ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[2006 ಇಸ್ವೆಚಾ ಸಪ್ತೆಂಬರ್ 23 ತಾರಿಕೆರ್ ಅಪ್ಲೊ 41ವೊ ಜಲ್ಮಾದಿವಸ್ ಆಚರಣ್ ಕರ್ಚಾ ಆಂಡ್ರು ತುಕಾ ಹೆಂ ಅಂಕಣ್ ಅರ್ಪಣ್]
ಸತಾಂ ಆನಿ ಖತಾಂ - 22. ಶೆರ್ಮಾಂವ್
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಗಾಂವ್ಚಾ ಎಕಾ ಫಿರ್ಗಜೆಂತ್ ಏಕ್ ಪಾದ್ರಿ ಆನಿ ಏಕ್ ಬೊಟ್ಲೆರ್ ರಾವ್ತಾಲೆ. ತ್ಯೇ ಫಿರ್ಗಜೆಂತ್ ಸಗ್ಳಿಂ ಕುಟ್ಮಾಂ ಕ್ರೀಸ್ತಾಂವ್ ನ್ಹಯ್ ತರೀ ಕ್ರೀಸ್ತಾಂವ್ ಕುಟ್ಮಾಂ ಆಸ್ಲ್ಲಿಂ. ಇಗರ್ಜೆಲಾಗಿಂ ಆಸ್ಚಾ ಘರ್ಚಿಂ ಸುಣಿಂ ಮಾಜ್ರಾಂ, ಕುಂಕ್ಡಾಂ ಸಗ್ಳಿಂ ಇಗರ್ಜೆಚಾ ಜಾಗ್ಯಾಕ್ ಯೆತಾಲಿಂ ಆನಿಂ ಕುಂಕ್ಡಾಂ ಉಗ್ತ್ಯಾ ಇಗರ್ಜೆಭಿತರ್ ರಿಗೊನ್ ಮೆಳೆಂ ಕರ್ತಾಲಿಂ, ಆನಿಂ ಹೆಂ ನಿತಳ್ ಕರ್ನ್ ಕರ್ನ್ ಬಾವ್ಡೊ ಬೊಟ್ಲೆರ್ ಥಕ್ಲ್ಲೊ.
ಪುಣ್ ಕೊಣೇಂಯ್ ಕಿತೆಂ ಕರ್ಯೆತ್? ತಿತ್ಲ್ಯಾ ಕುಂಕ್ಡಾಂಕ್ ಕಾಂಯ್ ಭಾಂದುನ್ ಘಾಲುಂಕ್ ಜಾಯ್ನಾ ಆನಿಂ ಇಗರ್ಜೆಚಿಂ ಸಗ್ಳಿಂ ಬಾಗ್ಲಾಂ ಬಂದ್ ಕರ್ಚೆಪರಿಂಯೀ ನಾ. ಹರ್ಯೆಕಾ ಸನ್ವಾರಾ ಬೊಟ್ಲೆರಾಕ್ ಇಗರ್ಜ್ ಧುಂವ್ಕ್ ಪಡ್ತಾಲಿ ದೆಖುನ್ ಎಕಾ ಸನ್ವಾರಾ ಬೊಟ್ಲೆರಾನ್ ಇಗರ್ಜ್ ನಿತಳ್ ಕರುನ್ ಯೇವ್ನ್ ಪಾದ್ರಿಕ್ ದೂರ್ ವೆಲೆಂ ಆನಿಂ ಪಾದ್ರಿನ್ ತಾಕಾ ಸಾಂಗ್ಲೆಂ. ಪಳೆ ಫಾಲ್ಯಾಂ ಪುಣೀಂ ತಿಂ ಕುಂಕ್ಡಾಂ ಯೆತಿತ್ ತರ್ ಕಶೆಂ ಪುಣೀಂ ಕರ್ನ್ ಧರ್ನ್ ದವರ್ ಆನಿಂ ದನ್ಪಾರಾಂ ತಾಂಚೆಂ ನಿಸ್ತೆಂ ಕರ್.
ಹೆಂ ಆಯ್ಕಾಲ್ಲ್ಯಾ ಬೊಟ್ಲೆರಾನ್ ದುಸ್ರ್ಯಾ ದಿಸಾ ಸಕಾಳಿಂ ತಶೆಂಚ್ ಕೆಲೆಂ. ಸೆಜಾರ್ಚಾ ಎಕಾ ಕುಂಕ್ಡಾಕ್ ಧರ್ಲೆಂ ಆನಿಂ ಕುತ್ತಾರೆಂತ್ ದಾಂಪುನ್ ಘಾಲೆಂ ಆನಿಂ ಸಕಾಳಿಂಚಾ ಮಿಸಾಕ್ ಗೆಲೊ.
