ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ಕೊಣೆಂಯ್ ದಿಲ್ಲೆಂ ಘೆವ್ನ್ ಕೊಣೆಂಯ್ ಸಮಧಾನ್ ಜೊಡ್ಯೆತ್, ಪುಣ್ ಹೆರಾಂಕ್ ದೀವ್ನ್ ಜೊಡ್ಚೆಂ ಸಮಧಾನ್ ವರ್ತೆಂ"
ಜೆಜು ಆನಿ ಗಾಂಧಿ ಸಾಯ್ಕಿ?
ವರಸ್ : 2006
ಅಂಕೊ : 27
ಮಯ್ನೊ : ಸಪ್ತೆಂಬರ್
ಸಂಪಾದಕೀಯ್ - 27.
ವಲ್ಲಿ ಕ್ವಾಡ್ರಸ್
ಮದರ್ ತೆರೆಜಾ ಅಶಿ ಸಾಂಗ್ತಾ; ’ತುಂ ಹೆರಾಂಕ್ ಬರೆಂ ಕರ್ಶಿ ತರ್ ತುಕಾ ತಾಂಚೆಥಾವ್ನ್ ಖೊಟೆಂಚ್ ಮೆಳ್ತೆಲೆಂ, ತರ್ಯ್ ತಾಂಕಾಂ ಬರೆಂಚ್ ಕರ್ - ಕಿತ್ಯಾಕ್ ತುಜಿ ಅಖ್ರೇಚಿ ಭೆಟ್ ತಾಂಚೆಸವೆಂ ನ್ಹಂಯ್ - ಬಗಾರ್ ದೆವಾಲಾಗಿಂ’ ಮ್ಹಣ್.
ಹಾಂವ್ ಅರ್ಧೊಂ ಪಾದ್ರಿ (ಸೆಮಿನರಿ ಥಾವ್ನ್ ಪಾಟಿಂ ಆಯಿಲ್ಲೊಂ - ತುಮ್ಚಾ ಭಾಶೆಂತ್ ಸಾಂಗೊಂ ತರ್ ’ದೊರೊ ಉಡೊನ್ ಆಯಿಲ್ಲೊಂ’) ತರ್ಯ್ ವಿಶೇಸ್ ದೇವ್ಭಕ್ತೆಚೊ ನ್ಹಂಯ್, ಸದಾಂಚೊ ಖಳಾನಾತ್ಲ್ಲೊ ತೇರ್ಸ್ ಜಾಂವ್, ಹಾಫ್ತ್ಯಾಚೆಂ ಚುಕಾನಾಸ್ತಾಂ ಮೀಸ್ ಜಾಂವ್ ಚುಕಯ್ನಾಸ್ತಾಂ ರಾಂವ್ಚೊ
’ಭಾಗೆವಂತ್’ ನ್ಹಂಯ್. ತಶೆಂ ಮ್ಹಣೊನ್ ದೇವ್ ನಾ ಮ್ಹಣ್ಚೊ ನಾಸ್ತಿಕ್ಯ್ ನ್ಹಂಯ್. ಹೆಂ ಹಾಂವ್ ಹೆಂ ಲೇಖನ್ ಬರಂವ್ಚಾ ಪಯ್ಲೆಂಚ್ ಉಗ್ಡಾಪೆಂ ಕರ್ತಾಂ.
