’ತೊ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ ’ದಾಯ್ಜ್’ ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಸವಾಲಾಂಕ್ ಜಾಪಿ

ಹ್ಯಾ ಅಂಕಣಾಂತ್ ಇನಾಮಾಂಕ್ ಫಾವೊ ಜಾಲ್ಲ್ಯಾ ಸವಾಲಾಂಚೆಂ ಪೋಶಕ್ ಜಾವ್ನಾಸಾತ್ ಹಿಂ ಕೊಂಕ್ಣಿ ಪತ್ರಾಂ

Placeholder: the original page gave this picture no description, and none has been written yet. It came from daaiz\daaiz\column\sz\sz4.asp.

ದಿವೊ ಹಾಫ್ತ್ಯಾಳೆಂ

ಮಿತ್ರ್ ಹಾಫ್ತಾಳೆಂ

ಸೆವಕ್ ಮಯ್ನ್ಯಾಳೆಂ

ಅಂಕಣ್‌ಕಾರಾ ವಿಶ್ಯಾಂತ್

’ಮಿತ್ರ್’, ’ಝೆಲೊ’ ತಶೆಂಚ್ ’ಕಾಣಿಕ್’ ಪತ್ರಾಂಚೆಂ ಸಂಪಾದಕ್ಪಣ್ ಚಲಂವ್ಚೆ ಮಾರಿಫಾತ್, ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಭರ್ಪೂರ್ ಅನ್ಭೋಗ್ ಆಸ್ಚೊ ದೊ|ಆಸ್ಟಿನ್ ಡಿ’ಸೋಜ್ ಪ್ರಭು ಪ್ರಸ್ತುತ್, ಅಮೆರಿಕಾಂತ್ ಅಪ್ಲ್ಯಾ ಕುಟ್ಮಾಸವೆಂ ವಸ್ತಿ ಕರುನ್ ಆಸಾ. ಕೊಂಕ್ಣಿ ಭಾಸ್/ಸಾಹಿತ್ಯಾಚಾ ವ್ಹಾಡಾವಳೆಕ್ ಖಾಂದ್ ದಿಲ್ಲೊ ಹೊ ಏಕ್ ಸಂಘಟಕ್/ಮುಖೆಲಿ ತಶೆಂಚ್ ಕೊಂಕ್ಣಿ ಕಾರ್ಭಾರಿ ಜಾವ್ನಾಸಾ.

ಹಾಚಾ ವೆಕ್ತಿತ್ವಾ/ವಿಚಾರಾಂವಿಶಿಂ ಚಡ್ ಜಾಣಾಂ ಜಾಂವ್ಕ್ ಕೊಂಕ್ಣಿ ಕಾರ್ಭಾರಿ ಅಂಕಣಾಕ್ ಭೆಟ್ ದೀ.

[ಹೆಂ ಮಯ್ನ್ಯಾಳೆಂ ಅಂಕಣ್ ಜಾವ್ನಾಸಾ, ತುಮ್ಚಿಂ ಸವಾಲಾಂ ವಿಚಾರಾ, ಇನಾಮಾಂ ಜೊಡಾ]

* ’ತೊ ಪಯ್ಶ್ಯಾಂನಿ ಕುಸ್ತಾ ಸಾಯ್ಬಾ’ ಮ್ಹಣ್ತಾತ್ ತರ್ ಮನ್ಶ್ಯಾಕ್ ಕುಸೊಂಕ್ ಕಿತ್ಲೆ ಪಯ್ಶೆ ಜಾಯ್? [ಸುಮನ್, ಕದ್ರಿ] (ಎಕಾ ವರ್ಸಾಚಿ ಸೆವಕ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)

