ಕಾಣ್ಯೊ
ಸಾಹಿತಿಕ್ ಸ್ಪರ್ಧೊ 2004
ಕಥಾಪಾಠ್
ಅಂಕಣಾಂ
ಸಾಹಿತಿಕ್ ಸ್ಪರ್ಧೊ 2005
ಕವಿತಾಂ
ಸಾಹಿತಿಕ್ ಸ್ಪರ್ಧೊ 2006
ದಾಯ್ಜ್ ಶಿಭಿರ್ 2006
ವಿಡಂಬನಾಂ
ದಾಯ್ಜ್ ಶಿಭಿರ್ 2007
ಕಥಾಮೃತ್
ವಿಮರ್ಶೆ
ಸತಾಂ ಆನಿ ಖತಾಂ - 29. ಏಕ್ ಸಾಮಾನ್ಯ್ ಸಂಗತ್
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಏಕ್ ಪಾವ್ಟಿಂ ಎಕಾ ಗಾಂವಾಂತ್ ಆಸ್ಚಾ ಎಕಾ ಮನ್ಶಾಕ್ ಕಶೆಂ ಪುಣೀಂ ಅಪ್ಣಾನ್ ಗ್ರೇಸ್ತ್ ಜಾಯ್ಜಯ್ ಮ್ಹಳ್ಳಿ ಆಶಾ ಆಯ್ಲಿ ಆನಿಂ ತಿ ಜ್ಯಾರಿ ಜಾಂವ್ಚಾಕ್ ತೊ ದೀಸ್ ರಾತ್ ದೆವಾಲಾಗಿಂ ಮಾಗಾಲಾಗ್ಲೊ. ಅಶೆಂ ತಾಚಿ ಕಠೀಣ್ ಭಕ್ತ್ ಪಳೆಲ್ಲ್ಯಾ ದೆವಾನ್ ತಾಚಾ ಸ್ವಪ್ಣಾಂತ್ ಯೇವ್ನ್ ತಾಚಾ ಘರಾ ಪಾಟಿಂ ಆಸ್ಚಾ ರುಕಾಮುಳಾ ಖೊಂಡುನ್ ಜೆಂ ಕಿತೆಂ ತಾಕಾ ಮೆಳ್ತಾ ತೆಂ ತಾಚೆಪರಿಂ ಸಾಮಾನ್ಯ್ ಆಸ್ಚಾಕ್ ಮಾತ್ರ್ ದಿಲೆಂ ತರ್ ಜಿತ್ಲೆಂ ತಾಣೆಂ ದಿಲೆಂಗೀ ತಾಚಾಕೀ ಚಾರ್ ವಾಂಟೆ ದೇವ್ ಪಾಟಿಂ ದಿತಾ ಮ್ಹಳ್ಳೆಂ ಚಿಂತಾಪ್ ಘಾಲೆಂ.
ಹೆಂ ಆಯ್ಕಾಲ್ಲೊ ತೊ ಫಾಂತ್ಯಾರ್ ಉಟೊನ್ ಎಕಾಚ್ಫರಾಂ ಅಪ್ಲ್ಯಾ ಘರಾ ಪಾಟ್ಲ್ಯಾ ರುಕಾಮುಳಾಂತ್ ಖೊಂಡುನ್ ಪಳೆತಾನಾ ತಾಕಾ ತಾಂತುಂ ಪರ್ಜಳೀತ್ ಚಾರ್ ಮೊತಿಯಾಂ ಮೆಳ್ಳಿಂ. ತೊ ಉಟಾಉಟಿಂ ವಚೊನ್ ತಿಂ ಮೊತಿಯಾಂ ಆಪ್ಲ್ಯಾ ಹಾತಿಂ ಘೆವುನ್ ಅಪ್ಣಾಪರಿಂಚ್ ಸಾಮಾನ್ಯ್ ಆಸ್ಚಾಂಕ್ ಸೊಧುನ್ ಗೆಲೊ.
