ಕವಿತಾकविताPoem
ಸರ್ಯಾಂ
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಓನ್ಲಾಯ್ನ್ ಕವಿತಾ ಸ್ಪರ್ಧ್ಯಾಂತ್ ಭಾಗ್ ಘೆಂವ್ಕ್ ’ಉತ್ರಾಂತ್ ಸೂತ್ರಾಂ’ ಅಂಕಣಾಕ್ ಭೆಟ್ ದಿ
ಸಕ್ಕಡ್ ಸಾಂಗಾತಾ ಮೆಳ್ಯಾಂ ಸಕ್ಕಡ್ ಲಾಗಿಂ ಸರ್ಯಾಂ ಆಮ್ಚೆ ತಾಳೆ ಏಕ್ ಕರ್ಯಾಂ ಮರಿಯೆಕ್ ಹೊಗಳ್ಸಿಯಾಂ
ಕವಿತಾಕ್ ಸಂದರ್ಭ್: ಮೊಂತಿ ಸಾಯ್ಭಿಣಿಚೆಂ ಫೆಸ್ತ್ (8 ಸಪ್ತೆಂಬರ್)
-ವಿಲ್ಸನ್ ಕಟೀಲ್
ಕಾಸಾಪ್ಪ್ಯಾಚಿ ಧುವ್ ಆನಿ ಬೊಂಗೆ
ಕಾಸಾಪ್ಪ್ಯಾಚ್ಯೆ ಧುವೆಚಿಂ ಬೊಟಾಂ ನಾಜೂಕ್
ರಗ್ತಾ ರಂಗಾಚ್ಯೊ ನಿಶ್ಟುರ್ ನಾಕ್ಶ್ಯೊ, ಪುಣ್
ಬಿರ್ಮತ್ ಆಸತ್ ಖಂಯ್ಗಿ ಇಡ್ಯಾಂತ್
ಖಾಡ್ಕೆರ್ ಮ್ಹಜ್ಯಾ ಕಾಳೊ ಚಾಮ್ಕುಳ್
ತ್ಯಾಯ್ ಚಾಮ್ಕುಳಾಕ್ ಭುಲ್ಲಾಂ ತೆಂ
ಕುಚುಲ್ಯೊ ಕರ್ತಾತ್ ಬೊಟಾಂ ಗಳ್ಯಾಕ್
ಜೊಕ್ತೊ ವೇಳ್ ಹೊ ಜೀಣ್ ಜಿಕೊಂಕ್
ಭಾಗಿಂತ್ಲ್ಯಾ ಬೊಂಗ್ಯಾಂನೊ ಏಕ್ ಖಿಣ್
ಭಿರಾಂತಿವೀಣ್ ಹಾಸೊನ್ ಕಾಡಾತ್
-ವಿನ್ಸಿ ಪಿಂಟೊ, ಆಂಜೆಲೊರ್
’ಮಾಯ್’ ಮಯ್ನ್ಯಾಚಿ ಮಹಿಮಾ
ಮಾಯ್ ಮ್ಹಹಿನ್ಯಾಚಿಂ
ಮೇ’ ಫುಲಾಂ ಚೊಯ್ತಾನಾ
ಮನಾಕ್ ಮಜಾ
ಮಧುರ್ ದೊಳ್ಯಾಂಕ್
ಮೇಯಾಂತ್ ಫುಲೊನ್
ಮದ್ಗತ್ ಜುನಾ ಪರ್ಯಾಂತ್
ಮುಕುಟ್ ರುಕಾರ್ ಜಶೆಂ,
ವಾಳ್ವಾಟಾಂತ್ ಮೃಗ್ಜಾಳ್
ಮಯ್ಲಾ ಪಯ್ಸ್
ಮಯ್ದಾನಾ ಭಂವ್ತಿಂ
ಮಾಟೊವ್ ಫುಲಾಂಚೊ
ಮೊಳ್ಬಾಕ್ ತೆಂಕ್ತಾತ್
ಮಾಯ್ ಮ್ಹಹಿನ್ಯಾಂತ್
ಮರಿಯೆ ಮಾಯೆಕ್ ಸರ್ಗಿಂ
ಮಯ್ಪಾಸಾನ್ ಮಾಡ್ಲ್ಯಾಂತ್
ಮಹಿಮಾ ವರ್ತಿ ಸಶ್ಟಿಚಿಂ
-ವಾಲ್ಟರ್ ದಾಂತಿಸ್, ಕಿನ್ನಿಗೋಳಿ
ಅಜ್ಯಾಪ್ ಅಶೆಂ ಘಡ್ಲಾಂ
ಫ೦ಣ್ಗಿಲ್ ಖಾಲಿ ಗುಡ್ಯಾ ಮೆರೆರ್
ಲಿಲ್ಲಿ ಫುಲ್ ಕಶೆ೦ ಫುಲ್ಲಾ೦?
ಹಜಾರ್ ದೆವಾ೦ಚೊ ದೇಶ್ ಸಯ್ತ್
ಮರಿಯೆ ಮೊಗಾಕ್ ಭುಲ್ಲಾ?
ತುಜಾ ಆಧಾರಾನ್ ಮಾಯೆ ಆಜ್ಯಾಪ್ ಅಶೆ೦ ಘಡ್ಲಾ೦.
