ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಸಾಹಿತಿಲಾಗಿಂ ಸಂವಾದ್
ಸಂವಾದ್ ಚಲವ್ಪಿ: ವಲ್ಲಿ ಕ್ವಾಡ್ರಸ್, ಅಜೆಕಾರ್
ಡೊಲ್ಫಿ ಕಾಸ್ಸಿಯಾ
ಸಾಹಿತಿವಿಶಿಂ ದೋನ್ ಉತ್ರಾಂ:
ಮ್ಹಜಾ ಸಾಹಿತಿಕ್ ಸುರ್ವಾತೆರ್ ಥಾವ್ನ್ ಹಾಂವ್ ಸಳಾವಳೆನ್, ಮೊಗಾನ್ ಆನಿ ಗೌರವಾನ್ ಮಾನೆಸ್ತ್ ಡೊಲ್ಫಿ ಕಾಸ್ಸಿಯಾಲಾಗಿಂ ಸಂಪರ್ಕಾರ್ ಆಸಾಂ, ತಾಚೆಥಾವ್ನ್ ಹಾಂವ್ ಜಾಯ್ತೆಂ ಶಿಕ್ಲಾಂ, ಶಿಕೊನ್ ಆಸಾಂ. ತೆಚ್ಚ್ ಪರಿಂ ತಾಣೆಂಯ್ ಮ್ಹಾಕಾ ಜಾಯ್ತೆಂ ವಾಚ್ಲಾಂ ತಶೆಂ ಸೊಸ್ಲಾಂ ಆನಿ ಆತಾಂ ಜಾಲ್ಯಾರ್ಯ್ ತೊ ಮ್ಹಾಕಾ ತೆಚ್ಚ್ಪರಿಂ ಮೊಗಾನ್, ಮಾಯ್ಪಾಸಾನ್ ವಳ್ಕತಾ ಮ್ಹಣ್ತಚ್ ತಾಚಾ ಕಾಳ್ಜಾಚೆಂ ವ್ಹಡ್ಪಣ್ ಆಮಿ ಪಳೆವ್ಯೆತ್. ಆಯ್ಲೆವಾರ್ ತಾಕಾ ಮೆಳೊನ್ ತಾಚೆಲಾಗಿಂ ಥೊಡೊ ವೇಳ್ ಖರ್ಚುನ್ ಹೆಂ ಸಂವಾದ್ ಚಲಯ್ಲೆಂ ಆನಿ ಮ್ಹಜಿಂ ಸವಾಲಾಂ ಆನಿ ತಾಚ್ಯೊ ಜಾಪಿ ಹಾಂಗಾಸರ್ ತುಮ್ಚೆಸವೆಂ ವಾಂಟುನ್ ಘೆಂವ್ಕ್ ಮ್ಹಾಕಾ ಭೋವ್ ಸಂತೊಸ್ ಭೊಗ್ತಾ.
ಮಟ್ವಿ ವಳೊಕ್:
ಡೊಲ್ಫಿ
ಕಾಸ್ಸಿಯಾಚಾ ಸಂಪೂರ್ಣ್ ಸಾಹಿತಿಕ್ ವಾವ್ರಾವಿಶಿಂ ಜಾಣಾಂ
ಜಾಂವ್ಕ್ ತಶೆಂಚ್ ತಾಚಿ ಏಕ್ ಮಟ್ವಿ ಕಾಣಿ ವಾಚುಂಕ್ ಹೆಂ
ಪಾನ್
ಜರೂರ್ ವಾಚ್.
ಸಂವಾದ್:
ಸ: ಲಗ್ಬಗ್ ತೀಸ್ ವರ್ಸಾಂಭರ್ ಕೊಂಕ್ಣಿ ಪತ್ರಿಕೋಧ್ಯಮಾಂತ್ ತುಮಿಂ ವಾವ್ರ್ ಕೆಲಾಸ್ತಾಂ ಆಜ್ - ತುಮ್ಕಾಂ ಕಿತೆಂಯ್ ಪಶ್ಚಾತಾಪ್ ಆಸಾ? ಕಿತ್ಯಾಕ್?
