ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 59. ದೇವ್ ಮ್ಹಳ್ಯಾರ್ ಕಿತೆಂ?
ವಿಲ್ಮಾ ಎಲ್ ರೇಗೊ: ಕೊಂಕ್ಣಿ ಸಾಹಿತ್ಯಾಂತ್ ಭೋವ್ ಥೊಡ್ಯಾಂಕ್ ಸಾಹಿತಿಕ್ ಪ್ರತಿಭಾ ಆಪ್ಲ್ಯಾ ಆವಯ್-ಬಾಪಾಯ್ ಥಾವ್ನ್ ದೆಂವೊನ್ ಆಯ್ಲ್ಯಾ. ಕೊಂಕ್ಣಿ ಸ್ತ್ರೀ ಲೇಖಿಕಾಂ ಪಯ್ಕಿಂತ್ ಬಾಯ್ ಗ್ಲ್ಯಾಡಿಸ್ ರೇಗೊ ತಿತ್ಲಿ ಪ್ರತಿಭಾ ಆಸೊನ್ಯೀ, ಜಿತ್ಲ್ಯಾ ಮಟ್ಟಾನ್ ಅಪೇಕ್ಶಾ ಕೆಲ್ಲಿ ತಿತ್ಲ್ಯಾ ಮಟ್ಟಾಚೆಂ ಸಾಹಿತ್ಯ್ ರಚುಂಕ್ ಸಕ್ಲಿನಾ ತರ್ಯೀ ಅಪ್ರೂಪಾಯೆನ್ ಕಾಣ್ಯೊ, ಕವಿತಾಂ ಬರಂವ್ಚಿ ಬಾಯ್ ವಿಲ್ಮಾ ರೇಗೊನ್ ಅಪ್ಲಿ ಸಾಹಿತಿಕ್ ಸುರ್ವಾತ್ ಕೆಲ್ಲಿ ’ಕಲಾರಾಣಿ’ ಲಿಖ್ಣೆನಾಂವಾರ್, ಅಜೀಕ್ ಚಡುಣೆಂ ವೀಸ್ ವರ್ಸಾಂ ಆದಿಂ.
ವಿಲ್ಮಾ ಎಲ್ ರೇಗೊ
ನಾಗುಚ್ಯಾ ಘರಾ ಕಾಮ್ ಕರ್ಚ್ಯಾ ಚುನ್ನಿಚೊ ಘೊವ್ ಚೆನ್ನ ತೀನ್ ವರ್ಸಾಂ ಆದಿಂ ಘಾಟಾರ್ ಧಾಂವ್ಲ್ಲೊ. ಕಾಲ್ಚೆ ರಾತಿಂ ಯೇವ್ನ್ ಚುನ್ನಿಕ್ ಆಪುಣ್ ಘಟಾಕ್ ಆಪವ್ನ್ ವ್ಹರ್ತಾಂ. ಥಂಯ್ಚರ್ ಆಪ್ಣೆಂ ಏಕ್ ಲ್ಹಾನ್ಶೆಂ ಬಿಡಾರ್ ಕೆಲಾಂ ಮ್ಹನ್ ಸಾಂಗೊನ್ ಗೆಲಾ ಮ್ಹಳ್ಳಿ ಖಬಾರ್ ನಾಗುಚ್ಯಾ ಪಪ್ಪಾನ್ ರಾತ್ಚ್ಯಾ ಜೆವ್ಣಾರ್ ಘರ್ಚ್ಯಾ ಸರ್ವಾಂಕ್ ಆಯ್ಕೊಂಚಾ ಪರಿಂ ಸಾಂಗ್ಲೆಂ....
ಜಲ್ಮಾ ಥಾವ್ನ್ಚ್ ಸಂಸಾರಾಚೊ ಉಜ್ವಾಡ್ ದೆಖೊಂಕ್ ಸಕೊಂಕ್ ನಾತ್ಲ್ಲ್ಯಾ ಕುರ್ಡ್ಯಾ ನಾಗುಕ್ ಚುನ್ನಿ ಫಕತ್ತ್ ಘರ್ ಕಾಮಾಚೆಂ ನ್ಹಂಯ್. ಭೋವ್ ಮೊಗಾಚೆಂ ಲಾಗ್ಶಿಲೆಂ, ಆಪ್ಲೊ ಆಧಾರ್ ಜಾವ್ನಾಸ್ಲ್ಲೆಂ ಚುನ್ನಿ ಬಾಯ್.
ನಾಗು ಆಪ್ಲ್ಯಾ ಆವಯ್ ಬಾಪಾಯ್ಕ್ ಎಕ್ಚ್ ಪೂತ್. ಜಲ್ಮಾ ಥಾವ್ನ್ ತೊ ಕುರ್ಡೊ. ಹ್ಯಾ ಕುರ್ಡ್ಯಾ ಭುರ್ಗ್ಯಾಕ್ ಸಾಂಗಾತ್ ದೀವ್ನ್ ಚಾಕ್ರಿ ಕರ್ಚ್ಯಾಕ್, ಆಟ್ ವರ್ಸಾಂಚ್ಯಾ ಚುನ್ನಿಕ್ ಆವಯ್ನ್ ಹಾಂಗಾಚರ್ ಕಾಮಾಕ್ ರಾವಯಿಲ್ಲೆಂ.