ಸ೦ಸಾರಾಚ್ಯಾ ಚಾರಾ೦ಯಿ ಕೊನ್ಶ್ಯಾ೦ನಿ
ಶಿ೦ಪೊಡ್ಲ್ಯಾ೦ತ್ ಆಮ್ಚಿ೦ ಭಾ೦ವ್ಡಾ೦
ತುಜ್ಯಾಚ್ ಉಸ್ಕ್ಯಾಕ್ ಪಾಟಿ೦ ಪೊರ್ತು೦ಕ್
ಹಳೂ ಕಾಡುನ್ ಆಸಾತ್ ಪಾವ್ಲಾ೦
ತುಜಾ ಆಧಾರಾನ್ ಮಾಯೆ ಆಜ್ಯಾಪ್ ಅಶೆ೦ ಘಡ್ಲಾ೦.
ಪರ್ಕಿ ದೇಸಾನಿ೦ ಫ಼ಾಸಾಳ್ಳೊ ಭಾವಾಡ್ತ್
ಮೊನ್ಶ್ಯಾಪೊಣ್ ಹಾ೦ಗಾ ಕಡ್ಲಾ೦
ತರೀ ಉದ್ಧಾರ್ ಸಗ್ಳ್ಯಾ೦ಕ್ ಕರ್ನ್೦ಚ್ ಆಸಾಯ್
ನಾತ್ಲ್ಯಾನಿ೦ ಜಾಯ್ತೆ೦ ಜೊಡ್ಲಾ೦
ತುಜಾ ಆಧಾರಾನ್ ಮಾಯೆ ಆಜ್ಯಾಪ್ ಅಶೆ೦ ಘಡ್ಲಾ೦
ತುಜ್ಯಾ ಮಾನಕ್ ಸಾ೦ಗಾತಾ ಮೆಳೊನ್
ಆಯ್ಲ್ಯಾ೦ತ್ ಹಿ೦ ನೆ೦ಟಿ೦ ಬಾಳಾ೦
ಜಿಡ್ಡೆ,ಶಿವ್ತಿ೦,ಅಬೊಲ್ಯಾ೦ ರಾಸ್
ತಾ೦ಚ್ಯಾ ಹಾಸ್ಯಾನ್೦ಚ್ ಫುಲ್ಲಿ೦ ಫುಲಾ೦!
ತುಜಾ ಆಧಾರಾನ್ ಮಾಯೆ ಆಜ್ಯಾಪ್ ಅಶೆ೦ ಘಡ್ಲಾ೦
ತುಜ್ಯಾ ಜಲ್ಮಾ ದಿಸಾ ಎಕಾಚ್ ತಾಳ್ಯಾನ್
ಗಾವು೦ಕ್ ಲಾಗ್ಲ್ಯಾ೦ವ್ ಗಾಣಾ೦
ತಾಳೊ೦ ಅಪ್ಸೊಚ್ ರ೦ಗೀನ್ ಜಾಲೊ
ಸಾದ್ಲೊ ಘರಾ೦, ಗಾ೦ವ್ ಆನಿ೦ ರಾಣಾ೦
ತುಜಾ ಆಧಾರಾನ್ ಮಾಯೆ ಆಜ್ಯಾಪ್ ಅಶೆ೦ ಘಡ್ಲಾ೦!
-ಕ್ಲೆರೆನ್ಸ್ ಕೈಕಂಬ
ತೆದ್ನಾಂ ಆಸ್ಲ್ಲೆಂ
ಗುರ್ಪುರ್ಚ್ಯಾ ಪೆಂಟೆಂತ್
ಸಾಂಜ್ ಜಾತಾನಾ
ಆಮ್ಚ್ಯಾಚ್ಚ್ ಜುವಾನ್ ಬಾಯೆನ್
ವಿಕೊನ್ ವಚಾನಾತ್ಲ್ಲ್ಯಾ
ಉಕಡ್ಲ್ಲ್ಯಾ ಕಣ್ಗೆಂತ್ಲೆ
ಲ್ಹಾನ್೦ಶೆ ಥಂಡ್ ಪಾಳ್
ಜಾಗ್ರುತ್ಕಾಯೆನ್ ವಿಂಚುನ್
ಹಾತಾರ್ ಘಾಲ್ಲೆಲೆಂ
ಸಾಲ್ ಕಾಡಿನಾಸ್ತಾಂ
ತಸೆಂಚ್ಚ್ ಚಾಬೊನ್ ಖಾತಾನಾ
ಪೊಟಾಕ್ ಜಾಲ್ಲಿ ಥಂಡಾಯ್
ಆಜೂನ್ ವಿಸ್ರೊಂಕ್ ಜಾಯ್ನಾ
ಜಾರ್ಧೊ ಯೆತಾನಾ
ಮಾಟಿಕುಳಾ ಪಾಟ್ಲ್ಯಾ
ಸುಕ್ಯಾ ಗಾದ್ಯಾಂತ್
ಪರ್ತಿಲ್ಲ್ಯಾ ವೊಳಿಂನಿಂ
ಚುಕೊನ್ ಉರ್ಲ್ಯೊಲ್ಯೊ
ನಿರ್ನಾಳ್ಚ್ಯಾ ಪಾವ್ಸಾಕ್
ಕಿರ್ಲಾಲ್ಲ್ಯೊ ಕಣ್ಗೆ ಘಾಂಟಿ
ಬೊಟಾಂನಿ ಉಸ್ತುನ್
ರುಕಾಡಾ ಕುಟ್ಟೆನ್ ಕಾಡುನ್
ಶಿಂದುನ್, ಪಿಯಾವ್ ತೇಲ್ ಘಾಲುನ್
ಮಾತಿಯೆ ಕುಂಡ್ಲ್ಯಾಂತ್
ಮೌಶೆನ್ ಕೆಲ್ಲಿ ’ಕಣ್ಗೆ ಉಪ್ಕಾರಿ’
ಕಿತ್ಲಿ ರುಚಿಕ್ ಆಸ್ಲ್ಲಿ ತೆಂ ಸಾಂಗ್ಚೆಂ ಕಸೆಂ?
