ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[2006 ಇಸ್ವೆಚಾ ಸಪ್ತೆಂಬರ್ 23 ತಾರಿಕೆರ್ ಅಪ್ಲೊ 41ವೊ ಜಲ್ಮಾದಿವಸ್ ಆಚರಣ್ ಕರ್ಚಾ ಆಂಡ್ರು ತುಕಾ ಹೆಂ ಅಂಕಣ್ ಅರ್ಪಣ್]
ಸತಾಂ ಆನಿ ಖತಾಂ - 15. ರಾಯ್
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಕೆದಾಚಾ ಎಕಾ ಫ಼ೊಂಡಾಂತ್ ಏಕ್ ಪಾವ್ಟಿಂ ಥೊಡೆ ಮಾಣ್ಕೆ ಸುಖಾನ್ ಜಿಯೆವ್ನ್ ಆಸ್ಲ್ಲೆ. ತಾಂಕಾ ಜಾಯ್ ತಶೆಂ ಹಾಸೊನ್, ನಾಸೊನ್ ಆನಿ ಖೆಳೊನ್ ಆಸ್ಲ್ಲೆ. ಹಾಂತ್ಲ್ಯಾ ಥೊಡ್ಯಾ ಮಾಣ್ಕ್ಯಾನಿಂ ಚಿಂತುಂಕ್ ಸುರು ಕೆಲೆಂ ಆಮ್ಕಾಂಯ್ ಜರ್ ಏಕ್ ರಾಯ್ ಆಸ್ಲ್ಲೊ ತರ್ ಕಿತ್ಲೆಂ ಬರೆಂ ಆಸ್ತೆಂ? ಆಮ್ಚೆ ಮಧೆಂ ಕಿತೆಂಯ್ ಫ಼ಿರ್ಯಾದ್ ಆಸ್ಲ್ಯಾರ್ ತಾಚೆಲಾಗಿಂ ಗೆಲ್ಯಾರ್ ಆಮ್ಕಾಂ ತೊ ನ್ಯಾಯ್ ದಿತೊ ಆನಿ ಆಮ್ಕಾಂ ಕಿತೆಂಯ್ ಭಿರಾಂತ್ ಆಸ್ತಿನಾ ಮ್ಹಣೊನ್ ಚಿಂತುನ್ ತೆ ಸರ್ವ್ ಮಾಣ್ಕೆ ಮೆಳೊನ್ ತಾಂಚಾ ದೆವಾಲಾಗಿಂ ಮಾಗಾಲಾಗ್ಲೆ; ’ದೆವಾ ಆಮ್ಕಾಂಯ್ ಏಕ್ ರಾಯ್ ಧಾಡ್ ಆನಿ ತೊ ಆಮ್ಚೆರ್ ರಾಜ್ವಟ್ಕಿ ಚಲಂವ್ದಿ ಆನಿ ಆಮ್ಚೆಂಯ್ ಜಿವಿತ್ ವ್ಯವಸ್ತಿತ್ ಜಾಂವ್ದಿ’.
ತಾಂಚೆಂ ಮಾಗ್ಣೆಂ ಆಯ್ಕಲ್ಲ್ಯಾ ದೆವಾಕ್ ಹ್ಯಾ ಮಾಣ್ಕ್ಯಾಂಚೊ ಬೊಬೊ ಆಯ್ಕೊನ್ ಹಾಸೊ ಆಯ್ಲ್ಯೊ ತರೀ ತಾಂಕಾ ನಿರಾಸ್ ಕರುಂಕ್ ಮ್ಹನ್ ಯೇನಾಸ್ತಾನಾ ತಾಣೆ ಏಕ್ ರುಕಾಚೊ ಕುಡ್ಕೊ ತ್ಯಾ ಫ಼ೊಂಡಾಕ್ ಉಡಯ್ಲೊ ಆನಿಂ ತೊ ರುಕಾಚೊ ಕುಡ್ಕೊ ಉದ್ಕಾಂತ್ ಉಪ್ಯೆಂವ್ಕ್ ಲಾಗ್ಲೊ.
ಸಗ್ಳೆ ಮಾಣ್ಕೆ ಭಿಂಯಾನ್ ಆನಿ ಗೌರವಾನ್ ತ್ಯಾ ಕುಡ್ಕ್ಯಾಸರ್ಶಿಂ ಯೇಂವ್ಕ್ ನರ್ಗಾಲೆ ತರೀ ತೊ ರುಕಾಚೊ ಕುಡ್ಕೊ ಹಾಲಾನಾತ್ಲ್ಲೊ ತೆಂ ದೆಖೊನ್ ತಾಂತ್ಲೆ ಥೊಡೆ ಘಟ್ ಕಾಳ್ಜಾಚೆ ಮಾಣ್ಕೆ ಧಯ್ರ್ ಕರುನ್ ತ್ಯಾ ರುಕಾಡಾಲಾಗಿಂ ಆಯ್ಲೆ ಆನಿ ಲೋವ್ ಆಪಡ್ನ್ ಪಳೆಲೆಂ. ತರೀ ತೊ ರುಕಾಚೊ ಕುಡ್ಕೊ ಹಾಲ್ಲೊನಾ ತೆಂ ಪಳೆವ್ನ್ ಹಾಂತ್ಲೊ ಏಕ್ ಹೀರೊ ಮಾಣ್ಕೊ ತ್ಯಾ ರುಖಾಡಾಚೆರ್ ಚಡ್ಲೊ ಆನಿ ತಾಚೆರ್ ಉಡ್ಲೊ,ಪಡ್ಲೊ ಆನಿ ನಾಚ್ಲೊ.