ಚುನ್ನಿಚಿ ವಿಧವ್ ಆವಯ್, ಸಾದಾಂ ಪಿಡೆಸ್ತ್. ಕೆದಾಳಾ ತಿಚೆ ಉಸ್ಮೊಡಿಚಿ ಪಿಡಾ ಚಡ್ತಾಲಿ. ಉಚಾಂಭಳ್ ಜಾತಾಲಿ. ಕೆದಾಳಾ ಇಲ್ಲಿಶಿ ದೆಂವ್ತಾಲಿ. ಪಿಡೆಸ್ತ್ ಆವಯ್ ಸಾಂಗಾತಾ ಹ್ಯಾ ನೆಣ್ತ್ಯಾ ಚಲಿಯೆನ್ ಪೊಟಾಕ್ ನಾಸ್ತಾನಾ ಆನಿ ಪಿಡಾ ಬದ್ಲುನ್ ವಳ್ವೊಳ್ಚೆಂ ನಾಕಾ ಮ್ಹಳ್ಳ್ಯಾ ಆವಯ್ ಮೊಗಾನ್ ತಿಣೆ, ಆಪ್ಣಾಕ್ಚ್ ಎಕ್ಸುರ್ಪಣಾಚ್ಯಾ ಸಾರಿಯೆರ್ ಧಾಳುನ್ ಚುನ್ನಿಕ್ ಕಾಮಾಕ್ ರಾವಯಿಲ್ಲೆಂ.
ವಿಚಿತ್ರ್ ದೆವಾಚಿಂ ಮಹಿಮಾ. ಚುನ್ನಿ ನಾಗುಗೆರ್ ಕಾಮ್ ಕರ್ತಾಸ್ತಾನಾಚ್ ಕಸಲಿಚ್ ಖಬಾರ್ ದೀನಾಸ್ತಾನಾ ತಿಣೆ ಪೆಲ್ಯಾ ಸಂಸಾರಾಚಿ ವಾಟ್ ದರ್ಲ್ಲಿ. ಚುನ್ನಿ ಆನಾಥ್ ಜಾಲ್ಲೆಂ. ನಾಗುಗೆಲೆಂ ಘರ್ಚ್ ತಾಚೆಂ ಬಿಡಾರ್ ಜಾಲೆಂ. ತಿಚೆಂ ಸರ್ವಸ್ವ್ ಜಾಲೆಂ.
ನಾಗುಚ್ಯಾ ಘರ್ಚಿ ಪರಿಸ್ಥಿತಿ ಬದಲ್ಲಿ. ಪಾವ್ಸಿಲ್ಯಾ ದಿಸಾಂನಿ ಭರ್ಲ್ಲೆ ಬಾಂಯ್ತ್ ಪಾಂಯ್ ನಿಸ್ರೊನ್ ಪಡೊನ್ ನಾಅದುಚಿ ಆವಯ್ ಮೊರ್ತಾನಾ, ಚುನ್ನಿಂಚ್ ನಗುಚಿ ಆವಯ್ ಜಾಲಿ. ನಾಗುಚೊ ಬಾಪಯ್ ಥೊಡ್ಯಾಚ್ ಆವ್ದೆ ಭಿತರ್ ದುಸ್ರ್ಯಾಪಣಾಕ್ ಕಾಜಾರ್ ಜಾತಾನಾ ಘೊವಾಚ್ಯಾ ಕುರ್ಡ್ಯಾ ಪುತಾಕ್ ದೆಖ್ಲ್ಯಾರ್ ತಾಕಾ ಜಾಯ್ನಾತ್ಲ್ಲೆಂ ಮಾವ್ಶೆಕ್. ಚುನ್ನಿ ನಾಗುಕ್ ಸರ್ವ್ ವಾಂಟ್ಯಾನಿ ಸುದಾರ್ಸಿತಾಲೆಂ. ತಾಚಿ ಸೆವಾ ಚುನ್ನಿ ಆಪ್ಲ್ಯಾಚ್ ಖಾಸ್ ಬಾವಾಪರಿಂ ಕರ್ತಾಲೆಂ.
ಪ್ರಾಯ್ ರಾವ್ತಾವೇ. ದೀಸ್ ಧಾಂವ್ತಾಸ್ತಾನಾ, ವರ್ಸಾಂ ಉಭೊನ್ ವೆತಾಲಿಂ. ಚುನ್ನಿ ತರ್ನಾಟ್ಪಣಾಚ್ಯಾ ಪಾಂವ್ಡ್ಯಾಕ್ ತೆಂಕ್ತಾಲೆಂ. ನಾಗು ಪ್ರಾಯೆನ್ ವಾಡ್ತಾಲೊ. ದಿಶ್ಟಿನ್ ನ್ಹಯ್, ಕುರ್ಡೊ ತೊ ಕಿರ್ಡೊಚ್. ಚುನ್ನಿಚ್ ತಾಚಿ ದೀಶ್ಟ್, ತಾಚೆ ದೊಳೆ ತಾಚಿ ದಾಕ್ಟುಲಿ ಆವಯ್.
