ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಸಾಹಿತಿಲಾಗಿಂ ಸಂವಾದ್
ಸಂವಾದ್ ಚಲವ್ಪಿಣ್: ವಾಯ್ಲೆಟ್ ಜೆ. ಪಿರೇರಾ
ಮಾ|ಫ್ರಾನ್ಸಿಸ್ ರೋಡ್ರಿಗಸ್, ಅಲಂಗಾರ್
ಸಾಹಿತಿವಿಶಿಂ ದೋನ್ ಉತ್ರಾಂ:
ಮಾ|ಬಾ|ಫ್ರಾನ್ಸಿಸ್ ರೊಡ್ರಿಗಸ್, ಪಾಟ್ಲ್ಯಾ ಸಭಾರ್ ತೆಂಪಾ ಥಾವ್ನ್ ರಾಕ್ಣೊಚೆರ್ ತಶೆಂಚ್ ಹೆರ್ ಪತ್ರಾಂನಿ ತವಳ್ ತವಳ್ ಅಪ್ರೂಪಾಯೆನ್ ತರ್ಯ್ ಅಪ್ಲಿಂ ಲಿಖಿತಾಂ, ಕಾಣ್ಯೊ ಬರವ್ನ್ಂಚ್ ಆಯ್ಲಾ ತರ್ಯ್ ಆತಾಂ ಕೊಂಕ್ಣಿ ಲೊಕಾಂಕ್ ತೊ ಚಡ್ ವಳ್ಕಿಚೊ ಜಾಲಾ ರಾಕ್ಣೊ ಪತ್ರಾಚೊ ಸಂಪಾದಕ್ ಜಾವ್ನ್. ಪ್ರಾಯೆಂತ್ ತರ್ನಾಟೊ ದೆಖುನ್ ಹುಮೆದಿನ್, ಚುರುಕಾಯೆನ್ ಸಾಹಿತಿಕ್ ವಾವ್ರಾಕ್ಯ್ ಲಾಗ್ಲಾ ದೆಖುನ್ ಕೊಂಕ್ಣಿ ಭಾಸೆಚಾ ವಾಡಾವಳೆಚಾ ನದ್ರೆನ್ ಹೆಂ ಸಂತೊಸಾಚೆಂಚ್. ದಾಯ್ಜ್ ಸಾಯ್ಟಿಖಾತಿರ್ ಏಕ್ ಸಂವಾದ್ ಚಲಂವ್ಕ್ ವಿಚಾರ್ಲ್ಲೆ ತಕ್ಷಣ್ ತೊ ಅಪ್ಲೊ ಥೊಡೊ ವೇಳ್ ದೀಂವ್ಕ್ ಕಬೂಲ್ ಜಾಲೊ ದೆಖುನ್ ತಾಕಾ ಆಮಿಂ ಆಭಾರಿ ಜಾವ್ನಾಸಾಂವ್.
ಸಂವಾದ್:
ಸ:
ಕೊಂಕ್ಣಿ ಪತ್ರಿಕೋಧ್ಯಮಾಕ್ ತುಮಿ ನವೆ ತರ್ಯ್ ಕೊಂಕ್ಣಿ ಸಾಹಿತ್ಯಾಕ್ ತುಮಿ ನವೆ ನ್ಹಂಯ್ - ಸಾಂಗಾ, ತುಮ್ಕಾಂ ಕೊಂಕ್ಣಿ ಸಾಹಿತ್ಯಾಕ್ ದೆಂವೊಂಕ್ ಲಾಭ್ಲ್ಲೆಂ ಪ್ರೇರಣ್ ಕಸಲೆಂ?