ಜಾ: ಮ್ಹಾಕಾ ಬಿಲ್ಕುಲ್ ಪಶ್ಚಾತಾಪ್ ನಾ.ಕಿತ್ಯಾಕ್ ಮ್ಹಳ್ಯಾರ್ ಹೆರಾಂನಿ ಹೆಂ ಕಾಮ್ ಕರಿಜಾಯ್ ಆಸ್ಲ್ಲೆಂ ಮ್ಹಣ್ ಲೆಖ್ಚಾ ಬದ್ಲಾಕ್ ಹಾವೆಂ ಹೆಂ ಕಾಮ್ ಕೆಲಾಂ ಮ್ಹಳ್ಳಿ ತೃಪ್ತಿ ಆಜ್ ಮ್ಹಾಕಾ ಮೆಳ್ಳ್ಯಾ. ಆಜ್ ಹಾಂವ್ ದುಡ್ವಾನ್ ಗ್ರೇಸ್ತ್ ನ್ಹಯ್ ಜಾಂವ್ಕ್ ಪುರೊ ಪುಣ್ ವಾಚ್ಪ್ಯಾಂನಿ/ಅಭಿಮಾನಿಂ ಮ್ಹಾಕಾ ಸಂತೊಸಾನ್ ಗ್ರೇಸ್ತ್ ಕೆಲಾ ದೆಖುನ್ ಮ್ಹಾಕಾ ಸಮಧಾನ್ ಆನಿ ತೃಪ್ತಿ ಆಸಾ.
ಸ: ತುಮ್ಕಾಂ ಎದೊಳ್ ಪರ್ಯಾಂತ್ ಕೊಂಕ್ಣೆಂತ್ ಹಾವೆಂ ಕರ್ಯೆತೆಂ ಆಸ್ಲ್ಲೆಂ ಪುಣ್ ಕರುಂಕ್ ನಾ ಮ್ಹಳ್ಳೆಂ ಭೊಗಾಪ್ ಖಂಚಾಯ್ ಸಂಗ್ತೆವಿಶಿಂ ಆಯ್ಲಾಂ?
ಜಾ: ನಾ. ಮ್ಹಜಾ ತಾಂಕಿ ಪ್ರಕಾರ್ ಮ್ಹಜ್ಯಾನ್ ಸಾಧ್ಯ್ ಜಾಂವ್ಚೆಂ ಸರ್ವ್ ಹಾವೆಂ ಕೆಲಾಂ, ಮನ್ಶಾಚಿ ಆಶಾ ಚಿಂತುಂಕ್ ಮಾತ್ರ್. ತಿ ಸಂಪೂರ್ಣ್ ಜ್ಯಾರಿ ಜಾಂವ್ಕ್ ಸಾಧ್ಯ್ ನಾ. ಏಕ್ ಆಶಾ ಜ್ಯಾರಿ ಜಾತಾನಾ ಅನ್ಯೇಕ್ ಆಶಾ ಉದೆತಾ ಮ್ಹಣ್ತಾನಾ ಕೊಣ್ಯ್ ಮನ್ಶಾಕ್ ಪರಿಪೂರ್ಣ್ ತೃಪ್ತ್ ಜಾಂವ್ನ್ ಜಿಯೆಂವ್ಕ್ ಹ್ಯಾ ಸಂಸಾರಾಂತ್ ಅಸಾಧ್ಯ್.
ಸ: ತುಮಿ ಏಕ್ ಕಾಣ್ಯೆಗಾರ್, ನಾಟಕಿಸ್ತ್, ಪತ್ರಿಕೋಧ್ಯಮಿ, ಚಿಂತ್ಪಿ, ಕವಿ.. ತುಮ್ಕಾಂ ಚಡ್ ಆಂವಡ್ಚೆಂ ಖಂಚ್ಯಾಂತ್ ಆನಿ ಕಿತ್ಯಾಕ್?
ಜಾ: ನಾಟಕ್ ಆನಿ ಪತ್ರಿಕೋಧ್ಯಮ್ ಮ್ಹಾಕಾ ಚಡ್ ಆಂವಡ್ತಾ, ಕಿತ್ಯಾಕ್ ಮ್ಹಳ್ಯಾರ್ ನಾಟಕ್ ಸರ್ವಾಂಕ್ ಆಭಿವ್ಯಕ್ತೆಧ್ವಾರಿಂ ಸಮ್ಜಾವ್ಯೆತ್, ಹಿ ಏಕ್ ಕಲಾ. ಪತ್ರಿಕೋಧ್ಯಮ್ - ಮ್ಹಜೆಥಂಯ್ ರುತಾಂ ಕೆಲ್ಲಿ ಆಸಕ್ತ್ ದೆಖುನ್ ತೆಚ್ಚ್ ಖಾತಿರ್ ಹಾಂವ್ ಭೋವ್ ಕಶ್ಟಾಂನಿ ಕಾನೂನ್ ಶಿಕ್ಲ್ಲೊಂ.