ಚೆನ್ನ, ತ್ಯಾಚ್ ಗಾಂವ್ಚೊ ಚೆಡೊ. ಚುನ್ನಿಚ್ಯಾಚ್ ಜಾತಿಚೊ. ನಾಗುಚ್ಯಾ ಬಾಪಾಯ್ನ್ ಏಕ್ ದೋನ್ ಚಿಂತುನ್, ಆಪ್ಲ್ಯಾ ಕುರ್ಡ್ಯಾ ಪುತಾಚ್ಯಾ ಜಿವಿತಾ ಖಾತಿರ್, ಎಕಾ ಆನಾಥ್ ಚಲಿಯೆಚೆಂ ಜೀವನ್ಯ್ ಶಿಂದುನ್ ವೆಚೆಂ ನಾಕಾ ಮ್ಹಳ್ಳ್ಯಾ ಉದ್ದೇಶಾನ್ ಲ್ಹಾನ್ಶ್ಯಾ ಮಟ್ಟಾರ್ ಕಾಜಾರ್ ಕರುನ್ ದಿಲ್ಲೆಂ.
ಚುನ್ನಿ ಘೊವಾಚ್ಯಾ ಘರಾ ವಚೊಂಕ್ ಭಾಯ್ರ್ ಸರ್ತಾನಾ, ನಾಗು ಚಿಂತ್ನಾಂನಿ ಕಾಳ್ಜಾಂತ್ಯ್ ಕುರ್ಡೊ ಜಾವ್ನ್ ಯೆತಾಚೊ ಭಗ್ತಾಲೆಂ. ತಾಚಿ ಆವಯ್ ತಾಕಾ ಸೊಡ್ನ್ ವೆತಾನಾ ಭಗಾನಾತ್ಲ್ಲೊ ವೆಗ್ಳಾಚಾರ್ ಆತಾಂ ತಾಕಾ ಭಗಾಲಾಗ್ಲೊ. ತೊ ಮತಿಂತ್ಚ್ ರಡ್ತಾಲೊ. ಚುನ್ನಿಚಿ ಭುಜಾವಣ್ ನಾಗುಕ್ ವೆಗ್ಳಾಚಾರ್ ಬರ್ತಿ ಕರುಂಕ್ ಸಕ್ಲಿ ನಾ.ಎಕಾ ಚಲಿಯೆನ್ ಆಪ್ಲ್ಯಾ ಮೊಗಾಚ್ಯಾ ಬಾವಾಕ್ ಸೊಡ್ನ್ ಪೆಲ್ಯಾ ಚಲ್ಯಾ ಸಾಂಗಾತಾ ವೆಚೆಂ ಪಾಪ್ಶೆಂ ತಾಕಾ ಭಗ್ತಾಲೆಂ. ಕದ್ವಳ್ಲ್ಲ್ಯಾ ಆಕಾಶಾರ್ ನಾಗುಕ್ ಸಮ್ಜಣಿ ದಿಂವ್ಚೊ ಚಂದ್ರ್ ನಾತ್ಲ್ಲೊ.
ವೇಳ್ ಧಾಂವ್ತಾನಾ, ದೀಸ್ ರಾವ್ತಾತ್ವೇ. ನಾಗುಚ್ಯಾ ಬಾಪಾಯ್ನ್ ಚುನ್ನಿಕ್ ಲ್ಹಾನ್ಶ್ಯಾ ಮಟ್ಟಾರ್ ಕಾಜಾರ್ ಕರುನ್ ದಿಲ್ಲೆಂ. ಚುನ್ನಿ ನಾಗುಕ್ ಸೊಡ್ನ್ ಘೊವಾಚ್ಯಾ ಘರಾಕ್ ವಚೊಂಕ್ ಭಾಯ್ರ್ ಸರ್ಲೆಂ. ಪುಣ್! ತಿಚೊ ಏಕ್ ದೊಳೊ ಆರ್ಧೆಂ ಕಾಳಿಜ್ ಹಾಂಗಾಚರ್ಚ್ಚ್ ಆಸ್ಲ್ಲೆಂ.
ನಾಗು ಆತಾಂ ಮತಿನ್ ಚಿಂತ್ನಾಂನಿಯ್ ಕುರ್ಡೊಚ್ ಜಾಲ್ಲೊ.