ಜಾ: ಪಯ್ಲ್ಯಾನ್ ಪಯ್ಲೆಂ ಘರಾ ಅಫ್ರೂಪ್ ಬಾಬ್ ರಾಕ್ಣೊ ಹಾಡ್ತಾಲೊ, ತೆಂ ವಾಚ್ಚಿ ಪಿಸಾಯೆಕ್ ಲಾಗೊನ್, ವಾಚ್ಪಾಚಿ ಪಿಸಾಯ್ ಸುರು ಜಾಲಿ. ತಾಚ್ಯಾ ಉಪ್ರಾಂತ್ ಪಿಯುಸಿಂತ್ ಮೊಸ್ತು ಕ್ಲಾಸಿ ಫ್ರೀ ಆಸ್ತಾಲ್ಯೊ ತ್ಯಾ ವೆಳಾರ್ ಘರಾ ಬಿಲ್ಕುಲ್ ವೊಸೊಂಕ್ ನಾಕಾ ಆಸ್ಲ್ಲೆ. ತ್ಯಾ ವೆಳಾರ್ ಉರುಲ್ಲೊ ವೇಳ್ ಖರ್ಚುಂಕ್ ಏಕ್ಚ್ಚ್ ವಾಟ್ ಪುಸ್ತಕ್ ಗ್ರಂಥ್. ದುಸ್ರೆಂ ಕಿತೆಂಗೀ ಮ್ಹಳ್ಯಾರ್ ಘರಾ ಆಮ್ಕಾಂ ಖೆಳೊಂಕ್ ಅಡ್ವಾರ್ಲೆಲೆಂ, ತೆದಾಳಾ ಕಿತೆಂ ತರೀ ವಾಚುನ್ ಬರಯ್ಜಯ್ ಆಸ್ಲ್ಲೆಂ (ಭುರ್ಗ್ಯಾಂನಿ ವಾಚ್ಲ್ಯಾರ್ ವ್ಹಡಿಲ್ಹಾಂಕ್ ಖುಶಿ ಜಾತಾಲಿ). ಪಿಯುಸಿಚ್ಯಾ ತ್ಯಾ ದೋನ್ ವರ್ಸಾಂನಿ ಕಾಲೈ ತರೀ ಗಿಚ್ಚುನ್ ಕಾಲೆಜಿಂತ್ ನೋಟೀಸ್ ಬೊರ್ಡಾರ್ ಘಾಲ್ತಾಲೊ. ಮಾಗಿರ್ ಪುರ್ತಿ ಪಿಸಾಯ್ ಸೆಮಿನಾರಿಕ್ ರಿಗ್ಲ್ಯಾ ಉಪ್ರಾಂತ್ ಜಾಲಿ. ಥಂಯ್ಸರ್ ಫುಂಕ್ಯಾಕ್ ಬೂಕ್ ಮೆಳ್ತಾತ್. ತಶೆಂ
1989-90 ರ್ ರಾಕ್ಣಾಕ್, ಆಮ್ಚಿ ಮಾಂಯ್ ಆನಿ ಆಂಜ್ ಪತ್ರಾಂಕ್ ಬರಯ್ತಾಲೊಂ, ತಾಚೆ ಉಪ್ರಾಂತ್ ಸೆವಕಾಕ್. (ಸೆಮಿನೆರಿಂತ್ ಆಮ್ಕಾ ಮಸ್ತ್ ಆವ್ಕಾಸ್ ಮೆಳ್ತಾಲೆ).
ಸ: ಕೊಂಕ್ಣೆಚಾ ಹೆರ್ ಪ್ರಕಾರಾಂಸವೆಂ ತುಲನ್ ಕರ್ತಾನಾ ’ಕೊಂಕ್ಣಿ ಸಾಹಿತ್ಯ್’ ತುಮ್ಚೆಪ್ರಕಾರ್ ಕೊಂಕ್ಣೆಚಾ ವ್ಹಾಡಾವಳೆಕ್ ಕಿತ್ಲೆಂ ಮಹತ್ವಾಚೆಂ?
