ಕವಿತಾकविताPoem
ತುಫಾನ್
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಕಾಣಿಂ ಎಕಾ ವಾಚ್ಪ್ಯಾಕ್ ಸ್ವಪ್ಣಾಂಚಾ ಸಾಗೊರಾಲಾಗಿಂ ಪಾವಂವ್ಕ್ ಸಕ್ತಾ ತರ್ ಕವಿತಾ ತಾಂತುಂ ಉಪ್ಯೆಂವ್ಚೊ ಅನ್ಭೋಗ್ ದಿತಾ’
ಕವಿತಾಪಾಠ್ - 9
ಲಿಸಾಂವ್ -9. ಭಿತರ್ಲೆಂ ತುಫಾನ್
ಕವಿತಾ - ಭಿತರ್ಲೆಂ ತುಫಾನ್
ಕವಿ: ಜೆ.ಬಿ.ಮೊರಾಯಸ್
ಬೂಕ್: ಭಿತರ್ಲೆಂ ತುಫಾನ್
ಪ್ರಕಾಶಕ್: ಪುನವ್ ಪ್ರಕಾಶನ್
ಪಾಠ್ ಚಲವ್ಪಿ: ವಲ್ಲಿ ಕ್ವಾಡ್ರಸ್
ತಾರಿಕ್: 14 ಅಕ್ತೋಬರ್ 2005
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಸುರ್ಯೊ ಬುಡೊಂಕ್ ಸೊಧ್ಚಾ ವೆಳಾರ್
ದಿಸಾ-ರಾತಿ ಮಿಲನ್ ಜಾತಾ.
ಮಂದ್ ಮಂದ್ ವಾರೆಂ ವ್ಹಾಳ್ತಾ
ಆನಿ ಪೃಥ್ವಿ ಶಾಂತ್ ಜಾತಾ.
ತ್ಯಾ ಅದ್ಭುತ್ ಮೌನಾಂತ್
ಭಿತರ್ ಮ್ಹಜ್ಯಾ ತುಫಾನ್ ಉಠ್ಲಾಂ
ಭಾಯ್ಲಿ ಥಂಡಾಯ್ ಆನಿ ಮೌನ್
ಫಟ್ಕಿರೆಂ ತೆಂ ಲಿಪಂವ್ಕ್ ಸಕಾನಾ
ತುಫಾನ್ ಭಿತರ್ಲೆಂ
ಕಾಳ್ಜಾಂತ್ಲೆ ಕಾಟ್ ತುಟೊನ್
ಉಮಾಳ್ಯಾಚಿಂ ಆವ್ರಾಂ ವ್ಹಾಳ್ಟಾತ್
ಆನಿ ಭಾಯ್ಲ್ಯಾನ್ ಶಾಂತತಾಯ್
ಕೊಣ್ ಪಾತ್ಯೆತ್? ಕೊಣ್ ಆಯ್ಕಾತ್
ಗೊಬ್ರಾಚ್ಯೆ ರಾಶಿಭಿತರ್
ಮುರ್ಮುರ್ಚ್ಯಾ ಕೆಂಡಾ ಬರಿ
ಥಂಡಾಯೆಚ್ಯಾ ಆವರಣಾಂತ್
ಹೆಂ ಮುರ್ಮುರ್ತಾ ಆನಿ ಶಿಜ್ತಾ
ಆನಿ ಏಕ್ ದೀಸ್ ಕಾಟ್ ತುಟಯ್ತಾ
ತೆದ್ನಾಂ ಮ್ಹಜಾ ಮನಾಂತ್ಲ್ಯಾ ಕಾನಾಂತ್
ಆಯ್ಕಾತಲೊ ಘಡ್ಘಡೊ
ಆನಿ ತೊಪ್ತೆಲೆಂ ಝಗ್ಲಾಣೆ
ಭಿತರ್ಲ್ಯಾ ದೊಳ್ಯಾಂಕ್
ಕೂಡ್ ಮ್ಹಜಿ ಕಾಂಪಯ್ತೆಲಿ
ತಿ ಭಿತರ್ಲಿ ಉಚಾಂಬಳಾಯ್
ದಿಸ್ಚಿನಾ ಹೆರಾಂಕ್
ದಿಸ್ತೆಲಿ ತಾಂಕಾಂ ಶಾಂತತಾಯ್
ಮುರ್ಮುರ್ಚ್ಯಾ ಕೆಂಡಾಂಕ್
ಲಿಪವ್ನ್ ಆಸ್ಚ್ಯಾ ಗೊಬ್ರಾ ಬರಿ
ಕವಿಚಿ ವ್ಹಳೊಕ್:
ಜೆ.ಬಿ.ಮೊರಾಯಸ್ ಕೊಂಕ್ಣೆಂತ್ಲೊ ಮಾಲ್ಘಡೊ ಕವಿ, ಸಾಹಿತಿ, ಪತ್ರಿಕೋಧ್ಯಮಿ, ವಾವ್ರಾಡಿ. ಅಪ್ಲ್ಯಾ ’ಭಿತರ್ಲೆಂ ತುಫಾನ್’ ಬುಕಾಕ್ ಕೇಂದ್ರ್ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ಥಿ ಜಿಕ್ಪಿ. ಕೊಂಕ್ಣಿ ಭಾಸೆಚೊ ಖಳ್ಮಿತ್ ನಾತ್ಲ್ಲೊ ವಾವ್ರ್ ಅಜೂನ್ ಕರುನ್ ಆಸ್ಚೊ ಹೊ ಆತಾಂ ಮುಂಬಯಾಂತ್ ಆಪ್ಲ್ಯಾ ಪತಿಣೆಸವೆಂ ವಸ್ತಿ ಕರುನ್ ಆಸಾ.
ದಾವ್ಯಾ ಥಾವ್ನ್ ಉಜ್ವ್ಯಾಕ್ (ಬಸ್ಲ್ಲಿಂ) ಐಡಾ ಡಿ’ಸಿಲ್ವಾ ಪಾಲಡ್ಕ, ಶ್ರೀಮತಿ ಆನಿ ಶ್ರೀ ಡೇವಿಡ್ ಡಿ’ಸೊಜ್, ಮೆಲ್ವಿನ್ ಜೆ. ವಾಸ್ ಕೆಲರಾಯ್. (ಉಭಿಂ ಆಸ್ಚಿಂ) ರೀನಾ ಕ್ವಾಡ್ರಸ್, ಆಂಟನಿ ಮಿನೇಜಸ್, ಹೆನ್ರಿ ಲುವಿಸ್, ರೋಬರ್ಟ್ ಕ್ರಾಸ್ತಾ, ವಿನ್ಸಿ ನೊರೊನ್ಹಾ, ಜೊಸ್ಸಿ ಪಿಂಟೊ ನಂತೂರ್, ಸಿರಿಲ್ ಪೆರಿಸ್ ಆನಿ ವಲ್ಲಿ ಕ್ವಾಡ್ರಸ್ (ತಸ್ವೀರೆಂತ್ ನಾ)
ಆಧ್ಲ್ಯಾ ಕವಿತಾಪಾಠಾಂಚೊ ವಿವರ್
ಕವಿತಾಪಾಠ್ - 8 . ದರ್ಯಾಕ್ ಉಜೊ ಪೆಟ್ಲಾ (ಚಾ.ಫ್ರಾ.ದೆ’ಕೋಸ್ತಾ)
ಕವಿತಾಪಾಠ್ - 7 . ಮನಿಸ್ ಮ್ಹಣ್ಜೆ ಕಿತೆಂ (ಲುವಿಸ್ ಮಸ್ಕರೇಞ್)