ಶೀನ ಬೈದಾನ್ ಸುರ್ ಮುರುನ್
ಆದ್ಲ್ಯಾ ರಾತಿಂ
ಪೆಟ್ಯಾನ್ ಲೆವೊನ್ ಸಾಫ್ ಕೆಲ್ಲ್ಯಾ
ವ್ಹಡ್ಲ್ಯಾ ಬಾಣಾಲ್ಯಾಂತ್
ದೊನ್ಪಾರಾಂ ತೆಂ ರಾತಿಂ ಮ್ಹಣಾಸರ್
ಕಡವ್ನ್ ಆನಿಂ ಆಟವ್ನ್,
ಜಾಲ್ಲೆಂ ಸುರಯ್ ಗೋಡ್
ಚುಡೆತಿ ವೊಳ್ಯಾಂನಿ ವೊತ್ಲ್ಯಾ ಉಪ್ರಾಂತ್
ಬಾಣಾಲ್ಯಾಚ್ಯಾ ಪಂದಾಕ್ ಉರ್ಲ್ಲೊ
ಚೂರ್ ಇಲ್ಲೊ ಗೊಡಾ ಪಿಟೊ
ಶಿರೊತಿ ಕುಡ್ಕ್ಯಾರ್ ಘಾಲುನ್
ಖುಶೆನ್ ಹಾತಿಂ ದಿಲ್ಲೊ
ಮಜೆನ್ ಚಾಕ್ತಾನಾ ಜಾಲ್ಲೊ ತೊ
ಗೊಡಾಚೊ ಗೋಡ್ ಸಂತೊಸ್
ಆತಾಂ ಕಸೊ ಸಾಂಗೊಂ?
ತೆದ್ನಾಂ ನಾತ್ಲ್ಲೆಂ ಆತಾಂ ಅಸಾ...
ಮಜೆಚೊ ಫಿಜಾ, ಕುರ್ಕುರಿ ಕೆಏಪ್ಸಿ
ಖಾಣಾ ಜೆವ್ಣಾಚಿ ಸಾಟ್ಲಿ ಪೊಟ್ಲಿ
ಪುಣ್, ಹಾಂಚ್ಯಾ ಮಧೆಂ
ಜುವಾನ್ ಬಾಯೆಕ್ ಸೊಧ್ತಾಂ
ಮೌಶೆ ಪಾಟ್ಲ್ಯಾನ್ ದಾವೊಂಕ್ ಚಿಂತ್ತಾ
ಶೀನಾಚ್ಯಾ ಬಾಣಾಲ್ಯಾ ಸಮೊರ್ ಆಶೆನ್ ರಾವೊನ್
ಗೊಡಾ ರೂಚ್ ಚಾಕೊಂಕ್ ಆಶೆತಾಂ..
ತೆದ್ನಾಂ ನಾತ್ಲ್ಲೆಂ ಆತಾಂ ಆಸಾ
ತೆದ್ನಾಂಚಿ ರೂಚ್ ಮಾತ್ ಆತಾಂ ನಾ......
-ಮನೋಹರ್ ಸರ್ದೇಸಾಯ್
ಗೊಂಯ್ಚೊ ಆಂಬೊ
ಗೊಂಯ್ಚೊ ಆಂಬೊ
ಮ್ಹೊಂವಾ ಥೆಂಬೊ
ಗೊಂಯ್ಚ್ಯಾ ಪೊಲ್ಯಾರ್
ಭಾಂಗ್ರಾ ತಿಬೊ
ಗೊಂಯ್ಚ್ಯಾ ಆಂಬ್ಯಾಂತ್
ಚಾಂದ್ಣೆಂ ಆಸಾ
ಸುರ್ಯಾಚೆಂ ಕೀರ್ಣ್ ಆಸಾ
ಆಮ್ಚ್ಯಾ ಮೊಗಾಳ್ ಜಮ್ಣಿಂತ್ಲೊ
ಅಮೃತಾಚೊ ಕೊಳ್ಸೊ ಆಸಾ
ಝಾಂಯಾಂ-ಝುಂಯಾಂ ಪೊರೊಸ್ ದಾಟ್
ಗೊಂಯ್ಚ್ಯಾ ಆಂಬ್ಯಾಕ್ ಧೊಮ್ಧೊಮಾಟ್
ಭುರ್ಗ್ಯಾಂಚ್ಯಾ ಗಾಲಾ ಪೊರೊಸ್
ಗೊಂಯ್ಚೊ ಆಂಬೊ ರೋಸ್ರೊಶಿತ್
ಹೊಕ್ಲೆಚ್ಯಾ ವೋಂಟಾ ಪೊರೊಸ್
ಗೊಂಯ್ಚೊ ಆಂಬೊ ಲುಸ್ಲುಶಿತ್