ಸ: ಕೊಂಕ್ಣೆಂತ್ ತುಮ್ಚೆಂ ವಿಶನ್ (Vission) ಕಸಲೆಂ?
ಜಾ: ಕೊಂಕ್ಣಿ ಕೆದಿಂಚ್ ಸಂಪಾನಾ/ಮೊರಾನಾ/ಆಳ್ವಾನಾ.
ಪಾಟ್ಲ್ಯಾ ಅಡ್ತೀಸ್ ವರ್ಸಾಂ ಥಾವ್ನ್ ಆಯ್ಕತಾಂ ಆನಿ ಧಾ ವರ್ಸಾಂನಿ ಕೊಂಕ್ಣಿ ಆಳ್ವೊನ್ ವೆತೆಲಿ ಮ್ಹಳ್ಳೆಂ ರುದಾನ್ ಸರ್ವ್ ಫಟಿಂ. ಭಾಸ್ ಮ್ಹನ್ಶಾಚಾ ಕಾಳ್ಜಾಚಿ ವೋಡ್. ಆತಾಂ ಕೊಂಕ್ಣೆಕ್ ನಿಜಾಯ್ಕೀ ಭಾಂಗ್ರಾಳೊ ಕಾಳ್, ಕಾರಾಣ್: ಕೊಂಕ್ಣೆಚೊ ವಾವ್ರ್ ಗಾಂವಾಂತ್ ಆನಿ ಬೊಂಬೊಂಯ್ತ್ ಮಾತ್ರ್ ನ್ಹಯ್, ವಿದೇಶಾನಿಂ ಸಯ್ತ್ ಭರಾನ್ ಚಲ್ತಾ. ಜ್ಯೆಂ ಅಜೀಕ್ ಪಂದ್ರಾ ವರ್ಸಾಧಿಂ ಆಮಿಂ ಸ್ವಪ್ಣೆಂವ್ಕ್ಚ್ ನಾತ್ಲ್ಲೆಂ.
ಸ: ಕೊಂಕ್ಣಿ ಲಿಪಿವಿಶಿಂ ತುಮ್ಚೊ ವಾದ್ ಕಸಲೊ?
ಜಾ: ಆಂಕ್ಡೆ ಪಳೆಲೆ ಜಾಲ್ಯಾರ್, ಚಡ್ ಕೊಂಕ್ಣಿ ಸಾಹಿತಿಕ್ ವಾವ್ರ್ ಆಸ್ಚೊ, ಉಲವ್ಪಿ ಆಸ್ಚೊ ಕನ್ನಡಾಂತ್ (ಲಗ್ಬ್ಭಗ್ ಪನ್ನಾಸ್ ಲಾಖ್ ಕೊಂಕ್ಣಿ ಲೊಕಾಂ ಪಯ್ಕಿ ಅಟ್ಟಾವೀಸ್ ಲಾಖ್ ಲೋಕ್ ಕನ್ನಡ ಲಿಪಿಯೆಚೊ), ದೇವ್ ನಾಗರಿ ಲಿಪಿಯೆಚೊ ಫಕತ್ತ್ ಸ ಲಾಖ್ (ಪತ್ರಾಂ ಬೊಟಾಂನಿ ಮೆಜ್ಯೆತಾ). ದೇವ್ ನಾಗರಿ ಆಸೊಂ, ಪುಣ್ ಕಾನಡಿ ಆನಿ ರೊಮಿಕ್ ಮಾನ್ಯತಾ ದೀನಾಸ್ತಾಂ ತ್ಯಾ ಲಿಪಿಂನಿನ್ ಬರಂವ್ಚಾ ಸಾಹಿತಿಂಕ್ ಅನ್ನ್ಯಾಯ್ ಕರ್ಚೊ ಸಾರ್ಕೊ ನ್ಹಯ್. ತಿನೀ ಲಿಪಿಂಕ್ ಕೇಂದ್ರ್ ಸಾಹಿತ್ಯ್ ಅಕಾಡೆಮಿನ್ ಮಾನ್ಯತಾ ದೀಜಾಯ್ ಮ್ಹಳ್ಳೊಚ್ ಮ್ಹಜೊ ವಾದ್. ಪುಣ್ ಲಿಪಿನಿಮ್ತಿಂ ಕೊಂಕ್ಣೆಕ್ ಮಾರ್ ನಾ ಪುಣ್ ಮನಾಂ ಪಾಡ್ ಜಾಂವ್ಕ್ ಪುರೊ.