ಕವಿತಾಪಾಠ್ - 6 . ಮ್ಹಜೊ ದಿವೊ (ಮಾವ್ರಿಸ್ ಶಾಂತಿಪುರ್)
ಕವಿತಾಪಾಠ್ - 5 . ಬಾಂಯ್ (ಆಂಡ್ರು ಎಲ್. ಡಿ’ಕುನ್ಹಾ)
ಕವಿತಾಪಾಠ್ - 4 . ಆಜ್ (ವಲ್ಲಿ ಕ್ವಾಡ್ರಸ್)
ಕವಿತಾಪಾಠ್ - 3 . ಸಲ್ವಣಿ (ಫ್ರೆಡ್ ಕುಮಾರ್)
ಕವಿತಾಪಾಠ್ - 2 . ಕಯ್ದ್ಯಾಚಿ ಕವಿತಾ (ಎಚ್ಚೆಮ್)
ಕವಿತಾಪಾಠ್ - 1 . ವಾಟ್ (ಮೆಲ್ವಿನ್ ರೊಡ್ರಿಗಸ್)
ಲಿಪವ್ನ್ ಆಸ್ಚೆಂ ಉಜ್ವಾಡಾಕ್ ಹಾಡ್ಚೆಂ ತುಫಾನ್
[-ವಲ್ಲಿ ಕ್ವಾಡ್ರಸ್, ಅಜೆಕಾರ್]
ಸುರ್ಯೊ ಬುಡೊಂಕ್ ಸೊಧ್ಚಾ ವೆಳಾರ್
ದಿಸಾ-ರಾತಿ ಮಿಲನ್ ಜಾತಾ.
ಮಂದ್ ಮಂದ್ ವಾರೆಂ ವ್ಹಾಳ್ತಾ
ಆನಿ ಪೃಥ್ವಿ ಶಾಂತ್ ಜಾತಾ.
ಕವಿತಾಕ್ ಆಸಾ ತಶೆಂ ಅಧ್ಯಯನಾಕ್ ಘೆತ್ಲೆಂ ತರ್ ಹೆಂ ಕಾಂಯ್ ನೈಸರ್ಗಿತ್ ಭಗ್ಣಾಂಕ್ ಕವಿಚಾ ಉಮಾಳ್ಯಾಂಕ್/ಅತ್ರೆಗಾಂಕ್ ವೆಕ್ತ್ ಕರ್ತಾ ಮ್ಹಳ್ಳೆಂ ಗೊಮ್ತಾ ತರ್ಯ್ ಸಾಂಕೇತಿಕ್ ರಿತಿನ್ ಹ್ಯಾ ಕವಿತಾಂತ್ ಜಾಯ್ತ್ಯೊ ಸಂಗ್ತ್ಯೊ ಲಿಪವ್ನ್ ಆಸಾತ್.
ಸುರ್ಯೊ ಹಾಂಗಾ ಪದ್ವೆದಾರ್ ಆನಿ ಅಧಿಕಾರ್. ಮ್ಹಣ್ಜೆ ಜೆನ್ನಾ ಪದ್ವೆದಾರ್ ನಿತ್ರಾಣ್ ಜಾತಾ ತೆದ್ನಾಂ ಬರೆಂ-ವಾಯ್ಟ್ ಏಕ್ ಜಾತಾ ಆನಿ ಪಾರಂಪರಿಕ್ ರಿತಿಪರಿಂ ವ್ಹಡ್ಲೆಂ ಧಾಕ್ಟ್ಯಾಕ್ ಗಿಳ್ತಾ ಆನಿ ದಾಕ್ಟ್ಯಾಚೆಂ ಅಸ್ತಿತ್ವ್ ನಪಂಯ್ಚ್ ಕರ್ತಾ. ಹೆಂ ಕಸಲೇಂಯ್ ವಾರ್ಜಿಕ್ ವ ವಿಚಿತ್ರ್ ನ್ಹಯ್, ಬಗಾರ್ ಸತ್!!
ದೀಸ್-ರಾತ್ ಸಾಂಕೇತಿಕ್ ರಿತಿರ್ ಬರೆಂ-ವಾಯ್ಟ್.
