ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮುಖೆಲ್ ಸಂಯೋಜಕಾಚಿಂ ಉತ್ರಾಂ:
ಪಾಸ್ಕಲ್ ಪಿಂಟೊವಿಶ್ಯಾಂತ್: ಕುವೆಯ್ಟಾಂತ್ ಪಾಟ್ಲ್ಯಾ ಸಭಾರ್ ತೆಂಪಾಥಾವ್ನ್ ವೆವೆಗ್ಳ್ಯಾ ರಿತಿರ್ ಸಮಾಜ್ ಸೆವಾ ಕರ್ನ್ ಲೊಕಾಮೊಗಾಳ್ ಜಾಲ್ಲ್ಯಾ ಮಾನೆಸ್ತ್ ಪಾಸ್ಕಲ್ ಪಿಂಟೊಚಿ ವಳೊಕ್ ಕರ್ಚಿ ಗರ್ಜ್ ನಾ. ಬಜ್ಪೆ/ಪೆರ್ಮುದೆ ಫಿರ್ಗಜೆಚೊ ಹೊ ಏಕ್ ಉಲವ್ಪಿ, ಕೊಂಕ್ಣಿ ಬರವ್ಪಿ ತಶೆಂಚ್ ಕೊಂಕ್ಣಿ ಮೊಗಿ ಆನಿ ವಾವ್ರಾಡಿ ಜಾವ್ನಾಸಾ. ದಾಯ್ಜ್ ಮಿಸಾಂವಾಕ್ ಹಾಣೆಂಯ್ ಹ್ಯಾ ಆಧಿಂ ಪಾಟಿಂಬೊ ದಿಲಾಸ್ತಾಂ, ಹ್ಯಾ ವರ್ಸಾಚ್ಯಾ ಮಿತ್ರ್-ದಾಯ್ಜ್ ವಿಶೇಸ್ ಅಂಖ್ಯಾಚೊ ಮುಖೆಲ್ ಸಂಯೋಜಕ್ ಜಾವ್ನ್ ತಾಕಾ ಆಮಿ ವಿಂಚುನ್ ದಿಂವ್ಚೊ ಗೌರವ್ ತಾಕಾ ಫಾವೊ ಜಾಲ್ಲೊ.
ಪಾಸ್ಕಲ್ ಪಿಂಟೊ
ಅನ್ಯೇಕ್ ಫಳಾಧಿಕ್ ದೀಸ್ ಉದೆಲಾ
ದೆವಾನ್ ರಚ್ಲೆಲ್ಯಾ ರಚ್ನೆ ಪಯ್ಕಿಂತ್ ಮನಿಸ್ ಉಂಚ್ಲೊ ಮ್ಹಣ್ಚಾಕ್ ಆಸ್ಚಾ ಥೊಡ್ಯಾ ಕಾರಾಣಾಂ ಪಯ್ಕಿ; ’ಮನಿಸ್ ಚಿಂತುಂಕ್ ಸಕ್ತಾ, ಬರೆಂ ವಾಯ್ಟಾ ಮಧೆಂ ವಿಂಚವ್ಣ್ ಕರುಂಕ್ ಸಕ್ತಾ ತಶೆಂಚ್ ಉಲಂವ್ಕ್ ಸಕ್ತಾ’ ಜಾವ್ನಾಸಾ. ಅಶೆಂ ಆಸ್ತಾಂ ಮನಿಸ್ ಆಪ್ಲ್ಯಾ ಭಂವ್ತೊಣಿಚ್ಯಾ ಸಮಾಜೆಚೆರ್ ನದರ್ ಘಾಲ್ತಾನಾ ಸಭಾರ್ ಸವಾಲಾಂ ಮತಿಂತ್ ಉದೆತಾತ್. ದೆವಾನ್ ಮನ್ಶ್ಯಾಕ್ ಕಿತ್ಯಾಕ್ ರಚ್ಲೆಂ? ಮನಿಸ್ ಅಪ್ಲ್ಯಾ ಜಿಣ್ಯೆಕ್ ಕಶೆಂ ಸಾರ್ಥಕ್ ರಿತಿನ್ ಜಿಯೆಂವ್ಕ್ ಸಕ್ತಾ? ಮನ್ಶಾನ್ ಅಪ್ಲ್ಯಾ ಜಿಣ್ಯೆಂತ್ ಕಶೆಂ ಹೆರಾಂ ಪಾಸತ್ ಜಿಯೆವ್ಯೆತಾ?