ಜಾ: "ಸಾಹಿತ್ಯ್" ಭಾಸೆಚೊ ಏಕ್ ಪ್ರಮುಕ್ ವಾಂಟೊ. ತಶೆಂ ಸಾಹಿತ್ಯ್ ಆಸಾ ಮ್ಹಣ್ತಾನಾ ಭಾಸ್ ಗ್ರೇಸ್ತ್ ಜಾಲಿ ಮ್ಹಣ್ ಆರ್ಥ್. ಎಕಾ ಭಾಷೆನ್ ದಿಲ್ಲ್ಯಾ ಸಾಹಿತ್ಯಾ ವರ್ವಿಂ ತಿಂ ಭಾಸ್ ವಾಚ್ತೆಲ್ಯಾಕ್ ಆನಿಂ ತಿಂ ಭಾಸ್ ಬರಯ್ತೆಲ್ಯಾಚಿ ಭಾಸ್ ಚಡ್ತಿಕ್ ಗ್ರೇಸ್ತ್ಕಾಯೆನ್ ಭರ್ತಾ. ನವಿ ಸಬ್ದಾವಳ್, ಆಲೋಚನ್ಯೊ, ಕ್ರಿಯಾತ್ಮಕ್ ಸಂಗ್ತ್ಯೊ ಎಕಾ ಫಾಲಾಣ್ಯಾ ಭಾಶೆವರ್ವಿಂ ಸಮ್ಜಾವ್ಯೆತ್ ಸೊಡ್ನ್ ವಾರ್ಯಾರ್ ಸಮ್ಜೊಂಕ್ ಸಾಧ್ಯ್ ನಾ. ಆಸಲ್ಯೊ ಸಂಗ್ತಿ ಕೊಂಕ್ಣಿ ಮನ್ಶ್ಯಾ ಥಾವ್ನ್ ವಾಳ್ಳ್ಯಾರ್ ಕೊಂಕ್ಣಿ ಗ್ರೇಸ್ತ್ಚ್ಚ್.
ಸ: ತುಮ್ಕಾಂ ಸಾಹಿತ್ಯಾಂತ್ ಖಾಯ್ಸ್ ಜಾಂವ್ಚೊ ಪ್ರಕಾರ್ ಖಂಚೊ? ಕಿತ್ಯಾಕ್?
ಜಾ: ಮ್ಹಾಕಾ ಜೆರಾಲ್ ಥರಾನ್ ಮುಖೆಲ್ ಜಾವ್ನ್ ಖಾಯ್ಸ್ ಜಾಂವ್ಚೊ ಪ್ರಕಾರ್: ಗದ್ಯ್, ಲೇಖನಾಂ ತಾಚ್ಯಾ ಸಾಂಗಾತಾ ರಚನಾತ್ಮಕ್ ಸಾಹಿತ್ಯ್ ಮ್ಹಾಕಾ ಭೋವ್ ಅಂವಡ್ತಾ. ಸುರ್ವಾತೆರ್ ಹಾಂವೆ ಬರೊಂವ್ಚಿ ಮಿನತ್ ಘೆತ್ಲ್ಲಿ ಕವಿತಾ, ಕಾಣ್ಯಾಂ ಮಾರಿಫಾತ್ಚ್ಚ್. ತಾಂತು ಏಕ್ಚ್ಚ್ ಭಾಷೆಚೊ ನ್ಹಂಯ್ ಬಗಾರ್ ಕೊಂಕ್ಣೆ ಸಾಂಗಾತಾ ಕನ್ನಡ, ಇಂಗ್ಲೀಶಾಚಿ ಲೇಖನಾ ವಾಚ್ತಾಲೊ.
ಸ: ಕೊಂಕ್ಣಿ ಪತ್ರಿಕೋಧ್ಯಮ್ ಪತ್ರಾಂನಿ ಆನಿ ವೆಬ್ಸಾಯ್ಟಾಂತ್ಲೆಂ ಕೊಂಕ್ಣೆಚಾ ಬರ್ಯಾಪಣಾಕ್ ಕಿತ್ಲೆಂ ಸಹಕಾರಿ?
