ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಸಾಹಿತಿಲಾಗಿಂ ಸಂವಾದ್
ಸಂವಾದ್ ಚಲವ್ಪಿ: ಎಚ್ಚೆಮ್ ಆನಿ ಮೆಲ್ವಿನ್ ಪೆರ್ನಾಲ್
ಸಿಜ್ಯೆಸ್ ತಾಕೊಡೆ
ಸಾಹಿತಿವಿಶಿಂ ದೋನ್ ಉತ್ರಾಂ:
ಕೊಂಕ್ಣಿ ಸಾಹಿತ್ಯಾಂತ್ ಆತಾಂ ಆಸ್ಚಾ ಮಾಲ್ಘಡ್ಯಾ ಮಧ್ಲೊ ಎಕ್ಲೊ. ಪತ್ರಿಕೋಧ್ಯಮಾಂತ್ ಭರ್ಪೂರ್ ಅನ್ಭೋಗ್ ಆಸ್ಚೊ ಹೊ ಏಕ್ ಪ್ರಭುದ್ದ್ ಚಿಂತ್ಪಿ, ಕಾಣ್ಯೆಗಾರ್, ನಾಟಕಿಸ್ತ್, ಕವಿ ತರ್ಯೀ ನಾಂವಾಡ್ದಿಕ್ ಜಾಲಾ ಹಾಸ್ಯ್ ಬರವ್ಪಿ ಜಾವ್ನ್. ಬರ್ಪಾಶಿವಾಯ್ ಹೊ ಏಕ್ ಬರೊ ಉಲವ್ಪಿ, ಕಾರ್ಯೆಂ ನಿರ್ವಾಹಕ್ ತಶೆಂಚ್ ಕೊಂಕ್ಣೆಚೊ ಹುಸ್ಕೊ ಆಸ್ಚೊ ಎಕ್ಲೊ.
ಸಂವಾದ್:
ಸ: ಕೊಂಕ್ಣಿ ಸಾಹಿತ್ಯಾಂತ್ ತುಮ್ಕಾಂ ಲಾಭ್ಲ್ಲೆಂ ಸುರ್ವಿಲೆಂ ಪ್ರೇರಣ್ ಕಸಲೆಂ?
ಜಾ: ಹಾಂವ್ ಸಂಯ್ಭಾನ್ಂಚ್ ಅಂತರ್ಮುಖಿ ಜಾಲ್ಲ್ಯಾನ್ ಮ್ಹಜ್ಯಾ ಭುರ್ಗ್ಯಾಪಣಾರ್ ಥಾವ್ನ್ಂಚ್ ಬೂಕ್ ಆನಿ ಪತ್ರಾಂ ಮ್ಹಜಿಂ ಸಾಂಗಾತಿಂ. ವಾಚ್ಪಾಂಚಿ ಅಭಿರೂಚ್ ಆಸ್ಲ್ಲ್ಯಾನ್ ಹಾಂವ್ ವಾಚ್ಚಾಂತ್ಚ್ ಸಂತೊಸ್ ಭೊಗ್ತಾಲೊಂ, ಧಾದೊಸ್ಕಾಯ್ ಜೊಡ್ತಾಲೊಂ.
ಕೊಂಕ್ಣಿ ಸಾಹಿತ್ಯಾ ಥಾವ್ನ್ ಮಾತ್ರ್ ನ್ಹಂಯ್, ಕೊಂಕ್ಣಿ ಲೋಕ್, ಸಂಸ್ಕೃತಾಯ್, ರಿತಿ-ರಿವಾಜಿ, ದಸ್ತೂರ್-ಸಂಪ್ರದಾಯ್, ಪರಿಸರ್ ಆನಿ ವಾತಾವರಣಾ ಥಾವ್ನ್ ಹಾಂವೆಂ ಪಳೆವ್ನ್,, ಆಯ್ಕೊವ್ನ್ ಆನಿ ಸ್ವತಾಃ ಭೊಗುನ್ ಅಪಾರ್ ಆನ್ಭೋಗ್ ಜೊಡ್ಲ್ಲೊ ಆಸಾ. ಹೊಚ್ ಆನ್ಭೋಗ್ ಮ್ಹಾಕಾ ಮೆಳ್ಲ್ಲೆಂ ಸುರ್ವಿಲೆಂ ಪ್ರೇರಣ್.
ಸ: ದಯಾಕರುನ್ ತುಮ್ಚ್ಯಾ ಸುರ್ವಿಲ್ಯಾ ದಿಸಾವಿಶಿಂ, ಕೊಂಕ್ಣಿ ಸಾಹಿತ್ಯಾಂತ್, ಸಾಂಗ್ಶಾತ್ಗೀ..?