ಹಾಲೊತ್, ಧಲೊತ್, ಲಜೊತ್, ಮಡೊತ್
ಪಾಚ್ವೊ ಪೊದೊರ್ ಆಂಗಾರ್ ಘೆತಾ
ಸತ್ರಾವೆಂ ವರ್ಸ್ ಫುಟುನ್
ಗೊಂಯ್ಚ್ಯಾ ಆಂಬ್ಯಾಂತ್ ರುಪಾಕ್ ಯೆತಾ
ಗೊಂಯ್ಚೊ ಆಂಬೊ ರೊಸಾಳ್ ಕವಿತ್
ಗೊಂಯ್ಚೊ ಆಂಬೊ ಗೊಂಯ್ಚೆಂ ಜಿವಿತ್
-ವಿನ್ಸಿ ಮೆಲ್ಕಾರ್
ಕೂಪನ್ ಆನಿ ಕೊಬು
ಆದ್ಲೊ ತೊ ಕಾಲ್ ಸಾಯ್ಬಾ ಬದ್ಲೊನ್ ಗೆಲಾ
ಪರ್ನೆ ಸರ್ವ್ ಆಳ್ವೊನ್ ಗೆಲಾ೦
ತು೦ ಕರ್, ವಾ ಹಾ೦ವ್ ಕರ್ತಾ೦ ಜಾಲಾ೦
ಮೊ೦ತಿ ಫೆಸ್ತ್ ಮಾತ್ರ್ ನಾ೦ವಾಕ್ ಜಾಲಾ೦
ವರ್ಸಾಕ್ ಏಕ್ ಪಾವ್ಟಿ೦ ಮಾಯೆಚ್ಯಾ ಪಾ೦ಯಾಥಳಾ
ಫುಲಾ೦ ಭರೊನ್ ವೊಮ್ತೊತಾತ್
ತೆ೦ಯೀ ನೊವ್ ದಿಸಾ೦ಚ್ಯಾ ಆಚರಣಾ ವೆಳಾ
ನಾ೦ವ್ ಜೊಡುನ್ ಘೆ೦ವ್ಚ್ಯಾಕ್
ಫೆಸ್ತಾಚ್ಯಾ ನಿಬಾನ್ ಗೊಡ್ಶೆ೦-ತಿಕ್ಶೆ೦ ವಾ೦ಟ್ತಾತ್
ಮೊ೦ತಿ ಫೆಸ್ತ್ ಮ್ಹಣ್ತಾನಾ
ಸಕ್ಟಾ೦ಕ್ಯೀ ಕೊಬಾಚೊಚ್ಚ್ ಉಗ್ಡಾಸ್
ಪಯ್ಲೆ೦ ಸಗ್ಳೊ ಕೊಬು ವಾ೦ಟ್ತಾಲೆ
ಆತಾ೦ ವರ್ಸಾ ಉತಾರ್ತಾ೦ ಆರ್ದೊ ಜಾವ್ನ್ ಗೆಲಾ
ತಿ ಲಾಯ್ನ್ ಸಾಯ್ಬಾ ಸಕ್ಟಾ೦ಚಿ
ಪಳೆವ್ನ್ ಪಾದ್ರ್ಯಾಬ್ ಥಟಕ್
ಪಾದ್ರಿ ಮತಿ೦ತ್ ಪುರ್ಪುರೊ೦ಕ್ ಲಾಗ್ಲೊ
ದಾನ್ ದಿಲ್ಲೊ ಕೊಬು ಥೊಡೊಚ್ಚ್
ತಾಳೊ ಪಿ೦ಜುನ್ ಬೊಬ್ ಘಾಲಿಲಾಗ್ಲೊ
ಫುಲಾ೦ ಹಾಡ್ಲ್ಯಾ೦ಕ್ ದಿಯಾ ಕುಪಾನಾಂ
ಉರ್ಲ್ಲ್ಯಾ೦ಕ್ ಲೊಟುನ್ ಘಾಲಾ ದಾರಾಭಾಯ್ರ್
ಕುಪಾನ್ ಕಾಣ್ಗೆಯಾ, ಕೊಬು ಘೆಯಾ
ನಾ೦ತರ್ ಆ೦ಗ್ಡಿಥಾವ್ನ್ ಮೊಲಾಕ್ ವ್ಹರಾ
ರಾವಾನಾಕಾತ್ ಕೊಬಾಚ್ಯಾ ಆಶೆನ್
ಹಾಡಿನಾಕಾತ್ ಫುಲಾ೦ ಕೊಬಾಚ್ಯಾ ನಿಬಾನ್
ಮಾಯೆಕ್ ದಿಯಾ ತುಮ್ಚೆ೦ ಕಾಳಿಜ್
ಮಾಗೊನ್ ಘೆಯಾ ಮಾಯೆಚಿಂ ಆಶಿರ್ವಾದಾ೦.
