ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಾಂವ್ ಸರ್ವಾಂಚೊ ಬಾಪ್
ಗಿಬ್ಬಾ ಕುಲ್ಶೇಕರ್
ನಾಂವ್ : ಗಿಲ್ಬರ್ಟ್ ಸಲ್ಡಾನ್ಹಾ
ಲಿಖ್ಣೆ ನಾಂವಾಂ : ಗಿಬ್ಬಾ ಕುಲ್ಶೇಕರ್
ಜನನ್ : 08 ಫೆಬ್ರೆರ್ 1953.
ಜಲ್ಮಾಲ್ಲೊ ಗಾಂವ್ : ಕುಲ್ಶೇಕರ್
ವಳೊಕ್: ಗಿಬ್ಬಾ ಕುಲ್ಶೇಕರ್ ಪಾಟ್ಲ್ಯಾ ಪಾಂತೀಸ್-ಚಾಳಿಸ್ ವರ್ಸಾಂ ಥಾವ್ನ್ ಅಪ್ರೂಪ್ ತರ್ಯೀ ಬರವ್ನ್ ಆಯ್ಲಾ. ಹಾಚ್ಯೊ ಕಾಣ್ಯೊ ಮನರಂಜನಾಚ್ಯೊ ತಶೆಂಚ್ ಸಸ್ಪೆನ್ಸ್/ಥ್ರಿಲ್ಲರ್. ಹಿಂದಿ ಕಾದಂಬರಿಂಕ್ ಚಡ್ ಖಾಯ್ಸ್ ಕರ್ಚಾ ಹಾಣೆಂ ಎದೊಳ್ ಕೊಂಕ್ಣೆಂತ್ ಬರಯಿಲ್ಲ್ಯೊ ಮಟ್ವ್ಯೊ ಕಾಣ್ಯೊ ಥೊಡ್ಯೊಚ್ ತರ್ಯೀ, ವಾಚ್ಪ್ಯಾಂಕ್ ಅಪ್ಲೆಚ್ಚ್ ಶೈಲೆರ್ ತಾಣೆಂ ಭರ್ಪೂರ್ ಮನರಂಜನ್ ದಿಲಾಂ ತೆಂ ಖಂಡಿತ್. ಕೊಂಕ್ಣಿ ಸಾಹಿತ್ಯಾಚೊ ಚಕ್ರವರ್ತಿ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚೊ ಆದರ್ಶ್ ಆನಿ ಪ್ರೇರಣ್ ಮ್ಹಣ್ಚಾ ಹಾಣೆಂ ಕಾಣ್ಯಾಂ ಶಿವಾಯ್ ಸಭಾರ್ ನೀಳ್ಗಥಾ/ಸಾಂಕಳ್ ಕಥಾ ಹಾಣೆಂ ಬರಯ್ಲ್ಯಾತ್. ತಾಂತ್ಲಿ ಏಕ್ ಜಾವ್ನಾಸಾ ರಗ್ತಾಳೊ ಖೆಳ್.
ಸುರ್ವಿಲಿಂ ದೋನ್ ಉತ್ರಾಂ
ಸಾಹಿತ್ಯಾಂತ್ ಹರ್ಯೆಕ್ ಪ್ರಕಾರಾಚ್ಯಾ ಸಾಹಿತಾಕ್ ಅಪ್ಲೊಚ್ ಮಹತ್ವ್ ಆನಿ ಗರ್ಜ್ ಆಸ್ತಾಚ್. ಮ್ಹಜ್ಯಾ ಭುರ್ಗ್ಯಾಪಣಾಚ್ಯಾ ಕಾಳಾರ್ ಲೊಕಾಕ್ ಮನರಂಜನಾಕ್ ಹೆರ್ ಮಾಧ್ಯಮಾ ನಾತ್ಲಿಂ, ಅಶೆಂ ಲಾಂಬ್ ಸಾಂಕಳ್ ಕಾಣ್ಯೊ, ಕಾದಂಬರಿ ಲೋಕ್ ಖೂಬ್ ವಾಚ್ತಾಲೊ ಆನಿ ಪಸಂದ್ ಕರ್ತಾಲೊ. ಪುಣ್ ಆಯ್ಚೊ ಕಾಳ್ ತಸೊ ಜಾವ್ನ್ ಉರೊಂಕ್ ನಾ, ಮನರಂಜನಾಚಿ ಜಾಯ್ತಿಂ ಮಾಧ್ಯಮಾಂ ಆಜ್ ಆಮ್ಚ್ಯಾ ಲೊಕಾಂಕ್ ಉಪಲಬ್ಧ್ ಜಾವ್ನ್ ಆಸಾತ್. ಹ್ಯಾ ಪ್ರಮುಕ್ ಕಾರಣಾ ಪಾಸತ್ ಆಜ್ ಸಾಹಿತ್ಯ್ ವಾಸ್ಚ್ಯಾ ಲೊಕಾಂಚೊ ಸಂಖೊ ಉಣೊಂಚ್ ಜಾಲಾ, ತರ್ಯೀ ವಾಚ್ತೆಲೆ ವಾಚ್ಪಿ ಅಜೂನ್ ಆಸಾತ್ ಮ್ಹಳ್ಳೆಂಯ್ ಖರೋಖರ್ ಸತ್ಚ್.
