ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 52. ಲಗ್ನಾಂತ್ಲೆಂ ವೀಘ್ನ್
ಗ್ಲೇಡಿಸ್ ರೇಗೊ: ಕೊಂಕ್ಣೆಂತ್ ಸ್ತ್ರೀ ಲೇಖಕಿ ಜಾವ್ನ್ ಫಾಮಾದ್ ತರ್ಯೀ, ಕೊಂಕ್ಣಿ ವಾವ್ರಾಕ್ಯೀ ಹಿ ತಿತ್ಲಿಚ್ಚ್ ಫಾಮಾದ್. ಸಾಮಾಜಿಕ್ ಸಂಗ್ತ್ಯಾಂಚೆರ್ ಸಾಹಿತ್ಯ್ ರಸ್ಚಾ ಹಿಚೆಂ ಚಡ್ತಾವ್ ಸಾಹಿತ್ಯ್ ಸ್ತ್ರೀ ಸಂವೇದನಾಚೆಂ. ಹಾಂಗಾಸರ್ ಆಸ್ಚಿ ಕಾಣಿಯೀ ಅಸಲಿಚ್ಚ್ ಸ್ತ್ರೀ ಸಂವೇದನ್ ಪಾಚಾರ್ತಾ. ಸಾದ್ಯಾ ಲೊಕಾಂಸವೆಂ ಭರ್ಸೊನ್ ಆಸಾ ದೆಕುನ್ ಹಿಣೆಂ ಕಾಣ್ಯೆಂತ್ ವ್ಹಾಪಾರ್ಲ್ಲಿ ಭಾಸ್ಯೀ ಸಾದಿ ಜಾವ್ನಾಸಾ. ಪುಣ್ ಹಿ ಕಾಣಿ ಕೊಣಾಯ್ಚಿಯೀ ಜಿಣಿ ಜಾವ್ಯೆತ್ ಜಾಲ್ಲಿ ಜಾವ್ನಾಸಾ ದೆಕುನ್ ವಾಚ್ತಾಂ ವಾಚ್ತಾಂ ಹ್ಯಾ ಕಾಣ್ಯೆಂತ್ಲೆ ಪಾತ್ರ್ ಆಮ್ಚಾ ದೊಳ್ಯಾಂ ಹುಜಿರ್ ಯೆತಿತ್ ತರ್ ಕಾಂಯ್ ಅಜ್ಯಾಪ್ ನಾ.
ಗ್ಲೇಡಿಸ್ ರೇಗೊ
ಸಾಕಾಳಿಂ ಉಟೊನ್ ಗುಡ್ಯಾಕ್ ಗೆಲ್ಲಿ ಆನ್ನಿ ಹಾತಾಂತ್ ಚೆಂಬು ಉಮ್ಕಾಳಾಯಿತ್ತ್ ಬೆಟಾಂಚ್ಯೊ ಮೆರೊ ಉತ್ರೊನ್, ಮಜಲಾಚ್ಯಾ ದೆಂವ್ಣೆರ್ ಫುಟ್ ಪಡ್ಲ್ಲ್ಯಾ ಬೆಟಾಂಚ್ಯಾ ಶಿಳಿಂನಿಂ ಭಿರ್ಮತೆಚಿ ನದರ್ ಖಂಚಯಿತ್ತ್ ಪಾವ್ಸಾ ಶೆಳಿಕ್ ಆತ್ರೆಗ್ಚಾ ಭುಮಿ ಕುಡ್ಕ್ಯಾಂಕ್, ಆನಿ ಆಪ್ಲ್ಯಾ ತಕ್ಲ್ಯಾಂತ್ ಖತ್ಕತ್ಚ್ಯಾ ಚಿಂತ್ನಾಂ ಝುಜಾಚ್ಯಾ ಸಮಸ್ಯಾಂಕ್ ತುಲನ್ ಕರಿತ್ತ್, ಆಪ್ಲೆಸ್ತಕಿಂ ಪುರ್ಪುರೀತ್ ಚಲ್ತಾಲಿ.
ಪಯ್ಲ್ಯಾ ಪಾವ್ಸಾಚ್ಯಾ ಚುಂಬನಾಕ್ ರಾಕ್ಚೆ ತ್ಯೆ ಭೂಮಾತೆಕ್ ದೆಖ್ತಾನಾ.... ಭಿರ್ಮೊತೆನ್ ಕಾಳಿಜ್ ತಿಚೆಂ-ಅತ್ರೆಗಾಂಚ್ಯಾ ಖೊಟಾಂನಿ ಪಾಸ್ಳಾಲ್ಲೊ ಅನುಭವ್ ಜಾಲ್ಯಾರ್ಯ್, ಮರ್ಯಾದ್ ಮ್ಹಳ್ಳೆಂ ಪಾತಳ್ ಕರ್ಲ್ ಫುಟಾತ್ ಮ್ಹಳ್ಳಿ ಕಾವ್ಜೆಣ್ ಪುಂಜಾವ್ನ್ ಹಾಡ್ಚ್ಯಾ ಧಯ್ರಾಕ್ ಮುಳಾ ಥಾವ್ನ್ ಹಾಲಂವ್ಕ್ ಲಾಗ್ತಾನಾ.... ಪಿಸುಡ್ನ್ ಪಾಪುಡ್ಚ್ಯಾ ಫುಲಾಂ ಪಾಕ್ಳ್ಯಾಂ ಸಾರ್ಕಿಂ ತಿಚಿಂ ಚಿಂತ್ನಾಂ ಅಖ್ಖ್ಯೆ ಕುಡಿಂತ್ ಇರ್ಜೊವ್ನ್ ಫಕತ್ತ್ ಪಾಚ್ವ್ಯಾನ್ ಧಲಾಜಾಯ್ ಜಾಲ್ಲ್ಯಾ ಶೆತಾಂ ಥಂಯ್, ಉದ್ಕಾನ್ ನಿಶೆಜಾಯ್ ಜಾಲ್ಲೆ ಭುಮಿ ಥಂಯ್, ಚುರ್ಚುರ್ಯಾಂಚೆ ಕಳ್ವಳೆ ಮಾತ್ರ್ ವೆಕ್ತ್ ಕರ್ತಾತ್.
ಆಮ್ಚ್ಯಾಚ್ ಗಾಂವಾರ್ ಪಾವ್ಸಾಚೊ ಬರ್ಗಾಲ್ ಕಿತ್ಯಾಕ್ ಹ್ಯಾ ವರ್ಸಾ! ಪಾವ್ಸ್ ಪಡ್ಚ್ಯಾ ಹ್ಯಾ ಭುಮಿ ಕುಡ್ಕ್ಯಾಂತ್ ಉಕಲ್ನ್ ವರುನ್ ದವರ್ನ್ ಸಾಗ್ವೊಳಿ ಕರುಂಕ್ ಸಕ್ಲ್ಯಾರ್? ಆಸಾದ್ಯ್ ಕಿತ್ಯಾಕ್? ಸಾಗೊರಾಚೆಂ ಉದಾಕ್ ತರ್ಯ್ ಉಸ್ಪುನ್ ಹ್ಯಾ ಶೆತಾಂನಿ ಭರುಂಕ್ ಆಸಾದ್ಯ್ ಕಿತ್ಯಾಕ್? ಮನ್ಶ್ಯಾ ಸಂಯ್ಬಾಕ್ ಸಮಡ್ತ್, ಧರ್ಮ್, ಆನಿ ಸಮಾಜೆಚ್ಯೊ ರಿತ್ ರಿವಾಜಿ, ಮಾನ್ ಮರ್ಯಾದ್, ಮ್ಹಳ್ಳಿ ಆಡ್ಕಳ್ ಜಾಲ್ಯಾರ್....
ಹೆ ಭೂಮಾತೆಕ್, ಸುಕೊನ್ ಫುಟ್ ಪಡ್ಲೆಲೆ ಧರ್ತೆಕ್ ಅಡ್ಕಳ್ ಕಿತ್ಯಾಚಿ?
ಖಂಯ್ಚರ್ ವರ್ಚೊ ಹೊ ಸಮಸ್ಸೊ?
ಮರ್ಯಾದ್ ಮ್ಹಳ್ಳೆ ಕೂಡ್ಲೆ ಹರ್ದ್ಯಾಕ್ ಉಮ್ಕಾಳಾವ್ನ್, ಲಾಬ್ಲ್ಲೆ ತಿತ್ಲೀಯ್ ಮರ್ಯಾದ್ ತಾಂತುನ್ ಭರ್ತೆಚ್ ರಾವೊನ್, ಪೆಂಕ್ಟಾಂತ್ಲೆಂ ನೆವಾಳೆಂ ವಿಕೊನ್ ಗೆಲ್ಯಾರ್ಯೀ ಹಾತಾಂತ್ಲೊ ಈದ್ರ್ ಚುಕಯ್ನಾಸ್ತಾನಾ, ಕುಟ್ಮಾಚ್ಯಾ ಸಾಂದ್ಯಾಂಚೆ ಮಾನಸಿಕ್ ಸಮಸ್ಯೆ ಕುತ್ತಾರೆ ಪಂದಾ ದಾಂಪುನ್ ಘಾಲುನ್, ಮರ್ಯಾದೆಚೆಂ ಕುಟಾಮ್ ಮ್ಹಣ್ ಸಂಸಾರಾಕ್ ಪ್ರದರ್ಶನ್ ಕರ್ಚ್ಯಾ-ಘರ್ಕಾರಾಕ್ ಕಶೆಂ ಹಾಂವ್ ಸಮ್ಜಾಂವ್? ಖಂಯ್ಚಾಂತ್ ಹಾಂವ್ ಪಿಂತ್ರಾಂವ್?
ಆಮ್ಚ್ಯಾ ಬಯ್ಲಾಂತ್ಲ್ಯಾ ಫಳಾಭರಿತ್ ಶೆತಾಂಕ್ ವಾಂಜ್ ಮ್ಹಳ್ಳೆಂ ಬಿರುಧ್ ಲಾವ್ನ್ ಆಮ್ಚಿ ಮರ್ಯಾದ್ ರಸ್ತ್ಯಾರ್ ಘಾಸ್ಚಾ ಆದಿಂ ಆಮಿ ರುಜು ಕರುನ್ ದಾಖವ್ಯಾಂ,
ತ್ಯಾ ಶೆತಾಂಕ್ ಉದ್ಕಾಚಿ ಶೆಳ್ ಕರ್ಚೊ ಪಾವ್ಸ್ ಸುಕೊನ್ ಗೆಲಾ..... ನಿರ್ಜೀವ್ ಜಾಲಾ.... ಖೆವಾಧ್ ಲಾಗೊನ್, ವ್ಹಾಳಯ್ ಖಾವ್ನ್ ಉಪ್ಕಾರಾಕ್ ಪಡಾನಾತ್ಲ್ಲೊ ಜಾಲಾ ಮ್ಹಣ್ ಕಶೆಂ ನಾಟ್ವಾಶೆಂ ಕರುಂ ಮ್ಹಜ್ಯಾ ದೆವಾ?
ಮರ್ಯಾದೆಚ್ಯಾ ಕುಟ್ಮಾಂತ್ಲೆಂ ಹೆಂ ಬಾಸ್ಕಾಳ್ ಘಡಿತ್ ಶಿರೊತೆಂನಿ ವಾಡುನ್, ಸಮಾಜೆ ಮುಕಾರ್ ಪಾತ್ಳಾಂವ್ಕ್ ಭಿಯೆವ್ನ್, ಪಾತಕ್, ಸ್ಕಾಂದಲ್, ಮ್ಹಣ್ ಬೋಟ್ ಜೊಕ್ಚೆ ನಿತಳ್ ಸಮಾಜೆಕ್, ಕುಸ್ಲೆಲ್ಯಾ ರೆಡ್ಯಾಚೆಂ ಮಾಸ್ ಖಾವಯಿಲ್ಲ್ಯಾ ಪರಿಂ.