ಪುಣ್ ಹಾಂವ್ ಬರೆಂ ಆನಿ ವಾಯ್ಟಾ ಮಧ್ಲೊ, ಸತ್ ಆನಿ ಫಟಿ ಮಧ್ಲೊ ಫರಕ್ ಸಮ್ಜೊಂಕ್ ಸಕ್ತಾಂ ತರ್ಯ್ ಪಾತಾಕ್ ಆನಿ ಪೂನ್ ಹಾಂಕಾಂ ಪಾತ್ಯೆನಾ ತರ್ಯ್ ಏಕ್ ಮಾತ್ರ್ ಖರೆಂಪಣಿಂ ಪಾತ್ಯೆತಾಂ - ’ಹರ್ಯೆಕಾ ಮನ್ಶಾಕ್ ಏಕ್ ಅತ್ಮೊ ಆಸಾ ಆನಿ ತೊ ಅತ್ಮೊ ತವಳ್ ತವಳ್ ಉಲಯ್ತಾ ಆನಿ ಆಮಿಂ ಕರ್ಚಾ ಎಕೆಕಾ ಕಾಮಾಚೆರ್, ಆಮಿ ಚಿಂತ್ಚಾ ಎಕೆಕಾ ಚಿಂತ್ಪಾಚೆರ್ ತೊ ಉಲೊ ಅಪ್ಲೆಂ ಫಯ್ಸಲ್ ದಿತೇಚ್ ಆಸ್ತಾ - ಜಾಂವ್ ಮನಿಸ್ ತಾಕಾ ಆಯ್ಕೊಂ ವಾ ಸೊಡುಂ’.
ಆಯ್ಲೆವಾರ್ ಅಖಿಲ್ ಭಾರತೀಯ್ ಬರವ್ಪ್ಯಾಂಚಾ ಎಕ್ತಾರಾಂತ್ ಅಧ್ಯಕ್ಶ್ಪಣ್ ಘೆತ್ಲ್ಲೊ ಫಾಮಾದ್ ಡೋಗ್ರಿ ಕವಿ ಡಾ|ಅರ್ವಿಂದ್ ರೈನಾ ಅಶೆಂ ಮ್ಹಣಾಲೊ;
"ಜಲ್ಮಾಲ್ಲೊ ಹರ್ಯೆಕ್ ಮನಿಸ್ ಭುರ್ಗ್ಯಾಪಣಾಚೆಂ ಹಂತ್ ಪಾಶಾರ್ ಜಾತಾ, ಭುರ್ಗ್ಯಾಪಣಾಚಾ ಮತಿಂತ್ ಉದೆಲ್ಲ್ಯಾ ಜಾಯ್ತ್ಯಾ ಸವಾಲಾಂಕ್ ಯೆದೊಳ್ಚ್ ಕೊಣೆಂಗೀ ತಯಾರ್ ಕರ್ನ್ ದವರ್ಲ್ಲ್ಯಾ
ಜಾಪಿಂನಿ ತೊ ಸಂತುಶ್ಟ್ ಜಾತಾ. ಪುಣ್ ಜೆದ್ನಾಂ ತೊ ಅಪ್ಲೆಂ
ಭುರ್ಗೆಂಪಣ್ ಸಂಪವ್ನ್ ತರ್ನಾಟೊ ಜಾತಾ ತೆದ್ನಾಂ ತಾಚಾ ಮತಿಂತ್ ಸವಾಲಾಂ ಉದೆತಾತ್ ಆನಿ ಜಿತ್ಲ್ಯಾ ಸವಾಲಾಂಕ್ ಜಾಫಿ ಸೊಧ್ಚಾಂತ್ ವಾ ಜೊಡ್ಚಾಂತ್ ತೊ ಸಲ್ವತಾಗೀ ತಿತ್ಲೊ ತೊ ಭಿತರ್ಲೆ ಭಿತರ್ ಅಸಮಧಾನಿ ಜಾತಾ. ಅಸಲ್ಯಾ ಅಸಮಧಾನಾಚಾ ಜಿಣ್ಯೆಚೆಂ ಫಳಿತಾಂಶ್ ಜಾವ್ನ್ ಮನಿಸ್ ಅಪ್ಲ್ಯಾ ಜಿಣ್ಯೆಂತ್ ಸೊಧುಂಕ್ ಪಡ್ತಾ ಆನಿ ಪರತ್ ಪರತ್
ಸಲ್ವತಾ, ಹಾಚೆಂ ಪರಿಣಾಮ್ ಜಾವ್ನ್ ಸಮಾಜೆಂತ್ ಅಶಾಂತಿ,
ಅಸಮಧಾನ್, ಅನೀತ್ ಭರೊನ್ ವೊಮ್ತಾತಾ. ಏಕ್ ಬರವ್ಪಿ ಹ್ಯಾ ವರ್ಗಾಥಾವ್ನ್ ಮಾತ್ಸೊ ಅಥ್ವೊ ಜಾವ್ನ್ ಜಿಯೆತಾ, ತೊ ಪಯ್ಲೆಂ ಆಪ್ಲ್ಯಾ ಅಸಲ್ಯಾ
ಸವಾಲಾಂಕ್ ಜಾಪಿ ಸೊಧುಂಕ್ ಸಕ್ತಾ ಆನಿ ಉಪ್ರಾಂತ್ ಹೆರಾಂಕ್ ತ್ಯೊ ಜಾಪಿ ದೀಂವ್ಕ್ ಪಾವ್ತಾ."