ಲಾಂಬ್/ಸಾಂಕಳ್ ಕಾಣ್ಯಾಂನಿ ಹಾಂವ್ ವಾಚ್ಪ್ಯಾಕ್ ಕಿತೆಂ ದೀಂವ್ಕ್ ಆಶೆತಾಂ ಮ್ಹಣ್ಚ್ಯಾಧಿಂ, ವಾಚ್ಪಿ ಕಿತೆಂ ಆಶೆತಾತ್ ಮ್ಹಳ್ಳೆಂ ಪಯ್ಲೆಂ ಉಲ್ಲೇಕ್ ಕರುಂ ತರ್; ಆಯ್ಚ್ಯಾ ಕಾಳಾರ್, ತೆಂಯೀ ಕೊಂಕ್ಣೆಂತ್, ಎಕಾ ವಾಚ್ಪ್ಯಾಕ್ ಶಿಕ್ಶಿತ್ ಕರ್ಚಿ, ತಾಣೆಂ ದಿಂವ್ಚ್ಯಾ ವೆಳಾಕ್ ಜೊಕ್ತೆಂ ರಿಟರ್ನ್ಸ್ ದಿಂವ್ಕ್ ಜಾಂವ್ ವೈಗ್ಯಾನಿಕ್, ತಾತ್ವಿಕ್, ಜಾಣ್ವಿಕ್, ವಾ ಹೆರ್ ರಿತಿಂನಿ ಭರ್ಪೂರ್ ಮಾಹೆತ್ ದಿಂವ್ಚ್ಯಾ ಕಾದಂಬರೆಂಚಿ ಸುಕಿಧಾಡ್ ಕೊಂಕ್ಣೆಂತ್ ಆಸ್ಚಿ ಉಟೊನ್ ದಿಸ್ತಾ; ತಿ ಮ್ಹಜ್ಯಾ ತಾಂಕಿಭಾಯ್ಲಿ. ಪುಣ್ ಸಾಂಕಳ್ ಕಾಣ್ಯಾಂನಿ ಥ್ರಿಲ್ಲರ್, ಸಸ್ಪೆನ್ಸ್, ಆನಿ ಖೂಬ್ ಮನರಂಜನ್ ದಿಂವ್ಚ್ಯಾ ಕಾಣ್ಯಾಂಚೊಯ್ ಸುಕಿಧಾಡ್ ಆಸಾ ಆನಿ ಮ್ಹಜಿ ವಿಂಚವ್ಣ್ ಹಿಚ್ಚ್ ಜಾವ್ನಾಸಾ. ಯೆದೊಳ್ ಮ್ಹಣಾಸರ್ ಪತ್ರಾಂನಿ ಮಾತ್ರ್ ಕಾದಂಬರಿ/ಸಾಂಕಳ್ ಕಾಣ್ಯೊ ಪರ್ಗಟ್ ಜಾತಾಲ್ಯೊ ತರ್, ಆತಾಂ ಅಂತರ್ಜಾಳಿ ಮುಖಾಂತ್ರ್ ಜಾಯ್ತ್ಯಾ ವಾಚ್ಪ್ಯಾಂಕ್ ಪಾವ್ತಾತ್ ಮ್ಹಳ್ಳೆಂ ಭೋವ್ ಸಮಧಾನೆಚೆಂ. ಮ್ಹಜಿ ’ರಗ್ತಾಳೊ ಖೆಳ್’ ಸಾಂಕಳ್ ಕಾಣಿ ವಾಚ್ಲ್ಲ್ಯಾ ಸಭಾರ್ ಇಶ್ಟಾಂನಿ, ವಳ್ಕಿಚ್ಯಾಂನಿ ಮ್ಹಾಕಾ ಶಾಭಾಸ್ಕಿ ಪಾಟಯ್ಲ್ಯಾ. ಹೊ ಆವ್ಕಾಸ್ ಮ್ಹಾಕಾ ಫಾವೊ ಕೆಲ್ಲ್ಯಾ ಮ್ಹಜ್ಯಾ ಮೊಗಾಚ್ಯಾ ದಾಯ್ಜ್ ಪಂಗ್ಡಾಕ್ ಉಲ್ಲಾಸ್ ಆನಿ ಧಿನ್ವಾಸ್.