-ಆಸ್ಟಿನ್ ಸಾಲಿನ್ಸ್, ಬ್ರಹ್ಮಾವರ್
ಬಾವ್ಲ್ಲೆಂ ಫುಲ್
ಹರ್ಯೆಕ್ ದೀಸ್ ಫಾಂತ್ಯಾರ್ ಉಟ್ತಾನಾ
ಪರ್ತ್ಯಾನ್ ಕಾಮ್ ಸದಾಂಚೆಂ ಮ್ಹಣ್ ಚಿಂತಾನಾ
ಸ್ವಪಾಣ್ ತೆಂ ಸ್ವಪಾಣ್ಚ್ ಉರ್ತಾನಾ
ದೀಸ್ಭರ್ ಘೊಳ್ನಾಸ್ತಾಂ ಕೊಣೀ ಲೆಕ್ಚೊನಾ
ಮಾಗ್ತಾಂ ದೆವಾ ರಾಕ್ ತುಂ ಮ್ಹಜೆಂ ಕುಟಾಮ್
ಜೀಣ್ಭರ್ ಘೊಳ್ತೆಲಿಂ ಚಡಿತ್ ಶಿಕೊಂಕ್ ನಾಂ ಲಿಸಾಂವ್
ಆಧಾರ್ ಆಸ್ಲೊ ಸುರ್ವೆರ್, ಭರ್ವಶ್ಯಾಚೊ ದಿವೊ ಪೆಟಯ್ಲೊ
ಭುರ್ಗಿಂ ಗೊದಾಂ ಲ್ಹಾನ್ ಆಸ್ತಾಂಚ್ ಪತಿಕ್ ದೆವಾನ್ ಆಪಯ್ಲೊ
ಪಾವ್ಲಿಂ ಹಾಂವ್ ಆರ್ಬ್ಯಾಂಚ್ಯಾ ಘರಾ ಆಯಾ ಜಾಂವ್ಕ್
ಪ್ರಾಯೆಸ್ತ್ ಮಾಂಯ್, ಪಾಯ್ಕ್ ಆಧಾರ್ ದೀಂವ್ಕ್
ಭುರ್ಗ್ಯಾಂನಿ ಬರೊ ಫುಡಾರ್ ಪಳೆಂವ್ಕ್
ತಾಣಿಂ ಪುಣೀ, ಘನಾನ್ ಮನಾನ್ ಜಿಯೆಂವ್ಕ್
ಪಯ್ಲೆಂ ಪುಸ್ತಾಂ ಸಗ್ಳ್ಯಾ ಘರಾಂತ್ ಧರ್ನ್
ತಾಚೆ ಉಪ್ರಾಂತ್ ಫುಲಾಂ ಝಾಡುಂಕ್ ಉದಾಕ್ ಮಾರ್ನ್
ಭಿತರ್ ನಾಸ್ಟೊ ತಯಾರ್ ಕರ್, ಆಯ್ಲೆಂ ಫರ್ಮಾಣ್
ಚುಕ್ಲಿಂ ತರ್ ಪಡ್ತಾಲೆ ಮಾರ್, ಜಿವಾಂತ್ ನಾ ಮ್ಹಜ್ಯಾ ತ್ರಾಣ್
ಹಾಂಚಾ ಘರಾಂತ್ ಭುರ್ಗಿಂ ಲೇಕ್ ಮೀತ್ ನಾತ್ಲಿಂ
ಉಕಲ್ತಾನಾ ಭಗ್ತಾ ಪೆಂಕ್ಟಾಚಿ ಖಿಳ್ ಪುಣಿ ಮೊಡ್ಲಿ
ತರೀ ಮೋಗ್ ತಾಂಚೊ ಕರ್ತಾಂ, ಉಕ್ಲುನ್ ವೇಂಗ್ ಮಾರ್ತಾಂ
ತೆಚ್ ಪ್ರಾಯೆಚಿಂ ಭುರ್ಗಿಂ ಮ್ಹಜಿಂ ನಿಯಾಳ್ನ್ ತಾಂಕಾಂ ರಡ್ತಾಂ
ವೇಳ್ಘಡಿ ಮೆಜುನ್, ಮೆಜುನ್ ಯೆತಾ ದೀಸ್ ಸುಕ್ರಾರಾಚೊ
ಖ್ಯಾಸ್ತಿಂತ್ ಹಾಂವ್ ಆಸ್ಲ್ಯಾರೀ, ಥೊಡೊಚ್ ವೇಳ್ ಸಂತೊಸಾಚೊ
ಫುಲ್ಲ್ಲೆಂ ಫುಲ್ ವೊತಾಕ್ ಬಾವ್ಲ್ಲೆಪರಿಂ, ಮೊಗಾಚಿ ಶೆಳ್ ನಾಸ್ತಾಂ ಕಾಳಿಜ್ ಸುಕ್ಲ್ಲೆಂ ತರೀ
ಇಲ್ಲೊ ಪೌಡರ್, ಹಫ್ತ್ಯಾಂತ್ ಏಕ್ ದೀಸ್ ಬರೆಂ ನ್ಹೆಸ್ಚೆಂ, ವಿಸ್ರಾಲ್ಲಿಂ ಕಷ್ಟ್
ಆಂಗ್ಡಿ ಸಾಲಾಂನಿ ಚಲ್ತಾನಾಂ, ಥೊಡ್ಯಾಂಚಿ ಖೊಟಿ ನದರ್, ಶೆಳಿಯೆಚೆರ್ ವಾಗ್ಟಾ ದೀಷ್ಟ್!
ಪಾವ್ತಾಂ ಹಾಂವ್ ಇಗರ್ಜೆಚಾ ಬಾಗ್ಲಾಕ್
ಸಮಧಾನ್ ಭಗ್ಚಾ ದೆವಾಚಾ ತೆಂಪ್ಲಾಕ್
ಲಜೆನ್ ಘಾಲ್ಚೆಂ ಇಜ್ಮೊಲ್ ಎಕ್ಚ್ ನಾಣೆಂ, ನಾಂತ್ ದಿನಾರ್
ಉಡಾಸ್ ಆಯ್ಲೊ ಸೊಮ್ಯಾಂ ತುವೆಂ ಸಾಂಗ್ಲ್ಲಿ ವಿಧ್ವಿಚಿ ವೊಪಾರ್
ಘಡ್ಯೆನ್ ಧಾಂವ್ಲೊ ವೇಳ್, ಪರತ್ ಧನ್ಯಾ ಘರಾ ಪಾವ್ತಾಂ
ಗಾಂವ್ಚಿ ಚೀಟ್ ಆಯ್ಲ್ಯಾ, ವಾಚುಂಕ್ ಹಾಂವೀ ಅತ್ರೆಗ್ತಾಂ
ಪಯ್ಲೆಂ ಚಾರ್ ಸಬ್ಧ್ ಬರೆ, ಮುಕ್ಲೆಂ ವಾಯ್ಟ್ಚ್ ಘಡ್ಲಾಂ
ಪಾವ್ಸಾಕ್ ಕೊಲ್ವಾಚೆಂ ಪಾಕೆಂ ಆಮ್ಚೆಂ ಕೊಸ್ಳೊನ್ ಪಡ್ಲಾಂ.