ಸ: ಅಜಿಕ್ ಚಡುಣೆಂ ಪಂಚ್ವೀಸ್-ತೀಸ್ ವರ್ಸಾಧ್ಲಿ ಆನಿ ಆತಾಂಚಿ ಪರಿಗತೆಚೆಂ ತುಲನ್ ಕರ್ಚೆಂ ತರ್ ತುಮ್ಚೆ ವಿಚಾರ್ ಕಸಲೆ?
ಜಾ: ಪಯ್ಲೆಂಚೊ ವಾವ್ರ್ ಕಿತೆಂಚ್ ಸ್ವಾರ್ಥ್ ನಾಸ್ತಾಂ, ಕಿತೆಂ ತರ್ಯ್ ಕೆಲಾ, ಪುಣ್ ಆತಾಂ - ಮಾಧ್ಯಮಾಂ ಚಡ್ಲ್ಯಾಂತ್, ಆಮ್ಚೆ ಬರವ್ಪಿ ಆಧುನಿಕ್ ಸವ್ಲತಾಯಾಂ ಸವೆಂ ಸಾಧ್ಯ್ ಆಸ್ಚೆ ತಿತ್ಲೊ ವಾವ್ರ್ ಕರುನ್ ಆಸಾತ್. ಪಯ್ಲೆಂಚೊ ವಾವ್ರ್ ಮೋಗ್ ಆನಿ ತ್ಯಾಗಾಚೊ, ಪುಣ್ ಆತಾಂಚೊ ಮೋಗ್ ಆನಿ ಅಭಿಮಾನಾಚೊ.
ಸ: ಇ-ಮಾಧ್ಯಮಾಂ (ವೆಬ್ಸಾಯ್ಟಿ) ಆನಿ ಪ್ರಿಂಟ್ ಮಾಧ್ಯಮಾಂ (ಪತ್ರಾಂ) ವಿಶಿಂ ತುಮ್ಚಿ ಅಭಿಪ್ರಾಯ್ ಕಸಲಿ?
ಜಾ: ಆಮ್ಚೊ ಚಡ್ತಾವ್ ಲೋಕ್ ಸಾದೊ ದೆಖುನ್ ತಾಂಕಾಂ ಇ-ಮಾಧ್ಯಮಾಂಚಿ ಉಪಲಬ್ಧಿ ನಾ ದೆಖುನ್ ಪ್ರಿಂಟ್ ಮಾಧ್ಯಮಾಂ ಚಡಿತ್ ಲೊಕಾಂಕ್ ಸಲೀಸಾಯೆನ್ ಪಾವ್ತಾತ್. ಪುಣ್ ಇ-ಮಾಧ್ಯಮ್ ಪರ್ಗಾಂವಾಂತ್ ವ ಸಂಸಾರಾಚಾ ಖಂಚಾಯ್ ಕೊನ್ಶಾಂತ್ ಆಸ್ಚಾಂಕ್ ಪಾವ್ತಾ ಮ್ಹಳ್ಳಿ ಧಾದೊಸ್ಕಾಯ್.
ಸ: ಆಯ್ಚಾ ಕಾಳಾಚಾ ಕೊಂಕ್ಣಿ ಸಾಂಸ್ಥ್ಯಾಂವಿಶಿಂ ತುಮ್ಚಿ ಅಭಿಪ್ರಾಯ್ ಕಸಲಿ?
ಜಾ: ಸರ್ವ್ ಸಂಸ್ಥೆ ತಾಂತಾಂಚಾ ವೆಳಾಖಾಳಾ ಫರ್ಮಾಣೆ ವಾವ್ರ್ ಕರ್ತಾತ್ - ಫಕತ್ತ್ ಮೊಗಾನ್. ಆತಾಂ ತುಂ ಪಳೆ - ಇತ್ಲೊ ಕೊಂಕ್ಣಿ ವಾವ್ರ್ ಕರ್ನ್ ಆಸಾಯ್ ಫಕತ್ ಮೊಗಾನ್ ಶಿವಾಯ್ ಹೆರ್ ಕಿತೆಂಚ್ ನ್ಹಯ್.
