ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 22. ಕರಿಯಮಣಿ
ಜೋನಿ ಸುರತ್ಕಲ್: ಕೊಂಕ್ಣಿ ರಂಗ್ಮಂಚಾರ್ ಅಪ್ಲ್ಯಾಏಕ್ ವಾವ್ರಾಡಿ, ಪದಾಂ ಘಡ್ಪಿ ತರ್ ಸಾಹಿತ್ಯಾಂತ್ ’ಬೇಬಿಪ್ರಿಯಾ’ ಏಕ್ ಕಾಣ್ಯೆಗಾರ್ ಸಯ್ತ್. ಹಾಚ್ಯಾ ಮಟ್ವ್ಯಾ ಕಾಣ್ಯಾಂಚೆ ದೋನ್ ಬೂಕ್; ರಗ್ತಾಚಿ ಕುಳಿ (1993), ತಶೆಂಚ್ ಫಾಂತ್ಯಾಚೆಂ ಸ್ವಪಾಣ್ (1998), ಹಾಣೆಂಚ್ ಆಪ್ಲ್ಯಾ ’ಉಜ್ವಾಡ್ ಪ್ರಕಾಶನ್’ ತರ್ಫೆನ್ ಎದೊಳ್ಚ್ಚ್ ಪರ್ಗಟ್ಲ್ಯಾತ್. ಕಾಣ್ಯಾಂ ಶಿವಾಯ್ ಹೆರ್ ಸಭಾರ್ ಲೇಖನಾಂ ಹಾಣೆಂ ಬರಯ್ಲ್ಯಾಂತ್. ಪುಣ್ ಕೊಂಕ್ಣಿ ಪತ್ರಾಂಕ್ ಪರ್ದ್ಯಾ ಪಾಟ್ಲ್ಯಾನ್ ರಾವೊನ್ ಪಾಟಿಂಬೊ ದಿಲ್ಲೊ ಹೊ ಸದಾಂಚ್ ಪರ್ದ್ಯಾ ಪಾಟಿಂಚ್ ಉರ್ಲೊ. ಹಿ ಕಾಣಿ ಹಾವೆಂ ಸಂಪಾದನ್ ಕೆಲ್ಲ್ಯಾ ’ಕುಳ್ವಾರ್ಚೆಂ ದಾಯ್ಜ್’ ಬುಕಾಂತ್ ಪರ್ಗಟ್ಲ್ಯಾ.
2006 ಇಸ್ವೆಚಾ ಅಗೋಸ್ತ್ 16 ತಾರಿಕೆರ್ ಹೊ ಕೊಂಕ್ಣೆಕ್ ಸಾಸ್ಣಾಚೊ ಅದೇವ್ಸ್ ಮಾಗೊನ್ ಗೆಲೊ.
ಜೊನಿ ಸುರತ್ಕಲ್
ವೊರಾಂ ಸಾಂಜೆಚಿಂ ಸಾತ್ ಉತ್ರಾಲ್ಲಿಂ. ಕುಜ್ನಾಂತ್ ಸಾಂಜೆಚ್ಯಾ ರಾಂದ್ಪಾಚ್ಯಾ ಕಾಮಾರ್ ಆಸ್ಲ್ಲೆ ಲಕ್ಶ್ಮಿಕ್ ವೇಳ್ ಕಿತ್ಲೊ ಜಾಲ್ಲೊ ತೆಂ ಕಳಿತ್ ಜಾಂವ್ಕ್ ನಾ. ಭಾಯ್ರ್ ಯೆತಾನಾ ಸಾಲಾಂತ್ ಕಾಳೊಕ್ ಭರ್ಲ್ಲೊ ಪಳೆವ್ನ್ ಆಪ್ಲೆ ಚತ್ರಾಯೆಕ್ ಗುಣ್ಗುಣೊನ್ ದಿವ್ಯಾಚಿ ಫಿರ್ಕಿ ತಾಣೆ ದಾಂಬ್ಲಿ. ಕುಡಾಂತ್ಲ್ಯಾ ಉಜ್ವಾಡಾಕ್ ಘುಂವ್ತಾನಾ ಏಕ್ ಪಾವ್ಟಿಂ ಉಡೊನ್ ಪಡ್ಲೆಂ ತೆಂ. ಬೋಬ್ ಮಾರುಂಕ್ ಉಗ್ತೆಂ ಕೆಲ್ಲೆಂ ತೋಂಡ್ ಮುಕ್ಲೆ ವೆಕ್ತಿಕ್ ಪಳೆವ್ನ್ ಉಗ್ತೆಂಚ್ ಉರ್ಲೆಂ.
ತಾಚೊ ಘೊವ್ ಸುರೇಶ್ ಧಾಕ್ಟ್ಯಾ ಮೊಡ್ಕೊರ್ ಕದೆಲಾರ್, ತಕ್ಲೆಕ್ ಹಾತ್ ದೀವ್ನ್, ನಿರ್ಲಿಪ್ತ್ ಮನಾನ್ ಚಿಂತೇಸ್ತ್ ಜಾವ್ನ್ ಬಸ್ಲ್ಲೊ. ತಾಚೊ ಹೊ ಜಿನೊಸ್ ಪಳೆವ್ನ್ ಲಕ್ಶ್ಮಿ ಘಾಬರ್ಲೆಂ. ಭಾಯ್ರ್ ಖೆಳೊಂಕ್ ಗೆಲ್ಲಿಂ ಭುರ್ಗಿಂ ಎದೊಳ್ಯಿ ಯೇಂವ್ಕ್ ನಾತ್ಲ್ಲಿಂ. ಸವ್ಕಾಸ್ ಘೊವಾಲಾಗಿಂ ಆಯ್ಲೆಂ ತೆಂ. ತಾಚ್ಯಾ ಖಾಂದಾರ್ ಹಾತ್ ದವರ್ನ್ ತಾಣೆ ಸುರೆಶಾಕ್ ಧೊಂಕುಳ್ಳೆಂ.
"ಸುರೇಶ್"
"ಹಾಂವ್" ಸಪ್ಣಾಂತ್ಲೊ ಜಾಗೊ ಜಾಲ್ಲೆಬರಿ ಏಕ್ ಪಾವ್ಟಿಂ ಉಡೊನ್ ಪಡ್ಲೊ ಸುರೇಶ್. ಕಿತ್ಲೊ ವೇಳ್ ತೊ ತಸೊ ಬಸೊನ್ ಆಸ್ಲ್ಲೊ ತೊಚ್ ನೆಣಾ.
ಪರತ್ ’ಸುರೇಶ್’ ಮ್ಹಣಾತ್ ಲಕ್ಶ್ಮಿ ತಾಚೆಲಾಗಿಂ ಬಸ್ಲೆಂ ಆನಿ ಕಪಲಾರ್ ಹಾತ್ ದವರ್ಲೊ.
"ಕಿತೆಂ ಭಲಾಯ್ಕಿ ಬರಿ ನಾಂವೇ ಸುರೇಶ್?" ಆಕಾಂತಾನ್ ವಿಚಾರ್ಲೆಂ ಲಕ್ಶ್ಮಿನ್.