ಆಯ್ಚ್ಯಾ ಚಾಲು ಸಂಸಾರಾಂತ್ ಜಿಯೆಂವ್ಕ್ ಜಾಯ್ ತರ್, ಹ್ಯಾ ಚಾಲುಮನ್ಶ್ಯಾಂಚೊ ಬಾಪುಯ್ ಜಾಂವ್ಚಿ ಗರ್ಜ್ ಆಸಾ. ಹೆಂಚ್ ತೀರ್ಳ್ ಹ್ಯಾ ಕಾಣ್ಯೆಚೆಂ. ಚಡ್ತಾವ್ ಜಾವ್ನ್ ಹಿಂದಿ ಸಾಹಿತ್ಯಾಚೆಂ ಪ್ರೇರಣ್ ಆಸ್ಚ್ಯಾ ಹಾಂವೆಂಯೀ ಮ್ಹಜ್ಯಾ ತಾಂಕಿಪ್ರಕಾರ್ ವಾಚ್ಪ್ಯಾಕ್ ಮನರಂಜಿತ್ ಕರ್ಚೆಂ ಪ್ರೇತನ್ ಕೆಲಾಂ, ಹಿ ಕಾದಂಬರಿ ತುಕಾ ಮೆಟಾಂ ಮೆಟಾಂಕ್ ಫುಡೆಂ ಕಿತೆಂ ಜಾತಾ ಕೊಣ್ಣಾ ಮ್ಹಣ್ ರಾಕಾಶೆಂ ಕರ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ. ಹ್ಯೇ ಕಾಣ್ಯೆವಿಶಿಂ ತುಜೆ ವಿಚಾರ್ ಮ್ಹಾಕಾ ಧಾಡ್ನ್ ದೀಂವ್ಕ್ ದಾಕ್ಶೆನಾಕಾತ್, ವಿಂಚ್ಣಾರ್ ವಿಚಾರ್ ದಾಯ್ಜ್.ಕೊಮ್ಚೆರ್ ಪರ್ಗಟ್ತೆಲೆ.
ತುಮ್ಚೆಥಂಯ್ ಮಯ್ಪಾಸಿ,
ಗಿಬ್ಬಾ ಕುಲ್ಶೇಕರ್
ಹಾಂವ್ ಸರ್ವಾಂಚೊ ಬಾಪ್
[ಸುರ್ವಿಲೊ ಅವಸ್ವರ್ ವಾಚುಂಕ್ ನಾಂಯ್ ತರ್ ಹಾಂಗಾಸರ್ ಭೆಟ್ ದಿ]
ಮುಂಬಯ್ ಶ್ಹೆರ್.
ಜನೆರ್ ಮಯ್ನ್ಯಾಚಿ ಆಟ್ರಾ ತಾರಿಕ್.
ಆಪ್ಲ್ಯಾ ಮೊಗಾಚ್ಯಾ ಮನ್ಶ್ಯಾಂಕ್ ತಾತ್ಕಾಲಾಚೊ ಆದೇವ್ಸ್ ಮಾಗೊನ್, ಬಾಲುಪಿಳ್ಳೆನ್ ದಿಲ್ಲ್ಯಾ ವಿಳಾಸಾರ್ ಪಾವ್ಲೊ ರೋಹಿತ್.
ಬಾಲುಪಿಳ್ಳೆನ್ ಹಾರ್ಧಿಕ್ ದೆವ್ಕಾರ್ ಮಾಗ್ಲೊ ತರ್ನಾಟ್ಯಾಕ್.
ದಪ್ತಾರಾಂತ್ ಬಿಗ್ ಡೆಡಿ ನಾತ್ಲ್ಲೊ.
"ಲಾಂಭಾಯೆಚೆಂ ಪಯ್ಣ್ ಕರುನ್ ತುಂ ಆಯ್ಲಾಯ್". ರೋಹಿತಾಕ್ ವೆಂಗೆಂತ್ ಘೆತ್ಲೊ ಪಿಳ್ಳೆನ್. "ಥಕ್ಲಾಯ್ ಮ್ಹಜ್ಯಾ ಇಷ್ಟಾ?" ತಾಚ್ಯಾ ತಾಳ್ಯಾಂತ್ ಮೊವ್ಶಾಣ್ ಆಸ್ಲ್ಲಿ. ತಾಚ್ಯಾ ವೆಂಗೆಂತ್ ಮಯ್ಪಾಸ್ ಆಸ್ಲ್ಲೊ.