ಹ್ಯಾ ಸಮಾಜೆಂತ್ ಜಿಯೆತಾಸ್ತಾನಾ ಹರ್ಯೆಕಾ ಸಂಗ್ತೆಕ್ ಪಳೆಂವ್ಕ್ ದೋನ್ ರಿತಿಚ್ಯೊ ನದ್ರ್ಯೊ ಗರ್ಜೆಚ್ಯೊ; ಪಯ್ಲಿ ಉತಳಾಯೆಚಿ ಆನಿ ದುಸ್ರಿ ಮಾತ್ಸಿ ಗುಂಡಾಯೆಚಿ. ಉತಳಾಯೆನ್ ಪಳೆಲೆಂ ತರ್ ಹರ್ಯೆಕ್ ಸಂಗತ್ ಸಮಸ್ಸ್ಯಾಂನಿ ರೆವ್ಡೊನ್ ಆಸ್ಚೆಪರಿಂ ದಿಸ್ತಾ ತರ್ಯೀ ಮಾತ್ಸೆಂ ಗುಂಡಾಯೆನ್ ಪಳೆಲ್ಯಾರ್ ಹ್ಯಾ ಎಕೆಕಾ ಗೊಂದೊಳಾಂಕ್ ಪರಿಹಾರ್ ದಿಂವ್ಚಿಂ ನಿಬಾಂ ಸೊಧುಂಕ್ಯ್ ಸಾಧ್ಯ್ ಆಸಾ. ಅಶೆಂ ಆಸ್ತಾಂ ಹರ್ಯೆಕಾ ಮನ್ಶ್ಯಾಕ್ ದೊನಾಂ ಮಧೆಂ ಏಕ್ ವಿಂಚವ್ಣ್ ಕರುಂಕ್ ಆಸಾ - ಉತಳಾಯೆನ್ ಸಂಸಾರಾಕ್ ಪಳೆವ್ನ್ ಫಕತ್ತ್ ಖೊಡಿ ಕಾಡ್ನ್ ವಾ ದುರಾಂ ಸಾಂಗೊನ್ ವೊಗೆಚ್ಚ್ ಬೊಸ್ಚೆಂ ವಾ ದುಸ್ರೆಂ; ಸಂಸಾರಾಕ್ ಮಾತ್ಶ್ಯಾ ಗುಂಡಾಯೆನ್ ಪಳೆವ್ನ್ ಎಕೆಕಾ ಗೊಂದೊಳಾಕ್ ಪರಿಹಾರ್ ಸೊಧ್ಚೊ. ಪಯ್ಲೆಂ ಕಾಳೊಕಾಕ್ ದುರ್ಸೊಂವ್ಚೆಂ ತರ್ ದುಸ್ರೆಂ ಅಪ್ಣಾನ್ ವಾತ್ ಪೆಟಂವ್ಕ್ ಮುಖಾರ್ ಸರ್ಚೆಂ. ಮ್ಹಜ್ಯಾ ಸಮ್ಜಣೆಪ್ರಕಾರ್ ಕುವೆಯ್ಟಾಂತ್ ದಾಯ್ಜ್ ಪಂಗಡ್ ದುಸ್ರಿ ವಿಂಚವ್ಣ್ ವಿಂಚುನ್ ಕಾರ್ಯಗತ್ ಕರ್ಚ್ಯಾ ಪಾವ್ಲಾಂನಿ ಚಮ್ಕೊನ್ ಆಸಾ. ಹೆಂ ಹಾವೆಂ ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ತರ್ಯೀ ಪಾರ್ಕಿಲಾಂ ಆನಿ ಸಮ್ಜಲಾಂ. ಎದೊಳ್ ಕೊಣೆಂಚ್ ಖಂಯ್ಚರ್ಯೀ ಅಸಲಿ ಸುರ್ವಾತ್ ಕೆಲ್ಲಿನಾ. ಕಿತ್ಯಾಕ್ ಹಾಂಗಾಸರ್ ಕಸ್ಲೆಚ್ ಹುದ್ದೆ ನಾಂತ್, ಫಕತ್ತ್ ಕಾಮಾಂ - ಆನಿ ಹರ್ಯೆಕ್ ಕಾಮಾಂ ಕೊಂಕ್ಣೆಚ್ಯಾ ಸೃಜನಾತ್ಮಕ್ ವಾವ್ರಾಚಿಂ ಕಾಮಾಂ. ಹಾಕಾ ಹಾಣಿಂ ಎದೊಳ್ ಪರ್ಗಟ್ ಕೆಲ್ಲೆ ಅಟ್ರಾ ಕೊಂಕ್ಣಿ ಬೂಕ್ ಗೊವಾಯ್ ದಿತಾತ್.
ಮಿತ್ರ್ ದಾಯ್ಜ್ ವಿಶೇಸ್ ಅಂಖೊಯ್ ಹೆಚ್ಚ್ ವರ್ಗಾಚೆಂ ಮಿಸಾಂವ್, ಹಾಚ್ಯಾಧಿಂ ದಿವೊ ದಾಯ್ಜ್ ವಿಶೇಸ್ ಅಂಖೊ ಕಾಡ್ನ್ ದಿವೊ ಪತ್ರಾಕ್ ಪಾಟಿಂಬೊ ದಿಲ್ಲೆಪರಿಂ ಹ್ಯೇ ಪಾವ್ಟಿಂ ಮಿತ್ರ್ ಪತ್ರಾಕ್ ಪಾಟಿಂಬೊ ದಿಂವ್ಚೆಂ ಪ್ರೇತನ್ ಆಮ್ಚೆಂ. ಅಮಿಂಯ್ ಎಕಾ ಕೊನ್ಶ್ಯಾರ್ ಬೊಸೊನ್ ತೆಂ ಸಮಾ ನಾ, ಹೆಂ ವಾಂಕ್ಡೆಂ, ತೆಂ ಆಲ್ಬೆಂ ಮ್ಹಳ್ಳ್ಯೊ ಖೊಡಿ ಕಾಡ್ಚ್ಯಾ ಬದ್ಲಾಕ್ ಸಂಸಾರ್ ಕಸೊಯ್ ಆಸೊಂ, ಆಮ್ಚ್ಯಾ ತಾಂಕಿಭಿತರ್ಲೊ ಕೊಂಕ್ಣಿ ವಾವ್ರ್ ಆಮಿ ಸರ್ವಾಂನಿ ಕೆಲೊ ತರ್, ಖಂಡಿತ್ ಜಾವ್ನ್ ಕೊಂಕ್ಣೆಂತ್ ಫುಡ್ಲ್ಯಾ ದಿಸಾಂನಿ ಸರ್ವ್ ಬರೆಂಚ್ ಜಾಂವ್ಚ್ಯಾಂತ್ ದುಭಾವ್
ನಾ.