ಥೊಡ್ಯಾಚ್ ದಿಸಾಂನಿ ಚುನ್ನಿ ರಡೊನ್ಚ್ ನಾಗುಚ್ಯಾ ಬಾಪಯ್ ಅರ್ಶಿನ್ ಆಯ್ಲೆಂ. ಚೆನ್ನಾ ಆಪ್ಲೆಂ ಬಾಂಗಾರ್, ಹೆಣೆ ತೆಣೆ ಆಸ್ಲ್ಲೆ ಫುಡ್ ಕಾಸ್ ಆನಿ ಕಾಜಾರಾಚಿಂ ದೋನ್ ಕಾಪ್ಡಾಂಯ್ ಘೆವ್ನ್ ಧಾಂವ್ಲಾ. ಖಂಯ್ಚರ್ ಗೆಲಾ ತೆಂ ಕಳಿತ್ ನಾ ಮ್ಹಣ್ ಹರ್ಧ್ಯಾಕ್ ಹಾತ್ ದಾಡಾವ್ನ್ ರಡ್ತಾನಾ ತಾಚೆಂ ಕಾಳಿಜ್ ಕಡ್ಲೆಂ.
ಗೆಲ್ಯಾರ್ ವಚೊಂದಿ. ಮ್ಹಣಾಲೊ ತೊ. ಪಿಯೊಣೆ, ಜುಗಾರ್, ಕೊಂಬ್ಯಾಕಾಟ್. ಕಾಜಾರ್ ಕರ್ತಚ್ ಪುಣಿ ಬರೊ ಜಾತಾಲೊ... ಆಪ್ಲ್ಯೊ ಕುಬ್ದ್ಯೊ ಆವಯೊ ಸೊಡುನ್, ಕುಟಾಮ್ ಸಾಂಬಾಳ್ತಾಲೊ.... ಮ್ಹಣ್ ತುಕಾ ಹಾವೆಂ ತಾಚೆ ಲಾಗಿಂ ಕಾಜಾರ್ ಕರುನ್ ದಿಲೆಂ. ತುಕಾ ಸುಖ್ ದೀಂವ್ಕ್ ಸಕೊಂಕ್ ನಾತ್ಲ್ಲೊ ತೊ, ಬಾಂಗಾರ್ ದುಡು ಮುಗ್ದಾತಾಚ್ ಪಾಟಿಂ ಯೆತಾಲೊ.
"ತುಂ ಮುಟ್ಟು ಕೆದಾಳಾ ಜಾಲ್ಲೆಂಯ್?" ವಿಚಾರ್ಲೆಂ ತಾಣೆ.
ಗೊಮ್ಟಿ ಆಡ್ ಘಾಲುನ್ ಲಜೆವ್ನ್ ಚುನ್ನಿ ಮ್ಹಣಾಲೆಂ "ಕಾಲ್ಚ್ ರಾವ್ಲಾಂ ಬಾಬಾ"
"ತೊ ಪೆಟ್ಯಾ ಪರಿಂ ಶಿಮ್ಟಿ ಪಂದಾ ಘಾಲುನ್ ಲಜೆನ್ ತುಜೆಲಾಗಿಂ ಯೆತಲೊ. ತುಂ ಹಾಂಗಾಚ್ ರಾವ್....!" ಮ್ಹಣ್ತಾನಾ ಆಯ್ಕೊನ್ ಆಸ್ಲ್ಲ್ಯಾ ನಾಗುಕ್ ಸರ್ಗ್ ಉಗ್ತೊ ಜಾಲ್ಲ್ಯಾ ಪರಿಂ ಬಗ್ಲೆಂ.
ಏಕ್ ಹೊಗ್ಡಾಯ್ತಾನಾ ಆನ್ಯೇಕ್ ಮೆಳ್ತಾ! ಚಿಂತ್ನಾಂನಿ ಬುಡ್ಲೆಂ ಚುನ್ನಿ. ನಾಗುಕ್ ಮಾತ್ರ್ ಕಾಜಾರಿ ಸಂಭಂಧ್, ಗೊವ್ ಬಾಲ್ ಚಡ್ತಿಕ್ ಸಂಭಂಧ್ ಕಳಿತ್ ನಾತ್ಲ್ಲೊ. ತಾಕಾ ಫಕತ್ತ್ ಚುನ್ನಿಬಾಯ್ ಆಪ್ಣಾಕ್ ಪಾಟಿಂ ಮೆಳ್ತಾ, ಆನಿ ತೆಂ ಆಪ್ಣಾ ಸಾಂಗಾತಾ ಉರ್ತಾ, ಇತ್ಲೆಂಚ್ ಕಳಿತ್. ಅಸಲ್ಯಾ ಚಿಂತ್ನಾಂಕ್ ಸ್ವಾರ್ಥ್ ಮ್ಹಣ್ತಾತ್ ಮ್ಹಳ್ಳೆಂಯ್ ತಾಕಾ ಕಳಿತ್ ನಾ.