ಲೊಕಾ ಮುಕಾರ್ ಆಂಗ್ಣಾಂತ್ ಥುಕುಂಕ್ಯ್ ಕಾವ್ಜೆಂವ್ಚ್ಯಾ ಮನ್ಶ್ಯಾ ಥಂಯ್ ಕಶೆಂ ಪಾತ್ಳಾಂವ್? ಆಪ್ಲಿಚ್ ಧುವ್ ತಿಚಿಂ ಬೊಗ್ಣಾ ಆಶಾ ಘರ್ಚ್ಯಾ ಕಾಮಾಂನಿ ಆನಿ ಶೆತಾಂತ್ಲೆ ಮಾತಿಯೆಂತ್ ಮುಡ್ಡುನ್ ಉಡಯ್ತಾ ಮ್ಹಳ್ಳೆಂ ಸತ್ ಹೊ ದಾದ್ಲೊ ಕಸೊ ಸ್ವೀಕಾರ್ ಕರಿತ್? ಭಾಯ್ರ್ ಥುಕೊಂಕ್ಯ್ ನ್ಹಂಯ್ ಭಿತರ್ ಗಿಳುಂಕ್ಯ್ ನ್ಹಂಯ್ ಮ್ಹಳ್ಳಿ ಹಿ ಘಾಣ್ಕುಟಿ ಥುಕ್ ಇರೊಂವ್ಚಿ ಖಂಯ್ಚರ್?
ಘರ್ಚ್ಯಾ ಯೆಜ್ಮಾನ್ಯಾಚ್ಯಾ ಮರ್ಯಾದ್ ಆನಿ ಮಾನಾ ಸಾಮ್ಕಾರ್ ಜಮೊನ್ ಯೆಂವ್ಚಿ ತಿಚಿ ಧೃಡತಾ, ಫುಲೊನ್ ಯೆಂವ್ಚ್ಯಾ ಸಾಳಕಾಚ್ಯೊ ಪಾಕ್ಳ್ಯೊ ಉಸವ್ನ್ ಉಸವ್ನ್, ಜಡೊನ್ ಧರ್ತರೆಚ್ಯಾ ಮಾತಿಯೆಂತ್ ಮಿಸ್ಳೊನ್ ವೆಚೆಪರಿಂ, ತಿಚೆ ನಿರ್ದಾರ್ ದಂಡಳೊಂಕ್ ಲಾಗ್ತಾನಾ, ಎಕ್ಸುರ್ಪಣಾಚ್ಯಾ ದುಸ್ಪಟ್ಲೆಲ್ಯಾ ವಾತಾವರಣಾಂತ್ ಥಂಡ್ ವಾರೆಂ ಕುಡಿಕ್ ತಿಚೆ ಪ್ರಪುಲ್ಲ್ ಕರಿಲಾಗ್ಲೆಂ.
ಶೆತಾ ಭಾಟಾಂನಿ ರಾಕ್ಚೊ ಪಾವ್ಸ್, ವೆಗಿಂಚ್ ಯೆಂವ್ಚೊ ನಿಶಾನಿ ತೆಂ ವಾರೆಂ. ತಿಕಾ ತೃಪ್ತಿ ದೀಂವ್ಕ್ ಲಾಗ್ಲೆಂ. ಆಳಾಂಕ್ ಆಪವ್ನ್ ಶೆತಾಂಚಿ ಸರ್ಬಾರಾಯ್ ಕರ್ಚೆ ದೀಸ್ ಚಡ್ ಪಯ್ಸ್ ನಾಂತ್ ತಶೆಂ ತಿಕಾ ಭಗಾಲಾಗ್ಲೆಂ. ತಾಂಚೆ ಸಾಂಗಾತಾ ತಿಚ್ಯಾ ನಿರ್ದಾರಾಚೆಂ ಕರ್ಲ್ ಘಟ್ ಜಾಯಿತ್ತ್ ಆಯ್ಲೆಂ.
ಘನ್ ಮರ್ಯಾದ್ ಗೆಲಿ ಪೊಸ್ಕಾಟ್ಯಾಂತ್!
ಕಾಳ್ಜಾಚ್ಯಾ ಖಾಂದ್ಯಾ ಥಾವ್ನ್ ತಿಚಿಕೂಡ್ ಪಾಪ್ಡಾಲಿ. ತ್ಯಾ ಫೊರ್ಸಾಕ್ ಹಾತಾಂತ್ಲೊ ಚೆಂಬು ಮೆರೆರ್ ಉಸ್ಲೊನ್, ಶೆತಾಂತ್ ಲೊಳಾಲಾಗ್ಲೊ. ವಾಸ್ರಾಚ್ಯಾ ಕಾನಾಂನಿ ವಾರೆಂ ರಿಗ್ಲ್ಲ್ಯಾ ಜಿನ್ಸಿಂ......! ಧಯ್ರಾಧೀಕ್ ನಿರ್ದಾರಾಚ್ಯಾ ಝೊಡಾನ್ ತಿ ಝೂಂಯ್ ಕರುನ್ ಘರಾ ದಿಶಿಂ ಧಾವಾಲಾಗ್ಲಿ.
ಹಾಂವ್ ಝುಜ್ತೆಲಿಂ. ಮ್ಹಜೆ ಧುವೆ ಖಾತಿರ್ ಹಾಂವ್ ಖಂಡಿತ್ ಝುಜ್ತೆಲಿಂ. ಸಮಾಜೆ ಮುಕಾರ್, ಸಮಡ್ತೆ ಮುಕಾರ್, ಝುಜೊನ್ ಹಾಂವ್ ಜಿಕ್ತೆಲಿಂ.
ಕಾಜಾರ್ ರದ್ದ್ ಕರುಂಕ್ ಸಾಧ್ಯ್ ಜಾಲ್ಯಾರ್, ಆನಿ ಮ್ಹಜ್ಯಾ ನಿತಳ್ ಫುಲಾಲಾಗಿಂ ದುಸ್ರೊ ಚಲೊ ಕಾಜಾರ್ ಜಾಲ್ಯಾರ್, ಝುಜಾಂತ್ ಹಾಂವ್ ಜಿಕೊನ್ ದಾಕಯ್ತೆಲಿಂ.
ಬೆಟಾ ಥಾವ್ನ್ ದೆಂವ್ತಾನಾ ಪೃಥ್ವಿ ಇತ್ಲಿಯೀ ಗಂಭೀರ್ ಆಸ್ಲ್ಲಿಕೀ ಎಕ್ಚ್ ಏಕ್ ಬಾರೀಕ್ ಖೊಲಿ ಸಯ್ತ್ ಹಾಲಾನಾಸ್ತಾನಾ, ತೆಣೆ ಹೆಣೆ ಉಬ್ಚಿಂ ಪಿಸೊಳಿಂ ಶಿವಾಯ್ ಏಕ್ ಲ್ಹಾನ್ಶೆಂ ಸುಕ್ಣೆಂ ಪರ್ಯಾಂತ್ ಪೃಥ್ವೆಚ್ಯಾ ಗಂಭೀರ್ಪಣಾಕ್ ಕಾವ್ಜೆವ್ನ್, ಕೊವ್ಳೊನ್ ಖಂಯ್ಚರ್ ಲಿಪ್ಲ್ಲೆಂ ಮ್ಹಳ್ಳೆಪರಿಂ ಆಸ್ಲ್ಲೆಂ ವಾತಾವರಣ್, ಘಡಿಯೆನ್ ಬದ್ಲೊನ್ ಯೆತಾಲೆಂ.
ಎದೊಳ್ ನಿಳ್ಶ್ಯಾ-ಧವ್ಯಾ ವರ್ಣಾನ್ ಸವ್ಕಾಸ್ ಚಮ್ಕೊನ್ ಆಸ್ಲ್ಲಿಂ ಆಕಾಸಾ ವಯ್ಲಿಂ ಮೊಡಾಂ ಕಾಳ್ಯಾ ಕಾಳ್ಯಾ ವರ್ಣಾನ್ ಬದ್ಲೊನ್, ವಾರ್ಯಾಚ್ಯಾ ಭಿರಾಂತೆನ್, ಎಕಾಮೆಕಾಕ್ ಲೊಟುನ್ ಧಾಂವ್ತಾಲಿಂ. ತೆಣೆ ಹೆಣೆ ಕಿಡಿ ಮುಯಾಂಚೊ ಆವಾಜ್, ಪಿಂರ್ಗೊಣಿ ಸುಕ್ಣಿಂ ಕಾವ್ಳೆ ಪಾಕಾಟೆ ಪಾಪ್ಡಿತ್ತ್ ಧಾಂವ್ಚೊ ಅಮ್ಚೊರ್. ಆನ್ನಿಚ್ಯಾ ಧರ್ವಡಿ ಉತ್ಸಾಹಾಕ್ ಸಾಂಗಾತ್ ದೀಂವ್ಕ್ ಲಾಗ್ಲಿಂ.
ಪೃಥ್ವಿ ಸಂತೊಸಾನ್ ನಾಚೊನ್, ಪಾವ್ಸಾಕ್ ಸ್ವಾಗತ್ ಕರುಂಕ್. ಭುಮಿ ಮಾತೆಚಿ ಫುಟ್ ಥಾಂಬಂವ್ಕ್ ಉಲ್ಲಾಸಿತ್ ಜಾತಾನಾ......
ಕಾಳ್ಜಾಂತ್ ಚರೊನ್ ಯೆಂವ್ಚೊ, ಕಾವ್ಜೆಣೆಚೊ ಥಂಡ್ ಕುಲ್ಕುಲೊ ಪಾಪುಡ್ನ್ ಸೊಡ್ನ್, ಘೊವಾಕ್ ಸೊದುನ್ ಕೊಡ್ಕ್ಯಾಕ್ ಧಾಂವ್ಲಿ ಆನ್ನಿ, ಹಾತಾಂತ್ಲೊ ಚೆಂಬು ಆಮ್ಸೊರಾನ್ ನ್ಹಾಣಿಯೆಚೆ ಪೆಂಟಾಳೆರ್ ದವರ್ನ್,
"ಆಯ್ಕಾಲೆಂಯ್ವೇ ತುವೆಂ?" ಘೊವಾಕ್ ಉದ್ದೇಶಿಲೆಂ ತಿಣೆಂ
ಮೊಡ್ತಿನ್ ಪಾಟಿಂ ಘುಂವ್ಲೊ. ಉತಾರ್ ಸುಟ್ಲೆಂ ನಾ ತಾಚೆಂ
ಪಾಲಂವ್ ಪೆಂಕ್ಟಾಕ್ ಖೊವಂವ್ಚೆ ಬಾಯ್ಲೆಕ್ಚ್ ಪಳಂವ್ಚ್ಯಾರ್ ಪಡ್ಲೊ ತೊ.
ಆತಾಂ ಹಾವೆಂ ಸಾಂಗ್ಚೆಂ ಆಯ್ಕ್. ಆನ್ನಿನ್ ಸಾಂಗ್ತಾನಾ ಮೊಡ್ತಿನ್ ಕಾವ್ಜೆಲೊ.
ಆಜ್ ಖಂಡಿತ್ ತುವೆಂ ಮ್ಹಜೆ ಸಾಂಗಾತಾ ಝುಜಾಜಾಯ್. ಮರ್ಯಾದ್ ಗೆಲಿ ವ್ಹಳ್ಯಾಕ್.....!
ಬಾಯ್ಲೆಚ್ಯಾ ಹರ್ಯೆಕಾ ಉತ್ರಾನ್, ಮೊಡ್ತಿನಿಚ್ಯಾ ಉಸ್ವಾಸಾಚೊ ವೇಗ್ ಚಡ್ತಾಲೊ. ದೊಳೆ ವ್ಹಡ್ ವ್ಹಡ್ ಉಸಾಲೆ. ಶಿವಾಯ್ ಜೀಬ್ ಹಾಲ್ಲಿ ನಾ. ವೋಂಟ್ ಉಸಾಲೆ ನಾಂತ್.
ಆಮ್ಚ್ಯಾ ಜಾಂವ್ಯಾಚೊ ಆನಿ ತುಜೆ ಏಣಿಚೊ ಆಜ್ಚ್ ವಿಚಾರ್ ಜಾಯ್ಜಯ್.
ಮೊಡ್ತಿನ್ ಭಾರೀಕ್ ಕಾಂಪೊಂಕ್ ಲಾಗ್ಲೊ.
