ಕವಿತಾकविताPoem
ರಬೀಂದ್ರನಾಥ್
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾದಾಯ್ಜ್ - 1
ರಬೀಂದ್ರನಾಥ್ ಠಾಗೋರ್
ಜಲ್ಮ್ : 6 ಮಾಯ್ 1861
ಮರಣ್ : 7 ಅಗೋಸ್ತ್ 1941
ಮಾಯ್ಭಾಸ್ : ಬೆಂಗಾಲಿ
ಸಾಹಿತಿಕ್ ಭಾಸ್/ಭಾಸೊ : ಬೆಂಗಾಲಿ, ಇಂಗ್ಲಿಷ್
ವಳೊಕ್:
ಪ್ರಶಸ್ತಿ : ಅಪ್ಲ್ಯಾ ಸಾಹಿತ್ಯಾಕ್ (ಗೀತಾಂಜಲಿ) 1913 ಚಿ ನೋಬೆಲ್ ಪ್ರಶಸ್ತಿ
ವೆಕ್ತಿತ್ವ್ :
ವಿಭಿನ್ನ್ ವೆಕ್ತಿತ್ವಾಚೊ ರಬೀಂದ್ರನಾಥ್ ಠಾಗೋರ್ ಏಕ್ ಕವಿ/ಬರವ್ಪಿ ಜಾವ್ನ್ ನಾಂವಾಡ್ದಿಕ್ ತರ್ಯೀ ತೊ ಏಕ್ ಸಂಪೂರ್ಣ್ ಕಲಾಕಾರ್. ಏಕ್ ಚಿಂತ್ಪಿ, ಏಕ್ ಚಿತ್ರ್ಕಾರ್, ಉಲವ್ಪಿ ಆನಿಂ ಏಕ್ ಸಮಾಜ್ವಾದಿ ಮನಿಸ್. ಪುಣ್ ರಬೀಂದ್ರನಾಥ್ ಏಕ್ ಸಾಹಿತಿ ಮಾತ್ರ್ ನ್ಹಯ್ , ಏಕ್ ವಿಶಾಲ್ ಸಂಸ್ಥೊ ಯಾ ಜಾಣ್ವಾಯೆಚೊ ದರ್ಯೊ ಮ್ಹಳ್ಯಾರೀ ಚೂಕ್ ಜಾಂವ್ಚಿನಾ.
ಪರಿಚಯ್/ವಿವರ್ - ಸುರ್ವಿಲ್ಲೆ ದೀಸ್ :
ರಬೀಂದ್ರನಾಥ್ ಠಾಗೋರ್ ಹಾಚೊ ಬಾಪುಯ್ ದೇಬೇಂದ್ರನಾಥ್ ಠಾಗೋರ್ ಏಕ್ ಸಂಸ್ಕ್ರತ್ ಪಂಡಿತ್ ಜಾವ್ನಾಸ್ಲ್ಲೊ ಮಾತ್ರ್ ನ್ಹಯ್, ’ಆದಿ ಬ್ರಹ್ಮೋ ಸಮಾಜ್’ ಹಾಚೊ ಘಡ್ಣಾರ್ ಆನಿಂ ಮುಖೆಲಿಯ್ ಜಾವ್ನಾಸ್ಲ್ಲೊ. ರಬೀಂದ್ರನಾಥ್ ಠಾಗೋರ್ ಹಾಣೆಂ ಆಪ್ಲೆಂ ಬುರ್ಗ್ಯಾಪಣಾಚೆಂ ಶಿಕಾಪ್ ಘರಾಂತ್ಚ್ ಜೊಡ್ಲೆಂ. ಹ್ಯಾಚ್ ಸಂದರ್ಭಾರ್, ತೊ ಸಾತ್ ವರ್ಸಾಂಚೊ ಭುರ್ಗೊ ಜಾವ್ನಾಸ್ತಾನಾಂಚ್ ಅಪ್ಲೆಂ ಪಯ್ಲೆಂ ಕವಿತಾ ಹಾಣೆಂ ಬರಯ್ಲೆಂ. ಇತ್ಲೆಂಚ್ ನ್ಹಯ್, ಸತ್ರಾ ವರ್ಸಾಂಚೊ ಜಾತಾನಾ ಹಾಚೊ ಪಯ್ಲೊ ಕವಿತಾಪುಂಜೊ ಪರ್ಗಟ್ಲೊ. ರಬೀಂದ್ರನಾಥ್ ಠಾಗೋರಾಚಾ ಇಸ್ಟಾಂನಿ ತಾಕಾ ಅಜ್ಯಾಪ್ ಕರ್ಚಾ ಇರಾದ್ಯಾಂತ್ ಹೊ ಪುಂಜೊ ಘುಟಾನ್ ಪರ್ಗಟ್ಲೊ.