ಹೆಂ ತಾಚೆಂ ಚಿಂತಾಪ್ ಮ್ಹಾಕಾ ಮ್ಹಜಾ ಜೆಮೆಲ್ಲ್ಯಾ ಚಿಂತ್ಪಾಕ್ ಜಾಗಯ್ತಾ; ’ಆಮ್ಚೆಲಾಗಿಂ ದೇವ್ ಆಸಾ, ಧರ್ಮ್ ಆಸಾ, ಆಮ್ಚೆಲಾಗಿಂ ಉಲಂವ್ಚಿ, ಬರಂವ್ಚಿ, ಚಿಂತ್ಚಿ ಸಕತ್ ಆಸಾ ತರ್ಯ್ ಆಮಿ ಕಿತ್ಲಿಂ ಲಾಚಾರ್? ಕಿತ್ಲಿಂ ಕಶ್ಟಿಂ ನ್ಹಂಯ್ಗಿ?’
ಏಕ್ ಪಾವ್ಟಿಂ ಎಕಾ ಭುರ್ಗ್ಯಾಕ್ ಎಕ್ಲ್ಯಾನ್ ಸವಾಲ್ ಕೆಲೆಂ "ಪುತಾ ಬರೊ ಮನಿಸ್ ಮ್ಹಳ್ಯಾರ್ ಕೋಣ್?"ಭುರ್ಗ್ಯಾನ್
ಅಶಿ ಜಾಪ್ ದಿಲಿ; "ಬರೊ ಮನಿಸ್ ಮ್ಹಳ್ಯಾರ್ ಸದಾಂ ಘರಾಂತ್ ಮಾಗ್ಣಿಂ ಕರ್ಚೊ, ಹಾಫ್ತ್ಯಾಕ್ ಚುಕಾನಾಸ್ತಾಂ ಮಿಸಾಕ್ ವಚೊ, ಕುಮ್ಗಾರ್ ಸೆಂವ್ಚೊ, ಕುಮ್ಸಾರ್ ಜಾಂವ್ಚೊ, ಕೊಯರಾಂನಿ ಕಾಂತಾರಾಂ ಗಾಂವ್ಚೊ, ವಾಂಜೆಲ್ ವಾಸ್ಚೊ ಆನಿ ಪಾದ್ರಿ/ಮಾದ್ರಿಂಕ್ ಪಾಟಿಂ ಉಲಯ್ನಾತ್ಲ್ಲೊ"ಹ್ಯೊ
ಜಾಪಿ ತ್ಯಾ ಭುರ್ಗ್ಯಾನ್ ಸೊಧ್ಲ್ಲ್ಯೊ ನ್ಹಂಯ್ ಬಗಾರ್ ತಾಚೆರ್ ಥಾಪ್ಲ್ಲ್ಯೊ. ಪುಣ್ ಹೊಚ್ಚ್ ಭುರ್ಗೊ ಹ್ಯಾಚ್ ಸವಾಲಾಕ್ ತೊ ತರ್ನಾಟೊ ಜಾತೆಚ್ಚ್ ಹಿಚ್ಚ್ ಜಾಪ್ ದೀತ್?