ಮರ್ಯಾದಿ ಖಾತಿರ್ ಸಮಾಜೆಕ್ ಭಿಯೆಂವ್ಚೊ, ಆಪ್ಲೆ ’ಬಿಜ್ಲ್ಲೆ ಉವೆ’ ಸಾರ್ಕ್ಯಾ ಬಾಯ್ಲೆ ಪ್ರಾಸ್, ಉಡ್ತ್ಯಾ ಸ್ವಭಾವಾಚಿ ಏಣ್ ಕೆದಾಳಾಯ್ ಮೊಡ್ತಿನಾಕ್ ಪಸಂದ್ ಜಾತಾಲಿ. ಸಮಾಜೆಕ್ ದಿಸಾನಾತ್ಲ್ಲ್ಯಾ ಚಿಂತ್ನಾಂನಿ ಮಾತ್ರ್, ಆಪ್ಲೆ ಭಿತರ್ಲೆ ವೆಕ್ತಿತ್ವಾಚೆರ್ ತೊ ಏಣಿಚೆರ್ ತೃಪ್ತಿ ಭಗ್ತಾಲೊ. ಸಂತೊಸ್ ಪಾವ್ತಾಲೊ.
ಆಪ್ಲೆಂ ಕಡ್ವಳ್ ಬಾಯ್ಲೆನ್ ಕಶೆಂ ವಾಚ್ಲೆಂ? ಮೊಡ್ತಿನ್ ಘಡ್ಬಡ್ಲೊ.
"ಆಜ್ಚ್ ಆಮ್ಚೆ ಧುವೆಕ್ ಘರಾ ಆಪವ್ನ್ ಹಾಡ್ಯಾಂ.....!" ಘರ್ಜಾಲಿ ಆನ್ನಿ.
ಕಿತ್ಯಾಕ್ ಆನ್ನಿ? ಪಾವ್ಸ್ ಮಾತ್ಯಾರ್ ಆಸಾ. ಸಾಗ್ವಳೆಚೆಂ ಕಾಮ್ ತಾಂಗೆರ್ಯೀ ಆಸಾ. ಇತ್ಲಿಂ ವರ್ಸಾಂ ತ್ಯಾ ಚೆಡ್ವಾನ್ ಆಮ್ಚ್ಯಾ ಶೆತಾಂನಿ ಸಾರೆಂ ವಾವಯಿಲ್ಲೆಂ ಪುರೊ. ಆಮಿ ಆಳಾಂಕ್ ಆಪವ್ಯಾಂ ಆನ್ನಿ.....!" ಮೊಡ್ತಿನಿಚಾ ತಾಳ್ಯಾಂತ್ಲೆ ಧಡ್ದಡೆ ರಾವ್ಲೆ ನಾಂತ್.
"ಧರ್ತಿ ಸುಕೊನ್ ಫುಟ್ ಪಡ್ಲ್ಯಾ! ತುಕಾ ಫಕತ್ತ್ ಶೆತಾಚೆಂ ಪಡೊನ್ ಗೆಲಾಂ. ಸಾಗ್ವೊಳೆಕ್ ದಿಲ್ಲಿ ಭುಂಯ್ ಪಣ್ಗಿಲ್ ಪಡ್ಲ್ಲಿ. ತುಕಾ ಖಂಯ್ ದಿಸ್ತಾ? ನ್ಹೆಸ್ಯಾಂ..... ಆತಾಂಚ್ ವಚಾಜಾಯ್. ಹೊ ಖಂಡಿತ್ ವಿಚಾರ್ ಜಾಯ್ಜಯ್. ಪಾವ್ಸ್ ಪಡ್ಚೆ ಆದಿಂ ಜಾಯ್ಜಯ್. ರೆಸ್ಪೆರ್ ಕೆಲ್ಲೊ ಪಾದ್ರಿ, ನ್ಹಂಯ್ ತರ್ ವಿಗಾರ್, ಭಿಸ್ಪ್, ಪಾಪ್ಸಾಯ್ಬ್....., ರೆಸ್ಪೆರ್ ಕೆಲ್ಲ್ಯಾಂಕ್ ಪಾಟಿಂ ಕಾಡುಂಕ್ ಕಾಯ್ದೊ ಖಂಡಿತ್ ಆಸ್ತಲೊ."
"ನ್ಹಂಯ್ ತರ್, ಕೋಡ್ತ್ ಆಸಾ! ಇಗರ್ಜೆಂತ್ ಜಾಯ್ನಾತ್ಲ್ಲೆಂ ಕೊಡ್ತಿಂತ್ ಜಾತಾ ಜಾಲ್ಯಾರ್ ಪಳವ್ಯಾಂ. ಧರ್ಮ್-ಸಮಡ್ತ್, ಮನ್ಶಾ ಜಿವಾ ವರ್ತೆಂ ಕಿತೆಮ್ಚ್ ನ್ಹಂಯ್!"
"ಕಿತೆಂ ಉಲಯ್ತಾಯ್ ತುಂ ಆನ್ನಿ....?" ಮೊಡ್ತಿನ್ ಪಿಂರ್ಗಾಲೊ.
"ಬಾಂಯ್ತ್ಲೊ ಮಾಣ್ಕೊ ತುಂ! ಫಕತ್ತ್ ತುಜೆಂ ಘರ್....., ತುಜೊ ಗಾಂವ್...., ತುಜಿ ಮರ್ಯಾದ್...., ಇತ್ಲೆಂಚ್ ತುಕಾ!"
"ಆಪ್ಲೊ ಪೂತ್ ಹಿಜ್ಡೊ ಮ್ಹಳ್ಳೆಂ ಕಳಿತ್ ಆಸೊನ್ಯ್ ಮಂತನಾಚ್ಯಾ ಘರಾಂತ್ಲೆಂ ಮಾಣಿಕ್ ಆಮ್ಚಿ ಧುವ್. ಶಿಕ್ಪಿ ಭಲಾಯ್ಕೆವಂತ್ ಚಲಿಯೆಕ್ ಕಾಜಾರ್ ಕರುನ್ ವರ್ನ್ ಸಂಸಾರಾಕ್ ಫಟವ್ನ್, ಫಕತ್ತ್ ಶೆತಾಂನಿ ಗೊಳವ್ನ್, ಸಂತೊಸ್ ಭಗ್ಚಿ ಕಪಠಿ ಸ್ತ್ರೀಯೆಕ್ ಆನಿ ದಾದ್ಲೊಯ್ ನ್ಹಂಯ್ ಸ್ತ್ರೀಯ್ ನ್ಹಂಯ್ ಜಾಲ್ಲ್ಯಾ ಲಜ್ಮಾಂಡ್ಯಾ ಪುರುಶಾಕ್ ಪಾರ್ಕುಂಕ್ ಕಳಿತ್ ನಾತ್ಲ್ಲೊ ಬೆಪ್ಪಾ ತುಂ....!"
"ತುಜ್ಯಾ ಮರ್ಯಾದೆಕ್ ಘಾಲ್ ಮಾತ್ತಿ! ಉಘಡ್ ಹಿ ಕುತ್ತಾರಿ. ಲಾಗೊಂ ತ್ಯಾ ಮಾನಾಕ್ ಶೆಳೊ. ಸಳ್ಸಳೊ ಪಡೊಂ ಸಮಾಜೆಚ್ಯಾ ಜಿಬಾಂಕ್. ಕುಸ್ಲ್ಲೆಂ ಘಾಣೊಂಕ್ಚ್ ಜಾಯ್! ಕುಸ್ಚ್ಯಾ ಪಯ್ಲೆಂ ಆಡಾಂವ್ಕ್ ಜಾಯ್ ಶಿವಾಯ್, ಘಾಣ್ತಾನಾ ನಾಕಾಂನಿ ಬೊಟಾಂ ಚೆಪ್ಚಿಂ ನ್ಹಂಯ್. ವೊಂಕಾರೆ ಯೆತಾತ್ ಮ್ಹಣ್ ಕುಶಿಕ್ ಸರ್ಚೆಂಯ್ ನ್ಹಂಯ್. ಹಾಂಡ್ಕೊರ್ ರೆಡ್ಯಾಚೆಂ ನಾಂವ್ ವ್ಹಡ್ ಮ್ಹಳ್ಳೆಪರಿಂ, ಧವ್ಯಾ ಲುಗ್ಟಾಂತ್ ರೆವ್ಡೊನ್ ಆಸ್ಲ್ಲ್ಯಾಂಕ್, ಲ್ಹಾನ್ಸೊ ಥಿಬೊ ಪಡ್ಲ್ಯಾರ್ಯ್ ವರ್ತೊ ಆಘಾತ್ ಭಗ್ತಾ ಖರೆಂ! ಲೊಕಾಚ್ಯೊ ದಿಶ್ಟಿ ಉತ್ರಾಂ ಖೊಂಕ್ತಾನಾ, ಮಾನಸಿಕ್ ಥರಾನ್ ವಳ್ವಳ್ಚೆಂ ಪಡ್ತಾ.....!" ದೆಂವ್ಣೆರ್ ಧಾಂವ್ಚ್ಯಾ ಬಸ್ಸಾಪರಿಂ ಆನಿಚ್ಯಾ ಶೆರ್ಮಾಂವಾಕ್ ಬ್ರೇಕ್ ಲಾಗ್ಲಿ ನಾ.
ಮತಿಂತ್ಲ್ಯಾ ಯೋಜನಾಕ್ ಪಾಟ್ಲಾವ್ ಕರುನ್ ಕಾಡ್ಲ್ಲಿಂ ಪಾಂವ್ಲಾಂ, ಸಮಡ್ತಿಚ್ಯಾ ಕಾಯ್ದ್ಯಾಲಾಗಿಂ ಝುಜಾಕ್ ದೆಂವ್ಚ್ಯಾ ಇತ್ತೂನ್ಯ್ ಪಾವ್ಲ್ಲಿಂ. ಪಾಟಿಂ ಫುಡೆಂ, ಪರ್ತ್ಯಾಂ ಚಿಂತುನ್ ಮೆಟಾಂ ಕಾಡ್ಚಿಂ ಬರೆಂ ಮ್ಹಣ್ ತಿಕಾ ಜಾಗಯ್ತಾಲಿಂ, ತಿಚೆಂ ಅಂತಸ್ಕರ್ನ್ ಕುಟ್ಟುನ್ ಕುಟ್ಟುನ್ ಸಾಂಗ್ತಾಲೆಂ. ತರ್ಯ್ ತಿ ಪಾಟಿಂ ಲಕ್ಲಿ ನಾ. ತಿಚೆರ್ಚ್ ತಿಕಾ ಭರ್ವಸೊ ಆಸ್ಲಲೊ. ಧಯ್ರ್ ಆಸ್ಲ್ಲೆಂ.
ಆಪ್ಲೆ ಧುವೆಕ್ ಕಾಜಾರ್ ಕರುನ್ ದಿಲ್ಯಾ ಉಪ್ರಾಂತ್, ಜಾಂವ್ಯಾಂಕ್ ಆನಿ ಯೆಣಿಕ್ ತನ್ಕೆಕ್ ಉಭೆಂ ಕರ್ಚೆ ತಿತ್ಲೆಂ ಸಲೀಸ್ ನ್ಹಂಯ್ ಚೆಡ್ವಾಚ್ಯಾ ಘರ್ಚ್ಯಾನಿಂ. ಆಪ್ಲೆ ಧುವೆಕ್ ಕಾಜಾರ್ ಕರುನ್ ದಿಲ್ಯಾ ಘರಾಕ್ ಖಾಲ್ ಜಾವ್ನ್ಚ್ ಚಲೊಂಕ್ ಜಾಯ್ ಮ್ಹಳ್ಳೊ ಸಂಪ್ರದಾಯ್, ಜಾಂವ್ಯಾಂಚ್ಯಾ ಘರ್ಚ್ಯಾಂನಿ ಕಿತೆಂ ಸಾಂಗ್ಲ್ಲೆಪರಿಂ ತಾಣಿಂ ನಾಚಾಜಾಯ್. ನ್ಹಂಯ್ ಜಾಲ್ಯಾರ್ ಆಪ್ಲೆ ಧುವೆಕ್ ಸಂಸಾರಿಂ ಯೆಮ್ಕೊಂಡ್ ಪ್ರಾಪ್ತ್ ಜಾಂವ್ಕ್ ತಡವ್ ಲಾಗಾನಾ. ಆಪ್ಲೆ ಧುವೆಚ್ಯಾ ಸುಖಾ-ಸಂತೊಸಾ ಖಾತಿರ್ ತರ್ಯೀ ಜಾಂವ್ಯಾಚ್ಯಾ ಘರ್ಚ್ಯಾಂಕ್ ಫುಲಾಂ ಘಾಲುನ್, ಧುವೆಚ್ಯಾ ಕಾಜಾರಿ ಭೆಸಾಕ್ ಏರ್ ಪಡಾನಾಶೆಂ ಪಳಂವ್ಚೊ ಕಾಯ್ದೊ ಚೆಡುಂ ದಿಲ್ಲ್ಯಾ ಘರ್ಚ್ಯಾಂಚೊ.
