾ ನಾಡ್ಲಾಂ
ಹಾಂವ್ ಚೊರ್ತಾಂ ಶೊಪಾಂಕ್ ರಿಗೊನ್
ತುಜ್ಯೆಪರಿಂ ಖಾತಾಂ ಮಾಗೊನ್
ತುಜೊ ಉಗ್ಡಾಸ್ ಮತಿಂ ಯೆತಾಂ
ರಾವ್ತಾಂ ಕುಂದೊ ವೆಂಗುನ್
ನ್ಹಯ್ಗೀ ಸರ್ವ್ ತುಜ್ಯೆ ಲಾಗೊನ್?
ತುಜ್ಯಾ ಕುಡಿಕ್ ಚಡ್ಲಿ ಮಸ್ತಿ
ಕೆಲಿಯ್ ತುಂವೆ ದೋಸ್ತಿ
ಮಾರುನ್ ತಾಚ್ಯೆಲಾಗಿಂ ಕುಸ್ತಿ
ಮ್ಹಾಕಾ ಹಾಡ್ಲೊಯ್ ಹ್ಯಾ ಸಂಸಾರಿಂ
ಮ್ಹಜ್ಯಾ ಜೀವಾಚೆರ್ ಕರ್ನ್ ಜಬರ್ದಸ್ತಿ
ಆತಾಂ ಹಾಂವ್ಂಚ್ ನೆಣಾಂ
ತುಂ ಖಂಯ್ ಆಸಾಯ್ ಮ್ಹಣ್
ತುಂಚ್ ನ್ಹಯ್ಮೂ ಪೋಯ್ರ್
ತ್ಯಾ ಜಲ್ಲಿ ಲೊರಿಯೆ ಪಂದಾ
ಪಡೊನ್ ಮೆಲ್ಲಿ ತಿ ಸ್ತ್ರೀ?
ಜಾಂವ್ಕ್ಯೀ ಪುರೊ,
ಹಾಂವ್ ನೆಣಾಸ್ಲೊಂ ತಿ ತುಂ ಮ್ಹಣ್
ನಾಸ್ಲ್ಯಾರ್ ತ್ಯಾ ದೀಸಾ, ಮೀಸಾಕ್ ತರೀ ವೆತೊಂ
ತುಜ್ಯಾ ಅತ್ಮ್ಯಾಕ್ ಶಾಂತಿ ಮಾಗೊಂಕ್
ಆಂಗಾರ್ ಬೆಂತಿಣ್ ಘಾಲ್ತೊಂ
ತಶೆಂ ಪುಣೀ ತುಜೆಂ ಮೊಡೆಂ
ಸೆಮಿತರಿಂತ್ ಪುರ್ಚ್ಯಾಕ್
ಸಾಸ್ಣಾಚೊ ವಿಶೆವ್ ಮೆಳ್ಚ್ಯಾಕ್
ಆತಾಂ ಹಾಂವ್ ರಾವ್ಲಾಂ ಹಾಂಗಾ
ಭುಕ್ ತಡ್ವುಂಕ್ ಸಕಾನಾಸ್ತಾಂ
ಫಕತ್ ತಾಚೊ ಪರ್ಮಳ್ ಘೆವ್ನ್ಂಚ್
ಮ್ಹಜೆಂ ಚಿರ್ಮುಟ್ಲೆಲೆಂ ಪೋಟ್
ಭರ್ಲ್ಲ್ಯಾಪರಿಂಚ್ ಜಾತಾ ಮ್ಹಾಕಾ
ತೆಂ ಉಶ್ಟೆಂ ಖಾವ್ನ್, ಖಾವ್ನ್
ಆಣ್ಕಿಟಿ ಸುಕೊನ್ ಗೆಲ್ಯಾ
ಲೊಣ್ಚ್ಯಾಂತ್ಲ್ಯಾ ತೆಂಡ್ಲ್ಯಾಂಪರಿ
ದೊಳೆ ಮಾಟ್ಯಾಂತ್ ರಿಗ್ಲ್ಯಾತ್
ದಾಂತ್ ತಾಂಬ್ಡೆ ಜಾಲ್ಯಾತ್
ಪಾನ್-ಫೊಡ್ ಖೆಲ್ಲ್ಯಾಂಪರಿ
ಮ್ಹಜ್ಯೆ ಮುಖಾರ್ ಸದಾಂ ವೆತಾತ್
ಮ್ಹಜ್ಯಾ ಪ್ರಾಯೆಚಿಂ ಭುರ್ಗಿಂ
ಕಿತೆಂ ತೊ ತಫಾವತ್!
ಉಜ್ಯಾಕ್ ಆನಿ ಕಾಳೊಕಾಕ್ ಸರಿ
ಹಾಂವ್ ಉಜ್ಯಾನ್ ಕರ್ಪಾಲಾಂ
ಕಾಳೊಕಾಂತ್ ಶಿರ್ಕಾಲಾಂ
ತುವೆಂ ಮ್ಹಜೆರ್ ಶಿರಾಪ್ ಘಾಲಾಯ್
ಪಾತ್ಕಾಂತ್ ಹಾಂವ್ ರೆಂವೊಡ್ಲಾಂ
ಆನಿ ಹಾಂವೆ ಮೊರ್ಚೆಂ ಹ್ಯಾ ಕಾಳೊಕಾಂತ್
ಭಾಜುನ್ ಲಾಸ್ಚೆಂ ತ್ಯಾ ಉಜ್ಯಾಂತ್
14. ಆಯ್ಕಾತ್
ಮ್ಹಜೆಂ ಮಾಗ್ಣೆಂ!