"ಹಾಂವ್ ಬರೊಂ ಆಸಾಂ ಲಕ್ಶ್ಮಿ" ನೀರಸ್ ಜಾಪ್ ದಿಲಿ ಸುರೇಶಾನ್. ಆತಾಂ ಲಕ್ಶ್ಮಿಕ್ ಇಲ್ಲೆಂ ಸಮಧಾನ್ ಜಾಲೆ. ಲಕ್ಶ್ಮಿ ತಸೆಂ ಭಿಯೆಂವ್ಕ್ಯೀ ಕಾರಣ್ ಆಸಾ. ಹರ್ಶೆಂ ಕಾಮ್ ಜಾಲ್ಲೆಂಚ್ ವೆಗಿಂ ಘರಾ ಯೇವ್ನ್ ಭುರ್ಗ್ಯಾಂಸವೆಂ ಹಾಸೊನ್-ಖೆಳೊನ್, ಕುಜ್ನಾಂತ್ ಲಕ್ಶ್ಮಿಕ್ ಇಲ್ಲಿ ಕುಮೊಕ್ ಕರ್ನ್ ಸಾಂಗಾತಾ ತಾಕಾ ಕಿತೆಂ ತರ್ಯಿ ತುಕ್ಲಾವ್ನ್ ಆಸ್ಚೊ ಸುರೇಶ್ ಆಜ್ ಖಂತಿಶ್ಟ್ ಜಾವ್ನ್ ಕಾಳೊಕಾಂತ್ ಬಸ್ಲಾ. ಆಪ್ಲೊ ಭರ್ತಾರ್, ತಶೆಂ ಘರ್ಚೊ ಆದಾರ್ ಖಾಂಬೊ ತಶೆಂ ಬಸ್ತಾನಾ ಖಂಚ್ಚಿಯ್ ಬಾಯ್ಲ್ ಜಾಲ್ಯಾರ್ಯಿ ಭಿಯೆಂವ್ಚೆಂ ಸಹಜ್.
ಮುಂಬಯ್ ಉಪನಗರಾಂತ್ಲೆ ಎಕೆ ಚಾಲಿಂತ್ ಏಕ್ ಕೂಡ್ ಆನಿ ಏಕ್ ಕೂಜ್ನ್ ಆಸ್ಚ್ಯಾ ತ್ಯಾ ಘರಾಂತ್ ದುಬ್ಳಿಕಾಯ್ ಏಕ್ ಸೊಡ್ಲ್ಯಾರ್ ಎಕಾ ಕುಟ್ಮಾಕ್ ಗರ್ಜ್ ಆಸ್ಚೊ ಮೋಗ್-ಮಯ್ಪಾಸ್, ರಾಗ್, ಸೊಡ್ದೊಡ್, ಸಂತೊಸ್, ತೃಪ್ತಿ ಹೆಂ ಸರ್ವ್ ತ್ಯಾ ಕುಟ್ಮಾಂತ್ ಆಸ್ಲ್ಲೆಂ. ಪುಣ್ ದುಬ್ಳಿಕಾಯೆನ್ ಮಾತ್ ಆಪ್ಲ್ಯಾ ಭಿರಾಂಕುಳ್ ದಾವ್ಲೆಂನಿ ತ್ಯಾ ಕುಟ್ಮಾಕ್ ಚಿರ್ಡುನ್ ಧರ್ಲ್ಲೆಂ.
ಸುರೇ ಆನಿಕ್ಯಿ ಮೊನೊ ಆಸ್ಲ್ಲೊ ಪಳೆವ್ನ್ ಲಕ್ಶ್ಮಿನ್ಚ್ ಮಾವ್ನ್ ಮೊಡ್ಲೆಂ.
"ಆಜ್ ತುಕಾ ಕಿತೆಂ ಜಾಲಾಂ ಸುರೇಶ್? ತುಂ ಕಿತ್ಯಾಕ್ ಉಲಯ್ನಾಂವ್? ಕಾಮಾಕಡೆ ಕಾಂಯ್ ಲಫ್ಡೆ ಜಾಲೆಗಿ?" ಲಕ್ಶ್ಮಿಚಿಂ ಸವಲಾಂ ಆಯ್ಕೊನ್ ಸುರೆಶಾಚಿ ತಕ್ಲಿ ತಾಪ್ಲಿ.
"ಕಾಂಯ್ ಜಾಂವ್ಕ್ ನಾ ಮ್ಹಳೆಂನೆ. ಮ್ಹಾಕಾ ಮ್ಹಜೆ ಇತ್ಲ್ಯಾಕ್ ಸೊಡ್ನ್ ತುಜೆಂ ಕಾಮ್ ಕರ್ ತುಂ" ಖುಬಾಳೊನ್ ಉಲಯ್ಲೊ ಸುರೇಶ್.
ಘೊವಾಚ್ಯಾ ಹ್ಯಾ ವರ್ತನಾನ್ ಲಕ್ಶ್ಮಿ ದುಕ್ಲೆಂ ತರ್ಯಿ ಸುರೇಶ್ ಕಸಲ್ಯಾಗಿ ಸಮಸ್ಯಾಂನಿ ರಾಂವ್ಚೆಂ ಬರೆಂ ಮ್ಹಣ್ ಚಿಂತುನ್ ತೆಂ ಉಟೊಂಕ್ ತಯಾರ್ ಜಾತಾನಾ ಸುರೆಶಾನ್ ತಾಕಾ ವೋಡ್ನ್ ಲಾಗಿಂ ಬಸಯ್ಲೆಂ.
ಘಡ್ಲ್ಲಿ ಗಜಾಲ್ ಸವ್ಕಾಸಾಯೆನ್ ವಿವರುಂಕ್ ಲಾಗ್ಲೊ..
"ಲಕ್ಶ್ಮಿ ಆಜ್ ಪೆಪರಾರ್ ಪರ್ದೆಶಾಂತ್ ಕಾರ್ಪೆಂಟರಾಂಚಿ ಗರ್ಜ್ ಆಸಾ ಮ್ಹಣ್ ಇಸ್ತಿಹಾರ್ ಆಯಿಲ್ಲೆಂ ವರ್ಕ್ಶೊಪಾಂತ್ ಕಾಮೆಲ್ಯಾಂನಿ ಉಲಯ್ತಾನಾ ಹಾಂವೆಂ ಆಯ್ಕಾಲೆಂ. ದೆಕುನ್ ಕಾಮ್ ಜಾಲ್ಲೆಂಚ್ ಆತುರಾಯೆನ್ ಹಾಂವ್ಯಿ ಥಂಯ್ಚರ್ ಗೆಲೊಂ. ಹಾಂವ್ ವೆತಾನಾ ಇಂಟರ್ವೀವ್ ಚಾಲು ಆಸ್ಲ್ಲಿ. ತಾಣಿಂ ಮ್ಹಜಿಯಿ ಇಂಟರ್ವೀವ್ ಘೆತ್ಲಿ. ಮ್ಹಜೆಂ ಆತಾಂಚೆಂ ಕಾಮ್, ಅನ್ಭೋಗ್ ತಾಂಕಾಂ ಖುಶಿ ಜಾಲಿ. ತಶೆಂ ತಾಣಿಂ ಪಾಸ್ಪೋರ್ಟ್ ಪಾಂಚ್ ತಸ್ವೀರ್ಯೊ ಸಾಂಗಾತಾ ಚಾಳಿಸ್ ಹಜಾರ್ ರುಪಯ್ ಹಾಡ್ನ್ ಯೇಂವ್ಕ್ ಸಾಂಗ್ಲಾಂ. ತೀನ್ ದಿಸಾಂ ಭಿತರ್ ಹೆಂ ಸರ್ವ್ ಜಾಯ್ಜೆ. ಹಫ್ತ್ಯಾನ್ ಸಾವ್ದಿ ವಚೊಂಕ್ ಆಸ್ತೆಲೆಂ."