"ನಿಜಾಯ್ಕಿ ವ್ಹಯ್" ಹಾಳ್ವಾಯೆನ್ ಪಿಂರ್ಗಾಲೊ ರೋಹಿತ್. ತಾಚಿ ನದರ್ ರಿಸೆಪ್ಶನ್ ಕೌಂಟರಾರ್ ಗೆಲಿ. ರಿಸೆಪ್ಶನ್ ಚೆಡ್ವಾನ್ ಪೊಕ್ರಿ ಹಾಸೊ ದಿಲೊ. ಹಾಸ್ತಾನಾ ಚೆಡ್ವಾಚಾ ಗಾಲಾಂ ವಯ್ರ್ ಪೊಂಡ್ಕುಲ್ ಉದೆಲೆ.
"ರೋಹಿತ್ ಪಾಠಕ್..." ವಳಕ್ ಕರುನ್ ದಿಲಿ ಪಿಳ್ಳೆನ್. "ರತಿ ಚಾವ್ಲಾ ಹ್ಯಾ ದಪ್ತಾರಾಂತ್ಲೊ ಸೊಭಿತ್ ಗುಲೊಬ್".
ಉಟೊನ್ ಉಭೆಂ ಜಾಲ್ಲ್ಯಾ ಚೆಡ್ವಾನ್ ರೋಹಿತಾಚೊ ಹಾತ್ ಹಾಲಯ್ಲೊ.
ಚೆಡ್ವಾಲಾಗಿಂ ಮಾದಕ್ ಶರೀರ್ ಆಸ್ಲ್ಲೆಂ. ಸೊಭಾಯೆನ್ ಪಿಕ್ಲ್ಲೆಂ. ದೊಳ್ಯಾಂನಿ ಚಂಚಲತಾ ಆಸ್ಲ್ಲಿ.
ರೋಹಿತಾಚಾ ಶರೀರಾಂತ್ ಮಿರ್ಮಿರೆ ಧಾಂವ್ಲೆ. ಭೋವ್ ಕಶ್ಟಾಂನಿ ನಾಜೂಕ್, ಕೋಮಲ್ ಹಾತ್ ತಾಣೆಂ ಮೆಕ್ಳೊ ಕೆಲೊ. ಶಿರಾಂನಿ ವೀಜ್ ಸಕತ್ ಪಾಶಾರ್ ಜಾಲ್ಲಿ.
"ಬಸ್ಕಾ ಸ್ವೀಕಾರ್ ಕರ್ ರೋಹಿತ್" ಸೋಫಾ ಚೇರಾ ತೆವ್ಶಿನ್ ಹಿಶಾರೊ ಕೆಲೊ ಪಿಳ್ಳೆನ್. "ತುಜ್ಯಾ ನವ್ಯಾ ಜಿವಿತಾಂತ್ ಜಾಯ್ತೆ ಗುಲೊಬ್ ಪ್ರವೇಶ್ ಜಾತೆಲೆ. ಗಳ್ಯಾಂಚೊ ಹಾರ್ ಫಕತ್ ಸೀತಾ ದಾಂಬ್ಲೆಕ್ ತುವೆಂ ಕರುಂಕ್ ಆಸಾ. ಕಿತ್ಯಾಕ್, ಮ್ಹಜೆಂ ಧುವ್ ಲಾಖಾಂನಿ ಏಕ್ ಜಾವ್ನಾಸಾ."
"ಗರೀಭಾಂಚೊ ದೇವ್ ತುಂ" ರೋಹಿತಾಚೊ ಗಳೊ ಭರೊನ್ ಆಯ್ಲೊ. "ಪಿಂದ್ಕರ್ ಜಿವಿತಾಂತ್ ನೆಕೆತ್ರಾಂ ಫುಲಯಿಲ್ಲೊ ಮಹಾನ್ ತುಂ."
"ತಾರೀಫ್ ಕೆ ಲಿಯೆ ಶುಕ್ರಿಯಾ" ಪಿಳ್ಳೆನ್ ದಾಂತ್ ದಾಕಯ್ಲೆ.. "ರುಪ್ಯಾಚ್ಯಾ ಪಾವ್ಲೆಕ್ ದೋನ್ ಕುಸಿ ಆಸಾತ್ ಆನಿ ದೊನೀ ಕುಸಿ ವೆವೆಗ್ಳ್ಯೊ ಆಸ್ತಾತ್ ಚೆಡ್ಯಾ. ಸಮ್ಜಾಲೊಯ್?"
ರೋಹಿತಾನ್ ಮಾತೆಂ ಖೊರ್ಪಿಲೆಂ.
