ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ - ಸಾಂ. ಮೆಂತಾಚೆಂ ಅಚರ್ಯೆಂ
ಚಾ.ಫ್ರಾ.ದೆ’ಕೋಸ್ತಾ: ಕೊಂಕ್ಣಿ ಸಾಹಿತ್ಯಾಚಾ ಮಟ್ಟಾರ್ ಸಾಂಗ್ಚೆಂ ತರ್ ಚಾ.ಫ್ರಾ.ನ್ ಆಪಡ್ಲೆಲೆಂ ಸರ್ವ್ ಭಾಂಗಾರ್, ತಾಣೆಂ ಬರಯಿಲ್ಲೆಂ ಸರ್ವ್ ಸಾಹಿತ್ಯ್, ತೆಂಯ್ ವಿಶಿಶ್ಟ್ ಮಟ್ಟಾಚೆಂ ಆನಿ ಅಪುರ್ಭಾಯೆಚೆಂ. ಜಾಂವ್ ನಾಟಕ್, ಜಾಂವ್ ಕವಿತಾ, ಜಾಂವ್ ಲೇಖನಾಂ ವಾ ಜಾಂವ್ ಕಾಣ್ಯೊ ಕಿತ್ಲ್ಯೊ ಅಪುರ್ಭಾಯೆಚ್ಯೊ ಮ್ಹಣ್ಚಾಕ್ ಹಿ ಕಾಣಿ ವಾಚ್ಲ್ಯಾರ್ ಸುಸ್ತಾತೆಲೆಂ. ವಿಂಚ್ಲ್ಲೊ ವಿಶಯ್ ಸಾದೊ ಜಾವ್ಯೆತಾ ಪುಣ್ ಬರಂವ್ಕ್ ವಾಪಾರ್ಲ್ಲಿ ಸೊಭಿತ್ ಕೊಂಕ್ಣಿ ಭಾಸ್ ತಾಚಾ ಉತ್ರಾಂನಿ ಕಶಿ ಸಾಡೊ ನೆಸ್ಲ್ಲ್ಯಾ ನವ್ಯಾ ಹೊಕ್ಲೆಪರಿಂ ಸೊಭ್ತಾ ತೆಂ ತುಮಿಂಚ್ ಪಾರ್ಕಿಯಾ.
ಚಾ.ಫಾ.ಚ್ಯೊ ಹೆರ್ ಕಾಣ್ಯೊ: ಕೊಳ್ಸೊ, ಚಿಮ್ಟೊ
ಚಾ.ಫ್ರಾ.ದೆ’ಕೋಸ್ತಾ
ಕೊಣಿ ಆತಾಂ ಮ್ಹಜೆಲಾಗಿಂ ಹೊ ಸಾಂ.ಮೆಂತ್ ಕೊಣ್ ಮ್ಹಣ್ ವಿಚಾರಿನಾಕಾತ್. ಕಿತ್ಯಾಕ್ ಹಾಂವ್ ಹ್ಯಾ ವಿಶಿಂ ಕಸಲಿಚ್ ಮಾಹೆತ್ ನಾತ್ಲ್ಲೊಂ.
“ಮೆಂತ್ ನ್ಹಯ್ರೆ ಕಾಲಾಮೆಂತ್" ಮ್ಹಣ್ತಾಲಿ ವ್ಹಡ್ಲಿಮಾಂಯ್.