ತರ್ ಹೆಂ ಕಿತ್ಯಾಕ್?
ಸಭಾರ್ ಪಾವ್ಟಿಂ ಹಾವ್ ಸಮ್ಜೊಂಕ್ ಸಕಾನಾ ’ಮನಿಸ್’, ’ಧರ್ಮ್’, ’ಚಿಂತಾಪ್’ ಆನಿ ’ಕರ್ನಿ’ ಕಿತ್ಲಿ ಎಕಾಮೆಕಾ ತಾಳ್ ಪಡ್ತಾ? ಕ್ರೀಸ್ತಾಂವ್ ಧರ್ಮಾಕ್ ಘೆವ್ಯಾಂ, ಕ್ರೀಸ್ತಿ ಮೌಲ್ಯಾಂ ಮ್ಹಳ್ಯಾರ್ ಫಕತ್ ’ಮಿಸಾಕ್ ವೆಚೆಂ’ ಆನಿ ’ಕುಮ್ಗಾರ್ ಸೆಂವ್ಚೊ/ಕುಮ್ಸಾರ್ ಜಾಂವ್ಚೆಂ’ ಆನಿ ಘರಾಂನಿ ಆಮೊರಿ ತೇರ್ಸ್ ಕರ್ಚೊ ವ ವಾಂಜೆಲ್ ವಾಸ್ಚೊ’ ಮಾತ್ರ್ ಮ್ಹಳ್ಳೆಂ ಚಿಂತ್ಚೆ/ಪಾತ್ಯೆಂವ್ಚೆ ಕಿತ್ಲೆ ನಾಂತ್ ಹ್ಯಾ ಸಂಸಾರಾಂತ್? ಪುಣ್ ಖರಿಂ ಕ್ರೀಸ್ತಿ ಮೌಲ್ಯಾಂ ಪ್ರಕಾರ್ ದುಸ್ಮಾನಾಂಕ್ ಭಗ್ಸುಂಚೊ, ಎಕಾ ಪೊಲ್ಯಾರ್ ಕೊಣೆಯ್ ಮಾರ್ಲೊ ತರ್ ತಾಕಾ ಮಾರುಂಕ್ ಅಪ್ಲೊ ದುಸ್ರೊ ಪೊಲೊಯ್ ದಿಂವ್ಚೊ ಕ್ರೀಸ್ತಾಂವ್ ಲೋಕ್ ಕಿತ್ಲೊ ಆಸಾ ಆಮ್ಚಾ ಸಮಾಜೆಂತ್? ಕೊಣ್ಯ್ ಆಸಾ ತರ್ ಸಮಾಜೆನ್ ವೊಲಾಂವ್ಚೆಂ ನಾಂವ್ ಜಾವ್ನಾಸಾ ’ಪಿಸೊ’ ವ ’ಸಾಯ್ಕಿ
(Psychy)’.
ಆಮ್ಚಾ ಚಾಲ್ತ್ಯಾ ಜಿಣ್ಯೆಂತ್ ಜಾಯ್ತ್ಯೊ ಸಂಗ್ತ್ಯೊ ಆಮ್ಕಾಂ ಮಹತ್ವಾಚೊ - ಫೆಸ್ತಾಂ ಸೊಭಾಣಾಂ, ಕಾಜಾರಾಂ ಕಾರ್ಯಿಂ ವ ಹೆರ್. ಹ್ಯಾ
ಹರ್ಯೆಕಾ ಕಾರ್ಯಾಂನಿ ಆಮಿ ಮಾಗ್ಣೆಂ ಕರ್ತಾಂವ್, ಮಿಸಾಕ್ ವೆತಾಂವ್, ಕಾಂತಾರಾಂ ಗಾಯ್ತಾಂವ್ - ಪುಣ್ ಹ್ಯಾ ಕಿತ್ಲೆಶ್ಯಾ ದಬಾಜ್ಯಾಂನಿ ಆಮ್ಚಿಂ ಕ್ರೀಸ್ತಿ ಮೌಲ್ಯಾಂ ಜೊಡ್ತಾಂವ್?
