ಕವಿತಾकविताPoem
ರಸ್ತ್ಯಾಚೊ
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತಿಂತೆರಾಂತ್ ಪಿಂತುರ್
ಪಿಂತುರ್ - 2
ವಿಶಯ್: ರಸ್ತೊ ಆನಿ ಮಿಸ್ತೆರ್
ಪಿಂತುರ್, ತಿಂತೆರ್ ಆನಿ ಪ್ರೇರಣಾಂ
’ತಿಂತೆರಾಂತ್ ಪಿಂತುರಾಂ’ಚಾ
ಪಯ್ಲ್ಯಾ ಆಂಕ್ಡ್ಯಾಂತ್ ’ಭುಕ್ ಆನಿ ಸೊಧ್ನಾಂ’ ಚೆರ್ ಪ್ರೇರಣ್
ಘೆವ್ನ್ ಆಯಿಲ್ಲಿಂ ಕವಿತಾ
ಸಭಾರಾಂಕ್ ಖಾಯ್ಸ್ ಜಾಲಿಂ ಮ್ಹಣ್ ಸಮ್ಜೊನ್ ಭೋವ್
ಸಂತೊಸ್ ಭಗ್ತಾನಾ ದುಸ್ರ್ಯಾ ಆಂಕ್ಡ್ಯಾಚಾ ಪಿಂತುರಾಚೆರ್ಯ್ ಅಪುರ್ಭಾಯೆಚಿಂ ಕವಿತಾ
ವ್ಹಾಳೊನ್ ಆಯ್ಲ್ಯಾಂತ್. ಹಾಂಚಿಂ ವಿಂಚವ್ಣ್ ಕರ್ಚೆಂ ಕಾಮ್ ತಿತ್ಲೆಂ
ಸಲೀಸ್ ನ್ಹಯ್ ತರ್ಯ್ ವಿಂಚ್ಣಾರ್ ಕವಿತಾಂಕ್ ಮಾತ್ರ್ ಆಮಿ
ಹಾಂಗಾಸರ್ ಪರ್ಗಟ್ ಕೆಲ್ಯಾಂತ್.
ರಸ್ತೊ ಕೆದ್ನಾಂಯ್ ವಾಟ್ಸುರ್ಯಾಕ್ ಶೆವೊಟಾಕ್ ಪಾವಯ್ತಾ ತರ್ಯ್
ಹೊ ರಸ್ತೊ ಕೆದ್ನಾಂಯ್ ಮಿಸ್ತೆರಾಂತ್ಚ್ ಭರೊನ್ ಆಸ್ತಾ. ಕೊಣ್ಯ್
ಹೊ ಮಿಸ್ತೆರ್ ಕಸಲೊ
ಮ್ಹಳ್ಳೆಂ ಜಾಣಾಸ್ಲ್ಲೊ ತರ್ ಅಸಲ್ಯಾ ರಸ್ತ್ಯಾಂನಿ ಆವ್ಘಡಾಂ ಜಾತಿಂನಾಂತ್, ಗಾಡಿಯೊ ಖಣಿಂತ್
ಪಡ್ತ್ಯೊನಾಂತ್, ಟಯರಾಂ ಪಂಕ್ಚರ್ ಜಾತಿಂ ನಾಂತ್. ರಸ್ತ್ಯಾರ್
ಲುಟ್ಕಾರ್ ಆಸ್ತೆನಾಂತ್, ರಸ್ತ್ಯಾಂನಿ ಕೊಣಾಚೆಂ ರಗಾತ್ ವ್ಹಾಳ್ತೆಂನಾ.
ಹ್ಯಾ ಪಿಂತುರಾಂತ್ ಆಟಾಪುನ್ ಆಸ್ಚೊ ಇಮಾಜ್ಯೊ ಜಾಯ್ತ್ಯೊ ಆಸಾತ್, ಕೊಣಾಕ್
ಪಯ್ಸಿಲೊ ಗಾಂವ್ ದಿಸ್ತಾ, ಕೊಣಾಕ್ ರಸ್ತ್ಯಾದೆಗೆಚೆ ಗುಡೆ ದೊಂಗೊರ್
ದಿಸ್ತಾತ್, ಕೊಣಾಕ್ ಕಾಳಿಂ ಕುಪಾಂ ದಿಸ್ತಾನಾ ಆನಿ ಕೊಣಾಕ್ ಹ್ಯಾ ರಸ್ತ್ಯಾವಯ್ರ್ ಅತ್ಮ್ಯಾಂಚೊ
ಪುರ್ಶಾಂವ್ ದಿಸ್ತಾತ್. ಆನಿ ಕವಿತಾ ವಾಚ್ತಾನಾ ಕವಿತಾರಸಿಕಾಂಕ್ ಖರೆಂಚ್
ಹೆಂ ಕವಿತಾಚಾ ಆಮಾಲಾಕ್ ಚಡಯ್ತಾ.