ಆಯ್ಕಲ್ಲ್ಯಾ ಲಕ್ಶ್ಮಿಚೆಂಯಿ ತೋಂಡ್ ಬಾವ್ಲೆಂ. ತರ್ಯಿ ಘೊವಾಕ್ ಸಮಧಾನ್ ಕರ್ಚ್ಯಾ ಇರಾದ್ಯಾನ್ ತಿ ಮ್ಹಣಾಲಿ, "ಸುರೇಶ್ ಸೊಡ್ನ್ ಸೊಡ್ ತಿ ಗಜಾಲ್. ಆತಾಂ ಆಮಿ ಕಾಂಯ್ ಉಪಾಶಿಂ ಪಡೊಂಕ್ ನಾಂವ್ನೆ. ಕಶ್ಟಾಂನಿ ತರ್ಯಿ ಆಮ್ಚೆ ದೀಸ್ ವೆತಾತ್. ತಿತ್ಲೊ ದುಡು ಖಂಚೊ ಹಾಡ್ಚೊ? ತೆಂ ಪುರಾ ಜಾಂವ್ಚೆಂ ಕಾಮ್ ನ್ಹಂಯ್. ಫಾತೊರ್ ಪಡೊಂ ತಾಕಾ. ತುಂ ಉಟೊನ್ ಚ್ಹಾ ಪಿಯೆ."
"ತಶೆಂ ನ್ಹಂಯ್ ಲಕ್ಶ್ಮಿ. ಆಮ್ಕಾಂ ಸೊಲ್ನ್ ಖಾಂವ್ಚಾ ಹೆ ದುಬ್ಳೆಕಾಯೆಂತ್ ಕೆದೊಳ್ ಪರ್ಯಾಂತ್ ಆಮಿ ಜಿಯೆಂವ್ಚೆಂ? ಆತಾಂಚ್ ಮಯ್ನ್ಯಾಚೆ ಅಖೆರಿಕ್ ಹಾಂವೆಂ ಹೆರಾಂಲಾಗಿಂ ಹಾತ್ ಉದಾರೆ ಕರ್ಚೆ ಪಡ್ತಾತ್. ಮುಕಾರ್ ಮೋತಿ ಆನಿ ಸುಶೀಲಾ ವ್ಹಡ್ ಜಾತಾನಾ ಪರಿಗತ್ ಕಶಿ
ರಾವತ್? ದೆಕುನ್ ಥೊಡಿಂ ವರ್ಸಾಂ ಪರ್ದೆಶಾಂತ್ ಘೊಳ್ಳ್ಯಾರ್
ಆಮ್ಚೆಸಂಗಿಂ ಆಮ್ಚಿಂ ಭುರ್ಗಿಂಯಿ ಸುಖಾನ್ ವಾಡ್ತಿತ್ ನ್ಹಂಯ್ಗಿ?"
"ತೆಂ ಸಮಾ ಸುರೇಶ್. ಪುಣ್ ಇತ್ಲೊ ದುಡು ಖಂಯ್ ಥಾವ್ನ್ ಹಾಡ್ಚೊ? ಆಮ್ಚಿ ಪರಿಗತ್ ಜಾಣಾಸ್ಲ್ಲೊ ಕೊಣ್ಯಿ ಆಮ್ಕಾಂ ರೀಣ್ ದಿಂವ್ಚೆನಾಂತ್. ದುಸ್ರಿ ವಾಟ್ ಕಿತೆಂ ಆಸಾ?" ಆಪ್ಲ್ಯಾ ಘೊವಾಚಿ ಸ್ಥಿತಿ ಜಾಣಾಸ್ಲ್ಲೆ ಲಕ್ಶ್ಮಿನ್ ಆಪ್ಲಿ ಅಸಾಹಯಕತಾ ಉಚಾರ್ಲಿ.
"ಪುಣ್ ತುವೆಂ ಮನ್ ಕೆಲ್ಯಾರ್ ಏಕ್ ವಾಟ್ ಆಸಾ ಲಕ್ಶ್ಮಿ."
"ಹಾಂವ್" ಹಾಂಕ್ರೆಲೆಂ ಲಕ್ಶ್ಮಿ.
"ಹಾಂವೆಂ ಮನ್ ಕೆಲ್ಯಾರ್? ಸಾಂಗ್ ಸುರೇಶ್ ಮ್ಹಜ್ಯಾನ್ ಕಿತೆಂ ಕರುಂಕ್ ಜಾತಾ ತೆಂ ಹಾಂವ್ ಕರ್ತಾಂ. ತುಜ್ಯಾ ಕಶ್ಟಾ-ಸುಖಾಂತ್ ಹಾತಾಕ್ ಹಾತ್ ದೀವ್ನ್ ಸಹಭಾಗಿ ಜಾಂವ್ಚ್ಯಾ ಖಾತಿರ್ಚ್ ನ್ಹಂಯ್ಗಿ ಹಾಂವ್ ತುಜ್ಯಾ ಘರ್ಚೆಂ ಹುಂಬರ್ ಉತರ್ಲ್ಯಾಂ."
ಲಕ್ಶ್ಮಿನ್ ಉತರ್ ದೀವ್ನ್ ಜಾಲ್ಲೆಂ.
ಪುಣ್ ಸುರೇಶ್ ಸಾಂಗೊಂಕ್ ಪಾದ್ದೆತಾಲೊ. ತಾಚ್ಯಾ ತೊಂಡಾಂತ್ಲಿಂ ಉತ್ರಾಂ ಭಾಯ್ರ್ ಪಡ್ಲಿಂನಾಂತ್. ತಶೆಂ ವಿಚಾರುಂಕ್ ತಾಚೊ ಸ್ವಾಭಿಮಾನ್ ತಾಕಾ ಆಡ್ ಯೆತಾಲೊ ತರ್ಯಿ ವಿಚಾರಿನಾಸ್ತಾಂ ನಿರ್ವೋಗ್ ನಾತ್ಲ್ಲೊ. ಆಪ್ಲೆಂ ಸರ್ವ್ ಧಯ್ರ್ ಆರಾವ್ನ್ ತಾಣೆ ಉತ್ರಾಂ ವಿಂಚ್ಲಿಂ.
"ಲಕ್ಶ್ಮಿ ತುಜೆಂ ಭಾಂಗಾರ್ ವಿಕ್ಲ್ಯಾರ್ ಕಾಂಯ್ ಪಯ್ಶೆ ಮೆಳ್ತಿತ್ ತರ್.. ತುಂ ಭಿಯೆನಾಕಾ ಲಕ್ಶ್ಮಿ. ತುಕಾ ದೋನ್ ವರ್ಸಾಂ ಭಿತರ್ ವಿಕ್ಲ್ಲೆಂ ಭಾಂಗಾರ್ ಪುರಾ ಕರವ್ನ್ ಘಾಲ್ತಾಂ" ಇತ್ಲೆಂ ಸಾಂಗ್ತಾನಾ ಸುರೆಶಾಚೆಂ ತೋಂಡ್ ಸಗ್ಳೆಂ ಲಜೆಲ್ಲೆಂ.
