ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[2006 ಇಸ್ವೆಚಾ ಸಪ್ತೆಂಬರ್ 23 ತಾರಿಕೆರ್ ಅಪ್ಲೊ 41ವೊ ಜಲ್ಮಾದಿವಸ್ ಆಚರಣ್ ಕರ್ಚಾ ಆಂಡ್ರು ತುಕಾ ಹೆಂ ಅಂಕಣ್ ಅರ್ಪಣ್]
ಸತಾಂ ಆನಿ ಖತಾಂ - 4. ಶಿಕ್ಪಿ ಆನಿ ಅಶಿಕ್ಪಿ
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಏಕ್ ಪಾವ್ಟಿಂ ಎಕಾ ಕೊಲೆಜಿಂತ್ಲಿಂ ಥೊಡಿಂ ಗ್ರಾಜುಯೆಟ್ ವಿಧ್ಯಾರ್ಥಿಂ ಎಕಾ ಹಳ್ಳೆಚಿ ಸಮೀಕ್ಶಾ ಕರುಂಕ್ ಲಾಗ್ಲಿಂ.
ಹಳ್ಳೆಕ್ ವಚೊನ್ ತಾಂಚಾ ಜಿವಿತಾಚಿ, ತಾಂಚಾ ಚಿಂತ್ಪಾಂಚಿ, ತಾಂಕಾ ಶಿಕ್ಪಾಚೆಂ ಮಹತ್ವ್ ಸಮ್ಜಾಂವ್ಚಾ ಇರಾದ್ಯಾನ್ ಹೊ ವಿಧ್ಯಾರ್ಥಿಂ ಜಮೊ ಹಳ್ಳೆಕ್ ವಚೊನ್ ಪಾವ್ಲೊ. ಸರ್ವ್ ಚಲೆ ಪ್ಯಾಂಟ್-ಶರ್ಟ್ ಆನಿಂ ಗಳ್ಯಾಕ್ ಟಾಯ್ ಘಾಲ್ನ್ ಆಯಿಲ್ಲೆ ಚೆಡ್ವಾಂ ಸೊಭಿತ್ ಕಾಪ್ಡಾಂ ನೆಸೊನ್ ಆಯಿಲ್ಲಿಂ.
ಹಳ್ಳೆಂತ್ ಘರಾಂ ಪಯ್ಸ್ ಪಯ್ಸ್ ಆಸ್ಲ್ಲಿಂ ಆನಿ ಸಾರ್ಕೊ ರಸ್ತೊ ನಾತ್ಲ್ಲೊ ದೆಖುನ್ ತಿಂ ಚಲೊನ್೦ಚ್ ಗೆಲಿಂ ಆನಿಂ ವೆತಾಸ್ತಾಂ ಎಕಾ ಸುವಾತೆರ್ ತಿಂ ರಾವ್ಲಿಂ. ಥಂಯ್ಚರ್ ಏಕ್ ಗಾಣೊ ಆಸ್ಲ್ಲೊ ಆನಿಂ ತಾ ಗಾಣ್ಯಾ ಭಂವಾರಿಂ ದೋನ್ ಪಾಡೆ ಸುತ್ತುರ್ ಘಾಲ್ತಾಲೆ. ಪುಣ್ ಅಜ್ಯಾಪ್ ಇತ್ಲೆಂಚ್ಚ್ಗೀ ತ್ಯಾ ಪಾಡ್ಯಾಂಕ್ ಧಾರಾಂವ್ಕ್ ಪಾಟ್ಲ್ಯಾನ್ ಕೊಣ್ಯೀ ನಾತ್ಲ್ಲೊ.
ಹೆಂ ಕಿತೆಂ ನವಾಲ್ಗಾಯ್ ಮ್ಹಣೊನ್ ಹಿಂ ವಿಧ್ಯಾರ್ಥಿ ಪಂಗಡ್ ಅಜ್ಯಾಪಾಯೆನ್ ಗಾಣ್ಯಾಲಾಗಿಂ ಆಯ್ಲಿಂ ಆನಿಂ ತಾಂಕಾ ಆತಾಂ ಸ್ವಷ್ಟ್ ದಿಸ್ಲೆ ಪಾಡೆ ಆನಿಂ ಕಿಣ್ಕುಳ್ಯಾಂಚೊ ಆವಾಜ್ ಕಾನಾಂಕ್ ಆಯ್ಕತಾಲೊ. ಹ್ಯಾ ವಿಧ್ಯಾರ್ಥಿಂ ಜಮ್ಯಾಕ್ ಪಳೆಲ್ಲೆ ಹೆ ಪಾಡೆ ಭಿಂಯೆಲೆ ಆನಿಂ ಗಾಣ್ಯಾಚಾ ಅನ್ಯೇಕಾ ಪೊಂತಾರ್ ವಚೊನ್ ರಾವ್ಲೆ.
ಇಲ್ಲ್ಯಾ ವೆಳಾನ್ ಏಕ್ ಭಾರೀಕ್, ಕಾಳೊಚ್ಚ್ ಪ್ರಾಯೆಸ್ತ್ ಮಾತಾರೊ ಭಾಯ್ರ್ ಆಯ್ಲೊ. ಪೆಂಕ್ಟಾರ್ ತಾಚಾ ಏಕ್ ತುವಾಲೊ ಮಾತ್ರ್ ಆಸ್ಲಲೊ ಶಿವಾಯ್ ಹೆರ್ ಸಗ್ಳೆಂ ಆಂಗ್ ತಾಚೆಂ ಉಗ್ತೆಂ ಆಸ್ಲ್ಲೆಂ.