ಆತಾಂ ಹೊ ಕಾಲಾಮೆಂತ್ ಮ್ಹಳ್ಯಾರ್ ಕೊಣ್ ಮ್ಹಣ್ ಮ್ಹಜೆಂ ಬೊಡಿಕ್ ಕುಟ್ಟಿಲ್ಯಾರ್ ಹಾಂವ್ ತಿತ್ಲೊಂಚ್ ಮೊನೊ. ಹಿಂದು ಭಾವಾಂನಿ ಎಕೆಕಾ ವಸ್ತುಕ್ ಎಕೆಕ್ ದೇವ್ ಭೆಟಯಿಲ್ಲೆಬರಿ ಆಮ್ಚಾ ಸಾಂತಾ ಭಕ್ತಾಂಚಾ ಎಕ್ತಾರಾಂತ್ಲಿಂ ಥೊಡಿಂ ಬೊಡಾಂ ಅಶಿಂ ಭೆಟೊನ್ ಗೆಲ್ಯಾ೦ತ್. ರಿತಾ ಅಸಾಧ್ಯಾಚಿ, ಅಂತೊನ್ ಸಾಂಡ್ಲ್ಲ್ಯಾಂಚೊ, ಜೂದ್ ದುಷ್ಟಾಕಾಯೆಚೊ, ಬಾರ್ಬರಾ ಘಡ್ಘಡ್ಯಾಂಚಿ ಆನಿ ಹೊ ಮೆಂತ್ ಜಿವ್ದಾಳಿಂಚೊ. ಹ್ಯೊ ಪದ್ವ್ಯೊ ಕೊಣೆಂ ಕಶ್ಯೊ ವಾಂಟ್ಲ್ಯಾತ್ ತೆಂ ಮ್ಹಜೆ ಜಾಣ್ವಾಯೆಕ್ ಕಳಿತ್ ನಾ. ಪುಣ್ ಮೆಂತ್ ಜಿವ್ದಾಳಿಂಚೊ ಭಕ್ತ್ ಮ್ಹಣ್ ದೃಡ್ ಪಾತಿಯೆಣೆನ್ ಮ್ಹಜಾ � ಮಾಲ್ಘಡಿ ಆಂಕ್ವಾರ್ ಭಯ್ಣ್ (ಆಮ್ಕಾಂ ಮ್ಹಾಲ್ಮಾಂಯ್) ಆಡ್ದೊಶಿಂ ಮಾಗ್ತಾಲಿ. ಇತ್ಲೆಂ ಹಾಂವ್ ಆಯ್ಕೊನ್ ಜಾಣಾಂ.
ತಿಕಾ ಜಿವ್ದಾಳಿಂಚೆ ಭ್ಯೆಂ ಚಡ್. ಆಂಗಾರ್ ಚುಡೆತಿ ಉಡಯ್ಲ್ಯಾರ್ ಎಕ್ ಕಿಂಕ್ರಾಟ್ ಮಾರ್ನ್ ಸಾಂ.ಮೆಂತಾಚಾ ಮಾನಾಕ್ ಎಕ್ ಖಣ್ ತೇರ್ಸ್ ಮ್ಹಣ್ತಾಲಿ.
“ಮೆಂತ್ ನ್ಹಯ್ರೆ ಕಾಲಾಮೆಂತ್" ವ್ಹಡ್ಲಿಮಾಂಯ್ಚೆಂ ಪರ್ತ್ಯಾನ್ ರುದಾನ್.
ಕಶೆಂಯಿ ಆಸೊಂಗೆ ಮ್ಹಜೆ ಆವಯ್, ಮಾಲ್ಮಾಂಯ್ಕ್ ತೊ ಮೆಂತ್ಚ್ ನ್ಹಯ್ವೆ? ಹಾಂವ್ ತಿಚಿ ಆನಿ ತಿಚಾ ಮೆಂತಾಚಿ ಕಾಣಿ ಸಾಂಗ್ತಾಂ:
ಮ್ಹಾಲ್ ಮಾಂಯ್ ಎಕೆ ರಾತಿಂ ತೀನ್ ಖಣ್ ತೇರ್ಸ್ ಆನಿ ಅಮಾನತ್ ಕೆಲ್ಲಿ ಎಕ್ ಆಮ್ಚಾ ಬಾಪಾ, ನಮಾನ್ ಮರಿ ಆನಿ ಆನಂದ್ ಬಾಪಾ ಭಾಗೆವಂತ್ ಸಾಂ. ಮೆಂತಾಚಾ ಮಾನಾಕ್ ಭಕ್ತಿಪಣಾನ್ ಮಾಗೊನ್ ಆಡ್ ಪಡ್ಲಿ. ಹಾತಾನ್ ಸಾಸ್ಪೊನ್ ಪಳೆಲೆಂ ಶೆಣಾಚೆ ಧರ್ಣಿರ್ ಕಾಡಿಯಾಂ ಪೇಟ್ ಆನಿ ಚಿಮ್ಣಿ ಮಾತ್ಯಾಲಾಗಿಂ ಆಸ್ಲ್ಲಿ. ಮಾಗಿರ್ ಪುಡಿಚಿ ಬೂಲ್ ಸಾಸ್ಪಾತಾನಾ ಮಾಜ್ರಾಚಿ ಶಿಮ್ಟಿ ಮೆಳ್ಳಿ. ತಿ ತಿಣೆಂ ಹಾತಾನ್ಂಚ್ ಪಯ್ಸ್ ಕೆಲಿ. ಸೊಪ್ಯಾರ್ ತಿಚೊ ಮಿವ್ಣೊ ಮ್ಹಜೊ ಆಬ್ ಘೊರೆತಾಲೊ. ಭಿತರ್ ಮ್ಹಜಿ ವ್ಹಡ್ಲಿಮಾಂಯ್ ಆನಿ ತಿಚಿ ಸಬಾರ್ ಭುರ್ಗಿಂ ನಿದ್ಲ್ಲಿಂ. ಪಾಟ್ಲ್ಯಾ ಸೊಪ್ಯಾರ್ ಕಾಮಾಚೊ ಬಿರ್ಮು ಪಡ್ಲ್ಲೊ.
ತ್ಯಾ ದಿಸಾ ಮಾಜ್ರಾಕ್ ಕಸಲಿಂ ಚಿಂತ್ನಾಂ ಘುಂವ್ತಾಲಿಂ ತೆಂ ಕೊಣ್ಯ್ ನೆಣಾಂ. ಘಡಿಯೆ ಘಡಿಯೆ ಮಾಜಾರ್ ಆಪ್ಲಿ ಶಿಮ್ಟಿ ವ್ಹಡ್ಲಿಮಾಂಯ್ಚೆ ತೊಂಡಾಕ್ ಯಾ ಕುಶಿಕ್ ಲಾಯ್ತಾಲೆಂ ಆನಿ ತಿ ಭರ್ಮಿದೆರ್ ಆಸ್ಲ್ಲಿ ಜಾಗಿ ಜಾತಾಲಿ.
“ಉಟ್ಲೆಂಯೆ ಮಾಜಾರ್ ತೆಂ"’ಖೆಂವ್ಚೆತಾಲಿ ತಿ.
ತೆದಾಳಾ ಕುಮೆರಿಂತ್ ಸಾಲಿಯೆ ರುಕಾರ್ ನತುಂಗ್ ಕುಕಾಯ್ತಾಲೆಂ, ಕಿಡಿ ಕಾನಾಂತ್ಲಿಂ ಫ಼ುಲಾಂ ವೊಡ್ತಾಲ್ಯೊ. ಮ್ಹಜಿ ಆಜಿ ಉಡೊನ್ ಪಡ್ತಾಲಿ.
“ಕಹಲೆಂ ಖಂಯ್ ತೆಂ?"
“ಮಾಜಾರ್ಗೊ ಶಿಮ್ಟಿ ಘಸ್ಟಿತಾ"
“ಕಿತೆಂ ಖಂಯ್ ತಾಕಾ?"
“ಚರಾಬ್ ತಾಕಾ."
ಅಶೆಂ ಮದ್ಯಾನ್ ರಾತ್ ಉತ್ರೊನ್ ಗೆಲಿ ಕಿಡಿ ಮೊವ್ ಜಾಲ್ಯೊ. ನತ್ತುಂಗ್ ಉಬ್ಲ್ಲೆಂ ಶೆಜಾರ್ಚಾ ಪೆಟ್ಯಾನ್ ಎಕ್ ಲಾಂಬ್ಶಿ ಹುಳ್ಮಿ ದಿಲಿ ಆನಿ ತೆದಾಳಾಚ್ ಮ್ಹಾಲ್ ಮಾಂಯ್ನ್ ಅನ್ಯೇಕ್ ತುಂರ್ಬೆಂತ್ ವ್ಹಾಜಯ್ಲೆಂ.