ಹೆಂ ದೆಖ್ತಚ್ಚ್ ಪಯ್ಸ್ ರಾವೊನ್ ತಮಾಸೊ ಪಳೆಂವ್ಚೆ ಮಾಣ್ಕೆಯ್ ಲಾಗಿಂ ಆಯ್ಲೆ ಆನಿ ತ್ಯಾ ರುಕಾಡಾಚೆರ್ ಚಡೊನ್ ನಾಚಾಲಾಗ್ಲೆ.
ಪುಣ್ ತಾಂಚಾ ರಾಯಾಚಿ ಕಸ್ಲಿಚ್ಚ್ ಪ್ರತಿಕ್ರಿಯಾ ನಾತ್ಲೆಲೆವರ್ವಿಂ ತಾಂಕಾ ಕಠೀಣ್ ನಿರಾಶಾ ಜಾವುನ್ ತೆ ಮಾಣ್ಕೆ ಪರತ್ ತಾಂಚಾ ದೆವಾಲಾಗಿಂ ಮಾಗಾಲಾಗ್ಲೆ; ’ಆಮ್ಕಾಂ ಏಕ್ ನೀಜ್ ರಾಯ್ ಜಾಯ್ ಆನಿಂ ತ್ಯಾ ರಾಯಾಕ್ ಜೀವ್ ಆಸ್ಚೊ ಗರ್ಜ್ ಆನಿ ತಾಕಾ ಆಮ್ಚೆರ್ ರಾಜ್ವಟ್ಕಿ ಚಲಂವ್ಚಿ ಶ್ಯಾಥಿ ಆಸೊಂಕ್ ಜಾಯ್’ ಮ್ಹಳ್ಳಿ ನವಿ ಮನವಿ ಕೆಲಿ.
ತಾಂಚಾ ದೆವಾಕ್ ಹೆಂ ಆಯ್ಕೊನ್ ಇಲ್ಲೊ ರಾಗ್ ಆಯ್ಲೊ ಆನಿ ತಾಣೆ ಏಕ್ ಲಾಂಚ್ ಪಾಂಯಾಂಚೆ ಆನಿ ಲಾಂಬ್ ತೊಂಡಾಚೆಂ ಸುಕ್ಣೆಂ ಧಾಡ್ಲೆಂ. ಆನಿ ಹೆಂ ಸುಕ್ಣೆಂ ಆಯಿಲ್ಲೆಂಚ್ಚ್ ಅಸ್ಕತ್ ದಿಸ್ಚಾ ಮಾಣ್ಕ್ಯಾಂಕ್ ಧರ್ನ್ ಖಾಂವ್ಕ್ ಲಾಗ್ಲೆಂ. ಸಗ್ಳೆ ಮಾಣ್ಕೆ ಭಿಂಯಾನ್ ತಾಂಚೆ ಅಖ್ರೇಚೆ ದೀಸ್ ಮೆಜಿಲಾಗ್ಲೆ.
ಸಂದೇಶ್: ರಾಯ್ ನಾಸ್ತಾಂ ಆಸ್ಚೆಂ ಎಕಾ ಕ್ರೂರ್ ರಾಯ್ ಆಸ್ಚಾಕೀ ಚಡ್ ಬರೆಂ. ಮನ್ಶಾ ಸಂಯ್ಬ್ಯ್ ಚಡಾವತ್ ಜಾವುನ್ ಆಪ್ಣಾಚಿ ಖಂತ್ ಹೆರಾಂನಿ ಕೆಲ್ಯಾರ್ ಕಿತ್ಲೆಂ ಬರೆಂ ಮ್ಹಣೊನ್ ಆಶೆತಾ. ಆಮಿ ಜಾವುನ್ ಹೆರಾಂಚಿ ಖಂತ್ ಕಾಡ್ಚಾ ಬದ್ಲಾಕ್ ಹೆರಾಂನಿ ಆಮ್ಕಾಂ ಆಯ್ಕಾಜಾಯ್, ಹೆರಾಂನಿ ಆಮ್ಕಾಂ ಸಮ್ಜಜಾಯ್ ಮ್ಹಣ್ ಆಶೆತಾತ್. ಜರ್ತರ್ ಸರ್ವಾಂನಿ ಅಪಾಪ್ಲಿ ಜವಾಬ್ಧಾರಿ ಸಮ್ಜೊನ್ ಘೆವ್ನ್ ಜವಾಬ್ಧಾರಿ ಜಾವುನ್ ಅಪ್ಲ್ಯಾ ಪೆಲ್ಯಾಂಚೊ ಹುಸ್ಕೊ ದವರ್ಲೊ ತರ್ ಕಿತೆಂ ಜಾತೆಂ? ಯೆಮ್ಕೊಂಡಾಕ್ ಬೀಗ್ ಪಡ್ತೆಂ ನ್ಹಯ್ಗೀ?
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
