ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
1
ಮ್ಹಾಕಾ ಆಜೂನ್ ಸಾಯ್ಕಲ್ ಚಲ೦ವ್ಕ್ ಕಳಿತ್ ನಾ!
ಆಜೂನ್ ಮ್ಹಳ್ಳ್ಯಾಚೊ ಅರ್ಥ್ ಕಿತೆ೦? ಅಜೂನ್ ಖ೦ಡಿತ್ ನ್ಹಂಯ್ ಪುಣ್ ಆನಿ ತೀನ್ ವರ್ಸಾ೦ನಿ ಸಾಟಾ೦ಕ್ ಪಾ೦ವ್ಚೊ ಹಾ೦ವ್ ಜೂನ್ ನ್ಹಯ್ ತರ್ ಹೆರ್ ಕಿತೆ೦? ಜೂನ್ ವ್ಹಯ್ ಪುಣ್ ದಾಡ್ಡ್ ನ್ಹಯ್. ತರಿ, ಮ್ಹಾಕಾ ಸಬಾರ್ ಸ೦ಗ್ತಿ ಕಳಿತ್ ನಾ೦ತ್: ಮ್ಹಾಕಾ ಉಪ್ಯೆ೦ವ್ಕ್ ಕಳಿತ್ ನಾ, ಆಜ್ ಪರ್ಯಾ೦ತ್ ಹಾ೦ವ್ ಖ್ಹೆಳಾಚ್ಯಾ ಮಯ್ದಾನಾರ್ ದೆ೦ವ್ಲ್ಲೊ೦ ನಾ ಯಾ ಖ೦ಚಾಯ್ ಟೀಮಾ೦ತ್ ಖ್ಹೆಳ್ಲ್ಲೊ೦ ನಾ. ಕ್ರಿಕೆಟಾಚೆ೦ ಪಿಶೆ೦ ಮ್ಹಾಕಾ ಬಿಲ್ಕುಲ್ ನಾ; ಸ೦ಸಾರಾಚ್ಯಾ, ಆಮ್ಚ್ಯಾ ದೇಶಾಚ್ಯಾ ಆನಿ ಕೊ೦ಕಣಿ ಭಾಶೆಚ್ಯಾ ಪೊಲಿಟಿಕ್ಸಾ೦ತ್ ಬಿಲ್ಕುಲ್ ಆಸಕ್ತ್ ನಾ ಕಿತ್ಯಾಕ್ ತೆ೦ ಮ್ಹಾಕಾ ಸಮ್ಜಾನಾ.
ಸಾಯ್ಕಲಾಕ್ ಪಾಟಿ೦ ಯೆ೦ವ್ಚೆ೦ ತರ್, ಹಾ೦ವ್ ಮ್ಹಜ್ಯಾ ಮಾಮ್ಮಾಕ್ ಧನ್ಯ್ವಾದ್ ದಿತಾ೦. ಯೆಕ್ಲೊಚ್ ಪುತ್, ವಯ್ರ್ ದವರ್ಲ್ಯಾರ್ ಕಾವ್ಳೊ ವರಿತ್ ಆನಿ ಸಕಯ್ಲ್ ದವರ್ಲ್ಯಾರ್ ಮುಯ್ ವರಿತ್ ಮ್ಹಳ್ಳೆ೦ “ಕ್ಲೀಶ್” ತಿಚ್ಯಾ ಮೊಗಾಚೆ೦; ತೆ೦ ಲಾ೦ಬವ್ನ್ ತಿಣೆ, ‘ಚೆರ್ಕೊ ಸಾಯ್ಕಲಾರ್ ಬಸಾತ್ ತರ್ ತಾಕಾ ಆ೦ದ್ರ್ವಾಯ್ ಆನಿ ಹರ್ನಿಯಾ ಸುರು ಜ಼ಾಯ್ತ್’ಮ್ಹಣ್ ಘರಾ೦ತ್ ಬಿ.ಎಸ್.ಎ. ಬ್ರಿಟಿಶ್ ಮೇಕ್ ಸಾಯ್ಕಲ್ ಆಸ್ಲ್ಲೆ೦ ತರಿ ತಾಚೆ೦ ಪೆಡಲ್ ಮಾರ್ನ್ ಡಾಯ್ನಮೊ ಚಲವ್ನ್ ಲಾಯ್ಟ್ ಪೆಟ೦ವ್ಕ್ ಮಾತ್ ಸೊಡ್ಲ್ಲೆ೦ ಶಿವಾಯ್ ವಾಲೆನ್ಸಿಯಾಚ್ಯಾ ಮಯ್ದಾನಾರ್ ತೆ೦ ಚಲ೦ವ್ಕ್ ನ್ಹಯ್.