ಕಾಮಾಂ ಪಾಟ್ಲ್ಯಾನ್ ಕಾಮ್, ಮದ್ಯಾನ್ ಪರ್ಯಾಂತ್
ಸಂಸಾರ್ ಸಗ್ಳೊ ವಿಶೆವಾಂತ್, ಹಾಂವ್ ಎಕ್ಸುರಿ ಕಾಮಾಂತ್
ನಿದ್ಲ್ಯಾರೀ ತೊಪ್ತಾ ತೆಂಚ್ ಚಿಂತಾಪ್, ಹಾಯ್ ದುರ್ಬಳ್ಪಣಾ
ಹಾಚೆ ಶಿವಾಯ್ ದುಸ್ರೊ ಸಂಸಾರ್ ಮ್ಹಾಕಾ ನಾ ಕೊಣ್ಣಾ?
-ಲವಿನಾ ಡೆ’ಸಾ, ಪಾಂಗ್ಳಾ/ಮಸ್ಕತ್
ಮರಿಯೆಚಿ ವಳೊಕ್
ವಳೊಕ್ ಕರ್ಯಾಂ ಹ್ಯಾ ಭಾಗಿ ಕುಟ್ಮಾಚಿ,
ಜೊಕಿಮ್, ಆನ್ನ ಅನಿ ತಾಂಚೆಂ ಬಾಳ್ ಮರಿಯೆಚಿ
ಜೆರುಜಲೆಮಾಚ್ಯಾ ಗ್ರೇಸ್ತ್ ಕುಟ್ಮಾಂತ್ಲ್ಯಾ ಜೊಕಿಮಾನ್,
ಲೆವಿ ಕುಳಿಯೆಚ್ಯಾ ಆನ್ನಾಕ್ ಕೆಲಿ ಪತಿಣ್ ಸೊಂತೊಸಾನ್
ಪನ್ನಾಸ್ ವರ್ಸಾಂ ಸಾರ್ಲಿ ತಾಣಿಂ ಸಾಂಗಾತಾ ಕಾಜಾರಾಚಿಂ,
ಫಾವೊ ಜಾಲೆಂನಾ ಭಾಗ್ ತಾಂಚ್ಯಾಚ್ ಭುರ್ಗ್ಯಾಕ್ ಖೆಳಂವ್ಚೆಂ.
ನ್ಹಿಸಂತಾನ್ ದೆಕುನ್ ನಿರಾಕರ್ಸಿಲಿ ಭೆಟವ್ಣಿ ತಾಂಚಿ ದೆವಾಳಾಂತ್,
ಲೊಕಾನಿಂ ವಾಯ್ಟ್ ಉಲವ್ನ್ ಬುಡಯ್ಲೆಂ ಆಕ್ಮಾನಾಂತ್.
ತರೀ ದೇವ್-ಭಕ್ತ್ ಸಾಂಡ್ಲಿನಾ ಹ್ಯಾ ಜೊಡ್ಯಾನ್,
ಹರ್ಯೆಕ್ ದೀಸ್ ಸಾರ್ಲೊ ಮಾಗ್ಣ್ಯಾ- ಉಪಾಸಾನ್.
ಮೆಚ್ವೊನ್ ತಾಂಚ್ಯಾ ತ್ಯಾಗ್ ಆನಿ ಭಾವಾರ್ಥಾಕ್,
ಫಾವೊ ಕೆಲೆಂ ತಾಂಕಾ ಮಹೊನ್ನತನ್ ಎಕಾ ಸೊಭಿತ್ ಮಾಣ್ಕಾಕ್.
ನಿಸ್ಕಳ್ಪಣಾಚಿ ಜಿಣಿ ಜಿಯೆಂವ್ಕ್ ಪಾವ್ಲಿ ತಿ ಚಲಿ,
ದೆಕುನ್ ದೆವಾನ್ ತಿಕಾ ಆಪ್ಲ್ಯಾ ಪುತಾಚಿ ಆವಯ್ ಕೆಲಿ.
ಕಾಳಿಜ್ ತಿಚೆಂ ಪಾಪ್ಸಿಲೆಂ ಸಾತ್ ದುಖಿಚ್ಯಾ ತಾಲ್ವಾರಿಂನಿ,
ದೆವಾಚ್ಯಾ ಖುಶೆಕ್ ಮಾನ್ ಬಾಗವ್ನ್ ಜಿಯೆಲಿ ಖಾಲ್ತೆಪಣಿಂ.
ಖುರ್ಸಾಮುಳಿಂ ತ್ಯಾಗ್ ಕೆಲೊ ತಿಚ್ಯಾ ಎಕ್ಲ್ಯಾಚ್ ಪುತಾಕ್,
ಆಮಿಂ ಸಾಲ್ವಾರ್ ಜಾವ್ನ್ ಸರ್ಗಾ ರಾಜ್ಯಾಕ್ ಪಾಂವ್ಚ್ಯಾಕ್.