ಜಾ: ಹಾಂವ್ ತಾಕೊಡೆ ಸಾಂ. ಜುಜೆಚ್ಯಾ ಶಾಳೆಂತ್ ಸವ್ಯೆ ದರ್ಜೆಂತ್ ಶಿಕ್ತಾಸ್ತಾನಾ (ದೆವಾಧೀನ್) ಲುವಿಸ್ ಸೆರಾಂವ್, ಆಮ್ಚೊ ವಿಗಾರ್. ತೊ ಸಂಯ್ಭಾನ್ ಕವಿ. ಆಮ್ಕಾಂ ಭುರ್ಗ್ಯಾಂಕ್ ಕೊಂಕಣಿ, ತುಳು ಆನಿ ಕನ್ನಡ್ ಪದಾಂ ಶಿಕಯ್ತಲೊ. ತಾಕೊಡೆಂತ್ ನವಿ ಇಗರ್ಜ್ ಭಾಂದ್ಚ್ಯಾ ಸಂದರ್ಭಿಂ ತಾಣೆಂ ಲೊಕಾಂ ಥಂಯ್ ಜಾಗೃತಿ ಹಾಡ್ಚೆ ಉದೆಶಿಂ ’ತಾಕೊಡೆ ಗಾಂವಾರ್, ಸಂತೊಸಾಚಿ ಖಬಾರ್’ ಮ್ಹಳ್ಳೆಂ ಪದ್ ಘಡುನ್ ಭುರ್ಗ್ಯಾಂಕ್ ಶಿಕಯ್ಲೆಂ.
ಹ್ಯಾ ಪದಾಚ್ಯಾ ಪ್ರೇರಣಾನ್ ಹಾಂವೆಂಯ್ ಏಕ್ ಕವನ್ ಘಡುನ್ ದೆ. ಚಾ.ಫ್ರಾ. ದೆಕೋಸ್ತಾಚ್ಯಾ ’ವಿಶಾಲ್ ಕೊಂಕಣ್’ ಪತ್ರಾಕ್ ಧಾಡ್ಲೆಂ. ತೆಂ ತಾಣೆಂ ಫಾಯ್ಸ್ ಕೆಲೆಂ. ಅಶೆಂ ಮ್ಹಜೆಂ ಥಂಯ್ ಬರಂವ್ಚಿ ಉಮೆದ್ ಉಭ್ಜಾಲಿ.
ಉಪ್ರಾಂತ್ ಹಾಂವೆ ರಾಕ್ಣೊ, ಪಯ್ಣಾರಿ, ಮಿತ್ರ್, ಝೆಲೊ, ಸೆವಕ್ ಆನಿ ಹೆರ್ ಪತ್ರಾಂಕ್ ಲ್ಹಾನ್ ಲ್ಹಾನ್ ಬರ್ಪಾಂ ಧಾಡುಂಕ್ ಸುರು ಕೆಲೆಂ.
ಸ: ತುಮ್ಚ್ಯಾ ಸುರ್ವಿಲ್ಯಾ ದಿಸಾಂನಿ ಕೊಂಕ್ಣಿ ಸಾಹಿತ್ಯಾಂತ್ ತುಮ್ಕಾಂ ಕಾಂಯ್ ವಿಶೇಸ್ ಕೌತುಕ್ಭರಿತ್ ಆನ್ಭೋಗ್ ಜಾಲ್ಲೊ ಆಸಾ..?
ಜಾ: ಹಾಂವ್ ಹಾಯ್ಸ್ಕೂಲಾಚೊ ವಿದ್ಯಾರ್ಥಿ ಆಸ್ತಾಂ ಹಾವೆಂ ದೆ. ಎ. ಟಿ. ಲೋಬೊ, ದೆ. ವಿ. ಜೆ. ಪಿ. ಸಲ್ದಾಂಜ್ (ಖಡಾಪ್), ದೆ. ಜೊ. ಸಾ. ಆಲ್ವಾರಿಸ್, ದೆ. ಚಾ.ಫ್ರಾ. ದೆಕೋಸ್ತಾ, ದೆ. ಗಾಬ್ರಿಯೆಲ್ ಡಿ’ಸೋಜಾ (ಶ್ರೀ ಗಬ್ಬು) ಆನಿ ಹೆರಾಂಚ್ಯೊ ಕಾಣಿಯೊ ಆನಿ ಕಾದಂಬರಿ ವಾಚುನ್ ವಿಜ್ಮಿತ್ ಪಾವ್ಲ್ಲೊಂ. ಮಂಗ್ಳುರಿ ಕೊಂಕ್ಣೆತ್ಲ್ಯಾ ಹ್ಯಾ ’ಪಂಚಪಾಂಡವ್’ ಬರವ್ಪ್ಯಾನಿಂ ಮ್ಹಜೆರ್ ವಿವಿಧ್ ರಿತಿಂನಿ ಪ್ರಭಾವ್ ಘಾಲ್ಲೊ.
