ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮ್ಹಾಕಾ ದಿಸ್ತಾ ಎವೆನ್ ಪಯ್ಲೆಂ ಹಾಸ್ಲೆಂ ಕೊಣ್ಣಾ, ಕಿತ್ಯಾಕ್ ಏಕ್ ಬಾಯ್ಲ್ ದಾಂತ್ ಸೊಡ್ನ್ ಹಾಸ್ತಾನಾ ಕಸಲ್ಯಾಯ್ ದಾದ್ಲ್ಯಾಚೆಂ ಕಾಳಿಜ್ ಕೊಸಾಳ್ತಾ, ತಾಂಚ್ಯಾ ಹಾಸ್ಯಾಂತ್ ಸೊಮ್ಯಾ ತುವೆಂ ಕಸಲಿ ಮಯಾ ಕೆಲ್ಯಾಯ್. ನಾಂತರ್ ಎಕ್ಲೆಂ ತರ್ನೆಂ ಸೊಭಿತ್ತ್ ಚಲಿ ಹಾಸಾತ್ ತರ್, ಹ್ಯಾ ಗಾಂವಾಂತ್, ಹ್ಯಾ ಸಂಸಾರಾಂತ್ ಕಿತ್ಲಿಂ ಆವ್ಘಡಾಂ ಘಡ್ತಾತ್ ಸೊಮ್ಯಾಂ? ಆಮ್ಚ್ಯಾ ಮಂಗ್ಳುರಾಂತ್ ಮಾರ್ಗಾರ್ ಫೊಂಡ್ ಚಡ್. ಡಾಮಾರಾಚ್ಯಾ ಮಾರ್ಗಾರ್ ದರಬಸ್ತ್ ಫೊಂಡ್. ತ್ಯಾ ಚೆಡ್ವಾಂಚ್ಯಾ ಹಾಸ್ಯಾಂಕ್ ಲಾಗೊನ್ ಕಿತ್ಲೆಶೆ ತರ್ನಾಟೆ ಹಾತ್-ಪಾಂಯ್ ಮತ್ ಚುಕೊನ್ ಆವ್ಘಡ್ ಜಾವ್ನ್ ಆಸ್ಪತ್ರೆಂತ್ ಲೊಳ್ತಾತ್. ದೆಕುನ್ ಹಾಂವ್ ಖಂಡಿತ್ ಚಿಂತಾಂ ಎವೆನ್ ಪಯ್ಲೆಂ ಹಾಸ್ಲೆಂ ಆಸ್ತೆಲೆಂ.
ಸತಾಂತ್ಲಿಂ ವಿಚಿತ್ರಾಂ - 2
ಜೆಮ್ಮಾ ಪಡೀಲ್
ದೆವಾ ತುವೆಂ ಮೊಗಾನ್ ಹೊ ಸಂಸಾರ್ ರಚುನ್ ತ್ಯಾ ಭುಂಯ್ ವೈಕುಟಾಂತ್
ಆದಾಂವಾಕ್ ರಚ್ಲೊಯ್. ತಾಕಾ ಸಾಂಗಾತ್ ದೀಂವ್ಕ್ ಎವೆಕ್ ರಚ್ಲೆಂಯ್. ಎವೆವರ್ವಿಂ ಸರ್ವ್ ಅನರ್ಥ್ ಘಡ್ಲೆಂ ಸೊಮ್ಯಾ.