ಕವಿತಾಂತ್ ತಶೆಂಚ್ ಕವಿತಾಚಾ ತಕ್ಲೆನಾಂವಾಂತ್ ಬಾಯ್ ಪ್ರಿಯಾ, ಎಚ್ಚೆಮ್, ಜೊಮೆಲ್
ಹಾಣಿಂ ಅಥ್ವಿಚ್ ದಿಶಾ ಧಾಖಯ್ಲ್ಯಾ - ಹೊಗ್ಳಾಪ್ ತುಮ್ಕಾಂ,
ಮಾ|ಜೋರ್ಜ್ ಒಲಿವೆರಾಕ್ ಹೊ ರಸ್ತೊ, ಹಿ ವಾಟ್ ಅತ್ಮಿಕ್/ದೈವಿಕ್
ಮ್ಹಳ್ಳೆಪರಿಂ ದಿಸ್ತಾ. ಆಸ್ಟಿನ್ ಪ್ರಭುಕ್ ಹ್ಯಾ ವಾಟೆರ್
ಪಡ್ಲ್ಲೊ ಮಿನತೆಚೊ ಘಾಮ್ ದಿಸ್ತಾ - ವಾ! ಅಪುರ್ಭಾಯೆಚಿ
ನದರ್ ಕವಿಚಿ. ಎಚ್ಚೆಮಾಕ್ ಹ್ಯಾ ರಸ್ತ್ಯಾಂತ್ ದಿಸ್ಚೆ ಪುರ್ಶಾಂವ್
ಮ್ಹಾಕಾಚ್ ಅಜ್ಯಾಪ್ ಕರ್ತಾತ್. ಅನಿಲ್ ಪೆರ್ನಾಲ್ ಅಪುರ್ಭಾಯೆನ್
ಹ್ಯಾ ರಸ್ತ್ಯಾಚೆರ್ ಅಪ್ಲೆಂ ಕವಿತಾ-ಫಯ್ಸಲ್ ದಿತಾ. ಆನಿ
ಹ್ಯಾ ಮಯ್ನ್ಯಾಚೊ ಕವಿ ಜಾವ್ನ್ ವಿಂಚೊನ್ ಯೆತಾನಾ , ತಾಕಾ ಆಮಿಂ ಉಲ್ಲಾಸ್
ಪಾಠಯ್ತಾಂವ್, ಫುಡೆಂ ತಾಚ್ಯೊ ಅನಿಕ್ಯ್ ಬರ್ಯೊ ಕವಿತಾ
ಹಾಂಗಾಸರ್ ವ್ಹಾಳೊಂದಿ, ತಶೆಂಚ್ ಹೆರ್ ಬರೆ ಕವಿ ಹಾಂಗಾಸರ್ ಉದೆಂವ್ಕ್
ಸಕೊಂದಿ ಮ್ಹಣ್ ಆಶೆತಾಂ.
[ವಾಂಟೆಲಿ ಜಾಲ್ಲಿಂ]
4. ವಾಯ್ಲೆಟ್ ಜೆ. ಪಿರೇರಾ, ದುಭಾಯ್
5. ಪ್ರಿಯಾ ಸಿಕ್ವೇರಾ, ಫೆರಾರ್/ಕುವೇಯ್ಟ್
6. ಜೋರ್ಜ್ ಒಲಿವೆರಾ, ಬೆಂಗ್ಳುರ್
7. ಆಸ್ಟಿನ್ ಪ್ರಭು, ನಂತೂರ್/ಅಮೆರಿಕಾ
9. ವಲ್ಲಿ ಕ್ವಾಡ್ರಸ್ ಅಜೆಕಾರ್/ಕುವೇಯ್ಟ್
1. ರಸ್ತ್ಯಾಚೊ ಮಿಸ್ತೆರ್ [ಮಯ್ನಾಚೆಂ ಕವಿತಾ]
ಜೆದ್ನಾಂ ಹ್ಯಾ ರಸ್ತ್ಯಾಕ್ ದೆಖ್ತಾಂ
ಮ್ಹಕಾ ಜಿಣ್ಯೆಚೊ ಉಡಾಸ್ ಧೊಸ್ತಾ
ವಾಂಕ್ಡೊ-ತಿಂಕ್ಡೊ
ಮಾತ್ಸೊ ಸಮಾ
ಹೊ ರಸ್ತೊ
ಆನಿಂ ಹ್ಯಾ ರಸ್ತ್ಯಾರ್ ಧಾಂವ್ಚಿಂ
ಹಜಾರ್ ನಮೂನ್ಯಾಂಚಿಂ
ಸಭಾರ್ ಆಕಾರಾಚಿಂ
ನಮುನ್ಯಾವಾರ್ ವಾಹನಾಂ
ಹರ್ಯೆಕ್ ವಾಹನ್ಯೀ
ಆಪ್ಲ್ಯಾ ಉದ್ದೇಶಾ ಕುಶಿನ್
ಧಾಂವ್ ಮಾರ್ತಾ
ಸರ್ವಾಂಕ್ಯೀ ಆಪ್ಲೊಚ್ಚ್
ವೇಗ್
ಆಪ್ಲಿಚ್ ಮೀತ್
ಅತೀ ವೆಗಾನ್
ವೆಗಾನ್
ಆನಿಂ ಥೊಡೆ ಸವ್ಕಾಸ್
ಉದ್ದೇಶ್ ಸರ್ವಾಂಚೊ
ಏಕ್ಚ್ಚ್
ಪೊಂತಾ ಪರ್ಯಾಂತ್
ಪಾಂವ್ಚೊ
ಉದ್ದೇಶ್ ಜರ್
ನಾತ್ಲ್ಲೊ
ತರ್ ಹೊ ರಸ್ತೊ
ಖಾಲಿ ಅಸ್ತೊ
ರಸ್ತ್ಯಾವರ್ವಿಂ ಉದ್ದೇಶ್?
