ಕವಿತಾकविताPoem
ಸಲ್ವಣ್
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಪಾಠ್ - 3
ಲಿಸಾಂವ್ - 3. ಸಲ್ವಣ್
ಕವಿತಾ - ಸಲ್ವಣ್
ಕವಿ: ಫ್ರೆಡ್ ಕುಮಾರ್ ಕುಚ್ಚಿಕಾಡ್
ಬೂಕ್: ವೊವ್ಳಾಂ
ಪ್ರಕಾಶಕ್: ಪ್ರಕೃತಿ ಪ್ರೀತ್ ಪ್ರಕಾಶನ್
ಪಾಠ್ ಚಲವ್ಪಿ: ವಲ್ಲಿ ಕ್ವಾಡ್ರಸ್, ಅಜೆಕಾರ್
ತಾರಿಕ್: 15 ಎಪ್ರಿಲ್ 2005
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ರಡುನಾಕಾ, ಥಾಂಬ್ಗೊ ಬಾಳಾ
ಗಾದ್ಯಾಂತ್ ಭಿಂ ವೊಂಪುನ್ ಜಾಲಾಂ
ಉಕ್ಡುನ್ ದಿತಾಂ ಕಣ್ಗೆ ಪಾಳಾಂ
ಭುಕ್ ಮಾತ್ಶಿ ಥಾಂಬಯ್ ಬಾಳಾ
ಖಾಯ್ನಾಕಾಗೋ ಜಾಗ್ರುತ್ ಬಾಳಾ
ಬೊರಾಂ ನ್ಹಯ್ ತಿಂ, ಸುಂರ್ಗೆ ಫಳಾಂ
ಥಾಂಬತ್ ಆಮ್ಚಿ ಭುಕ್ಗೊ ಬಾಳಾ
ಪುಶ್ಟೀ ಭಾತ್ ಪಸ್ವೊನ್ ಆಯ್ಲಾಂ
ಹಾಸ್ಗೊ ಬಾಳಾ, ನಾಚ್ಗೊ ಬಾಳಾ
ಶೆತ್ಗೊ ಆಮ್ಚೆಂ ಪಿಕೊನ್ ಜಾಲಾಂ
ಫಾಲ್ಯಾಂಚ್ ಫಾಂತ್ಯಾರ್ ಲುಂವೊನ್ ಘಾಲ್ಯಾಂ
ಸಗ್ಳ್ಯಾ ಮಾಳ್ಯಾರ್ ಮುಡೆಚ್ ದಾಳ್ಯಾಂ
ಸಾಂಗುಂ ಕಿತೆಂ ನೆಂಟ್ಯಾ ಬಾಳಾ
ಸಗ್ಳೆಂ ಬೆಳೆಂ ಚೆಂಚೊನ್ ಗೆಲಾಂ
ಸೆಜ್ರ್ಯಾ ರೆಡ್ಯಾನ್ ಉಸ್ತುನ್ ಘಾಲುನ್
ಆಮ್ಚೆಂ ಸುಕ್ಚ್ ಮಸ್ತುನ್ ಘಾಲಾಂ.
(ತಸ್ವಿರೆಂತ್ ಆಸ್ಚಿಂ - ದಾವ್ಯಾ ಥಾವ್ನ್ ಉಜ್ವ್ಯಾಕ್)
ಬಸ್ಲ್ಲಿಂ: ಲಾರೆನ್ಸ್ ಪಿಂಟೊ ಕೆಲರಾಯ್, ಉಮೇಶ್ ಶರ್ಮಾ, ವಾಲ್ಟರ್ ಡಿ’ಸೊಜ್ ನಂದಳಿಕೆ.
ಉಭಿಂ ಆಸ್ಚಿಂ: ಜೋನ್ ಕೊರೆಯಾ ಬೊಂದೆಲ್, ವಿಲ್ಸನ್ ಸಲ್ಡಾನ್ಹಾ ಶಿರ್ತಾಡಿ, ಹೆನ್ರಿ ಲುವಿಸ್ ಸಾಸ್ತಾನ್, ಮೆಲ್ವಿನ್ ವಾಸ್ ಕೆಲರಾಯ್, ಕ್ಲಾರಾ ಫೆರ್ನಾಂಡಿಸ್ ಕುಲ್ಶೇಕರ್, ಕ್ಯಾರಲ್ ಮಾರ್ಟಿಸ್ ಆನಿಂ ವಲ್ಲಿ ಕ್ವಾಡ್ರಸ್ (ತಸ್ವೀರೆರ್ ನಾ).
ಆಧ್ಲ್ಯಾ ಕವಿತಾಪಾಠಾಂಚೊ ವಿವರ್
ಕವಿತಾಪಾಠ್ - 2 . ಕಯ್ದ್ಯಾಚಿ ಕವಿತಾ (ಎಚ್ಚೆಮ್)
ಕವಿತಾಪಾಠ್ - 1 . ವಾಟ್ (ಮೆಲ್ವಿನ್ ರೊಡ್ರಿಗಸ್)
ಕವಿಚಿ ವ್ಹಳೊಕ್:
ಫ್ರೆಡ್ ಕುಮಾರ್ ಕುಚ್ಚಿಕಾಡ್ ಜಾಗೆಕವಿಂತ್ ಉದೆಲ್ಲ್ಯಾ ಕೊಂಕ್ಣೆಂತ್ಲ್ಯಾ ವಿಂಚ್ಣಾರ್ ಕವಿಂ ಪಯ್ಕಿ ಎಕ್ಲೊ. ಫ್ರೆಡ್ ಕುಮಾರ್ ಕುಚ್ಚಿಕಾಡ್ ಹಾಚಾ ಕವಿತಾಂನಿ ಕೊಂಕ್ಣಿ ಭಾಸೆಚಿ ಗ್ರೇಸ್ತ್ಕಾಯ್ ಉಟೊನ್ ದಿಸ್ತಾ ಮಾತ್ರ್ ನ್ಹಯ್, ಹಾಚಾ ಕವಿತಾಂನಿ, ವಾಚ್ಪ್ಯಾಂಚಾ ಮತಿಂತ್ ವಿಚಾರ್ ಉಟಾಶೆಂ ಕರ್ಚಿ ಶ್ಯಾಥಿ ಆಸಾ. ಉದೆವ್ ಪತ್ರಾಚಾ ಸಂಪಾದಕೀಯ್ ಮಂಡಳೆಂತ್ ವಾವ್ರ್ ಕೆಲ್ಲ್ಯಾ ಫ್ರೆಡ್ ಕುಮಾರಾಕ್, ದೆ|ಚಾ.ಫ್ರಾ’ದೆ’ಕೋಸ್ತಾಚಿ ಲಾಗ್ಸಿಲಿ ಸಳಾವಳ್ ಆಸ್ಲ್ಲಿ. ಎದೊಳ್ ಪರ್ಯಾಂತ್ ಫ್ರೆಡ್ ಕುಮಾರಾಚೊ ’ವೊವ್ಳಾಂ’ ಮ್ಹಳ್ಳೊ ಏಕ್ ಕವಿತಾಜಮೊ ಪರ್ಗಟ್ ಜಾಲಾ.
ದೆ|ಲುವಿಸ್ ಮಸ್ಕರೇನ್ಹಸ್ ಜನ್ಮಾಶತಾಬ್ಧಿಚಿ ಪ್ರಶಸ್ಥಿ ಹಾಕಾ ಲಾಭ್ಲ್ಯಾ.
1. ಭರ್ವಸೊಚ್ ಹಾತ್ ಸೊಡಿತ್ ತರ್....??? [ಜೋಮೆಲ್ ಬೊಂದೆಲ್]:
’ಸಲ್ವಣ್’ ಕವಿತಾಂತ್ ಕವಿ ತಾಚಾ ಜಿವಿತಾಂತ್ ಅಸಲ್ಯಾ ಎಕಾ ಶಿರಿಗುಂಡಿಂತ್ ಶಿರ್ಕಾಲಾಗೀ ಹರ್ಯೇಕಾ ಮೆಟಾ ಮೆಟಾನಿ ಕಸ್ಟ್ ಆನ್ವಾರಾಂ ಉದ್ಯೆಲಾಂತ್. ಜಿವಿತಾಂತ್ ಸಂಪೂರ್ಣ್ ಥರಾನ್ ತೊ ಸಲ್ವೊನ್ ಗೆಲಾ. ಜಾಂವ್ಕ್ ಪುರೊ ಆರ್ತೀಕ್ ರಿತಿನ್ ಯಾ ಕಂಚಾಯ್ ದುಸ್ರ್ಯಾ ಕಾರಾಣಾ ವರ್ವಿಂ ಜಾವ್ಯೆತ್. ಜಾಲ್ಯಾರಿ ಕವಿ ಹರ್ ಏಕ್ ಕಸ್ಟ್ ಪರಿಹಾರ್ ಕರುಂಕ್ ಜಿವಿತಾಂತ್ ವೊದ್ದಾಡುನ್ಂಚ್ ಆಸಾ. ತಶೆಂ ಆಸ್ತಾಂ, ಏಕ್ ನಾ ಏಕ್ ದೀಸ್ ತಾಕಾ ಜೀಕ್ ಯಾ ಕಸ್ಟಾಂಕ್ ಪರಿಹಾರ್ ಲಾಬ್ತಾಲೊ ಮ್ಹಣ್ ಬರ್ವಸೊ ಉದೆತಾವ್ಚ್ಯಾ ವೆಳಾರೀ, ಭರ್ವಸೊಚ್ ಜರ್ತರ್ ಹಾತ್ ಸೊಡಿತ್ ತರ್ ಜಿವಿತಾಚೊ ಹರ್ ಏಕ್ ವಾಟೆರ್ ಕಾಳೊಕ್ ದಿಸೊನ್ ಯೆತಾ ಮ್ಹಣೊನ್ ಹ್ಯಾ ಕವಿತಾಚೆರ್ ಸ್ಪಷ್ಟ್ ರಿತಿನ್ ದಿಸೊನ್ ಯೆತಾ.