ತೆಂ ತ್ಯಾ ತ್ಯಾ ಮನ್ಯ್ಶಾಚೆರ್ ಹೊಂದ್ವೊನ್ ಆಸಾ; ಥೊಡಿಂ ಆಡ್ಯೆಕ್ ಭಾಗ್ ಆಯಿಲ್ಲಿಂ ಪರ್ದೇಶಾಕ್ ಗೆಲ್ಲ್ಯಾ ತಕ್ಷಣ್ ಕುಸೊಂಕ್ ಲಾಗ್ತಾತ್. ಹೆಂ ಕ್ಯಾನ್ಸರ್ ಪಿಡೆಪರಿಂ - ಹಿ ಪಿಡಾ ಲಾಗ್ಲ್ಯಾರ್ ತಿಂ ಕೊಂಕ್ಣಿ ವಿಸರ್ತಾತ್ ಆನಿಂ ಇಂಗ್ಲಿಷ್ ಉಲವ್ನ್ಂಚ್ ಮೊರ್ತಾತ್.

* ಆಜ್‌ಕಾಲ್ ಥೊಡೆ ’ದೇಶಿ’ ವಿದೇಶಿಯಾಂಕ್ ತಶೆಂಚ್ ಥೊಡೆ ’ವಿದೇಶಿ’ ದೇಶಿಂಕ್ ನಕ್ಕಲ್ ಕರ್ತಾತ್ ಮೂ? [ರೊಜಿಟಾ ನಝ್ರೆತ್, ಮಿರಾ ರೋಡ್]

ಲೋಕಾಕ್ ಆಪ್ಲೆಂ ಮ್ಹಳ್ಳೆಂ ಕೆದಾಳಾಯೀ ಬರೆಂ ಲಾಗಾನಾ. ಹೆರಾಂಚೆಂ ನಕ್ಕಲ್ ಕಾಡ್ನ್ ಆಪ್ಲೆಂ ಅಕ್ಕಲ್ ಹೊಗ್ಡಾಂವ್ಚೊ ಕಾಳ್ ಹೊ. ಹಾಕಾ ಮ್ಹಣ್ತಾತ್ ’ಐಡೆಂಟಿಟಿ ಕ್ರೈಸಿಸ್’ ಮ್ಹಳ್ಯಾರ್ ವ್ಯಶ್ಟಿತ್ವಾಚೊ ಸಂಕಟ್‌ಕಾಳ್.

* ಹಾಂಗಾ ಥೊಡೆ ಫಟ್ಟಿಂಗ್ ಸಾಂತಿಪಣಾವಿಶ್ಯಾಂತ್ ಉಲಯ್ತಾತ್, ಕಿತೆಂ ಮ್ಹಣ್ತಾಯ್ ಆಸ್ಟಿನಾ? [ಗಂಗು ಗಂಗೊಳ್ಳಿ, ವಾರಣಾಸಿ]

ಹೆಂ ಸದಾಂಚೆಂ ಗಂಗು, ತಾಣಿಂ ಆಧಾರ್ಲೆಲಿಂ ಫಟ್ಟಿಂಗ್‌ಪಣಾಂ ಇತ್ಲಿಂ ಜಾಲ್ಯಾಂತ್‌ಗೀ ಆತಾಂ ತಾಂಕಾಂ ಸಾಂತಿಪಣ್ಂಚ್ ಸರ್ಗಾಚಿ ವಾಟ್; ಮೊರ್ಚೊ ಕಾಳ್ ಲಾಗಿಂ ಆಯ್ಲಾ ಆಸ್ತಲೊ!

* ದಿತಲೊ ವ್ಹಡ್‌ಗೀ ವ ಘೆತಲೊ ವ್ಹಡ್? [ವಿನ್ಸಿ, ಬೆಂಗ್ಳುರ್] (ಎಕಾ ವರ್ಸಾಚಿ ಮಿತ್ರ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)

ತೆಂ ಅಶೆಂ ವಿನ್ಸಿ - ಹಸ್ತಿ ಪಾಟ್ಲ್ಯಾನ್ ಗೆಲ್ಯಾರ್ ದಿತಲೊ ವ್ಹಡ್ ಆನಿ ಮಾಂಕ್ಡಾ ಪಾಟ್ಲ್ಯಾನ್ ಗೆಲ್ಯಾರ್ ಘೆತಲೊ ವ್ಹಡ್.