ಆಮಿಂ ಸೂಟ್ ನೆಸೊನ್ ಕಾರಾಂನಿ ಇಗರ್ಜೆಕ್ ವಚೊಂಕ್ ಪುರೊ,
ಲೊಕಾಂ ಮುಖಾರ್ ವ್ಹಡ್ಲೊ ನೋಟ್ ಇಜ್ಮೊಲ್ ದೀಂವ್ಕ್
ಪುರೊ, ಇಗರ್ಜೆ ಗೆಟಿಂತ್ ಸಾಲಾರ್ ಬಸೊನ್ ಆಸ್ಚಾ ಭಿಕಾರ್ಯಾಂಕ್
ಉಗ್ತ್ಯಾನ್ ದಾನ್ ದೀಂವ್ಕ್ ಪುರೊ, ಫೆಸ್ತಾಚೆಂ ಮುಡ್ದಮ್
ಆಮ್ಚೆಂಚ್ ಜಾಂವ್ಕ್ ಪುರೊ, ಪುಣ್ ಖರೆಂಪಣಿಂ ಆಮ್ಚಾ
ಲ್ಹಾನಾಂ ಭಾಂವ್ಡಾಂಚೆಂ ರುದಾನ್ ಆಮ್ಚಾ ಕಾನಾಂಕ್ ಕಿತ್ಲೆಪಾವ್ಟಿಂ
ಆಯ್ಕಾತಾ? ಆಮ್ಚಾ ನಾಗ್ಡ್ಯಾ ಭಾಂವ್ಡಾಂನಿ ಉಗ್ತೆಂ ಆಸ್ಚೆಂ
ಪಳೆವ್ನ್ ತಾಂಕಾಂ ನೆಸೊಂಕ್ ಆಮಿಂ ಕಿತ್ಲೆ ಪಾವ್ಟಿಂ ದಿತಾಂವ್?
ಭುಕೆಂತ್ ದಿಸಾಚೆಂ ಏಕ್ ಘೊಟ್ ನಿಸಾಕ್ ಗತ್ ನಾತ್ಲೆಲ್ಯಾಂಕ್
ಎಕಾ ದಿಸಾಚೆಂ ಖಾಣ್ ದೀಂವ್ಕ್ ಆಮಿ ಕಿತ್ಲೆಶಿಂ ಆಯ್ತಿಂ ಆಸಾಂವ್? ಹಾಂತುಂ
ಖಂಡಿತ್ ಸಂಸಾರಿ ನಾಂವ್ ಮೆಳ್ಚೆಂನಾ, ಪತ್ರಾಂನಿ/ಸಾಯ್ಟಿಂನಿ
ತಸ್ವೀರ್ ಛಾಪೊನ್ ಯೆಂವ್ಚಿನಾ ನ್ಹಂಯ್ಗಿ?ತರ್ಯ್
ಹೆರಾಂಚಿಂ ಪಾತ್ಕಾಂ, ಗುನ್ಯಾಂವ್ ಮೆಜ್ಚಾಂತ್ ಆಮ್ಚಾಕೀ ಭುಧ್ವಂತ್ ಕೊಣ್ಂಚ್ ನಾಂತ್, ಕಿತ್ಲೆಶೆ ಪಾವ್ಟಿಂ ಆಮ್ಚಾ ದೊಳ್ಯಾಂತ್ ಆಡೆ ಆಸೊನ್ಯ್ ಹೆರಾಂಚಾ ದೊಳ್ಯಾಂತ್ಲೆ ಕಿಸರ್ ಕಾಡುಂಕ್ ಆಮಿ ವಚಾನಾಂವ್? ಹೆಂ ಕಿತ್ಯಾಕ್??
