ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಥಂಯ್ ಸಜಾ ಹಾಂಗಾ ಮಜಾ - ಆಸ್ಟಿನ್ ಡಿ’ಸೋಜ್ ಪ್ರಭು
ಒರಿಸ್ಸಾಂತ್ ಇಗರ್ಜಾಂಕ್ ಉಜೊ ಪೆಟ್ಲೊ, ಹಾಂಗಾ ವೀಜ್ ದಿವೆ ಪೆಟ್ಲೆ!
ದಸೆಂಬರ್ ಚೊವೀಸಾವೊ ದಿವಸ್, ಸಗ್ಳ್ಯಾ ಸಂಸಾರಾರ್ ನತಾಲಾಂ ಸಂಭ್ರಮ್ಂಚ್ ಸಂಭ್ರಮ್! ಕೋಣ್ ಆಪ್ಲಿ ನವಿ ಮುಸ್ತಾಯ್ಕಿ, ಮೊಚೆ, ಸೂಟ್, ಕಾಪ್ಡಾಂ, ಇತ್ಯಾದಿ ಮಾಂಡುನ್ ದವ್ರುನ್ ಫಾಂತ್ಯಾಚ್ಯಾ ಮೀಸಾಕ್ ವೆಚಿ ಸರ್ಭಾರಾಯ್ ಕರ್ಚೊ ವರ್ಸಾಂತ್ಲೊ ಏಕ್ ಮಹಾನ್ ದೀಸ್. ಒರಿಸ್ಸಾಂತ್ಲ್ಯಾ ಭುವನೇಶ್ವರಾಂತ್ಲ್ಯಾ ಬಾಮುನಿಗಂ ಹಳ್ಳೆಂತ್ಯ್ ಅಸಲಿಚ್ ನ್ಹಯ್ ತರೀ ನತಾಲಾಂಚಿ ಸರ್ಭಾರಾಯ್ ಚಲೊನ್ಂಚ್ ಆಸ್ಲ್ಲಿ. ಥಂಯ್ಚ್ಯಾ ಕ್ರೀಸ್ತಾಂವಾಂನಿ - ಅಂಬೇಡ್ಕರ್ ಬನೀಕೊ ಸಂಘೊ - ಹಾಣಿಂ ರಸ್ತೊ ನತಾಲಾಂಕ್ ತಯಾರ್ ಜಾವ್ನ್ ಸುಂರ್ಗಾರಾಯಿಲ್ಲೊ. ಕಂದಮಲ್ ಜಿಲ್ಲ್ಯಾಂತ್ಲ್ಯಾ ಹ್ಯಾ ಹಳ್ಳೆಕ್ ಲಾಗಿಂಚ್ ದರಿಂಗಿಬಾದಿ ಪೊಲಿಸ್ ಠಾಣೆ ಆಸಾ. ಲೋಕ್ ಮಾಯಾಮೋಗಾನ್ ಚಲೊನ್ ಏಕಾಮೆಕಾಕ್ ಪಾಂವ್ಚ್ಯಾಂತ್ ಆಪ್ಲೊ ಉಕಲ್ಲೊಲೊ ಹಾತ್ ದಾಖಯ್ತಾತ್. ಹಳ್ಳೆಂತ್ಲ್ಯಾ ಕಾನುನಾಂ ಪ್ರಕಾರ್ ಗರ್ಜೆಚಿ ಒಪ್ಪಿಗಿ ಘೆವ್ನ್ ರಸ್ತ್ಯಾರ್ ಏಕ್ ಆರ್ಕ್ ಮಾಂಡುನ್ ಹಾಡ್ಲ್ಲೆಂ. ಹ್ಯಾ ವೇಳಾ ದೋನ್ ಪಂಗ್ಡಾಂ ಮಧೆಂ ಇಲ್ಲೆಂ ಉಲೊಣೆಂ ಜಾವ್ನ್ ಕ್ರೀಸ್ತಾಂವಾಂನಿ ಹಾಂಗಾಸರ್ ನತಾಲ್ ಸಂಭ್ರಮ್ ಕರ್ಚೊ ಬಂಧ್ ಕರಿಜಾಯ್ ಮ್ಹಣ್ ವಿರೋಧ್ ಪಂಗ್ಡಾಚೆ ಜಾವ್ನಾಸ್ಚ್ಯಾ ಕೋಮುವಾದಿಂನಿ ವಿರೋಧ್ ಹಾಡ್ಲ್ಲೊ.
ದಸೆಂಬರ್ ಚೊವೀಸ್ ಮಧ್ಯಾನ್ ರಾತಿಂ ಏಕಾಚ್ಛಾಣೆ ಹ್ಯಾ ಆತಂಕ್ವಾದಿಂಚೊ ಪಂಗಡ್ ಹಾತಿಂ ಬಂದೂಕೊ, ತಲ್ವಾರಿ, ದೊಣ್ಣೆ, ಇತ್ಯಾದಿ ಘೆವ್ನ್ ಆಯಿಲ್ಲೊ ಅಂಬೇಡ್ಕರ್ ಬನೀಕೊ ಸಂಘಾಚ್ಯಾ ಸಾಂದ್ಯಾಲಾಗಿಂ ವಾದ್ ವಿವಾದಾಕ್ ಲಾಗ್ಲೆ. ಸರ್ವ್ ಕ್ರೀಸ್ತಾಂವಾಂಚೆರ್ ಭಲಾತ್ಕಾರಾನ್ ಆಪ್ಲಿಂ ಆಯ್ದಾಂ ವಾಪ್ರುನ್ ಝಗ್ಡ್ಯಾಕ್ ದೆಂವ್ಲೆ. ತ್ಯಾಚ್ ದೀಸ್ ಮಧ್ಯಾನ್ ರಾತಿಂ ಮೀಸಾವೆಳಿಂ ಬುಬನೇಶ್ವರಾಂತ್ಲ್ಯಾ ಆರ್ಚ್ ಬಿಸ್ಪಾಚ್ಯಾ ಘರಾಕ್ ಸ್ಪೋಟನಾಂ ಉಡವ್ನ್ ತೆಂ ನಾಸ್ ಕರುಂಕ್ ಪಳೆಲೆಂ ತರೀ ದೆವಾಚ್ಯೆ ದಯೇನ್ ಕಿತೆಂಚ್ ಜಕಂ ಜಾಲಿ ನಾ.
ಹ್ಯಾ ಅತಂಕ್ವಾದಿಂಚ್ಯಾ ಭಿಂಯಾನ್ ಲೋಕ್ ಸಗ್ಳೊ ಚಲ್ಲಾಪಿಲ್ಲಿ ಜಾವ್ನ್ ಧಾಂವಾಲಾಗ್ಲೊ - ವಾಂಚ್ಲ್ಯಾರ್ ಭಿಕ್ ಮಾಗೊನ್ ಖಾತಾಂ ಮ್ಹಳ್ಳ್ಯಾಪರಿಂ. ಹ್ಯಾ ವಿರೋಧಿ ಪಂಗ್ಡಾನ್ ಕ್ರೀಸ್ತಾಂವಾಂಚೆರ್ ಗುಳೆ ಮಾರ್ನ್ ದೊಗಾಂಕ್ ಘಾಯೆಶೆಂ ಕೆಲೆಂ. ಸೆಜಾರ್ಚಿಂ ಸರ್ವ್ ಕ್ರೀಸ್ತಾಂವಾಂಚಿಂ ಶೊಪಾಂ ಲೂಟುನ್, ಉಜೊ ಪೆಟವ್ನ್ ದೆಸ್ವಾಟಾಯ್ಲಿಂ ಆನಿಂ ಸತ್ತ್ಯಾನಾಸ್ ಕೆಲೆಂ.
ದುಸ್ರ್ಯಾ ದೀಸಾ ನತಾಲಾಂಚೆಂ ಫೆಸ್ತ್, ಹೆ ಅತಂಕ್ವಾದಿ ಪರತ್ ಪಂಗಡ್ ಬಾಂಧುನ್ ಆಯ್ಲೆ ಆನಿಂ ಬಾಮುನಿಗಮಾಂತ್ಲ್ಯಾ ಸರ್ವಯ್ ಕ್ರೀಸ್ತಾಂವ್ ಇಗರ್ಜಾಂಕ್ ಉಜೊ ದೀವ್ನ್ ಭಸ್ಮುಂಕ್ ಪಾವ್ಲೆ. ತಾಂಚ್ಯಾ ಘರಾಂಕ್ ಉಜೊ ದಿಲೊ, ಆಸ್ತ್ ಪಾಸ್ತ್ ನಾಶ್ ಕೆಲಿ ಆನಿ ಸರ್ವ್ ಕ್ರೀಸ್ತಾಂವಾಂನಿ ತೊ ಗಾಂವ್ ಸೊಡ್ನ್ ಧಾಂವೊಂಕ್ ಜಾಯ್ ಮ್ಹಣ್ ಗಾಜಯ್ಲೆಂ ವ್ಹಡ್ ಬೊಬಾಟ್ ಮಾರುನ್. ಪೊಲಿಸ್ ಠಾಣೆಂ ಲಾಗಿಂಚ್ ಆಸ್ಲ್ಲೆಂ ತರೀ ಕ್ರೀಸ್ತಾಂವಾಂಕ್ ಪೊಲಿಸಾಂ ಥಾವ್ನ್ ಕಿತೆಂಚ್ ಆಧಾರ್ ಸಹಕಾರ್ ಮೆಳ್ಳೊನಾ.
ಹ್ಯಾಚ್ಪರಿಂ ದಸೆಂಬ್ರ್ ಚೊವೀಸ್ವೆರ್ ಬಳ್ಳಿಗುಡ ಫಿರ್ಗಜೆಕ್ ಹಾಂಚೊ ಪಂಗಡ್ ಯೇವ್ನ್ ಥಂಯ್ಚಿ ಇಗರ್ಜ್ ದೆಸ್ವಾಟಾಯ್ಲಿ, ಆಸ್ಲ್ಲೆಂ ಸರ್ವ್ ಲೂಟುನ್ ವ್ಹೆಲೆಂ, ದೊನ್ಫಾರಾಂಚ್ಯಾ ದೋನ್ ವರಾಂಚೆರ್ ಚಾರ್ಶಿಂ೦-ಪಾಂಯ್ಶಿಂ ಲೋಕ್ ಹೆಂ ಕೃತ್ಯೆಂ ಹಾತಿಂ ಧರುಂಕ್ ಆಯ್ಲೆ. ಫಿರ್ಗಜೆಚಿಂ ಹೆರ್ ಬಾಂದ್ಪಾಂಯ್ ಹ್ಯಾ ಬಜರಂಗದಳಾಚ್ಯಾ ಆತಂಕ್ವಾದಿಂನಿ ದೆಸ್ವಾಟಾಯ್ಲಿಂ. ರಾತಿಂ ಧಾ ವೊರಾಂ ಭಿತರ್ ಹಾಣಿಂ ಹಿ ಇಗರ್ಜ್, ಹೆರ್ ಬಾಂದ್ಪಾಂ, ಕೊಂವೆಂತ್, ಕಂಪ್ಯೂಟರ್ ರೂಮಾಂ, ದೋನ್ ಚಿಕಿತ್ಸಾಲಯಾಂ ಆನಿಂ ದೋನ್ ಹೊಸ್ಟೆಲಾಂ ದೆಸ್ವಾಟುನ್ ಜಾಲ್ಲಿಂ.
ಹ್ಯಾಚ್ ಲೊಕಾನ್ ಏಕ್ ಪ್ರೆಸ್ಬಟೇರಿಯನ್ ಆನಿಂ ಏಕ್ ಬ್ಯಾಪ್ತಿಸ್ತ್ ಇಗರ್ಜ್ಯ್ ಉಜ್ಯಾಕ್ ಬಲಿ ಕೆಲಿ. ಪೊಲಿಸಾಂಲಾಗಿಂ ಎಫ್.ಐ.ಆರ್. ರಿಪೋರ್ಟ್ ಕೆಲ್ಲೊ ತರೀ ಹೆ ಪಂಗಡ್ ಬಾಂದುನ್ ಯೇವ್ನ್ ಯಾಜಕಾಂಕ್, ಸಿಸ್ಟರಾಂಕ್, ಆನಿಂ ಸರ್ವ್ ಕ್ರೀಸ್ತಾಂವಾಂಕ್ ಭೆಷ್ಟಾಯ್ಲಾಗ್ಲೆ. ಕ್ರೀಸ್ತಾಂವಾಂ ಮಧೆಂ ಭಾರಿಚ್ ಭ್ಯೆಂ ಭಿರಾಂತ್ ವಿರಾಜುಂಕ್ ಸುರು ಜಾಲಿ, ತೆ ಕಂಗ್ಗಾಲ್ ಜಾವ್ನ್ ಗೆಲೆ. ಕಿತ್ಯಾ, ತಾಂಕಾಂ ತಾಂಚ್ಯಾಚ್ ಗಾಂವಾಂತ್ ವಿಚಾರ್ತಲೊ ಕೋಣ್ಂಚ್ ನಾತ್ಲ್ಲೊ.
ತ್ಯಾಚ್ ದೀಸ್ ಫುಲ್ಬಾನಿಂತ್ಲೆಂ ಏಕ್ ಕೊಂವೆಂತ್ ಹ್ಯಾ ಲುಟ್ಕಾರಾಂನಿ ಲುಟ್ಲೆಂ, ದೆಸ್ವಾಟಾಯ್ಲೆಂ, ಬಾಗ್ಲಾಂ ಜನೆಲಾಂ ತುಟೊನ್ ಘಾಲಿಂ ಅರ್ಸೆ ಫುಟಯ್ಲೆಂ ಆನಿಂ ಹಾತಾಕ್ ಮೆಳ್ಲ್ಲೆಂ ಸರ್ವ್ ಲುಟ್ಲೆಂ ಆನಿಂ ಪೊಳ್ಳೆ. ಧೊನ್ಫಾರಾ ಭಾರಾ ವೊರಾಂಚೆರ್ ಪೊಬಿಂಗಾ ಫಿರ್ಗಜೆಕ್ ಹಾಣಿಂ ದಾಡ್ ಘಾಲಿ ಆನಿಂ ಥಂಯ್ಚಿ ಇಗರ್ಜ್ ದೆಸ್ವಾಟಾಯ್ಲಿ. ಫಿರ್ಗಜ್ ಪಾದ್ರಿಚೆಂ ಘರ್ ಉಜ್ಯಾನ್ ಭಸ್ಮಿಲೆಂ.
ಹೆಂ ಸರ್ವ್ ಘಡ್ಲೆಂ ಪೊಲಿಸಾಂ ಮುಖಾರ್ಚ್. ಪೊಲಿಸ್ ಹ್ಯಾ ಕುಕೃತ್ಯಿಂಕ್ ಕಿತೆಂಚ್ ಆಡಾಂವ್ಕ್ ಸಕ್ಲೆ ನಾಂತ್. ಕಂದಮಲ್ ಜಿಲ್ಲ್ಯಾಂತ್ಲೊಯ್ ಚೊವೀಸಾಂ ಪ್ರಾಸ್ ಚಡ್ಚ್ಚ್ ಇಗರ್ಜೊ ಉಜ್ಯಾನ್ ಭಸ್ಮಾಲ್ಯೊ. ದೊಗಾಂ ಪೊಲಿಸಾಂನಿ ಫುಲ್ಬಾನಿ ಇಗರ್ಜೆಕ್ ಯೇವ್ನ್ ನತಾಲ್ ಸಂಭ್ರಮುಂಕ್ ಆಡ್ವಾರ್ಲೆಂ ಆನಿಂ ಸಂಭ್ರಮ್ ಕೆಲ್ಯಾರ್ ಚಡಿತ್ ಗೊಂದೊಳಾಕ್ ಕಾರಣ್ ಜಾತೆಲೆಂ ಮ್ಹಣ್ ಭೆಷ್ಟಾಯ್ಲೆಂ. ಹಾಂತುಂಚ್ ಕಳಿತ್ ಜಾಲೆಂ ಕೀ ಹ್ಯಾ ಪೆಂಕ್ಟಾಂತ್ ಭಳ್ ನಾತ್ಲ್ಲ್ಯಾ ಪೊಲಿಸಾಂಚೊ ಆಧಾರ್ ಹ್ಯಾ ಬಜರಂಗದಳಾಚ್ಯಾಂಕ್ ಸಂಪೂರ್ಣ್ ಆಸಾ ಮ್ಹಣ್!
ಎದೊಳ್ ವರೇಗ್ ಹಾಣಿಂ ಪಾಂಚ್ ಫಿರ್ಗಜೊ, ಚಾಳೀಸ್ ಆನಿಂ ಆಟ್ ಹಳ್ಳ್ಯಾಂತ್ಲೊಯ್ ಇಗರ್ಜೊ, ಸ ಕೊಂವೆಂತಾಂ, ತೀನ್ ಪ್ರೆಸ್ಬೆಟೇರಿಯನ್ ಇಗರ್ಜೊ, ಸ ಹೊಸ್ಟೆಲಾಂ, ತೀನ್ ಇತರ್ ಕಟ್ಟೋಣಾಂ, ಬಳ್ಳಿಗುಡಾಂತ್ಲಿ ಲ್ಹಾನ್ ಸೆಮಿನರಿ, ಬಳ್ಳಿಗುಡಾಂತ್ಲೆಂ ವೊಕೇಶನಲ್ ಟ್ರೇಯ್ನಿಂಗ್ ಸೆಂಟರ್, ಪೊಬಿಂಗಾಂತ್ಲೆಂ ಸರ್ಶ್ನಂದ ಕೊಡ್ಕಾರಾಂಚೆಂ ಘರ್ ಸಂಪೂರ್ಣ್ ದೆಸ್ವಾಟಾವ್ನ್ ಸೊಡ್ಲೆಂ.
ಬರಕ್ಕಾಮ ಫಿರ್ಗಜೆಂತ್ಲಿಂ ಚಾರ್ಶಿಂ ಕ್ರೀಸ್ತಾಂವಾಂಚಿಂ ಘರಾಂ ಉಜ್ಯಾನ್ ಭಸ್ಮಿಲಿಂ. ಪಾಂಚ್ ಜಣಾಂಚೊ ಜೀವ್ ಕಾಡ್ಲೊ, ಕಾರಾಂ, ಜೀಪಾಂ, ಮೊಟರ್ ಸೈಕಲಾಂ ಉಜ್ಯಾಕ್ ಬಲಿ ಕೆಲಿಂ, ಲೋಕಾಕ್ ಮಾರ್ನ್ ಧಾಂವ್ಡಾಯ್ಲೆಂ, ಶೊಪಾಂ ಲೂಟ್ಲಿಂ, ಕಾಪುಚಿನ್ ಪಾದ್ರ್ಯಾಬಾಂಚೆಂ ಘರ್ ಲುಟ್ಲೆಂ ಆನಿಂ ದೆಸ್ವಾಟಾಯ್ಲೆಂ.
ಹೆಂ ಸರ್ವ್ ಘಡ್ಲೆಂ ಫಕತ್ ತೀನ್ ದಿಸಾಂನಿ. ಏಕ್ಚ್ಚ್ ಪಾವ್ಟಿಂ ಸಭಾರ್ ಕಡೆನ್ ಹ್ಯಾ ಬಜರಂಗದಳಾಚ್ಯಾಂನಿ ದಾಡ್ ಘಾಲಿ ಆನಿ ತಾಂಕಾಂ ಕೋಣ್ಂಚ್ ವಿಚಾರ್ತಲೊ ನಾ ಮ್ಹಳ್ಳ್ಯಾಪರಿಂ ಸರ್ವ್ ದೆಸ್ವಾಟ್ ತಾಣಿಂ ಕೆಲಿಂ. ಹೆಂ ಕ್ರೀಸ್ತಾಂವಾಂಚೆರ್ ಭಾರಿಚ್ ನಿಗೂಢ್ ರೀತಿನ್ ಮಾಂಡುನ್ ಹಾಡ್ಲ್ಲೆಂ ಝುಜ್ ಕಸೆಂ ದಿಸ್ಲೆಂ. ಹೆರ್ ಕಿತ್ಲ್ಯೊ ಇಗರ್ಜ್ಯೊ ಹಾಣಿಂ ಭಸ್ಮಿಲ್ಯೊ ಮ್ಹಳ್ಳ್ಯಾಚೆಂ ಲೇಕ್ ಆಜೂನ್ ಸಾರ್ಕೆಂ ಮೆಳೊಂಕ್ ನಾ. ಹೆರ್ ಸಭಾರ್ ಕಡೆನ್ ಹಾಣಿಂ ಕ್ರೀಸ್ತಾಂವಾಂಚೊ ದೆಸ್ವಾಟ್ ಕೆಲಾ. ತಾಂಚೆಂ ಲೂಟುನ್ ಮಾರ್ನ್ ಧಾಂವ್ಡಾಯ್ಲಾಂ. ಕ್ರೀಸ್ತಾಂವ್ ಮಿಶ್ಯೊನರಿ ತಾಂಕಾಂ ಶಿಕಾಪ್ ದೀವ್ನ್ ಗುಲಾಮ್ಗಿರಿ ಥಾವ್ನ್ ಪಯ್ಸ್ ಧಾಂವ್ಡಾಯ್ತಾತ್ ಜಾಲ್ಲ್ಯಾನ್ ಹ್ಯಾ ದುಬ್ಳ್ಯಾ ಲೋಕಾಚಿಂ ಹಕ್ಕಾಂ ಧಿಕ್ಕಾರುನ್ ಆಸ್ಚ್ಯಾ ಹ್ಯಾ ಆತಂಕ್ವಾದಿ ಹಿಂದ್ವಾಂಕ್ ಕ್ರೀಸ್ತಾಂವಾಂಚೆರ್ ಏಕ್ ಮಾರೆಕಾರ್ ದೊಳೊ ಖಂಚ್ಲಾ.
ಒರಿಸ್ಸಾಂತ್ ಪಯ್ಲೆಂ ಥಾವ್ನ್ಂಯ್ ಹೆಣೆಂ ತೆಣೆಂ ಲ್ಹಾನ್ ಸಮುದಾಯಾಂ ವಿರೋಧ್ ಅಸಲಿಂ ಹೀನ್ ಕೃತ್ಯಾಂ ಘಡೊನ್ಂಚ್ ಆಸಾತ್ ತರೀ, ಹೆಂ ಕೃತ್ಯ್ ನಿಜಾಕ್ಯ್ ಬರೆಂಚ್ ಮಾಂಡುನ್ ಹಾಡುನ್ ಕಾರ್ಯಾರೂಪಾಕ್ ಹಾಡ್ಲ್ಲೆಂ ಮ್ಹಣ್ ಸರ್ವ್ ಮಾಂಧ್ತಾತ್. ತೆ ಇಗರ್ಜಾಂಕ್, ಕ್ರೀಸ್ತಾಂವಾಂಚ್ಯಾ ಶೊಪಾಂಕ್ ದಾಡ್ ಘಾಲುಂಕ್ ಯೆತಾನಾ ಸರ್ವಯ್ ವಸ್ತು ಹಾಡ್ನ್ ಆಯಿಲ್ಲೆ; ದಾಖ್ಲ್ಯಾಕ್ ಚಿಮ್ಣೆ ತೇಲ್, ಖೊರ್ವೊಂತ್, ತಾಲ್ವಾರಿ, ಪಿಕ್ಕಾಸಾಂ, ಬಂದೂಕೊ, ಸೊಂಟೆ, ಆಸಿಡ್, ತೆ ಹೆಣೆಂ ತೆಣೆಂ ದೆಸ್ವಾಟಾಯ್ತಾಲೆ ಆನಿ ಬಸೊನ್ ತಾಂಚೆಂ ಜೆವಾಣ್ ಜೆವ್ತಾಲೆ ಸಯ್ತ್! ಕಿತೆಂ ಹಂಕಾರ್, ಕಿತೆಂ ಚರಾಬ್ ಆನಿಂ ಕಿತ್ಲೊ ಸ್ವಾತಂತ್ರ್ ಹ್ಯಾ ಭೇಕೂಫ್ ಮನ್ಜಾತಿಸಾರ್ಕ್ಯಾ ಬಜರಂಗಿಂಕ್!
ಆರ್ಜ್ ಬಿಸ್ಪ್ ರಾಫಾಯೆಲ್ ಚೀನತಾನ್ ಸರ್ವಯ್ ಧಾರ್ಮಿಕ್ ಮುಖೆಲ್ಯಾಂಕ್ ತಾಂಚೊ ಜೀವ್ ವಾಂಚಂವ್ನ್ ರಾವೊಂಕ್ ಸಾಂಗ್ಲ್ಲೆಂ. ಇಗರ್ಜಾಂಚಿ ವ ಕಟ್ಟೋಣಾಂಚಿ ಕಿತೆಂಚ್ ಫಿಕಿರ್ ಕರಿನಾಸ್ತಾಂ ಜೀವಾಚಿ ಮಜತ್ ಘೆಂವ್ಕ್ ತಾಣೆಂ ವಿನಂತಿ ಕೆಲ್ಲಿ. ಅಸೆಂ ಜಾಲ್ಲ್ಯಾನ್ ಹ್ಯಾ ಆಕಂತ್ವಾದಿಂಕ್ ಭಾಜ್ಲ್ಲೆಂ ಮೆಳ್ಳೆಂ, ಸರ್ವಯ್ ವಸ್ತು ತಾಂಕಾಂ ಜಾಯ್ ಜಾಲ್ಲ್ಯಾಪರಿಂ ಹಾತಾಕ್ ದೆಸ್ವಾಟುಂಕ್ ಮೆಳ್ಳ್ಯೊ. ಸಾಧಾರ್ಣ್ ಪಿಂತುರಾಂನಿ ಜಾಂವ್ಚ್ಯೆಪರಿಂ ಹೊ ಲೋಕ್ ಏಕಾ ಜಾಗ್ಯಾ ಥಾವ್ನ್ ಆನ್ಯೇಕಾ ಜಾಗ್ಯಾಕ್, ಲೂಟುನ್, ಭಸ್ಮುನ್, ಸೊಭಾಯ್ ಪಳೆವ್ನ್ ವೆತಾಲೊ. ಪೊಲಿಸ್ ದೊಳೆ ಧಾಂಪುನ್ ಮ್ಹಳ್ಳ್ಯಾಪರಿಂ ಹಾಂಕಾಂ ಕಿತೆಂಚ್ ವಿರೋಧ್ ಹಾಡಿನಾತ್ಲ್ಲೆ.
ಚಡ್ತಾವ್ ಲೋಕ್ ಸಂಘ್ ಪರಿವಾರ್ ಪಂಗ್ಡಾಂತ್ಲೊ. ಹಿಂದುತ್ವಾ ವಾದ್ ಮುಖಾರ್ ಹಾಡುನ್ ಭಾರತ್ ಫಕತ್ ಹಿಂದ್ವಾಂಚೆಂ ಮ್ಹಣ್ ಪ್ರಸಾರ್ ಕರ್ಚ್ಯಾ ವರ್ಗಾಂತ್ಲೊ. ಹಾಂಕಾಂ ಒರಿಸ್ಸಾಂತ್ಲ್ಯಾ ಬಿಜೆಪಿ ಮುಖೆಲ್ಯಾಂಚೊ ಸಂಪೂರ್ಣ್ ಸಹಕಾರ್, ಆಧಾರ್ ಆನಿ ಪಾಟಿಂಬೊ ಆಸ್ಲ್ಲೊ. ಸ್ಥಳೀಯ್ ಲೋಕಾಕ್ ತಾಂಚಿ ವಳಕ್ ಕಳ್ತಾ ಮ್ಹಣ್ ತಾಣಿಂ ಹೆರಾಂಕ್ ಗಾಂವ್ಚ್ಯಾ ಲೋಕಾಕ್ ಹಾಡ್ನ್ ಹಿಂ ಹೀಣ್ ಕಾಮಾಂ ಇತ್ಯರ್ಥ್ ಕೆಲಿಂ.
ಕ್ರೀಸ್ತಾಂವ್ ಮುಖೆಲಿ ಜಿಲ್ಲಾ ಮ್ಯಾಜಿಸ್ಟ್ರೇಟ್ ಆನಿಂ ಸುಪರಿಂಟೆಂಡೆಂಟಾಕ್ ಮೆಳ್ಲ್ಲ್ಯಾ ವೆಳಾರ್ ತಾಂಚೆ ಥಾವ್ನ್ ಹ್ಯೊ ಸಂಗ್ತಿ ಉಜ್ವಾಡಾಕ್ ಆಯ್ಲ್ಯೊ:
> ಜಿಲ್ಲಾಧಿಕಾರಿಂನಿ ಹಿಂ ಕೃತ್ಯಾಂ ಆಡಾಂವ್ಕ್ ಕಿತೆಂಚ್ ಕಾರ್ಯಕ್ರಮ್ ಮಾಂಡುನ್ ಹಾಡುಂಕ್ ನಾತ್ಲ್ಲೆಂ.
> ಹ್ಯಾ ದೆಸ್ವಾಟಾಚಿ ಸರ್ವಾತ್ ದಸೆಂಬ್ರ್ ಚೊವೀಸ್ ತಾರಿಕೆರ್ ಸುರ್ವಾತಿಲ್ಲ್ಯಾ ವೆಳಾರ್ ಆರ್ಚ್ ಬಿಸ್ಪಾನ್ ಡೈರಕ್ಟರ್ ಜನರಲ್ ಆಫ್ ಪೊಲಿಸಾಕ್ ಕಳವ್ನ್ ಆಧಾರ್ ಮಾಗ್ಲ್ಲೊ ತರೀ ಸವೀಸ್ ವೊರಾಂ ಪರ್ಯಾಂತ್ ಕಿತೆಂಚ್ ಮಜತ್ ತಾಂಚ್ಯೆ ಥಾವ್ನ್ ಮೆಳ್ಳಿನಾ! ಉಪ್ರಾಂತ್ ತಾಣಿಂ ತಾಂಚೊ ಆಧಾರ್ ತ್ಯಾ ಜಾಗ್ಯಾಂಕ್ ಧಾಡ್ತಾನಾ ಸರ್ವ್ ದೆಸ್ವಾಟುನ್ ಜಾಲ್ಲೆಂ.
> ಪೊಲಿಸಾಂ ಮುಖಾರ್ಚ್ಚ್ ಹೆ ಲೊರಿಯಾಂನಿ ಜೈ ಶ್ರೀ ರಾಮ್, ಜೈ ಬಜರಂಗದಳ್ ಮ್ಹಣ್ ಬೊಬಾಟುನ್ ರಸ್ತ್ಯಾಂನಿ ವೆತಾಲೆ.
> ಪೊಲಿಸಾಂ ಮುಖಾರ್ಚ್ಚ್ ಲೂಟ್ ದೆಸ್ವಾಟ್ ಜಾತಾಲಿ ತರೀ ಏಕಾಚ್ ಏಕಾ ಬಜರಂಗದಳಿಕ್ ತಾಣಿಂ ಬಂಧ್ ಕೆಲೊ ನಾ.
> ಚಡ್ತಾವ್ ಯಾಜಕ್, ಕ್ರೀಸ್ತಾಂವ್ ರಾನಾಂನಿ ಲಿಪೊಂಕ್ ಧಾಂವ್ಲೆ ತರೀ ಥಂಯ್ಸರೀ ಹ್ಯಾ ಆತಂಕ್ವಾದಿಂನಿ ಯೇವ್ನ್ ತಾಂಕಾಂ ಮಾರುಂಕ್ ಸುರು ಕೆಲೆಂ.
ಜಿಲ್ಲಾ ಆಡಳ್ತೆಂ ಹ್ಯಾ ಜಾಗ್ಯಾಂನಿ ಶಾಂತಿ ಹಾಡ್ಚ್ಯಾಂತ್ ಸಂಪೂರ್ಣ್ ಸಲ್ವಾಲೆಂ ಮಾತ್ರ್ ನ್ಹಯ್, ಹ್ಯಾ ಆತಂಕ್ವಾದಿಂಕ್ ಸಂಪೂರ್ಣ್ ಶರಣಾಗತ್ ಜಾಲೆಂ ಕಿತೆಂಚ್ ಕ್ರಮ್ ಘೆನಾಸ್ತಾಂ. ಕಂದಮಲ್ ಜಿಲ್ಲ್ಯಾಂತ್ಲ್ಯಾ ಸರ್ವಯ್ ಕ್ರೀಸ್ತಾಂವಾಂಚಿಂ ಘರಾಂ, ಶಾಲಾಂ, ಇಗರ್ಜೊ ಹ್ಯಾ ಬಜರಂಗದಳಿಂನಿ ನಾಸ್ ಕೆಲ್ಯೊ.
ಕ್ರೀಸ್ತಾಂವ್ ಮುಖೆಲಿ ಒರಿಸ್ಸಾ ಮುಖೆಲ್ ಮಂತ್ರಿಕ್ ಮೆಳೊನ್ ಹಿಂ ಮಾಗ್ಣಿಂ ತಾಚ್ಯೆ ಮುಖಾರ್ ದವರ್ಲಿಂ:
> ಸೆಂಟ್ರಲ್ ಬ್ಯೂರೊ ಆಫ್ ಇನ್ವೆಸ್ಟಿಗೇಶನ್ ಮುಖಾರ್ ಯೇವ್ನ್ ಹ್ಯಾ ಕೃತ್ಯಾಂಚಿ ಸತ್ ಗಜಾಲ್ ಮುಖಾರ್ ಹಾಡುಂಕ್ ಜಾಯ್ ಆನಿಂ ಫಾವೊತೊ ನ್ಯಾಯ್ ದೀಂವ್ಕ್ ಜಾಯ್.
> ಸ್ಥಳೀಯ್ ಪೊಲಿಸಾಂನಿ ಆತಂಕ್ವಾದಿಂ ವಿರೋಧ್ ಕಿತೆಂಚ್ ಕ್ರಮ್ ಘೆಂವ್ಕ್ ನಾತ್ಲ್ಲ್ಯಾನ್ ಮಿಲಿಟರಿಚಿ ಕುಮಕ್ ಹ್ಯಾ ಜಾಗ್ಯಾಂಕ್ ದೀಂವ್ಕ್ ಜಾಯ್ ಆನಿಂ ಶಾಂತಿ ಪಾಟಿಂ ಹಾಡುಂಕ್ ಜಾಯ್.
> ಸರ್ವ್ ಕ್ರೀಸ್ತಾಂವ್ ಘರಾಂಕ್, ಇಗರ್ಜಾಂಕ್, ಕೊಂವೆಂತಾಂಕ್, ಆನಾಥಾಲಯಾಂಕ್, ಚಿಕಿತ್ಸಾಲಯಾಂಕ್, ತರ್ಭೆತಿ ಕೇಂದ್ರಾಂಕ್, ಹೊಸ್ಟೆಲಾಂಕ್ ಜಾಲ್ಲ್ಯಾ ನಷ್ಟಾಚೆಂ ಲೇಖ್ ಕಾಡ್ನ್ ಪುನರ್ ಬಾಂದುಂಕ್ ಸಂಪೂರ್ಣ್ ಪಯ್ಶೆ ದೀಂವ್ಕ್ ಜಾಯ್.
> ಆಪ್ಲಿಂ ಘರಾಂ ಹ್ಯಾ ದುಸ್ಮಾನಾಂಕ್ ಸೊಡ್ನ್ ಭಿಂಯಾನ್ ಧಾಂವ್ಲ್ಲ್ಯಾ ಸರ್ವ್ ಲೋಕಾಕ್ ಪಾಟಿಂ ತಾಂಚ್ಯಾ ಘರಾಂನಿ ಯೇವ್ನ್ ಶಾಂತಿ ಭದ್ರತೆನ್ ಜಿಯೆಂವ್ಕ್ ಆಧಾರ್ ಸಹಕಾರ್ ದೀಂವ್ಕ್ ಜಾಯ್.
> ಖರಿ ಗಜಾಲ್ ಸಮ್ಜೊಂಕ್ ಏಕ್ ಸಮಿತಿ ಮಾಂಡುನ್ ಹಾಡ್ನ್ ತಾಂಚ್ಯೆ ಥಾವ್ನ್ ಸರ್ವ್ ಜಾಗ್ಯಾಂಕ್ ಭೆಟ್ ದೀವ್ನ್ ತಾಂಕಾಂ ಭದ್ರತಿ ದೀಂವ್ಕ್ ಜಾಯ್.
ಬರಕ್ಕಾಮಾಂತ್ ಜನಸಂಖೊ ಪಾಂಚ್ ಹಜಾರ್ ಆನಿಂ ಹಾಂತುಂ ತೀನ್ ಹಜಾರ್ ಶೆಡ್ಯೂಲ್ಡ್ ಕಾಸ್ಟ್ -ಪಾನಾ ವರ್ಗಾಂತ್ಲೆ ಜೆ ಚಡ್ತಾವ್ ಕ್ರೀಸ್ತಾಂವ್ ಜಾವ್ನಾಸಾತ್. ಬಾರತಾಂತ್ಲ್ಯಾ ಸ್ವಾತಂತ್ರಾ ಉಪ್ರಾಂತ್ಲ್ಯಾ ಚರಿತ್ರೆಂತ್ ಕ್ರೀಸ್ತಾಂವಾಂಚೆರ್ ಆಯಿಲ್ಲೆಂ ಮಾರೆಕಾರ್ ಘಡಿತ್ ಹೆಂಚ್ ಪ್ರಥಮ್ ಮ್ಹಣ್ಯೆತ್. ಹ್ಯಾ ಆದಿಂಯ್ ಅಸಲಿಂಚ್ ಘಡಿತಾಂ ಘಡ್ಲ್ಯಾಂತ್, ದಾರಾಸಿಂಗ ತಸಲ್ಯಾ ಆತಂಕ್ವಾದಿನ್ ಆಸ್ಟ್ರೇಲಿಯನ್ ಮಿಶ್ಯೊನರಿ ಆನಿ ತಾಚ್ಯಾ ದೊಗಾಂ ಚೆರ್ಕ್ಯಾಂಕ್ ಏಕಾ ಜೀಪಾರ್ ಜಿವಂತ್ ಉಜೊ ದೀವ್ನ್ ಹುಲ್ಪಾವ್ನ್ ಮರ್ಣಾಕ್ ಬಲಿ ದಿಲ್ಲೆಂ ಆಸಾ......
ಕ್ರೀಸ್ತಾಂವಾಂ ವಿರೋಧ್ ಆಜ್ ಭಾರತಾಂತ್ ಸಭಾರ್ ಘಡಿತಾಂ ಘಡೊನ್ಂಚ್ ಆಸಾತ್. ಹಾಕಾ ಮುಖೆಲ್ ಕಾರಣ್ ಕೋಣ್? ಆಮಿಂಚ್ ಕ್ರೀಸ್ತಾಂವ್ ವ ಹೆ ಆತಂಕ್ ವಾದಿ ಬಜರಂಗದಳ್? ಹ್ಯಾಂ ಸವಾಲಾಕ್ ಜಾಪ್ ಹಾಡುಂಕ್ ತಿತ್ಲೆಂ ಕಾಂಯ್ ಸಲೀಸ್ ನ್ಹಯ್!
ಆನಿಂ ಆತಾಂ ಏಕಾ ವಾಟೆನ್ ಭಾರತಾಂತ್ ಹೆಂ ವಯ್ಲೆಂ ಘಡಿತ್ ಘಡೊನ್ ಕ್ರೀಸ್ತಾಂವಾಂಚಿ ದೆಸ್ವಾಟ್ ಜಾವ್ನ್ ಯೆತಾನಾ ಆನ್ಯೇಕಾ ವಾಟೆನ್ ಕ್ರೀಸ್ತಾಂವಾಂನಿ ಹ್ಯಾ ನತಾಲಾಂಚ್ಯಾ ಫೆಸ್ತಾ ನೀಬಾನ್ ಆಪ್ಲ್ಯಾ ಪಯ್ಶ್ಯಾಂಚಿ ದೆಸ್ವಾಟ್ ಕೆಲಿ!
> ಒರಿಸ್ಸಾಂತ್ ಇಗರ್ಜೊ ಭಸ್ಮಿಲ್ಯೊ ಆನಿಂ ಹಾಂಗಾ ಆಮಿ ದಾರು ಲಾಸುನ್ ಪಯ್ಶೆ ಭಸ್ಮಿಲೆ
> ಒರಿಸ್ಸಾಂತ್ ಇಗರ್ಜೊ ಉಜ್ಯಾಚ್ಯಾ ಕೇಂಡಾಂನಿ ದೆಸ್ವಾಟುಂಕ್ ಲಾಗ್ಲ್ಯೊ ಆನಿಂ ಹಾಂಗಾ ಸರ್ವ್ ಇಗರ್ಜೊ ವೀಜ್ ದಿವ್ಯಾಂಚ್ಯಾ ಶೃಂಗಾರಾನ್ ಉಜಾಳುಂಕ್ ಲಾಗ್ಲ್ಯೊ
> ಒರಿಸ್ಸಾಂತ್ ಕ್ರೀಸ್ತಾಂವ್ ಲೋಕ್ ಘರ್ ಸೊಡ್ನ್ ರಾನಾಂಕ್ ಧಾಂವಾಲಾಗ್ಲೆ ಆನಿಂ ಹಾಂಗಾ ಲೋಕ್ ಘರಾಂ ಸೊಡ್ನ್ ಫಾಂತ್ಯಾಚ್ಯಾ ಮೀಸಾಕ್ ಗೆಲೊ, ಉಪ್ರಾಂತ್ ಸಭಾರ್ ಬಾರಾಂನಿ ನಾಚ್ಪಾ ಸಾಲಾಂನಿ ರಸ್ತ್ಯಾ ದೇಗಾಂನಿ ಜಮೊನ್ ಜೆಜು ಕಿತ್ಯಾ ಜಲ್ಮಾಲ್ಲೊ ಮ್ಹಳ್ಳೆಂ ಚಿಂತುಂಕ್ ಪರ್ಯಾಂತ್ ಸಕಾನಾಸ್ತಾಂ ಬಿಯರ್, ಸೊರೊ ಪಿಯೆವ್ನ್ ಕಂಗ್ಗಾಲ್ ಜಾಲೊ.
> ಒರಿಸ್ಸಾಂತ್ ಯಾಜಕ್ ಭಿಂಯಾನ್ ಧಾಂವೊಂಕ್ ಲಾಗ್ತಾನಾ ಹಾಂಗಾ ಯಾಜಕ್ ಹಾಪಾಂ, ಪಾನ್ಪಾಳೆ, ಸೂಪ್, ದುಕ್ರಾ ಮಾಸ್ ಭೊಕಾಂವ್ಕ್ ಲಾಗ್ಲೆ
> ಒರಿಸ್ಸಾಂತ್ಲ್ಯಾ ಲೋಕಾಕ್ ಗರ್ಧನಾಚ್ಯಾ ಗೊಟ್ಯಾಂತ್ಲ್ಯಾ ಜೆಜುಚೊ ಖರೊ ಅನ್ಭೋಗ್ ಜಾತಾನಾ ಹಾಂಗಾ ಲೋಕಾಕ್ ಸುರ್, ಸೊರ್ಯಾ, ಜೆವ್ಣಾಂಚೊ, ಪಯ್ಶೆ ವಿಭಾಡ್ಲ್ಲ್ಯಾ ಮುಸ್ತಾಯ್ತೆಕೆಚೊ, ಶೃಂಗಾರಾಚೊ, ನಾಚ್ಪಾ ಸಾಲಾಂಚೊ, ಸಾಂತಾಕ್ಲೊಸಾಚೊ ಉಗ್ಡಾಸ್ ಆಯ್ಲೊ
ಜೆಜು ತೊ ಜೆಜುಚ್ ಸರ್ವ್ ಕ್ರೀಸ್ತಾಂವಾಂಕ್, ಪುಣ್ ತೊ ತಫಾವತ್ ಆಮಿಂ ಪಳೆಲೊ ತರ್ ರಾತಿ ಆನಿಂ ದೀಸಾ ಮಧ್ಲೊ, ಯಮ್ಕೊಂಡ್ ಆನಿಂ ಸರ್ಗಾ ತಸ್ಲೊ, ದೆಂವ್ಚಾರ್ ಆನಿಂ ಆಂಜ್ಯಾಂ ಸಾರ್ಕೊ. ಜೆಜು ಜಲ್ಮಾಲ್ಲ್ಯಾ ಗೊಟ್ಯಾಂತ್ ಆಮಿಂ ಆಜ್ ತ್ಯಾ ಪಾಪ್ ಗೊರ್ವಾಂಕ್ ಮಾತ್ರ್ ಸೊಡ್ಲಾಂ; ಆಮ್ಚೊ ಜೆಜು ಆಜ್ ಬಾರಾಂನಿ ನಾಚ್ತಾ, ಸುರ್ ಸೊರೊ ಘೊಟ್ತಾ, ಕೋಣಾ ಪಾಟ್ಲ್ಯಾನ್ ಧಾಂವ್ತಾ ಆನಿಂ ಫಕತ್ತ್ ಸಂಸಾರಿಕ್ ಸಂತೋಸಾನ್ ಆಂದೋಲನ್ ಹಾಡ್ತಾ. ಆಮಿಂ ಆಮ್ಚ್ಯಾ ಜೆಜುಕ್ ಅಸೆಂ ಕಿತ್ಯಾ ಕೆಲಾಂ? ಆಮಿಂ ಕೋಣ್ ತರೀ ಹ್ಯಾ ವಿಶ್ಯಾಂತ್ ಚಿಂತಾಂವ್? ಆಮ್ಚಿ ಚಿಂತ್ಪಾ ಸಕತ್ ಕಿತ್ಯಾಕ್ ಅಸಿ ಮಂಧ್ ಜಾಲ್ಯಾ? ಆನಿಂ ಹಾಂವ್ ಏಕ್ಲೊ ಪಿಸೊ ಅಸಲಿಂ ನಾಪಾಸ್ ಸವಾಲಾಂ ವಿಚಾರ್ನ್ ಕಿತ್ಯಾ ಹ್ಯಾ ಸಂತೊಸ್ಭರಿತ್ ಜೆಜುಕ್ ಆಂವ್ಡೆಲ್ಲ್ಯಾ ಲೋಕಾಕ್ ಪಿಸಾಂತುರ್ ಕರ್ತಾಂ?
ಸಂಸಾರಿಕ್ ಸಂಭ್ರಮ್, ಆಡಂಬರ್, ಆವ್ತಾರ್ ಆನಿಂ ವೇಸ್ ಪಾಂಗುರ್ಚೆಂ. ಆಮಿಂ ಆಮ್ಚೆಚ್ ಶೇಲೆ-ಮಂಗ್ಗಾಣೆ ಕರುನ್ ಜೆಜುಚಿ ಶಿಖವ್ನ್ ಪಕತ್ ತ್ಯಾ ಸೊಲ್ಲ್ಯಾಂನಿ ಲಿಪವ್ನ್ ದವರ್ತಾಂವ್. ಆಮ್ಕಾಂಚ್ ಕ್ರೀಸ್ತಾಂವ್ ಮ್ಹಳ್ಳ್ಯಾ ಏಕಾ ಮಹಾನ್ ನಾಂವಾನ್ ಆಪವ್ನ್ ಕ್ರೀಸ್ತಾನ್ ಚಿಂತುಂಕ್ ಪರ್ಯಾಂತ್ ನಾತ್ಲ್ಲೆಂ ಕಾರ್ಯಾರೂಪಿಂ ಕರುನ್ ತ್ಯಾ ಸೊಭಿತ್ ಸುಂದರ್ ಜೆಜು ಬಾಳ್ಕಾಕ್ ತಿ ಕಾಳಿ ತಾರಿಚಿ ಕಾಳ್ಬಾಣ್ ಪುಸ್ತಾಂವ್. ಆಮ್ಕಾಂ ಶಿಖವ್ಣ್ ಮೆಳ್ಲ್ಲಿ ಲೇಖಾವರ್ತಿ ಜಾಲ್ಯಾ, ಸೆಮಿನರಿಂತ್ಲ್ಯಾ ತ್ಯಾ ಜಾಣ್ವಾಯೆಚೆ ಆಮಿಂ ಪಿಶೆ ಜಾಲ್ಯಾಂವ್ ಆನಿಂ ಖರಿ ಶಿಖವ್ಣ್ ವಿಸ್ರೊಂಕ್ ಪಾವ್ಲ್ಯಾಂವ್. ರಾವ್ಳೆರಾಂ ಆಮ್ಚಿಂ ಘರಾಂ ಜಾಲ್ಯಾಂತ್, ಆಮ್ಚಿ ಕಾಶ್ಟಿ ಪರ್ಯಾಂತ್ ಭಾಂಗಾರಾಚ್ಯಾ ಝರಿನ್ ಝಳ್ಝಳ್ತಾ! ಕಿತೆಂ ಹೊ ಪಯ್ಶ್ಯಾಂ ವಿಭಾಡ್, ಕಿತೆಂ ಆಮ್ಚಿ ಖರಿಮಸ್ತ್, ಕಿತೆಂ ಆಮ್ಚಿ ಆಪುರ್ಬಾಯ್, ಆತುರಾಯ್, ಆಶಾ ಹ್ಯಾ ವಿಲಾಸಿ ಜೀವನಾಚಿ. ತರಿಪುಣ್ ಆಮ್ಕಾಂ ಕಿತೆಂ ಲಜ್ ದಿಸಾನಾ ಜೆಜು ತ್ಯಾ ಗರ್ಧನಾಚ್ಯಾ ಗೊಟ್ಯಾಂತ್ ತ್ಯಾ ಗೊರ್ವಾಂಚ್ಯಾ ಖಾಂವ್ಣೆರ್ ಜಲ್ಮಾಲೊ ಮ್ಹಣ್ ಒಪುನ್ ಘೆಂವ್ಕ್! ಆಮಿಂ ದೊಳೆ ಆಸೊನ್ ಕುರ್ಡೆ, ಕಾನ್ ಆಸೊನ್ ಕೆಪ್ಪೆ, ಜೀಬ್ ಆಸೊನ್ ಮೊನೆ, ಪಾಂಯ್ ಆಸೊನ್ ಥೊಂಟೆ, ಮೆಂದು ಆಸೊನ್ ಬೂದ್ ನಾಸ್ಚೆ ಆನಿಂ ಕಾಳಿಜ್ ಆಸೊನ್ ಮನ್ಜಾತಿ ಸಾರ್ಕ್ಯಾಚೆ.
ಆಮಿಂ ಜರ್ ಆಮ್ಕಾಂ ಕ್ರೀಸ್ತಾಂವ್ ಮ್ಹಣ್ ಆಪಂವ್ಕ್ ಜಾಯ್, ತರ್ ಆತಾಂಚ್ ಬದಲ್ಯಾಂ ಆಮ್ಚೆಂ ವಿಲಾಸಿ ಜೀವನ್; ಏಕಾಮೆಕಾಕ್ ವಾಂಟ್ಯಾಂ ಆಮ್ಚೆಂ ಪಾವನ್; ಆಮ್ಚೆ ಗರ್ಜೆವಂತ್ ಸೆಜಾರಿಚ್ ಜಾಂವ್ ಆಮ್ಚೆಂ ಕುಟಾಮ್; ಜಾತ್, ಕಾತ್, ಧರ್ಮ್ ಮ್ಹಳ್ಳೊ ಭೇದ್ ನಾಸ್ತಾಂ ಆಮಿಂ ಸರ್ವಯ್ ಮನ್ಶಾ ಧರ್ಮಾಚೆ, ಮನ್ಶಾ ಜಾತಿಚೆ, ಮನ್ಶಾ ಕಾತಿಚೆ ಮ್ಹಳ್ಳೆಂಚ್ ಜಾಂವ್ ಆಮ್ಚೆಂ ವೇದ್ ವಾಕ್ಯ್, ತಥಾಸ್ತು!
About us | Feedback | Contact us
Copyright ©
2005 DAAIZ.COM All rights reserved.
Page concept, designed, hosted and maintained by Ashawadi Publications