ಜಾ: ಏಕ್ ಪತ್ರಿಕೋದ್ಯಮ್ ಆದಿಂ ಥಾವ್ನ್ ಆಸ್ಲ್ಲೆ ಸಾಂಪ್ರದಾಯಿಕ್ ಮಾಧ್ಯಮ್ ಆಜೂನ್ಯೀ ಉರ್ಲಾಂ, ಆನಿಂ ತೆಂ ಕೊಂಕ್ಣೆಕ್ ಗ್ರೇಸ್ತ್ ಕರ್ತಾ. ಕಿತ್ಯಾಕ್ ಮ್ಹಳ್ಯಾರ್ ಚಡ್ತಾವ್ ಲೋಕ್ ಭಾಸ್ ಹ್ಯಾ ಮಾರಿಫಾತ್ ವಾಚ್ತಾ. ಉಲವ್ಪಾ ಉಪ್ರಾಂತ್ ಪತ್ರಾಂಧ್ವಾರಿ ಚಡ್ ಲೋಕ್ ಕೊಂಕ್ಣೆಕ್ ವ್ಹಾಪಾರ್ತಾತ್. ಪುಣ್ ಆಧುನಿಕ್ ತಂತ್ರ್ಗಿನ್ಯಾನಾಚಾ ಬದ್ಲಾವಣೆಂತ್ ಕೊಂಕ್ಣಿ ಹ್ಯಾ ಮಾರಿಫತ್ ಲೊಕಾಕ್ ಪಾವೊಂಕ್ ಮಿನತ್ ಘೆತ್ಲ್ಯಾರ್ ಆಮಿ ಕಾಳಾಚೆ ಆನಿ ವೆಳಾಚೆ ಮನಿಸ್ ಜಾತಾಂವ್. ತ್ಯಾ ಭಾಯ್ರ್ ಆತಾಂ ವಾಡೊನ್ ಯೆಂವ್ಚಾ ಪಿಳ್ಗೆಕ್ ಹ್ಯಾ ಚಾಪಾ ಮಾಧ್ಯಮಾವರ್ವಿಂ ಮಾಹಿತಿ ತಂತ್ರಗ್ಯಾನ್ ಅಂವಡ್ತಾ. ತಶೆಂ ಮ್ಹಣ್ತಾನಾ ತಾಂತು ಕೊಂಕ್ಣಿ ಬಸ್ಲಿ ಜಾಲ್ಯಾರ್ (ತಾಂತು ವಾವ್ರ್ ಜಾಲ್ಯಾರ್) ಕೊಂಕ್ಣಿ ಚಡ್ ಜಣಾಂಕ್ ಪಾವ್ಲಿ, ಚಡ್ ಗ್ರೇಸ್ತ್ ಜಾಲಿ ಮ್ಹಣ್ ಸಮ್ಜಾವ್ಯೆತ್. ಆಮಿಂ ಸಾಂಪ್ರದಾಯಿಕ್ ಥರಾನ್ ಕೊಂಕ್ಣಿ ಮನಿಸ್ ಜಾವ್ನ್ ಉರ್ತಾಂವ್ ಜಾಲ್ಯಾರ್, ಮಾಹಿತಿ ತಂತ್ರ್ಗಿನ್ಯಾನ್ ಕೊಂಕ್ಣಿಖಾತಿರ್ ವಾಪಾರ್ತಾನಾ ಆಮಿಂ ಅರ್ವಿಲ್ಯಾ ಯಾ ಆಧುನಿಕ್ ಕಾಳಾಚೆ ಕೊಂಕ್ಣಿ ಮನಿಸ್ ಜಾವ್ನ್ ಉರ್ತಾಂವ್. ಪತ್ರಾಂತ್ ಜಾಗ್ಯಾಚಿ ಮೀತ್ ವಾ ಗಡ್ ಮ್ಹಣ್ ಆಸಾ. ಪೂಣ್ ಅಂತರ್ಜಾಳಿಂತ್ ಆಸಲ್ಯಾ ಗಡಿ ತಾವ್ನ್ ಭಾಯ್ರ್ ವಚೊನ್ ಚಡ್ ವಿಸ್ತಾರ್ ರೂಪ್ ಘೆಂವ್ಕ್ ಆವ್ಕಾಸ್ ಆಸಾ. (ಕಿತೆಂಯ್ ಪರ್ಗಟುಂಕ್ ಆವ್ಕಾಸ್ ಆಸಾ).
ಸ: ಕೊಂಕ್ಣೆಂತ್ ಉದೆವ್ನ್ ಯೆಂವ್ಚಾ ಸಾಹಿತಿಂಕ್ ಉತ್ತೇಜನ್ ಕರ್ಚಾ ದಿಶೆಂತ್ ರಾಕ್ಣೊ ತರ್ಫೆನ್ ಕಸಲಿಂ ಯೋಜನಾಂ ಆಸಾತ್?