"ತುಜೆ ಬಾಲೆಲಾಗಿಂ ಇತ್ಲೆಂ ಸಾಂಗೊಂಕ್ ತುಂ ನರ್ಗತಾಯ್ಗಿ ಸುರೇಶ್? ಹೆಂ ಭಾಂಗಾರ್ ಮ್ಹಾಕಾ ಕಿತ್ಯಾಕ್? ತುವೆಂ ಕರವ್ನ್ ಘಾಲಿನಾತ್ಲ್ಯಾರ್ಯಿ ಪರ್ವಾನಾ. ಧರ್ ಆತಾಂಚ್ ಘೆ. ಪುಣ್ ಭಾಂಗಾರಾಕ್ ಚಾಳಿಸ್ ಹಜಾರ್ ರುಪಯ್ ಖಂಡಿತ್ ಮೆಳ್ಚೆನಾಂತ್" ದುಬಾವ್ಲೆಂ ಲಕ್ಶ್ಮಿ.
ಲಕ್ಶ್ಮಿಚೆಂ ಉತರ್ ಆಯ್ಕೊನ್ ಸುರೆಶಾಚೆಂ ತೋಂಡ್ ಪರ್ಜಳೆಂ. ಲಕ್ಶ್ಮಿ ಆಪ್ಣಾಲಾಗಿಂ ಕಾಜಾರ್ ಜಾವ್ನ್ ಯೆತಾನಾ ತಾಚ್ಯಾ ಘರ್ಚ್ಯಾಂನಿ ತಾಕಾ ಕಶ್ಟಾಂನಿ ಕರ್ನ್ ಘಾಲ್ಲೆಂ ಭಾಂಗಾರ್ ದೀಂವ್ಕ್ ತೆಂ ಇನ್ಕಾರ್ ಕರಿತ್ ಮ್ಹಳ್ಳೊ ದುಬಾವ್ ಆಸ್ಲ್ಲೊ ತಾಕಾ.
ತಾಣೆಂ ಲಕ್ಶ್ಮಿಕ್ ಮೊಗಾನ್ ಆರಾಯ್ಲೆಂ. "ಇತ್ಲೆಂ ಸಮ್ಜಣೆಚ್ಯಾ ತುಕಾ ಆಪ್ಣಾಯಿಲ್ಲೊಂ ಹಾಂವ್ ಕಿತ್ಲೆಂ ಭಾಗಿ?" ಮ್ಹಣೊನ್ ತಾಚ್ಯಾ ಪೊಲ್ಯಾರ್ ಮೊಗಾಚಿ ಮ್ಹೊರ್ ದಾಂಬ್ಲಿ ಸುರೆಶಾನ್. ಲಕ್ಶ್ಮಿನ್ ಆಪ್ಲ್ಯಾ ಆಯಾಪಣಾಚಿ
ಕುರುಃ ಜಾವ್ನಾಸ್ಚಿ ಕರಿಯಮಣಿ ಏಕ್ ಸೊಡ್ನ್ ಉರ್ಲ್ಲೆಂ ಪುರಾ ಭಾಂಗಾರ್ ಸುರೆಶಾಚ್ಯಾ ಹಾತಿಂ ದಿಲೆಂ.
"ಹ್ಯಾ ಭಾಂಗಾರಾಕ್ ಕಿತ್ಲೆ ಮೆಳ್ತಾತ್ ಪಳೆತಾಂ. ಉರ್ಲ್ಲೆ ಕಶೆ ಪುಣ್ಯಿ ಬಂದೊಬಸ್ತ್ ಕರ್ತಾಂ" ಮ್ಹಣೊನ್ ಭಾಯ್ರ್ ಸರ್ಲೊ ಸುರೇಶ್.
ಲಕ್ಶ್ಮಿಚೆಂ ಭಾಂಗಾರ್ ವಿಕ್ತಚ್ ತಾಂತುಂ ತಾಕಾ ಪಂಚ್ವೀಸ್ ಹಜಾರ್ ರುಪಯ್ ಮೆಳ್ಳೆ. ಉರ್ಲ್ಲ್ಯಾ ದೆಡ್ವಾಕ್ ಇಶ್ಟಾಂಲಾಗಿಂ ಮಂತ್ರಾಂ ಘಾಲಿಲಾಗ್ಲೊ. ಸುರೇಶ್ ಗಲ್ಫಾಕ್ ವೆತಾ ಮ್ಹಳ್ಲೆಂ ಆಯ್ಕೊನ್ ತೆ ಕುಮೊಕ್ ಕರುಂಕ್ ತಯಾರ್ ಜಾಲೆ. ಎಕ್ಲ್ಯಾಲಾಗಿಂ ಪಾಮ್ಚ್ ಹಜಾರ್, ಅನ್ಯೆಕ್ಲ್ಯಾಲಾಗಿಂ ಪಾಂಚ್ ಹಜಾಯ್ ಮೆಳ್ಲೆ. ಅನಿಕ್ಯಿ ಪಾಂಚ್ ಹಜಾರ್
ರುಪ್ಯಾಂಚಿ ಗರ್ಜ್ ಆಸ್ಲ್ಲಿ. ತರ್ಯಿ ಆಸ್ಲ್ಲೊ ದುಡು ಘೆವ್ನ್ ಏಜೆಂಟಾಲಾಗಿಂ ಗೆಲೊ ಸುರೇಶ್.
ಏಜೆಂಟಾಚ್ಯಾ ಮೆಜಾರ್ ಪಾಂತೀಸ್ ಹಜಾರ್ ರುಪಯ್ ದವರ್ಲೆ ತಾಣೆ. ಹೊ ದುಡು ಆಪ್ಣೆಂ ಖಂಚ್ಯೆ ಪರಿಗತಿಂತ್ ಜಮಯ್ಲಾ ಮ್ಹಳ್ಳೆಂ ವಿವರಾವ್ನ್ ಪಾಂಚ್ ಹಜಾರಾಂಕ್ ದೋನ್ ದಿಸಾಂಚೊ ವಾಯ್ದೊ ಮಾಗಿಲಾಗ್ಲೊ ತೊ.
ಪುಣ್ ಏಜೆಂಟ್ ಆಯ್ಕಾನಾ ಜಾಲೊ. "ಚಾಳಿಸ್ ಹಜಾರ್ ನ್ಹಂಯ್ ಆಸ್ತಾಂ, ಖರ್ಚಾಕ್ ಆನಿ ಪಾಂಚ್ ಹಜಾರ್ ಜಾಯ್. ಸಾವ್ದಿಕ್ ವಚೊಂಕ್ ವೀಜಾ ಡೆಲ್ಲಿ ಆಸಾ. ತಶೆಂ ಮ್ಹಣ್ತಾನಾ ಖರ್ಚಾನ್ ಅನಿಕ್ಯಿ ಚಾರ್ ಹಜಾರ್ ಜಾಯ್ ಪಡ್ತಿತ್. ದೆಕು ನ್ತುಂ ಪಾಂಚ್ ಹಜಾರ್ ಆನಿ ಖರ್ಚಾಚೆ ಚಾರ್ ಹಜಾರ್ ಜಮವ್ನ್ ಯೆ. ನಾಂತರ್ ಹೊ ದುಡು ಪಾಟಿಂ ವ್ಹರ್. ಫಾಲ್ಯಾಂ ಸಕಾಳಿಂ ಭಿತರ್ ಹೆಂ ಸರ್ವ್ ಜಾಯ್ಜೆ. ಉಪ್ರಾಂತ್ ಜಾಂವ್ಚೆಂ ನಾ."