ಘೊವ್-ಬಾಯ್ಲ್ ದೊಗಾಂಯ್ ನ್ಹೆಸೊನ್ ತಯಾರ್ ಜಾಲ್ಲಿಂ ಖರೆಂ. ಪುಣ್! ಸಮಸ್ಯಾಂನಿ ಭರ್ಲೆಲಿಂ ಸವಾಲಾ ಸಭಾರ್ ಆಸ್ಲ್ಲಿಂ ಕೊಣಾಲಾಗಿಂ ಪಯ್ಲೆಂ ವೆಚೆಂ? ಪಡ್ಲಾಕ್....? ಮುಡ್ಲಾಕ್.....?
ಆನ್ನಿಕ್ ಆನಿ ಮೊಡ್ತಿನಿಕ್ ಕಾಜಾರ್ ಜಾಲ್ಯಾ ಆರಂಭಾರ್, ಜಳ್ಮುಕೆ ಮಾಂಯ್ನ್ ಏಕ್ ವರಸ್ ಪರ್ಯಾಂತ್ ತಾಂಕಾಂ ಉಲಂವ್ಕ್ಯ್ ಆವ್ಕಾಸ್ ದೀಂವ್ಕ್ ನಾತ್ಲ್ಲೊ. ರಾತ್ಚೆಂ ಮೊಡಿತಿನಿಚೆಂ ಹಾಂತುಳ್ನ್ ಚಾವ್ಡೆರ್ ಜಾಲ್ಯಾರ್, ಆನ್ನಿಚೆಂ ಭಿತರ್ ನಂಡಾಂಚ್ಯಾ ಮಧೆಂ. ಹುಂಬ್ರಾರ್ ವೊಡಾ ರುಕಾಚೆಂ ಬೃಹದ್ ಮೂಳ್ ಕಶೆಂ ಸಾಸುಮಾಂಯ್ ಪರ್ತಾತಾಲಿ. ದೀಸ್ಭರ್ ಕಾಮ್. ಉಲಂವ್ಕ್ ಸೊಡ್ನ್ ಘೊವಾಚೆಂ ತೋಂಡ್ ಪಳಂವ್ಕ್ಯ್ ಆವ್ಕಾಸ್ ನಾತ್ಲ್ಲೊ.
ಉಪ್ರಾಂತ್ ಪಾಟಾಪಾಟ್ ಸಾತ್ ಜಣಾಂ ಭುರ್ಗಿಂ ಜಾಲಿಂ ಜಾಲ್ಯಾರ್ಯ್, ಖಾಸ್ಗಿ ಸಮಸ್ಯೆ ಸೆಜಾರ್ಚೆ ಮ್ಹಾತಾರೆಲಾಗಿಂ ಸಾಂಗ್ಲ್ಯಾರ್ಯೀ ಸ್ವತಾ ಘೊವಾಲಾಗಿಂ ಸಾಂಗೊಂಕ್ ಲಜ್. ತಸಲೆ ಪರಿಸ್ಥಿತಿಯೆಂತ್ ಆತಾಂ ತಿಚ್ಯಾಚ್ ಧುವೆಕ್ ಆಯಿಲ್ಲೆ ಸಂಕಶ್ಟ್ ಹ್ಯಾ ಬೆಪ್ಪಾ ಘೊವಾಲಾಗಿಂ ತಿ ಕಶಿ ಸಾಂಗ್ತೆಲಿ?
ಗುಂಡಿಯೆಕ್ ದೆಂವೊನ್ ಜಾಲ್ಲೆಂ. ಉದಾಕ್ ಥಂಡ್ ಮ್ಹಣೊನ್ ಪಾಟಿಂ ಆಯ್ಲ್ಯಾರ್ ಕಶೆಂ?
ಪಯ್ಲೆಂ ಆಪ್ಲ್ಯಾಚ್ಚ್ ಫಿರ್ಗಜ್ ಪಾದ್ರಿಕ್ ಭೆಟ್ ಕರ್ಚಿ ಆಲೊಚನ್ ಕರುನ್ ಚಲೊಂಕ್ ಲಾಗ್ಲಿಂ ತಿಂ
"ತುವೆಂಚ್ ನ್ಹಂಯ್ಗೀ ಆನ್ನಿ ಸಯ್ರಿಕ್ ಕೆಲ್ಲಿ. ಆತಾಂ ಕಿತೆಂ ಉಲಯ್ತಾಯ್ ತುಂ?"
ವಾಟೆನ್ ವೆತಾಂ ವೆತಾಂ ಮೊಡ್ತಿನ್ ಸವಾಲ್ ಕೆಲೆಂ. ತಾಕಾ ಬಾಯ್ಲೆಚೊ ಭರ್ತಾವ್ ಸಮ್ಜೊಂಕ್ ನಾತ್ಲ್ಲೊ.
"ವ್ಹಯ್! ಹಾವೆಂಚ್ ಸಯ್ರಿಕ್ ಕೆಲ್ಲಿ!" ಆನ್ನಿ ಘರ್ಜಾಲಿ. ತಿಚ್ಯಾ ಚಿಂತ್ನಾಂಚೆಮ್ ರೋದ್ ದೋನ್ ವರ್ಸಾಂ ಆದ್ಲ್ಯಾ ಘಡಿತಾಂಕ್ ಧೊಳಿಲಾಗ್ಲೆಂ.
ಸೆಜಾರಿ ಫಿರ್ಗಜೆಂತ್ಲ್ಯಾ ಆಪ್ಲ್ಯಾ ದಾಯ್ಜಾಂಗೆರ್, ಫಿರ್ಗಜ್ ಫೆಸ್ತಾಕ್ ವೆತಾನಾ, ಪಿ.ಯು. ಸಿ. ಸಂಪವ್ನ್ ಘರಾಚ್ ಆಸ್ಲ್ಲೆ ಆಪ್ಲೆ ಧುವೆಕ್ಯ್ ತಿ ಆಪವ್ನ್ ವರುನ್ ಗೆಲ್ಲಿ. ಆನಿ ಥಂಯ್ಚರ್ ಫೆಸ್ತಾಕ್ ಆಯಿಲ್ಲ್ಯಾ ದುಜೆಪಿನಾಚಿ ತಿಕಾ ವಳಕ್ ಜಾಲ್ಲಿ. ಆನ್ನಿಚ್ಯಾ ಸೊಬಿತ್ತ್ ಪುಡ್ಪುಡೀತ್ತ್ ಶಿಕ್ಪಿ ಧುವೆಕ್ ಪಳವ್ನ್, ಆಪ್ಲ್ಯಾ ಎಕಾಚ್ ಪುತಾಚ್ಯಾ ಕಾಜಾರಾಚಿ ಖುಶಿ ತಿಣೆ ಆನ್ನಿ ಮುಕಾರ್ ಪಾತ್ಳಾಯಿಲ್ಲಿ.
ಸಾಸುಮಾಂಯ್ನ್ ಸುನೆಕ್ ಪಯ್ಲಿಚ್ ಪಸಂದ್ ಕೆಲ್ಯಾ ಮ್ಹಣ್ತಚ್ ಸಯ್ರಿಕ್ ಘಟ್ ಜಾಂವ್ಕ್ ತಡವ್ ಜಾಲೊ ನಾ. ಗೊರ್ಯಾ ಕಾತಿಚೊ ಧಡಂಗ್ ಯುವಕ್, ಧಾರಾಳ್ ಸಾಗ್ವಳಿ ಆಸ್ಲ್ಲೆಂ ಅನ್ಕೂಲ್ವಂತ್ ಘರಾಣೆಂ. ಆಸ್ತಿಚ್ಯಾ ಹಕ್ಕಾಕ್ ದುಸ್ರಿ ತಕ್ಲಿ ನಾ ಮ್ಹಣ್ತಚ್ ಆನ್ನಿಗೆಲ್ಯಾ ಘರ್ಚ್ಯಾಂಕ್ ದೌಲತೆನ್ ಸಂಸಾರ್ ದಿಸಾನಾ ಜಾಲೊ.
ದೋತ್-ದೆಣೆಂ ಕಾಂಯ್ಚ್ ನಾಕಾ ಮ್ಹಳ್ಯಾರ್ಯ್ ಮಾಲ್ಗಡೆಂ ಧುವೆಕ್ ಜಾತಾ ತಿತ್ಲ್ಯಾ ಬಾಂಗಾರಾನ್ ದಾಳುನ್-ನೆಟವ್ನ್ ಘೊವಾಚ್ಯಾ ಘರಾ ದಾಡುಂಕ್ ಮೊಡ್ತಿನ್ ದಂಪತಿನ್ ಸುರಾತ್ ಕೆಲೊ ನಾ. ಮೊಶಿಕ್ ಘಾಲ್ಲಿ ಪೇಂಡ್ ಜಾವ್ನ್ ಆಸ್ಲ್ಲೆಂ ತಾಂಚೆಂ ಚಿಂತಾಪ್.
ಆನ್ನಿಚೆ ಮಾತಿಂತ್ ತವಳ್ ತವಳ್ ಉಟ್ಲ್ಲಿಂ ಧುವೆಚ್ಯಾ ಫುಡಾರಾಚೆ ಆಶೆಚಿಂ ರಾವ್ಳೆರಾಂ ದೀಸ್ ವೆತಾಂ ವೆತಾಂ ದುಬಾವಾಚ್ಯಾ ಮುರ್ಮುರ್ಯಾಂನಿ
ಪುರೊನ್ ವೆತಾಲಿಂ. ಆವಯ್ ಜಾಲ್ಲೆ ತಿಕಾ ಧುವ್ ಆಪ್ಣಾ ಥಾವ್ನ್ ಕಿತೆಂ ತರ್ಯೀ ಲಿಪಂವ್ಚೆಂ ಪ್ರಯತ್ನ್ ಕರ್ತಾ ಮ್ಹಳ್ಳೆಂ ತಿಚೆಂ ಮುಖಮಳ್ ದೆಕ್ತಾನಾ ಸುಸ್ತಾತಾಲೆಂ.
ಮೀಟ್ ಆನಿ ಖೊಲೊ ಘೆವ್ನ್ ಮ್ಹಳ್ಳೆಪರಿಂ ಪಯ್ಶಿಲ್ಯಾ, ವಳ್ಕೆ ಭಾಯ್ಲ್ಯಾ ಕುಟ್ಮಾಂತ್ಲಿ ಸಯ್ರಿಕ್ ಆಪ್ಲ್ಯಾ ಪುತಾಕ್ ರಾಕೊನ್ ಆಸ್ಲ್ಲ್ಯಾ ದುಜೆಪಿನಾಕ್, ಪಾಂಯಾಂ ಮುಳಾಂತ್ ದಿರ್ವೆಂ ವೊತ್ಲ್ಲೊ ಅನುಭವ್ ಜಾಲ್ಲೊ. ಆಪ್ಲ್ಯಾ ನಪುಂಸಕ್ ಪುತಾಕ್ ಸಯ್ರಿಕ್ ಸೊದುಂಕ್ ಸಯ್ರಿಕೆಚ್ಯಾ ಮಾಲ್ಯಾಲಾಗಿಂ ವಾ ಕುಟ್ಚಾದಾರಾಲಾಗಿಂ ಸಾಂಗ್ಚ್ಯಾ ತಿತ್ಲೆಂ ಧಯ್ರ್ ತಿಚೆಲಾಗಿಂ ನಾತ್ಲ್ಲೆಂ.