ತುವೆಂ ಎವೆಕ್ ರಚ್ಲೆಂಯ್ ತೆಂ ಬರೆಂ ಆನಿ ಖರೆಂ. ಪುಣ್ ತ್ಯಾ ಎವೆನ್ ಆದಾಂವ್ಕ್ ನಾಡ್ಲೆಂ, ಪುಸ್ಲಾಯ್ಲೆಂ, ರಡ್ಲೆಂ ಜಾಂವ್ಕ್ಯ್ ಪುರೊ. ಕಿತ್ಯಾಕ್ ಸೊಮಿಯಾಂ ಬಾಯ್ಲಾಂಚಿಂ ದುಕಾಂ ಆಸಾತ್ ಪಳೆ ಗರ್ನಾಳೆಬರಿ ದಾದ್ಲ್ಯಾಂಕ್ ಪಿಗ್ಳಾಯ್ತಾ. ತಾಂಚ್ಯಾ ದುಕಾಂನಿ ಕಸಲೊ ಖಡಕ್ಕ್ ದಾದ್ಲೊ ಫಾಜೆ ಫಾತ್ರಾಕ್ ಡೈನಮೇಟ್ ಘಾಲ್ನ್ ಫುಟಯಿಲ್ಲೆಬರಿ ನಿಚೆವ್ ಫಾಸಳ್ತಾತ್. ಭಾಸ್ ವಿಸರ್ತಾತ್, ತಾಂಚ್ಯಾ ದುಕಾಂತ್ ಕಸಲೊ ಆಮಾಲ್ ತುವೆಂ ಪುಸುನ್ ದವರ್ಲಾಯ್ ತೆಂ ಕಳಿತ್ ನಾ. ನಾಂತರ್ ಹ್ಯಾ ತುಜ್ಯಾ ಸಂಸಾರಾಂತ್ ಹೆಂ ಪುರಾ ಘಡ್ತಾ?
ಮ್ಹಾಕಾ ದಿಸ್ತಾ ಎವೆನ್ ಪಯ್ಲೆಂ ಹಾಸ್ಲೆಂ ಕೊಣ್ಣಾ, ಕಿತ್ಯಾಕ್ ಏಕ್ ಬಾಯ್ಲ್ ದಾಂತ್ ಸೊಡ್ನ್ ಹಾಸ್ತಾನಾ ಕಸಲ್ಯಾಯ್ ದಾದ್ಲ್ಯಾಚೆಂ ಕಾಳಿಜ್ ಕೊಸಾಳ್ತಾ, ತಾಂಚ್ಯಾ ಹಾಸ್ಯಾಂತ್ ಸೊಮ್ಯಾ ತುವೆಂ ಕಸಲಿ ಮಯಾ ಕೆಲ್ಯಾಯ್. ನಾಂತರ್ ಎಕ್ಲೆಂ ತರ್ನೆಂ ಸೊಭಿತ್ತ್ ಚಲಿ ಹಾಸಾತ್ ತರ್, ಹ್ಯಾ ಗಾಂವಾಂತ್, ಹ್ಯಾ ಸಂಸಾರಾಂತ್ ಕಿತ್ಲಿಂ ಆವ್ಘಡಾಂ ಘಡ್ತಾತ್ ಸೊಮ್ಯಾಂ? ಆಮ್ಚ್ಯಾ ಮಂಗ್ಳುರಾಂತ್ ಮಾರ್ಗಾರ್ ಫೊಂಡ್ ಚಡ್. ಡಾಮಾರಾಚ್ಯಾ ಮಾರ್ಗಾರ್ ದರಬಸ್ತ್ ಫೊಂಡ್. ತ್ಯಾ ಚೆಡ್ವಾಂಚ್ಯಾ ಹಾಸ್ಯಾಂಕ್ ಲಾಗೊನ್ ಕಿತ್ಲೆಶೆ ತರ್ನಾಟೆ ಹಾತ್-ಪಾಂಯ್ ಮತ್ ಚುಕೊನ್ ಆವ್ಘಡ್ ಜಾವ್ನ್ ಆಸ್ಪತ್ರೆಂತ್ ಲೊಳ್ತಾತ್. ದೆಕುನ್ ಹಾಂವ್ ಖಂಡಿತ್ ಚಿಂತಾಂ ಎವೆನ್ ಪಯ್ಲೆಂ ಹಾಸ್ಲೆಂ ಆಸ್ತೆಲೆಂ. ಹಾಸೊನ್ ಆದಾಂವ್ಕ್ ಪುಸ್ಲಾಂವ್ಕ್ ಸಲೀಸ್ ಜಾಲೆಂ ಆಸ್ತೆಲೆಂ. ಆದಾಂವ್ ಕಾಂಯ್ ಖಡ್ಪಿ ಕಾಸ್ತಾಚೊ ಮನಿಸ್ ತರ್ ಹಾಸೊನ್ ಉಪ್ಕಾರಾಕ್ ಪಡಾನಾತ್ಲ್ಲ್ಯಾ ವಗ್ತಾ ಖಂಡಿತ್ ಜಾವ್ನ್