ಜೆಜುನ್ ತಿಕಾ ಕೆಲಿ ಮಾಂಯ್ ಹ್ಯಾ ಮನ್ಶ್ಯಾಕುಳಾಚಿ,
ದೆವಾನ್ ತಿಕಾ ಠರಯ್ಲಿ ರಾಣಿ ಮ್ಹಣ್ ಸರ್ಗಾ-ಸಂಸಾರಾಚಿ.
ಆಮಾ ನಿರ್ಭಾಗಿ ಪಾತ್ಕ್ಯಾಂಚೊ ಆಧಾರ್ ತಿ ಜಾತಾ
ಹಿಚ್ ಜೊಕಿಮ್ ಆನಿ ಆನ್ನಾಚಿ ಧುವ್ ಮರಿ ಆಮ್ಚಿ ಮಾತಾ.
-ಆನ್ಸಿ ಪಾಲಡ್ಕಾ
ತುಂ-ಗೋ ಫುಲಾ
ರಾನಾ ಮೊಲ್ಯಾ ಝಡಾಂ ಮಧೆಂ
ಫುಲೊನ್ ಸೊಭ್ಚ್ಯಾ ಯೇ ಫುಲಾ
ಕೊಣಾ ಖಾತಿರ್ ಫುಲೊನ್ ರಾವ್ಲಾಂಯ್
ಭುಲೊನ್ ಉತರ್ ದಿಲಾಂ.........?
ಸೆಜ್ರಾ ಶೆರಾ ರಾಯಾ ಕುಂವರ್
ತಾಕಾ ಪೊಯ್ಗೊ ಆಜ್ ಕುರ್ವಾರ್
ಹಜ್ರಾಂತುಲೆಂ ತುಂಯಿ ಏಕ್ ತರ್
ಕಾಜ್ರಾವಿಣೆ ತುಂ ಗುರ್ವಾರ್.
ಸುವಾಸ್ ತುಜೊ ಸುಗಂಧ್ ಪೊಯ್ಗೊ
ರಾನಾ ಭಾಯ್ರ್ಯೀ ಪ್ರಸಾರ್ತಾ
ನಿವಾಸ್ ತುಜೊ ರಾನಾಂತ್ ನ್ಹಯ್ಗೊ
ಕೋಣ್ಗೊ ತುಕಾ ವಿಚಾರ್ತಾ....?
ಸುಂದರಿ ತಿ ಜಾಂವ್ಗೊ ಸಂಸ್ರಾಂತ್
ತುಕಾ ಉತರ್ ದಿಂವ್ಚಿನಾ
ಗುಡೆ ದೊಂಗರ್ ಫಾತೊರ್ ಕಚ್ರ್ಯಾಂತ್
ಪಾವ್ಲಾಂ ಕಾಡುನ್ ಯೆಂವ್ಚಿನಾ
ಪ್ರಕಾಸ್ ತುಜೊ ಇತ್ಲೋಯ್ ಚಡ್ಲಾ
ಸುರ್ಯೋಯಿ ಲಜೆನ್ ದೊಡ್ಲಾ
ಆಕಾಸ್ ತಾರಾಂ ಪಾಟ್ಲಾಮ್ ಚಿಡ್ಲ್ಯಾ
ಕೊಣೇಂಯ್ ಕಾಂಯ್ ತುಕಾ ನಾಡ್ಲಾಂ?
ಫುಲ್ಕಾರ್ನ್ ಫುಲಾಕ್ ಭುಲ್ಚೆಂಗೊ ನ್ಹಂಯ್
ಖುಂಟುನ್ ಶ್ಹೆರಾಕ್ ವ್ಹರ್ತೆಲಿ
ಕೊಣಾ ಕೊಣಾ ಸುಣ್ಯಾ ಸವಾಯ್
ತುಜೊ ವಿಕ್ರೊ ಕರ್ತೆಲಿ
ಕೊರ್ಗೊರ್ಲ್ಯಾಚಿ ಪುಟ್ಲಿಗೊ ಹಾಂವ್
ಮ್ಹಜೆರ್ ಶಿಣೊನಾಕಾಗೊ
ಕಾಳಿಂ ತರೀ ಲಕ್ಷಣ್ಗೊ ಹಾಂವ್
ಕಾಡುನ್ ವ್ಹರೂಂ ತುಕಾಗೋ...?
ದೆವಾಳಾಂತ್ಲ್ಯಾ ದೇವಿಲಾಗಿಂ
ಬೆಂಜಾರ್ ಕರ್ಚ್ಯಾಕ್ ವ್ಹರ್ತೆಲಿಂ
ಸೊಭಿತ್ ಸುಂದರ್ ಮ್ಹಜ್ಯಾ ರಾಯಾಕ್
ಮಾನಾನ್ ಅರ್ಪಣ್ ಕರ್ತೆಲಿಂ.