ಜಾ: ಆಮಿಂ ಥೊಡ್ಯಾ ಥೊಡ್ಯಾ ಸಂಧರ್ಭಾಂನಿ ನವ್ಯಾ ನವ್ಯಾ ಬರವ್ಪ್ಯಾಂಕ್ ವಿಚಾರ್ತಾಂವ್. ಆನಿಂ ತಾಂಕಾಂ ಖಂಚಾ ಥರಾನ್ ಚಡ್ ಪ್ರಭಾವಿತ್ ಜಾವ್ನ್ ಬರವ್ಯೆತ್ ಮ್ಹಣ್ ವಯ್ಯಕ್ತಿಕ್ ಹಿಶಾರೆ ದಿತಾಂವ್. ದುಸ್ರೆಂ ಆಮಿಂ ಥೊಡೆ ಸಾಹಿತಿಕ್ ಸ್ಪರ್ಧೆ ಕರ್ತಾಂವ್. ವ್ಹಡಾಂಕ್ ತಶೆಂ ಭುರ್ಗ್ಯಾಂಕ್ ಆಮಿಂ ಸುರ್ವಾತ್ ಕೆಲ್ಯಾತ್. ಆಶೆಂ ಆಮಿಂ ತಾಂಕಾ ಆವ್ಕಾಸ್ ದಿತಾಂವ್. ತಾಂಚಿಂ ಬಹುಮಾನಿತ್ ಲೇಖನಾಂ ಆಮಿಂ ಫಾಯ್ಸ್ ಕರುನ್ ತಾಂಕಾ ಪ್ರೋತ್ಸಾಹ್ ದಿತಾಂವ್. ಭುರ್ಗ್ಯಾಂನಿ ವಾಚುಂಕ್ ತಾಂಕಾ ಹುಮೆದ್ ದಿಂವ್ಚಾ ಖಾತಿರ್ "ಕಾಜುಲೊ"ಚಿ ಸುರ್ವಾತ್ ಕೆಲ್ಯಾ. ತ್ಯಾ ಮಾರಿಫಾತ್ ಭುರ್ಗ್ಯಾಂಕ್ ವಾಚುಂಕ್ ಬರಂವ್ಕ್ ಉಪ್ಕಾರಾಕ್ ಪಡ್ತಾತ್. ಭುರ್ಗ್ಯಾಂಚಿಚ್ಚ್ ಸಾಹಿತ್ಯ್ಗೋಷ್ಟಿ ಆಸಾ ಕರುಂಕ್ ಯೋಜನ್ ಕೆಲಾ. ಹಿಂ ಮುಖ್ಲ್ಯಾ ವರ್ಸಾಂನಿ ಪ್ರತ್ಯೇಕ್ ಜಾವ್ನ್ ಕಾಜುಲೊ ಪರ್ಬೆ ವೆಳಾರ್ ಕರುಂಕ್ ಯೆವ್ಜಣ್ ಕೆಲ್ಯಾ.
ಸ: ಕೊಂಕ್ಣಿ ವಾಚ್ಪ್ಯಾಂಕ್ ಚಡ್ ಕರ್ನ್ ಖಾಯ್ಸ್ ಜಾಂವ್ಚೊ ಸಾಹಿತಿಕ್ ಪ್ರಕಾರ್ ಖಂಚೊ?
ಜಾ: ಹಾಂವೆ ಸಮ್ಜೊಂಚ್ಯಾ ಪ್ರಕಾರ್ ಕಥಾ ಆನಿಂ ವಿನೋದ್ ಸಾದ್ಯಾ ವಾಚ್ಪ್ಯಾಕ್ ಜೆರಾಲ್ ಥರಾನ್ ಖಾಯ್ಸ್ ಜಾತಾತ್. ಪುಣ್ ಮಾಗಿರ್ ಪ್ರಕಾರಾ ತೆಕಿದ್ ಪಂಗಡ್ ಆಸಾತ್. ಥೊಡ್ಯಾಂಕ್ ಕಥಾ ಕವಿತಾ ಚಡ್ ಅಂವಡ್ತಾ, ಪ್ರತ್ಯೇಕ್ ಜಾವ್ನ್ ಸ್ರೀಯೊ. ಆನಿಂ ದಾದ್ಲ್ಯಾ ಪಂಗ್ಡಾಕ್ ಚಡ್ಶೆ ಲೇಖನಾ, ವಿಶ್ಲೇಷಣಾ, ವಿಚಾರ್. ತಿಂ ವಾಚ್ಪಾಚ್ಯಾ ಪತ್ರಾಧ್ವಾರಿಂ ಜಾಂವ್ಕ್ ಪುರೊ ಅಂವಡ್ತಾ. ಥೊಡೊಂ ವಿಂಚ್ಣಾರ್ಸೊ ಪಂಗಡ್ ಆಸಾ. ತಾಂಕಾ ಕವಿತಾ ಅಂವಡ್ತಾ. ತಾಂತು ದಾದ್ಲೆಚ್ಚ್ ಚಡ್ ಮ್ಹಳ್ಳೊ ಅಂದಾಜ್. ಮಾಗಿರ್ ಏಕ್ ಪಂಗಡ್ ಆಸಾ ತಾಂಕಾ ಖಂಚೊಯ್ ಪ್ರಕಾರ್ ಗರ್ಜೆಚೊ ಮ್ಹಣ್ ದಿಸಾನಾಸ್ತಾ ಸುರ್ವಾತೆ ಥಾವ್ನ್ ಕಿತೆಂ ಆಸಾ, ಬರೆಂ ಆಸೊಂ ಯಾ ನಾ ಆಸೊ ತೆಂ ವಾಚುನ್ಂಚ್ಚ್ ವೆತಾತ್. ಬರಂವ್ಚೆ ಚಡ್ ದಾದ್ಲ್ಯಾಂನಿ ಆನಿ ವಾಚ್ಚೆ ಚಡ್ ಬಾಯ್ಲಾಂನಿ.