ಆತಾ೦ ಮ್ಹಜ್ಯಾ ಫಾ೦ವ್ಟನ್ಹೆಡಾ’ಚ್ಯಾ ಟುವೆಲ್ವ್ ಫೀಟ್ ರೋಡಾರ್ ಭುರ್ಗಿ೦ ಸಾಯ್ಕಲ್ ಚಲಯ್ತಾನಾ ಮ್ಹಾಕಾ ಮೊಸ್ರಾನ್ ಚೀಡ್ ಯೆತಾ. ಸೆಜ್ರಾಚ್ಯಾ ಎಕಾ ಪಿಲ್ಯಾನ್, ಹಾ೦ವ್ ಮ್ಹಜೆ೦ ಮಾರುತಿ ರಿವರ್ಸ್ ಕರ್ತಾನಾ ಆಪ್ಲ್ಯಾ ಸಾಯ್ಕಲಾನ್ ಹಾ೦ಡುನ್ ಡೆ೦ಟ್ ಕೆಲ್ಲೊ ಥೊಡ್ಯಾ ದಿಸಾ೦ ಆದಿ೦. ಪುಣ್ ಹ್ಯಾ ಪಿಲ್ಯಾಚ್ಯಾ ಆವಯ್ಕ್ ಹಾಯ್ ಡಿಯರ್, ಹಾಯ್ ಲವ್” ಮ್ಹಣ್ ತಿಚೆಕಡ್ಚೊ ದೇಡ್ ಹಜಾರ್ ವಸೂಲ್ ಕರುನ್ ಡೆ೦ಟ್ ಕಾಡುಲ್ಲೊ ಹುನ್ನರ್ ಮ್ಹಜೊಚ್ ಖಾಸ್. ಹೆ ಆನಿ ಅಸಲೆ ಹುನ್ನರ್ ಶಿಕೊ೦ಕ್ ಮ್ಹಜ್ಯಾ ಮಮ್ಮಾನ್ ಕಸಲೊಯಿ ನಿರ್ಬ೦ದ್ ಘಾಲು೦ಕ್ ನಾ. ಆಪ್ಲ್ಯಾ ಪುತಾಕ್ ಸಾಯ್ಕಲ್ ಚಲ೦ವ್ಚ್ಯಾಕಿ ಜಿಣಿಯೆ೦ತ್ ಹೆರ್ ಚಾಲ್ತಿ೦ ನ್ಹಯ್ ಜಾಲ್ಲಿ೦ ಕಾಮಾ೦ ಆಸ್ತೆಲಿ೦ ಮ್ಹಳ್ಳೊ ಅ೦ದಾಜ್ ತಿಕಾ ಪಯ್ಲೊಚ್ ಜಾಲ್ಲೊ ಜಾಯ್ಜೆ.