* ಹಾಂಗಾ ಥೊಡೆ ತೆ ಜಾವ್ನ್ ಕರಿನಾಂತ್ ಆನಿ ಹೆರಾಂನಿ ಕೆಲ್ಲೆಂ ಪಳೆಂವ್ಕ್‌ಯ್ ಸಕಾನಾಂತ್ - ಕಿತೆಂ ಕರಿಜೆ ಹಾಂಕಾಂ? [ಸಹನಾ, ಕುವೇಯ್ಟ್]

ತ್ಯಾ ಕುರ್ಲ್ಯಾಂಚಿಂ ಜಾಂಗ್ಳಾಂ ಮೋಡ್ನ್, ಪಾಟಿಚೆಂ ಕಟ್ಟೆಂ ಕಾಡ್ನ್, ಆಂಬ್ಶಿ-ತಿಕ್ಶಿ ಕಡಿ ಕರುನ್ ತಾಂಕಾಂ ನಪಂಯ್ಚ್ ಕರುಂಕ್ ಜಾಯ್.

* ಜಾಪಿ ದಿತಾನಾ ತುಂ ತಾಪ್ತಾಯ್ ಕಿತ್ಯಾಕ್ ಆಸ್ಟಿನಾಮಾ? [ಡೆಲಿನಾ, ಬೆಂಗ್ಳುರ್]

ಮೊಗಾಳ್ ಡೆಲಿನಾ, ತುಂ ಕೆನ್ನಾಂ ಮ್ಹಾಕಾ ಆಪ್ಡುಂಕ್ ಆಯ್ಲೆಂಯ್? ಹಾಂವ್ ಖಂಯ್ ತಾಪ್ಲಾಂ ಮ್ಹಣ್ತಾಯ್ ತುಂ?

* ಹಾಂಗಾ ಎಕ್ಲೆಂ ಕೊಂಕುಣ್ಲೆಂ ಮ್ಹಜೆಂ ಖರೆಂ ನಾಂವ್ ಕಿತೆಂ ಮ್ಹಣ್ ಪಾಟಿಕ್ ಲಾಗ್ಲಾಂಮೂ? [ಸನ್ನೇಸಿ ಬೊಳಿಯೆ, ತಾರ್ದೇವ್]

ತುಕಾ ಲೊಟ್ರಿ ಉಟ್ಲ್ಯಾ ಸನ್ನೇಶ್ಯಾ! ತುಜೆ ಸಾಂತಿಪಣಾಚೆ ದೀಸ್ ಮಾಯಾಗ್ ಜಾಲೆ; ಸಾಂಗ್ ನಾಂವ್, ಧರ್ ಪೊಟ್ಲುನ್ ಆನಿಂ ದೀ ಏಕ್ ಉಮೊ ದೊಳೆ ಧಾಂಪುನ್!

* ಅಮೆರಿಕಾಂತ್ ಕ್ರಿಕೆಟ್ ಕಿತ್ಯಾಕ್ ನಾ ಆಸ್ಟಿನಾ? [ಡೇವಿಡ್ ರೊಡ್ರಿಗಸ್, ಪೆರ್ಮುದೆ]

ಹಾಂಗಾಚ್ಯಾ ಲೋಕಾಕ್ ತೀನ್-ಪಾಂಚ್ ದಿವಸ್ ಏಕ್ ಮ್ಯಾಚ್ ಪಳೆಂವ್ಚ್ಯೆ ತಿತ್ಲೆಂ ಸೈರಾಣ್-ಸಂಯಮ್ ನಾ; ಹಾಂಗಾಚಿಂ ಮ್ಯಾಚಾಂ ಪಾಂಚ್ ವೊರಾಂ ವಯ್ರ್ ಭಿಲ್ಕುಲ್ ವಚಾನಾಂತ್.