ಸೆಜಾರ್ಚೊ ತಾಚೆಪರಿಂ ನಾತ್ಲ್ಲೊ. ತೊ ಘಾಟಾಚೊ ಗೌಡಾ, ದೆಕುನ್ ತಾಕಾ ಹಿಂ ಮೊತಿಯಾಂ ದಿಂವ್ಚೆಂ ಆನಿಂ ಗುಂಡಿಯೆಕ್ ಉಡಂವ್ಚೆಂ ದೊನೀಂ ಎಕ್ಚ್ ಮ್ಹಣೊನ್ ಚಿಂತುನ್ ತೊ ಪೆಂಟೆಕ್ ಗೆಲೊ. ಪೆಂಟೆಚ್ಯಾ ವಾಟೆರ್ ತಾಕಾ ಮಾರಾಂಚೆ ಮೆಳ್ಳೆ, ತೇಯ್ ಕಾಂಯ್ ಆಪ್ಣಾಪರಿಂ ಸಾಮಾನ್ಯ್ ನ್ಹಯ್ ಮ್ಹಳ್ಳೆಂ ಗೊಮ್ತಚ್ಚ್ ತೊ ಅಪ್ಲಿ ವಾಟ್ ಮುಖಾರುನ್ ಗೆಲೊ.
ಪೆಂಟೆರ್ ತಾಕಾ ಕೊಂಕ್ಣೊ ಮೆಳ್ಳೊ. ಕೊಂಕ್ಣೊ ಆಪ್ಣಾಪರಿಂ ನ್ಹಯ್, ಮೋವ್ ಉಲವ್ಣೆಂ ಉಲವ್ನ್ ಪಾಟಿಕ್ ತೊಪ್ಲ್ಲಿ ಸುರಿ ಕಳಾಚ್ಚ್ ನಾ. ಆತಾಂ ಕಿತೆಂ ಕರುಂ? ತಾಚಿ ನದರ್ ತೆಣೆಂಚ್ ಪಾಶಾರ್ ಜಾಂವ್ಚಾ ದಿವ್ಳಾಚಾ ಭೊಟಾಚೆರ್ ಗೆಲಿ, ಇಗ್ರಜೆಚಾ ಪಾದ್ರಿಚೆರ್ ಗೆಲಿ, ಕೊವೆಂತಾಚಾ ಧಾರ್ಮಿಕ್ ಭಯ್ಣ್ಯಾಂಚೆರ್ ಗೆಲಿ ಪುಣ್ ಉಹುಂ! ತಾಚಾ ಮತಿಂತ್ ತಿಂ ಆಪ್ಣಾಪರಿಂ ಸಾಮಾನ್ಯ್ ಮ್ಹಳ್ಳೆಂ ಭೊಗಾಪ್ ಆಯ್ಲೆಂಚ್ ನಾ.
ತೊ ಅನಿಕ್ಯ್ ಫುಡೆಂ ಗೆಲೊ. ಗಾಂವಾಂತ್ ತಾಕಾ ಕೊಣ್ಂಚ್ ಆಪ್ಣಾಕ್ ಸಾಮಾನ್ಯ್/ಸರಿ ಜಾಂವ್ಚೊ ಮನಿಸ್ ಮೆಳ್ಳೊನಾ. ಅಪುಣ್ ಕಾಳ್ಜಾನ್ ಬರೊ, ಕೊಣಾಯ್ಕ್ಯ್ ದುಖಯ್ನಾ, ಕೊಣಾಯ್ಕ್ಯ್ ವಾಯ್ಟ್ ಕರಿನಾ. ಪುಣ್ ಅಪ್ಣಾಚೆ ತಳ್ಳೆಕ್ ಆಯಿಲ್ಲ್ಯಾಂಕ್ ಬಿಲ್ಕುಲ್ ಸೊಡಿನಾ. ಆನಿಂ ಹೊ ಸಗ್ಳೊ ಲೋಕ್ ಮತ್ಲಾಬಿ, ಅಶೆಂ ಚಿಂತುನ್ ಆಸ್ತಾನಾ ಮುಖ್ಲ್ಯಾನ್ ಎಕ್ಲೊ ನಿರ್ವಾಣ್ ಸ್ವಾಮಿ ಯೆಂವ್ಚೊ ದಿಸ್ಲೊ. ತೊ ಸಗ್ಳೊ ನಾಗ್ಡೊ ಜಾವ್ನ್ ಕಸಲ್ಯಾಚ್ ಸಂಗ್ತ್ಯಾಂಚಿ ಫಿಕಿರ್ ನಾ ಮ್ಹಳ್ಳೆಪರಿಂ ಚಲೊನ್ ಆಸ್ಲ್ಲೊ. ಪುಣ್ ತೊ ಕಬೂಲ್ ಜಾಲೊಚ್ಚ್ ನಾ, ಬಗಾರ್ ಆತಾಂ ಗಾಂವ್ ಸೊಡ್ನ್ ಗೆಲೊ.