ಸ: ತುಮ್ಚಿ ಮಹತ್ವಾಕಾಂಕ್ಷಾ ಕಸಲಿ?
ಜಾ: ಕೊಂಕ್ಣೆಚೆ ದೀಸ್ ಆತಾಂ ಪಾಡ್ ನಾಂತ್. ಹಾಂವ್ ಆಸ್ಲ್ಯಾರೀ ನಾತ್ಲ್ಯಾರೀ ಕೊಂಕ್ಣೆಚಿ ಉದರ್ಗತಿ ಜಾತೆಲಿಚ್ಚ್. ಆಧ್ಲೆ ಪಾಂಚ್ ಪಾಂಡವ್ ಆಜ್ ಆಮ್ಚೆಸವೆಂ ನಾಂತ್ ತರೀ ವಾವ್ರ್ ಮುಖಾರುನ್ ಆಯ್ಲಾ. ಆಜ್ ತೆ ಆಜ್ ಜೀವ್ ಆಸ್ತೆ ತರ್ ಹೆಂ ಪಳೆವ್ನ್ ತಾಂಕಾಂಚ್ ಅಜ್ಯಾಪ್ ಜಾತೆಂ. ಆಜ್ ಕೊಂಕ್ಣಿ ಉಲಂವ್ಕ್ ಲಜ್ ದಿಸಾನಾ ಬಗಾರ್ ಅಭಿಮಾನ್ ಭಗ್ತಾ.
ಸ: ಪುನವ್ ಪ್ರಕಾಶನಾಧ್ವಾರಿಂ ತುಮ್ಚೆಂ ಫುಡ್ಲೆಂ ಮಿಸಾಂವ್ ಕಸಲೆಂ?
ಜಾ: ಕೊಂಕ್ಣಿ ಪತ್ರಾಂನಿ ಆಯಿಲ್ಲ್ಯಾ ಬರ್ಯಾ ಕಾದಂಬರಿಂಕ್ ಬುಕಾರುಪಾರ್ ಪರ್ಗಟ್ ಕರ್ಚೆಂ ಮ್ಹಜೆಂ ಮಿಸಾಂವ್ ಜಾವ್ನಾಸಾ (’ಪಾಪ್ ಆನಿ ಶಿರಾಪ್’ ಸದ್ದ್ಯಾನ್
1700
ಪಾನಾಂಚೊ ಏಕ್ ಬೂಕ್ ಸದ್ದ್ಯಾಕ್ ತಯಾರ್ ಜಾತೆಚ್ಚ್ ಆಸಾ). ಮ್ಹಜೆಲಾಗಿಂ ಪೊಯ್ಶೆ ನಾಂತ್ ತರ್ಯೀ ಹೆಂ ಕಾಮ್ ಮ್ಹಜ್ಯಾನ್ ಕರ್ಯೆತ್ ಮ್ಹಳ್ಳೊ ಭರ್ವಸೊ ಖಂಡಿತ್ ಆಸಾ.
ಸ: ಕೊಂಕ್ಣೆಚೊ ವಾವ್ರ್ ಕರ್ನ್ ಆಮ್ಚಾಚ್ ಲೊಕಾಂ ಥಾವ್ನ್ ’ಸಸಾರ್ಗಾಯ್’ ಭೊಗ್ಲ್ಲೆಂ ಆಸಾ?
ಜಾ: ಹಹ (ಹಾಸೊನ್) - ಆಮ್ಚಾ ಲೊಕಾಚಿ ಮನೋಗತ್ ತುಂಯ್ ಜಾಣಾಂಯ್. ಪುಣ್ ಜಿಣ್ಯೆಂತ್ ಗೋಡ್ ತಶೆಂ ಕೊಡು ಅನ್ಭೋಗ್ ಧಾರಾಳ್ ಆಸ್ತಾತ್ ದೆಖುನ್ ಗೋಡ್ ಉಡಾಸಾಕ್ ದವ್ರುನ್ ಕೊಡು ವಿಸ್ರೊನ್ ಚಲ್ಚೆಂ. ಕಿತ್ಯಾಕ್ ಮ್ಹಳ್ಯಾರ್ ದೆವಾನ್ ಮನ್ಶಾಕ್ ದಿಲ್ಲಿಂ ದೋಣ್ ದೆಣಿಂ ಭೋವ್ ಮೊಲಾಚಿಂ - ಪಯ್ಲೆಂ ನೀದ್ ಆನಿ ದುಸ್ರೆಂ ವಿಸರ್ಚೆಂ.