ಆಪ್ಲೆಂ ಕಾಜಾರ್ ಜಾಲ್ಲೆಂಚ್ ಘೊವಾ ಸಾಂಗಾತಾ ಬೊಂಬಯ್ ಗೆಲ್ಲಿ ದುಜೆಪಿನ್ ಚೆರ್ಕ್ಯಾಕ್ ಪಾಂಚ್ ವರ್ಸಾಂ ಭರ್ತಾನಾಂಚ್ ಗಾಂವಾಕ್ ದೆಂವ್ಲ್ಲ್ಯಾನ್ ಆವಯ್-ಬಾಪಯ್ ಶಿವಾಯ್ ಹೆರಾಂಕ್ ಹೊ ನಿಶ್ಟುರ್ ಘುಟ್ ಕಳಿತ್ ನಾತ್ಲ್ಲೊ. ತರ್ಯ್...
ಖಾಲಿ-ಪೋಲಿ ಕುಟ್ಮಾಂತ್ಲಿ, ಉಣ್ಯಾ ಶಿಕ್ಪಾಚಿ ಚಲಿ ಹಾಡ್ಲ್ಯಾರ್ ಲಜ್ ಮರ್ಯಾದ್ ನಾಸ್ತಾನಾ ಅಪ್ಲ್ಯಾ ಪುತಾಚೆಂ ಭಾಂಡೆಂ ಫುಟೊನ್ ರಸ್ತ್ಯಾರ್ ಘಾಲಿತ್ ಮ್ಹಳ್ಳೆ ಕಾವ್ಜೆಣೆನ್ ಘರ್ಚ್ಯಾ ಶೆತಾಚ್ಯಾ ಕಾಮಾನಿ ಆಪ್ಲ್ಯಾ ಪುತಾಕ್ ನಿರಂತರ್ ಸಾಂಗಾತ್ ದೀಂವ್ಕ್ ಆನಿ ಆಪ್ಲ್ಯಾ ಘರ್ಚಿ ಮಾನ್ ಮರ್ಯಾದ್ ರಾಕೊನ್ ವರುಂಕ್ ಮರ್ಯಾದೆಚ್ಯಾ ಕುಟ್ಮಾಂತ್ಲಿ ಮಾನೆಸ್ತ್ ಚಲಿ ಸುನ್ ಜಾವ್ನ್ ತಿಕಾ ಜಾಯ್ ಆಸ್ಲ್ಲಿ.
ಶಿಕ್ಪಿ ಚಲಿ ಆಪ್ಲ್ಯಾ ಅಂತಸ್ಥಾ ಖಾತಿರ್ ಹೊ ಕೀಳ್ ಘುಟ್ ಖಂಡಿತ್ ಜಾವ್ಯ್ಯ್ ಭಾಯ್ರ್ ಘಾಲ್ಚಿ ನಾ ಮ್ಹಳ್ಳೊ ತಿಚೊ ಭರ್ವಸೊ.
ದುಜೆಪಿನಾಚ್ಯಾ ಪುತಾಚೆಂ ಕಾಜಾರ್. ಮೊಡ್ತಿನಿಚ್ಯಾ ಧುವೆಲಾಗಿಂ ಜಾವ್ನ್ ವರ್ಸಾಂ ದೋನ್ ಉತ್ರಾಲ್ಲಿಂ ದೆಖ್ಚೆ ದಿಶ್ಟಿಕ್ ಹೆಂ ಏಕ್ ಸಂತೊಸ್ಬರಿತ್, ಆದರ್ಶ್ ಜೊಡೆಂ. ಸಾಸುಮಾಂಯ್ಕ್ ಸುನ್ ಮ್ಹಳ್ಯಾರ್..... ಧುವೆ ವರ್ತೊ ಮೋಗ್!
ಆಪ್ಲ್ಯಾ ಘರ್ಚೊ ಘುಟ್ ಪೆಲ್ಯಾ ಮಾಡಾಮುಳಾಕ್ ವೊತ್ಲ್ಲೆಂ ದೂದ್ ಜಾಯ್ತ್ ಮ್ಹಳ್ಳ್ಯಾ ಭಿರಾಂತೆಚೊ ಭಾಯ್ಲೊ ಘುರ್ತ್ ಮ್ಹಳ್ಳೆಂ ಕಿತ್ಯಾ ಜಣಾಂಕ್ ಕಳಿತ್ ಆಸಾತ್?
ಪುಣ್! ಶಿಕ್ಪಿ ಚಲಿ ಜಾವ್ನ್ ಆಸ್ಚೆ ಆನ್ನಿಚ್ಯಾ ಧುವೆನ್ ಆಪ್ಲ್ಯಾ ಘೊವಾಚೊ ಘುಟ್ ಪಾರ್ಕಿಲ್ಲೊ. ಸಾಸುಮಾಂಯ್ಚೆ ಒಪ್ಪಸಾಲೆ ತಿಕಾ ಕಳ್ಲ್ಲೆ. ಪುಶ್ಟ್ ಕುಡಿಚ್ಯಾ ಆಪ್ಲ್ಯಾ ಸುಂದರ್ ಪತಿಚಿ ಹಕೀಗತ್ ತಿಣೆ ಪಾರ್ಕಿಲ್ಲಿ. ದಾಕ್ತೆರಾಲಾಗಿಂ ವಚೊನ್ ಪರಿಹಾರ್ ಸೊದ್ಯಾಂ ಮ್ಹಳ್ಳೆ ತಿಚೆ ವಿನತೆಕ್ ಘೊವಾನ್ ಮರ್ಯಾದೆಚೆಂ ನೀಬ್ ದೀವ್ನ್ ನಿರಾಕರ್ಸಿತಾನಾ ತಿ ನಿರಾಶಿ ಜಾಲ್ಲಿ. ತಿಚಿ ಆದ್ಲಿ ಕಳಾ ದಿಸಾಂದೀಸ್ ಬದ್ಲಾತ್ತ್ ವೆತಾಲಿ. ತರ್ಯ್ ದೆಖ್ತೆಲ್ಯಾಂಕ್ ಏಕ್ ಆದರ್ಶ್ ಜೊಡೆಂ ತೆಂ ಘರ್ಚೊ ಘುಟ್ ಭಾಯ್ರ್ ಪಡಾನಾತ್ಲ್ಲೊ.
ಆನಿ ಪಡ್ಲ್ಯಾರ್? ಪಲಿತಾಂಶ್ ಬರ್ಯಾನ್ ಜಾಣಾ ಆಸ್ಲ್ಲಿ ತಿ ಶಿಕ್ಪಿ ಚಲಿ.
ಘೊವಾನ್ ಆಪ್ಲ್ಯಾ ಬಾಯ್ಲೆಲಾಗಿಂ ಜಲ್ಮಾನ್ ಆಪುಣ್ ಹಿಜ್ಡೊ ಮ್ಹಳ್ಳೊ ಘುಟ್ ಫಡ್ಲ್ಲೊ ತೊ ಸಾಸುಮಾಂಯ್ಕ್ ಕಳಿತ್ ನಾತ್ಲ್ಲಿ ಸಂಗತ್. ತರ್ಯ್ ಸಾಸುಮಾಂಯ್ ಬದ್ದ್ ವಿರೋದ್ ಜಾವ್ನ್ ಆಸ್ಲ್ಲಿ ಹ್ಯಾ ವಾಕ್ಮೂಲಾಕ್.
ಬಾಯ್ಲೆಚ್ಯಾ ವಿಚಂತ್ಚಿ ವತ್ತಾಯ್ ಸೊಸುಂಕ್ ಆಸಾದ್ಯ್ ಜಾತಾನಾ, ತ್ಯಾ ದೀಸ್ ಪುತಾನ್ ಹಕೀಗತ್ ಆವಯ್ಕ್ ಕಳಯ್ತಾನಾ, ವ್ಹಡ್ಲಿ ರಂಬಾರೂಟ್ಚ್ ಜಾಲ್ಲಿ ತ್ಯಾ ಘರಾಂತ್. ಖರೆಂ ಸತ್ ಉಜ್ವಾಡಾಕ್ ಯೆಂವ್ಚೆಂ ಕೀರ್ಣ್ ಫಾಂಕ್ತಾನಾ, ಸಲ್ವಣೆಚೆಂ ಜಾಳ್ ಉಸವ್ನ್, ಥಳಾಚೆರ್ ಪಡೊಂಕ್ ತಯಾರ್ ಜಾತಾನಾ,
ಪೃಥಮಾರ್ ಮಾರ್ಲ್ಲೆ ಎಕೆ ಫಟಿ ಖಾತಿರ್, ಮನಿಸ್ ಹಜಾರ್ ಫಟಿಂಚಿ ಶಿಂಕಳ್ಚ್ ಘಡುಂಕ್ ಸುರ್ವಾತಿನಾ. ಕಿತ್ಲ್ಯಾ ಮೊಗಾಚ್ಯಾ ಮನ್ಶ್ಯಾಂಕ್ಯ್ ಧಮ್ಕಾಂವ್ಚೆಂ ಬೆಶ್ಟಾವ್ಣ್ಯಾನ್ ಥಂಡ್ ಕರ್ಚೆಂ ಪ್ರಯತ್ನ್ ಕರ್ತಾ. ಮೊಗಾಚೆಂ ಸಯ್ಲಾಪಾಚೆಂ ಮಹತ್ವ್ ಸಮ್ಜೊಂಚೆಂಯ್ ಥಂಯ್ಚರ್ಚ್.
ಸೊರ್ಮುಣಾಂತ್ಲೊ ಇಂಗ್ಳೊ ಕಿತ್ಲೊ ತೇಂಪ್ ಧಾಂಪುನ್ ದವರ್ಯೆತ್?
ಆಪ್ಲೆ ಗರ್ಜೆಕ್ ಗಳ್ಸುಂಚ್ಯಾಕ್ ಕರ್ಚೊ ಕಪಠಿ ಮೋಗ್ ಆನ್ ಖರ್ಯಾ ಮೊಗಾಚೊ ವ್ಯಾತ್ಯಾಸ್ ತ್ಯಾ ದಿಸಾ ತಿ ಘರ್ಚಿ ಸುನ್ ಸಮ್ಜಾಲ್ಲಿ.
ಹೊ ಸುಂರ್ಗಾರಾಯಿಲ್ಲೊ ಮೋಗ್ ಫಕತ್ತ್ ಚುಕಿ ಲಿಪಂವ್ಚ್ಯಾಕ್. ಲೊಂಕ್ಡಾವಯ್ಲ್ಯಾ ಥಳ್ತಳ್ಚಿ ಬಾಂಗ್ರಾ ವೋಪ್ ಮ್ಹಣೊನ್.
ಉಪ್ರಾಂತ್ ತಿಣೆ ವೇಳ್ ವಿಭಾಡ್ಲೊ ನಾ.
ದೋನ್ ವರ್ಸಾಂ ಥಾವ್ನ್ ಸಾಂಬಾಳ್ನ್ ಮುರ್ಮುರ್ಯಾ ಭಿತರ್ ದಾಂಪುನ್ ವೆಲ್ಲೊ ಹೊ ಘುಟ್ ಧುವೆನ್ ಆವಯ್ಕ್ ಕಳಯ್ಲೊ.
ಹ್ಯಾ ಮೊಗಾಚ್ಯಾ ಕುಟ್ಮಾಚಿ ವೋಪ್ ಸೆಜಾರ್ಯಾಂ ಮುಕಾರ್ ಸವ್ಕಾಸ್ ಜರೊಂಕ್ ಲಾಗೊನ್, ದುಭಾವಾಚೆಂ ಕಿಠಾಳ್ ವಾತಾವರಣಾಂತ್ ನಾಚ್ ಕರ್ತಾನಾಂಚ್ ದುಜೆಪಿನಾಚ್ಯೊ ಹಿಕ್ಮತ್ಯೊ ಆರಂಬ್ಲ್ಯೊ.
ಕಾಜಾರ್ ಜಾವ್ನ್ ಜಾತಾತ್ ದೋನ್ ವರ್ಸಾಂ. ಎದೊಳ್ಯ್ ಭುರ್ಗೆಂ ಜಾಂವ್ಕ್ ನಾ ಮ್ಹಣೊನ್ ಹೆ ಶಿಕ್ಪಿ ಲಜ್ಮಾಂಡಿ ಬಾಯ್ಲ್ ಮ್ಹಜ್ಯಾ ಪುತಾಕ್ ದುರ್ಸೊಂಕ್ ಲಾಗ್ಲ್ಯಾ. ಕಸಲೊ ವೋರ್ ಹಾಬಾ ಹೊ! ಸೆಜಾರ್ಯ್ ಶಿಕ್ಪಿ ಸುನೆಕ್ಚ್ ದುರ್ಸೊನ್ ಮಾನ್ ಮಾಣ್ಸುಗಿ ಪಾತಕ್ ಸ್ಕಾಂದಲ್ ಉಸ್ಪೊಂಕ್ ಲಾಗ್ತಾನಾ......