"ಹೆ ಪಾಡೆ ತುಜೆಗೀ?" ತಾಣಿಂ ಮಾತ್ಯಾರ್ಯಾಕ್ ಸವಾಲ್ ಕೆಲೆಂ.
"ವ್ಹಯ್, ಕಿತೆಂ ಜಾಲೆಂ?" ಮಾತ್ಯಾರ್ಯಾನ್ ಸವಾಲಾಂತ್ ಜಾಪ್ ದಿಲಿ.
"ಹೆ ಪಾಡೆ ಕಶೆಂ ಆಪ್ಲೇಸ್ತಕಿಂ ಘುಂವ್ತಾತ್? ಹಾಂಚಾ ಪಾಟ್ಲ್ಯಾನ್ ಕೊಣ್ಯೀ ಮನಿಸ್ ನಾಸ್ತಾಂ ಸಯ್ತ್?" ವಿಧ್ಯಾರ್ಥಿಂನಿ ಪರತ್ ಸವಾಲ್ ಕೆಲೆಂ.
"ಹೋ! ತೆಂ ಭೊವ್ ಸಂಪೆಂ. ಹಾಂವೆಂ ಮ್ಹಜಾ ಪಾಡ್ಯಾಂಚಾ ಗಳ್ಯಾಂಕ್ ಏಕ್ ಕಿಣ್ಕಿಲೊ ಬಾಂದ್ಲಾ ಆನಿಂ ತೆ ಪಾಡೆ ಗಾಣ್ಯಾಕ್ ಸುತ್ತುರ್ ಘಾಲ್ತಾನಾ ತ್ಯಾ ಕಿಣ್ಕಿಲ್ಯಾಂತ್ಲೊ ಆವಾಜ್ ಜಾವ್ನ್ ಆಸ್ತಾ ಆನಿಂ ತಶೆಂ ಭಿತರ್ ಕಾಮ್ ಕರ್ಚಾ ಮ್ಹಾಕಾ ಕಳ್ತಾ" ಮಾತಾರ್ಯಾನ್ ಜಾಪ್ ದಿಲಿ.
ವಿಧ್ಯಾರ್ಥಿಂ ಪಯ್ಕಿ ಎಕ್ಲೊ ಬುದ್ದು-ವಂತ್ ಬರ್ಗೊ ಸವಾಲ್ ಕರಿಲಾಗ್ಲೊ; "ಜರ್ತರ್ ತೆ ಪಾಡೆ ವಗೊಚ್ಚ್ ರಾವೊನ್ ತಾಂಚಿ ಗೊಮ್ಟಿ ಹಾಲವ್ನ್ ಆವಾಜ್ ಕರ್ತಿತ್ ತರ್ ತೆಂ ತುಕಾ ಕಶೆಂ ಕಳ್ತಾ?"
ಮಾತಾರೊ ಏಕ್ ಘಡಿ ತ್ಯಾ ವಿಧ್ಯಾರ್ಥಿಂಕ್ ಪಳೆವ್ನ್ ಹಳೂ ಜಾಪ್ ದೀಲಾಗ್ಲೊ; "ತಶೆಂ ಕರುಂಕ್ ಮ್ಹಜೆ ಪಾಡೆ ತುಮ್ಚೆಪರಿಂ ಗ್ರಾಜುಯೆಟ್ ನ್ಹಂಯ್"
ಸಂದೇಶ್: ಸಮ್ಜೊಣಿ, ಜಾಣ್ವಾಯ್ ಆನಿಂ ಚಲಾಕೀ ಹೆ ಸರ್ವ್ ಫಕತ್ತ್ ಸಭ್ದ್ ಮಾತ್ರ್ ನ್ಹಂಯ್. ಮ್ಹನ್ಶಾಕ್ ಹಾಂತ್ಲೆಂ ಖಂಯ್ಚೆಂಯ್ ಜೊಡುಂಕ್ ಶಿಕ್ಪಾಚಿ ಗರ್ಜ್ ತರೀ ಶಿಕಾಪ್ ನಾತ್ಲಲ್ಯಾಂಕ್ ಸಮ್ಜೊಣಿ/ಜಾಣ್ವಾಯ್/ಚಾಲಾಕಿ ನಾ ಮ್ಹಣೊನ್ ಕಾಂಯ್ ನಾ. ಸಾದ್ಯಾ ಮ್ಹನ್ಶಾಂಚಾ ಮತಿಂತ್ ಶಿಕ್ಪ್ಯಾಂವಿಶಿಂ ಕಿತ್ಲೊ ಬರೊ ಅಭಿಪ್ರಾಯ್ ಆಸ್ಲ್ಯಾರೀ ತಾಂಚೆ ವಯ್ರ್ ಇಲ್ಲೊ ದುಭಾವ್ ಜರೂರ್ ಆಸ್ತಾ. ಮ್ಹನ್ಶ್ಯಾನ್ ಜಾಣ್ವಾಯ್ ಸಮ್ಜೊಣೆಂತ್ ಜೊಡ್ಯೆತ್ ಆನಿಂ ಸಮ್ಜೊಣಿ ಯೇಂವ್ಕ್ ಜಿಣ್ಯೆ ಅನ್ಭೋಗ್ ಆನಿ ಚಿಂತ್ಪಾಚಿ ಗರ್ಜ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