ಚುನ್ನಿಬಾಯೆನ್ ಆಪ್ಲೊ ಮೋಗ್ ಚಾಕ್ರಿ � ತಾಮ್ಚೊ ದೊಗಾಂಯ್ಚೊ ಸಂತೊಸ್ ಆಟಾಪುನ್ ಆಸಾ. ಆಶೆಂ ಆಸ್ಲ್ಲೆಂ ಚಿಂತಾಪ್ ನಾಗುಚೆಂ. ವರ್ಸಾಂ ಯಾಂತ್ರಿಕ್ಪಣಿ ಪಾಶಾರ್ ಜಾತಾಲಿಂ ಚುನ್ನಿ ನಾಗು ಸಾಂಗಾತಾ, ತಾಂಚ್ಯಾ ಕುಟ್ಮಾಂತ್ ಜೀವನ್ ಭರ್ ಕಾತ್ತೆ ಚಾಕ್ರಿ ಕರ್ಚೆಂ ಆಳ್ ಕಾಮಾಚೆಂ ಮ್ಹಳ್ಳ್ಯಾ ಆಣ್ಕಾಣ್ಯಾಂತ್ ನಾತ್ಲ್ಲೆಂ ಜಾಲ್ಯಾರ್ಯೀ ದಿಶ್ಟಿಂನಿ ಆಸ್ಲ್ಲೆಂ.
ವರ್ಸಾಂ ಪಾಶಾರ್ ಜಾಲಿಂ. ಋತು ಬದಲ್ತಾನಾ, ಸಂದರ್ಭ್, ಸನ್ನಿವೇಶಾಂಯ್ ಬದಲ್ತಾಲಿಂ. ತೀನ್ ವರ್ಸಾಂ ಉತಾರ್ತಾನಾ ಪರ್ತ್ಯಾಕ್ ಏಕ್ ಖಬಾರ್ ಫುಟ್ಲಿ. ಚೆನ್ನ ಪಾಟಿಂ ಯೆತಾ. ಚುನ್ನಿಕ್ ಆಪ್ಣಾ ಸಾಂಗಾತಾ ಆಪವ್ನ್ ವರ್ತಾ!
ಉತ್ರಾಲ್ಲ್ಯಾ ವರ್ಸಾಂನಿ ತುಟ್ಲೆಲ್ಯಾ ಲಗ್ನಾಚಿಂ ಕಸಲಿಂ ಭಗ್ಣಾ ಚುನ್ನಿಚ್ಯಾ ಕಾಳ್ಜಾ ಮನಾಂತ್ ಭರೊನ್ ವೊಮ್ತಾತಾಲಿಂ. ತಾಚೆಂ ಕೊಣಾಕ್ಚ್ ಗುಮಾನ್ ನಾತ್ಲ್ಲೆಂ. ನಾ ಮ್ಹನ್ ಚುನ್ನಿನ್ ಕೆದೆಂಕ್ಚ್ ತಿಂ ಬಾಯ್ರ್ ಉಸ್ತಿಲ್ಲಿಂ ನಾಂತ್. ಆಪ್ಲ್ಯಾ ಮುಖಮಳಾರ್ ತಾಂಕಾ ದಾಕಯಿಲ್ಲಿಂ ನಾಂತ್.
ಸಾಕಾಳಿಂ ಉಟ್ತಾನಾ ನಾಗುಚೊ ಹಾತ್ ದರ್ನ್, ನ್ಹಾಣಿಯೆಕ್ ಆಪವ್ನ್ ವರ್ನ್, ದಾಂತ್ ಘಾಸುನ್, ಕುಡಿಚಿ ಗರ್ಜ್ ತಿರ್ಸುಂಕ್, ಕಾಫಿ, ಫಳಾರ್, ಜೆವಾಣ್ ದಿಂವ್ಚ್ಯಾ ಥಾವ್ನ್ ತಾಕಾ ನಿತಳ್ ಕರುಂಕ್ ಮಾತ್ರ್ ನ್ಹಂಯ್, ತಾಚ್ಯಾ ಹಜಾರ್ ಸವಾಲಾಂಕ್ ಜಾಪಿ ದೀಂವ್ಕ್ ಚುನ್ನಿ ಮಾತ್ರ್ ಸಕ್ತಾಲೆಂ. ಚುನ್ನಿ ನಾಗುಚಿ ಉತ್ತೀಮ್ ಶಿಕ್ಶಕಿ, ಆವಯ್, ಚಾಕರ್ನ್, ಆನಿ ದೇವ್.
ಏಕ್ ದೀಸ್ ಖೆಳಾ ಮಧೆಂ ಖಂಚ್ಯಾ ಎಕಾ ಸೆಜಾರಿ ಭುರ್ಗ್ಯಾನ್ "ದೆವಾಚ್ಯಾ ಮ್ಹಾಕಾ ಕಳಿತ್ ನಾ" ಮಳ್ಳಿಂ ಉತ್ರಾಂ ಆಯ್ಕೊನ್ ನಾಗುನ್ ಚುನ್ನಿಲಾಗಿಂ ವಿಚಾರ್ಲ್ಲೆಂ ತಾಕಾ ಉಡಾಸ್ ಆಯ್ಲೊ.