ಆನ್ನಿ ನಿತಿ ಖಾತಿರ್ ಇಗರ್ಜ್ಮಾತೆಚಿಂ ಮೆಟಾಂ ಚಡಾಲಾಗ್ಲಿ. ಆಪ್ಲೆ ಮಾಲ್ಗಡ್ಯೆ ಧುವೆಚ್ಯಾ ಘೊವಾಚಾ ಘರ್ಚ್ಯೊ ರಾತ್ರಿ ಕದ್ವಳೊನ್ ವೆಚ್ಯೊ ತಿಚ್ಯಾ ಹರ್ದ್ಯಾ ಗುಡಾಕ್ ಸಲ್ವಣೆಚೆ ಗುಮ್ಸೆ ದೀಂವ್ಕ್ ಲಾಗ್ತಾನಾ..... ಸ್ವತಾಹ ಥಂಯ್ ಧಯ್ರ್ ಭರೊನ್ ಘೆವ್ನ್ ಮರ್ಯಾದೀಚ್ಯಾ ಆಪ್ಲ್ಯಾ ಬೆಪ್ಪಾ ಘೊವಾಕ್ ಘೆವ್ನ್, ರೆಸ್ಪೆರ್ ಕೆಲ್ಲ್ಯಾ ಫಿರ್ಗಜ್ ವಿಗಾರಾಚ್ಯಾ ಪಾಂಯಾಲಾಗಿಂ ತಿ ಹಾಜರ್ ಜಾಲ್ಲಿ.
ರಸ್ತ್ಯಾರ್ ಚಲೊನ್ ವೆತಾನಾ ಲಜ್ ಸಾಂಡುನ್ ಮ್ಹಳ್ಳೆಪರಿಂ ಧುವೆಚ್ಯಾ ಲಗ್ನಾ ಜಿವಿತಾಚಿ ಖರಿ ಗಜಾಲ್ ಘೊವಾಕ್ ತಿಣೆ ವಿವರ್ಸಿಲಿ. ತರ್ಯ್ ಕಪಾಲಾರ್ ಮಿರಿಯೊ ಘಾಲುನ್ ತೊಂಡಾಂತ್ ಆವಾಳೆ ಭರುನ್ ವಿಗಾರಾ ಮುಕಾರ್ ನಮೃತೆನ್ ಸಾಂತಿಪಣ್ ಪಾಂಗುರ್ನ್ ಬಸ್ಲೆಲ್ಯಾ ತಾಚೆರ್ ತಾತ್ಸಾರಾಚಿ ಏಕ್ ನದರ್ ಮಾರುನ್, ಆಯಿಲ್ಲಿ ಗರ್ಜ್ ವಿಗಾರಾ ಮುಕಾರ್ ಆನ್ನಿನ್ಚ್ ಉತ್ರಾಯ್ಲಿ.
ದೇವ್ ಭಿರಾಂತೆಚ್ಯಾ ನಿಸ್ಕಳ್ ಚಿಂತ್ನಾಂಚಾ ವಿಗಾರ್ ಬಾಪಾನ್ ಮಾತ್ರ್ ಎಕೆ ಸ್ತ್ರೀಯೆನ್ ಹಿ ಕೇಜ್ ವಿವರ್ಸಿತಾನಾ ಆಯ್ಕೊನ್ ಹರ್ದ್ಯಾರ್ ಏಕ್ ಖುರಿಸ್ ವೊಡುನ್, ತಾಳೊ ಸದೀಲ್ ಕರುನ್ ಸ್ಕಾಂದಲಾಚೆಂ ಮಹಾಪಾತಕ್ ಕೆಲ್ಲ್ಯಾ ಜೆಜುಕ್ರಿಸ್ತಾಚ್ಯಾ ಕಾಳಾರ್ ಮರಿ ಮಗ್ದೆಲಿನಾಕ್ ದೆಖ್ಲ್ಲೆ ತಿತ್ಲೆಯ್ ಹಿಮ್ಸಾಣೆಚಿ ದೀಶ್ಟ್ ಆನ್ನಿಚೆರ್ ಖಂಚಯ್ಲಿ.
"ಇತ್ಲ್ಯಾ ಮರ್ಯಾದೆಚ್ಯಾ ಕುಟ್ಮಾಂತ್ಲಿಂ ಮನ್ಶ್ಯಾಂ ತುಮಿಂ..... ಕಿತೆಂ ತುಮಿ ಸಾಂಗೊಂಕ್ ಚಿಂತಾತ್? ಲಜ್ ಭೊಗಾನಾ ತುಕಾ! ಏಕ್ ಸ್ತ್ರೀ ಜಾವ್ನ್ ಹೆಂ ಪಿತಿಸ್ಪೊಣ್ ಉಲಂವ್ಕ್!" ದಾದ್ಲೊ ಮೊಡ್ತಿನಿಚ್ಯಾ ವದನಾರ್ ದೆಖೊನ್ ಘರ್ಜಾಲೊ ವಿಗಾರ್.
ಹೊ ವಿಶಯ್ ದಾದ್ಲ್ಯಾಂನಿ ಮಾತ್ರ್ ಉಲಂವ್ಕ್ ಫಾವೊ ಜಾಲ್ಲೊ ಮ್ಹಳ್ಳ್ಯಾ ಅರ್ಥಾರ್.
"ಮರ್ಯಾದ್....! ಫಕತ್ತ್ ಮರ್ಯಾದೆಚೆಂ ಮಾತ್ರ್ ಸವಾಲ್ ನ್ಹಂಯ್ ಫಾದರ್ ಹೆಂ. ಹ್ಯಾ ಕಾಜಾರಾಂತ್ ಧಖೊ ಜಾಲಾ!" ದಾಕ್ಶೆವ್ನ್ ದಾಕ್ಶೆವ್ನ್ ಆನ್ನಿಚ್ ಪಿಂರ್ಗಾಲಿ.
"ಕಾಜಾರಾಂತ್ ಕಾಜಾರಾಂತ್ ಧಗೊ ಜಾಲಾ ಮ್ಹಣ್ ಆತಾಂ ಕಳ್ಳೆಂ ತುಮ್ಕಾಂ? ಪಯ್ಲೆಂ ಖಂಯ್ ತುಮಿಂ? ಜೀವ್ ನಾತ್ಲ್ಲ್ಯಾತ್? ಆತಾಂ ತುಮ್ಚಿಂ ನಾಪಾಸ್ ದುರಾಂ ಹಾಡುನ್ ಮ್ಹಜೆ ಸಾಮ್ಕಾರ್ ಆಯ್ಲ್ಯಾತ್.......!?"
"ಕಾಜಾರ್ ಜಾವ್ನ್ ದೋನ್ ವರ್ಸಾಂ ಜಾತಾನಾಚ್, ಧುವ್ ಗುರ್ವಾರ್ ಜಾಂವ್ಕ್ ನಾ ಮ್ಹಣ್ ಧುವೆ-ಜಾಂವ್ಯಾಂಕ್ ದಾಕ್ತೆರಾ ಸರ್ಶಿನ್ ಆಪವ್ನ್ ವರ್ಚೆಂ ಸೊಡುನ್, ಪಾದ್ರಿಲಾಗಿಂ ದುರಾಂ ಹಾಡ್ಚಿಂ......! ಮ್ಹಜ್ಯಾ ಭೆಸಾಂತ್ಚ್ ಪ್ರಥಮ್ ಹೆಂ......!"
"ನಾತ್ರಾಂ ಭುರ್ಗ್ಯಾಂಚೊ ವಿಶಯ್ ಹೊ ನ್ಹಂಯ್ ಪಾದ್ರ್ಯಾಬಾ....! ತುಮ್ಕಾಂ ಕಿತ್ಯಾಕ್ ಸಮ್ಜಾನಾ? ತ್ಯಾ ದಾದ್ಲ್ಯಾ ಥಂಯ್ ಭುರ್ಗಿಂ ಉತ್ಪನ್ನ್ ಕರ್ಚಿ ಸಕತ್ಚ್ ನ್ಹಂಯ್. ಕಾಜಾರಾಚಿ ಕರ್ನಿ ಇಂಟರ್ ಕೋರ್ಸ್ ಆದಾರ್ಚಿ ಸಕತ್ಯ್ ನಾ. ತೊ ಹಿಜ್ಡೊ!"
ಆನ್ನಿಚಿಂ ಉತ್ರಾಂ ಆಯ್ಕೊನ್ ವಿಗಾರ್ ಆನಿ ಮೊಡ್ತಿನ್ ಘಡ್ಗಡೊ ಮಾರ್ಲ್ಲ್ಯಾ ಜಿನ್ಶಿಂ ಉಡೊನ್ ಪಡ್ಲೆ.
"ಹೆಂ ತುಕಾ ಕಶೆಂ ಕಳ್ಳೆಂ?" ಖುಬಾಳ್ಳೊ ವಿಗಾರ್. "ತುಜ್ಯಾ ಧುವೆನ್ ಸಾಂಗ್ಲೆಂ....? ತಿಕಾಯ್ ನಾ ಲಜ್...!"
ವಿಗಾರಾಚ್ಯಾ ಸವಾಲಾಂನಿ ಆನ್ನಿಚೆ ಕುಡಿಂತ್ ಧಯ್ರ್ ಆನಿ ಹಟ್ಟ್ ಚಡೊನ್ಚ್ ವೆತಾಲೆಂ.
"ಧುವೆನ್ ಆವಯ್ಲಾಗಿಂ ನ್ಹಂಯ್ ಆಸ್ತಾಂ ಆನಿ ಕೊಣಾಲಾಗಿಂ ಸಾಂಗ್ಚೆಂ ಫಾದರ್....? ಸಾಂಗ್ಲ್ಯಾರ್ ನ್ಹಂಯ್ವೇ ಕಳ್ಚೆಂ!"
"ಆತಾಂಚಿ ಪಿಳ್ಗಿ ಬಾಬಾ ಹಿ. ಆತಾಂಚೊ ಸಂಸಾರ್. ಚೆಡ್ವಾಂಚೆ ಜಾತಿಕ್ ಚಡ್ತಿಕ್ ಶಿಕಾಪ್ ದಿಲ್ಯಾರ್ ಜಾಂವ್ಚಿ ಆವಸ್ಥಾ ಹಿಚ್!" ವಿಗಾರಾನ್ ದೋನ್ ಪಾವ್ಟಿಂ ತಕ್ಲೆರ್ ಹಾತ್ ಮಾರ್ಲೊ. "ತುಮ್ಕಾಂ ತಕ್ಲಿ ಸಮಾ ನಾ. ತ್ಯಾ ಪಿಶ್ಯಾ ಚೆಡ್ವಾಚೆಂ ಆಯ್ಕೊನ್, ಹಿ ಕೇಜ್ ಮ್ಹಜೆಲಾಗಿಂ ಹಾಡುನ್ ಆಯ್ಲ್ಯಾತ್. ಇತ್ಲ್ಯಾರ್ಚ್ ಆಕೇರ್ ಕರ್ ಹೆಂ ಭುರ್ಗೆಂಪಣ್.....! ಮುಕಾರ್ ಪಾವ್ಶಿ...., ಪೋಲಿಸ್, ಸ್ಟೇಶನ್. ಕೋಡ್ತ್ ಮ್ಹಣ್ ಸಂಸಾರಾಕ್ ಹಾಸೊಂಕ್ ಕರ್ನ್, ಚೆಡ್ವಾ ಸಾಂಗಾತಾ ತುಮಿಂಯ್ ಬುರಾಕಾಚೆ ಕಟ್ಟೆಂತ್ ನಾಕ್ ಬುಡವ್ನ್ ಮೊರಾಜಾಯ್ ಪಡಾತ್!"