ಉದ್ದೇಶಾಖಾತಿರ್ ರಸ್ತೊ!?
ಹಾಂವ್ ತರೀ ನೆಣಾಂ
ಜೆದ್ನಾಂ ಹ್ಯಾ ರಸ್ತ್ಯಾಕ್ ದೆಖ್ತಾಂ
ತಾಂತುಂ ಧಾಂವ್ಚ್ಯಾ
ವಾಹನಾಂಕ್ ಚೊಯ್ತಾಂ
ದೊಳ್ಯಾಂ ಹುಜ್ರಿಂ
ಮ್ಹಜ್ಯಾ
ಜಿಣ್ಯೆ ಮಿಸ್ತೆರ್
ನಾಚ್ತಾ.
2. ಹ್ಯಾ ಪಯ್ಣಾಕ್... [ಜೊಮೇಲ್, ಬೊಂದೆಲ್]
ಚಲ್, ತುಂ ರಾಜ್ ರಸ್ತ್ಯಾನಿ ಚಲ್ ಯಾ ಅಕ್ಕಡೊ ಉಡೊನ್
ವೊಣಿಂತ್ಲ್ಯಾನಿ ಪೊಳ್;
ಜಿವಿತಾ ಭಿತರ್ಲ್ಯಾ ಜಿಣ್ಯೆ ಪಯ್ಣಾಕ್ ಡಿಗ್ರಿ ಆನಿ ಬೂಕಾಂ ಥಾವ್ನ್
ಬಾಯ್ರ್ ಯೇವ್ನ್ ತೀಳ್.
ಪಯ್ಸಿಲೊ ರಂಗಾಳ್ ಪಾಚ್ವೊ ದೊಂಗೊರ್ ಫಟ್ ಮಾರ್ತಾ ದೊಳ್ಯಾಂಕ್ ತುಜ್ಯಾ
ಮಾತಿ ವೊಡ್ತಾ;
ಜಿವಿತಾ ಭಿತರ್ಲೊ ಗುಡೊ ಚಡೊನ್ ವಚೊಂಕ್ ಕಾಂಟ್ಯಾ ಖುಂಟ್ಯಾ
ಮಧೆಂ ಕಾತಿ ಝರಯ್ಜಾಯ್ ಪಡ್ತಾ.
ಕಾಲ್ಚ್ಯಾ ತ್ಯಾ ಕಾಳ್ಯಾ ಮೊಡಾಂ ವರ್ವಿಂ ಆಜ್ ಪಾವ್ಸಾನ್ ಹಿ
ಸುಕಿಧಾಡೆಚಿ ಭುಂಯ್ ಜಿವಾಳ್ ಕೆಲ್ಯಾ;
ಜಿವಿತಾ ಭಿತರ್ಲ್ಯಾ ವಾರ್ಯಾ ವಾದಾಳಾ ಉಪ್ರಾಂತ್ ಧೊಣು ಜಾವ್ನ್ ಜಿವಿತಾ ಶಿಂಖಳ್
ಶೃಂಗಾರ್ ಜಾಲ್ಯಾ
ರೂಂದ್ ರಸ್ತ್ಯಾರ್ ಫುಡೆಂ ಚಲ್ತಾನಾ ಭಂವ್ತೊಣಿಚ್ಯಾ
ವೊಡ್ತಾಚಿ ಸೊಭಾಯ್ ಆರಾಯ್
ಕಾಂಟ್ಯಾ ಖುಂಟೆ ತೊಪುನ್ ಹುಲೊಪ್ ಚಡ್ತಾನಾ ರಗ್ತಾಘಾಮಾಚೊ
ಲೇಪ್ ಸಾರಯ್
ಕಾಣಿ ಆನಿ ಜಿಣಿ ಶಾಸ್ವತ್ ಉರ್ಚಿನಾ ಜೊಮೆಲಾ, ಹರ್ಯೆಕಾ ಉಸ್ವಾಸಾಕ್
ನವಿಂ ಮೆಟಾಂ ಕಾಡ್
ಜಿವಿತಾ ಭಿತರ್ಲೊ ಶೆವೊಟ್ ಸಂಪ್ಚ್ಯಾ ಫುಡೆಂ ಶೆವೊಟಾಕ್
ಪಾವಂವ್ಚೊ ಮಾರೊಗ್ ಬಾಂಧುನ್ ಸೊಡ್
3. ವಾಟ್ಸುರಿ [ಮೆಲ್ವಿನ್ ಜೆ. ವಾಸ್]
ಶ್ರಾವಣಾಚೆಂ ಕಾಳೆಂ
ಮೋಡ್ ಪಾಲಂವ್ ಉಭಯ್ತಾನಾ
ಪಯ್ಶಿಲ್ಯಾ ರಾನಾಂತ್ ಮೋರ್ ಪಾಕಾಂ ಫುಲಯ್ತಾ.
ದೊಳೆ ದಾರಾಂ ಧಾಂಪುನ್ ನಿದೆಕ್ ವೆಂಗ್ತಾನಾ
ಗಾಂವ್ಚಾ ವಾಟೆರ್ ಹೊ ಕೊಣ್ರೆ ಉಭೊ ವಾಟ್ಸುರೊ?