ಸಾಂಜೆರ್ ಕಾಮ್ ಮುಗ್ದೊನ್ ಆಪ್ಲ್ಯಾ ಬಗ್ಲೆಕ್ ಬಸ್ಲೆಲ್ಯಾ ಚುನ್ನಿಕ್ ವಿಚಾರಿಲಾಗ್ಲೊ ನಾಗು.
"ಚುನ್ನಿಬಾಯ್...., ದೇವ್ ಮ್ಹಳ್ಯಾರ್ ಕಿತೆಂ?"
"ದೇವ್...!" ದೇವ್ ಮ್ಹಳ್ಯಾರ್ ಕಳಿತ್ ನಾಂಗೀ ತುಕಾ? � ತುಕಾ ಲ್ಹಾನ್ ಥಾವ್ನ್ ದೆವಾಲಾಗಿಂ ಮಾಗೊಂಕ್ ಶಿಕಯ್ತಾಂ.....!"
"ಮಾಗ್ತಾಂ ವ್ಹಯ್ ಚುನ್ನಿಬಾಯ್! ತೊ ಕಸೊ ಆಸಾ? ಮ್ಹಾಕಾ ದೀಶ್ಟ್ ನಾ, ಪಳಂವ್ಕ್ ಮೆಳಾನಾ. ತುವೆಂ ತಾಕಾ ಪಳೆಲಾಂಯ್? ತೊ ಕಸೊ ಆಸಾ? ಸಾಂಗ್ ಮ್ಹಾಕಾ....!"
ಚುನ್ನಿನ್ ದೆವಾಚೆಂ ವರ್ಣನ್ ಕರುಂಕ್ ಆರಂಭ್ ಕೆಲೆಂ ಲಾಗ್ಶಿಲ್ಯಾ ದಿವ್ಳಾಂತ್ ಭಾಯ್ಲ್ಯಾ ಭಾಯ್ರ್ ದೆಖ್ಲೆಲ್ಯಾ ದೆವಾಂಚ್ಯಾ ಮೂರ್ತಿಂಚಿ, ತಸ್ವೀರೆ, ಚಿತ್ರಾಂಚಿ, ಆಪ್ಣಾಕ್ ಕಳಿತ್ ಆಸ್ಲ್ಲ್ಯಾ ಸರ್ವ್ ದೆವಾಂಚಿ.
"ತುವೆಂ ನೀಜ್ ದೆವಾಕ್ ಪಳೆಲಾಂಯ್ ಚುನ್ನಿಬಾಯ್?"
"ತುಂ ಬೆಪ್ಪಾ! ನೀಜ್ ದೆವಾಕ್ ಪಳಂವ್ಕ್, ಕೊಣಾಕ್ ಪುಣಿ ಜಾತಾ?"
"ಮ್ಹಳ್ಯಾರ್....?" ".......ದೊಳ್ಯಾಂಕ್ ದೀಶ್ಟ್ ಆಸ್ಚ್ಯಾ ತುಮ್ಕಾಂಯ್ ತೊ ದಿಸಾನಾಂ?"
"ದೆಕುನ್ಚ್ ಪೆದ್ದಾ! ತಾಕಾ ದೇವ್ ಮ್ಹಣ್ಚೆಂ. ದೊಳ್ಯಾಂಕ್ ದಿಸ್ಚೆ ಸರ್ವ್ ಮನಿಸ್! ದೇವ್ ನ್ಹಂಯ್.....! ಕಳ್ಳೆಂ...?" ಆಪ್ಣಾಕ್ ಸಗ್ಳೆಂ ಕಳಿತ್ ಆಸಾ ಮ್ಹಳ್ಳ್ಯಾ ಪರಿಂ ಉಲಯ್ಲೆಂ ಚುನ್ನಿ.
ದೇವ್ ಕೊಣಾಯ್ಚಾ ದೊಳ್ಯಾಂಕ್ ದಿಸಾನಾ. ತರ್.....!
ತೊ ಆಸಾ....? ವಾ ನಾ?
ಆಸಾ ಮ್ಹಣೊನ್ ಹಿಂ ಕಶೆಂ ಸಮ್ಜಾತಾತ್? ಬೆಶ್ಟೆಂಚ್ ಮ್ಹಜೆ ತಸಲ್ಯಾ ಕುರ್ಡ್ಯಾಂಕ್ ಮಾಂಕೊಡ್ ಕರುಂಕ್ ತಶೆಂ ಸಾಂಗ್ತಾತ್ ಜಾಂವ್ಕ್ ಪುರೊ. ನಾ ತರ್.....! ದೇವ್ ಮ್ಹಳ್ಳೊ ಎಕ್ಲೊ ಆಸಾ! ತೊ ಕೊಣಾಯ್ಕ್ಯ್ ದಿಸಾನಾ ಮ್ಹಳ್ಯಾರ್ ಕಿತೆಂ?
ಮ್ಹಜ್ಯಾ ದೊಳ್ಯಾಂಕ್ ದೀಶ್ಟ್ ಆಸ್ಲ್ಲಿ ಜಾಲ್ಯಾರ್.....!?