"ಕಿತ್ಲೆಶ್ಯಾ ಕುಟ್ಮಾಂನಿ ಭುರ್ಗ್ಯಾಂಚಿ ಸಂತತ್ ನಾಸ್ತಾಂ ’ವಾಂಜ್’ ಮ್ಹಳ್ಳೆಂ ಭಿರುದ್ ಘೆವ್ನ್ ಸ್ತ್ರೀ ಜಿಯೆಂವ್ಕ್ ನಾ? ತುಂ ಮ್ಹಣ್ತಾಯ್ ಕಾಜಾರಾಚಿ ಕರ್ನಿ...! ಆಮಿ ಕಿತೆಂ ನಾಂವ್? ಕಿತ್ಲೆಶ್ಯೊ ಮಾದ್ರಿ ಸ್ತ್ರೀಯೊ ನಾಂತ್? ಕಿತ್ಲಿಶಿಂ ಜಣಾಂ ಆಂಕ್ವಾರ್ ಉರೊನ್ ಜಿಯೆನಾಂತ್? ತುಜೆ ಧುವೆಕ್ಚ್ ಕಿತೆಂ ಹೊ ಹೊರ್ಬೊಸ್?"
ವಿಗಾರಾಚ್ಯಾ ಉತ್ರಾಂನಿ ಆನ್ನಿಚೆಂ ರಗಾತ್ ಸಳ್ಸಳ್ಳೊ ಅನುಭವ್ ಜಾವ್ನ್ ತಿ ಕಾಂಪ್ತಾಲಿ. ತರ್ಯೀ ಕೊಯ್ತೆಚಿ ಧಾರ್ ತಿಚೆ ಮುಟಿಂತ್ ಆಸಾ ಮ್ಹಣ್ಚ್, ಸಮಾಧಾನ್ ತಿಣೆಂಚ್ ಸಾಂಬಾಳ್ಚಿ ಗರ್ಜ್ ಆಸ್ಲ್ಲಿ. ಪುಣ್! ಸಲ್ವಣಿ ಆಪ್ಣಾಂವ್ಕ್ ತಿಕಾ ಖಂಡಿತ್ ನಾಕಾ ಆಸ್ಲೆಂ.
"ಆಂಕ್ವಾರ್ ರಾಂವ್ಚೆಂ ಸವಾಲ್ ವಿಂಗಡ್ ಫಾದರ್! ಮಾದ್ರಿಂತ್ ವೆಚೆಂ, ಮಾದ್ರಿಂತ್ ವಚೊನ್ ದೆವಾಚಿ ಚಾಕ್ರಿ ಕರ್ಚಿ ತರ್, ಕಾಜಾರ್ ಕರ್ನ್ ದೀವ್ನ್ ಘೊವಾಚ್ಯಾ ಘರಾಂತ್ ಫಕತ್ತ್ ಗಸ್ಟೊ ಕಾಡುಂಕ್ ಕಿತ್ಯಾಕ್ ದಾಡಿಜಾಯ್?"
"ಹ್ಯಾ ಗರ್ಜೆ ಭಾಯ್ಲ್ಯಾ ವಿಧಾನಾ ಪ್ರಾಸ್, ಆಮ್ಕಾಂ ನೀತ್ ಜಾಯ್ ಫಾದರ್! ನೀತ್, ಕೋಡ್ತ್, ಕಚೇರ್ ಜಾಲ್ಯಾರ್ಯ್ ಹಾಂವ್ ಸೊಡ್ಚಿಂ ನಾ. ಹ್ಯಾ ಧಗಲ್ಬಾಜಿ ಘಟನಾಕ್ ನೀತ್ ಲಾಭ್ತಾ? ವಾ ನಾ? ತೆಂ ಹಾಂವ್ ಪಳವ್ನ್ ಘೆತೆಲಿಂ!"
"ದಾದ್ಲೊ ಮೊಣ್ಕ್ಯಾ ದೆಂವ್ಚಾರಾಪರಿಂ ಫಾತ್ರಾಚಿ ಮೂರ್ತಿ ಜಾಲಾ. ಆನಿ ಹಿ ಸಾದಿ ಸ್ತ್ರೀ ಇತ್ಲಿ ಹುಳ್ವುಳ್ತಾನಾ....." ವಿಗಾರಾಚ್ಯಾ ಸ್ವಾಭಿಮಾನಾಕ್ಚ್ ಹಾಲವ್ನ್ ಜಾಗಯಿಲ್ಲ್ಯಾ ಪರಿಂ ಭಗ್ಲೆಂ. ಖಂಯ್ ಥಾವ್ನ್ಗೀ ಉತ್ಪನ್ನ್ ಜಾಲ್ಲೆ ಸಕ್ತೆನ್ ತೊ ಉಟ್ಲೊ.
ಆನಿ ಮೊಡ್ತಿನಿಕ್ ಉದ್ದೇಶುನ್,
"ತುಂ ಕಿತೆಂ ಮ್ಹಣ್ತಾಯ್ಗಾ....?"
"ತುಜಿ ಬಾಯ್ಲ್ ಇತ್ಲಿ ಮುಕಾರ್ ಧಾಂವ್ತಾನಾ..... ಮ್ಹಾಕಾ ಹಿಚೆ ಸಾಂಗಾತಾ ಝುಜಾಕ್ ದೆಂವ್ಚೆಂಚ್ ಪಡ್ತಾ!"
ಉಪ್ರಾಂತ್ ವಿಗಾರ್ ಪೊನಾಲಾಗಿಂ ಚಮ್ಕಾಲೊಂ.
ಆನ್ನಿಚ್ಯಾ ಧುವೆಕ್ ಕಾಜಾರ್ ಕರುನ್ ದಿಲ್ಲ್ಯಾ ಪಿರ್ಗಜ್ ವಿಗಾರಾಲಾಗಿಂ ಕಿತೆಂಗೀ ಉಲವ್ನ್, ತಿಂ ತೆಗಾಂಯ್ ಚೆಡ್ಯಾಚೆ ಪಿರ್ಗಜೆಕ್ ಪಾವ್ತಾನಾ ಧನ್ಪಾರ್ ಜಾಲ್ಲೊ. ಪಿರ್ಗಜೆ ವಿಗಾರಾಚ್ಯಾ ದಯಾಳ್ ಮನಾನ್ ತೆಗಾಂಯ್ಚಾ ಪೊಟಾಚಿ ಭುಖ್ ಥಾಂಬಂವ್ಕ್, ದನ್ಪರಾಂಚೆಂ ಜೆವಾಣ್ ತಾಂಕಾಂ ಲಾಬ್ಲೆಂ. ಜೆವ್ಣಚ್ಯಾ ಮೆಜಾರ್ ದೊಗೀ ವಿಗಾರಾಂಚೆ ಉಲವ್ಪ್ ಚರ್ಚೆ ಚಲ್ಲೆ.
ಕಾಜಾರಿ ಬಾಂದಾಂತ್ ಎಕ್ವಟ್ಲ್ಲ್ಯಾ ಹೊಕಾಲ್ ನೊವ್ರ್ಯಾನ್ ಪವಿತ್ರ್ ಇಗರ್ಜೆಂತ್ ಸಾಕ್ರಾಮೆಂತಾ ಮುಕಾರ್, ಜೆಜು ಕ್ರಿಸ್ತಾಕ್ ಸಾಕ್ಸ್ ಜಾವ್ನ್. ಫರ್ಮಾಣ್ ಕರ್ನ್ ಭಾಸ್ ದಿಲ್ಯಾ. ತಿ ಭಾಸ್ ಫಕತ್ತ್ ಭುರ್ಗಿಂ ಜಾಯ್ನಾಂತ್, ಘೊವಾಕ್ ಭುರ್ಗಿಂ ಕರ್ಚಿ ಸಕತ್ ನಾ ಮ್ಹಣ್, ಕಾಜಾರಾಚಿ ಭಾಸ್ ಮೋಡ್ನ್, ಘೊವಾಕ್ ಆನಿ ದೆವಾಕ್ ಮೋಸ್ ಕರ್ಚೊ ನ್ಹಂಯ್. ಸಮಾದಾನ್ ಘೆಜಾಯ್. ದೆವಾನ್ ದಿಲ್ಲೊ ಖುರಿಸ್ ಮ್ಹಣ್ ವಾವಯ್ಜಾಯ್ ಶಿವಾಯ್ ಪವಿತ್ರ್ ಭಾಂದಾಚಿ ಬಲಿ ಬೆಟಂವ್ಚಿ ನ್ಹಂಯ್. ದೆವಾಚ್ಯಾ ಭಾಂದಾ ಖಾತಿರ್ ಮನ್ಶ್ಯಾ ಜಿವಾಚಿ ಬಲಿ ಭೆಟಯ್ಲ್ಯಾರ್ಯೀ ವ್ಹಡ್ ನಾ. ಕಾಜಾರಿ ಸಾಕ್ರಾಮೆಂತಾಚಿ ವೀದ್ ವಾವ್ಳಿ ಕರುಂಕ್ ಧುವೆಕ್ ಸಹಕಾರ್ ದೀನಾಕಾತ್. ಕಾಜಾರಿ ಬಾಂದ್ ಜಾವ್ನಾಸಾ ಖುರಿಸ್. ತೊ ಸೊಸ್ಣಿಕಾಯೆನ್ ವ್ಹಾವವ್ನ್, ಪೂನ್ ಜೊಡಿಜಾಯ್ ಶಿವಾಯ್ ಖೊಟಾವ್ನ್ ಚಲೊಂಕ್ ಉತ್ತೇಜನ್ ದಿನಾಕಾತ್ ಮ್ಹಳ್ಳೊ ಲ್ಹಾನ್ಸೊ ಶೆರ್ಮಾಂವ್ ಮೆಳ್ಳೊ ಜಾಲ್ಯಾರ್ಯ್,
ಆನ್ನಿ ತಿಚ್ಯಾ ನಿರ್ದಾರಾಂನಿ ಹಾಲ್ಲಿ ನಾ. ತಿಣೆ ಎಕ್ಚ್ ಉತಾರ್ ಧೃಡಾನ್ ಉಚಾರ್ಲೆಂ.
ಇಗರ್ಜೆಂತ್ ಘಡ್ಲ್ಲೆಂ ಕಾಜಾರ್ ಹೆಂ. ಇಗರ್ಜೆಚ್ಯಾ ವ್ಹಡಿಲಾಂಕ್ ನೀತ್ ಕರುಂಕ್ ಆಸಾದ್ಯ್ ತರ್ ಹಾಂವ್ ಸರ್ಕಾರಾಚಿ ಮಜತ್ ಮಾಗ್ತೆಲಿಂ. ಪುಣ್! ಇತ್ಲ್ಯಾರ್ ಚಮ್ಕೊನ್ ಪಾಟಿಂ ಪೊಳ್ಚಿಂ ನಾ.
ಆನ್ನಿ ಚ್ಯಾ ಹಟ್ಟಾ ಮುಕಾರ್ ವಿಗಾರಾಚೆಂ ಧಾರ್ಮಿಕ್ ರಾಜಾಂವ್ ಚಲ್ಲೆಂ ನಾ.
ವಿಗಾರಾನ್ ಆವಯ್ ಪುತಾಕ್ ತುರಂತ್ ಆಪವ್ಣೆ ದಾಡ್ಲೆಂ. ಸಾಂಗಾತಾ ಸುನೆಕ್ಯ್ ಆಪವ್ನ್ ಹಾಡುಂಕ್ ಸಾಂಗ್ಲ್ಯಾರ್ಯ್ ದುಜೆಪಿನಾನ್ ಥಂಯ್ಚರ್ಯ್ ಲ್ಹಾನ್ಶ್ಯೊ ಶಿಂತ್ರ್ಯೊ ರಚ್ಲ್ಯೊ.
ಇಗರ್ಜೆಚ್ಯಾ ವಿಗಾರಾ ಥಾವ್ನ್ ಎಕ್ಚ್ ಪಾವ್ಟಿಂ ತೆಗಾಂಯ್ಕ್ಯೀ ಆಪವ್ಣೆಂ ಆಯ್ಲಾಂ ಮ್ಹಣ್ತಚ್ ತಿಕಾ ದುಬಾವ್ ಭಳ್ ಜಾಲ್ಲ್ಯಾನ್, ಸುನೆಕ್ ಘರಾ ಭಿತರ್ ರಾವವ್ನ್, ಭಾಯ್ಲ್ಯಾನ್ ಬೀಗ್ ಘಾಲುನ್ ಪುತಾಕ್ ಘೆವ್ನ್ ತಿ ವಿಗಾರಾ ಮುಕಾರ್ ಹಾಜರ್ ಜಾಲಿ.