ಪಾಕ್ಯಾವಯ್ರ್ ಘಡ್ಗಡೊ ಗುಮ್ಟಾಂ ವಾಜಯ್ತಾನಾ
ಆಂಗ್ಣಾಂತ್ ಝಗ್ಲಾಣೆಂ ದಿವ್ಟಿ ಪೆಟವ್ನ್ ನಾಚ್ತಾ
ಆಂಕುಡ್ಚಾ ಹಿಂವಾಂತ್ ಬುರ್ಗೆಂ ಆವಯ್ಕ್ ಸೊಧ್ತಾನಾ
ಗಾಂವ್ಚಾ ವಾಟೆರ್ ಹೊ ಕಿತ್ಯಾಕ್ರೆ ಉಭೊ ವಾಟ್ಸುರೊ?
ಶೆರಾಂತ್ ಆಜ್ ಫೆಸ್ತ್, ಕಾನಿಂ ಸಂಗೀತ್ ಆಯ್ಕಾತಾನಾ
ದೆವಾಚೊ ಪುರ್ಶಾಂವ್, ಗಾಂವಾಂತ್ ಬೋಬ್ ಸ್ತುತಿ ವ್ಹಾಳ್ತಾ
ಧಾ ಆಂಕ್ವಾರಿ ವ್ಹಂಯ್ಚಾ ತಡಿರ್ ಚುನೊ ಕಿರಯ್ತಾನಾ
ಗಾಂವ್ಚಾ ವಾಟೆರ್ ಹೊ ಕಸೊರೆ ಉಭೊ ವಾಟ್ಸುರೊ?
ಕಪಾಲಾ ತಿಳೊ ನಾಣಿಯೆ ಉದ್ಕಾಂತ್ ಧುವ್ನ್ ವೆತಾನಾ
ಪಯ್ಸ್ ಪಯ್ಸ್ ಕೊಲ್ಯಾಂ ಬೋಬ್ ಆಯ್ಕೊನ್ ಯೆತಾ
ಶಿರಾಂಧಾರಿ ಪಾವ್ಸಾಂತ್ ನೆಣ್ತೊ ಬಾವ್ಡೊ ಭಾಯ್ರ್ ಪಡ್ತಾನಾ
ಗಾಂವ್ಚಾ ವಾಟೆರ್ ಅಜೂನ್ ಕಸೊರೆ ಉಭೊ ಹೊ ವಾಟ್ಸುರೊ?
4.ರಸ್ತೊ ಆನಿ ಮಿಸ್ತೆರ್ [ವಾಯ್ಲೆಟ್ ಜೆ. ಪಿರೇರಾ]
ಮೆಟಾಂ ಕಾಡುನ್ ಮುಕಾರ್
ಸರ್ತಾಂ
ಚುಕೊನ್ ಪಡಾನ್ಂಗೀ ಮ್ಹುಣೊನ್ ಭಿಯೆತಾಂ
ಸಾಂಗಾತ್ ತುಜೊ ಸದಾಂಚ್ಚ್ ಆಶೆತಾಂ
ಪೊಂತಾಕ್ ಪಾವೊಯ್ತೊಲೊಯ್ ಮ್ಹಣ್ ಭರ್ವಸ್ತಾಂ
ಪಯ್ಣ್ ಹ್ಯಾ ಸಂಸಾರಿ ಆಮಾ
ಸರ್ವಾಂಚೆಂ
ಸೊಭಿತ್ ಮೊಳಾಬ್ ರಾಜ್ವಟ್ ಸುರ್ಯಾ ಚಂದ್ರಾಚೆಂ
ಫಾಂಕ್ಲಾಂ ಕೀರ್ಣ್ ಸಂಸಾರಿ ಆಮ್ಚಾ ನಶಿಬಾಚೆಂ
ಜಲ್ಮಾತಾನಾಂಚ್ ಲಿಕ್ಲಾಂ ಅಂತ್ಯ್ ಆಮ್ಚಾ ಜಿಣ್ಯೆಚೆಂ
ಸಂಸಾರಿ ಆಮ್ಕಾಂ ಆಸಾತ್ ಸಭಾರ್ ಕಾಯ್ದೆ
ಹರ್ಯೇಕಾ ಹಂತಾಕ್ ದಿಲ್ಯಾತ್ ನಿರ್ದೀಶ್ಟ್ ವಾಯ್ದೆ
ಭುರ್ಗೆ, ತರ್ನಾಟೆ ವ್ಹಡಿಲ್ ಆನಿ ಮಾತಾರ್ಪಣ್
ಸಾಕ್ರಿಫಿಸ್ ಜಾಯ್ಜಯ್ ಆಮ್ಚೆಂ ದಾಧೊಸ್ಪಣ್
ವೇಳಾ ಕಾಳಾಚಿ ಕರಿಜಾಯ್ ಗಿನ್ಯಾನ್
ಭುರ್ಗ್ಯಾಪಣಾರ್ ಶಿಕ್ಪಾಕ್ ಚಡ್ ದೀ ಧ್ಯಾನ್
ತರ್ನಾಟ್ಪಾಣಾರ್ ದೀವ್ನ್ ವ್ಹಡಿಲಾಂಕ್ ಮಾನ್
ಕಾಜಾರಿ ಜಿಣಿ ಜಾಂವ್ದಿ ಎಕಾಮೆಕಾಚೆ ಆರ್ಪಣ್
ಕಾಜಾರಿ ಜಿಣ್ಯೆಂತ್ ಆಸ್ತೆಲೆ ಸಭಾರ್ ಕಾಂಟೆ