ಏಜೆಂಟಾನ್ ಖಾಡಾಖಡ್ ಸಾಂಗ್ತಾನಾ ಸುರೆಶಾಚೆಂ ತೋಂಡ್ ಬಾವ್ಲೆಂ. ತರ್ಯಿ ದುಸ್ರೊ ಉಪಾವ್ ನಾಸ್ತಾನಾ ತೊ ಏಜೆಂಟಾಲಾಗಿಂ ಆಡ್ದೊಸ್ ಮಾಗಾಲಾಗ್ಲೊ.
"ಸಾಯ್ಬಾ ಹೊ ದುಡು ದವರ್. ದುಸ್ರ್ಯಾ ಪಯ್ಶ್ಯಾಂಚಿ ವಿಲೆವಾರಿ ಕರ್ತಾಂ." ಮ್ಹಣ್ ಸಾಂಗೊನ್ ಪಾಟಿಂ ಆಯ್ಲೊ. ಆಪ್ಲ್ಯೆ ಒಳ್ಕಿಚ್ಯಾ ಸಬಾರಾಂಲಾಗಿಂ ತೊ ಆಡ್ದೊಸ್ ಮಾಗಾಲಾಗ್ಲೊ ತರ್ಯಿ ಸರ್ವಾಂನಿ ಹಾತ್ ಉದಾರೆ ಕೆಲೆ. ದುಸ್ರಿ ವಾಟ್ ನಾಸ್ತಾಂ ಪಾಟಿಂ ಘರಾ ಆಯ್ಲೊ ತೊ. ಗಜಾಲ್ ಪತಿಣೆಕ್ ಕಳಯ್ಲಿ ತಾಣೆ. ಪುಣ್ ಲಕ್ಶ್ಮಿಚ್ಯಾನ್ ಕಿತೆಂಚ್ ಕರುಂಕ್ ಜಾಲೆಂನಾ.
ಅಶೆಂ ಉಲಯ್ತಾನಾ ಸುರೆಶಾಚಿ ದೀಶ್ಟ್ ಲಕ್ಶ್ಮಿಚ್ಯಾ ಗಳ್ಯಾಂತ್ಲೆ ಕರಿಯಮಣಿಚೆರ್ ಗೆಲಿ. ಬಾರಿಕ್ ತರ್ಯಿ ಪಾಂಚ್ ಹಜಾರ್ ಖಂಡಿತ್ ಮೆಳ್ತೆಲೆ. ತಾಚ್ಯಾ ತೊಂಡಾರ್ ಭರ್ವಸ್ಯಾಚೆಂ ಕೀರ್ಣ್ ಫಾಂಕ್ಲೆಂ. ಆಪ್ಲೆಂ ಭಾಂಗಾರ್ ಕಸಲೆಚ್ ಘಳಾಯೆವಿಣೆ ದಿಲ್ಲೆಂ ಲಕ್ಶ್ಮಿ ಕರಿಯಮಣಿಯಿ ಖಂಡಿತ್ ದಿತೆಲೆಂ ಚಿಂತುನ್ ತಾಣೆ ವಿಚಾರ್ಲೆಂ.
"ಲಕ್ಶ್ಮಿ ತುಜ್ಯಾ ಗಳ್ಯಾಂತ್ಲಿ ಕರಿಯಮಣಿ ಮ್ಹಾಕಾ ದೀ. ಹಾಂವ್ ಬದ್ಲಾಕ್ ತುಕಾ ಬಾಜಾರಾಂತ್ಲಿ ಗಿಲಿಟಾಚಿ ಹಾಡ್ನ್ ದಿತಾಂ. ಕೊಣಾಯ್ಕಿ ಕಳ್ಚೆಂನಾ. ಉಪ್ರಾಂತ್ ಪಯ್ಶೆ ಜಾತಾನಾ ಕರವ್ಯೆತ್."
ಹೆಂ ಆಯ್ಕೊನ್ ಲಕ್ಶ್ಮಿ ಕಾವ್ಜೆಲೆಂ.
"ತುಂ ಕಿತೆಂ ಉಲಯ್ತಾಯ್ ತೆಂ ಜಾಣಾಂಯ್ಗಿ ಸುರೇಶ್? ಘೊವಾನ್ ಕಾಜಾರಾ ದಿಸಾ ಬಾಯ್ಲೆಚ್ಯಾ ಗಳ್ಯಾಂತ್ ಘಾಲ್ಲೆಂ ಆಯಾಪಣ್ ತಿಣೆ ಸಾಂಡ್ಲ್ಯಾರ್ ವ ವಿಕ್ಲ್ಯಾರ್ ತಿಚೆಂ ಸರ್ವಸ್ವ್ ನಾಸ್ ಜಾಲ್ಲೆಬರಿ. ಹೆಂ ತುಂ ನೆಣಾಂಯ್ಗಿ? ತುವೆಂ ಪರ್ದೆಶಾಕ್ ವಚನಾ ತರ್ಯಿ ವ್ಹಡ್ ನಾ. ಘಡ್ಗಡೊ ಮಾರುಂದಿ ತ್ಯಾ ಪರ್ದೆಶಾಕ್. ಆತಾಂ ಗೆಲ್ಲೆಬರಿ ದೀಸ್ ವೆತೆಲೆ. ಕಿತೆಂಯ್ ಜಾಂವ್ ಗಳ್ಯಾಂತ್ಲೆಂ ಆಯಾಪಣ್ ಹಾಂವ್ ದಿಂವ್ಚಿಂ ನಾ. ತುಂ ವಚೊನ್ ತೆ ಪಯ್ಶೆ ಪಾಟಿಂ ಹಾಡ್" ಖಡಾಖಡ್ ನೆಗಾರ್ ಕೆಲೆಂ ಲಕ್ಶ್ಮಿನ್.
ದುಸ್ರಿ ವಾಟ್ ನಾಸ್ತಾಂ ಸುರೇಶ್ ನಿರಾಶೆನ್ ಏಜೆಂಟಾಲಾಗಿಂ ಗೆಲೊ. ಉರ್ಲ್ಲ್ಯಾ ಪಯ್ಶ್ಯಾಂಚಿ ಬಂದೊಬಸ್ತ್ ಕರುಂಕ್ ಉಪ್ಕಾರ್ ಮಾಗಲಾಗ್ಲೊ.
"ಸಾವ್ದಿ ಪಾವೊನ್ ಲಾಬ್ಲ್ಲ್ಯಾ ಪಯ್ಲ್ಯಾ ಸಾಂಬಾಳಾಂತ್ಚ್ ತುಜೆಂ ರೀಣ್ ಫಾರಿಕ್ ಕರ್ತಾಂ. ಕಾಂಯ್ ತರ್ಯಿ ಉಪ್ಕಾರ್ ಕರ್ ಸಾಯ್ಬಾ."