ರಡ್ಲಾಂ ಆಸ್ತೆಲೆಂ. ಹೆಂ ತುಂ ಸರ್ವ್ ಜಾಣಾಂಯ್. ಹಾವೆಂ ತುಕಾ ಸವಾಲಾಂ ಘಾಲ್ಚಿಂ ಮಾತ್ರ್. ಕಿತ್ಯಾಕ್ ಮ್ಹಳ್ಯಾರ್ ಆಮ್ಚೆ ಮಣಿಯಾರಿ ಎಕೆಕಾ ವೆಳಾ ಎಕೆಕ್ ಉಲಯ್ತಾತ್. ಪಯ್ಲೆಂ ಮ್ಹಣ್ತಾಲೆ ದೆವಾನ್ ಮಾತ್ಯೆಕ್ ಉಸ್ವಾಸ್ ದೀವ್ನ್ ಜೀವ್ ಜಾಲೊ ಮ್ಹಣ್. ಮಾಗಿರ್ ಭುಂಯ್ ವೈಕುಟಾಂತ್ ಆದಾಂವ್ಕ್ ಎವೆಚ್ಯಾ ಪುಸ್ಲಾವ್ಣೆಕ್ ಲಾಗೊನ್ ಎಪ್ಪಲ್ ಖೆಲೆಂ ಮ್ಹಣೊನ್. ಎಪ್ಪಲ್ ಖೆಲ್ಯಾರ್ ಜಿವಾಕ್ ಭಾರಿ ಬರೆಂ, ರಗಾತ್ ಭರ್ತಾ ಮ್ಹಣ್ತಾತ್ ತರ್, ದೆವಾ ತುವೆಂ ರಚ್ಲೆಲ್ಯಾ ಭುಂಯ್ ವೈಕುಟಾಂತ್ ತೆಂ ಕಸಲೆಂ ಎಪ್ಪಲ್ ಸೊಮಿಯಾಂ? ತುಕಾ ಬರೆಂ ಲಾಗಾನಾತ್ಲ್ಲೆಂ?
ತುಂ ಇತ್ಲೊ ಬರೊ, ಎಪ್ಪಲ್ ಖೆಲ್ಲ್ಯಾಖಾತಿರ್ ಅಶೆಂ ಕರ್ಶಿಗಿ?
ಹೆಂ ಸವಾಲ್ ಆನಿ ಆಮ್ಚ್ಯಾ ಆತಾಂಚ್ಯಾ ಪಿಳ್ಗೆಚ್ಯಾ ಮತ್ ವಿಕಾಸಾನ್ ಜಾವ್ಯೆತ್ ಮಣಿಯಾರ್ಯಾಂನಿ ತಾಂಚ್ಯಾ ಉತ್ರಾಂಚಿ ಧಾರ್ ಬದಲ್ಲ್ಯಾ. ಮನಿಸ್ ಮಾಂಕ್ಡಾ ಥಾವ್ನ್ ಆಯ್ಲಾ ಜಾವ್ಯೆತ್, ಚಾರ್ಲ್ಸ್ ಡಾರ್ವಿನ್ ವಿಗ್ಯಾನಿ ಚಿಂತಾಪ್ ಸಾರ್ಕೆಂ ತರೀ, ತ್ಯಾ ಪಯ್ಲ್ಯಾ ಆದಾಂವ್ಚೊ ಆತ್ಮೊ ದೆವಾಥಾವ್ನ್ ಆಯಿಲ್ಲೊ ಮ್ಹಳ್ಳೆಂ ಖರೆಂ ಸತ್ ಮ್ಹಣ್ತಾತ್. ಹೆಂ ಸತ್ ಮ್ಹಳ್ಳೆಂ ಮ್ಹಾಕಾಯ್ ಭೊಗ್ತಾ. ಹೆಂ ಆತಾಂಚೆಂ ಚಿಂತಾಪ್ ಸತ್ ತರ್, ಲಾಗ್ಗಿಂ ಲಾಗ್ಗಿಂ
2000 ವರ್ಸಾಂ ಥಾವ್ನ್ ದೆಂವೊನ್ ಆಯಿಲ್ಲಿ ರೀತ್, ಪಾಳ್ಲ್ಲಿ ರೀತ್, ಸಾಂಗ್ಲ್ಲಿ ರೀತ್, ಸಕ್ಕಡ್ ಚೂಕ್ ಜಾಲೆಂ ನ್ಹಯ್ಗೀ?