ಸ: ತುಮ್ಚ್ಯಾ ಸುರ್ವಿಲ್ಯಾ ದಿಸಾಂಚ್ಯಾ ಪತ್ರಾಂವಿಶಿಂ ಆಮ್ಕಾಂ ಸಾಂಗ್ಶಾತ್ಗೀ? ಜೆಂ ತುಮಿಂಚ್ ಬರವ್ನ್, ಪ್ರಸಾರಾರ್ ಘಾಲ್ಲೆಂ...
ಜಾ: ಹ್ಯಾಚ್ ಸಂದರ್ಭಾರ್ ತಾಕೊಡೆಚೊ ವಿಗಾರ್ ದೆ. ಲುವಿಸ್ ಸೆರಾಂವ್ ಬಾಪಾನ್ ’ತಾಕೊಡೆಚೆಂ ನೆಕೆತ್ರ್’ ಮ್ಹಳ್ಳಿ ಹಾತ್-ಪತ್ರಿಕಾ ಸುರು ಕರುನ್ ಮ್ಹಾಕಾ ಸಂಪಾದಕ್ ಕೆಲೊ. ತವಳ್ ತಾಕೊಡೆಚ್ಯಾ ಯುವಜಣಾಂಚಿಂ ಥರಾವಳ್ ಬರ್ಪಾಂ, ಕಥಾ, ಕವಿತಾ ಆನಿ ಲೇಕನಾಂ ಸಾಂಗಾತಾ ಕರ್ನ್, ತಿಂ ಘಾಳ್ನ್, ಮೊಳ್ನ್, ನಿತಳ್ ಆನಿ ಸುಡಾಳ್ ಹಾತ್-ಬರ್ಪಾನ್ ’ತಾಕೊಡೆಚೆಂ ನೆಕೆತ್ರ್’ ತಯಾರ್ ಕರ್ತಾಲೊಂ.
ಸ: ಆಮ್ಚೆ ಚಡಾವತ್ ಬರ್ಪಿ ಗಂಭೀರ್ ಕಾಣಿಯೊ ಬರಯ್ತಾತ್. ತುಮಿ ’ಹಾಸ್ಯ್ ವಿಶೇಷಜ್ನ್’. ತುಮಿ ಹಾಸ್ಯ್ ಸ್ಪೆಶಲಿಸ್ಟ್ ಜಾಂವ್ಕ್ ಕಾರಾಣಾಂ ಕಿತೆಂ?
ಜಾ:
1975 -ಂತ್ ’ಮಿತ್ರ್’ ಆನಿ ’ಝೆಲೊ’ ಸಂಪಾದಕ್ ಓಸ್ಟಿನ್ ಡಿ’ಸೋಜಾ ಪ್ರಭುನ್ ಜೆ.ಸಿ. ವೇಗಸ್ (ಸಿರಿವಂತ್) ಹಾಚೆಕಡ್ಚೆಂ ’ಕಾಣಿಕ್’ ಪತ್ರ್ ಘೆತ್ಲೆಂ. ತೊ ಪ್ರಧಾನ್ ಸಂಪಾದಕ್ ಆನಿ ಹಾಂವ್ ಸಂಪಾದಕ್. ತಾಕೊಡೆ ಥಾವ್ನ್ಂಚ್ ’ಕಾಣಿಕ್’ ಪತ್ರಾಚಿಂ ಬರ್ಪಾಂ ತಯಾರ್ ಕರುನ್ ಹಾಂವ್ ಓಸ್ಟಿನ್ ಪ್ರಭುಕ್ ಧಾಡುನ್ ದಿತಾಲೊಂ.
1977 -ಂತ್ ’ರಾಕ್ಣೊ’ ಸಂಪಾದಕ್ ಬಾಪ್ ಮಾರ್ಕ್ ವಾಲ್ಡರಾಚ್ಯಾ ಆಪವ್ಣ್ಯಾಕ್ ಪಾಳೊ ದೀವ್ನ್ ಹಾಂವ್ ರಾಕ್ಣೊ ಪತ್ರಾಚೊ ಸಹಾಯಕ್ ಸಂಪಾದಕ್ ಜಾವ್ನ್ ಕಾಮಾಕ್ ಲಾಗ್ಲೊಂ. ಮ್ಹಜಿಂ ವಿವಿಧ್ ಬರ್ಪಾಂ ವಾಚ್ಲ್ಲ್ಯಾ ಬಾ. ವಾಲ್ಡರಾನ್ ಮ್ಹಜೆ ಥೈಂ ಹಾಸ್ಯ್ಪ್ರಜ್ನಾ ಆಸಾ, ತ್ಯೆಚ್ ದಿಶೆನ್ ಮುಂದರುಂಕ್ ಸಲಹಾ ದಿಲಿ.