ಹ್ಯಾ ಕವಿತಾಂತ್ ಕವಿ ತಾಚಾ ’ನೆಂಟ್ಯಾ ಬಾಳಾ’ ಕಡೆನ್ ಉಲಯ್ತ್ ಆಸಾ. ನೆಂಟೆ ಬಾಳ್ ಮ್ಹಳ್ಯಾರ್ ಆಮಿ ಜಲ್ಮಾಲ್ಯಾ ಭುರ್ಗ್ಯಾ ಥಾವ್ನ್ ಚ್ಯಾರ್ ಪಾಂಚ್ ವರ್ಸಾಂಚ ಭುರ್ಗ್ಯಾಕ್ ಆಮಿ ಬಾಳಾ ಮ್ಹಣ್ ಆಪಯ್ತಾಂವ್. ಆನಿಂ ಹ್ಯಾ ಭುರ್ಗ್ಯಾಂಕ್ ಕಸ್ಟ್, ದುಃಕ್, ಸುಖ್, ಸೊಂತೊಸ್ ಮ್ಹಣ್ ತಾಂಕಾ ಕಿತೆಂಚ್ ಗೊತ್ತು ನಾ. ತಿಂ ತಾಂಚಾಚ್ ಸೊಬಿತ್ ಆಂಜಾಳ್ ಸಂಸರಾಂತ್ ಆಸ್ತಾತ್.
ಏಕ್ ಬಾಪುಯ್ ಕಸ್ಟಾನ್ ಮ್ಹಳ್ಳ್ಯಾ ಬರಿಂ ಸದನೀತ್ ಏಕ್ ಕಿಲೊ ತಾಂದುಳ್ ಹಾಡ್ನ್ ಶಿಜಾವ್ನ್ ವಾಡಿತ್ ತರ್ ತೆಂ ಬಾಳ್ ತೆಂ ಸದಾಂಚ್ ಖುಶ್. ಯಾ ತೊಚ್ ಬಾಪುಯ್ ಕಶೆಂಯ್ ತರೀ ಯಾ ಉಶ್ಣೆಂ ಮಾಗೊನ್ ತರೀ ಏಕ್ ಕ್ವಿಂಟಾಲ್ ತಾಂದುಳ್ ಹಾಡ್ನ್ ಸದಾನೀತ್ ಶಿಜಾವ್ನ್ ವಾಡಿತ್ ತರಿ ತೆಂ ಬಾಳ್ ಸದಾಂಚ್ ಖುಶ್. ಬಾಪುಯ್ ಕಿತ್ಲ್ಯಾ ಕಸ್ಟಾನಿ ಪೊಸ್ತಾ ಮ್ಹಳ್ಳೆಂ ತ್ಯಾ ಬಾಳಾಕ್ ಕಾಂಯ್ಚ್ ಗೊತ್ತುನಾ. ಹೆಂ ಜಾವ್ನಾಸಾ ನೆಂಟ್ಯಾ ಬಾಳಾಂಚಿ ಚಿಂತಾಪ್. ಹಾಂಗಾಸರ್ ಕವಿ ಕಂಚ್ಯಾ ’ನೆಂಟ್ಯಾ ಬಾಳಾ’ಕಡೆನ್ ಉಲೈತಾ? ಮ್ಹಜ್ಯಾ ಪ್ರಕಾರ್ ಕವಿ ತಾಚಾ ಬಿತರ್ ಆಸ್ಲ್ಲ್ಯಾ ವ್ಯಕ್ತಿಕ್ ಏಕಾ ನೆಂಟ್ಯಾ ಬಾಳಾಕ್ ಸರಿ ಕರುನ್ ತಾಚೆ ಕಡೆನ್ ಉಲೈತಾ. ಪಯ್ಲ್ಯಾ ಪಂಗ್ತೆರ್ ಕವಿ, ತಾಚಾ ಜಿವಿತಾಚಾ ಕಠೀಣ್ ಕಸ್ಟಾಂಚ ಘಡಿಯೆಚಾ ವೆಳಾರೀ ’ಸಲ್ವಣೆಕ್’ ಜಯ್ತ್ ವರುಂಕ್ ಸೊಡಿನಾಸ್ತಾಂ, ತಾಚಾ ಜಿವಿತಾಚೊ ಅಖ್ರೆಚೊ ’ತುರುಪಾಚೊ ಪತ್ತೊ" (Trump Card) ಉಪಯೊಗ್ಸಿತಾ. ತೊ ತಾಚಾ ಬಾಳಾ ಕಡೆನ್ ಅಶೆಂ ಸಾಂಗ್ತಾ’ಜಿವಿತ್’ ಮ್ಹಳ್ಳೆಂ ಶೆತ್ ಕೊಸುಂಕ್ ಆಸಾಚ್, ಜಿಯೆಂವ್ಕ್ ಆಸಾಚ್, ಪೊಳಾಪಳ್ ಘೆಂವ್ಕ್ ಜಾಯ್ನಾ. ದೆಕುನ್ ’ಬಾಳಾ’ ತುಂ ಚುರ್ಚುರ್ನಾಕಾ, ರಡನಾಕ.
ಕವಿನ್ ತಾಚಾ ಜಿವಿತ್ ಮ್ಹಳ್ಳ್ಯಾ ಶೆತಾಂತ್ ಯಾ ಗಾದ್ಯಾಂತ್ ’ಭಿಂ’ ವೊಪುನ್ ಜಾಲಾಂ, ಮ್ಹಣ್ಜೆ ’ಭಿಂ’ ಸತಾಚೆಂ, ನಿತಿಚೆಂ, ಅನಿಂ ಬೊರ್ಯಾ ಮೌಲ್ಯಾನಿಂ ಬೊರ್ಲ್ಲೆ ಜಾವ್ನ್ ಆಸಾ. ಹೆಂ ಸಂಸರಾಚೆ ದಿಷ್ಟಿಕ್ ಪ್ರಯೊಜಾನಾಕ್ ಪಡ್ಚೆ ನಾ ಜಾಂವ್ಕ್ ಪುರೊ. ಆನಿ ಥೊಡ್ಯಾಂಕ್ ಹೊ ಬಿಯಾಳೊ ವರ್ಥ್ಯ್ ಜಾಂವ್ಕ್ ಪುರೊ. ದೆಕುನ್ ಕವಿ ಬಾಳಾ ಕಡೆನ್ ಸಾಂಗ್ತಾ ’ಬಾಳಾ ತುಂ, ಆಮಿ ಜಿಯೆವ್ನ್ ಆಯಿಲ್ಲ್ಯಾ ತ್ಯಾ ವಾಟೆರ್ ಕಸ್ಟ್ ಆಸುಂಕ್ ಪುರೊ, ಪೂಣ್ ಏಕ್ ದೀಸ್ ಆಮ್ಕಾ ಪ್ರತಿಪಳ್ ಮೆಳ್ತಾಲೊ ತೊ ಖಂಡಿತ್. ತೆದಾಳಾ ಮ್ಹಣಸರ್ ತುಂ ಸುದಾರ್ಸುನ್ ವ್ಹರ್, ’ಕಣ್ಗೆ ಪಾಳಾಂನಿ’ ಸೊಸ್ಣಿಕಾಯ್ ತುಜಿ ಭುಕ್ ತಿಕೆಶೆ ಥಾಂಬಾಯ್.