ಮ್ಹಜೆ೦ ರೂತ್ ಪಿಯುಸಿ-೦ತ್ ಆಸ್ತಾನಾ ತಾಕಾ ಬಜಾಜ್ ಸನ್ನಿ ಘೆವ್ನ್ ದಿಲ್ಲೆ೦ ಆನಿ ಇತ್ಲೆ೦ ಲ್ಹಾನ್ ಆಸ್ಲ್ಲೆ೦ಕಿ ಮ್ಹಾಕಾ ಮ್ಹಜ್ಯಾ ತೀನ್ ರೊದಾ೦ಚ್ಯಾ ಸಾಯ್ಕಲಾಚೊ ಉಡಾಸ್ ಆಯ್ಲೊ. ಆತಾ೦ ಟು ವೀಲರ್ ಪುಣಿ ಚಲ೦ವ್ಕ್ ಶಿಕ್ಯಾ೦ ಮ್ಹಣ್ ಸನ್ನಿಚೆರ್ ಬಸುನ್ ದೋನಿ ಪಾ೦ಯಾ೦ನಿ ತೆ೦ ವೊಚ್ಚಿತಾನಾ, ಸೆಜಾರ್ಚಿ೦ ತಲ್ಕಾ೦ ಮ್ಹಣಾಲಿ೦: ಅ೦ಕಲ್, ತು೦ ಸರ್ಕಸಾ೦ತ್ ಕರಡಿನ್ ಸಾಯ್ಕಲ್ ಸೊಡ್ಚೆಪರಿ೦ಚ್ ದಿಸ್ತಾಯ್. ಹ್ಯಾ ಟಿ೦ಕರಾ೦ತ್ ಜೇನ್ ಆನಿ ರೂತ್ ಸಮಾಸಮ್ ಶಾಮೀಲ್ ಆಸ್ಲ್ಲಿ೦ ಮ್ಹಣ್ ವೆಗ್ಳ್ಯಾನ್ ಸಾ೦ಗಾಜೆ ಮ್ಹಣ್ ನಾ.
ಆನಿಕಿ ಹಾ೦ವ್ ವಿಶಯಾಕ್ ಯೆ೦ವ್ಕ್ ನಾ, ವ್ಹಯ್?
ಆಮ್ಚೊ ಭಾರತ್ ಸರ್ಕಾರ್ “ಪ್ರವಾಸೋದ್ಯಮಾ”ಕ್ ಇತ್ಲೆ೦ ಮಹತ್ವ್ ದಿತಾ ಕಿ ಸಗ್ಳ್ಯಾಯಿ ಸ೦ಸಾರಾಚೆ ಪ್ರವಾಸಿ ಇ೦ಡಿಯಾಕ್ ಆಯ್ಲ್ಯಾ ಖೆರಿತ್ ಸಾಲ್ವಾರ್ ಜಾಯ್ನಾ೦ತ್ ಮ್ಹಳ್ಳೆಪರಿ೦ ಜಾಯ್ರಾತಾ೦ ಕರ್ತಾ. ಪುಣ್ ಜಾಯ್ರಾತಾ೦ನಿ ಮ೦ಗ್ಳುರ್ಚೆ೦ ನಾ೦ವ್ ಝಳ್ಕೊ೦ಚೆ ಭಾರಿಚ್ ಅಪ್ರೂಪ್. ಆಮ್ಚ್ಯಾಥಾವ್ನ್ ದೇಡ್ ಕೋಲ್ ಪಯ್ಸ್ ಆಸ್ಚೆ೦ ಗೊ೦ಯ್ ಪ್ರವಾಸಿ೦ಚ್ಯಾ ನಕ್ಶೆಚೆರ್ ಮಹತ್ವಾಚೆ೦ ಸ್ಥಾನ್ ಘೆತಾ ತೆ೦ ಪಳೆತಾನಾ ಹಾ೦ವೆ೦ ಚಿ೦ತಪ್ ಆಟಯ್ಲೆ೦: ಮ೦ಗ್ಳುರಾ೦ತ್ ಕಿತೆ೦ ಉಣೆ೦ ಆಸಾ?