ಬುಡೊಂಕ್ ವೆಚ್ಯಾ ಸುರ್ಯಾಕ್ ರಂಗಾಳ್ ಪರ್ಜಳಾಚೆರ್ ಕಾಳ್ಯಾ ಮೊಡಾಂನಿ ಗೆರೆ ವೊಡ್ಲ್ಲ್ಯಾ ಪರಿಂ ಸಲ್ವಣೆಂತ್ಯ್ ಗೆಲ್ವಾತೆಲಿಂ ಮ್ಹಳ್ಳ್ಯಾ ಫಟ್ಕಿರ್ಯಾ ಧಯ್ರಾಧೀಕ್ ಹಾಸ್ಯಾಂನಿ ಆನ್ನಿ ಆನಿ ಮೊಡ್ತಿನಿಚೆರ್ ದೀಶ್ಟ್ ಖಂಚಯ್ಲಿ ತಿಣೆ.
ಹೆ ಪಾದ್ರಿ ಕಾಂಯ್ ದಾಕ್ತೆರ್ ನ್ಹಂಯ್. ಹೆ ಸ್ತ್ರೀಯೆಚ್ಯೊ ಕಾಣಿಯೊ ಆಯ್ಕೊನ್, ಮ್ಹಜ್ಯಾ ಪುತಾಕ್ ವಿಣ್ಗೊ ಕರುನ್ ತಪಾಸಣ್ ಕರ್ಚ್ಯಾ ಇತ್ಲಿ ಹಿಮ್ಮತ್ ಹ್ಯಾ ಪಾದ್ರಿಂಕ್ ಖಂಚಿ? ಮ್ಹಳ್ಳೆಂ ಇತ್ಲ್ಯಾ ಘಮಂಡಾಯೆನ್ಚ್ ತಿಣೆ ದೊಗೀ ಪಾದ್ರಿಂಕ್ ವಂದನ್ ಕೆಲೆಂ.
ಮುಖ್ಯ ವಿಶಯಾಂಚೆರ್ಚ್ ವಿಗಾರಾನ್ ದುಜೆಪಿನಾಕ್ ಆನಿ ಪುತಾಕ್ ಸಾಂಗಾತಾಚ್ ಸವಾಲ್ ಕರ್ತಾನಾ.....
ಹಾತ್ ಜೋಡ್ನ್ ನಮೃತೆನ್ಚ್ ಆಪ್ಲೆಂ ಸಾಂತಿಪಣ್ ಪ್ರದರ್ಸುಂಕ್ ಆರಂಭ್ಲೆಂ ದುಜೆಪಿನಾನ್.
ನಾ ಫಾದರ್! ಖಂಡಿತ್ ನಾ. ಮ್ಹಜೊ ಪೂತ್ ಏಕ್ ಪ್ರಭುದ್ದ್ ದಾದ್ಲೊ ಜಾವ್ನಾಸಾ ಮ್ಹಳ್ಳೆಂ ಸತ್. ಬಾಯ್ಬಲಾಚೆರ್ ಹಾರ್ ದವ್ರುನ್ ಸಾಂಗೊಂಕ್ ಹಾಂವ್ ತಯಾರ್ ಆಸಾಂ. ಹೆ ಸ್ತ್ರೀಯೆಕ್ ಪಿಶೆಂ ಲಾಗ್ಲಾಂ ಆಸ್ತೆಲೆಂ ಆನ್ನಿ ದಿಶಿಂ ಧಯ್ರಾನ್ ಬೋಟ್ ಜೊಕ್ಲೆಂ ತಿಣೆಂ
ಮ್ಹಜ್ಯಾ ಪುತಾ-ಸುನೆಚೆ ದೀಸ್ ಇತ್ಲ್ಯಾ ಮೊಗಾನ್ ಸಂತೊಸಾನ್ ಪಾಶಾರ್ ಜಾತಾತ್ಕೀ ಕಾಮಾಚ್ಯಾ ಮಧೆಂಯೀ ತಿಂ ಎಕಾಮೆಕಾ ವೆಂಗುನ್, ಉಮೆ ಘೆವ್ನ್, ತಾಂಚ್ಯಾ ಕುಡಾಂತ್ ವಚೊನ್ ವೇಳ್ ಪಾಶಾರ್ ಕರ್ಚೊ ಹಾವೆಂ ಪಳೆಲಾಂ. ಫಕತ್ತ್ ಕಾಜಾರ್ ಜಾವ್ನ್ ದೋನ್ ವರ್ಸಾಂ ಭಿತರ್ ಭುರ್ಗೆಂ ಜಾಂವ್ಕ್ ನಾ, ಗುರ್ವಾಚಾರ್ ಯೆಂವ್ಕ್ ನಾ, ಮ್ಹಳ್ಳೆಂ ಕಾರಾಣ್ ಘೆವ್ನ್ ಹಿ ಸ್ತ್ರೀ ಮ್ಹಜ್ಯಾ ಪುತಾಚೆರ್ ಫಟ್ಕಿರೊ ಆಪ್ರಾದ್ ಜರ್ ಮಾಂಡ್ತಾ.... ಹಾಚೊ ಫಲಿತಾಂಶ್ ತಿಚೆ ಸಾಂಗಾತಾ ತಿಚೆ ಧುವೆನ್ಯ್ ಭಗ್ಚೆ ಪಡ್ತಲೊ.
ಚಡ್ತಿಕ್ ಚರ್ಚ್ಯಾಂನಿ ವೇಳ್ ವಿಭಾಡುಂಕ್ ವಿಗಾರಾಕ್ ನಾಕಾ ಆಸ್ಲ್ಲೊ.
"ಹುಣ್ಸಾಣ್ ಲಾಗ್ಲ್ಯಾ ಶಿವಾಯ್ ಲೊಣಿ ಖಡ್ಚಿನಾ!" ಮ್ಹಳ್ಳ್ಯಾ ಪ್ರದರ್ಶನಾಚಿ ದುಜೆಪಿನಾಚಿ ಘಮಂಡಾಯ್ ಸರ್ವಾಂಕ್ ಕಳ್ತಾಲಿ. ಅರ್ಥ್ ಜಾತಾಲಿ.
ಖುಶಾಲಾಯೆನ್ಚ್ ಎಕ್ಸುರ್ಯಾ ಪುತಾಕ್ ಭಿತರ್ ಆಪವ್ನ್ ವರುನ್ ಗೆಲೆ ದೊಗ್ಯೀ ವಿಗಾರ್. ವೊರೆ ವಿಂಗಡ್ ಆಪವ್ನ್ ತನ್ಕಿ ಆರಂಭ್ ಕರ್ತಾನಾ ಮಾತ್ರ್ ದುಜೆಪಿನ್ ಭಿಂಯಾನ್ ಘುಡ್ಗುಡ್ಲಿ.
ಆನ್ನಿಚೊ ವಾದ್ ಖರೊ ಜಾಲ್ಲೊ. ಕಡ್ಲಲ್ಯಾ ಮುಖಮಳಾಚ್ಯಾ ಜಾಂವ್ಯಾಂಕ್ ಆನ್ನಿ ಸಾಮ್ಕಾರ್ ಹಾಡುನ್, ವಿಗಾರ್ ಗಂಭೀರ್ಪಣಾನ್ ಮಾನ್ ಭಾಗಾಯ್ತಾನಾಂಚ್.... ಹೆಂ ಘಟನ್ ಇಗರ್ಜ್ಮಾತೆಚ್ಯಾ ಮಾಂತಾ ಭಿತರ್ ವೆಗ್ಳಾಚಾರಾನ್ ತಿರ್ಸೊಂಚಾರ್ ಆಸ್ತಾನಾಚ್ ಭಿರಾಂತೆನ್ ಕಾಂಪ್ಚೆ ಆನ್ನಿಚೆ ಧುವೆಕ್ ಘೆವ್ನ್ ಸರ್ಕಾರಿ ಪವ್ಜೆದಾರ್ ಹಾಜರ್ ಜಾತಾನಾ ಹ್ಯಾ ದೃಶ್ಯಾಕ್ ದುಸ್ರಿಚ್ ಘುಂವ್ಡಿ ಆಯ್ಲಿ.
ಆವಯ್ ಪೂತ್ ಸುನೆಕ್ ಘರಾ ಭಿತರ್ ಪಿಚಾರ್ ಕರುನ್ ಗೆಲ್ಲಿಂಚ್ ಕಾವ್ಜೆಣೆನ್ ಸಸಾಯೆಕ್ ದಿಲ್ಲ್ಯಾ ಉಲ್ಯಾಕ್ ಪಾಳೊ ದೀವ್ನ್ ಸೆಜಾರ್ಚ್ಯಾಂನಿ ಪೊಲಿಸಾಂಕ್ ಆಪಾವ್ನ್ ದಾರ್ ಫಡ್ನ್ ಸುನೆಕ್ ಬಚಾವ್ ಕರುನ್ ಗಜಾಲ್ ಸಮ್ಜಾತಾಚ್ ಪೊಲಿಸ್ ಪವ್ಜ್ ತಿಕಾ ಘೆವ್ನ್ ಇಗರ್ಜೆ ದಿಶಿಂ ಚಮ್ಕಾಲಿ.
ಅಪ್ರೂಪಾಚೆಂ ಘಡಿತ್, ತೆಂಯ್ ಮಧ್ಯಮ್ ವರ್ಗಾಚ್ಯಾ ಕಿರಿಸ್ತಾಂವ್ ಸಮಾಜೆಂತ್ಲೆಂ ಉತ್ಸಾಹಿ ಇನ್ಸ್ಪೆಕ್ಟರಾಚ್ಯಾ ಹಾತಾಕ್ ಪಡ್ತಾಚ್ ವಿಗಾರಾನ್ ನ್ಹಂಯ್ ಕೊಣೆ ಪರಾತ್ಲ್ಯಾರ್ಯೀ ಕೊಡ್ತಿಕ್ ಪಾವಯ್ಲ್ಯಾ ಶಿವಾಯ್ ರಾವಯ್ಲೆಂ ನಾ.
ಪವಿತ್ರ್ ಸಭೆಚೊ ಕಾಯ್ದೊ 1084 ಪರ್ಮಾಣೆ ದಾದ್ಲ್ಯಾಕ್ ಆಪ್ಲ್ಯಾ ಪತಿಣೆಲಾಗಿಂ ಸಂಭೋಗ್ ಕರುಂಕ್ ಆಸಾದ್ಯ್ ಜಾಲ್ಲ್ಯಾ ಖಾತಿರ್ ಫಿರ್ಗಜ್ ವಿಗಾರಾ ಥಾವ್ನ್ ಭಿಸ್ಪಾಕ್ ಕಳವ್ನ್ ಭಿಸ್ಪಾಚೆ ಪರ್ವಣ್ಗೆ ಶಿಫಾರಾಸೆನ್ ಪಾಪಾ ಸಾಯ್ಬಾಕ್ ದಾಡುನ್ ಕಾಜಾರ್ ರದ್ದ್ ಜಾಲೆಂ.
ತರ್ಯೀ ಸರ್ಕಾರಾ ಥಾವ್ನ್, ವಂಚನ್ ಕರುನ್ ಘಡ್ಲ್ಲ್ಯಾ ಕಾಜಾರಾ ಖಾತಿರ್ ಮಾನ್ನಶ್ಟಾ ಬರಾಬರ್ ದುಡುಯೀ ಲಾಬ್ಲೊ.
ಪುಣ್! ಸಮಾಜೆಚ್ಯೊ ಜಿಬೊ ಮಾತ್ರ್ ಸ್ತ್ರೀಯೆಕ್ಚ್ ಲಜ್ಮಾಂಡಿ. ದಾದ್ಲ್ಯಾಂಚಿ ಆಬ್ಲೇಶಿ ಆಸಲ್ಯಾ ವಿವಿಧ್ ಭಿರುದಾಂನಿ ವೊಲಾಯ್ಲಾಗ್ಲೊ. ಹಿಜ್ಡೊ ದಾದ್ಲೊ ಸ್ತ್ರೀ ಜಿಬಾಂಚ್ಯಾಚ್ ಪಾಪ್ ಭಿರ್ಮತೆಚ್ಯಾ ಕಾಂಬ್ಳಿ ಭಿತರ್ ಶಾಭೀತ್ ಉರ್ಲೊ.
***********
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