ಕೊಣಿ ತರಿ ’ಕಣ್ಗೆ ಪಾಳಾಂ’ ಉಕ್ಡುನ್ ಜಿವಿತ್ ಸಾರ್ತಾ ಜಾಲ್ಯಾರ್, ತಾಕಾ ಜಿಯೆಂವ್ಕ್ ವಿಶೆಚ್ ದುಬ್ಳಿಕಾಯ್ ಆಸಾ ಮ್ಹಣ್ ಜಾಲೆಂ, ತೆದಾಳಾ ತೊ ದುಸ್ರಿ ವಾಟ್ ನಾಸ್ತಾನ್ ಹ್ಯಾ ದೇಡ್ ಗೇಣ್ ಪೊಟಾಚಿ ಭುಕ್ ಥಾಂಬಾಂವ್ಕ್ ಕಣ್ಗೆಚಿ ಪಾಳಾಂ ತರೀ ಉಕ್ಡುನ್ ದೀಸ್ ಸಾರ್ತಾ. ಹಾಂಗಸರ್ ಕಣ್ಗೆ ಪಾಳಾಂ ಮ್ಹಳ್ಯಾರ್ ಸೊಸ್ಣಿಕಾಯ್ ಜಾವ್ನಾಸ. ದುಸ್ರ್ಯಾ ಪಂಗ್ತೆರ್, ಕವಿ ಹ್ಯಾ ಕಸ್ಟಾಂಚ ವೆಳಾರ್, ತೊ ತಾಕಾಚ್ ಜಾಗ್ರುತ್ ಕರ್ತಾ. ಕಸ್ಟಾಂಚಾ ವೆಳಾರ್ ವಯ್ರ್ ವಯ್ರ್ ಅನ್ವಾರಾಂ ಯೆತೆಚ್ ಆಸ್ತಾತ್. ಸಾಂಗಾತಾಚ್ short cut ಜಿಣಿ ಜಿಯೆಂವ್ಕ್ ’ತಾಳ್ಣ್ಯೊ ಯೆತಾತ್. ತಿಂ ಜಿಣಿ ನಾಸ್ ಕರ್ಚಿ ಮಾರೆಕಾರ್ ’ಸುಂರ್ಗೇ ಫಳಾಂ’ ಜಲ್ಯಾರೀ, ಪೊಳೊಂವ್ಚ್ಯಾಕ್ ’ಬೊರಾಂ’ ಬರಿಂ ದಿಸ್ತಾ ತರೀ. ದೆಕುನ್ ಕವಿ ಸಾಂಗ್ತಾ ಕೀ ತುಂ ಜಿಯೆವ್ನ್ ಆಯಿಲ್ಲಿ ವಾಟ್, ಜಿಣಿ ಯಾ ಉಕೊಲ್ನ್ ದರ್ಲ್ಲಿಂ ಜಿವಿತಾಚಿ ಮೌಲ್ಯಾಂ ’ಪುಶ್ಟಿ’ ಬಾತ್ ಯಾ ಬೆಳೆಂ ಜಾವ್ನ್ ಫಳ್ ದಿತಾನಾ, ’ಬೊರಾಂ’ ಬರಿಂ ದಿಶ್ಚ್ಯಾ ’ಸುಂರ್ಗೇ ಪಳಾಂ’ ಖಾಂವ್ಕ್ ಆಶೆನಾಕಾ.
ತಿಸ್ರ್ಯಾ ಪಂಗ್ತೆರ್ ಕವಿ ಬಾರೀ ಸೊಂತೊಸಾನ್ ತಾಚಾ ಬಾಳಾಕಡೆನ್ ಸಂಗ್ತಾ ಕೀ "ಅಳೆ ಆಮಿ ಜಿಯೆಲ್ಯಾ ಕಸ್ಟಾ ವಾಂಟ್ಯಾಕ್ ಪಳ್ ಮೆಳ್ಳಾ, ಆಮ್ಕಾ ಜೀಕ್ ಮೆಳ್ಳ್ಯಾ, ದೆಕುನ್ ಆನಿಂ ಆಮಿ ರಡ್ಚೆನಾಕಾ ನಾಚ್ಯಾ ಆನಿ ಹೊ ಪಳ್ ಆಮಿ ಪಾಲ್ಯಾಂಚ್ ಏಕ್ಟಾಂಯ್ ಕರುಂಯಾ". ’ಸಗ್ಳ್ಯಾ ಮಾಳ್ಯಾರ್ ಮುಡೆಚ್ ದಾಳ್ಯಾಂ’ ಮ್ಹಣ್ಜೆ ಹ್ಯಾ ಪ್ರತಿಪಳಾ ನಿಮ್ತಿ ಆಮಿ ಆಮ್ಚ್ಯಾ ಮುಕ್ಲ್ಯಾ ಜಿವಿತಾಕ್ ಆನಿ ಹೆರಾಂಕ್ ಆದರ್ಶ್ ಜಾವ್ನ್ ಪುಂಜಾವ್ನ್ ದವರುಂಯಾ.
ಚೊವ್ತ್ಯಾ ಪಂಗ್ತೆರ್, ಕವಿಚಿ ದುಃಖ್ ಸಾಂಗ್ಚೆಂಚ್ ನ್ಹಂಯ್. ಇತ್ಲ್ಯಾ ಸಂತೊಸೊನ್ ಆಸ್ಲ್ಲೊ ಕವಿ, ತಾಚೆರ್ ಆನ್ಯೆಕ್ ಅನ್ವಾರ್ ಆಯ್ಲಾಂ ಮ್ಹಣ್ ಸಾಂಗ್ತಾ. ತಾಕಾ ಮೆಳ್ಲ್ಲೊ ಬೊರ್ಯಾ ಶೆಗುಣಾಚೊ ಪ್ರತಿಪಳ್ ’ಅನ್ಬೋಗ್ ಕರ್ಚ್ಯಾ ಪುಡೆಂಚ್, ಸೆಜ್ರಾ ರೆಡ್ಯಾನ್’ ಮ್ಹಣ್ಜೆ ವಾಯ್ಟ್ ಸಕ್ತೆನ್ ಯಾ ದುಸ್ರ್ಯಾಂಚ್ಯಾ ಶಿಂತ್ರಿನ್ ಯಾ ಆಡ್ಪಾಯ್ ದಿಲ್ಲ್ಯಾ ನಿಮ್ತಿ ತಾಕಾ ಮೆಳ್ಲ್ಲೆಂ ಸುಕ್ಚ್ ಮಸ್ತುನ್ ಘಾಲಾಂ ಹ್ಯಾ ಕವಿತಾಂತ್ ಕವಿ ವಾಚ್ಪ್ಯಾಕ್ ಸುರ್ವೆರ್, ಖಂತ್, ಬಿರ್ಮೊತ್ ಉಬ್ಜಾಯ್ತಾ. ಉಪ್ರಾಂತ್ ಚತ್ರಾಯೆಚಿ ಬುದ್ಬಾಳ್ ಸಾಂಗೊನ್ ನಾಚೊನ್ ಉಡ್ಕಣಾ ಗಾಲ್ತಾನಾಂಚ್ ತಾಚೆರ್ ಆಯಿಲ್ಯಾ ಸಲ್ವಣ್ ದಾಕೊವ್ನ್ ಆಮ್ಕಾ ಬೆಜಾರಾಯೆಂತ್ ಬೊಡೊವ್ನ್ ದವರ್ತಾ.
2. ಆಶೆಚೆಂ ಭಿಂ ಫಳ್ ದಿತಾನಾ...! - ಮೆಲ್ವಿನ್ ಜೆ. ವಾಸ್, ಕೆಲರಾಯ್
ಪ್ರಕೃತೆಚ್ಯಾ ನೈಸರ್ಗಿಕ್ ಸುಂದರಾಯೆಂತ್ ಆಪ್ಲ್ಯಾ ಕವಿತೆಂನಿ ಸ್ವಫ್ಣಾಂ ಘುಂತ್ಚೊ ಫ್ರೆಡ್ ಕುಮಾರ್ ಕುಚ್ಚಿಕಾಡ್ ಹ್ಯಾ ಭೋವ್ ಅಪುರ್ಭಾಯೆಚಾ ಕವಿತಾಂತ್ ಸಲ್ವಣೆಕ್ ಭೋವ್ಚ್ ಸೊಭಿತ್ ಥರಾನ್ ಪಿಂತ್ರಾಯ್ತಾ. ಸಲ್ವಣ್ ಮನ್ಶಾ ಜಿವಿತಾಚ್ಯಾ ಮೆಟಾಂಚೆಂ ಜಯ್ತ್ ಜಾವ್ನಾಸಾ, ಸಲ್ವಣ್ ನಾಸ್ತಾನಾ ಜಯ್ತಾಕ್ ಸೊಭಾಯ್ ನಾ. ಸಲ್ವಣಿ ಮನ್ಶಾಕ್ ಸಭಾರ್ ಲಿಸಾಂವಾಂ ಶಿಕಯ್ತಾ ಜಶೆಂ ಹೆಂ ಕವಿತಾಯ್.
