ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್’ -ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮಂಗ್ಳುರಾಂತ್ ’ಮೊತಿಯಾಂ ಆನಿ ತಾರಾಂ’ ಬುಕಾಚಿ ಮೊಕ್ಳೀಕ್ ಆನಿ ಅಪೂರ್ವ್ ಸನ್ಮಾನ್ ಕಾರ್ಯೆಂ
ಮಂಗ್ಳುರ್ (ಸಪ್ತೆಂಬರ್ 24): ಆಶಾವಾದಿ ಪ್ರಕಾಶನ್ ಆನಿ ಸಾಂಗಾತಿ ಮೀಡಿಯಾ ಹಾಣಿಂ ಸಾಂಗಾತಾ ಮೆಳೊನ್ ಆಶಾವಾದಿ ಪ್ರಕಾಶನಾನ್ ಆಯ್ಲೆವಾರ್ ಪರ್ಗಟ್ ಕೆಲ್ಲ್ಯಾ ಪಾಂಚ್ ಬುಕಾಂಚಿ ಮೊಕ್ಳೀಕ್ ಕಾರ್ಯೆಂ ಸಪ್ತೆಂಬರಾಚಾ 24 ತಾರಿಕೆರ್ ಸಂದೇಶ ಸಭಾಂಗ್ಣಾಂತ್ ಚಲವ್ನ್ ವೆಲೆಂ. "ಚರಿತ್ರಾ ತವಳ್ ತವಳ್ ಘಡಾನಾ, ಆನಿ ತವಳ್ ತವಳ್ ಘಡ್ಚಿ ಚರಿತ್ರಾಯ್ ಜಾಯ್ನಾ" ಅಶೆಂ ಮ್ಹಣಾಲೊ ಹ್ಯಾ ಕಾರ್ಯಾಂತ್ ಪ್ರಮುಕ್ ಉಲವ್ಪಿ ಜಾವ್ನ್ ಹಾಜರ್ ಆಸ್ಲ್ಲೊ ಕೊಂಕ್ಣೆಂತ್ಲೊ ನಾಮ್ಣೆಚೊ ಕವಿ/ಸಾಹಿತಿ ಆಂಡ್ರು ಎಲ್. ಡಿ’ಕುನ್ಹಾ.
ವೈ.ಸಿ.ಎಸ್/ವೈ.ಸಿ.ಎಮ್ ಹಾಚೊ ದಿರೊಕ್ತೊರ್ ಮಾ|ಬಾ|ರೊನಾಲ್ಡ್ ಪ್ರಕಾಶ್ ಡಿ’ಸೊಜ್ ಹಾಚಾ ಅಧ್ಯಕ್ಶ್ಪಣಾಖಾಲ್ ಚಲ್ಲ್ಲ್ಯಾ ಹ್ಯಾ ಅಪ್ರೂಪಾಯೆಚಾ ಕಾರ್ಯಾಂತ್ ಕುವೆಯ್ಟ್ ಥಾವ್ನ್ ಮಟ್ವ್ಯಾ ರಜೆರ್ ಗಾಂವಾಕ್ ಆಯಿಲ್ಲ್ಯಾ ವಲ್ಲಿ ಕ್ವಾಡ್ರಸಾನ್ ಮುಖೆಲ್ ಸಯ್ರ್ಯಾಂಕ್, ಮಾನೆಸ್ತ್ ಜೆರಿ ಕುಲ್ಶೇಕರ್, ಮಾನೆಸ್ತ್ ಎಡ್ವಿನ್ ಜೆ.ಎಫ್.ಡಿ’ಸೊಜ್, ಮಾನೆಸ್ತ್ ವಿಲ್ಫಿ ರೆಬಿಂಬಸ್, ಮಾನೆಸ್ತ್ ಎಡಿ ನೆಟ್ಟೊ, ಮಾನೆಸ್ತ್ ಎರಿಕ್ ಒಝೆರಿಯೊ ತಶೆಂಚ್ ದುಭಾಯ್ ಥಾವ್ನ್ ರಜೆರ್ ಆಯಿಲ್ಲೊ ಮಾನೆಸ್ತ್ ಆಂಡ್ರು ಎಲ್. ಡಿ’ಕುನ್ಹಾ ಹಾಂಕಾ ಫುಲಾಂಚೊ ಬುಕ್ಕೊ ದಿವುನ್ ವೆದಿಕ್ ಸ್ವಾಗತ್ ಕೆಲೊ.