ತವಳ್ ಪಿ.ಡಿ. ವಾಜ್ (ಪಿಡ್ವಾಜ್), ವಿಕ್ಟರ್ ಆಲ್ವಾರಿಸ್ (ವಿಜಯ್) - ಅಸಲೆ ಹಾಸ್ಯ್ ಸೊಡ್ಲ್ಯಾರ್ ಆಮ್ಚೆ ಮಧೆಂ ಫೊಕಣಾಂ ಬರಂವ್ಚೆ ತಸಲೆ ಚಡ್ ಬರವ್ಪಿ ನಾತ್ಲ್ಲೆ. ಹೆರ್ ಕೊಣ್ಯೀ ಆಸ್ಲ್ಯಾರೀ ತೆ ’ಲಾದ್ರು-ಪೆದ್ರು’ ವಾ ’ಎಸ್ತು-ಬೊಸ್ತು’ಚ್ಯಾ ಪಾತ್ರಾ ಭಂವಾರಿಂ ವಾ ಪಾದ್ರ್ಯಾಬಾಚ್ಯಾ ಬೊಟ್ಲೆರಾವಿಶಿಂ ಬರಂವ್ಚ್ಯಾ ತಸಲೆ.
ಸ: ಕೊಂಕ್ಣೆಂತ್ಲ್ಯಾ ಮಾಲ್ಘಡ್ಯಾಂ ಬರವ್ಪ್ಯಾಂ ಸಾಂಗಾತಾ ತುಮ್ಚೊ ಸಂಪರ್ಕ್ ಬರೊ ಆಸಾ. ತುಮ್ಕಾಂ ಪ್ರೇರಣ್, ಪ್ರೋತ್ಸಾವ್ ದಿಲ್ಲ್ಯಾ ಮಾಲ್ಘಡ್ಯಾಂ ಬರವ್ಪ್ಯಾಂ ವಿಶಿಂ ಸಾಂಗ್ಶಾತ್ಗೀ?
ಜಾ: ಮ್ಹಾಕಾ ಕೊಂಕ್ಣಿಂತ್ಲ್ಯಾ ಸರ್ವ್ ಪತ್ರಾಂಚ್ಯಾ ಸರ್ವ್ ಸಂಪಾದಕಾಂನಿ ಫ್ರೋತ್ಸಾವ್ ದಿಲಾ. ಥೊಡಿಂ ನಾಂವಾಂ ಸಾಂಗ್ಚಿಂ ತರ್ - ದೆ. ಜೊ. ಸಾ. ಆಲ್ವರಿಸ್ (ಮಿತ್ರ್ ಆನಿ ಝೆಲೊ), ಮೊ. ಆಲೆಕ್ಸಾಂಡರ್ ಸೋಜ್ ಆನಿ ಬಾಪ್ ಮಾರ್ಕ್ ವಾಲ್ಡರ್ (ರಾಕ್ಣೊ), ದೆ. ಚಾ. ಫ್ರಾ. ದೆಕೋಸ್ತಾ (ವಿಶಾಲ್ ಕೊಂಕಣ್, ಉದೆವ್ ಆನಿ ಜಿವಿತ್), ದೆ. ಆಂತೊನ್ ಜುವಾಂವ್ ಸೋಜ್ (ಮರಿದಾಸ್ - ಆಮ್ಚಿ ಮಾಯ್), ದೆ. ಶ್ರೀ ಗಬ್ಬು (ಮಾಂಯ್ ಗಾಂವ್), ಪಿ. ಡಿ’ಸೋಜಾ (ಪಯ್ಣಾರಿ), ಆಂದ್ರು ಮೆಂಡೋನ್ಸಾ (ಕಾಣಿಕ್ ಆನಿ ಕಥಾಂ ಝೆಲೊ), ಕಾಪುಚಿನ್ ಫ್ರಾದ್ ಬಾಪ್ ವಿಶೆಂತ್ ಲೋಬ್ (ಸೆವಕ್), ದೆ. ಟಿ. ಎ. ಲೋಬೊ (ಜೆಜುರಾಯ್), ದೆ. ಫೆಲಿಕ್ಸ್ ಪಾವ್ಲ್ ನೊರೊಞ್ ಶಿವಾಯ್ ಕೊಂಕ್ಣಿ ಸಾಹಿತ್ಯ್ ಪ್ರಕಾಶನಾಚೊ ಸಂಪಾದಕ್- ಸಂಚಾಲಕ್ ರಾಯ್ಮಂದ್ ಮಿರಾಂದ್, ದೆ. ಸಿಪ್ರಿಯನ್ ಪಯ್, ಜೆ. ಸ. (ಸ್ವಾಮಿ ಸುಪ್ರಿಯಾ) ಆನಿ ಹೆರ್.