ಹಾಂಗಾಸರ್ ಹಾಂವ್ ಹ್ಯಾ ಸಲ್ವಣೆಕ್ ಸಗ್ಳಿಂ ರುಪಾಂ ಸೊಡುನ್ ಕೇವಲ್ ದೋನ್ ರುಪಾಂ ಆಪ್ಣಾಯ್ತಾಂ. ಪಯ್ಲೆಂ ಸಾಮಾಜಿಕ್ ದುಸ್ರೆಂ ಧಾರ್ಮಿಕ್.
’ರಡುನಾಕಾ ಥಾಂಬ್ಗೊ ಬಾಳಾ
ಗಾದ್ಯಾಂತ್ ಭಿಂ ವೊಂಪುನ್ ಜಾಲಾಂ
ಉಕ್ಡುನ್ ದಿತಾಂ ಕಣ್ಗೆ ಪಾಳಾಂ
ಭುಕ್ ಮಾತ್ಶಿ ಥಾಂಬಯ್ ಬಾಳಾ’
ಸಾಮಾಜಿಕ್ ರಿತಿನ್ ಪಳೆಂವ್ಚೆಂ ತರ್ ಸಮಾಜೆಂತ್ ಭುಕ್ ವಾಸ್ತವಿಕ್. ಜಾಂವ್ ತಿ ಕುಡಿಚಿ ಜಾಂವ್ ತಿ ಪೊಟಾಚಿ, ಜಾಂವ್ ತಿ ಆಶೆಚಿ, ಸಗ್ಳ್ಯಾ ಥರಾಂಚ್ಯಾ ಭುಕೆಕ್ ಹಾಂವ್ ಹಾಂಗಾ ಆಶೆಚೆಂ ಏಕ್ಚ್ ರೂಪ್ ದಿತಾಂ. ಹಾಂಗಾಸರ್ ಬಾಳ್ ಆನಿಂ ಭುಜವ್ಣೆದಾರ್ ಕೊಣ್ಯ್ ಜಾವ್ಯೆತ್. ಆಶಾಚ್ ರಡ್ಣ್ಯಾಕ್ ಮೂಲ್ ಕಾರಾಣ್. ದೆಕುನ್ ಕವಿ ಸಾಂಗ್ತಾ ಗಾದ್ಯಾಂತ್ ಭಿಂ ವೊಂಪುನ್ ಜಾಲಾಂ. ಹೆಂ ವೊಂಪ್ಲ್ಲೆಂ ಭಿಂ ಖಂಯ್ಚಾ ಭುಕೆಚಾ ರುಪಾಂತ್ ವೊಂಪ್ಲಾಂ ತೆಂ ತೊ ಸಾಂಗಾನಾ. ಶೆತಾಂತ್ ತೆಂ ವೊಂಪ್ಲಾಂ, ಶೆತ್ ತೆಂ ಕಸಲೇಂಯ್ ಜಾವ್ಯೆತ್ ಪೋಟ್, ಕೂಡ್, ಮತ್ ಇತ್ಯಾದಿ. ವೊಂಪ್ಲ್ಲೆಂ ಭಿಂ ಫಳ್ ದೀಂವ್ಕ್ ಖಂಡಿತ್ ವೇಳ್ ಲಾಗ್ತಾ. ತೆದೊಳ್ ಮ್ಹಣಾಸರ್ ರಾಕೊಂಕ್ ಪಡ್ತಾ. ತ್ಯಾ ಭುಕೆಖಾತಿರ್ ಆಜ್ ರಡ್ಲ್ಯಾರ್ ರಡ್ಲ್ಲಿ ತಿ ಭುಕ್ ಥಾಂಬಾನಾ. ಹ್ಯಾ ಭುಕೆಚಾ ವಾಟೆವಯ್ರ್ ಜಿವಿತ್ ಸಾರ್ತಾನಾ ಆಶಾ ಕರುನ್ ರಡ್ಚಾ ಕಣ್ಗೆ ಪಾಳಾಂ ಜಿವಿತಾಚಾ ಮೆಟಾಂ ವಯ್ಲಿಂ ಉತ್ರಾಂ, ಜಿವಿತ್ ಮ್ಹಳ್ಳ್ಯಾ ರುಕಾಕ್ ವಾದಾಳಾಥಾವ್ನ್ ರಾಕೊನ್ ರಾಕೊನ್ ರಾಕೊನ್ ವರ್ಚೆ ಜಿವ್ಯಾ ಇದ್ಕಾಚೆ ಉಪಾದೆಸ್. ಹಾಂಕಾಂ ಧಾರ್ಮಿಕ್ ಉಪಾದೆಸಾಂಕ್ ಸರಿ ಕರ್ಯೆತ್. ಹ್ಯಾ ಉಪಾದೆಸಾಂಕ್ ವಿರುದ್ದ್ ರಿತಿರ್, ವಾಂಕ್ಡೆ ವಾಟೆಚೆ ಉಪಾದೆಸ್ಯ್ ಮುಕ್ಲ್ಯಾ ಉತ್ರಾಂನಿ...
’ಖಾಯ್ನಾಕಾಗೊ ಜಾಗ್ರುತ್ ಬಾಳಾ
ಬೊರಾಂ ನ್ಹಯ್ ತಿಂ ಸುಂರ್ಗೆ ಫಳಾಂ
ಥಾಂಬತ್ ಆಮ್ಚಿ ಭುಕ್ಗೊ ಬಾಳಾ
ಪುಶ್ಟೀ ಭಾತ್ ಪಸ್ವೊನ್ ಆಯ್ಲಾಂ’
ಜಿವಿತಾಚೆ ವಾಟೆವಯ್ಲಿ ಭುಕ್ ಥಾಂಬಯ್ತಾನಾ ಬರ್ಯಾ ಭುಕೆಕ್ ಬೊರಾಂ ಆನಿಂ ವಾಯ್ಟ್ ಬುಕೆಕ್ ಸುಂರ್ಗೆಂಫಳಾಂಕ್ ಸರಿ ಕರ್ತಾ ಕವಿ. ಜಿವಿತಾ ವಾಟೆ ವಯ್ಲೆ ಉಪಾದೆಸ್ ವಿಂಚ್ತಾನಾ ಸುಂರ್ಗೆಫಳಾಂಚಿ ಚತ್ರಾಯ್ ದಿತಾ. ಸುಂರ್ಗೆಫಳಾಂ ಮ್ಹಳ್ಯಾರ್ ಭುಕ್ ಥಾಂಬಂವ್ಕ್ ಸುಂರ್ಗೆಂ ಫಳಾಂ ಖಾವ್ನ್ ಜಿವಿತ್ಚ್ ವಾಂಕ್ಡ್ಯಾ ವಾಟೆಂನಿ ಹೊಗ್ಡಾಯಿಲ್ಲೊ ಸಭಾರ್ ಯುವಲೋಕ್ ಆಸಾ. ಜಾಂವ್ ಅಮಾಲ್ ಪಿಯೆವ್ಣ್ಯಾಂನಿ, ಯಾ ರಂಗೀನ್ ಜಿವಿತಾಚಾ ಸ್ವಪ್ಣಾಂನಿ. ಹ್ಯಾ ತರ್ನಾಟ್ಪಣಾಚಾ ವಾಟೆರ್ ಭಾತ್ ಪಸ್ವೊನ್ ಯೆಂವ್ಚೊ ವೇಳ್ ಹೊ. ಜಿವಿತಾಚಾ ಸಭಾರ್ ಭುಕೆಂಚಿಂ ರುಪಾಂ ಹಾಂಗಾಥಾವ್ನ್ ಥಾಂಬೊನ್ ಯೆಂವ್ಚೆಂ ಸ್ವಾಭಾವಿಕ್. ರಾಕೊನ್ ರಾವ್ಲ್ಲ್ಯಾ ಜಿವಿತಾಂತ್ ಆಜ್ ಪುಷ್ಟಿ ಭಾತ್ ಪಳೆವ್ನ್ ಸಂತೊಸ್ ಪಾಂವ್ಚೆಂ ಸಹಜ್.
’ಹಾಸ್ಗೊ ಬಾಳಾ ನಾಚ್ಗೊ ಬಾಳಾ
ಶೆತ್ಗೊ ಆಯ್ಚೆಂ ಪಿಕೊನ್ ಜಾಲಾಂ
ಫಾಲ್ಯಾಂಚ್ ಫಾಂತ್ಯಾರ್ ಲುಂವೊನ್ ಘಾಲ್ಯಾಂ
ಸಗ್ಳ್ಯಾ ಮಾಳ್ಯಾರ್ ಮುಡೆಚ್ ದಾಳ್ಯಾಂ’
ಹ್ಯಾ ತರ್ನಾಟ್ಪಣಾಚಾ ಜಿವಿತಾಂತ್ ಸಂತೊಸಾಚೆಂ ಆಮಾಲ್ ಕಿತ್ಲೆಂ ತೆಂ ಕವಿ ಹಾಂಗಾ ವರ್ಣಿತಾ. ಯೆದೊಳ್ ಆಪ್ಣೆಂ ಕಸ್ಟ್ ಕಾಡ್ಲ್ಲ್ಯಾಚೊ ಫಳ್ ಮುಕಾರ್ ದಿಸ್ಚೊ ತೊ ಪಳೆವ್ನ್ ಹಾಸೊನ್ ನಾಚೊನ್ ಮೆಟಾಂ ಕಾಡ್ಚಿಂ. ಹಾಂಗಾ ಆರಂಬ್ ಜಾತಾತ್ ಸ್ವಪ್ಣಾಂ. ಹಾವೆಂ ಪಯ್ಲೆಂಚ್ ಸಾಂಗ್ಲ್ಲೆಪರಿಂ ಆಶಾಚ್ಚ್ ದುಕಾಕ್ ಮೂಲ್ ಕಾರಾಣ್. ಹಾಂಗಾ ಫಾಲ್ಯಾಂಚಿ ಸ್ವಪ್ಣಾಂ ಉದೆತಾತ್ ಮುದೆ ದಾಳುಂಕ್. ಹಾಂಗಾಸರ್ ಧಾರ್ಮಿಕ್ ರಿತಿನ್ ಪಳೆಂವ್ ಜಾಲ್ಯಾರ್ ಸಾಂ|ಲುಕಾಚಾ ವಾಂಜೆಲಾಂತ್ ಜೆಜುನ್ ಸಾಂಗ್ಲ್ಲಿ ಎಕಾ ಪಿಶ್ಯಾ ಗ್ರೇಸ್ತ್ ಮನ್ಶಾಚಿ ವೊಪಾರ್ ಉಡಾಸಾಕ್ ಯೆತಾ. ಮತಿಂತ್ಲ್ಯಾ ಸ್ವಪ್ಣಾಂಕ್ ವೊಪಾರಿಂತ್ ಜೆಜುನ್ ದಿಲ್ಲೆಂ ಲಿಸಾಂವ್ಂಚ್ ಹಾಂಗಾ ಕವಿಯ್ ಆಮ್ಚೆ ಮುಕಾರ್ ದವರ್ತಾ. ಆಯ್ಚೊ ತಾಚೊ ನಾಚ್ ಆನಿ ಖೆಳ್ ಫಾಲ್ಯಾಂಚಾ ಜಿವಿತಾಂತ್,
’ಸಾಂಗುಂ ಕಿತೆಂ ನೆಂಟ್ಯಾ ಬಾಳಾ
ಸಗ್ಳೆಂ ಬೆಳೆಂ ಚೆಂಚೊನ್ ಗೆಲಾಂ
ಸೆಜ್ರಾ ರೆಡ್ಯಾನ್ ಉಸ್ತುನ್ ಘಾಲುನ್
ಆಮ್ಚೆಂ ಸುಕ್ಚ್ ಮಸ್ತುನ್ ಘಾಲಾಂ’
ಅಶೆಂ ಪಾಟ್ಲೆಂ ದೂಕ್ ಹಾಂಗಾ ನಿಮಾಣೆಂ ಉಭೆಂ ಜಾತಾ. ಫಾಲ್ಯಾಂಚೆಂ ಸ್ವಪಾಣ್ ಜಾವ್ನ್ ಉಭೊನ್ ವೆತಾ. ಎಕಾ ವಾಟೆನ್ ಸುಕ್ ಭೊಗ್ಚೊ ವೇಳ್ ಯೆತಾನಾ ಜಿವಿತ್ ಸಾಂಗಾತ್ ದೀಂವ್ಕ್ ತಯಾರ್ ನಾ ಹೆಂ ಧಾರ್ಮಿಕ್ ರಿತಿನ್ ಪಳೆಲ್ಯಾರ್ ಸಾಮಾಜಿಕ್ ರಿತಿರ್ ಹೆಂ ಏಕ್ ಶೋಷಣ್ ಮ್ಹಣ್ಯೆತ್. ಸೆಜ್ರಾ ರೆಡೊ, ಕವಿನ್ ಉಭಿ ಕೆಲ್ಲಿ ಇಮಾಜ್ಚ್ ಸಾಂಗ್ತಾಕೀ ನೆಂಟ್ಯಾ ಬಾಳಾಮುಕಾರ್ ರೆಡ್ಯಾಚೆಂ ಭಳ್ ಕಿತ್ಲೆಂ ತೆಂ. ಹ್ಯಾ ಸೆಜ್ರಾ ರೆಡ್ಯಾನ್ ಸಮಾಜೆಂತ್ಲ್ಯಾ ವಾಸ್ತವಾಂತ್ ಶೋಷಣ್ ಕರ್ತೆಲ್ಯಾ ಕೊಣಾಯ್ಕ್ಯ್ ಸರಿ ಕರ್ಯೆತ್. ತಾಚ್ಯೆ ಮುಕಾರ್ ಶೋಷಿತ್ ಜಾಲ್ಲೊ ಕೆದಾಳಾಯ್ ನೆಂಟೊಚ್.
ಬೊರಾಂಕ್ ಆನಿಂ ಸುಂರ್ಗೆಫಳಾಂಕ್ ಪಾರ್ಕುನ್ ಭುಕ್ ಥಾಂಬಯಿಲ್ಲೆಂ ಜಿವಿತ್ ಫಾಲ್ಯಾಂಚಾ ಸ್ವಪ್ಣಾಂಚಾ ಸ್ವಪ್ಣಾಂಚಾ ಬುಕೆಖಾತಿರ್. ಹ್ಯಾ ಖಾತಿರ್ ವಾರಾಯಿಲ್ಲ್ಯಾ ವಾಟೆರ್ ಕಿತ್ಲೆಂ ರಡ್ಣೆಂ ಉದೆಲ್ಲೆಂ. ಕಿತ್ಲಿಂ ದುಖಾಂ ಗಳಯಿಲ್ಲಿಂ. ಕಿತ್ಲೆ ಕಸ್ಟ್ ಭೊಗ್ಲ್ಲೆ. ಆಶಾ ಫಾಲ್ಯಾಂಚಾ ಸ್ವಪ್ಣಾಚಿ ಆಸ್ಲ್ಯಾರ್ಯೀ ಕಣ್ಗೆಪಾಳಾಂ ಖಾವ್ನ್ ಜಿವಿತ್ ಕಾಡ್ಲ್ಲೆಂ ಫುಡಾರಾಚ್ಯಾ ಸುಕಾಕ್. ಫುಡಾರಾಚೆಂ ಸುಕ್ ಪಸ್ವೊನ್ ಯೆತಾನಾ ಸಂತೊಸ್ ಕಿತ್ಲೊ? ನಾಚ್ ಕಿತ್ಲೊ? ತ್ಯಾ ಸ್ವಪ್ಣೆಲ್ಲ್ಯಾ ದೊಳ್ಯಾಂನಿ ಆನಿ ಕುಡಿಂನಿ ಸುಕ್ ಹಾತಾ ತಾಳ್ವೆರ್ ಖೆಳ್ತಾನಾ ಪಾಲ್ವಾಂಚಿ ಆಶಾ ತಿ ಖರಿ. ಹ್ಯಾ ಆಶೆಚ್ಯಾ ಶಿಖರಾರ್ ಆಸ್ತಾನಾ ತ್ಯಾ ಸೆಜ್ರಾ ರೆಡ್ಯಾಚಾ ಹಾಂಕಾರಾಕ್ ಬಲಿ ಜಾಂವ್ಚೆಂ ಜಿವಿತ್ ಭೊವ್ಚ್ ಸೊಭಾಯೆನ್ ಪಿಂತ್ರಾಯ್ಲಾಂ ಕವಿನ್.
ತಶೆಂಚ್ ಧಾರ್ಮಿಕ್ ರಿತಿನ್ ಸಂಸಾರಾಚಾ ಆಶೆಂತ್ ಬರ್ಯಾ ಕಷ್ಟಿ ಜಿವನಾಕ್ ವಾಯ್ಟಾಚೆಂ ಜೀವನ್ ಸುಲಭ್ ವಾಟ್ ಜಾವ್ನ್ ಯೆತಾನಾ ತೆಂ ಸೊಡುನ್ ಬರ್ಯಾ ವಾಯ್ಟಾಕ್ ಪಾರ್ಕುನ್ ಆಪ್ಣೆಂ ಘೆತ್ಲ್ಲ್ಯಾ ಜಿವಿತಾಕ್ ಆರ್ಥ್ ದಿಂವ್ಚೊ ವೇಳ್ ಲಾಗಿಂ ಯೆತಾನಾ ಮನ್ಶಾನ್ ಸ್ವಪ್ಣಾಂ ಭಾಂದ್ಚಿಂ ಸಹಜ್. ಫಾಲ್ಯಾಂಚಾ ಚಿಂತ್ನಾಂನಿ ಗುಂತ್ಲ್ಲ್ಯಾ ಸ್ವಪ್ಣಾಂ ದೆವಾಚಾ ಖುಶೆಕ್ ಆಡ್ ವೆತಾನಾ ತ್ಯಾ ಗ್ರೇಸ್ತ್ ಪಿಶ್ಯಾ ಮನ್ಶಾಚಾ ವೊಪಾರಿಪರಿಂ ಆಮ್ಚೆಂಯ್ ಸುಕ್ ಉಸ್ತುನ್ ವೆಚಾಂತ್ ಕಾಂಯ್ ದುಭಾವ್ ನಾ ಮ್ಹಣ್ಯೆತ್.
ಮನಿಸ್ ಸಲ್ವಣೆಕ್ ಸ್ವಿಕಾರ್ ಕರುಂಕ್ ನರ್ಗಾತಾನಾ... [ಕ್ಯಾರಲ್ ಮಾರ್ಟಿಸ್, ತ್ರಾಸಿ]
ಹ್ಯಾ ಕವನಾಂತ್ ಮನಿಸ್ ತಾಚಾ ಜಿವಿತಾಂತ್ ಕಸ್ಟ್ ಕಾಡ್ನ್ ವಯ್ರ್ ಯೆತಾನಾ, ದುಸ್ರೊ ತಾಕಾ ತಾಚಾ ಜಿವಿತಾಂತ್ ಸಲ್ವಣ್ ದಿತಾ ಜಶೆಂಕೀ ವೊಂಪ್ಲ್ಲೆಂ ಭಿಂ ಕಿರ್ಲೊನ್ ವ್ಹಡ್ ಜಾವ್ನ್ ಲುಂವೊಂಕ್ ತಯಾರ್ ಜಾತಾನಾ ಸೆಜಾರ್ಚೊ ರೆಡೊ (ಮನಿಸ್ ಯಾ ಮನಿಸ್ ಜಾವ್ಯೆತ್) ಯೇವ್ನ್ ಬೆಳೆಂ ಸಗ್ಳೆಂ ಗುಡ್ಡಾವ್ನ್ ವೆತಾ. ಆನಿ ತಾಕಾ ಭಗ್ತಾಕೀ ತಾಕಾ ಚಿಂತಿನಾಸ್ತಾನಾ ತಾಚ್ಯಾ ಜಿವನಾಂತ್ ಸಲ್ವಣ್ ಮೆಳ್ತಾ.
1. ಭುಕೆಲ್ಲೆಂ ಭುರ್ಗೆಂ ರಡ್ತಾನಾ ಆವಯ್ ತಾಕಾ ಅಶೆಂ ಸಾಂಗೊನ್ ಥಾಂಬಯ್ತಾಗೀ ಆತಾಂ ತಾಚೆಂ ಕಸ್ಟಾಂಚೆ ದೀಸ್ ವೆಗ್ಗಿಂ ಪರಿಹಾರ್ ಜಾತೆಲೆ. ಕಿತ್ಯಾಕ್ ಮ್ಹಳ್ಯಾರ್ ತಾಣಿಂ ಗಾದ್ಯಾಂತ್ ವೊಂಪ್ಲ್ಲೆಂ ಭಿಂ ಕಿರ್ಲೊನ್ ಯೆತಚ್ ಆಸಾ ಆನಿಂ ತಾಂಚೆ ಕಸ್ಟಾಂಚೆ ದೀಸ್ ವೆಗ್ಗಿಂ ಪರಿಹಾರ್ ಜಾತೆಲೆ, ತ್ಯಾ ದೆಕುನ್ ಆತಾಂ ಭುರ್ಗ್ಯಾಂಚಿ ಭುಕ್ ಥಾಂಬವ್ಕ್ ತೊ ಸಾಂಗ್ತಾಕೀ ಕಣ್ಗೆಚಿಂ ಪಾಳಾಂ ಉಕಡ್ನ್ ದಿವುನ್ ತಾಚಿ ಭುಕ್ ಥಾಂಬಂವ್ಕ್.
2. ಭುರ್ಗೆಂ ಸುಂರ್ಗೆ ಫಳಾಂ ಖಾವ್ನ್ ಭುಕ್ ಥಾಂಬಂವ್ಕ್ ಪಳೆತಾನಾ, ಆವಯ್ ಸಾಂಗ್ತಾಕೀ, ಖಾಯ್ನಾಕಾ ತೆಂ ಫಳ್, ಜಿವಾಕ್ ತಿಂ ಬರಿಂ ನ್ಹಯ್ ಮ್ಹಣ್. ಭುಕ್ ಆಮ್ಚಿ ವೆಗ್ಗಿಂ ಥಾಂಬ್ತೆಲಿ ಕೀ ಗಾದ್ಯಾಂತ್ ಆಮ್ಚೆಂ ಭಾತ್ ಬರೆಂ ಜಾವ್ನ್ ಪಿಕೊನ್ ಆಯ್ಲಾಂ ಆನಿ ಕಸ್ಟಾಂಚೆ ದೀಸ್ ವೆಗ್ಗಿಂ ಪರಿಹಾರ್ ಜಾತೆಲೆ ಮ್ಹಣೊನ್.
3. ಆತಾಂ ತಿ ಭುರ್ಗ್ಯಾಕ್ ಅಶೆಂ ಸಾಂಗೊನ್ ಖುಶ್ ಕರ್ತಾಕೀ ತುಂ ಬಾಳಾ ಆತಾಂ ಹಾಸೊನ್ ಖೆಳೊನ್ ರಾವ್. ಕಿತ್ಯಾಕ್ ಗಾದ್ಯಾಂತ್ ಆಮ್ಚಾ ಶೆತ್ ಪಿಕೊನ್, ಲುವೊಂಕ್ ಆಯ್ತೆಂ ಜಾಲಾಂ ದೆಕುನ್ ಫಾಲ್ಯಾಂಚ್ ಫಾಂತ್ಯಾರ್ ಆಮಿಂ ಭಾತ್ ಲುಂವೊನ್ ಘಾಲ್ತಾತ್, ಉಪ್ರಾಂತ್ ಘರ್ಚಾ ಮಾಳ್ಯೆರ್ ಮುಡೆಚ್ ದಾಳ್ನ್ ದವರ್ಯಾಂ ಮ್ಹಣ್ ಖುಶಿ ಜಾವ್ನ್ ಭುರ್ಗ್ಯಾಂಕ್ ಸಮ್ಜಾಯ್ತಾ.
4. ಅಖ್ರೇಚಾ ಪಂಗ್ತೆರ್ ತಿಂ ಇತ್ಲಿಂ ದುಖೇಸ್ತ್ ಜಾಲ್ಯಾಕೀ ಆನಿಂ ಆಪ್ಲ್ಯಾ ನೆಣ್ತ್ಯಾ ಭುರ್ಗ್ಯಾಕ್ ಸಾಂಗ್ತಾಕೀ ಸಗ್ಳೆಂ ಆಮ್ಚೆಂ ಬೆಳೆಂ ಪಾಡ್ ಜಾವ್ನ್ ಮಸ್ತೊನ್ ಚೆಂಚೊನ್ ಗೆಲಾಂ. ಸೆಜಾರ್ಚಾ ಮನ್ಶಾನ್ ಗಾದ್ಯಾಂತ್ ತಾಮ್ಚ್ಯಾ ರೆಡ್ಯಾಕ್ ಸೊಡ್ನ್ ಸಗ್ಳೆಂ ಬೆಳೆಂ ಉಸ್ತುನ್ ಘಾಲಾಂ ಆನಿಂ ಆತಾಂ ತ್ಯಾ ಕುಟ್ಮಾಚೆಂ ಸುಖ್ಚ್ ಮಸ್ತುನ್ ಘಾಲಾಂ ಮ್ಹಣ್ ದುಖಾಂನಿ ಆಪ್ಲ್ಯಾ ಭುರ್ಗ್ಯಾಕ್ ಸಮ್ಜಾಯ್ತಾ.
ಸಲ್ವಣೆಂತ್ ಜೀಕ್ ಜೊಡ್ಟಾ ಕವಿ ಆನಿ ಕವಿತಾ [- ವಲ್ಲಿ ಕ್ವಾಡ್ರಸ್, ಅಜೆಕಾರ್]
ಸಲ್ವಣ್ ಕವಿತಾ ಸಂತೊಸಾಚಾ ವಾಟೆರ್ ಚಲವ್ನ್ ನಿರಾಶೆಚಾ ಲೊಟಾಕ್ ಘಾಲ್ಚೆಂ ಜಾವ್ನಾಸಾ ಮ್ಹಜಾ ಮತಿಂತ್ ಖಂಚ್ಲ್ಲೆಂ ಎಕಾ ಉತ್ರಾಚೆಂ ರುಪ್ಣೆಂ ತರ್ಯೀ ಕವಿತೆಚೆ ಹರ್ಯೆಕ್ ಸಂದ್ ಮೊಡುನ್, ಜೊಡುನ್ ಪಳೆತಾನಾ ಮ್ಹಾಕಾ ಅಶೆಂ ಭೊಗ್ತಾ;
ಪಯ್ಲೆಂ : ’ಕವಿತಾಕ್ ಘೆತ್ಲೆಲೊ ವಿಷಯ್’; ಆಯ್ಚಿ ಕೊಂಕ್ಣಿ ಪರಿಗತ್. ಕವಿತಾ ವಾಚುನ್ ಮ್ಹಜಾ ಮತಿಂತ್ ಉದೆವ್ನ್ ಆಯಿಲ್ಲೆಂ ಪಿಂತುರ್ ಜಾವ್ನಾಸಾ ಕವಿತೆಚೊ ಕವಿ ಕೊಂಕ್ಣಿ ಭಾಸೆಚಾ ಬರ್ಯಾ ಪ್ರಗತೆಚಿ ಆಶಾ ದವ್ರುನ್ ಅಖ್ರೇಕ್ ನಿರಾಸ್ ಜಾವ್ನ್ ಕಳ್ವಳ್ತಾ. ಪುಣ್ ಹಾಂಗಾಸರ್ ಕವಿನ್ ವಿಂಚ್ಲ್ಲಿ ಸುವಾತ್ ಫಕತ್ ಭಾಸೆಚೆರ್ ಮಾತ್ರ್ ಸೀಮಿತ್ ಜಾವ್ನ್ ಉರ್ನಾಸ್ತಾಂ ಸಂಸ್ಕ್ರತೆಚೊ ಹುಸ್ಕೊ ಉಭ್ಜಾಶೆಂ ಕರ್ಚೆಂಯ್ ದಿಸೊನ್ ಯೆತಾ.
ದುಸ್ರೆಂ : ’ಇಮಾಜೊ/ಅಲಂಕಾರ್ ಪಳೆಯಾಂ’;
ಪಯ್ಲ್ಯಾ ಪಂಗ್ತೆರ್ ಮ್ಹಾಕಾ ದಿಸ್ಚೊ ಇಮಾಜ್ಯೊ; ಬಾಳ್, ಗಾದೊ, ಭಿಂ, ಕಣ್ಗೆಪಾಳಾಂ, ಭುಕ್, ಥಾಂಬವ್ಣಿ ಬಾಳ್ ಮ್ಹಳ್ಯಾರ್ ಲೊಕಾ, ಗಾದೊ ಮ್ಹಳ್ಯಾರ್ ಆಮ್ಚೊ ಮಾಯ್ಗಾಂವ್, ಭಿಂ ಮ್ಹಳ್ಯಾರ್ ಆಮ್ಚೆ ವಿಚಾರ್, ಭಾಸ್, ಸಂಸ್ಕ್ರತಿ, ರಿವಾಜ್, ಭುಕ್ ಮ್ಹಳ್ಯಾರ್ ದೀಸ್ಪಡ್ತೊ ಗ್ರಾಸ್ ಯಾ ಪೊಟಾಚಿ ವ್ಯಾಪ್ತ್. ಥಾಂಬವ್ಣಿ ಮ್ಹಳ್ಯಾರ್ ಸಮಧಾನ್.
ದುಸ್ರ್ಯಾ ಪಂಗ್ತೆರ್ ಮ್ಹಾಕಾ ದಿಸ್ಚೊ ಇಮಾಜ್ಯೊ; ಬೊರಾಂ, ಸುಂರ್ಗೇ ಫಳಾಂ, ಪುಶ್ಟೀ ಭಾತ್ ಬೊರಾಂ ಮ್ಹಳ್ಯಾರ್ ಫಟವ್ನ್ ಪಡ್ಲ್ಲೆಂ ಚಿಂತಾಪ್. ಸುಂರ್ಗೇ ಫಳಾಂ ಮ್ಹಳ್ಯಾರ್ ವರ್ಗಾನಾಸ್ಚೆಂ, ಯಾ ಅಥ್ವೆಂ. ಪುಶ್ಟೀ ಭಾತ್ ಮ್ಹಳ್ಯಾರ್ ಅಪ್ಲ್ಯಾ ಗಾಂವಾಂತ್ ಸಾರ್ಚಿ ಜಿಣಿ. ಸ್ವಾಭಿಮಾನ್.
ತಿಸ್ರ್ಯಾ ಪಂಗ್ತೆರ್ ಮ್ಹಾಕಾ ದಿಸ್ಚೊ ಇಮಾಜ್ಯೊ; ಶೆತ್, ಫಾಂತೆಂ, ಲುಂವಣ್, ಮಾಳೊ, ಮುಡೆ, ದಾಳ್ಚೆಂ ಶೆತ್ ಮ್ಹಳ್ಯಾರ್ ಆಮ್ಚಿ ಗಾಂವ್, ಫಾಂತೆಂ ಮ್ಹಳ್ಯಾರ್ ವೆಗ್ಗಿಂ, ಲುಂವ್ಣಿಂ ಮ್ಹಳ್ಯಾರ್ ಫಲಿತಾಂಶ್ - ಯಾ ರುಜ್ವಾತ್. ಮುಡೆ ಮ್ಹಳ್ಯಾರ್ ದಾಯ್ಜ್, ದಾಳ್ಚೆಂ ಮ್ಹಳ್ಯಾರ್ ಎಕ್ಟಾಂವ್ಚೆಂ. ಚವ್ತ್ಯಾ ಪಂಗ್ತೆರ್ ಮ್ಹಾಕಾ ದಿಸ್ಚೊ ಇಮಾಜ್ಯೊ; ನೆಂಟೆಂ, ಚೆಂಚೊನ್ ಗೆಲಾಂ, ಸೆಜಾರ್, ರೆಡೊ, ಉಸ್ತುನ್ ಘಾಲ್ಚೆಂ ನೆಂಟೆಂ ಮ್ಹಳ್ಯಾರ್ ನೆಣಾರಿ, ಚೆಂಚೊನ್ ಗೆಲಾಂ ಮ್ಹಳ್ಯಾರ್ ಪಿಪ್ಡ್ಡ್ಯಾರ್ ಜಾಲಾಂ, ಸೆಜಾರ್ ಮ್ಹಳ್ಯಾರ್ ಪರ್ದೆಸ್, ರೆಡೊ ಮ್ಹಳ್ಯಾರ್ ಪರ್ಕಿ ಭಾಸ್/ಸಂಸ್ಕ್ರತಿ/ರಿವಾಜ್. ಉಸ್ತುನ್ ಘಾಲಾಂ ಮ್ಹಳ್ಯಾರ್ ಧೆಸ್ವಾಟ್ ಕೆಲಾಂ.
ತಿಸ್ರೆಂ : ’ವಾಪಾರ್ ಕೆಲ್ಲಿಂ ಉತ್ರಾಂ ಸಬ್ಧ್/ಭಾಸೆಚೊ ಪ್ರಯೋಗ್’;
ಫ್ರೆಡ್ ಕುಮಾರ್ ಕುಚ್ಚಿಕಾಡ್ ಕೊಂಕ್ಣಿ ಭಾಸೆಕ್ ಪರಿಪೂರ್ಣ್ ಸಮ್ಜಾಲ್ಲೊ ಕವಿ, ಗಾಂವ್ಚಿ ಅಪುಟ್ ಕೊಂಕ್ಣಿ ತಾಚಾ ಕವಿತೆಂನಿ ಆಸ್ತಾ. ಸಲ್ವಣ್ ಕವಿತಾಂತ್ ತಾಣೆಂ ವಾಪಾರ್ ಕೆಲ್ಲಿ ಭಾಸ್ ಸುಡಾಳ್ ಜಾವ್ನ್ ವ್ಹಾಳೊ ಸೊಭಿತ್ ಆಸಾ. ಆತಾಂ ಕವಿತೆಚೊ ಸಾರ್ ಪಳೆಯಾಂ; ಪಯ್ಲ್ಯಾ ಪಂಗ್ತೆರ್ ಕವಿ ಲೊಕಾಕ್ ಸಮಧಾನ್ ಕರ್ತಾ, ರಡ್ಚೆಂ ನಾಕಾ ವಿಳಾಪ್ ಕರ್ಚೊ ನಾಕಾ, ಕೊಂಕ್ಣಿ ಶೆತಾಂತ್ ಬರೆಂ ಭಿಂ ವೊಂಪ್ಲಾಂ ದೆಕುನ್ ಬರೆಂ ಫಳ್ ಜರೂರ್ ಖಿರ್ಲೊನ್ ಬರೆಂ ಪಿಕಾಳ್ ಯೆಂವ್ಚೊ ಆಶಾವಾದ್ ವೆಕ್ತ್ ಕರ್ತಾ. ತೆದೊಳ್ ಪರ್ಯಾಂತ್ ತುಮಿಂ ಭುಕ್ ತಡ್ವುಂಕ್ ಸಕಾನಾಂತ್ ತರ್ ಆಮ್ಚಾ ಗಾಂವಾಂತ್ ಕಿತೆಂಚ್ ನಾ ಮ್ಹಣ್ ಶಿಣಾನಾಕಾತ್ - ಬಗಾರ್ ಅನಿಕ್ಯೀ ಜಾಯ್ತೆಂ ಆಸಾ, ಸದ್ದ್ಯಾಕ್ ಕಣ್ಗೆಪಾಳಾಂ ಉಕ್ಡುನ್ ದಿತಾಂ ತುಮ್ಚಿ ಮಾತ್ಸಿ ಭುಕ್ ಥಾಂಬವ್ನ್ ಅತ್ರೆಗಾನ್ ರಾಕೊನ್ ರಾವಾ ಪಿಕಾಳಾಕ್ ಮ್ಹಣ್ತಾ.
ದುಸ್ರ್ಯಾ ಪಂಗ್ತೆಚೊ ಸಾರ್ ಪಳೆವ್ಯಾಂ; ದುಸ್ರ್ಯಾ ಪಂಗ್ತೆಚೆರ್ ಕವಿ ಬೊಭಾಟ್ತಾ ಲೊಕಾಕ್, ಜೊ ಕಣ್ಗೆ ಪಾಳಾಂ ಖಾವ್ನ್ ಬೊರಾಂ ಮ್ಹಣ್ ಲೆಕುನ್ ಪರ್ಕಿ ಫಳಾಂಕ್ ಖಾಂವ್ಕ್ ಧರ್ಲೆಲ್ಯಾಕ್. ತಿಂ ಬೊರಾಂ ನ್ಹಯ್ ಬಗಾರ್ ಸುಂರ್ಗೆ ಫಳಾಂ ಮ್ಹಣ್ತಾ ಕವಿ. ಸವಾಲ್ ತಿಂ ಬೊರಾಂ ವ್ಹಯ್ಗೀ ಯಾ ನ್ಹಯ್ ಮ್ಹಳ್ಳೆಂ ನ್ಹಯ್. ಕವಿಕ್ ತಿಂ ಪೆರಾಂ ಜಾಂವ್ ತೊರಾಂ ಜಾಂವ್ ಯಾ ಕಿತೆಂಯ್ ಜಾಂವ್ - ತಾತ್ಸಾರ್. ಕಿತ್ಯಾಕ್ ತಿಂ ಪರ್ಕಿ ಫಳಾಂ ಮ್ಹಳ್ಳ್ಯಾಕ್. ಥಾಂಬತ್ ಆಮ್ಚಿ ಭುಕ್ ಕಿತ್ಯಾಕ್ ಮ್ಹಳ್ಯಾರ್ ಪುಶ್ಟಿ ಭಾತ್ ತಯಾರ್ ಜಾಲಾಂ ಮ್ಹಣ್ತಾ. ಮ್ಹಳ್ಯಾರ್ ಆಮ್ಚಾ ಮೊಟಾಚಿ ಭುಕ್ ಥಾಂಬ್ಚೆತಿತ್ಲೆಂ ಪಿಕಾಳ್ ಆಮ್ಚಾಚ್ ಗಾಂವಾಂತ್ ಆಸ್ತಾಂ ಕಿತ್ಯಾಕ್ ಆಮ್ಕಾಂ ಪರ್ಕಿ ಮ್ಹಳ್ಳೆಂ ಕವಿ ಸಾಂಗ್ತಾ.
ತಿಸ್ರ್ಯಾ ಪಂಗ್ತೆಚೊ ಸಾರ್ ಪಳೆವ್ಯಾಂ; ತಿಸ್ರ್ಯಾ ಪಂಗ್ತೆಚೆರ್ ಕವಿ ಉಲ್ಲಾಸಾನ್ ಭರ್ಲಾ - ಲೊಕಾಂಕ್ ಉಲ್ಲಾಸಿತಾ, ಹಾಸೊಂಕ್, ನಾಚೊಂಕ್ ಉಲೊ ದಿತಾ. ಆಮ್ಚಾ ಗಾಂವಾಂತ್ ಪಿಕಾಳ್ ಆಯಿಲ್ಲಿ ತೊ ರುಜ್ವಾತ್ ದಿತಾ ಆನಿಂ ಫಾಲ್ಯಾಂಚ್ ಲುಂವ್ಣಿ ಕರುಂಕ್ ಸಾಂಗ್ತಾ, ಮಾತ್ರ್ ನ್ಹಯ್ ಮುಡೆಚ್ ಧಾಳುಂಕ್ ಉಲೊಯ್ ದಿತಾ. ಹಾಂಗಾಸರ್ ’ಫಾಲ್ಯಾಂ’ ಮ್ಹಳ್ಳೊ ಸಬ್ಧ್ ವಾಪಾರ್ತಾ ದೆಕುನ್ ಕವಿತೆಚಾ ಕವಿಚಿ ಆಳ್ಸಾಯ್ ಮ್ಹಾಕಾ ದಿಸ್ತಾ. ಪುಣ್ ’ವೆಗ್ಗಿಂ’ ಮ್ಹಳ್ಳೊ ಸಬ್ಧಾಚೊ ವಾಪಾರ್ ಕರುನ್ ತೊ ’ಸುಡ್ಸುಡಿತ್’ ಯ್ ಜಾವ್ಯೆತ್ ಮ್ಹಳ್ಳೊ ಹಿಶಾರೊ ದಿತಾ. ಚವ್ತ್ಯಾ ಪಂಗ್ತೆಚೊ ಸಾರ್ ಪಳೆವ್ಯಾಂ;
ಚವ್ತ್ಯಾ ಪಂಗ್ತೆಚೆರ್ ಕವಿ ಅಕ್ಲಾಸ್ ರುದಾನಾರ್ ಭರ್ಲಾ. ಅಪ್ಣಾಚಿ ಚೂಕ್ ಸಮ್ಜಣಿ ತೊ ಭೋವ್ ಬುಧ್ವಂತ್ಕಾಯೆನ್ ಲೊಕಾಂಚಾ ಮಾತ್ಯಾರ್ ಥಾಪ್ತಾ - ’ನೆಂಟ್ಯಾ ಬಾಳಾ’ ಮ್ಹಣೊನ್. ಜಿತ್ಲೊ ಆಶಾವಾದ್ ತೊ ಪಯ್ಲ್ಯಾ ತೀನ್ ಪಂಗ್ತ್ಯಾಂನಿ ವೆಕ್ತ್ ಕರ್ತಾಗೀ ತಾಕಾ ವೆತಿರಿಕ್ತ್ ಜಾವ್ನ್ ಅಖ್ರೇಚಾ ಪಂಗ್ತೆರ್ ಪೊಳ್ಕುರೊ ಜಾವ್ನ್ ಸೊಡ್ನ್ ಸೊಡ್ತಾ. ಮೊನೆಂ ರುದಾನ್ ವಿಳಾಪ್ ಕರ್ತಾ. ಸೆಜ್ರಾಚಾ ರೆಡ್ಯಾನ್ ಉಸ್ತುನ್ ಘಾಲಾಂ ಆನಿಂ ಆಮ್ಚೆಂ ಸುಖ್ ಮಸ್ತುನ್ ಘಾಲಾಂ ಮ್ಹಣ್ ದುಖಾಂ ಗಳಯ್ತಾ. ಹಿ ಕವಿಚಿ ಅಸ್ಕತ್ಕಾಯ್ ಜಾವ್ಯೆತ್ ಯಾ ಸೊಭಾಯ್ ಜಾವ್ಯೆತ್. ಅಸ್ಕತ್ಕಾಯ್ ಆಸ್ಯೆತಾ ಕವಿತೆಂತ್ಲ್ಯಾ ಕವಿಚಿ ಯಾ ತ್ಯಾ ಕವಿತೆಚಾ ಕವಿಕ್ ಸಮ್ಜಲ್ಲ್ಯಾ ಮ್ಹಜಿ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.