ಹಾವೆಂ ಭುಂಯ್ ವೈಕುಂಟಾಚೆಂ ಎಪ್ಪಲಾ ವಿಶ್ಯಾಂತ್ ಬರಂವ್ಚೆಂ ಜಾಲ್ಯಾರ್ ಆದಾಂವ್ ಎವೆನ್ ಕಿತೆಂಗೀ ಖೆಲ್ಲೆಂ ತೆಂ ತುವೆಂ ಸಂಸಾರಾಕ್ ಮಾತ್ರ್ ಕಳವ್ಯೆತ್. ಪುಣ್! ಹೆಂ ಚಿಂತಾಪ್ ಶಿಕೊನ್, ಅರ್ಥ್ ಕರುನ್ ಮೊರೊನ್ ಗೆಲ್ಲ್ಯಾ ಹ್ಯಾ ಮನ್ಶಾಕುಳಾನ್ ಪುನರ್ ಜಿವಂತ್ ಜಾತಾನಾ, ಸಂಸಾರಾಚ್ಯಾ ಆಖೇರಿಕ್ ತಾಂಚಿಂ ’ಆಧ್ಲಿ ಮತ್’ ಕಶಿ ನವ್ಯಾ ’ಸೂತ್ರಾಂ’ ಥಂಯ್ ಘುಂವ್ಡಾಂವ್ಚಿ ಸೊಮಿಯಾಂ.
ಹ್ಯಾ ವೆಳಾರ್ ಕಿತ್ಯಾಕ್ಗೀ ಮ್ಹಾಕಾ ಪಾಪ್ ಗೆಲೆಲಿಯಾಚೊ ಉಡಾಸ್ ಯೆತಾ. ಸಂಸಾರ್ ಸುರ್ಯಾಭಂವ್ತಿಂ ಘುಂವ್ತಾ ಮ್ಹಳ್ಳ್ಯಾ ತಾಚ್ಯಾ ಶಿಕವ್ಣೆಕ್ ತಾಚೆಂ ಜೀವನ್ ಸರ್ವ್ ನಿಸ್ಸಂತಾನ್ ಜಾಲೆಂ. ತಾಕಾ ಜೈಲಾಂತ್ ಘಾಲೊ, ಆತಾಂ ತಾಚಿ ಶಿಕವ್ಣ್ ಸಾರ್ಕಿ ಮ್ಹಣ್ ಸಾಂಗ್ತಾತ್. ಹ್ಯಾ ಥರಾನ್ ಚಿಂತುನ್ ಗೆಲ್ಯಾರ್ ಸಂಸಾರಾಚಿ ಗಜಾಲ್ ಕಿತೆಂ ಜಾಯ್ತ್? ಹಾವೆಂ ಏಕ್ ಪಿಂತುರ್ ಪಳೆಯಿಲ್ಲೆಂ ಆಯ್ಲೆವಾರ್, ಏಕ್ ನೀಜ್ ಘಡಿತ್. ಎಕಾ ನಿರಾಪ್ರಾಧಿ ಮನ್ಶಾಕ್ ಅಪ್ರಾಧಿ ಕರ್ನ್ ಜೈಲಾಂತ್ ಘಾಲೊ. ಥಂಯ್ಚ್ ತೊ ಮೆಲೊ. ತೊ ಮೊರೊನ್ ವರ್ಸಾಂ ಉಪ್ರಾಂತ್ ತಾಕಾ ನಿರಪ್ರಾಧಿ ಮ್ಹಳ್ಳೆಂ ಫಯ್ಸಲ್ ದಿಲೆಂ. ತಾಕಾ ಹೆಂ ಸಾಂಗ್ಚೆಂ ಕೊಣೆಂ ಸೊಮ್ಯಾಂ?