(ವಿಲ್ಫಿ ರೆಬಿಂಬಸ್, ಎಡ್ವಿನ್ ಜೆ.ಎಫ್.ಡಿ’ಸೊಜ್, ಜೆರಿ ಕುಲ್ಶೇಕರ್, ಮಾ|ರೊನಾಲ್ಡ್ ಡಿ’ಸೊಜ್, ಎಡಿ ನೆಟ್ಟೊ, ಎರಿಕ್ ಒಝೆರಿಯೊ)
’ದಾಯ್ಜಿದುಭಾಯ್’ ಬರವ್ಪ್ಯಾಂಚಾ ಎಕ್ತಾರಾಚೊ ಆದ್ಲೊ ಸಂಪಾದಕ್ ಮಾನೆಸ್ತ್ ಆಂಡ್ರು ಅಪ್ಲ್ಯಾ ಉತ್ರಾಂನಿ, ಪಾಟ್ಲ್ಯಾ ಚಡುಣೆಂ ಚಾರ್ ವರ್ಸಾಂನಿ ವಲ್ಲಿ ಕ್ವಾಡ್ರಸಾಚಾ ವೆವೆಗ್ಳ್ಯಾ ಪ್ರಕಾರಾಚಾ ಕೊಂಕ್ಣಿ ವಾವ್ರಾಚೊ ಉಲ್ಲೇಕ್ ಕರೀತ್ತ್, ಕೊಂಕ್ಣೆಂತ್ ಎಕಾ ಸಂಸ್ಥ್ಯಾನ್ ಕರಿಜಾಯ್ ಆಸ್ಚಾ ವಾವ್ರಾಕ್ ಏಕ್ ವೆಕ್ತಿ ಜಾವ್ನ್, ತೇಂಯ್ ಅಪ್ಲ್ಯಾ ಕಾಮಾಚಾ ರಾಟಾವಾಳೆಮಧೆಂ ಸಯ್ತ್ ಖಳಾನಾಸ್ತಾನಾ ನಿಸ್ವಾರ್ಥಿ ರಿತಿನ್ ವಾವ್ರ್ ಕರ್ಚೆವಿಶಿಂ ಅಪ್ಲೆ ವಿಚಾರ್ ವೆಕ್ತ್ ಕರುನ್ ವಲ್ಲಿ ಕ್ವಾಡ್ರಸಾಚಾ ’ದಾಯ್ಜ್’ ಸ್ವಪ್ಣಾವಿಶಿಂ, ’ಆಶಾವಾದಿ ಪ್ರಕಾಶನ್’ ವಿಶಿಂ ಉಲಯ್ಲೊ. ಪಾಂಚ್ ಬುಕಾಂಚಿ ಪರ್ಗಟ್ಣಿ ಕೆಲ್ಲ್ಯಾ ಆಶಾವಾದಿ ಪ್ರಕಾಶನಾನ್ ಹೆಚ್ಚ್ ವರ್ಸಾ ತೀನ್ ಬೂಕ್ ಪರ್ಗಟ್ ಕೆಲ್ಲೆ, ಮ್ಹಳ್ಯಾರ್ ಪಾಟ್ಲ್ಯಾ ನೋವ್ ಮಯ್ನ್ಯಾಂನಿ ಆಟ್ ಬೂಕ್. ಜಶೆಂ ಏಕ್ ಬೂಕ್ ಪರ್ಗಟ್ಚೆಂ ಮ್ಹಳ್ಯಾರ್ ಏಕ್ ಬಾಂಳ್ತೆರ್, ತರ್ ಆಶಾವಾದಿ ಪ್ರಕಾಶನ್ ನೋವ್ ಮಯ್ನ್ಯಾಂನಿ ಆಟ್ ಪಾವ್ಟಿಂ ಬಾಳಾಂತ್ ಜಾಲಾಂ ಮ್ಹಣಾಲೊ.