ಸಮ್ಜೊನ್ ಎಕಾಮೆಕಾ ಮೊಗಾಕ್ ದಿಯಾ ಫಾಂಟೆ
ಕೆದಿಂಚ್ಚ್ ಕರಿನಾಕಾತ್ ಕುಟ್ಮಾಂತ್ ವಾಂಟೆ
ಜಾಯಾ ಕುಟ್ಮಾಂಚೆ ಬಳ್ವಂತ್ ಖಾಂಬೆ
ಕರಿನಾಕಾ ಮನ್ಶ್ಯಾ ದುಡು ಭಾಂಗಾರಾಚಿ ಆಶಾ
ನಿಮಾಣ್ಯಾ ದಿಸಾ ತುಜಿ ಮ್ಹಜಿ ಝಡ್ತಿ ಜಾತಾ
ರಸ್ತೊ ಹೊ ಕಷ್ಟಾಂಚೊ ಭೋವ್ಚ್ಚ್ ಆಶೀರ್
ಹಾಚೆರ್ ಪಯ್ಣ್ ಕರ್ಶಿ ಪಾವ್ತೊಲ್ಯೊ ಸರ್ಗಾರ್
5.ಆಕಸ್ಮಿಕ್ [ಪ್ರಿಯಾ ಸಿಕ್ವೇರಾ, ಫೆರಾರ್]
ಆಶಾ ತಿ ವಾರ್ಯಾ ವೇಗಾನ್ ಧಾಂವ್ಚಿ
ಪಯ್ಣ್ ತೆಂ ಸಲೀಸಾಯೆನ್ ಸಂಪಂವ್ಚಿ
ಧಾರಾಳ್ ಉಬಾರ್ ತಗ್ಗ್ ತ್ಯಾ ವಾಟೆರ್
ನಾ ಗಣ್ಣೆಂ ಹ್ಯಾ ಸಂಗ್ತಿಚೆರ್
ತೊ ಸ್ವಾರ್ಥ್ ಸರ್ವಾಂಕ್ ಪಾಟಿಂ ಘಾಲ್ಚೊ
ಪಯ್ಲೆಂ ಸ್ಥಾನ್ ಥಿರ್ ಸಾಂಬಾಳ್ಚೊ
ತಾಂಬ್ಡೆಂ ಸಿಗ್ನಲ್ ಬಿಲ್ಕುಲ್ ದಿಸಾನಾ
ಟ್ರಾಪಿಕ್ ಪೊಲಿಸಾಂಚಿ ಫಿಕಿರ್ಚ್ಚ್ ನಾ
ಗರ್ವ್ ತೆಂ ಆಡ್ಕಳ್ಯಾಂಕ್ ಪಯ್ಸ್ ದವರ್ಚೆಂ
ರಸ್ತೊ ತೊ ಸಾಫ್ ಸಾಂಬಾಳ್ಚೊ
ಜೊ ಕೋಣ್ ಆಡ್ ತ್ಯಾ ವಾಟೆರ್
ಜಾತೆಲೆ ಥಂಯ್ಸರ್ಚ್ಚ್ ತಾಚೆಂ ಆಖೇರ್
ದುರಾಶಾ ತಿ ದಿಗಂತಾಕ್ ಪಾಂವ್ಚಿ
ಸುರ್ಯಾಕ್ ತ್ಯಾ ಬೆಟ್ ದಿಂವ್ಚಿ
ಜರ್ ತರ್ ರಸ್ತೊ ಮೆಳ್ಳೊ
ಆಗಾಸಾರ್ ತಂಬು ಮಾರ್ಚೊ
ರಸ್ತ್ಯಾಕ್ ತ್ಯಾ ಅಂತ್ ನಾ
ಆಶೆಕ್ ತ್ಯಾ ಲಗಾಮ್ ನಾ
ಸ್ವಾರ್ಥಾಕ್ ಕಾಂಯ್ ಉಣೆಂಚ್ ನಾ
ಪುಣ್ ಪಯ್ಣಾಕ್ ತ್ಯಾ
ಜರೂರ್ ಆಸಾ ಅಂತ್
ಆಕಸ್ಮಿಕ್!!
6.ರಸ್ತೊ ಆನಿ ಮಿಸ್ತೆರ್ [ಮಾ|ಜೋರ್ಜ್ ಒಲಿವೆರಾ]
ರಸ್ತೊ ಅನಿ ಮಿಸ್ತೆರಾ
ಮಧೆಂ ಗಾಂಚ್ ಯಾತ್ರಿಕ್ ಪಯ್ಣಾರಿ;
ಯಾತ್ರಿಕ್ ವಾಟ್ಸುರಿ ಮತಿಂತ್ ರಸ್ತ್ಯಾ ಲಾಂಬಾಯ್-ರುಂದಾಯ್
ಅಟವ್ನ್; ಕಾಳ್ಜಾಂತ್ ಮಿಸ್ತೆರಾ ಘುಂಡಾಯ್ ನಿಯಾಳ್ ಕರ್ನ್;
ಅಪ್ಲಿಂ ಫಾವ್ಲಾಂ ಕಾಡ್ತಾನಾ; ಸಾರ್ಥಕ್ ವಾಟೆನ್ ಚಾಮ್ಕಾಲ್ಲಿ -
ಶೆಂಬರ್ ಠಕ್ಕೆಂ ಸಂತ್ರಪ್ತಿ ಗ್ಯಾರಂಟಿ ತಾಚ್ಯಾ ಜಿವಿತಾಚಿ.