ಎಕಾದಾವೆಳಾರ್ ತಶೆಂ ಜಾಲ್ಯಾರ್, ಮ್ಹಾಕಾ ಕುರ್ಡ್ಯಾಕ್ ಆನಿ ಹಾಂಕಾಂ ಕಿತೆಂ ವ್ಯತ್ಯಾಸ್? ಮ್ಹಾಕಾ ದೊಳೆ ದಿಸಾನಾಂತ್. ದೆಕುನ್ ದೆವಾಕ್ ದೆವಾಕ್ ಪಳಂವ್ಕ್ ಆಸಾದ್ಯ್. ಹಾಂಕಾಂ ಸರ್ವಾಂಕ್ಯ್ ದೊಳೆ ಉಗ್ತೆಚ್ ಆಸಾತ್. ದೀಶ್ಟ್ ಆಸಾ. ತ್ರಯೀ ದೇವ್ ದಿಸಾನಾ. ನಾಗುನ್ ಥೊಡ್ಯಾನ್ ತೆಂಪಾ ಆದಿಂ ಚುನ್ನಿಲಾಗಿಂ ಕೆಲ್ಲಿ ಚರ್ಚಾ ತಾಕಾ ಉಡಾಸ್ ಯೆತಾನಾ,
ಆಪ್ಲಿಂ ಭೊಗ್ಣಾಂ ಭಾಯ್ರ್ ಉಸ್ತಿನಾಸ್ತಾಂಚ್ ಭಿತರ್ಲೆ ಭಿತರ್ ಆಪ್ಲ್ಯಾ ಕಡ್ವಳಾಂತ್ ಅತ್ರೆಗಿ ಉಲ್ಯಾಂಚೊ, ಭರ್ವಸ್ಯಾ ರೊಳ್ಣೆ ಪಾಗೊರ್ ಬಾಂದುನ್ ಹಾಡ್ಲ್ಲೊ ತೊ ಕೊಸ್ಲಾವ್ನ್ ಆಪ್ಲೊ ಪತಿ ಪಾಟಿಂ ಯೇವ್ನ್, ಆಪ್ಣಾಕ್ ಸಾಮ್ಗಾತಾ ಆಪವ್ನ್ ವರ್ತಾ ಮ್ಹಳ್ಯಾರ್? ದೊಳ್ಯಾಂಕ್ ದಿಸಾನಾತ್ಲ್ಲೊ ದೇವ್ ಆಸಾ. "ಘೊವ್ಚ್ ತುಜೊ ದೇವ್!" ತಿಚ್ಯಾ ಸಯ್ರ್ಯಾ ಆಜಿಯೆಚಿಂ ಉತ್ರಾಂ ತಿಕಾ ಉಡಾಸಾಕ್ ಯೆತಾತ್.
ನಾಗುಕ್ ಮಾತ್ರ್.... ಚುನ್ನಿಕ್ ತಿಚೊ ಘೊವ್ ಚೆನ್ನ ಆಪವ್ನ್ ವರುಂಕ್ ಆಯ್ಲಾ, ಉತ್ರಾ. ಜಿರಂವ್ಕ್ ಜಾಯ್ನಾತ್ಲ್ಲಿಂ. ಗಿಳುಂಕ್ ಜಾಯ್ನಾತ್ಲ್ಲಿ ಉಂಡಿ ಜಾವ್ನ್ ಅಡ್ಕಳ್ತಾಲಿ. ಕಶೆಂ ತರ್ಯೀ ಚುನ್ನಿಬಾಯೆಕ್ ಆಪ್ಣಾ ಸಾಂಗಾತಾಚ್ ಉರಂವ್ಚೆ ಆತ್ರೆಗ್, ಚೆನ್ನಾನ್ ಪರ್ತ್ಯಾಂ ಧಾಂವೊಂಕ್ ಆನಿ ಚುನ್ನಿಬಾಯೆಕ್ ಆಪ್ಣಾ ಸಾಂಗಾತಾ ಸೊಡುಂಕ್ ಕೊಣಾಲಾಗಿಂ ಮಾಗ್ಯೆತ್? ಕಳಾನಾತ್ಲ್ಲೆಂ.