ತ್ಯೇ ಉಪ್ರಾಂತ್ ’ಆಮ್ಚೊ ಯುವಕ್’ ಪತ್ರಾಚೊ ಆದ್ಲೊ ಸಂಪಾದಕ್ ಮಾನೆಸ್ತ್ ಕೆನ್ಯೂಟ್ ಕೆಲರಾಯ್ ಹಾಣೆಂ ಮೊಕ್ಳಿಕ್ ಜಾಂವ್ಚಾ; ’ಮೊತಿಯಾಂ ಆನಿ ತಾರಾಂ’, ’ವಿಂಚ್ಣಾರ್ ಚಿಂತಾಪ್ ಆನಿ ಭೊಗ್ಣಾಂ’, ’ಸತಾಂ ಆನಿ ಖತಾಂ’, ’ಸರ್ಗಾವಯ್ಲಿ ಮಾಂಯ್’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಹ್ಯಾ ಪಾಂಚ್ ಬುಕಾಂಚಿ ಮಟ್ವ್ಯಾನ್ ವಳೊಕ್ ಕರುನ್ ದಿಲಿ, ಆಶಾವಾದಿ ಪ್ರಕಾಶನಾಚಾ ಹ್ಯಾ ಪಾಂಚ್ ಬುಕಾಂಪಯ್ಕಿ ಚಾರ್ ಬುಕಾಂಚಿ ಮೊಕ್ಳೀಕ್ ಕಾರ್ಯೆಂ ಎದೊಳ್ಚ್ ದುಭಾಯಾಂತ್ ತಶೆಂಚ್ ಕುವೆಯ್ಟಾಂತ್ ಜಾಲ್ಲೆಂ.
ರೋಶನ್ ಡಿ’ಸೊಜ್, ಫೆರಾರ್ ಸನ್ಮಾನಿತ್ ಜಾಲ್ಲಿ ಘಡಿ
ಕೊಂಕ್ಣೆಂತ್ ಎದೊಳ್ ವೆವೆಗ್ಳ್ಯಾ ರಿತಿಚೆ ಬೂಕ್ ಪರ್ಗಟ್ಲ್ಯಾತ್ ತರ್ಯೀ ’ಮೊತಿಯಾಂ ಆನಿ ತಾರಾಂ’ ಏಕ್ ವಿಶಿಷ್ಟ್ ರಿತಿಚೊ ಬೂಕ್ ಜಾವ್ನಾಸಾ, ಹಾಂತುಂ ಕೊಂಕ್ಣಿ ಸಾಹಿತ್ಯಾಂತ್ ಪರ್ಜಳ್ಳೆಲ್ಯಾ; ವಿಲ್ಫಿ ರೆಬಿಂಬಸ್, ವಲ್ಲಿ ವಗ್ಗ, ಸಿಜ್ಯೆಸ್ ತಾಕೊಡೆ, ಎಮ್.ಪಿ.ರೊಡ್ರಿಗಸ್, ಆಸ್ಟಿನ್ ಪ್ರಭು - ಹ್ಯಾ ತಾರಾಂಚಿಂ ಪಾಂ-ಪಾಂಚ್ ಕವಿತಾಸವೆಂ, ಮೊತಿಯಾಂ ಜಾವ್ನ್ ಆಯ್ಲೆವಾರ್ ಪರ್ಜಳ್ಚಾ; ರೋಬರ್ಟ್ ಫೆರ್ನಾಂಡಿಸ್, ಆರ್ಥರ್ ರೋಶನ್ ಪಿರೇರಾ, ವಿನ್ಸಿ ಪಿಂಟೊ ಆಂಜೆಲೊರ್, ದಿನೇಶ್ ಕೊರೆಯಾ, ಜೊಮೆಲ್, ಮೆಲ್ವಿನ್ ವಾಸ್ ಕೆಲರಾಯ್ ಹಾಂಚಿಂ ಪಾಂ-ಪಾಂಚ್ ಕವಿತಾ ಆಸೊನ್, ಕೇಂದ್ರ್ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ತಿ ಜಿಕ್ಪಿ ಮಾನೆಸ್ತ್ ಜೆ.