೧೮೭೮ ಇಸ್ವೆಂತ್ ತೊ ಫ಼ುಡ್ಲ್ಯಾ ಶಿಕ್ಪಾ ಖಾತಿರ್ ಇಂಗ್ಲೆಂಡಾಕ್ ಗೆಲೊ ತರ್ಯ್ ದೇಡ್ ವರ್ಸಾಂತ್ ಹ್ಯಾ ಶಿಕ್ಪಾಚೆರ್ ಅಭಿರುಚ್ ನಾಸ್ತಾಂನಾ ಪಾಟಿಂಚ್ ಆಯ್ಲೊ. ಅಶೆಂ ಪಾಟಿಂ ಆಯಿಲ್ಲೊ ರಬೀಂದ್ರನಾಥ್ ಠಾಗೋರ್ ಪರತ್ ಕವಿತಾ ಬರಂವ್ಚಾ ಆಪ್ಲ್ಯಾ ದೆಣ್ಯಾಥಂಯ್ ಧ್ಯಾನ್ ದೀಲಾಗ್ಲೊ. ಕವಿತಾಸವೆಂ ಮಟ್ವ್ಯೊ ಕಾಣ್ಯೊ, ಕಾದಂಬರಿ, ನಾಟ್ಕುಳೆ ಸಯ್ತ್ ಬರಂವ್ಕ್ ಲಾಗ್ಲೊ.
1883 ಇಸ್ವೆಂತ್ ತೊ ಮ್ರಣಾಲಿನಿ ದೇವಿ ರಾಯ್ ಚೌಧುರಿಲಾಗಿಂ ಲಗಿನ್ ಜಾಲೊ. ಆನಿಂ ಆಪ್ಲ್ಯಾ ಭಾಯ್ಲೆಕ್ ಬೆಂಗಾಲಿ ಆನಿಂ ಸಂಸ್ಕ್ರತ್ ತಾಣೆಂಚ್ ಶಿಕಯ್ಲೆಂ.
1891-1900: ಹ್ಯಾ ಆವ್ದೆಂತ್ ರಬೀಂದ್ರನಾಥ್ ಠಾಗೋರ್ ಹಾಣೆಂ ಆಪ್ಲ್ಯಾ ಜಾಯ್ತ್ಯಾ ಸಾಹಿತ್ಯಾಕ್ ಪರ್ಗಟ್ ಕೆಲೆಂ. ಹಾಂತ್ಲೆಂ ಚಡಾವತ್ ಜಾವ್ನ್ ಪಾರಂಪರಿಕ್ ಬೆಂಗಾಲಿ ಸಂಸ್ಕ್ರತೆವಿಶ್ಯಾಂಚೆರ್ ಆಧಾರಿತ್ ಯಾ ಪ್ರೇರಿತ್ ಜಾಲ್ಲೆಂ.