* ತುಂ ದಿಸಾಚೆಂ ಕಿತ್ಲಿಂ ವೊರಾಂ ನೀದ್ ಕಾಡ್ತಾಯ್ ಗಾ? [ದುಕೊರ್ ಬೊಸ್ತ್ಯಾಂವ್, ದುಭಾಯ್]

ಅಳೆ ದುಕ್ರಾ, ಹಾಂವ್ ತುಜ್ಯೆಪರಿಂ ಆಳ್ಶಿ ನ್ಹಂಯ್. ಪಾಂಚ್ ವೊರಾಂ ವಯ್ರ್ ನೀದ್ ಮೆಳ್ಚಿಚ್ ಆಪ್ರೂಪ್!

* ತುಜೆಲಾಗಿಂ ಸವಾಲಾಂ ವಿಚಾರ್ತಾಂ ದೆಖುನ್ ಮ್ಹಜೊ ಘರ್ಕಾರ್ ಮ್ಹಜೆರ್ ದುಭಾವ್ತಾಮೂ ಕುಂಪಾರೆ? [ಕುಮಾದ್ರ್, ಕುಂದಾಪುರ್]

ಮಾಫ್ ಕರ್ - ತುಂ ಕಾಂಯ್ ಗುರ್ವಾರ್ ಜಾಂವ್ಕ್ ನಾಂಯ್‌ಮೂ?

* ತುಂ ಬಾಯ್ಲಾಂಚಾ ಸವಾಲಾಂಕ್ ಪಯ್ಲೆಂ ಜಾಪಿ ದಿತಾಯ್ ಕಿತ್ಯಾಕ್ ಆಸ್ಟಿನ್ ಅಂಕಲ್? [ಸಿರಿಲ್ ಮಿನೇಜಸ್, ಬಿ.ಸಿ.ರೋಡ್]

ಮ್ಹಾಕಾ ಬಾಯ್ಲಾಂ ಮ್ಹಳ್ಯಾರ್ ಖಂಯ್ ನಾಸ್‌ಲ್ಲೊ ಆಂಗ್ಗಾಲಾಪ್ ಸಿರಿಲಾ; ದೇವಾನ್ ದಿಲ್ಲೆಂ ದೆಣೆಂ ತೆಂ!

* ಗಾಡಾಂವ್ ಆನಿ ದುಕ್ರಾ ಮಧೆಂ ಕೋಣ್‌ಗಾ ಬುಧ್ವಂತ್? [ಬಡ್ಡ, ಬಾರ್ಕುರ್]

ತುಂಚ್ ಬಡ್ಡಾ!

* ಕುಂಟನಿಗೆ ಎಂಟು ಬುದ್ಧಿ ಮ್ಹಣ್ತಾತ್ ವ್ಹಯ್‌ವೆ ಆಸ್ಟಿನಾಮಾ? [ಲಂಬು, ಲಂಡನ್] (ಎಕಾ ವರ್ಸಾಚಿ ದಿವೊ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)

ವ್ಹಯ್ ಲಂಬು, ತಾಂಕಾಂ ಹಾತ್ ಪಾವಾನಾಸ್‌ಲ್ಲ್ಯಾ ಜಾಗ್ಯಾಂಕ್ ತಿಳುಂಕ್ ವಚೊನ್ ಹಾತ್-ಪಾಂಯ್-ಪೆಂಕಾಟ್ ಮೋಡ್ನ್ ಕಾಣ್ಘೆಂವ್ಚಿ ವಾಯ್ಟ್ ಸವಯ್ ಚಡ್.