ಸ: ಕೊಂಕ್ಣೆತ್ಲಿ ಆಯ್ಚಿ ಜೆರಾಲ್ ಪರಿಗತ್ ಕಶಿ ಆಸಾ? ತುಮ್ಚ್ಯಾ ಕಾಳಾಕ್ ಆನಿ ಆಯ್ಚ್ಯಾ ಕಾಳಾಕ್ ತುಲನ್ ಕರ್ತಾನಾಂ ತುಮ್ಕಾಂ ಖಾಸ್ಗೆನ್ ಕಿತೆಂ ಭೊಗ್ತಾ?
ಜಾ: ಆದ್ಲ್ಯಾ ಆನಿ ಆಯ್ಚ್ಯೆ ಪರಿಗತೆಕ್ ರಾತ್-ದೀಸ್ ಫರಕ್ ಆಸಾ. ಹಾಂವೆ ಬರಂವ್ಕ್ ಧರ್ಲ್ಲ್ಯಾ ಸುರ್ವಿಲ್ಯಾ ವರ್ಸಾಂನಿ ಮಾಲ್ಘಡ್ಯಾಂ ಲೇಖಕಾಂಕ್ ಪಳೆಂವ್ಕ್, ತಾಂಕಾಂ ಮೆಳೊಂಕ್ ಆನಿ ಉಲಂವ್ಕ್ ಮ್ಹಜೆ ತಸಲೆ ಯುವಬರವ್ಪಿ ಅತ್ರೆಗ್ತಾಲೆ. ಆನಿ ಆಭಿಮಾನ್ ಪಾವ್ತೆಲೆ. ಮಾಲ್ಘಡ್ಯಾಂ ಬರವ್ಪ್ಯಾಂ ಥೈಂ, ಕವಿ ಥೈಂ ಆಮ್ಕಾಂ ವಿಶೇಸ್ ಗವ್ರವ್ ಆಸ್ತಾಲೊ. ಪೂಣ್ ಆತಾಂಚ್ಯಾ ಪರಿಗತೆವಿಶಿಂ ಉಣೆಂ ಉಲಯಿಲ್ಲೆಂ ತಿತ್ಲೆಂ ಬರೆಂ.
ಸ: ಕೊಂಕ್ಣಿ ವಾವ್ರ್ - ಜೊ ವಾವ್ರ್ ಆಜ್ ಕೊಂಕ್ಣಿ ಭಂವಾರಾಂತ್ ಚಲ್ತೇ ಆಸಾ, ತುಮ್ಕಾಂ ಹ್ಯಾ ವಿಶಿಂ ಸಂತೊಸ್ ಆಸಾ?
ಜಾ: ಖಂಡಿತ್ ಜಾವ್ನ್. ಕೊಂಕ್ಣಿ ವಾವ್ರ್ ಆಜ್ ಕರ್ನಾಟಕಾಂತ್ ಮಾತ್ರ್ ನ್ಹಂಯ್, ಗಲ್ಫ್ ರಾಷ್ಟ್ರಾಂನಿ ಶಿಂಪ್ಡೊನ್ ಆಸ್ಚ್ಯಾ ಮಂಗ್ಳುರಿ ಲೊಕಾಮಧೆಂಯ್ ಚಲೊನ್ ಆಸಾ ತೊ ಪಳೆವ್ನ್ ಸಂತೊಸ್ ಭಗ್ತಾ.
ಸ: ಕೊಂಕ್ಣೆಂತ್ ಆಜ್ ಚಲೊನ್ ಆಸ್ಚ್ಯಾ ಲಿಪಿಚ್ಯಾ ವಾದಾವಿಶಿಂ ತುಮ್ಚಿ ಆಭಿಪ್ರಾಯ್ ಕಿತೆಂ? ಹೊ ಕಚ್ಚಾಟ್ ಕೊಂಕ್ಣಿ ಭಾಸ್ಚ್ ಸತ್ತ್ಯಾನಾಸ್ ಕರ್ನ್ ಉಡಯ್ತ್?