ರತಿ ಚಾವ್ಲಾಚ್ಯಾ ಮುಸ್ಕರಾರ್ ಮತ್ಲಾಬಿ ಹಾಸೊ ಉದೆವ್ನ್ ಮಾಯಾಗ್ ಜಾಲ್ಯೊ. ಮ್ಹಾತಾರ್ಯಾ ಕೊಳಿಂದ್ರಾಕ್ ತೆಂ ಬರ್ಯಾ ಥರಾನ್ ವಳ್ಕಾತಾಲೆಂ. ರುಪ್ಯಾಚಿ ದುಸ್ರಿ ಕೂಸ್ ತಾಣೆಂ ಪಳೆಲ್ಲಿ ಆಸಾ. ಅನುಭವ್ ಜೊಡ್ಲ್ಲೊ ಆಸಾ.
"ಪಾಂಡುಕ್ ಆವಾಜ್ ದೀ ರತಿ."
"ತೊ ಆವಾಜ್ ಕಾಮಾಕ್ ಯೇಂವ್ಕ್ ನಾ ಮಿ. ಪಿಳ್ಳೆ"
ರಾತಿಂ ನಾಕ್ ಭರ್ ಪಿಯೆಲಾ ಆಸ್ತಲೊ ಆನಿ ಆಜ್ ಕಾಮಾಕ್ ಗುಟ್ಲಿ ಮಾರ್ಲ್ಯಾ ಆಸ್ತೆಲಿ ಬೆಬ್ದ್ಯಾನ್. ನವ್ಯಾ ಸಯ್ರ್ಯಾಕ್ ಆನಿ ಮ್ಹಾಕಾ ಜ್ಯೂಸ್ ಮೆಳಾತ್ ತರಿ ಡಾರ್ಲಿಂಗ್?"
"ಶೂವರ್, ವೈ ನಾಟ್?" ಚೆಡ್ವಾನ್ ಜಾಗೊ ಖಾಲಿ ಕೆಲೊ.
"ರೇಯ್ಲಾರ್ ಆಯ್ಲೊಯ್?"
"ವ್ಹಯ್"
"ಆವಯ್ ಭಯ್ಣ್ಯೊ ಖುಶ್ ಜಾಲಿಂ?"
"ನಿಜಾಯ್ಕಿ ವ್ಹಯ್"
"ಸೀತಾ ದಾಂಬ್ಲೆಕ್ ವೆಗ್ಳಾಚಾರ್ ಭೋವ್ ಕಶ್ಟಾಂಚೊ ಜಾಲೊ ನ್ಹಯ್?"
"ಕಾಳ್ಜಾಂ ವಿಂಗಡ್ ಜಾಲ್ಯಾಂತ್ ತರಿ ತರಂಗಾಂ ಉಲವ್ನ್ಚ್ ಆಸ್ತಾಲಿಂ. ತಾಚಿ ತಸ್ವೀರ್ ಹಾಡುಂಕ್ ಹಾಂವ್ ವಿಸ್ರೊಂಕ್ ನಾ" ರೋಹಿತಾಚ್ಯಾ ತಾಳ್ಯಾಂತ್ ವೆಗ್ಳಾಚಾರ್ಚಿ ದೂಕ್ ಆಸ್ಲ್ಲಿ. "ಎಕಾ ವರ್ಸಾಚೊ ವೆಗ್ಳಾಚಾರ್ ಯುಗಾಂ ಜಾಂವ್ಕ್ ಪಾವ್ತೆಲಿಂ." ತಾಚೆ ದೊಳೆ ತೇವಾಭರಿತ್ ಜಾಲೆ.
"ಆವಯ್ ಬಾಪಯ್ ನಾತ್ಲ್ಲೆಂ ಆನಾಥ್ ಚೆಡುಂ ತೆಂ. ತಾಕಾ ಹಾಂವ್ ಮುಂಬಯ್ ಹಾಡ್ತಾಲೊಂ ಆನಿ ತುಜೆಂ ಕಾಮ್ ಸಂಪ್ಲ್ಲ್ಯಾ ದಿಸಾಚ್ ತುಮ್ಚೆಂ ಲಗ್ನ್ ಹಾಂವ್ ಕರಯ್ತಾಲೊಂ. ಧುವೆಚೊ ಹುಸ್ಕೊ ಬಾಪಾಯ್ಕ್ ಆಸ್ತಾ. ಪರ್ಕ್ಯಾಕ್ ನ್ಹಯ್."
"ತುವೆಂ ತಾಕಾ ಧುವ್ ಮ್ಹಣ್ ಮಾಂದುನ್ ಘೆತ್ಲಾಂಯ್?"