ಪರ್ಗಾಂವಾಂತ್ ತೊ ಸರ್ವ್ ಥರಾಚ್ಯಾ ಮನ್ಶಾಂಕ್ ಮೆಳ್ಳೊ, ಮರಾಟಿ, ಹೈದ್ರಾಬಾದಿ, ಸಿಂಧಿ, ಗುಜ್ರಾತಿ, ಪಂಜಾಬಿ, ತಮ್ಳಾಂಚೆ, ಮಲ್ಯಾಳಿ, ತೆಲ್ಗುಚೆ, ಯು.ಪಿ.ಚೆ, ಬಿಹಾರ್ಚೆ, ದೆಲ್ಲಿ, ಬೆಂಗಾಲಿ, ಕಾಶ್ಮೀರ ಥಾವ್ನ್ ಕನ್ಯಾಕುಮಾರಿ ಪರ್ಯಾಂತ್ಲೆ. ಸಗ್ಳೆ ವೆವೆಗ್ಳೆ ಭಾಸೆಂತ್, ಬೊಲಿಂತ್, ಚಾಲಿಂತ್, ನೆಸ್ಪಾಂತ್, ಚಿಂತ್ಪಾಂತ್, ಖಾಣಾಂತ್, ಮನಾಂತ್.
ಹೊ ಆತಾಂ ಕಂಗಾಲ್ ಜಾಲೊ, ಕಿತೆಂ ಕರುಂ ಆತಾಂ ಹ್ಯಾ ಮೊತಿಯಾಂಕ್?
ತೊ ದೆದೆಸ್ಪ್ರಾರ್ ಜಾಲೊ ಆನಿಂ ಆಪ್ಣಾಕ್ ಸರಿ ಜಾಲ್ಲೊ ಮನಿಸ್ ಆಪ್ಣಾಸಾರ್ಕೊ ಮನಿಸ್ ಹ್ಯಾ ದೆಸಾಂತ್ ಕೊಣೀಂ ನಾಂತ್ ಮ್ಹಣೊನ್ ಪರತ್ ದೆವಾಲಾಗಿಂ ಮಾಗೊಂಕ್ ಬೊಸ್ಲೊ. ದೆವಾನ್ ತಾಚಾ ಮತಿಕ್ ಪರತ್ ಏಕ್ ಚಿಂತಾಪ್ ದಿಲೆಂ ಸಾರ್ಕೆಂ ’ಸೊಧ್, ತುಕಾ ಮೆಟಾಂ ಮೆಟಾಂಕ್ ಮೆಳೊಂಕ್ ಪುರೊ ಪುಣ್ ಉಡಾಸ್ ದವರ್, ಹಿಂ ಮೊತಿಯಾಂ ತುಕಾ ಕಸಲ್ಯಾಚ್ ಉಪ್ಕಾರಾಕ್ ಪಡ್ಚಿಂ ನ್ಹಯ್’.