ಆಮ್ಚಾ ತೃಪ್ತೆಕ್? ಸಮಧಾನಾಕ್??
ಜರ್ ಹೆರಾಂಚ್ಯೊ ಖೊಡಿ ಕಾಡ್ನ್, ಹೆರಾಂಕ್ ಹಲ್ಕ್ ಕರ್ನ್ ತೃಪ್ತಿ ಭೊಗ್ತಾಂವ್ ತರ್ ತಿ ಕಸಲಿ ತೃಪ್ತಿ? ತೆಂ ಕಸಲೆಂ ಸಮಧಾನ್?
ಆಯ್ಲೆವಾರ್ ಮ್ಹಜಾ ಸಳಾವಳೆರ್ ಆಸ್ಚಿ ಎಕ್ಲಿ ವಳ್ಕಿಚಿ ಮ್ಹಜೆರ್ ಕಠೀಣ್ ರಾಗಾರ್ ಜಾಲಿ ಆನಿ ಮ್ಹಜಾ ಎಕಾ ಇಶ್ಟಾಲಾಗಿಂ ಮ್ಹಜೆವಿಶಿಂ ಜಾಯ್ತ್ಯೊ ಖೊಡಿ ಕುಲ್ಪಾಂ ಕಾಡಿಲಾಗ್ಲಿ, ಗಾಳಿ ಶಿರಾಪ್ ದೀಲಾಗ್ಲಿ. ಮ್ಹಜಾ ಇಶ್ಟಾನ್ ಮ್ಹಾಕಾ ಹೆಂ ಸಾಂಗ್ತಚ್ ಸಂಯ್ಬಿಕ್ ರಾಗ್ ಮ್ಹಾಕಾ ಆಯ್ಲೊ. ಮ್ಹಾಕಾಯ್ ತಿಕಾ ಜೊಕ್ತ್ಯಾ ಭಾಸೆನ್ ಜೊಕ್ತಿ ಜಾಪ್ ದೀಂವ್ಕ್ ಜಾತೆಂ ತರ್ಯ್ ಮ್ಹಾಕಾ ಮ್ಹಜೆಂ ಅಂತರ್ಸ್ಕರ್ನ್ ಅಶೆಂ ಮ್ಹಣಾಲೆಂ ’ಜರ್ ತರ್ ಹಾಂವ್ಯ್ ತಿಕಾ ಜಾಪ್ ದೀಂವ್ಕ್ ಗೆಲೊಂ ತರ್ ತಿಚಾ ಆನಿ ಮ್ಹಜಾ ಮಧೆಂ ತಫಾವತ್ ತರ್ಯ್ ಕಸಲೊ?’ - ದೆಖುನ್ ಹಾಂವ್ ವಗೊಚ್ ರಾವ್ಲೊಂ ಶಿವಾಯ್ ಕಿತೆಂಚ್ ಕೆಲೆಂನಾ.
ಥೊಡ್ಯಾ ದಿಸಾಂನಿ ತಿಚ್ ಬಾಯ್ಲ್ ಪರತ್ ಮ್ಹಜೆಲಾಗಿಂ ಬರೆಂ ಉಲಂವ್ಕ್ ಲಾಗ್ತಾನಾ ಹಾಂವ್ ಕಿತೆಂಚ್ ಜಾಂವ್ಕ್ ನಾ ಮ್ಹಳ್ಳೆಪರಿಂ ತಿಚೆಲಾಗಿಂ ಬರ್ಯಾನ್ ಉಲಂವ್ಚೆಂ ಪಳೆವ್ನ್ ಅಜ್ಯಾಪ್ ಜಾಲ್ಲ್ಯಾ ಮ್ಹಜಾ ಮಿತ್ರಾನ್ ತಿಕಾ ಸವಾಲ್ ಕೆಲೆಂ ಖೈಂ ’ತುಂ ತಾಕಾ ಇತ್ಲ್ಯೊ ಗಾಳಿ ದಿತಾಲಿಯ್ ಮೂ? ಆತಾಂ ಕಿತೆಂ ಜಾಲೆಂ?’ ಸಟ್ಟ್ ಕರ್ನ್ ತಿಚಿ ಜಾಪ್ ’ತೊ ಸಾಯ್ಕಿಯಾ’.