ತವಳ್ ಸಂಸಾರಿ ದೆಖಿಕ್ ಮಂದ್ ಮಂದ್ ವಾರೆಂಚ್ ವ್ಹಾಳ್ತಾ ಕಿತ್ಯಾಕ್ ಸುರ್ಯಾಚಿ ದಾವ್ ನಿಂವ್ಲ್ಯಾ, ಪದ್ವೆದಾರಾಚಿ ತಾಂಕ್ ನಿತ್ರಾಣ್ ಜಾಲ್ಯಾ ಆನಿಂ ತ್ಯಾ ವೆಳಾರ್ ಪೃಥ್ವಿ ಶಾಂತ್ ಜಾತಾ.
ತ್ಯಾ ಅದ್ಭುತ್ ಮೌನಾಂತ್
ಭಿತರ್ ಮ್ಹಜ್ಯಾ ತುಫಾನ್ ಉಠ್ಲಾಂ
ಭಾಯ್ಲಿ ಥಂಡಾಯ್ ಆನಿ ಮೌನ್
ಫಟ್ಕಿರೆಂ ತೆಂ ಲಿಪಂವ್ಕ್ ಸಕಾನಾ
ಅಸಲ್ಯಾ ಪದ್ವೆಚಾ ಗೈರ್ ಹಾಜ್ರೆಂತ್ ಸಂಸಾರಾಂತ್ ತಾತ್ಕಾಲಿಕ್ ಶಾಂತತಾ, ಥಂಡಾಯ್, ಮೌನ್ ರಾಜ್ ಕರ್ತಾ. ಎದೊಳ್ ಪರ್ಯಾಂತ್ ಝಳೊನ್, ಪೆಟೊನ್ ಆಸ್ಚೆಂ ಕವಿಚೆಂ ಭಿತರ್ಲೆಂ ತುಫಾನ್ ಆತಾಂ ಭಾಯ್ಲ್ಯಾ ಮೌನಾಕ್ ಸೊಸುಂಕ್ ಕಬೂಲ್ ನಾ. ಮೌನ್ ಭೋವ್ಶಾ ಹ್ಯಾ ತುಫಾನಾಕ್ ಖೆಂಡ್ತಾ ವಾ ಸವಾಲ್ ಕರ್ತಾ. ವಾಜ್ಬಿಚ್ ಸಯ್!
ತುಫಾನ್ ಭಿತರ್ಲೆಂ
ಕಾಳ್ಜಾಂತ್ಲೆ ಕಾಟ್ ತುಟೊನ್
ಉಮಾಳ್ಯಾಚಿಂ ಆವ್ರಾಂ ವ್ಹಾಳ್ಟಾತ್
ಆನಿ ಭಾಯ್ಲ್ಯಾನ್ ಶಾಂತತಾಯ್
ಕಾಳ್ಜಾಂತ್ಲೆ ಉಮಾಳೆ ಕಾಟ್ ತುಟೊನ್ ವಾಳ್ಚಾ ಉಮಾಳ್ಯಾಂಚಾ ಆವ್ರಾಸವೆಂ ವಚೊಂಕ್ ಲಾಗ್ತಾನಾ ಕವಿಕ್ ಭಾಯ್ಲಿ ಫಟ್ಕಿರಿ ಶಾಂತತಾಯ್ ಸೊಸುಂಕ್ ಜಾಯ್ನಾಂ.