ಪುಲ್ಪುತ್ರಾರ್ ಚಡ್ಲ್ಲ್ಯಾ ಪಾದ್ರಿನ್ ಶೆರ್ಮಾಂವ್ ಸುರು ಕೆಲೊಚ್. ದೆವಾ ಆನಿಂ ದೆಂವ್ಚಾರಾ ಮಧ್ಲ್ಯಾ ಅಂತರಾ ವಿಶ್ಯಾಂತ್. ಸರ್ಗ್ ಆನಿಂ ಯೆಮ್ಕೊಂಡಾ ಮ್ಹಧ್ಲ್ಯಾ ಅಂತರಾ ವಿಶ್ಯಾಂತ್. ಬರಿ ಕರ್ನಿ ಆನಿಂ ಪಾತ್ಕಾಂ ಮಧ್ಲ್ಯಾ ಅಂತರಾ ವಿಶ್ಯಾಂತ್. ಪಾತ್ಕಾಂ ಕೆಲ್ಲ್ಯಾಂಕ್ ದೇವ್ ಕಠೀಣ್ ಶಿಕ್ಶಾ ದಿತಾ. ಕೆದಿಂಕ್ಚ್ ಪಾಲ್ವಾನಾತ್ಲ್ಲ್ಯಾ ಉಜ್ಯಾಂತ್ ಲಾಸ್ತಾ, ಭಾಜ್ತಾ ಮ್ಹಣೊನ್.
ಕಶೇಂಯ್ ಮೀಸ್ ಜಾಲೆಂ ಆನಿಂ ದನ್ಪಾರ್ ಯೆತೆಚ್ ಪಾದ್ರಿ ಭುಕೆನ್ ಜೆವ್ಣಾಕ್ ಗೆಲೊ. ಬೊಟ್ಲೆರಾನ್ ದಾಳಿಚೊ ಸಾರ್ ಮಾತ್ರ್ ಕೆಲಾ ಶಿವಾಯ್ ಸಕಾಳಿಂ ಧರ್ಲ್ಲ್ಯಾ ಕುಂಕ್ಡಾಚೊ ಪಾತ್ತೊ ನಾತ್ಲ್ಲೆಂ ಪಳೆವ್ನ್ ಪಾದ್ರಿ ರಾಗಾರ್ ಜಾವ್ನ್ ಬೊಟ್ಲೆರಾಕ್ ವಿಚಾರಿಲಾಗ್ಲೊ.
"ಹಾವೆಂ ಕುಂಕಾಡ್ ಪುಣೀಂ ಧರ್ಲ್ಲೆಂ ಫಾದರ್. ಪುಣ್ ತುಮ್ಚೊ ಶೆರ್ಮಾಂವ್ ಆಯ್ಕೊನ್ ಭಿಂಯಾನ್ ವಚೊನ್ ತೆಂ ಸೊಡ್ಲೆಂ"
ಅನಿಕೀ ರಾಗಾರ್ ಜಾಲ್ಲೊ ಪಾದ್ರಿ ಬೊಬಾಟ್ಲೊ "ಅಳೆರೇ ಬೆಪ್ಪಾ.. ಶೆರ್ಮಾಂವ್ ಹಾವೆಂ ತುಕಾ ಸಾಂಗ್ಲ್ಲೊಯೆರೇ? ಲೊಕಾಕ್ ನ್ಹಯ್ವೇ?"
ಸಂಧೇಶ್: ಜಿಣಿಯೆಂತ್ ಆಮಿಂ ಹೆರಾಂಕ್ ಶೆರ್ಮಾಂವ್ ಸಾಂಗ್ಚಾಂತ್ ಹುಶಾರ್ ನ್ಹಯ್ಗೀ? ಪುಣ್ ಪಾಳುಂಕ್ ತೆಂ ಕಿತ್ಲೆ ಕಶ್ಟ್ ನ್ಹಯ್ಗೀ? ದೆಖುನ್ಂಚ್ ಜಾಯ್ಜಯ್ ಬರ್ಯೊ ಕರ್ನ್ಯೊ ಕರ್ನ್ ದಾಖಂವ್ಚೆ ಕೆದಾಳಾಯ್ ಹೆರಾಂಕ್ ಶೆರ್ಮಾಂವ್ ದೀನಾಂತ್, ಬಗಾರ್ ಕಾರ್ಯಾಂನಿ ಕರ್ನ್ ಧಾಖಯ್ತಾತ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