1891 ಇಸ್ವೆಂತ್ ರಬೀಂದ್ರನಾಥ್ ಠಾಗೋರ್ ಅಪ್ಲ್ಯಾ ಬಾಪಾಯ್ಚಾ ಎಸ್ಟೇಟಾಂಕ್ ಸಾಂಭಾಳ್ಚಾಕ್ ಮ್ಹಣೊನ್ ಶಿಲೇಯ್ದಾ ಆನಿಂ ಸಯಾದ್ಪುರ್ ಗೆಲೊ ಆನಿಂ ಥಂಯ್ಚಾ ಗರೀಬ್ ಲೊಕಾಂಸವೆಂ ಮೆಳೊನ್ ಸಾದ್ಯಾ ಮನ್ಶಾಂಚಾ ಜಿಣ್ಯೆವಿಶ್ಯಾಂತ್ ಸಮ್ಜಾಲೊ. ಹ್ಯಾಚ್ ಕಾಳಾರ್ ತಾಚಿ ಮತ್ ಚಡಿತ್ ಸಾಮಾಜಿಕ್ ರಿತಿನ್ ಚಿಂತಾಪ್ ಚಿಂತಿಲಾಗ್ಲಿ, ಗರ್ಜೆವಂತಾಚೊ ಗರ್ಜೊ ಸಮ್ಜೊಂವ್ಚಿ ಶ್ಯಾಥಿ ತಾಕಾ ಹ್ಯಾಚ್ ಲೊಕಾಂ ಥಾವ್ನ್ ಲಾಭ್ಲಿ. ಅಶೆಂ ಆಪ್ಲ್ಯಾ ಸಾಹಿತ್ಯಾಂತ್ ಸಾದ್ಯಾಲೊಕಾಂಚಾ ಸಮಸ್ಯಾಂಚೆರ್, ಗಾಂವ್ಟಿ ಪರಿಸರಾಚೆರ್ ಬರಂವ್ಕ್ ಸುರುಕೆಲೆಂ.
ತಾಚೆಂ 1912 ಇಸ್ವೆಂತ್ ಫ಼ಾಯ್ಸ್ ಜಾಲ್ಲೊ ’ಗಲ್ಪ ಗುಚ್ಚಾ’ ಹ್ಯಾಚ್ ಗ್ರಾಮೀಣ್ ಪರಿಸರಾಚೆರ್ ಪ್ರೇರಿತ್ ಜಾವುನ್. ಹಾಚೆಶಿವಾಯ್ ಸೊನಾರ್ ತರಿ, ಕಲ್ಪನಾ ಆನಿಂ ಚಿತ್ರಾ ಹ್ಯೊ ಸರ್ವ್ ಕ್ರತಿಯೊ ಏಕ್ ನ್ಹಯ್ ಏಕ್ ರಿತಿರ್ ಅಸಲ್ಯಾಚ್ ಗ್ರಾಮೀಣ್ ಸಂಗ್ತ್ಯಾಂಚೆರ್ ಲಿಖ್ಲ್ಯಾತ್. ಶಾಂತಿನಿಕೇತನ್, ಗೀತಾಂಜಲಿ ಆನಿಂ ಸ್ವಾತಂತ್ರ್: ರಬೀಂದ್ರನಾಥ್ ಠಾಗೋರಾಕ್ ಬ್ರಿಟಿಶಾಂನಿ ರಾಜ್ವಟ್ಕಿ ಕರ್ಚಿ ರೀತ್ ಆನಿಂ ತಾಂಚಾ ನಿತಿವಿಶ್ಯಾಂತ್ ಬರಿ ಜಾಣ್ವಾಯ್ ಆಸ್ಲ್ಲಿ. ಅಶೆಂ ಹಾಣೆಂ ’ಸ್ವದೇಶಿ’ ಚಿಂತ್ಪಾಚಾ ಸಂಘಟನಾಂಕ್ ಪಾಟಿಂಬೊ ದಿಲೊ.