“ಗೆಲೆ೦ಯೆ ಮಾಜಾರ್, ಪಿದಾಪ್ತಾಚೆಂ"
“ಹೆಂ ಕಾಹಲೆಂ ಎಕ್ ಘಡಿಯೆ ಪಾವ್ಟಿ ಕಲ್ಕಿತಾ?" ವ್ಹಡ್ಲಿಮಾಂಯ್ ಧೆಂಕ್ಣೆಲಿ.
“ಅಳೆ ಪರ್ತ್ಯಾನ್ ಆಯ್ಲೆಂಚ್, ಚಲ್, ಮೊರ್ನ್ ವಚ್" ಪಯ್ಸ್ ಲೊಟ್ಲೆಂ ಮ್ಹಾಲ್ ಮಾಂಯ್ನ್.
ಆತಾಂ ವ್ಹಡ್ಲಿಮಾಂಯ್ಕ್ ಸಮಾಧಾನ್ ನಾ ಜಾಲೆಂ. ತಿ ಪಿಂರ್ಗತ್ ಉಟ್ಲಿ ಆನಿ ಆಲ್ತಾರಿರ್ ಭೋವ್ ಬಾರೀಕ್ ಜಾವ್ನ್ ಜಿಳ್ಚಿ ಚಿಮ್ಣಿ ವ್ಹಡ್ ಕೆಲಿ. ತಿಚೊ ಉಜ್ವಾಡ್ ಫಾಂಕ್ತಾನಾಂಚ್ ತಿಣೆಂ ಮಾರ್ಲ್ಲೆ ಕಿಂಕ್ರಾಟೆಕ್ ವೊಣದಿ ಹಾಲ್ಲ್ಯೊ. ಭುರ್ಗಿಂ ಜಾಗಿಂ ಜಾಲಿಂ, ಬಿರ್ಮು ಘುಡಾ ಸೊಪ್ಯಾ ವಯ್ಲೊ ಸಕ್ಲಾ ಪಡ್ಲೊ ಆನಿ ಆಬಾನ್ ರಾತಿಂ ಮಾರ್ಲ್ಲ್ಯಾ ಸೊರ್ಯಾಚೆಂ ನಿಮಾಣೆಂ ಅಮಾಲ್ ಧೊಂಪ್ರಾಂತ್ ದೆಂವ್ಲೆಂ.
ಆತಾಂ ಮ್ಹಾಲ್ಮಾಂಯ್ ಹೆ ಘಡಿಯೆ ಕಶಿ ಜಾಲ್ಲಿ ತೆಂ ಸಾಂ.ಮೆಂತ್ಚ್ ಜಾಣಾಂ. ಹಸ್ತಿನ್ ಕಿಂಕ್ರಾಟ್ ಮಾರ್ಲ್ಲೆ ಬರಿ ರಾತಿಂ ಎಕ್ ಬೋಬ್ ಜಾಲ್ಲಿ ಗಾಂವಾಂತ್ ಸುಮಾರ್ ವರ್ಸಾಂ ಉಗ್ಡಾಸ್ ಉರ್ಲಾ. ಆಲ್ತಾರಿಲಾಗಿಂ ದಿಮ್ಕುರ್ಯಾಂ ಪಾವೊನ್ ಪಾಟ್ ಕರ್ನ್ ತಿ ಉಶ್ಯಾಕ್ ಪಳೆತಾಲಿ, ಆನಿ ಪಿಂಪ್ಳಾಚಿ ಖೊಲಿ ಥರ್ಥರ್ಲ್ಲೆಬರಿ ಥರ್ಥರ್ತಾಲಿ.
ಎಕಾ ಭುರ್ಗ್ಯಾನ್ ದಾರಾಚೊ ಆಡಾಂಬೊ ಕಾಡ್ಲೊ. ಘರ್ಚಾ ಧನಿಯಾನ್ ವಿಚಾರ್ ಕರ್ತಾನಾ ಘರ್ಚೆ ಧನಿನಿನ್ ಜಿವ್ದಾಳ್ ಪಳೆಲಿ ಮ್ಹಣ್ ಥಿರ್ ಜಾಲೆಂ.
“ಖಂಯ್ ಗೆಲಿ?"
