ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[2006 ಇಸ್ವೆಚಾ ಸಪ್ತೆಂಬರ್ 23 ತಾರಿಕೆರ್ ಅಪ್ಲೊ 41ವೊ ಜಲ್ಮಾದಿವಸ್ ಆಚರಣ್ ಕರ್ಚಾ ಆಂಡ್ರು ತುಕಾ ಹೆಂ ಅಂಕಣ್ ಅರ್ಪಣ್]
ಸತಾಂ ಆನಿ ಖತಾಂ - 19. ಜಯ್ತಾಚೆಂ ಸೂತ್ರ್
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಎಕಾ ಗಾಂವಾಂತ್ ಏಕ್ ಪಾವ್ಟಿಂ ಮಾಣ್ಕ್ಯಾಂಕ್ ಏಕ್ ಸ್ಪರ್ಧೊ ಆಸಾ ಕೆಲ್ಲೊ.
ಎಕಾ ಮಯ್ದಾನಾರ್ ಆಸ್ಚಾ ವ್ಹಡ್ಲ್ಯಾ ಖಾಂಬ್ಯಾಕ್ ಚಡ್ಚೊ ಸ್ಪರ್ಧೊ ತೊ ಜಾವ್ನಾಸ್ಲ್ಲೊ.
ಆನಿಂ ಹೊ ಸ್ಪರ್ಧೊ ಪಳೆಂವ್ಕ್ ಆನಿಂ ಹ್ಯಾ ಮಾಣ್ಕ್ಯಾಂಕ್ ಉಲ್ಲಾಸುಂಕ್ ಸಭಾರ್ ಲೋಕ್ ಜಮೊ ಆಸ್ಲ್ಲೊ.
ಅಶೆಂ ಹೊ ಸ್ಪರ್ಧೊ ಸುರು ಜಾಲೊ. ಲಗ್ಬಗ್ ಸಾಟ್ ಸತ್ತರ್ ಮಾಣ್ಕೆ ಎಕಾಚ್ಫರಾಂ ಎಕೇಕ್ ಕೊನ್ಶಾಥಾವುನ್ ಧಾಂವೊನ್ ಯೇವ್ನ್ ಖಾಂಬೊ ಚಡೊಂಕ್ ಲಾಗ್ಲೆ.
ಜಮೊ ಆಸ್ಚಾ ಲೊಕಾಂಕ್ ಮಾಣ್ಕ್ಯಾಂನಿ ಖಾಂಬೆ ಚಡ್ಚೆಂ ತೆಂ ಖಂಡಿತೀ ಅಸಾಧ್ಯ್ ಮ್ಹಳ್ಳೆಂ ಸಮ್ಜಾಲ್ಲೆಂ ಆನಿಂ ತಾಣಿಂ ಬೊಬೊ ಘಾಲುಂಕ್ ಸುರು ಕೆಲೆಂ "ತುಮ್ಚಾನ್ ತೆಂ ಅಸಾಧ್ಯ್!!!"
ಲೊಕಾಂಚೊ ಬೊಬೊ ಆಯ್ಕೊನ್ ಎಕೆಕ್ಚ್ ಮಾಣ್ಕೆ ಚಡ್ಲ್ಲಿಂ ಮೆಟಾಂ ದೆಂವೊಂಕ್ ಲಾಗ್ಲೆ.
ಲೊಕಾಂನಿಂ ಪರತ್ ಬೊಬೊ ಘಾಲ್ಯೊ "ತುಮ್ಚಾನ್ ತೆಂ ಅಸಾಧ್ಯ್! ಬೆಶ್ಟೆಂಚ್ ಖಾಂಬೆ ಚಡೊಂಕ್ ವಚೊನ್ ಪಡೊನ್ ಪೆಂಕಾಟ್ ಮೋಡ್ನ್ ಘೆನಾಕಾತ್"
ಅಶೆಂ ಆಸ್ಚಾ ಚಡಾವತ್ ಸಕ್ಕಡ್ ಮಾಣ್ಕ್ಯಾಂನಿ ಸಲ್ವಣಿ ಸ್ವೀಕಾರ್ ಕೆಲಿ. ತಾಂತ್ಲೊ ಏಕ್ ಮಾಣ್ಕೊ ಮಾತ್ರ್ ಚಡೊನ್ಂಚ್ ವೆತಾಲೊ.
ಆನಿಂ ಹಾಕಾ ಪಿಶೆಂ ಲಾಗ್ಲಾಂ ಮ್ಹಣೊನ್ ಹೆರ್ ಮಾಣ್ಕೆ ಚಿಂತಾಸ್ತಾನಾ ತೊ ಎಕ್ಸುರೊ ಮಾಣ್ಕೊ ತೊ ಖಾಂಬೊ ಚಡೊನ್ ಜಾಲ್ಲೊ.
ಅಶೆಂ ತ್ಯಾ ಮಾಣ್ಕ್ಯಾಕ್ ಅಭಿನಂದನ್ ಪಾಟಂವ್ಕ್ ಗೆಲ್ಲ್ಯಾ ಹೆರಾಂಕ್ ಕಳ್ಳೆಂಗೀ ತೊ ಮಾಣ್ಕೊ ಕಾನ್ ಆಯ್ಕಾನಾತ್ಲ್ಲೊ ಕೆಪ್ಪೊ ಮ್ಹಳ್ಳೆಂ.
ಸಂದೇಶ್: ಆಮ್ಚಾ ಜಿಣ್ಯೆಂತ್ ಹೆಂ ಖಂಡಿತ್ ಜಾವ್ನ್ ವಾಸ್ತವ್ ನ್ಹಯ್ಗೀ? ಕಾಳೊಕಾಕ್ ದುರ್ಸತೆಲಿಂ ಆಮ್ಚಾ ಸಮಾಜೆಂತ್ ಕಾಂಯ್ ಉಣಿಂಗೀ? ಪುಣ್ ತಾಂಚೆಮಧೆಂ ಕೊಣೀಂ ಎಕ್ಲಿಂ ದೊಗಾಂ ವಾತ್ ಪೆಟಂವ್ಕ್ ಮುಖಾರ್ ಯೆತಿತ್ ತರ್ ತಾಂಕಾ ಖೋಡಿಕುಲ್ಪಾಂ ಕಾಡುನ್, ತಾಂಕಾ ಖೆಂಡುನ್ ಬೆಂಡುನ್, ತಾಂಚೊ ಖೆಬ್ಡಾಯೊ ಕರ್ತೆಲಿಂ ಉಣಿಂಗೀ?
ದೆಖುನ್ಂಚ್ ಎಕ್ಲೊ ತತ್ವ್ಶಾಸ್ತ್ರಿ ಮ್ಹಣ್ತಾ "ಆಮ್ಚಾ ಜಿಣ್ಯೆಂತ್ ಬರೆಂ ಸಾಧನ್ ಕರುಂಕ್ ಮುಖಾರ್ ಯೆತಾನಾ ಅಸಲೆಂ ಖೆಂಡ್ತೆಲ್ಯಾಂಕ್ ಆಯ್ಕೊನ್ ಕೆಪ್ಪೆ ಜಾಯ್ಜಯ್, ತವಳ್ ಮಾತ್ರ್ ಜಿಣ್ಯೆಂತ್ ಜಯ್ತ್ ಆಪ್ಣಾಂವ್ಕ್ ಸಾಧ್ಯ್".
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