ಸ: ಹೆರ್ ಪ್ರಾಂತೀಯ್ ಭಾಸಾಂಚಾ ಸಾಹಿತ್ಯಾ ಮುಖಾರ್ ಕೊಂಕ್ಣೆಚೆಂ ತುಲನ್ ತುಮಿ ಕಶೆ ಕರ್ತಾತ್?
ಜಾ: ಪಯ್ಲೆ ಸುವಾತೆರ್ ಎಕಾ ಭಾಸೆಚೆ ಹೆರ್ ಭಾಸೆಕ್ ತುಲನ್ ಕರ್ಚಿ ಗರ್ಜ್ಚ್ಚ್ ನಾ. ಹರ್ಯೇಕ್ ಭಾಸ್ ವಿಶಿಶ್ಟ್ ಆನಿಂ ಹರ್ಯೇಕ್ ಭಾಸೆಕ್ ಅಪ್ಲೆಚ್ಚ್ ಮ್ಹಳ್ಳಿ ಗಡ್, ತಡಿ ಹೆಂ ಸರ್ವ್ ಆಸಾತ್. ಆರ್ಥಿಕ್ ಗಡ್., ವಾಚ್ಪಾಂಚಾ ಸಂಖ್ಯಾಚಿ ಗಡ್. (ಕಾದಂಬರಿ ಬರಯ್ಲ್ಯಾರ್ ಕೋಣ್ ಫಾಯ್ಸ್ ಕರ್ತಾ ಮ್ಹಳ್ಳೆ ಸವಾಲ್ ಉದೆಂವ್ಕ್ ಪುರೊ). ದುಸ್ರೆಂ ತುಲನ್ ಕರ್ಚೆಂ ತರ್ ಕೊಂಕ್ಣೆಂತ್ ಗ್ರೇಸ್ತ್ಕಾಯ್ ಆಸಾ. ಪೂಣ್ ಹೆರ್ ಭಾಸಾಂತಿತ್ಲಿ ಬಿಲ್ಕುಲ್ ನ್ಹಂಯ್. ಹೆರ್ ಭಾಸಾಂಕ್ ತುಲನ್ ಕೆಲ್ಯಾರ್ ಕೊಂಕ್ಣಿ ಮೊಸ್ತ್ ಉಣಿ, ತಶೆಂ ಜಾಲ್ಲ್ಯಾನ್ ಕೊಂಕ್ಣೆಚ್ಯಾ ವಾಡಾವಳೆಕ್ ಮಸ್ತ್ ಅವ್ಕಾಸ್ ಆಸಾ. ಆತಾಂ ಚಡ್ ಗರ್ಜೆಚೆ ಮ್ಹಳ್ಯಾರ್ ಕಥಾ ಕಾದಂಬರಿ ಚಡ್ ಆಸಾ ಪುಣ್ ವೃತ್ತಿಪರ್ ಮಾಹೆತ್, ವಿಮರ್ಶಾತ್ಮಕ್ ಮಾಹೆತ್ ಭೋವ್ ಉಣಿಂ. ಕಥಾ ಕಾದಂಬರಿ ಆನಿಂ ಕವಿತಾ ಸುಮಾರ್ಶಾ ಮಾಪಾನ್ ಆಸಾ. (ವಕೀಲ್, ದಾಕ್ತೆರ್, ಇಂಜಿನಿಯರಿಂಗ್ - ವೃತ್ತಿಪರ್ ಮಾಹೆತ್.) ಹೆರ್ ಭಾಸಾಂನಿ ಭಾಸಾಂಚ್ಯಾ ಸಾಹಿತ್ಯಾಂತ್ ವಿಸ್ತಾರಿತ್ ರುಪಾಚೊ ವಿಷಯ್ ಆಸಾ. ಆಮ್ಚಾ ಕಡೆನ್ ಬೊಯ್ಲಾಚಿ ಗಾಡಿ, ಗಾದೊ, ಮಾತಿ, ಕೊಂಕ್ಣಿ ಮನಿಸ್ಚ್ಚ್ ವಿಷಯ್ ಜಾತಾ.