ಜಾ: ಲಿಪಿವಾದಾಕ್ ಚಡ್ ಪ್ರಚಾರ್ ದಿಂವ್ಚೊ ನಾಕಾ. ಲಿಪಿವಾದಾ ನಿಮ್ತಿಂ ಕೊಂಕ್ಣಿ ಲೊಕಾಮಧೆಂ ದೊರೆ ಉಭಾರ್ಚೆ ನಾಕಾತ್. ಹ್ಯಾ ವರ್ವಿಂ ಕೊಂಕ್ಣಿ ಭಾಶೆಚ್ಯಾ ಉದರ್ಗತೆಕ್ ಮಾರ್ ಬಸ್ತಾ. ವಿವಿಧ್ ಲಿಪಿಯಾಂನಿ ಕೊಂಕ್ಣಿ ವಾವ್ರ್ ಚಲೊಂ. ಪುಣ್ ಕೇಂದ್ರ್ ಸಾಹಿತ್ಯ್ ಅಕಾಡೆಮಿನ್ ದೇವ್ನಾಗರಿ ಲಿಪಿಂತ್ಲ್ಯಾ ಪುಸ್ತಕಾಂಪರಿಂ ಹೆರ್ ಲಿಪಿಂಚಾ ಪುಸ್ತಕಾಂಕ್ಯೀ ಪ್ರಶಸ್ತಿ ಪುರಸ್ಕಾರ್ ದೀಂವ್ಕ್ ಜಾಯ್.
ಸ: ಭಾಯ್ಲ್ಯಾ ಗಾಂವಾಂತ್ಲೊ ಆನಿ ಮಾಂಯ್ ಗಾಂವಾಂತ್ಲೊ ಕೊಂಕ್ಣಿ ವಾವ್ರ್, ಚಟುವಟಿಕ್ಯೊ ಎಕಾಮೆಕಾಕ್ ಪೂರಕ್ ಕಾಮ್ ಕರ್ತಾತ್ ವಾ ದೊನಾಂ ಮಧೆಂ ಫರಕ್, ಅಂತರ್ ಆಸಾ?
ಜಾ: ಮಾಂಯ್ಗಾಂವಾಂತ್ಲೊ ಕೊಂಕ್ಣಿ ವಾವ್ರ್ ಗರ್ಜೆಚೊ ಮ್ಹಣ್ ಭೊಗ್ತಾ ತರ್ ಗಲ್ಫಾಂತ್ಲೊ ಕೊಂಕ್ಣಿ ವಾವ್ರ್ ಕೆನ್ನಾ ಕೆನ್ನಾಂ ಮರ್ಜೆಚೊ ಕಸೊ ದಿಸ್ತಾ.
ಸ: ಪ್ರಿಂಟ್ ಮೀಡಿಯಾ ವಾ ಇ-ಮೀಡಿಯಾ, ಕೊಂಕ್ಣೆಕ್ ಖಂಯ್ಚೆ ಬಳ್ ದೀತ್?
ಜಾ: ಚಡಾವತ್ ಕೊಂಕ್ಣಿ ಲೋಕ್ ಸಾಧೊ-ಸುಧೊ ಜಾಲ್ಲ್ಯಾನ್ ಹಾಂಗಾಸರ್ ಪ್ರಿಂಟ್-ಮೀಡಿಯಾಚೆಂ ಬಳ್ ಶಿವಾಯ್ ಇ-ಮೀಡಿಯಾಚೆಂ ಭಿಲ್ಕುಲ್ ನೈಂ. ಇ-ಮೀಡಿಯಾ ಫಕತ್ ’ಕೊಂಗ್ಲಿಷ್’ ಲೊಕಾಕ್ ಸೀಮಿತ್.
ಸ: ಕೊಂಕ್ಣಿ ಭಳ್ವಂತ್ ಕರ್ಚ್ಯಾಂತ್ ಖಂಯ್ಚೊ ’ಸ್ಪಿರಿತ್’ ದಿಸನಾಂ?
ಜಾ: ಕೊಂಕ್ಣಿ ಭಳ್ವಂತ್ ಕರ್ಚ್ಯಾಂತ್ ’ಭಾವ್ - ಭಾಂಧವ್ಪಣಾಚೊ’ ಜಾಂವ್ ’ಪರಸ್ಪರ್ ಸಮ್ಜೊಣೆಚೊ ಜಾಂವ್’, ಸೊಡ್-ದೊಡಿಚೊ ’ಸ್ಪಿರಿತ್’ ಪಳೆಂವ್ಕ್ ಮೆಳಾನಾಂ.
ಸ: ಇ-ಮೀಡಿಯಾ, ಇ-ಬೂಕ್ ಇತ್ಲ್ಯಾ ವ್ಯತಿರಿಕ್ತ್, ಕೊಂಕ್ಣಿ ವೆಬ್ಸಾಯ್ಟ್ ಥಾವ್ನ್ ಆನಿ ತಾಂಚ್ಯಾ ಕಾಮಾಂಥಾವ್ನ್ ಕೊಂಕ್ಣೆಕ್ ಕಿತೆಂಯ್ ಬರೆಂಪಣ್ ಜಾಯ್ತ್?