“ಬಾಯೆಚಾ ಉಶ್ಯಾ ಪಂದಾ ರಿಗ್ಲ್ಯಾ"
ಆಬಾನ್ ಚಿಮ್ಣಿ ವ್ಹಡ್ ಕರ್ನ್ ಧರ್ಣಿರ್ ದವರ್ಲಿ. ಆನಿ ಸೊಪ್ಯಾರ್ ಥಾವ್ನ್ ಆಪ್ಣೆಂ ಪೆಟವ್ನ್ � ಲಾಗಿಂಚ್ ದವರ್ಲಿ. ಭಾಯ್ರ್ ಉಡಿ ಮಾರ್ತಾನಾ ಬಿರ್ಮು ದೋನ್ ಸೊಂಟೆ ಘೆವ್ನ್ ಭಿತರ್ ಉಡ್ತಾಲೊ.
“ಏ ಮ್ಹಜಾ ಸಾಂ.ಮೆಂತಾ" ಮ್ಹಾಲ್ ಮಾಂಯ್ ಆಕ್ಲಾಸ್ತಾಲಿ.
ದೊಗಾಂಯ್ನಿ ಮೆಳೊನ್ ವ್ಹಡ್ ಜಯ್ತ್ ಅಗ್ಗ್ಯೊ ಮಾರ್ನ್ ಘಾಲೊ. ಬಿರ್ಮುನ್ ತಾಕಾ ಘರಾಭಾಯ್ರ್ ಹುಲ್ಪಾಯ್ಲೊ.
ತೆ ರಾತಿಂ ಉಪ್ರಾಂತ್ ನೀದ್ ಪಡ್ಲಿನಾ ಮ್ಹಾಲ್ � ಕಾಂಪ್ ಸುಟೊಂಕ್ ದೋನ್ ಗೊಡಾಂಚಿ ಕಾಫ಼ಿ ಕರ್ನ್ ಭರಯ್ಲಿ. ಮಾಗಿರ್ ತಿಣೆಂ ಆಡ್ದೊಸ್ ಮಾಗ್ಲೊ ಆನಿ ಸಳ್ ಕೆಲೆಂ ಮ್ಹಣೊನ್ ಘರ್ಚಾ ಸಗ್ಳ್ಯಾಂ ಕರ್ನಾಂ ಎಕ್ ಕೊಂತ್ ತೇರ್ಸ್ ಸಾಂ.ಮೆಂತಾಚಾ ಮಾನಾಕ್ ಮ್ಹಣಯ್ಲೊ. ಆಬ್ ಮಾತ್ರ್ ಪುರ್ಪುರಾತ್ ಸೊಪ್ಯಾರ್ ಬಸೊನ್ ಬೀಡಿ ವೊಡ್ತಾಲೊ ಖಂಯ್.
“ಸಾಂ.ಮೆಂತಾಚೆಂಚ್ ಆಚರ್ಯೆಂ ಹೆಂ! ನಾತ್ಲ್ಯಾರ್ ಸಗ್ಳಿ ರಾತ್ ಹಾಂವ್ ತಾಕಾ ಮಾಜಾರ್ ಮ್ಹಣ್ ಹಾತಾಂತ್ ಧರ್ತಾಂ, ಉಡಯ್ತಾಂ, ಪರ್ತ್ಯಾನ್ ಧರ್ತಾಂ ಉಡಯ್ತಾಂ ಆನಿ ತೊ ಮಾಕಾ ಚಾಬ್ಲೊನಾ." ತಿಚೆಂ ಎಕ್ಚ್ ರಜಾರ್ ಆಸ್ಲ್ಲೆಂ.
ದುಸ್ರ್ಯಾ ದಿಸಾ ಸೆಜ್ ಸಾಂಬಾರ್ಚಿಂ ಘರಾಂತ್ ಜಮ್ತಾನಾ ಮ್ಹಾಲ್ ಮಾಂಯ್ ಮಾಂದ್ರೆಕ್ ಶೆವ್ಟಾಲ್ಲಿ. ತಿಕಾ ಉಟೊಂಕ್ ಜಾಯ್ನಾ ತಸಲಿ ದೂಕ್ ಕುಸಾಳಾಂನಿ ಪಡ್ಲ್ಲಿ.