ಬಿ.ಮೊರಾಯಸ್ ಹಾಚಾ ಪ್ರಸ್ತಾವನಾಂತ್ ಸಜೊನ್, ವಲ್ಲಿ ಕ್ವಾಡ್ರಸಾಚಾ ಸಂಪಾದಕ್ಪಣಾಖಾಲ್ ಪರ್ಗಟೊನ್ ಆಯಿಲ್ಲೊ ಹೊ ಬೂಕ್ ಆಶಾವಾದಿ ಪ್ರಕಾಶನಾಚೊ ಭಾರಾವೊ ಬೂಕ್, ಕೊಂಕ್ಣಿ ಕವಿತಾಂಕ್ ಅಧ್ಯಯನ್ ಕರ್ತೆಲ್ಯಾಂಕ್ ಭೋವ್ ಉಪ್ಕಾರಾಕ್ ಪಡ್ಚೆತಸಲೊ ಜಾವ್ನಾಸಾ. ಹೊ ಕವಿತಾಜಮೊ ಕೊಂಕ್ಣಿ ಕವಿತಾಶೆತಾಂತ್ ನವ್ಯಾ ಕವಿಂಕ್ ಜತ್ನೆನ್ ಪೊಸ್ಚಾ ಮಾನೆಸ್ತ್ ಮೆಲ್ವಿನ್ ರೊಡ್ರಿಗಸ್ ಆನಿ ಆಂಡ್ರು ಎಲ್ ಡಿ’ಕುನ್ಹಾ ಹಾಂಕಾ ಅರ್ಪಿತ್ ಜಾಲ್ಲಿ ಹ್ಯಾ ಬುಕಾಚಿ ವಿಶೇಷತಾ.
ಬುಕಾಂಚಿ ವಳೊಕ್ ಜಾತೆಚ್ಚ್ ಮುಖೆಲ್ ಸಯ್ರ್ಯಾಂನಿ ಬುಕಾಂಚಿ ಮೊಕ್ಳೀಕ್ ಕರ್ಯೆಂ ಚಲವ್ನ್ ವೆಲೆಂ, ಮಾನೆಸ್ತ್ ಜೆರಿ ಕುಲ್ಶೇಕರಾನ್ ’ಮೊತಿಯಾಂ ಆನಿ ತಾರಾಂ’ ಬುಕಾಚಿ ಮೊಕ್ಳೀಕ್ ಕಾರ್ಯೆಂ ಚಲಯ್ಲೆಂ ತರ್, ಮಾನೆಸ್ತ್ ವಿಲ್ಫಿ ರೆಬಿಂಬಸಾನ್ ’ವಿಂಚ್ಣಾರ್ ಚಿಂತಾಪ್ ಆನಿ ಭೊಗ್ಣಾಂ’, ಮಾನೆಸ್ತ್ ಎಡ್ವಿನ್ ಜೆ. ಎಫ್. ಡಿ’ಸೊಜಾನ್ ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’, ಮಾನೆಸ್ತ್ ಎಡಿ ನೆಟ್ಟೊನ್ ’ಸರ್ಗಾವಯ್ಲಿ ಮಾಂಯ್’, ಮಾನೆಸ್ತ್ ಎರಿಕ್ ಒಝೆರಿಯೊನ್ ’ಸತಾಂ ಆನಿ ಖತಾಂ’ ಬುಕಾಚಿ ಮೊಕ್ಳೀಕ್ ಕರ್ತಚ್, ವಲ್ಲಿ ಕ್ವಾಡ್ರಸಾನ್ ಪಾಂಚ್ ಬುಕಾಂಚ್ಯೊ ಪ್ರತಿಯೊ ಮುಖೆಲ್ ಸಯ್ರ್ಯಾಂಕ್ ದಿಲ್ಯೊ.