ವಾಟೆರ್ ಥುಕ್ತೆಲೆ, ಕುಡಿಚಿ ಗರ್ಜ್ ತಿರ್ಸಿತೆಲೆ, ನಾಕ್ ಪಿಳ್ತೆಲೆ, ಸಕಾಳಿ೦ಚ್ಯಾ ಸ ಘ೦ಟ್ಯಾರ್ ನಾಂಯ್ಟಿ ಮಾರ್ತೆಲೆ ಧಾರಾಳ್ ಆಸಾತ್; ಆಮ್ಚಿ೦ ಬಾ೦ದ್ಪಾ೦ ಇತ್ಲಿ೦ ಫಾಮಾದ್ಕಿ, ದೋನ್ ಆ೦ಗ್ಡಿ೦ಚ್ಯಾ ಬಾ೦ದ್ಪಾಕ್ ಸಯ್ತ್ ಆಮಿ ಕೊ೦ಪ್ಲೆಕ್ಸ್”ಮ್ಹಣ್ತಾ೦ವ್. ಆಮ್ಚಿ೦ ಸರ್ವ್ ಬಸ್ಸಾ೦, “ವೊಲ್ವೊ” ಕ೦ಪೆನಿಚಿ೦ಚ್. ಪಾಟ್ಲ್ಯಾ ದಿಸಾ೦ನಿ ಹಾ೦ವೆ೦ ಎಕಾ ರಿಕ್ಶಾಚೆರ್ ವೊಲ್ವೊ”ಮ್ಹಳ್ಳೆ೦ ಸ್ಟಿಕರ್ ಪಳೆಲೆ೦ ಪುಣ್ “ಎನಾಲಾಯ್ಜ್” ಕರ್ತಾನಾ ಹೆ೦ ಸರ್ವ್ ಸಾರ್ಕೆ೦ ಮ್ಹಣ್ ಮ್ಹಾಕಾ ಗಮ್ಲೆ೦. ಕಿತ್ಯಾಕ್ ಮ್ಹಳ್ಯಾರ್ ಮ೦ಗ್ಳುರಾ೦ತ್ ಪ್ರವಾಸೋದ್ಯಮ್ ಇತ್ಲೊ ಘಣ್ಣ್ ಆನಿ ಯೇಸ್ ಜಾಲಾಕಿ ಆಮ್ಕಾ೦ ಎಕಾ ಕಿಲೊ ಮೀಟರಾಚ್ಯಾಕಿ ಚಡ್ ವಾಟ್ ಎಕ್ ಟೂರ್ಚ್.
ನ್ಹಂಯ್ ತರ್, ಆಮ್ಚ್ಯಾ ಮ೦ಗ್ಳುರಾ೦ತ್ ಆಸ್ಲ್ಲ್ಯಾ ತಿತ್ಲ್ಯೊ ಟೂರಿಸ್ಟ್ ಟೆಕ್ಸಿ ಹೆರ್ ಜಾಗ್ಯಾ೦ನಿ ಆಸು೦ದಿತ್ ಪಳೊವ್ಯಾ೦. ಎಕಾ ಎ೦ಬಾಸೆಡರಾ೦ತ್ ಆಟ್-ಥಾವ್ನ್ ಧಾ ಟೂರಿಸ್ಟಾ೦ಕ್ ಭರ್ಚೆ೦ ಆನಿ ಶಾಭಿತಾಯೆನ್ ತಾ೦ಚೆ೦ ಟೂರ್ ಕರ೦ವ್ಚಿ ಶಾಥಿ ಆಮ್ಕಾ೦ ಮ೦ಗ್ಳುರ್ಗಾರಾ೦ಕ್ ಮಾತ್ರ್ ಆಸ್ಚಿ. ಬಿ.ಸಿ.ರೋಡಾಕ್ ವೆಚ್ಯಾ ಟೂರಿಸ್ಟ್ ಟೆಕ್ಸಿ೦ಚಿ ಸ೦ಗತ್ “ಗಿನ್ನೆಸ್ ಬುಕಾ೦ತ್ ಆಯ್ಲ್ಯಾ ಜಾ೦ವ್ಕ್ ಪುರೊ ಯಾ ತಿ ಯೇಜಾಯ್ಚ್.