1901 ಇಸ್ವೆಂತ್ ರಬೀಂದ್ರನಾಥ್ ಠಾಗೋರಾನ್ ಶಾಂತಿನಿಕೇತನ್ ಅಸ್ತಿತ್ವಾಕ್ ಹಾಡ್ಲೆಂ (ಬೆಂಗಾಲಾಂತ್ ಆಸ್ಚಾ ಬೋಲ್ಪುರ್ ಗಾಂವಾಂತ್) ಆನಿಂ ಹ್ಯಾ ಸಂಸ್ಥ್ಯಾಂಕ್ ಭಾಯ್ಲ್ಯಾ ಗಾಂವ್ಚಾ (ಪಾಶ್ಚಾತ್ಯ್) ರಿತಿರ್ ಆನಿಂ ಭಾರತೀಯ್ ರಿತಿರ್ ಶಿಕಾಪ್ ಸುರು ಕೆಲೆಂ.
1902 ಆನಿಂ 1907, ಇಸ್ವೆಚಾ ಮಧೆಂ ರಬೀಂದ್ರನಾಥ್ ಠಾಗೋರಾಚಿ ಬಾಯ್ಲ್, ಆನಿಂ ಏಕ್ ಪೂತ್ ಆನಿಂ ಏಕ್ ಧುವ್ ಅಂತರ್ಲಿಂ. ಪುಣ್ ಹ್ಯಾ ದುಃಖಿನ್ ತಾಕಾ ಹೆರ್ ಸಂಗ್ತ್ಯಾಂಥಾವ್ನ್ ಪಯ್ಸ್ ವೆಲ್ಯಾರ್ಯಿ ಕವಿತಾಶೆತಾಂತ್ಲೊ ಮೆಕ್ಳೊ ಕೆಲೊನಾ ಆನಿಂ ಅಪ್ಲ್ಯಾ ಜಿಣ್ಯೆಂತ್ಲಿ ತವಳ್ಪರ್ಯಾಂತ್ಲಿ ಶ್ರೇಷ್ಟ್ ಕ್ರತಿ ಮ್ಹಣ್ ನಾಂವಾಡ್ಲೆಲಿ ’ಗೀತಾಂಜಲಿ’ ಹಾಣೆಂ 1910 ಇಸ್ವೆಂತ್ ಫ಼ಾಯ್ಸ್ ಕೆಲಿ. ಬೆಂಗಾಲಿ ಭಾಶೆಂತ್ ಬರಯಿಲ್ಲಿಂ ಹಾಂತ್ಲಿಂ ಕವಿತಾ ತಾಣೆಂಚ್ ಇಂಗ್ಲಿಶ್ ಭಾಸೆಕ್ ಆಣ್ಕಾರ್ ಕೆಲಿಂ.
1913 ಇಸ್ವೆಂತ್ ಹ್ಯಾ ಬುಕಾಕ್ ’ನೋಬೆಲ್ ಪ್ರಶಸ್ತಿ’ ಲಾಭ್ಲಿ. ಫ಼ುಡ್ಲ್ಯಾ ದೋನ್-ತೀನ್ ವರ್ಸಾಂನಿ ಬ್ರಿಟಿಶ್ ಚಕ್ರವರ್ತೆನ್ ತಾಕಾ ಪುಸ್ಲಾಂವ್ಕ್ ಎಕಾ ಪ್ರಾಂತ್ಯಾಚಿ ರಾಜ್ವಟ್ಕಿ ದಿಲಿ.
ಪುಣ್ 1919 ಇಸ್ವೆಂತ್ ಜಾಲ್ಲ್ಯಾ ಜಲಿಯಾನ್ವಾಲಾ ಭಾಗಾಂತ್ ಜಾಲ್ಲ್ಯಾ ಮನ್ಶಾಂಚಾ ಹತ್ಯಾಂತ್ ಠಾಗೋರ್ ಇತ್ಲೊ ಖುಭಾಳ್ಳೊ ಆನಿಂ ಕಾಂಠಾಳ್ಳೊಕೀ, ತಾಣೆಂ ಹಿ ರಾಜ್ವಟ್ಕಿ ನಿರಾಕರ್ಸಿಲಿ.