ಹೊ ಸಂಸಾರ್ ಕಿತ್ಲೊ ಕಠೀಣ್ ನ್ಹಯ್ಗೀ? ಆಮಿ ನಿರಾಪ್ರಾಧಿಂಕ್ ಅಪ್ರಾಧಿ ಕರ್ತಾಂವ್, ಚುಕಿ ಕಳಿತ್ ಜಾಲ್ಲ್ಯಾ ಉಪ್ರಾಂತ್
’ಚೂಕ್ ಜಾಲಿ ಭೊಗ್ಶಿ’ ಮ್ಹಣ್ತಾಂವ್. ಸೊಮ್ಯಾ ತುವೆಂ ಹ್ಯಾ ಥರಾಚ್ಯಾ ಚುಕಿಕ್, ಕಾಳಿಜ್, ಕುಡ್, ರಗಾತ್ ಆನಿ ಆಂಗಾಂತ್ ಉದಾಕ್ ಆಸ್ಲೆಲ್ಯಾ ಮನ್ಶಾಕ್ ’ಸೊರ್ರಿ.. ಚುಕ್ ಜಾಲಿ’ ಮ್ಹಳ್ಳ್ಯಾ ಉತ್ರಾಂನಿ ಪಾಡ್ ಕೆಲ್ಲೆಂ ಸಮಾ ಜಾತಾಗಿ ಸೊಮ್ಯಾ? ಮ್ಹಜಾ ತಕ್ಲೆಂತ್ ಕಿತೆಂಚ್ ವಚಾನಾ ದೆಕುನ್ ಹಾವೆಂ ತುಜ್ಯಾಲಾಗಿಂ ವಿಚಾರ್ಚೆಂ, ನಾಂತರ್.. ತುವೆಂ ತುಜ್ಯಾ ಲೊಕಾಕ್ "ಸೊರ್ರಿ.. ಚೂಕ್ ಜಾಲಿ, ಭೊಗ್ಶಿ" ಮ್ಹಳ್ಳಿಂ ಉತ್ರಾಂ ಆರಂಬ್ ಕರ್ಚ್ಯಾ ಪಯ್ಲೆಂ ತಾಕಾ ಫಾವೊತಿ
’ಚಿಕಿತ್ಸಾ’ ಯಾ antidote ತುವೆಂ ದಿಲ್ಲೆಂಯ್ ತರ್, ಹ್ಯಾ ಕುದಿ ಮನ್ಶ್ಯಾಂಚ್ಯಾ ಕಾಳ್ಜಾಂನಿ ಕೊಡ್ಸಾಣ್ ಆಸ್ತಿನಾ. ದುಕಾಚೆ ಮುರ್ಮುರೆ, ರಾಗಾಚೊ ಉಜೊ, ಫಾರಿಕ್ಪಣಾಚಿ ತಾನ್ ಆಸ್ತಿನಾ. ತುವೆಂ ಹೆಂ
antidote ದೀಂವ್ಕ್ ನಾತ್ಲ್ಲ್ಯಾ ಕಾರಾಣಾಂನಿ ರಗ್ತಾಕ್ ರಗಾತ್, ಮಾರಾಕ್ ಮಾರ್, ಲಡಾಯೆಕ್ ಲಡಾಯ್, ಝುಜಾಕ್ ಝುಜ್ ಸರ್ವ್ ಜಾವ್ನ್ ಆಸಾ.