ಕೊಂಕ್ಣೆಚಿ ಆಯ್ಚಿ ಪರಿಗತ್ ಖಂಡಿತ್ ಜಾವ್ನ್ ಬರ್ಯಾ ಫುಡಾರಾ ತೆವ್ಶಿನ್ ಚಮ್ಕೊನ್ ಆಸಾ. ಕರ್ನಾಟಕಾಂತ್ ಕೊಂಕ್ಣಿ ಭಾಸೆಕ್ ಇಸ್ಕೊಲಾಂನಿ ಶಿಕಂವ್ಕ್ ಸುರು ಕೆಲಾಂ. ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮೆನ್ ಶೆಕ್ಡ್ಯಾಚ್ಯೊ ಮಟ್ವ್ಯೊ ಕಾಣ್ಯೊ ಆನಿ ಶೆಕ್ಡ್ಯಾಚಿಂ ಕವಿತಾ ಎಕ್ಟಾಂವ್ನ್ ಬೂಕ್ ಪರ್ಗಟ್ಚೆಂ ಕಾಮ್ ಕೆಲಾಂ. ಹಾಚೆಂ ಸುಂಕಾಣ್ ಘೆತ್ಲ್ಲ್ಯಾ ಬಾಬ್ ಎರಿಕ್ ಒಝೆರಿಯೊ ಆನಿ ಹೆರ್ ಸಾಂದ್ಯಾಂಕ್ ಶಾಭಾಸ್ಕಿ ಫಾವೊ. ಗಾಂವಾಂತ್ ತಶೆಂ ಪರ್ಗಾಂವಾಂತ್ ಕೊಂಕ್ಣೆಚ್ಯಾ ವಾಡಾವಳೆಖಾತಿರ್ ಹರ್ಯೆಕ್ಲ್ಯಾನ್ ಅಪ್ಲೊ ಖಾಸ್ಗಿ ಮನಸ್ಥಾಪ್ ಕಸ್ಲೋಯ್ ಅಸ್ಲ್ಯಾರ್ ದೆಗೆನ್ ದವ್ರುನ್ ಎಕ್ವಟಿತ್ ಜಾವ್ನ್ ಕಾಮ್ ಕರ್ಚಿ ಗರ್ಜ್ ಉದೆಲ್ಯಾ.
ದಾಯ್ಜ್ ಪಂಗಡ್ ನವ್ಯಾ ನವ್ಯಾ ತಾಲೆಂತಾಕ್ ಸೊಧುನ್, ತಾಂಕಾಂ ಜೊಕ್ತೆಂ ಮಾರ್ಗ್ದರ್ಶನ್, ಉತ್ತೇಜನ್ ದಿತಾ ಮಾತ್ರ್ ನ್ಹಂಯ್, ಅಪ್ಲ್ಯಾ ಖರ್ಚಾಂತ್ ತಾಂಚಿಂ ಬರ್ಪಾಂ ಪರ್ಗಟ್ ಕರ್ಚೆಂ ಕಾಮ್ಯೀ ಕರ್ತಾ ಮ್ಹಣ್ತಾನಾ ಹ್ಯಾ ಕಾಮಾಚೆರ್ ಅಭಿಮಾನ್ ಪಾವೊಂಕ್ ಕಾರಣಾಂಯ್ ಸಭಾರ್. ಹೆಂ ಕಾಮ್ ಸಲೀಸಾಯೆಚೆಂ ನ್ಹಂಯ್. ಸಗ್ಳ್ಯಾಂಕ್ ಹ್ಯಾ ಕಾಮಾಂಚೆಂ ಮೋಲ್ ಸಮ್ಜತಾಂ ವಾ ಸಮ್ಜಲಾಂ ಮ್ಹಣ್ ಸಾಂಗೊಂಕ್ ಅಸಾಧ್ಯ್. ತರ್ಯೀ ಕೊಂಕ್ಣೆಚಿ ಖರಿ ವಾಡಾವಳ್ ಜಾಂವ್ಕ್ ಜಾಯ್ ತರ್ ಸಂಸಾರಾಚ್ಯಾ ಕೊನ್ಶ್ಯಾ ಕೊನ್ಶ್ಯಾಂನಿ ಅಸಲೊ ವಾವ್ರ್ ಜಾಂವ್ಕ್ ಜಾಯ್ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್.