ಜಾ: ಕೊಂಕ್ಣಿ ವೆಬ್ಸಾಯ್ಟಿಂಥಾವ್ನ್ ಕೊಂಕ್ಣೆಚೆಂ ಬರೆಂಪಣ್ ಜಾತೆಲೆಂ ಮ್ಹಣ್ಚ್ಯಾಂತ್ ದುಬಾವ್ ನಾಂ. ಮಾಲ್ಘಡ್ಯಾ ಕೊಂಕ್ಣಿ ಲೇಖಕಾಂಚೊ ಲಿಖ್ಣೆ ವಾವ್ರ್, ಭಾಶೆತಜ್ನಾಂಚೊ ಸಂಸೊಧ್ ವಾವ್ರ್ ತಶೆಂಚ್ ಲೊಕಾವೇದ್, ಕೊಂಕ್ಣಿ ಪದಾಂ, ಸಂಗೀತ್, ಸಂಪ್ರದಾಯ್, ರಿತಿ-ರಿವಾಜಿ ಆನಿ ಸಂಸ್ಕ್ರತಾಯ್ ಫುಡ್ಲೆ ಪಿಳ್ಗೆಖಾತಿರ್ ಜೊಗಾಸಾಣೆನ್ ಸಾಂಬಾಳ್ಚೆಂ ಕಾಮ್ ಹ್ಯಾ ವೆಬ್ಸಾಯ್ಟಿಂದ್ವಾರಿಂ ಸುಲಭ್ ಜಾತೆಲೆಂ.
ಸ: ಗಲ್ಫಾಂತ್ಲೆ ಕೊಂಕ್ಣಿ ಕಾಮ್/ ವಾವ್ರ್ ತುಮಿ ಖುದ್ ಪಳೆಲಾಂ. ಪ್ರಾಮಾಕ್ಪಣಿ ಸಾಂಗ್ಶಾತ್ಗೀ, ಹಾಂತು ಕೊಂಕ್ಣೆಚೆಂ ಕಾಂಯ್ ಬರೆಂಪಣ್ ಆಸಾ ವಾ ತಾಂತಾಂಚ್ಯಾ ನಾಂವಾಕ್, ಫಾಯ್ದ್ಯಾಕ್ ಆನಿ ವಯ್ಭಾವಾಕ್ ಮಾತ್ರ್?
ಜಾ: ಗಲ್ಫಾಂತ್ ಸಭಾರ್ ಲ್ಹಾನ್-ವಡ್ ಕೊಂಕ್ಣಿ ಸಂಘಟನಾಂ ಆಸಾತ್. ಫಿರ್ಗಜೆ ಮಟ್ಟಾರ್ ಥಾವ್ನ್ ಧರ್ಲ್ಲಿಂ ವಾರಾಡ್ಯಾ ಹಂತಾಚೆ ಸಂಘ್ಯೀ ಆಸಾತ್. ಥೊಡೆ ಅಪ್ಲ್ಯಾ ಮಾಂಯ್ಗಾಂವ್ಚ್ಯಾ ದುಬ್ಳ್ಯಾ-ಧಾಕ್ಟ್ಯಾಂಚಾ ಗರ್ಜಾಂ ಪಾಸತ್ ಪ್ರಾಮಾಕ್ಪಣಿಂ ಕಾಮ್ ಕರ್ಚೆ ಆಸಾತ್. ಥೊಡ್ಯಾಂಕಡೆ ಪಯ್ಶೆ ಆಸಾತ್, ನಾಂವಾಚಿ ಇಲ್ಲಿ ಖೊರೊಜ್ ಆಸ್ತಾ. ಆನಿ ಥೊಡೆ ಕೊಂಕ್ಣೆಚ್ಯಾ ನಾಂವಾರ್ ಫಾಯ್ದೊ ಉಟಂವ್ಚೆಯೀ ಆಸಾತ್. ಪುಣ್ ಪ್ರಾಮಾಕ್ಪಣಿಂ ಕೊಂಕ್ಣಿ ವಾವ್ರ್ ಕರ್ಚೆ ಭೋವ್ ಥೊಡೆಚ್ ಪಳೆಂವ್ಕ್ ಮೆಳ್ತಾತ್.
ಸ: ಸದ್ದ್ಯಾಕ್ ಕೊಂಕ್ಣೆಂತ್ ಮಾಲ್ಘಡ್ಯಾಂ ಆನಿ ತರ್ನ್ಯಾಂ ಬರವ್ಪ್ಯಾಮಧೆಂ ಕಸಲೊ ಸಂಬಂಧ್ ಆಸಾ?