"ಮ್ಹಜ್ಯಾ ಉತ್ರಾಂ ವಯ್ರ್ ದುಬಾವ್ ಆಸಾ ತುಕಾ?"
"ದೆವಾ ವಯ್ರ್ ದುಬಾವ್ ಕೆಲ್ಯಾರ್ ಯೆಮ್ಕೊಂಡಾಚಿಂ ಬಾಗ್ಲಾಂ ಉಗ್ತಿಂ ಜಾತೆಲಿಂ."
"ಶುಕ್ರಿಯಾ."
ತಿತ್ಲ್ಯಾರ್ ರತಿ ಟ್ರೋಲಿ ಸವೆಂ ಭಾಯ್ರ್ ಆಯ್ಲೆಂ. ಬಾಗೊನ್ ತಾಣೆ ಜ್ಯೂಸಾಚೊ ಲಾಂಬ್ ಗ್ಲಾಸ್ ರೋಹಿತಾಕ್ ದಿಲೊ. ಉಗ್ತ್ಯಾ ಗಳ್ಯಾಚ್ಯಾ ಬ್ಲಾವ್ಜಾಂತ್ಲ್ಯಾನ್ ಪುಡ್ಪುಡೀತ್ ಸ್ಥನಾಂ ಪ್ರದರ್ಶಿತ್ ಜಾಲಿಂ. ರೋಹಿತಾನ್ ದೊಳೆ ಲಜೆನ್ ದಾಂಪ್ಲೆ. ತಾಚ್ಯಾ ಶರೀರಾಂತ್ ಪರತ್ ಮಿರ್ಮಿರೆ ದಾಂವ್ಲೆ. ಚೆಡುಂ ಹಾಸ್ಲೆಂ. ತ್ಯಾ ಹಾಸ್ಯಾಂತೀ ಗುಪಿತ್ ಆಮಂತ್ರಣ್ ಆಸ್ಲ್ಲೆಂ.
"ಮ್ಹಜಿ ವಿಂಚವ್ಣ್ ಕಸಿ ಆಅಸಾ ರತಿ?" ಟ್ರೋಲಿಂತ್ಲೊ ಗ್ಲಾಸ್ ವಿಂಚ್ಲೊ ಪಿಳ್ಳೆನ್.
"ಫೆಂಟಾಸ್ಟಿಕ್. ಉದ್ಗಾರ್ಲೆಂ ಚೆಡುಂ. ಬಿಗ್ ಡೆಡಿಚ್ಯೊ ತಿಜೊರ್ಯೊ ಭರೊನ್ ವೊಮ್ತಾತಾಲ್ಯೊ."
"ಶುಕ್ರಿಯಾ ಬೇಬಿ" ಜ್ಯೂಸಾಚೊ ಲಾಂಭ್ ಘೊಟ್ ಮಾರ್ಲೊ ಪಿಳ್ಳೆನ್. ಬಿಗ್ ಡೆಡಿ ಆಜ್ ದಫ್ತಾರಾಕ್ ಯೆಂಚೊ ನಾ?"
"ಡರ್ಬೀ ರೇಸಿಂತ್ ಇಕ್ರಾ ಲಾಖ್ ಹೊಗ್ಡಾಯ್ಲ್ಯಾತ್. ರಮ್ಮ್ ಆನಿ ರಂಭಾ ಸವೆಂ ಹೊಗ್ಡಾಯಿಲ್ಲ್ಯಾ ದುಡ್ವಾಕ್ ವಿಸ್ರೊಂಚೆಂ ಪ್ರಯತ್ನ್ ಕರ್ತಾ ಆಸ್ತಲೊ."
"ಕಿತೆಂ ಫರಕ್ ಪಡ್ತಾ ಬಿಗ್ ಡೆಡಿಕ್? ದುಡ್ವಾಚೊ ಸಾಗೊರ್ಚ್ ಆಸಾ ತಾಚೆಲಾಗಿಂ. ಸಾಗೊರಾಂತ್ಲೆ ಥೊಡೆ ಥೆಂಬೆ ಉಣೆ ಜಾಲ್ಯಾರ್ ಸಾಗೊರಾಂತ್ಲ್ಯಾ ಸೀಜರಾಕ್ ಕಸಲೊ ಫರಕ್ ಪಡ್ತಾ?"
"ಯೂ ಮೀನ್ ಕ್ರೊಕೊಡಾಯ್ಲ್?"
"ಪಯ್ಶೆವಾಲಾ ಮಗರ್ಮಚ್" ವ್ಹಡ್ಲ್ಯಾನ್ ಹಾಸ್ಲೊ ಪಿಳ್ಳೆ.