ಆತಾಂ ತೊ ಪಿಸೊಚ್ ಜಾಲೊ, ಸೊಧುನ್ ಸೊಧುನ್ ಎದೊಳ್ಚ್ ಜಾಯ್ತೊ ವೇಳ್ ತಾಣೆ ಹೊಗ್ಡಾಯಿಲ್ಲೊ. ಆತಾಂ ತೊ ಮನ್ಶಾಚೊ ಧರ್ಮ್ ಸೊಡ್ನ್, ಚಿಂತುನ್ ಗೆಲೊ. ಭಿಕಾರಿ, ಬೆಕಾರಿ, ವ್ಹೆಪಾರಿ, ಕೂಲಿ, ಇಜ್ನೆರ್, ದೊತೊರ್ ಸಗ್ಳ್ಯಾಂಕ್ ತಾಣೆಂ ಪಳೆಲೆಂ ತರ್ಯ್ ಆಪ್ಣಾಕ್ ಸರಿ ಜಾಂವ್ಚೊ ಮನಿಸ್ ತಾಕಾ ಅಜೂನ್ ಮೆಳ್ಳೊನಾ.
ಆತಾಂ ಅಖ್ರೇಕ್ ತಾಣೆಂ ಏಕ್ ಆಲೋಚನ್ ಕೆಲಿ. ದೋನ್ ದೀಸ್ ಪಳೆಂವ್ಚೆಂ. ಕೊಣೀಂ ಮೆಳ್ಳಿಂನಾಂತ್ ತರ್ ಹಿಂ ಮೊತಿಯಾಂ ವರ್ನ್ ಗುಂಡಿಯೆಕ್ ಉಡಂವ್ಚಿಂ ಮ್ಹಣೊನ್ ತೊ ಚಿಂತಿಲಾಗ್ಲೊ.
ಪಯ್ಲೊ ದೀಸ್ ಆಯ್ಲೊ, ತೆ ದಿಸಾ ತಾಣೆಂ ಶಿಂವ್ಕಾರಾಂಕ್, ಸಾವ್ಕಾರಾಂಕ್, ಚಾಮಾದೊರಾಂಕ್ ಪಳೆಲೆಂ, ಪುಣ್ ತೆಂ ಆಪ್ಣಾಕ್ ಸರಿ ಜಾಲ್ಲೆ ನ್ಹಯ್ ಮ್ಹಣೊನ್ ಚಿಂತುನ್ ಆಸ್ತಾನಾ ದೀಸ್ಯ್ ಸಂಪೊನ್ ಗೆಲೊ ಆನಿಂ ದುಸ್ರೆ ದಿಸಾ ತಾಕಾ ಜೈಲಾಂತ್ ಆಸ್ಚೆ ಕೈದಿ, ಕೊರ್ಟಾಂತ್ಲೆ ವಕೀಲ್, ಪೊಲಿಸ್ ಸಗ್ಳೆ ಚೋರ್ ಮ್ಹಣೊನ್ ತಾಣೆ ಲೆಕ್ಲೆಂ ಆನಿಂ ಫಾಲ್ಯಾಂ ಹಿಂ ಮೊತಿಯಾಂ ವರುನ್ ದರ್ಯಾಕ್ ಉಡಂವ್ಚೆಂ, ಆಪ್ಣಾಕ್ ಉಪ್ಕಾರಾಕ್ ಪಡಾನಾತ್ಲ್ಲಿಂ ಮೊತಿಯಾಂ ಕಿತ್ಯಾಕ್? ಮ್ಹಣೊನ್ ಲೆಕುನ್ ತೊ ನಿದೊಂಕ್ ಗೆಲೊ.