ಸ: ಕೊಂಕ್ಣಿ ಬುಕಾಂಕ್ ವಾಚ್ಪಿ ಚಡಿತ್ ಖಾಯ್ಸ್ ಕರಿನಾಂತ್, ಪುಣ್ ಕೊಂಕ್ಣಿ ಪತ್ರಾಂ ಸಯ್ತ್ ಬುಕಾಚಿ ಮಟ್ವಿ ಪರಿಚಯೆ ಶಿವಾಯ್ ಚಡ್ತಿಕ್ ಚಿಂತುಂಕ್ ವಚಾನಾಂತ್ - ಕಿತ್ಯಾಕ್?
ಜಾ: ಏಕ್ ಕಾರಾಣ್ ಪತ್ರಾಂಕ್ ಪಾನಾಂಚಿ ಪರಿದಿ ಹ್ಯಾ ಗಡ್ ಆಸಾ. ಆನಿಂ ವಾಚ್ಪಿ ಕೋಣ್ ಮ್ಹಳ್ಳೆ ಕಳಿತ್ ಆಸ್ತಾ. ಕೊಂಕ್ಣಿ ಬುಕಾಂಚೆ ವಾಚ್ಪಿ, ಜೆರಾಲ್ ಅಂಕೆ ಜೆರಾಲ್ ವಾಚ್ತಾತ್. ಕೊಂಕ್ಣಿ ಪತ್ರಾಂತ್, ವಾಚ್ಪಿ ಕೋಣ್ ಮ್ಹಣ್ ಆಮಿಂ ಸಮ್ಜಾಲೆಂ ಜಾಲ್ಯಾರ್ ಆಮ್ಕಾಂ ಎಕಾಚ್ಚ್ ಪುಸ್ತಕಾವಿಶಿಂ ಸಾಹಿತಿಕ್ ಗುಂಡಾಯ್ ದೀಂವ್ಕ್ ಸಾಧ್ಯ್ನಾ. ಆನ್ಯೇಕ್ ಸಮಸ್ಸೊ ಆಜ್ಕಾಲ್ ಮೊಸ್ತು ಪುಸ್ತಕ್ ಪರ್ಗಟ್ ಜಾತಾತ್. ಪುಣ್ ಕಿತೆಂ ಬರೆಂ ಸಾಂಗ್ತಾತ್ ತೆಂ ಘೆಂವ್ಚಿ ಸಕತ್ ಬರವ್ಪ್ಯಾಕ್ ಆಸ್ತಾ, ಪುಣ್ ಕಿತೆಂ ಠೀಕಾತ್ಮಕ್ ಪ್ರತಿಕ್ರಿಯಾ ದಿಲ್ಯಾರ್ ತಿಂ ಘೆಂವ್ಚಿ ಸಕತ್ ಬರವ್ಪ್ಯಾಕ್ ನಾ ಮ್ಹಳ್ಳಿ ಭಿರಾಂತ್ ಪತ್ರಾಂಕ್ ಆಸಾ.
ಸ: ಕೊಂಕ್ಣಿ ವೆಬ್ಸಾಯ್ಟಿಂ ವಿಶಿಂ ತುಮ್ಚೆ ವಿಚಾರ್/ಅಭಿಪ್ರಾಯ್ ಕಸಲಿ? ಕೊಂಕ್ಣಿ ವೆಬ್ಸಾಯ್ಟಾಂ ಥಾವ್ನ್ ಕೊಂಕ್ಣೆಚಿ ವ್ಹಾಡಾವಳ್ ಸಾಧ್ಯ್ ಮ್ಹಣ್ ತುಮ್ಕಾಂ ಭಗ್ತಾ?