1916 ಆನಿಂ 1941 ಇಸ್ವೆಂತ್ ರಬೀಂದ್ರನಾಥ್ ಠಾಗೋರಾನ್ 21 ಬುಕಾಂಕ್ ಛಾಪ್ಲೆ. ಹಾಂತುಂ ಆಪ್ಣಾನ್ ಯುರೋಪಾಂತ್, ಅಮೆರಿಕಾಂತ್, ಚಾಯ್ನಾಂತ್, ಜಪಾನಾಂತ್, ಮಲೇಸಿಯಾಂತ್, ಇಂಡೋನೇಸಿಯಾಂತ್.. ಅಶೆಂ ದಿಲ್ಲಿಂ ಭಾಷಣಾಂಯ್ ಆಟಾಪೊನ್ ಆಸಾತ್.
1924 ಇಸ್ವೆಂತ್ ತಾಣೆಂ ಶಾಂತಿನಿಕೇತನಾಂತ್ ಭಾರತೀಯ್ ಸಂಸ್ಕ್ರತೆಚೆಂ ದಾಯ್ಜ್ ಜಾವ್ನಾಸ್ಚೆಂ ’ವಿಶ್ವ್ ಭಾರತೀ ವಿದ್ಯಾಲಯ್’ ಹಾಚೆಂ ಸ್ಥಾಪನ್ ಕೆಲೆಂ. ಠಾಗೋರಾಚಿ ಪ್ರತಿಭಾ, ಫ಼ಕತ್ ಸಾಹಿತ್ಯಾಕ್ ಸೀಮಿತ್ ಜಾವ್ನ್ ಆಸಾನಾಸ್ತಾಂ, ಸಂಗೀತ್, ನಾಟಕ್, ಭಾಶಣಾಂ, ಪೇಂಯ್ಟಿಂಗ್ಸ್ ಅಶೆಂ ಸಭಾರ್ ಪ್ರಕಾರಾಂನಿ ತಾಣೆಂ ವಿಶೇಷ್ ವಾವ್ರ್ ಕೆಲಾ. ಅಖ್ರೇಕ್ ಅಪ್ಲ್ಯಾಚ್ ಉತ್ರಾಂನಿ ತೊ ಅಶೆಂ ಸಾಂಗ್ತಾ; "ಹೊ ಸಂಸಾರ್ ಮ್ಹಜೆಲಾಗಿಂ ಉಲಯ್ತಾ ರಂಗಾಂನಿ, ಮ್ಹಜೊ ಅತ್ಮೊ ತಾಂಕಾಂ ಜಾಪ್ ದಿತಾ ಸಂಗೀತಾನ್"
ತಾಚಾ ಸಾಹಿತಿಕ್ ವಾವ್ರಾಚೊ ಮಟ್ವೊ ವಿವರ್ - ಪರ್ಗಟ್ ಜಾಲ್ಲೆ ಕವಿತಾಂಚೆ ಬೂಕ್ : ಪನ್ನಾಸಾಂ ವಯ್ರ್.
ಥೊಡೆ ಬೆಂಗಾಲಿ ಭಾಸೆಂತ್ಲೆ ಬೂಕ್ ಹ್ಯೇ ಪರಿಂ ಆಸಾತ್;
ಮಾನಸಿ (1890) [ಆದರ್ಶ್], ಸೊನಾರ್ ತರಿ (1894) [ಭಾಂಗಾರಾಚೆಂ ತಾರುಂ], ಗೀತಾಂಜಲಿ (1910) [ಗಿತಾಂ ಭೆಟವ್ಣಿಂ], ಗಿತಿಮಾಲ್ಯ (1914) [ಗಿತಾಂಚೆ ತುರೊ], ಬಲಕಾ (1916) [ಕ್ರೇನಾಂಚೊ ಜಮೊ].