ರತಿನ್ ನಾಕ್ ಮೊಡ್ಲೆಂ.
ರೋಹಿತ್ ಜ್ಯೂಸ್ ಪಿಯೆಂವ್ಚ್ಯಾರ್ ಮಗ್ನ್ ಜಾಲ್ಲೊ.
""ಆಜ್ ರೋಹಿತ್ ಆರಾಮ್ ಕರ್ತಲೊ. ಗ್ಲಾಸ್ ಖಾಲಿ ಕೆಲೊ ಪಿಳ್ಳೆನ್. ಬಿಗ್ ಡೆಡಿ ಸವೆಂ ಫಾಲ್ಯಾಂ ಸಕಾಳಿಂ ಧಾ ವರಾರ್ ಮೀಟಿಂಗ್ ಫಿಕ್ಸ್ ಕರ್ ಬೇಬಿ."
"ಡೋಂಟ್ ವರಿ"
"ಡಿಂಪಲ್ ಗರ್ಲ್" ಪಿಳ್ಳೆನ್ ದೊಳೊ ಮೊಡ್ಲೊ. ಆಯ್ಚ್ಯಾ ರಾತಿಂ ಜುಸ್ತ್ ಆಟ್ ವರಾರ್ ’ಲಿಟಲ್ ರೊಕ್’ಂತ್ ಆಮಿ ಮೆಳ್ತೆಲ್ಯಾಂವ್. ಉಂಚ್ಲೊ ಸೊರೊ, ಜೆವಾಣ್, ಉಪ್ರಾಂತ್ಲೆಂ ಪ್ರೋಗ್ರಾಮ್ ತುಂ ಬರ್ಯಾ ಥರಾನ್ ಜಾಣಾಂಯ್."
"ಪನ್ನಾಸ್ ವರ್ಸಾಂಚೊ ಮ್ಹಾತಾರೊ ಜಾಲಾಯ್. ಪುಣ್... ಚರ್ಬೆಲಾಯ್" ದೊಳೆ ಕಾಡ್ಲೆ ಚೆಡ್ವಾನ್.
"ತರ್ನಿಂ ತಲ್ಕಾಂ ಹಾಂವ್ ಪಸಂದ್ ಕರ್ತಾಂ" ಪಿಳ್ಳೆಚೆ ದೊಳೆ ಫಳ್ಪಳ್ಳೆ.. ವಯಾಗ್ರಾ ಆಸ್ತಾನಾ ಭಿರಾಂತ್ ಕಸಲಿ? ಘರ್ಚಿ ಕೊಂಬಿ ಮ್ಹಾತಾರಿ ಜಾಲ್ಯಾ" ಪರತ್ ವ್ಹಡ್ಲ್ಯಾನ್ ಹಾಸ್ಲೊ ಪಿಳ್ಳೆ.
"ಹ್ಯಾ ಜಾಗ್ಯಾರ್ ಆಮಿ ತಿಸ್ರ್ಯಾ ಸವೆಂ ಆಸಾಂವ್ ಓಲ್ಡ್ ಮೌಸ್."
"ಉಗ್ತ್ಯಾ ಸ್ವಭಾವಾಚೊ ಹಾಂವ್" ಭುಜಾಂ ಉಡಯ್ಲಿಂ ಪಿಳ್ಳೆನ್. "ರೋಹಿತ್ ಪಾಠಕಾಕ್ ಇಷ್ಟ್ ಕರುನ್ ಘೆತ್ಲಾ ಹಾವೆಂ. ಕಸಲೆಚ್ ಪಡ್ದೆ ಹ್ಯಾ ಫುಡಾಂ ಆಮ್ಚೆ ಮಧೆಂ ಆಸ್ಚೆ ನಾಂತ್. ಕಿತೆಂ ಮ್ಹಣ್ತಾಯ್ ಯಂಗ್ ಬೊಯ್?"
ರೋಹಿತಾನ್ ಫಕತ್ ಹಾಸೊ ದಿಲೊ.
"ಆತಾಂ ಆಮ್ಕಾಂ ವಚೊಂಕ್ ಆಸಾ" ಉಟೊನ್ ಉಭೊ ಜಾಲೊ ಪಿಳ್ಳೆ. "ಟೇಕ್ ಕ್ಯಾರ್ ಬ್ರಾಯ್ಟ್ ಐಜ್" ತಾಚಿಂ ಪಾವ್ಲಾಂ ದಪ್ತಾರಾ ಥಾವ್ನ್ ಭಾಯ್ರ್ ವಚೊಂಕ್ ಲಾಗ್ಲಿಂ. ಚೆಡ್ವಾಕ್ ವಂದನ್ ಕರುನ್ ಪಿಳ್ಳೆಚೊ ಪಾಟ್ಲಾವ್ ಕೆಲೊ ರೋಹಿತಾನ್.