ರಸ್ತೊಕ್ಷಣಿಕ್ ಸಂಕೇತ್: ಮಿಸ್ತೆರ್ ಶಾಶ್ವತ್ ನಿಶಾನಿ -
ಮನ್ಶ್ಯಾ ಜಿವಿತಾಚಿ; ಗಾಂಚ್ ಮುಕ್ಲ್ಯಾ ಜಿವಿತಾಚಿ.
ರಸ್ತೊ ಜಿವಿತಾಚೊ ಆರಂಬ್ ಅನಿ ಅಕೇರ್ ಪಾಚಾರ್ತಾನಾ -
ಮಿಸ್ತೆರ್ ಜಿವಿತಾಚೊ ಅಂತರಾರ್ಥ್ ನಿಯಾಳುಂಕ್ ಅಹ್ವಾನ್.
ರಸ್ತೊ ಮೆಜೂಂಕ್ ಮತ್ ಸಕಾತ್, ಪೂಣ್ ಮಿಸ್ತೆರ್ -
ಅಟಾಪುಂಕ್ ನಾಸಾಧ್ಯ್; ಮೊಗಾವರ್ವಿಂ ಪಾರ್ಕುಂಕ್ ಜಾಯ್:
ಭಾವಾರ್ಥನ್ ಅಪ್ಣಾಂವ್ಕ್ ಜಾಯ್ ಭರ್ವಾಶ್ಯಾನ್ ಮಾಂದುಕ್ ಜಾಯ್.
ರಸ್ತೊ ಬಹಿರಂಗ್ ಜಿವಿತಾಚಿ ನಿಶಾನಿ ತರ್; ಮಿಸ್ತೆರ್ ಅಂತರಂಗಾಚೊ ಘುಟ್.
ಮನ್ಶ್ಯಾಜಿವಿತಾಂತ್ ಬಾಯ್ರ್-ಬಿತರ್ ವೆಚೊಂ ಏಕ್ ಸಾಂಖೊವ್.
7.ರಸ್ತೊ ಆನಿ ಮಿಸ್ತೆರ್ [ಆಸ್ಟಿನ್ ಪ್ರಭು, ನಂತೂರ್]
ತೊ ರಸ್ತೊ - ದಿಸ್ತಾ ರಂಗ್
ಕಾಳೊ ಕಾಳೊ ಕಾವ್ಳ್ಯಾಸಾರ್ಕೊ
ವೋತಾಕ್ ತಾಪ್ತಾ, ಪಾವ್ಸಾಕ್ ಭಿಜ್ತಾ,
ರಾತಿಕ್ ಥಂಡ್ ಜಾತಾ ಕುಲ್ಕುಲ್ನಾಸ್ತಾಂ
ಮನಿಸ್,
ಮನ್ಜಾತ್ ವ ವಾಹನ್
ಕಿತೆಂಚ್ ಪರ್ವಾ
ನಾಸ್ತಾಂ ಮಸ್ತಿತಾ
ಏಕಾ ಗಾಂವಾ ಥಾವ್ನ್ ಆನ್ಯೇಕಾ
ಗಾಂವಾಕ್ ತೊ ಶೀದಾ
ಪಾವಯ್ತಾ
ಏಕಾ ದೇಶಾ ಥಾವ್ನ್ ಆನ್ಯೇಕಾ ದೇಶಾಕ್
ತೊ ಸಂಬಂಧ್ ಹಾಡ್ತಾ ಭ್ಯೆಂ ನಾಸ್ತಾಂ
ಕೋಣ್ ಪಡೊಂ, ಕೋಣ್ ಮರೊಂ,
ಹ್ಯಾ ರಸ್ತ್ಯಾಕ್ ಕಿತೆಂಚ್ ಪರ್ವಾ ನಾ
ಹಾಚೆರ್ ಪೆಟೊ
ಹಾಗ್ತಾ, ಸುಕ್ಣಿಂ ಚಿರ್ಪಿತಾತ್,
ಗಾಯಾಂಚೆಂ
ಶೆಣ್ ಪಡ್ತಾ ಲಜ್ ನಾಸ್ತಾಂ
ತರಿಪುಣ್ ತೊ ಕಿತೆಂಚ್
ಫಿಕಿರ್ ನಾಸ್ತಾಂ
ಆಸಾ ತಯಾರ್
ವಾಟ್ ದಾಖಂವ್ಕ್ ಸರ್ವಾಂಕ್
ಜಾಂವ್ ದುಬ್ಳೊ, ಜಾಂವ್ ಗ್ರೇಸ್ತ್;
ಜಾಂವ್ ಭಿಕಾರಿ, ವ ಜಾಂವ್ ಪಾದ್ರಿ
ರಸ್ತೊ ಮ್ಹಣ್ತಾ - ಆಪುಣ್ ಏಕ್ಚ್;
ಆಪುಣ್ ಮ್ಹನ್ಶ್ಯಾಪರಿಂ ಬದ್ಲಾನಾ
ರಸ್ತ್ಯಾರ್ ಕೋಣ್ ಕಷ್ಟಾಂನಿ ಗಾಡಿ
ವೊಡ್ತಾ,
ಕೋಣ್ ಮಝೆನ್ ಕಾರ್
ಸೊಡ್ತಾ
ಕೋಣಾಚೊ ಕಪಾಲಾ ಥಾವ್ನ್ ಘಾಮ್
ಪಡ್ತಾ,
ಕೋಣಾ ಕಾರಾಚೆಂ ಡೀಸೆಲ್ ಗಳ್ತಾ
ಕಿತೇಂಯ್ ಜಾಂವ್, ಹೊ ರಸ್ತೊ ಗಪ್-ಚುಪ್