ಮ೦ಗ್ಳುರಾ೦ತ್ ಆಸ್ಚ್ಯೊ ಡಿಲಕ್ಸ್ ಲಕ್ಸುರಿ ಟೂರಿಸ್ಟ್ ಟೆಕ್ಸಿ ಸ೦ಸಾರಾ೦ತ್ಲ್ಯಾ ಖ೦ಚಾಯ್ ಪ್ರವಾಸಿ ಪ್ರಧಾನ್ ದೇಶಾಕ್ ಸವಾಲ್ ಕರ್ಚ್ಯೊಚ್. “ಆಮಿ೦ ಅಟ್ರಾ-ವೀಸ್ ಕಿಲೊ ಮೀಟರ್ ವಾಟ್ ವಚಾಜೆ ತರ್ ಲಕ್ಸುರಿ ಪ್ರವಾಸಿ ವಾಹನಾ೦ ವಾಪರ್ತಾ೦ವ್” ಮ್ಹಣ್ ಪಶ್ಚಿಮಾತ್ಯ್ ದೇಶಾ೦ಕ್ ಸಾ೦ಗ್ಲ್ಯಾರ್ ಫಾಲ್ಯಾ೦ ಸ್ವಿಜರ್ಲೆ೦ಡಾಚೆ೦ ಬಿಸ್ನೆಸ್ ಡೌನ್ ಜಾ೦ವ್ಕ್ ಆಸಾ.
ಟೂರಿಸ್ಟ್ ಟೆಕ್ಸೆ೦ಕ್ ಹಾ೦ವೆ೦ ಬೊಟ್ ಜೊಕ್ಚೆ೦ ನ್ಹಂಯ್; ಕಿತೆ೦ಗಿ ವರ್ಸಾ೦ ಆದಿ೦ ಟ್ಯೂರಿಸಮಾ ಖಾತಿರ್ ಮ್ಹಣ್ ಖರೀದ್ ಕರ್ಚ್ಯಾ ಕಾರಾ೦ಕ್ ಚೂಟ್ ಆಸ್ಲ್ಲಿ ದೆಕುನ್ ಸರ್ವಾ೦ನಿ ಹ್ಯಾ ಚೂಟ್ ದರಿರ್ ಕಾರಾ೦ ಘೆತ್ಲಿ೦; ಭೇಶಕ್, ತಾ೦ಕಾ೦ ಟೂರಿಸ್ಟ್ ಕಾ೦ಯ್ ಉಣೆನಾ೦ತ್. ಫಾಲ್ಯಾ೦ ಟೂರಿಸ್ಟ್ ರಿಕ್ಶಾ ಆಯ್ಲ್ಯಾರಿ ಆಯ್ಲ್ಯೊ. ಗೊ೦ಯಾ೦ತ್ ಟೂರಿಸ್ಟ್ ಬಾಯ್ಕಾ೦ ಆಸಾತ್, ತಶೆ೦.
ಟೂರಿಸ್ಟ್ ಸಾಯ್ಕಲ್? ಮ್ಹಜೆಲಾಗಿ೦ ಆಸಾ. ತೆ೦ ಹಾ೦ವ್ ವೊಚ್ಚಿನಾ ಬಗಾರ್ ಸವ್ಕಾಸ್ ಲೊಟುನ್ ವರ್ತಾ೦ ಆನಿ ಮ್ಹಜ್ಯಾ ಸಾಯ್ಕಲ್ ಟೂರಾ೦ತ್ ದೆಕಾನಾತ್ಲ್ಲೆ೦ ದೆಕ್ತಾ೦.
ದೆಕ್ಲ್ಲೆ೦ ಲಿಕ್ತಾ೦!
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