ಪುಣ್ ಮುಂಬಂಯ್ತ್ ಹೆಂ ಸದಾಂಚೆಂ ರಜಾರ್ ಆಯ್ಕಲ್ಲ್ಯಾ ಏಜೆಂಟಾಚೆಂ ಮನ್ ಆಯ್ಕಲೆಂ ನಾ. ತರ್ಯಿ ಥೊಡಿ ಸೊಡ್ದೊಡ್ ಕರ್ಚ್ಯಾ ಇರಾದ್ಯಾನ್, "ಪಳೆ ಆಯ್ಕ್, ಹಾಮ್ವ್ ಹಾಂಗಾಥಾವ್ನ್ ಡೆಲ್ಲಿ ಪರ್ಯಾಂತ್ ಖರ್ಚಾಚೊ ಬಂದೊಬಸ್ತ್ ಕರ್ತಾಂ. ಪುಣ್ ಚಾಳಿಸ್ ಹಜಾರಾಂತ್ ಬಾಕಿ ಆಸ್ಚೆ ಪಾಂಚ್ ಹಜಾರ್ ತುವೆಂ ಹಾಡಿಜೆಚ್ ಪಡ್ತೆಲೆ. ತುಜೆ ಟಿಕೆಟಿಖಾತಿರ್ ತೊ ದುಡು ಭರುಂಕ್ ಆಸಾ."
ಪುಣ್ ಸುರೆಶಾನ್ ಆಪ್ಲೆಂ ಅಸಹಯಕ್ಪಣ್ ದಾಕಯ್ತಾನಾ ಆದ್ಲ್ಯಾ ದಿಸಾ ತಾಚೆಥಾವ್ನ್ ಘೆತ್ಲ್ಲೆ ಪಾಂತೀಸ್ ಹಜಾರ್ ರುಪಯ್ ಏಜೆಂಟಾನ್ ಪಾಟಿಂ ದಿಲೆ ಆನಿ ಮ್ಹಣಾಲೊ, "ಆಜ್ ಸಾಂಜೆಭಿತರ್ ಪಯ್ಶ್ಯಾಂಚಿ ವಿಲೆವಾರಿ ಕರುಂಕ್ ಜಾಯ್ತ್ ತರ್ ಹಾಡ್ನ್ ಯೆ. ಫಾಲ್ಯಾಂ ಸಕಾಳಿಂ ರಯ್ಲಾರ್ ವಚೊಂಕ್ ಆನಿ ಯೆಂವ್ಚಾ ಮಯ್ನ್ಯಾಚ್ಯಾ ಭಾರಾ ತಾರಿಕೆರ್ ಸಾವ್ದಿ ವಚೊಂಕ್ ಆಸ್ತೆಲೆಂ. ವೇಳ್ ನಾ ದೆಕುನ್ ತುರ್ತ್ ಕರ್." ಏಜಂಟಾನ್ ನಿಮಾಣೆಂ ತೀರ್ಪ್ ದಿಲೆಂ.
ಸುರೇಶ್ ನಿರ್ವೋಗ್ ನಾಸ್ತಾಂ ಪಯ್ಶೆ ಘೆವ್ನ್ ಪಾಟಿಂ ಆಯ್ಲೊ. ಇಶ್ಟಾಂ ಥಾವ್ನ್ ಘೆತ್ಲ್ಲೆ ಪಯ್ಶೆ ತಾಂಕಾಂ ಪಾಟಿಂ ದಿಲೆ. ಉರ್ಲ್ಲೆ ಪಂಚ್ವೀಸ್ ಹಜಾರ್ ಲಕ್ಶ್ಮಿಚ್ಯಾ ಹಾತಾಂತ್ ದೀವ್ನ್ ತಾಚೆಂ ಭಾಂಗಾರ್ ಕರಂವ್ಕ್ ಸಾಂಗ್ಲೆಂ. ಪುಣ್ ಲಕ್ಶ್ಮಿಆಯ್ಕಾಲೆಂನಾ.
"ಆತಾಂ ವಿಕುನ್ ಜಾಲ್ಲೆಂ ಜಾಲಾಂ ಸುರೇಶ್. ನವೆಂ ಕರಂವ್ಕ್ ಗೆಲ್ಯಾರ್ ಮ್ಹಾರಗ್ ಪಡ್ತೆಲೆಂ. ಆಂಗಾರ್ ಭಾಂಗಾರ್ ಆಸ್ಲ್ಯಾರ್ಯಿ ಝರೊನ್ಚ್ ವೆಚೆಂ. ತ್ಯಾ ಬದ್ಲಾಕ್ ಹೆ ಪಯ್ಶೆ ಭುರ್ಗ್ಯಾಂಚ್ಯಾ ನಾಂವಾರ್ ಪೊಸ್ಟಾಂತ್
ದವರ್ಯಾಂ. ಸ ವರ್ಸಾಂನಿ ದೊಡ್ತೆ ಜಾತಾತ್."
ಲಕ್ಶ್ಮಿಚ್ಯಾ ನಿರ್ದಾರಾಕ್ ಸುರೆಶಾನ್ ಖಾಲ್ತಿಮಾನ್ ಘಾಲಿ. ದೊಗಾಂಯಿ ವಚೊನ್ ಪಯ್ಶೆ ಪೊಸ್ಟಾಂತ್ ಘಾಲ್ನ್ ಸರ್ಟಿಫಿಕೆಟ್ ಹಾಡ್ನ್ ಆಯ್ಲಿಂ.
ಪುಣ್ ಸುರೆಶಾಕ್ ಮಾತ್ ಬಾಯ್ಲೆಚೆರ್ ಕಠಿಣ್ ಅಸಮದಾನ್ ಉಭ್ಜಾಲ್ಲೆಂ. ಲಕ್ಶ್ಮಿಚ್ಯಾ ಹಟಾವರ್ವಿಂ ಹಾತಾತ್ ಆಯಿಲ್ಲಿ ಉಂಡಿ ತೊಂಡಾಕ್ ಯೇನಾತ್ಲ್ಲೆಬರಿ ಜಾಲ್ಲೆಂ. ಲಕ್ಶ್ಮಿನ್ ಬರೆಂ ಮನ್ ಕರ್ನ್ ಕರಿಯಮಣಿ ದಿಲ್ಲಿ ತರ್ ತೊ ಆಜ್ ಗಲ್ಫಾಕ್ ಪಾವ್ತೊ. ದೆಕುನ್ ತಾಕಾ ಲಕ್ಶ್ಮಿಚೆರ್ ತಾತ್ಸಾರ್ ಉಭ್ಜಾಲ್ಲೊ.
ಆಪ್ಲೊ ರಾಗ್ ಸರ್ವ್ ಧಾಂಬುನ್ ಧರ್ನ್ ಪರತ್ ಚ್ಯಾಚ್ ವರ್ಕ್ಶೊಪಾಕ್ ಕಾಮಾಕ್ ಗೆಲೊ ತೊ. ಪಾಟ್ಲ್ಯಾ ದೋನ್ ದಿಸಾಂ ಥಾವ್ನ್ ತೊ ಕಾಮಾಕ್ಯಿ ವಚೊಂಕ್ ನಾತ್ಲ್ಲೊ.