* ಹಾವೆಂ ಏಕ್ ಕಾಣಿ ಬರಂವ್ಕ್ ಚಿಂತ್ಲ್ಯಾ ಪುಣ್ ಕಶಿ ಸುರು ಕರ್ಚಿ ತೆಂ ಕಳಾನಾ, ಉಪಾವ್ ಸಾಂಗ್ಶಾತ್‌ಗಿ ಸಾಡ್ವಾಂನೊ? [ಸಾಡು, ಅಲ್ಲಿಪಾದೆ]

ತುಂವೆಂ ಮ್ಹಾಕಾ ಸಾಡ್ವಾಂನೊ ಮ್ಹಳೆಂಯ್‌ಗೀ ವ ಲಾಡ್ವಾಂನೊ? ಹಾಂವ್ ಕೆದಾಳಾ ತುಜೊ ಸಾಡು ಜಾಲೊಂ? ಅಲ್ಲಿಪಾದೆ, ಇಲ್ಲಿಪಾದೆ, ಎಲ್ಲೆಲ್ಲೂ ಪಾದೆ, ಪಾದೆ ಅಶೆಂ ಬರಂವ್ಕ್ ಸುರು ಕರ್.

* ದೆಂಕ್ಳೊ ಆನಿ ಮಾಣ್ಕೊ - ಹಾಂಚೆಪಯ್ಕಿ ಕೊಣ್‌ಗಾ ಉಂಚ್ಲೊ? [ಶರ್ಮಿಳಾ, ನಂತೂರ್]

ದೆಂಕ್ಳೊ ಉದ್ಕಾಂತ್ ಉಡ್ತಾ ಆನಿಂ ಮಾಣ್ಕೊ ಧರ್ಣಿರ್ ಉಡ್ತಾ; ದೊಗಾಂಯ್ಕೀ ಆಪಡ್ಲ್ಯಾರ್ ನಿಸರ್ತಾತ್ ಆನಿಂ ದೊಗಾಂಯ್ಕೀ ಮಾರ್ನ್ ಖಾತಾತ್. ದೆಂಕ್ಳೊ ಧರ್ಣಿರ್ ವಾಂಚಾನಾ ಪುಣ್ ಮಾಣ್ಕೊ ಧರ್ಣಿರ್ ತಶೆಂ ಉದ್ಕಾಂತ್ ಜಿಯೆಂವ್ಕ್ ಸಕ್ತಾ.

ಎಕಾ ವರ್ಸಾಚಿ ದೇಶಿ ವರ್ಗಣಿ ಹ್ಯಾ ಸಕಯ್ಲ್ಯಾಂಕ್ ಫಾವೊ ಜಾತಾ

’ಮಿತ್ ಹಾಪ್ತ್ಯಾಳೆಂ’

ವಿನ್ಸಿ, ಬೆಂಗ್ಳುರ್

’ದಿವೊ ಹಾಪ್ತ್ಯಾಳೆಂ’

ಲಂಬು, ಲಂಡನ್

’ಸೆವಕ್ ಮಯ್ನ್ಯಾಳೆಂ’

ಸುಮನ್, ಕದ್ರಿ

(ಇನಾಮಾಂ ಜಿಕ್ಪ್ಯಾಂಕ್ ತಾಂಚಿಂ ಇನಾಮಾಂ ತಾಣಿಂ ದಿಲ್ಲ್ಯಾ ವಿಳಾಸಾಕ್ ಪಾವ್ತೆಲಿಂ, ಚೂಕ್ ವಿಳಾಸಾಕ್ ಆಮಿ ಜವಾಬ್ಧಾರ್ ನಾಂವ್) - ಸಂ.

ತುಮ್ಚಿಂ ಸವಾಲಾಂ ಧಾಡುಂಕ್ ವಿಳಾಸ್: austinporob@gmail.com ವಾ editor@daaiz.com

ಹ್ಯಾ ಅಧ್ಲಿಂ ಸವಾಲಾಂ-ಜಾಪಿ: 1 , 2, 3

ಪಾಟಿಂ ದಾಯ್ಜ್ ಪಾನಾಕ್