ರಾತಿಂ ದೇವ್ ಪರತ್ ತಾಚಾ ಸ್ವಪ್ಣಾಂತ್ ಆಯ್ಲೊ ಆನಿಂ ಹೊ ಉಚಾಂಬಳ್ ಜಾಲೊ; "ದೆವಾ, ಕಸಲಿ ಪರಿಕ್ಶಾ ಕೆಲಿಯ್ ತುವೆಂ? ಆಪ್ಣಾಕ್ ಸರಿ ಜಾಲ್ಲೊ ಏಕ್ ಮನಿಸ್ ಸಯ್ತ್ ತುವೆಂ ರಚುಂಕ್ ನಾಂಯ್. ಎಕ್ಲೊ ದುಬ್ಳೊ ತರ್ ದುಸ್ರೊ ಗ್ರೇಸ್ತ್, ಎಕ್ಲೊ ಸಾವ್ಳೊ ತರ್ ದುಸ್ರೊ ಗೊರೊ, ಎಕ್ಲೊ ಪಾತ್ಕಿ ತರ್ ದುಸ್ರೊ ಘಾತ್ಕಿ, ಎಕ್ಲೊ ಹಿಂದ್ವಾಂಚೊ ತರ್ ದುಸ್ರೊ ಮಾಪ್ಳೊ, ತರ್ ಸಾಂಗ್ ಕಶೆಂ ಹಾಂವ್ ಲೆಕುಂ ಮ್ಹಾಕಾ ಸರಿ ಜಾಲ್ಲೊ ಮನಿಸ್ ಖೈಂ ಆಸಾ ಮ್ಹಣೊನ್?"
ದೇವ್ ಥೊಡೊ ವೇಳ್ ಶಾಂತ್ ಜಾವ್ನ್ ಪಾಜ್ ದೀಲಾಗ್ಲೊ "ಪುತಾ, ತುವೆಂ ಮನಾಂಕ್ ಪಳೆಂವ್ಚಿ ರೀತ್ ಬದ್ಲಿ, ತುವೆಂ ಹೆರಾಂವಿಶ್ಯಾಂತ್ ಚಿಂತ್ಚಿ ರೀತ್ ಬದ್ಲಿ ತವಳ್ ಸಗ್ಳೆಂ ತುಜೆಪರಿಂಚ್ ತುಕಾ ದಿಸ್ತೆಲೆಂ. ಹರ್ಯೆಕ್ ಮನಿಸ್ ತುಜೆಪರಿಂಚ್ ಆಸಾ, ಸಗ್ಳೆ ತಾಂತಾಂಚಾ ಚಿಂತ್ಪಾ ಫರ್ಮಾಣೆ ಬರೆಚ್, ಹೆರಾಂಕ್ ಕೊಣೀಂ ದುಖಂವ್ಕ್ ಆಶೆನಾಂತ್, ಬಗಾರ್ ಆಪ್ಣಾಕ್ ದುಖಂವ್ಚಾಂಕ್ ಸೊಡ್ನ್ಯ್ ದೀನಾಂತ್. ತುಂ ಆತಾಂ ಸಲ್ವಲಾಯ್ ದೆಕುನ್ ಆಯ್ಕ್ - ತುಜ್ಯಾ ಆನಿಂ ತುವೆಂ ಎದೊಳ್ ಪರ್ಯಾಂತ್ ಭೆಟ್ಲ್ಲ್ಯಾ ಸಗ್ಳ್ಯಾ ಮನ್ಶಾಂಲಾಗಿಂ ಆಸ್ಚೆಂ ಸಾಮಾನ್ಯ್ ಸಂಗತ್ ಖಂಯ್ಚಿಗೀ ಮ್ಹಳ್ಯಾರ್ ’ಮನ್ಶಾಪಣ್’"
ಸಂದೇಶ್: ಮನಿಸ್ ಕೋಣ್, ಕಿತೆಂ?, ಕಸೊ? ಮ್ಹಳ್ಳೆಂ ಚಿಂತಾಪ್ ಸಂಸಾರಾಚೆಂ ಚಿಂತಾಪ್, ತರ್ ಹರ್ಯೆಕ್ಲೊ ಮನಿಸ್ ಆಪ್ಣಾಪರಿಂಚ್. ಮನ್ಶಾಪಣಾಚಾಕೀ ಉಂಚ್ಲೆಂ ತತ್ವ್ ಹೆರ್ ನಾ ಮ್ಹಳ್ಳೆಂ ಚಿಂತಾಪ್ ಜರ್ತರ್ ಮನಿಸ್ ಚಿಂತುಂಕ್ ಸಕ್ತಾ ತೊ ಖರೆಂಚ್ ದೈವಿಕ್ ಚಿಂತಾಪ್ ಚಿಂತಾಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