“ಸಾಂ. ಮೆಂತಾಚೆಂ ಖರೆಂ ಆಚರ್ಯೆಂ! ಸಾಂ. ಮೆಂತಾ ಮಾಕಾ ಪಾವ್." ಮ್ಹಣ್ ಜಣಾಂ ಪರ್ತಾಲಿಂ. ತರಿ ಮ್ಹಾಲ್ಮಾಂಯ್ ಹರ್ಶೆಂ ಶಾಬೀತ್ ಆಸ್ಲ್ಲಿ ತಿ ದೀಸ್ ವೆತಾಂ ವೆತಾಂ ಕ್ಷೀಣ್ ಜಾಲಿ. ವಯ್ಜಾಂಚೆಂ ವಕಾತ್ ನಟ್ವಾಲೆಂ ನಾ. ಗಾಂವ್ಟಿ ಆಲೊಪಾಲೊ ಲಾಗ್ಲೊ ನಾ. ಘಡಿಯೆ ಘಡಿಯೆ ಉಡೊನ್ ಪಡ್ತಾಲಿ.
“ಸಾಂ. ಮೆಂತಾ ಪಾವ್, ಸಾಂ. ಮೆಂತಾ ಪಾವ್" ಹೆಂಚ್ ಮಾಗ್ಣೆಂ ತಿಚೆಂ ಸರ್ಗಾರಾಜಾಕ್ ಬೊಬಾಟ್ತಾಲೆಂ.
ಜಣಾಂ ಭುಜಯ್ತಾಲಿಂ.
“ನಿಜಾಯ್ಕಿ ಸಾಂ.ಮೆಂತ್ ತುಕಾ ಪಾವ್ಲೊ. ತಾಚಿ ದಯಾ ನಾತ್ಲ್ಲಿ ಜಾಲ್ಯಾರ್, ತ್ಯಾ ಜಿವ್ದಾಳಿಂಚಾ ಭಕ್ತಾನ್ ತುಕಾ ಸಾಂಡ್ಲ್ಲೆಂ ತರ್ ತುಂ ತ್ಯಾಚ್ ದಿಸಾ ಖಾಲಿ ಜಾತಿ ನಾಂವೆ?" ಅಸಲೆ ವಾದ್ ಕರ್ನ್ ತಿಕಾ ಭುಜಯ್ತಾನಾ,
“ಮೊಜಾ ಉಶಾ ಪಂದಾ ಕಾಹಲೆಂ ರಿಗ್ಲೆಂ?" ವಿಚಾರ್ತಾಲಿ ತಿ “ಸಾಂ. ಮೆಂತಾ ಪಾವ್, ಸಾಂ.ಮೆಂತಾ ಪಾವ್."
ಸಮಾ ಎಕಾ ಮಹಿನ್ಯಾನ್ ಮ್ಹಾಲ್ಮಾಂಯ್ ಅಂತರ್ಲಿ.
“ಕಸಲೆ ನಶಿಬ್ ಪಳೆಗೆ ಬಾಯೆ, ಸಗ್ಳಿ ರಾತ್ ಮಾಜಾರ್ ಮ್ಹಣ್ ಹಾತಾಂತ್ ಧರ್ಲ್ಲ್ಯಾ ಜಿವ್ದಾಳಿ ಥಾವ್ನ್ ಸಾಂ.ಮೆಂತಾನ್ ವಾಂಚಯ್ಲೆಂ ಆತಾಂ ಕಶೆಂ ಮ್ಹಣ್ ಸಯ್ತ್ ಕಳಾನಾಸ್ತಾನಾ ಸರ್ಲಿ."
ತಿಚಿ ಪಿಡಾ ಕೊಣಾಕ್ ಕಳೊ೦ಕ್ಯಿ ಕಳ್ಳಿನಾ ಯಾ ಕಳ್ಳ್ಯಾರ್ಯಿ ತೆ ಪಿಡೆಚೊ ಸಾಂತ್ ಕಳ್ತೊ ಯಾ ನಾ ತೆಂ ಆತಾಂ ಮ್ಹಜಾನ್ ಸಾಂಗೊಂಕ್ ಜಾಯ್ನಾ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