ಉಪ್ರಾಂತ್ ಕಾರ್ಯಾಚಾ ಅಧ್ಯಕ್ಶಾನ್ ಮಾ|ಬಾ|ರೊನಾಲ್ಡ್ ಡಿ’ಸೊಜಾನ್ ಹ್ಯಾ ಬುಕಾಂತ್ ಪ್ರತ್ಯಕ್ಶ್ ಜಾವ್ನ್ ವ ಪರೋಕ್ಶ್ ರಿತಿನ್ ವಾವ್ರ್ ದಿಲ್ಲ್ಯಾಪಯ್ಕಿ ಹಾಜರ್ ಆಸ್ಲ್ಲ್ಯಾ ಮಾನೆಸ್ತಿಣ್ ಜಾನೆಟ್ ಪಿರೇರಾ, ಮಾನೆಸ್ತ್ ಮೌರಿಸ್ ಶಾಂತಿಪುರ್, ಮಾನೆಸ್ತ್ ಮಿಕ್ಮ್ಯಾಕ್ಸ್, ಮಾನೆಸ್ತ್ ವಿನ್ಸಿ ಪಿಂಟೊ ಆಂಜೆಲೊರ್, ಮಾನೆಸ್ತ್ ಜೊಮೆಲ್, ಮಾನೆಸ್ತಿಣ್ ಶಾಂತಿ ಹಾಂಕಾಂ ಬುಕಾಂಚ್ಯೊ ಪ್ರತಿಯೊ ದಿಲ್ಯೊ.
ಅಪ್ಲ್ಯಾ ಅಧ್ಯಕ್ಷೀಯ್ ಉತ್ರಾಂನಿ ಉಲವ್ನ್ ಮಾ|ರೊನಾಲ್ಡ್ ಉಲವ್ನ್ ವಲ್ಲಿ ಕ್ವಾಡ್ರಸಾಸವೆಂ ಅಪ್ಲ್ಯೊ ಬುರ್ಗ್ಯಾಪಣಾರ್ ಖರ್ಚಿಲ್ಲ್ಯಾ ಸಾಹಿತಿಕ್ ಘಡಿಯಾಂಚೊ, ವಾವ್ರಾಚೊ ಉಡಾಸ್ ಕಾಡುನ್ ವಲ್ಲಿ ಕ್ವಾಡ್ರಸಾಚಾ ಮುಖೇಲ್ಪಣಾವಿಶ್ಯಾಂತ್, ತಶೆಂಚ್ ಕಸಲ್ಯಾಯ್ ಸಂಕಶ್ಟಾಂಕ್ ಫುಡ್ ಕರ್ಚಾ ಶ್ಯಾಥಿಯೆವಿಶ್ಯಾಂತ್ ಉಲಯ್ಲೊ. ಕೊಂಕ್ಣಿ ವಾವ್ರಾಕ್ ಅಸಲೆಚ್ ಗರ್ಜ್ ಆಸೊನ್ ಕೊಂಕ್ಣಿ ಪರಿಗತೆಕ್ ನವೆಂ ತ್ರಾಣ್ ಲಾಭೊಂದಿ ಮ್ಹಣಾಲೊ.
ತ್ಯೇ ಉಪ್ರಾಂತ್ ಚಲ್ಲ್ಲ್ಯಾ ಸನ್ಮಾನ್ ಕಾರ್ಯಾಂತ್, ಮಾನೆಸ್ತ್ ಜೊಮೆಲ್ ಹಾಣೆಂ ಮ್ಯಾಂಗಲೋರಿಯನ್ ಡಾಟ್ ಕೊಮ್ ಹಾಚಾ ರೋಶನ್ ಡಿ’ಸೊಜಾಚಿ ವಳೊಕ್ ಕರುನ್ ದಿತೆಚ್ಚ್, ರೋಶನ್ ಡಿ’ಸೋಜ್ ಹಾಣೆ ಸಮಾಜೆಕ್ ದಿಂವ್ಚಾ/ದಿಲ್ಲ್ಯಾ ದೇಣ್ಗೆಖಾತಿರ್ ’ಆಶಾವಾದಿ ಪ್ರಕಾಶನ್’ ತರ್ಫೆನ್ ಮಾ|ರೊನಾಲ್ಡ್ ಡಿ’ಸೊಜಾನ್ ಶಾಲ್ ಪಾಂಗ್ರುನ್, ಫುಲಾಂ-ಫಳಾಂ ದಿವುನ್ ಮಾನ್ ಕೆಲೊ.