ತಶೆಂಚ್ ಇಂಗ್ಲಿಶಾಂತ್ ಪರ್ಗಟ್ಲೆಲೆ ಬೂಕ್;
ದ ಗಾರ್ಡನರ್ (1913), (ಮಾಲಿ) ಫ಼್ರೂಟ್-ಗ್ಯಾದರಿಂಗ್ (1916), (ಫ಼ಳಾಂಚೊ ಜಮೊ) ದ ಫ಼ುಜಿಟಿವ್ (1921), (ಸುಟ್ಕಾ ಲಾಭ್ಲ್ಲೊ) ಆಫ಼ರಿಂಗ್ಸ್ (1912), (ಭೆಟವ್ಣಿ) ಹಾಚಾ ಸರ್ವ್ ಕ್ರತಿಯಾಂ ಪಯ್ಕಿ ಉಂಚ್ಲಿ ಕ್ರತಿ ಮ್ಹಣೊನ್ ನಾಂವಾಡ್ಲ್ಯಾ.
ನಾಟಕ್ ;
ರಾಜ (1910) [ದ ಕಿಂಗ್ ಆಫ಼್ ದ ಡಾರ್ಕ್ ಚೇಂಬರ್], ಡಾಕ್ಘರ್ (1912) [ಪೋಸ್ಟ್ ಆಫ಼ೀಸ್ (ತಪ್ಪಾಲ್ ಘರ್) ], ಅಛಲಯಾತನ್ (1912) [ಅಸ್ಥಿರ್ ಜಾಯ್ನಾತಸಲೆಂ], ಮುಕ್ತಧಾರ (1922) [’ಘೊಸ್ಗೊಸ್’, ಯಾ ’ಜಳ್ಪಡ್’ ಮ್ಹಣ್ಜೆ ವಯ್ರ್ ಥಾವ್ನ್ ಪಡ್ಚೆಂ ಉದಾಕ್ (ಫ಼ಾಲ್ಸ್)], ರಕ್ತಕಾರವಿ (1926) [ತಾಂಬ್ಡೆಂ ವಿಕಾಳ್ ಝಡ್].
ಹಾಚೆ ಮಟ್ವ್ಯಾ ಕಾಣ್ಯಾಂಚೆ ಬೂಕ್ ;
ಗೊರಾ (1910), ಘಾರೆ-ಭಾಯ್ರೆ (1916), ಯೋಗಯೋಗ್ (1929) ಹ್ಯಾ ಶಿವಾಯ್ ತಾಣೆ ಸಂಗೀತ್ ನಾಟಕ್, ನ್ರತ್ಯ್ ನಾಟಕ್, ಸರ್ವ್ ಥರಾಂಚೆ ಪ್ರಭಂದ್, ಪ್ರಯಾಣ್ ಸಾಹಿತ್ಯ್, ತಶೆಂಚ್ ದೋನ್ ಆತ್ಮ್ಕಥಾ ಲಿಖ್ಲ್ಯಾತ್. ಪಯ್ಲಿ ಅಪ್ಲ್ಯಾ ತರ್ನಾಟ್ಪಣಾಚಾ ನಿಮಾಣ್ಯಾ ಹಂತಾರ್ ತರ್ ಅನ್ಯೇಕ್ ಅಪ್ಲ್ಯಾ ಮರ್ನಾಚಾ ಥೊಡ್ಯಾಚ್ ವರ್ಸಾಧಿಂ. ಇತ್ಲೆಂಚ್ ನ್ಹಯ್, ಹಾಣೆಂ ಅಪ್ಲ್ಯಾ ಥೊಡ್ಯಾ ಕವಿತಾಂಕ್ ತಾಳೆ ಆನಿಂ ಸಂಗೀತ್ಯ್ ಬರಯ್ಲಾಂ. ಜಾಯ್ತಿಂ ತಾಚಿಂ ಪೇಂಯ್ಟಿಂಗ್ಸ್ ಆನಿಂ ಪಿಂತುರಾಂಯ್ ಲೊಕಾಮೊಗಾಳ್ ಜಾಲ್ಯಾಂತ್.