ಆವಾಜ್ ಕರಿನಾಸ್ತಾಂ ವೊಗೊಚ್ ಆಸ್ತಾ
ವಾಹನಾಂ ಧಾಡಾಯ್ತಾತ್, ಜೀವ್ ಉಭ್ತಾತ್
ರಸ್ತೊ ಧಾರುಣ್ - ತೊ ಭಿಲ್ಕುಲ್ ರಡಾನಾ
ರಸ್ತೊ
ನಾಸ್ಲೊ ತರ್ ಮನಿಸ್ ಆಪ್ಲ್ಯಾಚ್
ಘುಡಾಂತ್
ಬಸೊನ್ ಕುರ್ವೊನ್ ಆಸ್ತೊ
ಏಕಾಮೆಕಾಚೊ
ಸಂಬಂಧ್ ನಾಸ್ತಾಂ
ಲೋಕ್
ಮನ್ಜಾತಿಪರಿಂಚ್ ಜಿಯೆತೊ
ಗಾಂವ್ ಸುಧ್ರೊಂಕ್ ರಸ್ತೊಚ್ ಕಾರಣ್
ವ್ಯಾಪಾರ್ ವೃದ್ಧಿ ಜಾಂವ್ಕ್ ರಸ್ತೊಚ್ ಮೇಳ್
ಜರ್ ಆಜ್ ಹೊ ಸಂಸಾರ್ ಬದಲ್ಲಾ
ಹಾಕಾಯೀ ಖಂಡಿತ್ ರಸ್ತೊಚ್ ಭಾಗಿದಾರ್
ರಸ್ತೊ ಏಕ್ಚ್ ತರೀ ವಿವಿಂಗಡ್
ನಾಂವಾಂ
ಮೆಲ್ಲ್ಯಾ-ಗೆಲ್ಲ್ಯಾಂಚೊ ಉಗ್ಡಾಸ್ ಕಾಡುಂಕ್
ದಾನ್ ದಿಲ್ಲ್ಯಾಂಚೆಂ
ವಾರೆಂ ಫುಂಕುಂಕ್
ಗ್ರೇಸ್ತ್
ಮ್ಹನ್ಶ್ಯಾಂ ಪೆಂಪಾರೆಂ ವ್ಹಾಜಂವ್ಕ್
ರಸ್ತೊ ಹಾಂವ್ ವೊಗೊ ಆಸಾಂ ಮ್ಹಣ್
ರಾಜ್ಕಾರಣಿ ಮ್ಹಜಿ ಸಳ್ಗಿ ಘೆತಾತ್
ತಾಂಚ್ಯಾಚ್ ಬಾಪಾಯ್ಚಿ ಆಸ್ತ್ ಕಶಿ
ಮ್ಹಾಕಾ ತೆ ಸರ್ವ್ ವೊಲಾಂವ್ಕ್ ಲಾಗ್ತಾತ್
ಪಂದ್ಲ್ಯಾನ್
ಬಸ್ಸ್, ವಯ್ಲ್ಯಾನ್ ರಯ್ಲ್
ಮಧೆಗಾತ್ ತೆ
ಸಾಂಖವ್ ಬಾಂಧ್ತಾತ್
ತೋಡ್ ಉತ್ರೊಂಕ್ ಹಳ್ಳೆಂತ್ ಕಶೆಂ
ರೈತಾಂನಿ
ಪಾಂಪಾಳೆಂ ಬಾಂಧ್ಲ್ಲೆಪರಿಂ
ರಸ್ತೊ ಜಾವ್ನಾಸಾ ಏಕ್ ಮಾಧ್ಯಮ್
ಸರ್ವ್ ವಸ್ತು ಸಾಂಗಾತಾ ಹಾಡುಂಕ್
ಸರ್ವ್ ಮನ್ಶ್ಯಾಂಕ್ ಸಂಗಿಂ ದವ್ರುಂಕ್
ಏಕ್ ದುಬ್ಳೊ ಗಾಂವ್ ಗ್ರೇಸ್ತ್ ಕರುಂಕ್
8.ತುಂ [ಎಚ್ಚೆಮ್, ಮುಂಬಯ್]
ತುಮಿಂಚ್ ನ್ಹಯ್ಗೀ ಉಗ್ತ್ಯಾ ರಸ್ತ್ಯಾರ್
ಮ್ಹಜೆ ದಗ್ಲೆ ಪಿಂದ್ಲ್ಲೆ ಆನಿ ಕೊಯ್ತ್ಯೊ ಹಾಡ್ನ್
ಮಾಸಾಂ ಚಿರ್ಲ್ಲಿಂ - ಜಿವೆಚ್ಚ್ ಆಸಾತ್ ಥಂಯ್
ಜಿವ್ಯಾ ಮಾತ್ಯೆಂತ್ ಗಳ್ಲ್ಲೆಕಡೆ ರಗತ್
ವಾಡೊನ್ ರಾವ್ಲಾಂ ಪಳೆಯಾ ಆಜ್ ಪಾರ್ತೇನಿಯಮ್ ರಾನ್
ತುಮಿಂಚ್ ನ್ಹಯ್ಗೀ ಆತಾಂ ಮದ್ಯಾ ರಾನಾಂತ್
ಧವೆ ದಗ್ಲೆ ನೆಸೊನ್ ಯೇವ್ನ್ ಹಾತ್ ಜೊಡ್ನ್ ರಾವ್ಲ್ಯಾತ್
ಹಿಂಡಾಂತ್ಲೊ ಮೆಕ್ಳೊ ಜಾಲ್ಲ್ಯಾ ಬೊಕ್ಡೆಪಿಲಾಪರಿಂ ರಡ್ಟಾತ್
ಆಮಿ ನ್ಹಯ್ ತೆ, ಆಮ್ಚೆ ಸಾರ್ಕೆ ಸೆಕುಲಾರ್ ಕೊಣೀ
ನಾಂತ್.