ಕೊಣ್ ಪಾತ್ಯೆತ್? ಕೊಣ್ ಆಯ್ಕಾತ್
ಗೊಬ್ರಾಚ್ಯೆ ರಾಶಿಭಿತರ್
ಮುರ್ಮುರ್ಚ್ಯಾ ಕೆಂಡಾ ಬರಿ
ಥಂಡಾಯೆಚ್ಯಾ ಆವರಣಾಂತ್
ಹಸ್ತಿಕ್ ಧಾಖಂವ್ಕ್ ಆಸ್ಚೆ ದಾಂತ್ ವೆಗ್ಳೆ ಆನಿ ಚಾಬೊಂಕ್ ಆಸ್ಚೆ ದಾಂತ್ ವೆಗ್ಳೆ ಮ್ಹಳ್ಳೆಪರಿಂ, ಹರ್ಯೆಕ್ ಮನಿಸ್ ಎಕಾ ನ ಎಕಾ ರಿತಿಚಾ ಸಂಕಶ್ಟಾಸವೆಂ ಜಿಯೆತಾ, ತರ್ಯ್ ಭಾಯ್ರ್ ತ್ಯಾ ಸಂಕಶ್ಟಾಂಕ್ ಧಾಖಯ್ನಾಸ್ತಾಂ ಶಾಂತತಾಯೆಚೊ ಪಡ್ದೊ ನೆಸ್ತಾ. ಕವಿ ಹ್ಯಾ ಪರಿಗತೆಕ್ ಸವಾಲ್ ಕರ್ತಾ, ಹಿ ಪೊಕೊಳ್ ರೀತ್ ಕಿತ್ಯಾಕ್? ಮ್ಹಳ್ಳೆಂ ಸವಾಲ್ ಕರ್ತಾ.
ಹೆಂ ಮುರ್ಮುರ್ತಾ ಆನಿ ಶಿಜ್ತಾ
ಆನಿ ಏಕ್ ದೀಸ್ ಕಾಟ್ ತುಟಯ್ತಾ
ತೆದ್ನಾಂ ಮ್ಹಜಾ ಮನಾಂತ್ಲ್ಯಾ ಕಾನಾಂತ್
ಆಯ್ಕಾತಲೊ ಘಡ್ಘಡೊ
ಆನಿ ತೊಪ್ತೆಲೆಂ ಝಗ್ಲಾಣೆ
ಕವಿ ಅಪ್ಲ್ಯಾ ಆಂತರಿಕ್ ಅಕ್ಲಾಸಾಂಕ್ ಭಾಯ್ಲ್ಯಾ ಮೌನಾಂತ್ ಮೆಳಂವ್ಕ್ ಆಶೆತಾ, ಬಿಲ್ಕುಲ್ ವ್ಹಡ್ ಮಾಸ್ಳೆನ್ ಲ್ಹಾನ್ ಮಾಸ್ಳೆಕ್ ಗಿಳ್ಚೆಪರಿಂ. ಕಿತ್ಯಾಕ್ ಸುರ್ಯೊ ನಾಸ್ತಾನಾ ಉದೆಲ್ಲ್ಯಾ ಥಂಡಾಯೆಂತ್ ಹಿ ಭಿತರ್ಲಿ ದಾವ್ ಮೆಳಯ್ಲಿ ತರ್ ಇಲ್ಲೆಂ ಜೊಡುಂಕ್ ಆಸ್ತೆಲೆಂ ಇಲ್ಲೆಂ ಹೊಗ್ಡಾಂವ್ಕ್ ಮೆಳ್ತೆಲೆಂ ಆನಿಂ ಕವಿಚೊ ಆಶಾವಾದ್ ಹೊಕೀ ಏಕ್ ದೀಸ್ ಅಶೆಂ ಜರೂರ್ ಘಡ್ತೆಲೆಂ, ಭಿತರ್ಲೆಂ ತುಫಾನ್ ಭಾಯ್ಲ್ಯಾ ಮೌನಾಸವೆಂ ಎಕ್ವಟ್ತೆಲೆಂ ಮ್ಹಣ್ ತೊ ನಿಹಾಳ್ ಕರ್ತಾ.