ಆಪ್ಣಾಚೊ ಘೊವ್ ಪಾಟಿಂ ಯೇವ್ನ್, ಆಪ್ಣಾಕ್ ಪರ್ತ್ಯಾನ್ ಸ್ವಿಕಾರ್ ಕರ್ತಲೊ ಮ್ಹನ್ ಸಪ್ಣಾಂತ್ಯ್ ಚಿಂತುಂಕ್ ನಾತ್ಲ್ಲೆಂ. ಗೊವಾನ್ ಬಾಯ್ಲೆಕ್ ಸೊಡ್ಚೆಂ, ಬಾಯ್ಲೆನ್ ಜೀವ್ಘಾತ್ ಕರ್ಚೆಂ, ಸರ್ವ್ ತಿಣೆ ಹೆಣೆ ತೆಣೆ ಆಯ್ಕಾಲ್ಲೆಂ. ಪುಣ್! ತಿಕಾ ಕೆದಿಂಚ್ ಭಗ್ಲ್ಲೆಂ ನಾ ಚೆನ್ನುನ್ ಆಪ್ಣಾಕ್ ಸೊಡ್ಲಾಂ. ಹಾವೆಂಯ್ ಜೀವ್ಗಾತ್ ಕೆಲ್ಯಾರ್ ಬರೆಂ ಮ್ಹಣೊನ್. ಕಿತ್ಯಾಕ್, ತಿಚ್ಯೆರ್ಚ್ ಹೊಂದೊನ್ ಆಸ್ಲ್ಲೊ ನಾಗು ಆಸಾ. ತಾಚಿ ಜವಾಬ್ದಾರಿ ತಿಚೆರ್ ಆಸಾ. "ತೆಣೆಂ ನಂಯ್ ಹೆಣೆಂ ಬಾಂಯ್" ಮ್ಹಳ್ಳೆ ಪರಿಂ ತಿಚೆಂ ಜಿವಿತ್. ತ್ರಯೀ ತಿಣೆ ದೆವಾಲಾಗಿಂ ಯಾಂತ್ರಿಕ್ ಥರಾನ್ ಮಾಗ್ಲ್ಲೆಂ ಆಸಾ. ಆಪ್ಲ್ಯಾ ಘೊವಾನ್ ಲ್ಹಾನ್ಶೆಂ ಬಿಡಾರ್ ಕರುನ್, ತ್ಯಾ ಘೊಂಟೆರಾಂತ್ ಆಪ್ಲ್ಯಾ ಕುಟ್ಮಾಚಿಂ ಪಾಳಾಂ ರೊಂಬವ್ನ್ ಲ್ಹಾನ್ ಲ್ಹಾನ್ ಭುರ್ಗಿಂ ಪಿಂಪ್ರಿ ಉಂಗ್ಯಾಂ ಉಂಗ್ಯಾ ರಡೊನ್ ವಾಡ್ಚಿಂ, ಹಾಸೊನ್ ಖೆಳೊನ್ ಉಡ್ಚಿಂ. ಘೊವ್-ಬಾಯ್ಲೆನ್ ದೊಗಾಂಯ್ನಿ ತ್ಯಾ ಪಿಲ್ಕಟ್ಯಾಂಚಿ ಚಾಕ್ರಿ.... ಆನ್ಭೊಗಾ ಥಾವ್ನ್ ಆತಾಂಯ್ ಆಪುಣ್ ನಾಗುಚಿ ಕರ್ತಾಂ. ತಾಚ್ಯಾಕ್ಯ್ ವರ್ತನ್ ಅಪ್ಲ್ಯಾಚ್ ಸ್ವಂತ್ ಭುರ್ಗ್ಯಾಂಚಿ ಕರುನ್ ಜಿಯೆಂವ್ಕ್ ಚುನ್ನಿ ಸಪ್ನಾಂ ದೆಖ್ತಾಲಿ. ದೆವಾಲಾಗಿಂ ಮಾಗ್ತಾಲಿ.
ಆಜ್ ತೊಚ್ ದೀಸ್ ಉದೆಲ್ಲೊ. ಎಕಾ ವಾಟೆನ್ ನಾಗುಚೊ ವೆಗ್ಳಾಚಾರ್. ದುಸ್ರ್ಯಾ ವಾಟೆನ್ ಹಾತ್ ದರ್ಲ್ಲೊ ಘೊವ್!
ನಾಗುಕ್ ತಿಣೆ ಭುಜಯ್ಲೆಂ. ಚುಕೊನ್ಯ್ ಹಾಂವ್ ಪಾಟಿಂ ಯೆತೆಲಿಂ ಮ್ಹಳ್ಳಿಂ ಉತ್ರಾಂ ತಿಚೆ ಜಿಬೆ ಥಾವ್ನ್ ಚುಕೊನ್ಯ್ ಉಸಾಳ್ಳಿಂ ನಾಂತ್. ತಿಂ ಚಲ್ಲಿಂ ಘಾಟಾಚಿ ವಾಟ್ ದರುನ್ ಆಪ್ಲ್ಯಾ ಸ್ವಂತ್ ಬಿಡಾರಾಕ್.
ದೀಶ್ಟ್ ನಾತ್ಲೆಲ್ಯಾ ನಾಗುಚ್ಯಾ ದೊಳ್ಯಾಂತ್ಲಿಂ ಹುನೊಂನಿ ದುಃಖಾಂ ಪೊಲ್ಯಾಂನಿ ನಿಸ್ರೊನ್ ಜಿರೊನ್ ವೆತಾನಾ, ಪುಸುಂಕ್ ಚುನ್ನಿಬಾಯ್ ನಾತ್ಲ್ಲೆಂ.
****************
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