ಸವಾಲ್ ಹಾಂಗಾಸರ್ ಕೊಣ್ ಸಾಯ್ಕೊ ಕೊಣ್ ನ್ಹಂಯ್ ಮ್ಹಣ್ ನ್ಹಂಯ್.
ಸವಾಲ್ ಹಾಂಗಾ - ತರ್ ಹೆಂ ಅಂತಸ್ಕರ್ನ್/ಕೊಶೆಡ್ದ್ ಮ್ಹಳ್ಳೆಂ ಸರ್ವಾಂಕ್ ಆಸಾ? ಸರ್ವಾಂ ಹಾಕಾ ಆಯ್ಕತಾತ್? ಖಾಲ್ ಜಾತಾತ್? ಮನ್ಶಾಚಾ ಹರ್ಯೆಕಾ ಕರ್ನೆಂತ್, ವಿಚಾರಾಂತ್, ಚಿಂತ್ನಾಂತ್ ಹೆಂ ಅಂತಸ್ಕರ್ನ್ ಜರ್ ಉಲಯ್ತಾ, ತರ್ ಸಂಸಾರಾಂತ್ ಇತ್ಲಿ ಅನೀತ್, ಅಸಮಧಾನ್ ತರ್ಯ್ ಕಿತ್ಯಾಕ್?ದೆಖುನ್
ಜಾಯ್ಜಯ್ ಆಮ್ಚೆಲಾಗಿಂ ವಿಗ್ಯಾನ್ ಆಸಾ, ಧರ್ಮ್ ಆಸಾ, ದೇವ್ ಆಸಾ, ಉಂಚ್ಲೆಂ ಶಿಕಾಪ್ ಆಸಾ, ಬರೆಂ ಕಾಮ್, ಬರಿ ಜೋಡ್ ಆಸಾ ತರ್ಯ್ ಆಮ್ಚೆಭಿತರ್ ಆಮಿ ಭಿಕಾರಿ, ನಾಗ್ಡಿಂ ಆನಿ ಕಂಗಾಲ್. ಆನಿ ಹ್ಯಾ ಭಿತರ್ಲ್ಯಾ ಸ್ಥಿತೆಚೊ ಪರಿಣಾಮ್ ಜಾವ್ನ್ ಅಸಲೊ ರಾಗ್, ಮೊಸೊರ್, ಹಗೆಂ, ಜಿದ್ದ್ ಆನಿ ಧ್ವೇಷ್.. ದೆಕುನ್ಂಚ್ ಭೋವ್ಶಾ ಗಾಂಧಿನ್ ಸಾಂಗ್ಲ್ಲೆಂ ’ಹಾಂವ್ ಕ್ರೀಸ್ತಾಕ್ ಪಾತ್ಯೆತಾಂ ಪುಣ್ ಕ್ರೀಸ್ತಾಂವಾಂಕ್ ನ್ಹಂಯ್!’
ಕಿತ್ಲೆಂ ಅಪುಟ್ ಸತ್ ನ್ಹಂಯ್ಗಿ? ಪುಣ್ ಆತಾಂ ತುಮ್ಚೆ ಪಯ್ಕಿ ಕೊಣ್ ತರ್ಯ್ ಸಾಂಗ್ತಲೊ ’ಗಾಂಧಿ ಸಾಯ್ಕಿ’ ಮ್ಹಣೊನ್.
ದೇವ್ ಬರೆಂ ಕರುಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