ತುವೆಂ ರಚ್ಲ್ಲೊ ಮನಿಸ್ ವಿಚಿತ್ರ್, ಆಜ್ ಉಲಯಿಲ್ಲೆಂ ಥೊಡ್ಯಾಂಕ್ ಫಾಲ್ಯಾಂ ಉಗ್ಡಾಸ್ ನಾ. ಕಿತ್ಯಾಕ್ ತಸಲ್ಯಾಂಕ್ ರಾಟಾವಳಿ ಚಡ್ ಜಾಲ್ಯಾತ್. ತುವೆಂ ಹ್ಯಾ ಲೊಕಾಕ್ ರಾಟಾವಳಿಂನಿ ಕಿತ್ಯಾಕ್ ಗುಟ್ಲಾಯ್ಲಾಂಯ್ ಸೊಮಿಯಾಂ? ತಾಂಕಾಂ ಪಳೆತಾನಾ ತೆ ಕೆದಾಳಾ ನಿದ್ತಾತ್ ಕೆದಾಳಾ ಉಟ್ತಾತ್ ತೆಂ ಕಳಾನಾ. ಏಕ್ಧಮ್ ಬಿಜಿ,
ತಾಂಚಾ ಜಿಣ್ಯೆಂತ್ ಮುಖಾರ್ ತಾಣಿಂ ಸವ್ಕಾಸಾಯ್ ಘೆಂವ್ಚಿ ಕೆದಾಳಾ?
ತುವೆಂ ಆಮ್ಚೊ ಮೋಗ್ ಕೆಲಾಯ್, ಕರೀತ್ ಆಸಾಯ್, ತುವೆಂ ಹರ್ಯೆಕ್ಲ್ಯಾಕ್ ಎಕೆಕಾ ಥರಾಚ್ಯಾ ವ್ಹಡ್ಪಾಣಾನ್ ತಾಲೆಂತಾನ್ ಪಿಕಯ್ಲಾಂಯ್. ದೆಕುನ್ ಜಾವ್ಯೆತ್ ಘೊವ್ ಜ್ಯೋರ್ ಆಸ್ಲ್ಯಾರ್ ಬಾಯ್ಲ್ ಗೊರುಂ. ಎಕ್ಲ್ಯಾಕ್ ಉಗ್ಡಾಸ್ ಗುಡ್ಯಾಕ್ ಗೆಲ್ಯಾರ್ ಅನ್ಯೇಕ್ಲ್ಯಾಕ್ ಉಗ್ಡಾಸ್ ಫಾತ್ರಾಂತ್ ಖಾಂತಯಿಲ್ಲೆಬರಿ. ಎಕ್ಲ್ಯಾಕ್ ಫಾರಿಕ್ಪಣಾಚಿ ತಾನ್ ತರ್ ಅನ್ಯೆಕ್ಲ್ಯಾಕ್ ಮೊಗಾಚೊ ಅಂಗಲಾಪ್. ತುವೆಂ ಸರ್ವ್ ಚಿಂತುನ್ ಕೆಲಾಂಯ್ ತುವೆಂ ಏಕ್ ಮದರ್ ತೆರೆಜಾಕ್ ದೀವ್ನ್ ಕಿತೆಂ ಸರ್ವ್ ಕರುಂಕ್ ನಾಂಯ್?
ಮೊಗಾಳ್ ವಾಚ್ಪ್ಯಾ ತುಕಾ ಸಮ್ಜಾಲೆಂ? ಹೊ ಚಿಂತ್ಪಿ ಜೆಮ್ಮಾ ತುಕಾ ಖಂಯ್ ವೊರಾತ್ ತರ್ ಏಕ್ ಮಾತ್ರ್ ಖರೆಂ ಸತ್, ದೇವ್ ಆಸಾ; ತಾಕಾ ಸರ್ವ್ ಕಳಿತ್ ಆಸಾ, ಹಾವೆಂ ಆನಿ ತುವೆಂ ತಾಚ್ಯೆ ವಿಶ್ಯಾಂತ್ ಚಿಂತ್ಲ್ಯಾರ್ ತಾಕಾ ಹರ್ಸಿಲ್ಯಾರ್ ಪುರೊ! ತಿತ್ಲೆಂಚ್
ದೇವ್ ಬರೆಂ ಕರುಂ.
ಆಧ್ಲೆ ಆಂಕ್ಡೆ: ಸಂವಾದ್, ಆಂಕ್ಡೊ 1,
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