ಕವಿತಾದಾಯ್ಜ್ - 1 . ರಬೀಂದ್ರನಾಥ್ ಠಾಗೋರ್
ಹಿಂ ಕವಿತಾ ತಾಚಾ ಗೀತಾಂಜಲಿ ಬುಕಾಂತ್ಲಿಂ ವಿಂಚ್ಲ್ಯಾಂತ್; (ಮಾಂಯ್ಡ್ ವಿತೌಟ್ ಫಿಯರ್, ಸ್ಲೀಪ್)
1. ಭಿರಾಂತ್ ನಾತ್ಲ್ಲಿ ಮತ್
ಖಂಯ್ ಮತ್ ಭಿರಾಂತೆವಿಣೆಂ,
ಆನಿಂ ತಕ್ಲಿ ಉಭಾರುನ್ ದರುನ್;
ಖಂಯ್ ಜಾಣ್ವಾಯ್ ಸ್ವತಂತ್ರ್;
ಖಂಯ್ ಸಂಸಾರ್ ಬಾರೀಕ್ ಘರ್ಚಾ ವೊಣದಿಂಚೆ ಕುಡ್ಕೆ ಜಾವ್ನ್
ಫ಼ುಟೊಂಕ್ ನಾಂತ್ಗೀ;
ಖಂಯ್ ಉತ್ರಾಂ ಯೆತೆಲಿಂ
ಸತಾಚಾ ಗುಂಡಾಯೆಥಾವ್ನ್;
ಖಂಯ್ ಪುರಾಸಣೆವೀಣ್ ಪರಿಶ್ರಮ್ ನಿರಂತರ್
ಅಪ್ಲೆ ಬಾವ್ಳೆ ಪರಿಪೂರ್ಣತೆ ತೆವ್ಶಿನ್ ವಿಸ್ತಾರ್ತಾನಾ;
ಖಂಯ್ ಉದ್ದೇಶಾಚೊ ನಿತಳ್ ವಾಳೊ;
ಅಪ್ಲಿ ವಾಳ್ವಾಟಾಚಾ ನಿಶ್ಟುರ್ ರೆಂವೆಚಾ
ಸವಯಾಂತಸ್ಲಿ ವಾಟ್ ಚುಕಾನಾಂಗೀ;
ಖಂಯ್ ಮತ್ ತುಜಾ ಮುಖೇಲ್ಪಣಾಖಾಲ್
ನಿರಂತರ್ ಚಿಂತ್ನಾಂಕ್ ಆನಿಂ ಕರ್ನೆಂಕ್ ಫ಼ುಡೆಂ ಸರೊನ್;
ಸ್ವತಂತ್ರಾಚಾ ಸರ್ಗಾಕ್, ಮ್ಹಜಾ ಬಾಪಾ
ಮ್ಹಜಾ ದೇಸಾಕ್ ಜಾಗಯ್.
2 . ನೀದ್
ಪುರಾಸಣೆಚಾ ರಾತಿಂ
ಕಿತೆಂಚ್ ಪ್ರತಿಭಟನ್ ನಾಸ್ತಾಂ ಹಾಂವ್ ಮ್ಹಾಕಾಚ್ ನಿದೆಕ್ ದಿತಾಂ
ಮ್ಹಜೊ ಭರ್ವಸೊ ತುಜೆರ್ ದವ್ರುನ್
ಮ್ಹಾಕಾ ನಿಂವ್ಲ್ಲ್ಯಾ ಸ್ಪಿರಿತಾನ್ ಉಣ್ಯಾ ತಯಾರೆಚೆಂ,
ತುಜಾ ಆರಾಧನೆಕ್ ಭಲತ್ಕಾರ್ ಕರುಂಕ್ ನಾಕಾ.
ತೊ ತುಂಚ್ ಜಾವ್ನಾಸಾಯ್ ಜೊ ಥಕ್ಲ್ಲ್ಯಾ ದಿಸಾಚಾ ದೊಳ್ಯಾಂಕ್
ರಾತಿಚೊ ವೇಳ್ ಬಾಂದ್ತಾಯ್
ಆನಿ ತಾಚಾ ದಿಶ್ಟಿಕ್
ನವ್ಯಾ ಹುರುಪಾಚಾ ಜಾಗ್ವಣೆಕ್ ನವೀಕ್ರತ್ ಕರುಂಕ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.