-ಎಚ್ಚೆಮ್
ವೋಂಯ್
ತುಜ್ಯಾ ಮ್ಹಜ್ಯಾ ಘರಾಕ್ ಆಂಗಾಣ್ ಎಕ್ಚ್
ಹಾಸೊನ್ ಖೆಳೊನ್ ತಾಂತುಂ ಆಮ್ಚಿಂ ಭುರ್ಗಿಂ ವಾಡ್ಲಿಂ
ಮ್ಹಜ್ಯಾ ಧುವೆಕ್ ತುವೆಂ ಪಾಂತಿ ಭಾಂದ್ತಾನಾ ಹಾವೆಂ
ತಾಚೆರ್ ಫುಲಾಂ ಮಾಳ್ಳಿಂ, ಪೂತ್ ತುಜೊ ಲಿಸಾಂವ್
ಕರ್ತಾನಾ ಹಾಂವ್ ಟಿವಿ ಬಂದ್ ಕರುನ್ ಬಸ್ಲೊಂ
ಧುವೆಕ್ ಮ್ಹಜ್ಯಾ ಶೆಗುಣ್ ತುಜೆ ಕಸೆ ಗೊಂವಾ ಬಣ್
ಪುತಾಕ್ ತುಜ್ಯಾ ದೊಳೆ ಮ್ಹಜೆ ತಸೆಂ ವಾಗಾ ತ್ರಾಣ್
ಆಂಗ್ಣಾಂತ್ ವಾಡ್ಲ್ಲಿಂ ಭುರ್ಗಿಂ ಆತಾಂ ಪಾವ್ಲ್ಯಾಂತ್ ಅಮೆರಿಕಾ
ನಾತ್ರಾಂ ಆಮ್ಚಿಂ ಖೆಳೊಂಕ್ ತಯಾರ್ ನಾಂತ್ ಆಂಗ್ಣಾಂತ್ ಹ್ಯಾ
ಆತಾಂ ತುಜೆಂ ಘರ್ ತುಕಾ ಮ್ಹಜೆಂ ಮ್ಹಾಕಾ
ತಸೆಂ ಖೆಳ್ಚಿಂ ಭುರ್ಗಿಂ ನಾತ್ಲ್ಲೆಂ ಆಂಗಣ್ ಕಿತ್ಯಾ?
-ಆರ್ಥರ್ ಜೆ. ಪಿರೇರಾ
ನಮೋ ತುಕಾ ಬಾಳೊಕ್ ಮರಿಯೆ
ಸಾಂ ಜೊಕಿಚ್ಯಾ ಘರಿಂ, ಸಾಂ ಆನ್ನಾಚ್ಯಾ ಉದರಿಂ
ಉದೆಲೆಂ ನೆಕೆತ್ರ್, ಜಲ್ಮೊನ್ ಹ್ಯಾ ಸಂಸಾರಿ
ಕೊಣಾಕ್ ತರಿ ತಿಕಾ ಆಮಿಂ ಕರು ಸರಿ
ತಿ ಜಿಯೆತಾ ಹರ್ಯೆಕ್ಲ್ಯಾಚ್ಯಾಯಿ ಘರಾನ್ ಘರಿಂ ವ್ಹಯ್,
ತಿ ಆಮ್ಚಿ, ಆಮಾ ಸರ್ವಾಂಚಿ ಬಾಳೊಕ್ ಮರಿ
ಗಾಣಾಂ ಗಾಂವುನ್ ಸಂಗಿಂ, ತಾಳೆ ಮೆಳೊಂಯಾಂ
ಶಿಂವ್ತಿಂ, ಕಳೆ, ಆಬೊಲಿಂ, ಫುಲಾಂ ಅರ್ಪುಯಾಂ
ತಿಚೆ ಸಮೊರ್ ಆಮಿಂ ಏಕ್ ಜಾವ್ಯಾಂ
ದೀನ್ಪಣಿಂ ಎಕಾ ಕಾಳ್ಜಾನ್ ಹರ್ಸುಂಯಾಂ
ನಮೋ ತುಕಾ ಬಾಳೊಕ್ ಮರಿಯೆ, ಮರಿಯೆಕ್ ಹೊಗಳ್ಸಿಯಾಂ
ಭರೊನ್ ಅಸಾಂ ನವೆಂ ಕಣ್ಶ್ಯಾ ಭಾತಾಂನಿ
ಬಾಳೊಕ್ ಮರಿಯೆಚ್ಯಾ ಧಾರಾಳ್ ಭೆಸಾಂವಾಂನಿ
ಮಾಗೊನ್ ತಿಚೆಲಾಗಿಂ ಜೆವ್ತಾಂವ್ ಆಮಿಂ
ಜಾತಾಂವ್ ಏಕ್ ಕುಟಾಮ್ ತಿಚೆಂ ನಾಂವಿಂ ಅಶೆಂ,
ನವೆಂ ಜಿವಿತ್ ಉಘಡ್ತಾ ಹರ್ಯೆಕಾ ಘರಾಂನಿ
ಆಜ್ ಸೊಭ್ತಾಯ್ ಘರಿಂ, ತುಂ ಜಾವ್ನ್ ಬಾಳ್
ರೆಂವೆ ವಯ್ಲ್ಯಾ ಆಮ್ಚ್ಯಾ ಪಾವ್ಲಾಂಕ್ ದ್ ತು ಬಳ್
ಉಬೊನ್ ಆಸ್ಚ್ಯಾ ಸಪ್ಣಾಂಕ್, ಲಾಭಯ್ ಹತಾಥಳ್
ಆಪಾಪ್ಲ್ಯಾಚೆಂ ಜಾಂವ್ ಜಿವಿತ್, ಮೊಗಾಳ್ ಭೋವ್ ಮೊವಾಳ್ ದೆಕುನ್,
ಆಮಾಂ ಸರ್ವಾಂಕ್ ತುಂ ಭರ್,
ತುಜ್ಯಾ ಆಶಿರ್ವಾದಾಂನಿ ವ್ಹಾಳ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.