ಭಿತರ್ಲ್ಯಾ ದೊಳ್ಯಾಂಕ್
ಕೂಡ್ ಮ್ಹಜಿ ಕಾಂಪಯ್ತೆಲಿ
ತಿ ಭಿತರ್ಲಿ ಉಚಾಂಬಳಾಯ್
ದಿಸ್ಚಿನಾ ಹೆರಾಂಕ್
ದಿಸ್ತೆಲಿ ತಾಂಕಾಂ ಶಾಂತತಾಯ್
ಮುರ್ಮುರ್ಚ್ಯಾ ಕೆಂಡಾಂಕ್
ಲಿಪವ್ನ್ ಆಸ್ಚ್ಯಾ ಗೊಬ್ರಾ ಬರಿ
ಸಂಸಾರ್ ಕಸೊ ದೆಖ್ತಾ ಮನ್ಶಾಚೆಂ ಕಾಳಿಜ್? ತಿತ್ಲೊ ವೇಳ್ ಕೊಣಾಲಾಗಿಂ ಆಸಾ ಎಕ್ಲ್ಯಾಚಾ ಕಾಳ್ಜಾಭಿತರ್ ವಚೊನ್ ತಿಳುಂಕ್? ಸಂಸಾರಾಕ್ ಫಕತ್ ಭಾಯ್ಲೆಂ ರೂಪ್ಚ್ ಜಾಯ್. ದೆಕುನ್ ಜೊ ಕೊಣ್ ಜಿತ್ಲೊ ಬರೊ ವೇಸ್ ಭಾಯ್ಲ್ಯಾನ್ ಧಾಖಯ್ತಾ ತೊ ಸಂಸಾರಾಚೆ ನದ್ರೆನ್ ಬರೊ. ಆನಿ ಜೊ ಕೊಣ್ ಭಾಯ್ಲೊ ವೇಸ್ ಬರೊ ಧಾಖಯ್ನಾ ತೊ ಖೊಟೊ. ಆನಿ ಕವಿಚೆ ಉಮಾಳೆ/ಅತ್ರೆಗ್ಯ್ ಹೊ ಸಂಸಾರಿ ಡೋಂಗ್ ಅಖೇರ್ ಕರ್ಚೊ.
ಪುಣ್ ಅಖೇರ್ ಪರ್ಯಾಂತ್ ಕವಿತೆಚಾ ನಾಯಕಾನ್ ಕಾಳ್ಜಾಂತ್ ಆಸ್ಚಾ ಹ್ಯಾ ತುಫಾನಾಚೆಂ ಮೂಳ್ ಕಾರಾಣ್ ಉಗ್ತೆಂಚ್ ದವರ್ಲಾಂ.
ಹ್ಯಾಚ್ ಕವಿತೆಂತ್ ಆಸ್ಚೊ ಸ್ವಶ್ಟ್ ಇಮಾಜ್ಯೊ ಸೊಧ್ಚ್ಯೊ ತರ್; ಸುರ್ಯೊ, ದೀಸ್-ರಾತ್, ಭಿತರ್, ಭಯ್ರ್, ಮೌನ್, ಶಾಂತತಾಯ್, ಘಡ್ಗಡೊ, ಝಗ್ಲಾಣೆ, ಕೇಂಡ್, ಗೊಬೊರ್ ಪುಣ್ ಅಸ್ವಶ್ಟ್ ಇಮಾಜ್ಯೊಯ್ ಸಭಾರ್ ಆಸಾತ್. ಧಾಖವ್ಣಿಂ, ವೇಸ್, ರಿವಾಜ್, ಬೋಬ್, ಅಕ್ಲಾಸ್, ನಿರಾಸ್, ರಾಗ್ ಹ್ಯೊ ಸರ್ವ್ ಇಮಾಜ್ಯೊ ಲಿಪವ್ನ್ ಆಸ್ಚೆಂ ಹೆಂ ಕವಿತಾ ಮ್ಹಜಾ ನದ್ರೆಂತ್ ಲಿಪವ್ನ್ ಆಸ್ಲ್ಲೆಂ ಉಜ್ವಾಡಾಕ್ ಹಾಡ್ಚೆಂ ತುಫಾನ್.
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.