ಜಾ: ಕೊಂಕ್ಣಿಂತ್ ಮಾಲ್ಗಡ್ಯಾಂ ಆನಿ ತರ್ನ್ಯಾಂ ಬರವ್ಪ್ಯಾಂ ಮಧೆಂ ಆದಿಂ ಆಸ್ಲ್ಲೊ ತೊ ಸಂಬಂಧ್ ಆತಾಂ ದಿಸೊನ್ ಯೆನಾಂ. ಕೊಂಕ್ಣಿ ಪತ್ರಾಂಚ್ಯಾ ದಫ್ತರಾಂನಿ ಹಾಚೊ ಆನ್ಭೋಗ್ ಜಾತಾ. ಕಿತೆಂ ಮ್ಹಳ್ಯಾರ್ಯೀ ಪಯ್ಲೆಂ ಆಯಿಲ್ಲ್ಯಾ ಕಾನಾ ಪ್ರಾಸ್ ಉಪ್ರಾಂತ್ ಫುಟ್ಲ್ಲಿಂ ಶಿಂಗಾಂ ಬಳ್ ನ್ಹಂಯ್ವೇ?
ಸ: ಆಯ್ಚ್ಯಾ ಜೆರಾಲ್ ಕೊಂಕ್ಣಿ ಪರಿಗತೆವಿಶಿಂ ತುಮ್ಕಾಂ ಸಂತೊಸ್, ಸಮಧಾನ್ ಆಸಾ?
ಜಾ: ಸತ್ಚ್ ಸಾಂಗ್ಚೆಂ ತರ್ ಆಯ್ಚ್ಯಾ ಜೆರಾಲ್ ಪರಿಗತೆವಿಶಿಂ ಹಾಂವೆಂ ಸಾಂಗ್ಚೆತಿತ್ಲೊ ಸಂತೊಸ್ ಜಾಂವ್, ಸಮಧಾನ್ ಜಾಂವ್ ನಾ ಮ್ಹಾಕಾ.
ಸ: ದಾಯ್ಜ್ ಸಾಯ್ಟಾವಿಶಿಂ, ತಾಚ್ಯಾ ಪ್ರೇತನಾವಿಶಿಂ, ವಾವ್ರಾವಿಶಿಂ - ತುಮ್ಚಿ ಆಭಿಪ್ರಾಯ್ ಕಿತೆಂ?
ಜಾ: ’ದಾಯ್ಜ್’ ಜಾಳಿ ಜಾಗೊ (ವೆಬ್ಸಾಯ್ಟ್) ಏಕ್ ಉತ್ತೀಮ್ ಪ್ರೇತನ್. ಚ್ಯಾರ್-ಚವ್ಗಾಂಕ್ ಸಾಂಗಾತಾ ಹಾಡ್ಚಿ ಏಕ್ ಆಪೂರ್ವ್ ವೇದಿ. ಮಟ್ವ್ಯಾನ್ ಸಾಂಗ್ಚೆ ತರ್ ’ದಾಯ್ಜ್’ ಏಕ್ ಸಂಪೂರ್ಣ್ ಇ-ಪತ್ರ್.
ಸ: ದಾಯ್ಜ್ ಪಂಗ್ಡಾಕ್ ಆನಿ ತಾಚಾ ವಾಚ್ಪ್ಯಾಂಕ್ ತುಮ್ಚೊ ಸಂಧೇಶ್, ಸಲ್ಹಾ ಸುಚನಾಂ ಕಿತೆಂ?
ಜಾ: ಕೊಂಕ್ಣಿ ಮಿಸಾಂವಾಚಿ ಏಕ್ ಬರಿ ಸುರ್ವಾತ್. ಹಾತಾಕ್ ಹಾತ್ ದೀವ್ನ್ ಫುಡೆಂ ಸರಾ. ಸುರ್ವೆರ್ ತುಮ್ಚೊ ವಾವ್ರ್ ಗುಡ್ಯಾಕ್ ಮಾತಿ ವಾವ್ಯಿಲ್ಲ್ಯಾಪರಿಂ ದಿಸೊಂಕ್ ಪುರೊ. ಪುಣ್ ಸವ್ಕಾಸ್ ತರ್ಯೀ ಕಾಳೊಕಾಂತ್ ವಾತಿ ಪೆಟ್ಯಿಲ್ಲೊ ಸಂತೊಸ್ ತುಮ್ಕಾಂ ಲಾಭ್ತಾಲೊ. ಆನಿ ತಶೆಂಚ್ ಜಾಂವ್.
ಸ: ದೇವ್ ಬರೆಂ ಕರುಂ ತುಮ್ಕಾಂ, ತುಮಿಂ ಆಮ್ಕಾಂ ದಿಲ್ಲ್ಯಾ ಅಮೊಲಿಕ್ ವೆಳಾಖಾತಿರ್.
ಜಾ: ತುಮ್ಕಾಂಯ್ ದೇವ್ ಬರೆಂ ಕರುಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