ಸ: ದಾಯ್ಜ್ ಡಾಟ್ ಕೊಮ್ ವಿಶಿಂ ತುಮ್ಚಿ ಅಭಿಪ್ರಾಯ್?
ಜಾ: ದಾಯ್ಜಾಚಿಂ ಸುರ್ವಿಲ್ಲಿಂ ಪಾವ್ಲಾಂಚ್ ಇತ್ಲಿಂ ಭರ್ವಶ್ಯಾಚಿಂ ಮ್ಹಣ್ತಾನಾ ಶೆವೊಟಾಚೆರ್ ಮ್ಹಾಕಾ ದುಭಾವ್ ನಾ. ಹೆಂ ನಿರಂತರ್ ವ್ಹಾಳೊನ್ ವಚಾಜಯ್, ವಲ್ಲಿ ಕ್ವಾಡ್ರಸ್ ಆಸೊಂ ವಾ ನಾ ಆಸೊಂ, ಪುಣ್ ದಾಯ್ಜ್ ಅಶೆಂಚ್ ಬರ್ಯಾನ್ ಚಲೊನ್ ವಚಾಜಯ್ ಮ್ಹಳ್ಳಿ ಮ್ಹಜಿ ಅಶಾ. ಹಾವೆಂ ತುಜೆ ದಾಯ್ಜಾವಿಶ್ಯಾಂತ್ಲೆ ವಿಚಾರ್ ಪಾತ್ರಾಚೆರ್ ವಾಚ್ಲೆ, ತುಜೆಂ ವಿಜನ್
(Vission) ಭೋವ್ ಪಯ್ಸಿಲೆಂ ಮ್ಹಣ್ತಾನಾ ಕೊಂಖ್ಣೆಕ್ ಖಂಡಿತ್ಯ್ ಬರ್ಯಾಕ್ಚ್. ದಾಯ್ಜ್ ಕೊಂಕ್ಣೆಚೆಂ ಅನ್ಯೇಕ್ ವಜ್ರ್, ವಿಶಾಲ್ ಚಿಂತ್ಪಾಚೆಂ ಮಿಸಾಂವ್ ಕೊಂಕ್ಣೆಚೊ ಫುಡಾರ್ ಉಜ್ವಲ್ ಕರ್ಚೆಂ.
ಸ: ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್?
ಜಾ: ದಾಯ್ಜ್ ಸದಾಂ ಸರ್ವದಾಂ ಉರೊಂ ಆನಿ ಅಸೊಚ್ಚ್ ಕೊಂಕ್ಣಿ ವಾವ್ರ್ ಚಡೊಂ, ಹೆಚ್ ಮ್ಹಜೆ ಸಂದೇಶ್.
ಸ: ಡೊಲ್ಫಿಯಾಬ್, ಮೊಸ್ತ್ ದೇವ್ ಬರೆಂ ಕರುಂ ತುಮಿ ದಿಲ್ಲ್ಯಾ ಮೊಲಾಧಿಕ್ ವೆಳಾಕ್, ತುಮ್ಚೆಲಾಗಿಂ ಉಲವ್ನ್ ಮ್ಹಾಕಾ ಮೊಸ್ತ್ ಸಂತೊಸ್ ಭೊಗ್ಲೊ, ತುಮ್ಕಾಂ ಬರೆಂ ಮಾಗ್ತಾಂ, ಬರಿ ಭಲಾಯ್ಕಿ ಆನಿ ಸರ್ವ್ ಬರೆಂ ಮಾಗ್ತಾಂ.
ಜಾ: ದೇವ್ ಬರೆಂ ಕರುಂ ತುಕಾ ವಲ್ಲಿ ಆಮ್ಚೊ ಉಡಾಸ್ ದವ್ರುನ್ ಮೆಳೊಂಕ್ ಆಯಿಲ್ಲ್ಯಾಕ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