"ಚಾಲೂ ಮನಿಸ್ ತುಂ ವ್ಹಯ್ ತರೀ ಫಾಯ್ದ್ಯಾಚೊ ಜಾವ್ನಾಸಾಯ್. ಪಾಂಚ್ ಹಜಾರ್ ರುಪಯ್ ಎಕಾ ರಾತಿಕ್? ನೊಟ್ ಬ್ಯಾಡ್" ಕ್ರೆಡಲಾ ವಯ್ಲಿಂ ನಂಬ್ರಾಂ ಪಂಚ್ ಕೆಲಿಂ ರತಿನ್.
ಲಾಯ್ನಿರ್ ತಾಚೆಂ ರೂಮ್ ಪಾರ್ಟ್ನರ್ ಸುಂದರಿ ಆಸ್ಲ್ಲೆಂ.
"ಆಯ್ಚಿ ರಾತ್ ’ಲಿಟಲ್ ರೊಕ್’ಂತ್ ಪಾಶಾರ್ ಕರುಂಕ್ ಆಸಾ."
"ನವೊ ಬೊಕ್ರೊ?"
"ನ್ಹಯ್ ಯಾರ್. ತೊಚ್ ಸದಾಂಚೊ ಮ್ಹಾತಾರೊ ಕೊಳಿಂದ್ರ್."
"ಕೆದಾಳಾ ಪಾವ್ತೆಲೆಂಯ್?"
"ಫಾಂತ್ಯಾರ್."
"ವಾರ್ಡನಾಕ್ ಸಾಂಭಾಳುಂಕ್ ಪಡ್ತೆಲೆಂ."
"ಪಾಂಯ್ಶ್ಯಾಂಚೊ ಏಕ್ ಗಾಂಧಿ ನೋಟ್ ಮೆಳ್ತಲೊ ಮ್ಹಣ್ ಸಾಂಗ್"
"ಆನಿ ಮ್ಹಾಕಾ?"
"ಸದಾಂಚೆಂ."
"ಇಟಾಲಿಯನ್ ಪಿಜ್ಜಾ"
"ಹುಂ"
"ನಾಕಾ."
"ಆನಿ ಕಿತೆಂ ಜಾಯ್?"
"ಡೀಪ್ ರಿವರ್ ಬಾರಾಂತ್ ವೊಡ್ಕಾ ಸವೆಂ ಏಕ್ ಎಲ್.ಎಸ್.ಡಿ. ಗುಳಿ."
"ಮಾರೆಕಾರ್ ಸವಯ್ ಬರಿ ನ್ಹಯ್ ಅಮ್ಮಾ. ಪರ್ವಾನಾ."
"ಡನ್."
"ನೋ ಪ್ರಾಬ್ಲೆಮ್."
"ಹಜಾರ್ ವರ್ಸಾಂ ಜಿಯೆ ಅಮ್ಮಾ."
ರತಿಕ್ ಉಸ್ತುರೆಂ ಗೆಲೆಂ.
"ದುಡ್ವಾ ಪಾಟ್ಲ್ಯಾನ್ ಧಾಂವೊನ್ ಆಸಾಯ್ ಅಮ್ಮಾ. ಮಾರೆಕಾರ್ ಖರ್ಗಾಕ್ ಸಾಂಪಡ್ನಾಕಾ."
"ಉಂಚ್ಲ್ಯಾ ಕ್ವಾಟಿಚೆಂ ಕೊಂಡಮ್ ಆಸ್ತಾನಾ ಭಿರಾಂತ್ ಕಸಲಿ? ಎನೀ ವೇ ವಾರ್ಡನಾಕ್ ಸಾಂಬಾಳ್" ಹಾಸೊನ್ಚ್ ಲಾಯ್ನ್ ಕಾತರ್ಲಿ ರತಿನ್.
"ಲಿಟಲ್ ರೊಕ್ ಂತ್ ಝುಜಾಕ್ ಹಾಂವ್ ವೆಳಾರ್ ಪಾವ್ತೆಲಿಂ ಮ್ಹಾತಾರ್ಯಾ ಕೊಳಿಂದ್ರಾ "ಡ್ರಾವರ್ ಉಗ್ತೆಂ ಕರುನ್ ಕೊಂಡೊಮಾಚಿ ಪೆಕೆಟ್ ಬೆಗಾಂತ್ ನಿಸ್ರಾಯ್ಲಿ ಚೆಡ್ವಾನ್.
[ಮುಖಾರುಂಕ್ ಆಸಾ...]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