ತ್ಯಾ ದಿಸಾಉಪ್ರಾಂತ್ ಸುರೇಶ್ ಘರಾಂತ್ ಅಸಮಧಾನ್ ಆಸ್ಲ್ಲೊ. ಸುರೇಶ್ ಆನಿ ಲಕ್ಶ್ಮಿ ಮದೆಂ ಗರ್ಜೆಪುರ್ತೆಂ ಉಲವ್ಣೆಂ ಮಾತ್ ಚಲ್ತಾಲೆಂ. ಬಾಯ್ಲೆಚೆರ್ ಆಸ್ಚೊ ರಾಗ್ ಅನಿಕ್ಯಿ ನಿವೊಂಕ್ ನಾತ್ಲ್ಲೊ. ಹರ್ಶೆಂ ಭುರ್ಗ್ಯಾಂ ಸಂಗಿಂ ಹಾಸೊನ್-ಖೆಳೊನ್ ಆಸ್ಚೊ ಸುರೇಶ್ ಆತಾಂ
ತಾಂಕಾಂ ಧೆಂಕ್ಣೆ ಘಾಲ್ನ್ ಧಾಂವ್ಡಾಯ್ತಾಲೊ.
ಹೆಂ ಸರ್ವ್ ಲಕ್ಶ್ಮಿ ಪಳೆವ್ನ್ಂಚ್ ಆಸ್ಲ್ಲೆಂ. ಪರ್ದೆಶಾಕ್ ವೆಚೆ ತಾಚೆ ಆಶೆವರ್ವಿಂ ಹೆಂ ಸರ್ವ್ ಜಾಲೆಂ ಮ್ಹಣ್ ತಾಕಾ ಕಳಿತ್ ಆಸ್ಲ್ಲೆಂ. ಇಸ್ತಿಹಾರ್ ಘಾಲ್ಲ್ಯಾ ದಿಸಾಳ್ಯಾಗಾರಾಕ್ ಶಿರಾಪಿಲಾಗ್ಲೆಂ ತೆಂ. ತರ್ಯಿ ಥೊಡ್ಯಾ ದಿಸಾಂನಿ ಸಾರ್ವ್ ಸಾರ್ಕೆಂ ಜಾತೆಲೆಂ
ಮ್ಹಳ್ಳ್ಯಾ ಭರ್ವ್ಯಸ್ಯಾನ್ ವೊಗೆಂ ಆಸ್ಲ್ಲೆಂ ತೆಂ.
ಅಶೆಂಚ್ ಹಫ್ತೊ ಪಾಶಾರ್ ಜಾಲೊ. ಭಾರಾ ತಾರಿಕ್ ಉದೆಲಿ. ಸಕಾಳಿಂ ಉಟ್ತಾನಾಚ್ ಸುರೆಶಾಕ್ ಪರ್ದೆಶಾಚೊ ಉಡಾಸ್ ಆಯ್ಲೊ. ಆಯ್ಚೊ ದೀಸ್ ಪರ್ದೆಶಾಕ್ ಉಭ್ಚೊ. ಜರ್ ಪಯ್ಶಾಂಚಿ ಬಂದೊಬಸ್ತ್ ಜಾಲ್ಲಿ ತರ್ ತೊಯಿ ಹೆರಾಂಸಂಗಿಂ ಪರ್ದೆಶಾಕ್
ಉಭ್ತೊ. ತಾಚ್ಯಾ ವರ್ಕ್ಶೊಪಾಂತ್ಲೆ ದೋಗ್ ಕಾಮೆಲಿ ಪರ್ದೆಶಾಕ್ ಗೆಲ್ಲೆ. ಚಿಂತುನ್ ತಾಚಿ ಮತ್ ದೆದೆಸ್ಪ್ರೊರ್ ಜಾಲಿ. ಕಾಮಾಕ್ ಮ್ಹಣ್ ಭಾಯ್ರ್ ಸರ್ನ್ ಗೆಲ್ಲೊ ತೊ ಕಾಮಾಕ್ ಗೆಲೊನಾ. ಶೀದಾ ಗಡಂಗಾಕ್ ಪಾವ್ಲೊ. ಎದೊಳ್ ಸೊರೊ ಪಿಯೆನಾತ್ಲ್ಲೊ ತೊ ಆಜ್ ಮತಿಚಿ ವಿರಾರಾಯ್ ನಿವಾರುಂಕ್ ನಾಕ್ಭರ್ ಘೊಟಿಲಾಗ್ಲೊ. ಉಪ್ರಾಂತ್ ಉಟೊಂಕ್ ಜಾಯ್ನಾಸ್ತಾಂ ಥಂಯ್ಚ್ ಆಡ್ ಪಡ್ಲೊ. ಸಾಂಜೆರ್ ಉಟೊನ್ ಪರತ್ ಪಿಯೆವ್ನ್ ಲಕೊನ್ ಘರಾ ಆಯ್ಲೊ.
ಲಕೊನ್ ಯೆಂವ್ಚಾ ಸುರೆಶಾಕ್ ಪಳೆವ್ನ್ ಚಾಲಿಂತ್ಲೆ ಸೆಜಾರಿ ಆಜ್ಯಾಪ್ ಪಾವ್ಲೆ. ಹಾಚಿ ಅವಸ್ತಾ ಪಳೆವ್ನ್ ಲಕ್ಶ್ಮಿ ಶೆರ್ಮೆಲೆಂ. ಆತಾಂ ತೆಂ ಪುರ್ತೆಂ ಖುಬಾಳ್ಳೆಂ. ಸುರೆಶಾಕ್ ಸಾಂಭಾಳ್ನ್ ಭಿತರ್ ವ್ಹೆಲ್ಲ್ಯಾ ತಾಣೆ ತಾಕಾ ನ್ಹಾಣ್ಯೆಕ್ ವ್ಹೆಲೆಂ. ಏಕ್ ಬಾಲ್ದಿ ಉದಕ್ ಮಾತ್ಯಾರ್ ವೊತುನ್ ಸಣ್ಸಣಿಲಾಗ್ಲೆಂ ತೆಂ.
ಲಕ್ಶ್ಮಿಚೆಂ ಪಿರ್ಪಿರಿಸಾಂವ್ ಆಯ್ಕಲ್ಲ್ಯಾ ಸುರೆಶಾಚೊ ರಾಗ್ ತಳ್ಮಟ್ಯಾಕ್ ಚಡ್ಲೊ. ಇತ್ಲೆ ದೀಸ್ ದಾಂಬುನ್ ದವರ್ಲ್ಲೊ ರಾಗ್ ಪುರಾ ಭಾಯ್ರ್ ಪಡ್ಲೊ. ಲಕ್ಶ್ಮಿಚ್ಯಾ ಕೆಸಾಂಕ್ ಧರ್ನ್ ಸುಶೆಗಾತ್ ಗುಮ್ಸೆ ಘಾಲೆ ತಾಣೆ., ಲಕ್ಶ್ಮಿ ದುಕಿನ್ ಪಿಂರ್ಗೊನ್ ಕೊನ್ಶಾಂತ್ ಪಡ್ಲೆಂ. ಭುರ್ಗಿಂ ಥರ್ಥರೊನ್ ಬೊಬಾಟಿಲಾಗ್ಲಿಂ. ಭುರ್ಗ್ಯಾಂಚಿ ಬೊಬಾಟ್ ಆಯ್ಕೊನ್ ಸೆಜಾರ್ಚಿಂ ಧಾಂವೊನ್ ಆಯ್ಲಿಂ ಸೆಜಾರ್ಚ್ಯಾ ಅಬ್ಬು
ಚಾಚಿಚ್ಯಾ ಧೆಂಕ್ಣ್ಯಾಕ್ ಬಾಯ್ಲೆಕ್ ಮಾರ್ಚೆಂ ರಾವಯ್ಲೆಂ ಸುರೆಶಾನ್. ಸಾಲಾಚ್ಯಾ ಮದೆಗಾತ್ ಉದಾರೊಚ್ ಪರ್ತಾಲ್ಲೊ ತೊ ಥಂಯ್ಚ್
ಘೊರೆಂವ್ಕ್ ಲಾಗ್ಲೊ. ತ್ಯಾ ದೀಸ್ ಘರಾಂತ್ಲ್ಯಾ ಸರ್ವಾಂಕ್ ಉಪ್ವಾಸ್. ಭುರ್ಗಿಂ ಭುಕೆನ್ಚ್ ಆವಯ್ಚೆ ಪಾಸ್ಳೆರ್ ನಿದ್ಲಿಂ.