ಅಪ್ಲ್ಯಾ ಉತ್ರಾಂನಿ ಮಾನೆಸ್ತ್ ರೋಶನ್ ಡಿ’ಸೊಜ್ ಫೆರಾರಾನ್ ಅಪುಣ್ ಸರ್ವಾಂಚಾಕೀ ಪಯ್ಸ್ ಆಸ್ಚೊ ವೆಕ್ತಿ ಮ್ಹಣ್ ಚಿಂತುನ್ ಆಸ್ಲ್ಲೊಂ ಪುಣ್ ಕೊಂಕ್ಣಿ ಲೊಕಾಂನಿ ಮ್ಹಾಕಾ ತಾಂಚಾ ಕಾಳ್ಜಾಂತ್ ದವರ್ಲ್ಲೆಂ ಪಳೆತಾನಾ ಹಾವೆಂ ಕಾಡ್ಲ್ಲಿ ವಾಂವ್ಟ್/ಮಿನತ್ ಸಾರ್ಥಕ್ ಜಾಲ್ಲೆಪರಿಂ ಮ್ಹಣ್ ಸಾಂಗೊನ್ ಆಜ್ ಮ್ಯಾಂಗಲೋರಿಯನ್ ಡಾಟ್ ಕಾಮ್ ಸಾಯ್ಟ್ ಉಂಚ್ಲ್ಯಾ ವರ್ಗಾಚಾ ಸಾಯ್ಟಾಂಪಯ್ಕಿ ಏಕ್ ಜಾವ್ನಾಸಾ ತರ್ ತಾಕಾ ಕೊಂಕ್ಣಿ ಪರ್ಜಾಚ್ಚ್ ಕಾರಾಣ್ ಮ್ಹಣಾಲೊ.
ಉಪ್ರಾಂತ್ ಆಪ್ಲ್ಯಾ ಉಲವ್ಣ್ಯಾಂತ್ ವಲ್ಲಿ ಕ್ವಾಡ್ರಸಾನ್ ಅಪ್ಲ್ಯಾ ಭಗ್ಣಾಂಕ್ ಉಚಾರಿತ್ತ್, ಕೊಂಕ್ಣೆಚಾ ಆಯ್ಚಾ ಪರಿಗತೆವಿಶಿಂ ಉಲವ್ನ್ ಅಪ್ಲ್ಯಾ ಸಾಹಿತಿಕ್ ವಾವ್ರಾಕ್ ಉತ್ತೇಜನ್ ದಿಲ್ಲ್ಯಾ/ದಿಂವ್ಚಾ ವೆಕ್ತಿಂಚೊ ಉಡಾಸ್ ಕಾಡುನ್ ಅರ್ಗಾಂ ಪಾಠಯ್ಲಾಗ್ಲೊ.
ಮಿತ್ರ್ ಪತ್ರಾಚೊ ಸಂಪಾದಕ್ ಮಾನೆಸ್ತ್ ಎಲ್ಯೆರ್ ಹಾಣೆಂ ಉಪ್ಕಾರ್ ಆಟವ್ಣೆಚೆಂ ಕಾರ್ಯೆಂ ಚಲವ್ನ್ ವೆಲೆಂ ತರ್ ಹ್ಯಾ ಅಪುರ್ಭಾಯೆಚಾ ಕಾರ್ಯಾಚೆಂ ಸುತಾರ್ಪಣ್ ಮಾನೆಸ್ತ್ ವಿತೊರಿ ಕಾರ್ಕೊಳ್ ಹಾಣೆಂ ಕೆಲೆಂ.
ಹ್ಯಾ ಕಾರ್ಯಾಕ್ ಕೊಂಕ್ಣೆಚೆ ನಾಂವಾಡ್ದಿಕ್/ನವೆ ಸಾಹಿತಿ ಮೆಳೊನ್ ಚಡುಣೆಂ ಸಾಠ್ ಜಣ್ ಹಾಜರ್ ಆಸ್ಲ್ಲೆ.
ಕುವೆಯ್ಟಾಂತ್ ಪಾಂಚ್ ಬುಕಾಂಚಿ ಮೊಕ್ಳೀಕ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed, hosted and maintained by Ashawadi Publications