9.ಚಲ್ ತುಂ ಮುಖಾರ್ [ವಲ್ಲಿ ಕ್ವಾಡ್ರಸ್]
ಕೊಣ್ಯ್ ನಾ ತುಜೆಸವೆಂ ತ್ಯಾ
ಲಾಂಬ್ ರೂಂದ್ ರಸ್ತ್ಯಾರ್
ಥೊಡಿಂಚ್ ಮೆಟಾಂ ಉರ್ಲ್ಯಾಂತ್ ದೆವೊಂಕ್ ತುಜಾ ಗಾಂವಾರ್
ಥಕಾಣ್ ಕಸಲಿ ಪುರಾಸಣ್ ಕಿತ್ಲಿ ತ್ಯಾ ವಾಟೆರ್
ಮೆಟಾಂ ಕಾಡ್ ಧಯ್ರಾನ್ ಆತಾಂ ಚಲ್ ತುಂ ಮುಖಾರ್
ಭ್ಯೆಂ ಕಸಲೆಂ ಎಕ್ಸುರ್ಪಣಾಚೆಂ? ಯೆತಾಂ-ವೆತಾಂ ಎಕ್ಲೊಚ್ಮೂ?
ದೀಸ್ ಬುಡ್ಲ್ಯಾರ್ ಕಿತೆಂ ಜಾಲೆಂ? ರಾತ್ ಅಜೂನ್ ಯೇಂವ್ಕ್
ನಾಮೂ?
ಚಡ್ಣಿ ಗೆಲ್ಯಾ ದೆಂವ್ಣಿಂಚ್ ಆತಾಂ ಕಿತ್ಯಾಕ್ ಕರಿ ಸುಸ್ಕಾರ್
ಚತ್ರಾಯೆನ್ ಆನಿ ಭರ್ವಶ್ಯಾನ್ ಆತಾಂ ಚಲ್ ತುಂ ಮುಖಾರ್
ಎದೊಳ್ ಸಾಂಗಾತ್ ದಿಲ್ಲಿಂ ತಾಂಚಾ ವಾಟೆರ್ ಮುಖಾರ್ ಗೆಲಿಂ
ಕುಪಾಂನಿ ಕಾಳ್ಬಾಣ್ ಭರ್ಲ್ಯಾ ದೆಕುನ್ ರುದಾನ್ ಕಿತ್ಯಾಕ್ ಕರಿ
ಕಾಳೊಕ್ ಆನಿ ಕುಪಾಂ ಕಾಂಯ್ ಶಾಶ್ವತ್ ನ್ಹಯ್ ಹಾಂಗಾ
ತುವೆಂ ಪಾವ್ತಚ್ ಉಜ್ವಾಡ್ ಜಾತಲೊ ಆತಾಂ ಚಲ್ ತುಂ ಮುಖಾರ್
ಗುಡೆ ದೊಂಗೊರ್ ನಾಡ್ತಿತ್ ತುಕಾ ಕುಶಿನ್ ತಿಳುಂಕ್ ವಚಾನಾಕಾ
ತುಜಾ ವಾಟೆರ್ ಫಾತೊರ್ ಘಾಲ್ತಿತ್ ಮ್ಹಣೊನ್ ಭಿಂಯಾನ್ ಕಾಂಪಾನಾಕಾ
ತುಜಿ ವಾಟ್ ಮತಿಂತ್ ಖಂಚವ್ನ್ ಚಲ್ ತುಂ ಪಾಟಿಂ ಪಳೆನಾಕಾ
ಲಿಪ್ತೆ ಮಿಸ್ತೆರ್ ಉಘಡ್ತೆಲೆ ಆತಾಂ ಚಲ್ಶಿ ತರ್ ತುಂ ಮುಖಾರ್
About
us | Feedback | Contact us
Copyright
© 2005 DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.