[-ಆಸ್ಟಿನ್
ಪ್ರಭು]
ಉಜೊ ದೆವಾ, ಉಜೊ, ಉಜೊ ತೊ ಉಜೊ
ಆನಿ ಮ್ಹಜ್ಯಾನ್ ಭಿಲ್ಕುಲ್ ಸೊಸುಂಕ್ ನಜೊ
ಪೊಟಾಂತ್ ಪಡ್ಲಾ ತೊ ಭುಕೆಚೊ ಉಜೊ ಧನ್ಯಾಂ
ಜಾಲೆ ದೀಸ್ ಪಾಶಾರ್ ಪೊಟಾಕ್ ಪಡಾನಾಸ್ತಾಂ
ಕಸಲ್ಯಾಚ್ ನಮೂನ್ಯಾಚೊ ಖಾಣಾ ಗುಜೊ
ರಾಕ್ತಾಂ, ರಾಕ್ತಾಂ, ಹಾಂವ್ ಹಾಂಗಾ ರಾಕ್ತಾಂ
ದೊಳೆ ಧಾಂಪುನ್ ಸರ್ವಾಂಲಾಗಿಂ ಮಾಗ್ತಾಂ
ಕಾಂಯ್ ತರೀ ದಿಯಾ ಮ್ಹಣ್ ಪರಾತ್ತಾಂ
ಪುಣ್ ಹಾತಾಕ್ ಮ್ಹಜ್ಯಾ ಕಿತೆಂಚ್ ಮೆಳಾನಾ
ಕೊಣಾಚಿಚ್ ಸಾವ್ಳಿ ಮ್ಹಜೆಶಿಂ ಪಡಾನಾ
ಬಾಯೆ, ಬಾಯೆ, ದೀ ಬಾಯೆ ಕಾಂಯ್ ತರೀ ಇಲ್ಲೆಂ
ಮಾಗ್ತಾಂ ತುಜೆಲಾಗಿಂ, ವಾಂಟ್ ದೇವಾನ್ ದಿಲ್ಲೆಂ
ಖಾಣಾಚೊ ಪರ್ಮಳ್ ಪಳೆವ್ನ್ ಹಾಂವ್ ಜಾಲಾಂ ಜಾಗೊ
ಚಿರ್ಮುಟ್ಲೆಲಿ ಆನ್ಕಿಟ್ ಉಟೊನ್ ರಾವ್ಲ್ಯಾ ಆತಾಂ
ತರ್ ಮಾಗಾನಾಸ್ತಾಂ ರಾವೊಂ ತರೀ ಕಸೊ ವೊಗೊ?
ದೀಷ್ಟ್, ತಿ ದೀಷ್ಟ್ ಸಂಸಾರಾಚಿ ಸೊಭಾಯ್ ಪಳೆಂವ್ಚಿ
ಮ್ಹಜೆ ಥಾವ್ನ್ ಕಿಮ್ಚುನ್ ಕಾಡ್ಲಿಯ್ ತುವೆಂಚ್ ದೆವಾ
ಆನಿ ಕೆಲೊಯ್ ಮ್ಹಾಕಾ ದೊಳೆ ಆಸೊನ್ ಕುರ್ಡೊ
ಹ್ಯಾ ಕಾಳೊಕಾಂತ್ ಜಿಯೆಂವ್ಕ್ ಹಾಂವ್ ಕಸೆಂ ಉರ್ಡೊಂ?
ದೆಖುನ್ಂಚ್ ಹಾಂವ್ ಹಾತಿಂ ಧರುನ್ ಆಸಾಂ ಕಂರ್ಡೊ
ಭಿಕ್, ಭಿಕ್ ದಿಯಾತ್ ಮ್ಹಾಕಾ ಹ್ಯಾ ಕಿರ್ಕೊಳ್ ರಚ್ಣಾಕ್
ವಾಂಚೊಂಕ್ ಸೊಡಾ ವೆಚಾ ಪಯ್ಲೆಂ ಹಾಂವೆ ಸಾಸ್ಣಾಕ್
ಧಾಂವ್ಡಾಯಾ ತೊ ಕಾಳೊಕ್ ಮ್ಹಜ್ಯೆ ಭಂವ್ತಿಲೊ ತುಮಿ
ದಿತಲೊ ಪಾಟಿಂ ತುಮ್ಕಾಂ ಧಾ ವಾಂಟ್ಯಾಂನಿ ತೊ ಸೊಮಿ
ಮಾಗ್ತಾಂ, ಮಾಗ್ತಾಂ ತುಮ್ಚ್ಯೆಲಾಗಿಂ ಧೀನ್ವಾಸುಂನಿ
About
us | Feedback | Contact us
Copyright
© 2005 DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.