ಆಜ್ ಜರ್ ದಾಯ್ಜ್ ಡಾಟ್ ಕೊಮ್ ಸಾಯ್ಟಿಕ್ ದಿಸಾಕ್ ಸರಿಸುಮಾರ್ ತೀನ್ ಹಜಾರಾಂ ವಯ್ರ್ ವಾಚ್ಪಿ ಆಸಾತ್ ತರ್ - ಸಂಸಾರ್ಭರ್ ಶಿಂಪಡ್ಲೆಲ್ಯಾ ಕೊಂಕ್ಣಿ ಲೊಕಾಚಿ ಅಭಿರುಚ್ ಉಗ್ಡಾಪಿ ಕರ್ತಾ. ಆಮ್ಚಾ ಗಾಂವಾಂತ್ ಅಜೂನ್ ಸಾದ್ಯಾ ಲೊಕಾಂಕ್ ಅಂತರ್ಜಾಳ್ ಪಾವೊಂಕ್ ನಾ ತರ್ಯೀ, ಆಜ್ ಅಂತರ್ಜಾಳಿಚೆರ್ ಸಯ್ತ್ ಕೊಂಕ್ಣೆಚೆಂ ವಿಂಚ್ಣಾರ್ ಸಾಹಿತ್ಯ್ ಪರ್ಗಟ್ ಜಾತಾ ಮ್ಹಣ್ತಾನಾ ಹ್ಯಾ ವಾವ್ರಾಕ್ ಜತ್ನೆನ್, ಮೊಗಾನ್, ಜವಭ್ದಾರೆನ್ ಖಾಂದ್ ಮಾರ್ಚ್ಯಾ ದಾಯ್ಜ್ ಪಂಗ್ಡಾಕ್ ಖರೆಂಚ್ ಉಲ್ಲಾಸ್. ಹಿಂ ಕಾಮಾಂ ಕರುಂಕ್ ಲೊಕಾಂಚಿ ಖೆಟ್ ನ್ಹಂಯ್, ಹುದ್ದೆ ನ್ಹಂಯ್ ಬಗಾರ್ ನಿಸ್ವಾರ್ಥಿ ಕೊಂಕ್ಣಿ ಮೋಗ್ ಆನಿ ಕಠೀಣ್
ಶೃದ್ದಾ ಗರ್ಜೆಚಿ. ಆನಿ ಹಿ ಶೃದ್ದಾ ದಾಯ್ಜ್ ಪಂಗ್ಡಾಚಾ ಎಕೆಕಾ ಉರ್ಭೆವಂತ್ ಯುವ ಲೇಖಕಾಂಲಾಗಿಂ ಆಸ್ಚೆಂ ಕೊಂಕ್ಣೆಚ್ಯಾ ಮಟ್ಟಾಕ್ ಭೋವ್ ದಾಧೊಸ್ಕಾಯೆಚೆಂಚ್ ಸಯ್. ಸರ್ವ್ ಬರೆಂ ಜಾಂವ್ ತಾಂಕಾಂ ತಶೆಂಚ್ ತಾಂಚ್ಯಾ ಕೊಂಕ್ಣಿ ಮಿಸಾಂವಾಕ್. ತಾಂಚೆಂ ಮಿಸಾಂವ್ ಆಮ್ಚೆಂಯ್ ಜಾಂವ್ದಿ ಮ್ಹಣ್ ಮಾಗ್ತಾಂ.
- ಮಾಯಾಮೊಗಾಸವೆಂ
ಪಾಸ್ಕಲ್ ಪಿಂಟೊ, [ಸಂಯೋಜಕ್, ಮಿತ್ರ್-ದಾಯ್ಜ್
ವಿಶೇಸ್ ಅಂಖೊ 2007]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications