ಸಾದೊ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಏಕ್ ಸಾದೊ ಮನಿಸ್ ಆನಿ ತಾಚೆಂ ವ್ಹಡ್‌ಪಣ್

ಆಸ್ಟಿನ್ ಪ್ರಭು

'The greatest truth is simple' ಮ್ಹಳ್ಳ್ಯಾ ಎಕಾ ಇಂಗ್ಲಿಶ್ ಸಾಂಗ್ಣೆಪರಿಂ, ಸಂಸಾರಾಂತ್ ವ್ಹಡ್ ಮ್ಹಳ್ಳೆಪರಿಂ ದಿಸ್ಚ್ಯೊ ಸಂಗ್ತಿ ಸಾದ್ಯೊ - ಕಿತ್ಯಾಕ್, ಸಾದೆಂಪಣ್, ಲ್ಹಾನ್ವಿಕಾಯ್ ಆನಿ ಖಾಲ್ತೆಂಪಣ್ ಮನ್ಶಾಕುಳಾಕ್ ಭೋವ್ ಕಶ್ಟಾಂಚೆಂ. ಚರಿತ್ರೆಚಿಂ ಪಾನಾಂ ಉಸ್ತಿಲಿಂ ತರ್‌ಯೀ ಆಮ್ಕಾಂ ವಾಚುಂಕ್ ಮೆಳ್ಚೆಂ ಹೆಂಚ್ ಸತ್, ಜಾಂವ್ ತೊ ಮಹಾತ್ಮ ಗಾಂಧಿ, ಜಾಂವ್ ಮದರ್ ತೆರೆಜಾ ವಾ ಹೆರ್ ಪ್ರವಾದಿ; ಸರ್ವ್ ಖಾಲ್ತೆಚ್.

ಸಂಸಾರಾಂತ್ ಹರ್ಯೆಕ್ಲ್ಯಾಚ್ಂ ಚಿಂತಾಪ್ ವೆವೆಗ್ಳೆಂ, ಎಕಾಮೆಕಾ ತಾಳ್ ಪಡಾಜಯ್ ಮ್ಹಣೊನ್ ನಾ. ಪುಣ್ ಹ್ಯಾ ಸರ್ವ್ ಥರಾಚ್ಯಾ ಚಿಂತ್ಪಾಚ್ಯಾ ಮನ್ಶಾಂಚೆ ವರ್ಗ್ ಕರ್ಚೆ ತರ್ ಏಕ್ ವರ್ಗಾಚೆ ಮನಿಸ್ ಹೆ; ಹೆರಾಂಕ್ ಆಪ್ಲ್ಯಾ ಜಿಣ್ಯೆಖಾತಿರ್ ಗಳ್ಸಿತೆಲೆ, ಆನಿ ದುಸ್ರೆ ವರ್ಗಾಚೆ ಮನಿಸ್ ಹೆ; ಅಪ್ಣಾಕ್ ಹೆರಾಂಚ್ಯಾ ಜಿಣ್ಯೆಖಾತಿರ್ ಗಳ್ಸಿತೆಲೆ. ಹಾಂವೆಂ ವ್ಹಳ್ಕಾಲ್ಲೊ ಹೊ ಮಾನ್‌ವೆಕ್ತಿ ಖಂಚ್ಯಾ ವರ್ಗಾಚೊ ಮ್ಹಳ್ಳೆಂ ಅಖ್ಖೊ ಕೊಂಕ್ಣಿ ಲೋಕ್ ಜಾಣಾಸ್ತಾಂ ಹಾಂಗಾಸರ್ ಪರತ್ ಮ್ಹಜಿ ವಾಖಣ್ಣಿ ಗರ್ಜ್ ನಾ.

ಪುಣ್ ಕಿತ್ಯಾಕ್‌ಗಿ ಕೊಂಕ್ಣಿ ವರ್ತುಲಾಂತ್ ಹ್ಯಾ ಸಬ್ಧಾಕ್ ಮತ್ಲಬ್ ನಾ, ಮಹತ್ವ್ ನಾ, ಆಸ್ಲ್ಯಾರೀ ಕಾಂಯ್ ಅವಾಜ್ ನಾತ್‌ಲೆಲ್ಯಾ ಸಭ್ದಾಂನಿ, ಅರ್ಥ್ ನಾತ್ಲೆಲ್ಯಾ ಮೌನಾಂತ್ ಲಿಪ್ಲಾ. ಕೊಣ್ ಜಾಣಾ ಜೆದ್ನಾಂ ಮೌನ್ ಉತಾರ್ ಜಾವ್ನ್ ಬದಲ್ಲೆಂ ತರ್ ಆಪ್ಲೆಂ ಖಾಸ್ಗಿ ಕಾಂಯ್ ಲುಕ್ಸಾಣ್ ಜಾಯ್ತ್ ಮ್ಹಳ್ಳಿ ಭಿರಾಂತ್‌ಕಿ ವಾ ಅಪ್ಣಾಚೆಂ ಕಾಂಯ್ ಲುಕ್ಸಾಣ್ ಜಾಯ್ತ್‌ಕಾಯ್ ಮ್ಹಳ್ಳಿ ಕಾವ್ಜೆಣಿಕೀ, ವ ಮ್ಹಾಕಾ ಕಿತೆಂ ಫಾಯ್ದೊ ಮ್ಹಳ್ಳೆಂ ವ್ಹೆವಾರಿಕ್ ಚಿಂತಾಪ್? ಮ್ಹಜ್ಯಾ ಮತಿತ್ ಸಮ್ಜಾನಾತ್‌ಲ್ಲ್ಯಾ ಜಾಯ್ತ್ಯಾ ಸಂತ್ತಿಂ ಪಯ್ಕಿಂತ್ ಹಿಯೀ ಏಕ್. ಆಮ್ಚೆ ಮಧೆಂ, ಆಮ್ಚೆ ಪಯ್ಕಿಂತ್ ವ್ಹಡ್ ಮನಿಸ್ ನಾಂತ್? ಕೆದಿಂಚ್ ಅಪ್ಲ್ಯಾ ವ್ಹಡ್‌ಪಣಾಚಿ ಬಡಾಯ್ ಉಲಯ್ನಾಸ್ತಾಂ, ಕೊಣೆಂ ಕಿತೆಂ ಸಾಂಗ್ಲ್ಯಾರಿ, ಕೊಣೆ ಕಿತೆಂ ಕೆಲ್ಯಾರೀ, ವಿಕ್ರಮಾಧಿತ್ಯಚ್ಯಾ ಹಠಾನ್ ಅಪ್ಲೊ ಸಾಮಾಜಿಕ್ ವಾವ್ರ್ ಮುಖಾರುನ್, ಸರ್ವಾಂಕ್ ದಿತೆಚ್ಚ್ ವೆಚೆ ಭೋವ್ ಅಪ್ರೂಪ್ ತರ್‌ಯೀ ಕೊಂಕ್ಣೆಂತ್ ನಾಂತ್?

ಹೊಯ್ ತಸಲೊಚ್ಚ್, ವ್ಹಡ್ಲೊ ಮನಿಸ್. ಅಶೆಂ ಮ್ಹಣೊನ್ ಹೊ ಕೆದ್ನಾಂಯ್ ಲ್ಹಾನ್ ನಾತ್‌ಲ್ಲೊ? ಜಾವ್ಯೆತಾ ಹಾಂವ್ ಹಾಚೆಸಮೊರ್ ನೆಣ್ತೊ ಭುರ್ಗೊಚ್. ತರ್‌ಯೀ, ಹಾಚೆಥಾವ್ನ್ ಪ್ರೇರಣ್ ಜೊಡ್ಲೆಲ್ಯಾಂ ಥಾವ್ನ್ ಆಯ್ಕಾಲ್ಲೆಪ್ರಕಾರ್, ಕೊಂಕ್ಣೆಂತ್ ಹಾಚೆತಸಲೊ ದುಸ್ರೊ ಕೊಣ್‌ಚ್ ಎದೊಳ್ ಮ್ಹಜ್ಯಾ ನದ್ರೆಕ್ ಪಡೊಂಕ್ ನಾ. ಜೆದ್ನಾಂ ಮಾಂಯ್‌ಗಾಂವ್ ಸಾಂಡುನ್ ಹಜಾರೊಂ ಮಯ್ಲಾಂ ಪಯ್ಸ್ ವೆತೆಲ್ಯಾಂಚ್ಯಾ ಕಾಳ್ಜಾ ಮನಾಂತ್ ಆಸ್ತಾ ಏಕ್ ಹುಸ್ಕೊ; ಆಪ್ಲೆಂ ಕಾಮ್, ಆಪ್ಲೆಂ ಕುಟಾಮ್, ಆಪ್ಲೆಂ ಬ್ಯಾಂಕ್ ಬ್ಯಾಲೆನ್ಸ್, ಆಪ್ಲೆ ಈಶ್ಟ್ ಮಂತ್ರ್, ಆಪ್ಲಿಂ ಸಯ್ರಿಂ, ಆಪ್ಲೆಂ ಅಂತಸ್ತ್, ಅಪ್ಲಿ ಪ್ರತಿಷ್ಟಾ. ಅಶೆಂ ಆಸ್ತಾಂ ಅಪ್ಲ್ಯಾ ಸೆಜ್-ಸಾಂಬಾರಾ ಸಯ್ತ್ ಜಾಲ್ಲ್ಯಾ ಅಸ್ಕತ್ ದಾಂತ್ ಖಿರ್ಲೊಣೆಚ್ಯಾ ಗಾಜೆಕ್ ಆಯ್ಕತೆಲೆಂ ಕಾಳಿಜ್ ಕೊಣಾಲಾಗಿಂ ಆಸಾ? ಅಪ್ಲ್ಯಾ ಸೆಜ್-ಸಂಬಾರಾಚಿ ಹಾಲ್ ಆಯ್ಕಾನಾತ್‌ಲ್ಲ್ಯಾ ಲೊಕಾಂ ಸಮೊರ್, ಹಜಾರೊಂ ಮೈಲಾಂ ಪಯ್ಸ್ ಆಸೊನ್‌ಯೀ ಆಪ್ಲ್ಯಾ ದಿಸಾಚ್ಯಾ ಚವೀಸ್ ವೊರಾಂ ಪಯ್ಕಿಂತ್ ಚಡ್ತಾವ್ ವೊರಾಂ ಹೆರಾಂಚ್ಯಾ ಬರ್‍ಯಾಪಣಾಚೆಂ ಚಿಂತಾಪ್ ಚಿಂತೆಲೆ ಕಿತ್ಲೆ ಆಸಾತ್? ಸಾಂಗಾ ಮಾಕಾ ಕಿತ್ಲೆ ಆಸಾತ್?

ಹಜಾರೊಂ ಮಯ್ಲಾ ಪಯ್ಸ್ ಆಸೊನ್‌ಯೀ, ಸಂಸಾರಾಚ್ಯಾ ಖಂಚ್ಯಾಯ್ ಮುಲ್ಯಾಂತ್ ಜೆದ್ನಾಂ ಕೊಣ್ ಎಕ್ಲೊ ಕೊಂಕ್ಣಿ ಮನಿಸ್ ಹಾಸ್ತಾ, ತಾಚ್ಯೊ ಹಾಸೊ ಚಡಂವ್ಚೊ, ಸಂಸಾರಾಚ್ಯಾ ಖಂಚ್ಯಾಯ್ ಮುಲ್ಯಾಂತ್ ಜೆದ್ನಾಂ ಏಕ್ ಕೊಂಕ್ಣಿ ಮನಿಸ್ ವಿಳಾಪ್ ಕರ್ತಾ, ತಾಚ್ಯಾ ದುಖಾಂತ್ ಭಾಗಿ ಜಾಂವ್ಚೆಂ ವಿಶಾಲ್ ಕಾಳಿಜ್ ಆಸ್ಚೊ ವೆಕ್ತಿ ಖರೊಚ್ ಜಾವ್ನ್ ವ್ಹಡ್ ನಾಸ್ತಾಂ ಆನಿ ಕಿತೆಂ?

ಭುರ್ಗ್ಯಾಪಣಾರ್ ಕಶ್ಟ್ ಆನಿ ದೂಕ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಭೋವ್ ಬರ್‍ಯಾ ರಿತಿನ್ ಸಮ್ಜೊನ್, ಹ್ಯಾ ಕಶ್ಟಾಂ ಮಧೆಂ ವ್ಹಾವಂವ್ಕ್ ಝಡಾಯೆಚಿ ಜವಾಭ್ದಾರಿ, ಭೋವ್ ಅಪುರ್ಭಾಯೆನ್ ಸಾಂಭಾಳುನ್, ದೆವಾನ್ ಅಪ್ಣಾಕ್ ದಿಲ್ಲಿಂ ತಾಲೆಂತಾಂ ಆಪ್ಲ್ಯಾ ಸಾಮಾರ್ತೆಂತ್ ವಾಪ್ರುನ್, ಯುವ ವಾವ್ರ್ ಜಾಂವ್, ಸಮಾಜೆಚೊ ವಾವ್ರ್ ಜಾಂವ್, ಕುಟ್ಮಾಚೊ ಹಾರ್‌ಭಾರ್ ಜಾಂವ್ ಸರ್ವ್ ಎಕಾಚ್ಚ್ ರಿತಿನ್, ಮೊಗಾನ್ ಆನಿ ಗೌರವಾನ್ ಸಾಂಭಾಳುನ್ ವೆಚೆಂ ತಿತ್ಲೆಂ ಸಲೀಸ್ ನ್ಹಯ್. ಅತಾಂ ಸಂಪರ್ಕ್ ಮಾಧ್ಯಮಾಂ ಆಸಾತ್, ಪ್ರಗತಿಪರ್ ಸಂಸಾರ್ ಹೊ. ಪುಣ್ ಅಜೀಕ್ ಕಾಂಯ್ ತೀಸ್-ಚಾಳಿಸ್ ವರ್ಸಾಧಿಂ ಹಿ ಪರಿಗತ್ ನಾತ್ಲಿ. ತರ್‌ಯೀ, ಆಪ್ಲ್ಯಾ ತರ್ನಾಟೆ ಪ್ರಾಯೆರ್ ಕೊಂಕ್ಣಿ ಲೊಕಾಂಚ್ಯಾ ಸೆವೆ ಮಧೆಂ ಕೊಂಕ್ಣೀ ಪತ್ರಿಕೋಧ್ಯಮಾಚೊ ಭರೊ, ಕೊಣಾಚೊಕೀ ಕೊಣಾಚೆರ್‌ಕೀ ಆಸ್ಚೊ ರಾಗ್ ತಾಚ್ಯಾ ಪತ್ರಾಧ್ವಾರಿಂ ಕೊಣೆಂಕೀ ಕಾಡ್ಲೆಲ್ಯಾಕ್ ಹಾಣೆಂ ಭಗ್ಲೆಲ್ಯಾ ಕಶ್ಟ್ ಆನಿ ಲುಕ್ಸಾಣೆಚಿ ಭಿರಾಂಕುಳ್ ಕಾಣಿ ಆಯ್ಕತಾನಾ ಆತಾಂ ಸಯ್ತ್ ರಾಗಾನ್ ದಾಂತ್ ಅಪ್ಶೆಂಚ್ ಘಶ್ಟಾತಾತ್. ತರ್‌ಯೀ ಹೆಂ ಸರ್ವ್ ಅವ್ಮಾನ್, ಲುಕ್ಸಾಣ್, ದೂಕ್, ಖಿರವ್ನ್, ಜಿರವ್ನ್, ಸೊಸುನ್ ಮಾತ್ರ್ ನ್ಹಯ್‌ಗಿ ಎಕ್ಲ್ಯಾನ್ ವ್ಹಡ್ ಜಾಂವ್ಚೆಂ? ಇತ್ಲೆಂ ಸರ್ವ್ ಭಗುನ್ ಅಖ್ರೇಕ್ ಕರಿನಾತ್‌ಲ್ಲ್ಯಾ ಚುಕಿಚಿ ಮಾಫಿ ಮಾಗೊನ್ ಪಯ್ಸ್, ಭೋವ್ ಪಯ್ಸ್ ವಚೊನ್ ಆಪ್ಲ್ಯಾ ಕುಟ್ಮಾಕ್ ವಯ್ರ್ ಹಾಡ್ಚೆಂ ಮಿಸಾಂವ್ ಕಾಂಯ್ ಸಂಪೆಂ ನ್ಹಯ್.

ದೆಕುನ್ ಜಾವ್ಯೆತ್ ಅಸಲೆ ಮನಿಸ್ ಅಮ್ಕಾಂ ಮೆಟಾಂ ಮೆಟಾಂಕ್ ಮೆಳ್‌ಲ್ಲೆ ತರ್ ಆಮಿ ’ವ್ಹಡ್‌ಪಣ್’ ಮ್ಹಳ್ಯಾರ್ ಕಿತೆಂ ಮ್ಹಣ್ ಸಮ್ಜೊಂಕ್ ಕೆದಿಂಚ್ ಸಕ್ತೆನಾಂವ್ ಕೊಣ್ಣಾ.

ಇತ್ಲೆಂ ಪಯ್ಸ್ ಪಾವ್ಲೊ ತರ್‌ಯೀ, ಅಜೂನ್ ತಾಚೆಂ ಕಾಳಿಜ್ ಕೊಂಕ್ಣಿ ಲೊಕಾಂ ಮಧೆಂ ಆಸಾ, ಕಶ್ಟ್, ಭುಕ್, ಎಕ್ಸುರ್‌ಪಣ್, ಅವ್ಮಾನ್ ಹೆಂ ಸರ್ವ್ ಭೋವ್ ಲಾಗ್ಸಿಲ್ಯಾನ್ ಪಳೆವ್ನ್, ಭಗುನ್ ಹೆಳ್‌ಲ್ಲ್ಯಾ ಹಾಕಾ ಹೆರಾಂಚೆ ಕಶ್ಟ್ ಆನಿ ದೂಕ್ ಪಾರ್ಕುಂಚಿ ಆನಿ ಸಮ್ಜೊಂಚಿ ಶ್ಯಾಥಿ ನಾಸ್ತಾಂ ಆನಿ ಕೊಣಾಕ್ ಆಸೊಂಕ್ ಸಾಧ್ಯ್?

ಜಿಣ್ಯೆಂತ್ ಕೆದಿಂಚ್ ಮುಖಾಮುಖಿ ಜಾವ್ನಾತ್‌ಲ್ಲ್ಯಾ ಹಾಚಿ ವ್ಹಳೊಕ್ ಮ್ಹಾಕಾ ಜಾಲ್ಲಿ ಇಮೇಯ್ಲಾಂ ಮುಖಾಂತ್ರ್. ಹಾಚೆ ಥಾವ್ನ್ ಜಾಯ್ತೆಂ ಶಿಕ್ಲೊಂ ಆನಿ ಖರೆಂಚ್ ಮ್ಹಾಕಾ ಭಗ್ಲೆಂ - ಹೊ ಏಕ್ ವೆಕ್ತಿ ನ್ಹಯ್, ಏಕ್ ಸಂಸ್ಥೊ. ಖರೊಚ್ ಜಾವ್ನ್ ಏಕ್ ಸಂಸ್ಥೊ. ಹೆರಾಂವಿಶಿಂ ಬರೆಂ ಚಿಂತೆಲಿಂ ಹ್ಯಾ ಸಂಸಾರಾಂತ್, ಪ್ರತ್ಯೇಕ್ ಜಾವ್ನ್ ಕೊಂಕ್ಣೆಂತ್ ಖುದ್ದ್ ಏಕ್ ತಮಾಸೊ ಜಾತಾತ್. ದೆಕುನ್ ಸಂಸಾರಾಂತ್ ಥೊಡಿಂ ಹಾಂಚೆರ್ ಹಾಸ್ತಾತ್ ತರ್‌ಯೀ, ಸೊಸುಂಕ್ ಆಸಾ. ಕಿತ್ಯಾಕ್ ಹಾಸೊಂಕ್ ಸಲೀಸ್, ಸೊಸುಂಕ್ ಸಲೀಸ್ ನ್ಹಯ್.

ಲಯನ್ಸ್ ಕ್ಲಬ್ಬಾಂತ್ ಹಾಣೆಂ ದಿಲ್ಲ್ಯಾ ವಾವ್ರಾಕ್ ಎಕಾ ಪಾಟ್ಲ್ಯಾನ್ ಏಕ್ ಪ್ರಶಸ್ಥ್ಯೊ ಲಾಭ್ಲ್ಯಾತ್, ತಶೆಂಚ್ ಲಾಭೊನ್ ಆಸಾತ್, ತ್ಯೊ ಎಕ್‌ಯೀ ಹಾಣೆಂ ಕೆಲ್ಲ್ಯಾ ನಿಸ್ವಾರ್ಥಿ ವಾವ್ರಾಚೊ ಪ್ರತಿಫಳ್. ಇತ್ಲೆ ಸರ್ವ್ ಪ್ರಶಸ್ಥ್ಯೊ ಲಾಭ್ಲ್ಯಾರೀ, ಕೊಂಕ್ಣಿ ವರ್ತುಲಾಂತ್ ಭೋವ್ ಅಪ್ರೂಪ್ ವೆಕ್ತಿತ್ವ್ ಹಾಚೆಂ. ಹಾಚೆಥಾವ್ನ್ ಪ್ರೇರಣ್ ಜೊಡ್ಲೆಲ್ಯಾ ಹೆರ್ ಮುಖೆಲ್ಯಾಂಕ್ ಹಾಂವ್ ವೆಕ್ತಿಗತ್ ಜಾವ್ನ್ ಜಾಣಾಂ, ತಾಂಕಾಂಯ್ ಹಾಂವ್ ಮಾನ್ ದಿತಾಂ. ಪುಣ್ ಕೊಂಕ್ಣಿ ಲೊಕಾಂಕ್, ಕೊಂಕ್ಣಿ ಮನ್ಶ್ಯಾಂಕ್ ಇತ್ಲೊ ಮೋಗ್ ದಿಲ್ಲ್ಯಾ ಹ್ಯಾ ಮಾನೆಸ್ತಾಕ್ ಕೊಂಕ್ಣೆನ್ ಕಾಂಯ್ ದಿಲಾಂ ತರ್ ಭೋವ್ ಚಿಲ್ಲರ್. ಚಾ.ಫ್ರಾ.ದೆ’ಕೋಸ್ತಾಕ್ ಜೀವ್ ಆಸ್ತಾನಾ ಮೆಳಾನಾತ್‌ಲ್ಲೊ ಮಾನ್, ತಾಕಾ ಮೆಲ್ಲ್ಯಾ ಉಪ್ರಾಂತ್ ಮೆಳ್ಳೊ. ಕಿತೆಂ ಫಾಯ್ದೊ? ಜೀವ್ ಆಸ್ತಾನಾ ತಾಕಾ ಜರ್ ಮಾನ್ ಮೆಳ್ಳಾ ತರ್ ತೊ ಗೊಯಾಂ ಥಾವ್ನ್ ಮಾತ್ರ್. ಪುಣ್ ಹಾಕಾ ಅಶೆಂ ಜಾಯ್ನಾ ಜಾಂವ್. ದೆವಾಲಾಗಿಂ ಹೆಂಚ್ ಮ್ಹಜೆಂ ಮಾಗ್ಣೆಂ ಜಾವ್ನಾಸಾ.

- ಸಂ.

ಆಸ್ಟಿನ್ ಪ್ರಭುಸವೆಂ ಏಕ್ ಸಂವಾದ್

ದಾಯ್ಜ್ ವರ್ಸಾಚೊ ಕವಿ 2007

ದಾಯ್ಜ್ ವರ್ಸಾಚೊ ಕಾಣ್ಯೆಗಾರ್ 2008

ದಾಯ್ಜ್ ವರ್ಸಾಚೊ ಕವಿ 2008

ದಾಯ್ಜ್ ವರ್ಸಾಚೊ ಕವಿ 2006

ದಾಯ್ಜ್ ವರ್ಸಾಚೊ ಕಾಣ್ಯೆಗಾರ್ 2007

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed, hosted and maintained by Ashawadi Publications