ಜಾ: ಆತಾಂಚ್ಯಾ ಕಾಳಾರ್ ಆಮಿಂ ಜಿಯೆಂವ್ಚಾಕ್ ಕೊಂಕ್ಣಿ ಅಂತರ್ಜಾಳಿ ಪಾನಾಂ ಖಂಡಿತ್ ಜಾವ್ನ್ ಗರ್ಜೆಚಿ. ಹಾಂಗಾಸರ್ ಜಾಗ್ಯಾಚಿ ಆನಿಂ ವೆಳಾಚಿ ಗಡ್ ನಾಸ್ತಾನಾ ಕೊಂಕ್ಣೆಚೆ ಮಿಸಾಂವ್ ಕರುಂಕ್ ಅವ್ಕಾಸ್ ಆಸಾ. ಆನಿಂ ಕೋಣ್ ಛಾಪ್ಲ್ಲಿ ಪತ್ರಾಂ ಹಾಡ್ನ್ ಚಡ್ ವಾಚಿನಾಂತ್, ಪೂಣ್ ಆಸಲಿ ಅಂತರ್ಜಾಳಿಚ್ಚ್ ಚಡ್ ಪರಿಚಿತ್ ಆಸಾತ್, ತಸಲ್ಯಾಂಕ್ ಕೊಂಕ್ಣಿ ಪಾವೊಂಕ್ ಹಿಂ ಅಂತರ್ಜಾಳಿ ಉಪ್ಕಾರ್ತಾತ್.
ಸ: ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್ ಕಸಲೆ?
ಜಾ: ದಾಯ್ಜ್ ಏಕ್ ಬರೆಂ ಕೊಂಕ್ಣಿ ಮಿಸಾಂವ್. ಕಿತ್ಯಾಕ್ ಮ್ಹಳ್ಯಾರ್ ತಾಂತು ಅಂತರ್ಜಾಳಿದ್ವಾರಿ ಕೊಂಕ್ಣಿ ಸಂಸರಾಕ್ ಪಾವೊಂವ್ಚೆ ಮಿಸಾಂವ್ ಆಸಾ. ಕೊಂಕ್ಣಿ ಸಾಹಿತಿಂಕ್, ಬರವ್ಪ್ಯಾಂಕ್ ಹಾಚೆ ಮುಖಾಂತ್ರ್ ಪಾಟಿಂಬೊ ದಿಂವ್ಚೆ ಮಿಸಾಂವ್ ಆಸಾ.
ಸಾಹಿತಿಕ್ ಸ್ಪರ್ಧೆ, ಸಾಹಿತಿಕ್ ಅಧ್ಯಯನಾಂ, ಸಾಹಿತಿಕ್ ಶಿಬಿರಾಂ ಆಸಲ್ಯಾ ಸಂಗ್ತಿ ಮಾರಿಫಾತ್ ಕೊಂಕ್ಣಿ ಮನ್ಶ್ಯಾಕ್ ರೂಪಿತ್ ಕರ್ಚೆಂ ಮಿಸಾಂವ್ ಆಸಾ. ದಾಯ್ಜ್ ವಾಡೊಂ ಆನಿಂ ಸಗ್ಳ್ಯಾಂನಿ ವಿಸ್ತಾರುಂ ಮ್ಹಣ್ ಹಾಂವ್ ಮಾಗ್ತಾಂ. ದಾಯ್ಜಾಚ್ಯಾ ಸರ್ವ್ ವಾವ್ರಾಡ್ಯಾಂಕ್ ತಶೆಂಚ್ಚ್ ವಲ್ಲಿಕ್ ಹಾಂವ್ ಸರ್ವ್ ಬರೆಂ ಮಾಗ್ತಾ. ದೇವ್ ಬರೆಂ ಕರುಂ.
[ರಾಕ್ಣೊ ಸಂಪಾದಕೀಯ್ ಮಂಡಳಿಸವೆಂ ಮಾ|ಬಾ|ಫ್ರಾನ್ಸಿಸ್ ಅಲಂಗಾರ್]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