ದುಸ್ರ್ಯಾ ದಿಸಾ ಸಕಾಳಿಂ ಸುರೆಶಾಕ್ ಹರ್ಶೆಂಚ್ಯಾಬರಿ ಜಾಗ್ ಜಾಲಿ. ಉಟೊನ್ ಬಸ್ಲೊ ತೊ. ಭಂವ್ತಿಂ ಪಳೆಲೆಂ ತಾಣೆಂ. ಲಕ್ಶ್ಮಿ ಆನಿ ಭುರ್ಗಿಂ ಎಕಾ ಕೊನ್ಶಾಕ್ ಮುದೊ ಜಾವ್ನ್ ನಿದ್ಲ್ಲಿಂ. ತಾಕಾ ಆದ್ಲ್ಯಾ ದಿಸಾಚೊ ಉಡಾಸ್ ಆಯ್ಲೊ. ಅಪ್ಲಿಚ್ ಲಜ್ ದಿಸ್ಲಿ ತಾಕಾ. ತೊ ಉಟ್ಲೊ ಆನಿ ತೋಂಡ್ ಧುಲೆಂ. ದೂದ್ ಹಾಡ್ನ್ ಕುಜ್ನಾಕ್ ವಚೊನ್ ಚ್ಹಾ ಕರ್ನ್ ಪಿಯೆಲೊ. ಜಾಪ್ ಕಾಡಿನಾಸ್ತಾಂ ಭಾಯ್ರ್ ಗೆಲೊ ತೊ. ಭಾಯ್ರ್ ಗೆಲ್ಲೊ ತೊ ಪಾನ್ ಬಿಡಿಂಚ್ಯಾ ದುಕಾನಾಲಾಗಿಂ ಬಸ್ಲೊ.
ತಿತ್ಲ್ಯಾರ್ ಖಬ್ರೆ ಪತ್ರಾರ್ ಆಯಿಲ್ಲಿ ಖಬರ್ ದೋಗ್ ಜಣ್ ಉಲಯ್ತಾಲೊ. ಖಂಚ್ಯಾಗಿ ವಿಮಾನ್ ಅವ್ಘಡಾವಿಶಿಂ ಉಲಯ್ತಾಲೆ. ಆತುರಾಯೆನ್ ಸುರೆಶಾನ್ಯಿ ಏಕ್ ಪತ್ರ್ ಗೆತ್ಲೆಂ. ಖಬರ್ ವಾಚುನ್ ತಾಚೊ ಸಗ್ಳೊ ಜೀವ್
ಕಾಣ್ಶಿರ್ಲೊ. ತೊ ರೂಕ್ ಜಾಲ್ಲೊ.
ಭಾರಾ ತಾರಿಕೆರ್ ಸಾವ್ದಿ ವಚೊಂಕ್ ಆಸ್ಲ್ಲೆಂ ಸಾವ್ದಿ ಏರ್ಲಾಯ್ನಾಚೆಂ ವಿಮಾನ್ ಉಭ್ಲ್ಲ್ಯಾ ಥೊಡ್ಯಾಚ್ ಘಡ್ಯಾಂನಿ ಕಝಕಿಸ್ತಾನಾಚ್ಯಾ ಅಕ್ಯೆಕಾ ವಿಮಾನಾಕ್ ಆಪ್ಟೊನ್ ಭಸ್ಮ್ ಜಾಲ್ಲೆಂ. ವಿಮಾನಾಂತ್ಲೆ ಪಯ್ಣಾರಿ ಕೊಣ್ಯಿ ವಾಂಚೊಂಕ್ ನಾತ್ಲ್ಲೆ. ಥೊಡ್ಯಾ ವೆಳಾನ್ ಸುರೆಶಾನ್ ಏಜೆಂಟಾಚ್ಯಾ ದಫ್ತರಾಕ್ ಫೊನ್ ಕರ್ನ್ ಖಬರ್ ಕಾಡ್ಲೊ. ತಾಚೆ ಸರ್ವ್ ಪಯ್ಣಾರಿ ತ್ಯಾಚ್ ವಿಮಾನಾರ್ ಆಸ್ಲ್ಲೆ. ತಾಂಚೆಪಯ್ಕಿ ತಾಚ್ಯಾಚ್ ವರ್ಕ್ಶೊಪಾಂತ್ಲೆ ದೋಗ್ ಜಣ್ಯಿ ಆಸ್ಲ್ಲೆ.
ಪತ್ರ್ ಹಾತಿಂ ಘೆವ್ನ್ ಧಡ್ದಡ್ಚ್ಯಾ ಕಾಳ್ಜಾನ್ ಸುರೇಶ್ ಘರಾ ಧಾಂವೊನ್ ಆಯ್ಲೊ. ಲಕ್ಶ್ಮಿಕ್ ಸಗ್ಳಿ ಗಜಾಲ್ ಕಳಯ್ಲಿ ತಾಣೆ. ಖಬರ್ ಆಯ್ಕೊನ್ ಲಕ್ಶ್ಮಿ ಸುರೆಶಾಕ್ ವೆಂಗೊನ್ ರಡಾಲಾಗ್ಲೆಂ. ತಕ್ಶಣ್ ಭಿತರ್ ಧಾಂವ್ಲೆಂ ತೆಂ. ಘರಾಂತ್ಲ್ಯಾ ಆರಾದನ್ ದೇವಿಚ್ಯಾ ಪಾಯ್ನೆಲಾಮುಕಾರ್ ದಿವೊ ಜಳಯ್ಲೊ ತಾಣೆ. ದೆವಾಕ್ ಅರ್ಗಾಂ ದಿಲಿಂ. ಆಪ್ಲ್ಯಾ
ಗಳ್ಯಾಂತ್ ಉಮ್ಕಾಳ್ಚಿ ಕರಿಯಮಣಿ ಹಾತಿಂ ಘೆವ್ನ್ ತಾಚೊ ಉಮೊ ಘೆತ್ಲೊ ಆನಿ ದೊನ್ಯಿ ದೊಳ್ಯಾಂಕ್ ಲಾಯ್ಲಿ ಲಕ್ಶ್ಮಿನ್. ತೆಚ್ಚ್ ಕರಿಯಮಣಿವರ್ವಿಂ ತಾಚೆಂ ಆಯಾಪಣ್ ಆಜ್ ಸುರಕ್ಶಿತ್ ಉರ್ಲ್ಲೆಂ.
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
