ಕವಿತಾकविताPoem
ಪ್ರಕಾಶಕ್
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಕಾಣಿಂ ಎಕಾ ವಾಚ್ಪ್ಯಾಕ್ ಸ್ವಪ್ಣಾಂಚಾ ಸಾಗೊರಾಲಾಗಿಂ ಪಾವಂವ್ಕ್ ಸಕ್ತಾ ತರ್ ಕವಿತಾ ತಾಂತುಂ ಉಪ್ಯೆಂವ್ಚೊ ಅನ್ಭೋಗ್ ದಿತಾ’
ಕವಿತಾಪಾಠ್ - 14
ಸೊಧ್ನಾಂ - ಮೆಲ್ವಿನ್ ಜೆ. ವಾಸ್
ಕವಿತಾ - ಸೊಧ್ನಾಂ
ಬೂಕ್ - ಪರ್ಗಟ್ಣೆರ್ ಆಸಾ
ಪ್ರಕಾಶಕ್ - ಆಶಾವಾದಿ ಪ್ರಕಾಶನ್
ಕವಿ: ಮೆಲ್ವಿನ್ ಜೆ. ವಾಸ್, ಕೆಲರಾಯ್
ಪಾಠ್ ಚಲವ್ಪಿಣ್: ಪ್ರಿಯಾ ಫೆರಾರ್
ತಾರಿಕ್: 21 ಎಪ್ರಿಲ್ 2006
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಉಗ್ಡಾಸಾ ಭಾಯ್ಲ್ಯಾ
ಹ್ಯಾ ವಾಟೆರ್
ಥಂಯ್ ಹಾಂಗಾ ವಳ್ಕೊಂಚಿಂ ಪಾವ್ಲಾಂ
ಥೊಡಿಂ ಹಾಸ್ತಿಂ ಥೊಡಿಂ ಲಕ್ಚಿಂ
ಥಂಯ್ ಹಾಸ್ಚಿಂ ಹಾಂಗಾ ರಡ್ಚಿಂ
ಎಕೇಕ್ ಅಪ್ಲಿ ಕೂಸ್ ಬದ್ಲುಂಚಿಂ
ಹ್ಯಾ ವಾಟೆವಯ್ಲ್ಯಾ ಮೊಳ್ಬಾ
ವೆಂಗೆಂತ್
ಘಡಿ ದೋನ್ ಘಡಿಯಾಂಚಿ ಸುಂದರ್ ಸಪ್ಣಾಂ
ಏಕ್ ಹಾಸ್ಚೆಂ ಏಕ್ ದಡ್ಬಡ್ಚೆಂ
ಹಾಂಗಾ ಚಲ್ಚೆಂ ಥಂಯ್ ತುಟ್ಚೆಂ
ಎಕೇಕ್ ಮಧುರ್ ತಾಳ್ಯಾನ್ ಘುಣ್ಗುಣ್ಚೆಂ
ಉಗ್ಡಾಸಾ ಭಾಯ್ಲ್ಯಾ ತ್ಯಾ ಧೊಮ್ಸಾ
ಪಾಟ್ಲ್ಯಾ ದರ್ಯಾಂತ್
ನೆಣ್ತೆಂ ಹೊಡೆಂ
ಆಪ್ಲ್ಯಾ ಪಾವ್ಲಾಂಚಿ ವಳೊಕ್ ಧರಿತ್ತ್
ಸಪ್ಣಾಂ ದೊಳ್ಯಾಂನಿ ಸೊಭಯಿತ್ತ್
ವ್ಹಳೂ ವ್ಹಳೂ ಸವ್ಕಾಸ್ ಸವ್ಕಾಸ್
ಎಕ್ಸುರೆಂ ಚಲೊನ್ ಚಲೊನ್
ಪಯ್ಣಾರ್ಯಾಚಿಂ ಸೊಧ್ನಾಂ ಕರೀತ್ತ್
ಲ್ಹಾರಾಂಸವೆಂ
ವೆಳೆಕ್ ಪಾಂವ್ಚಾಕ್..
ಲ್ಹಾರಾಂ ಉಟ್ತಾತ್
ವೆಳೆಕ್ ವೆಂಗುನ್ ಯೆತಾತ್
ಸೊಧುನ್ಂಚ್ ಆಸಾಂ ಹ್ಯಾಚ್ ಲ್ಹಾರಾಂನಿ
ತ್ಯಾ ಸಪ್ಣಾಂಕ್ ನ್ಹಯ್ ತ್ಯಾ ವಾಟೆನ್ ನ್ಹಯ್
ಸೊಧುನ್ ಆಸಾಂ ತ್ಯಾಚ್ ಹೊಡ್ಯಾಕ್
ಕಿತ್ಯಾಕ್ ಹಾಂವ್ಂಚ್ ತಾಚೊ ಸಾಂಗಾತಿ
ಹಾಂವ್ಂಚ್ ತಾಚೊ ಪಯ್ಣಾರಿ
ಕವಿಚಿ ವ್ಹಳೊಕ್:
’ಮೆಲ್ವಿನ್ ಜೆ. ವಾಸ್ ಕೆಲರಾಯ್’ ಕೊಂಕ್ಣಿ ಸಾಹಿತ್ಯಾಕ್ ಚಡುಣೆಂ ದೇಡ್ ದಾಕ್ಡ್ಯಾ ಥಾವ್ನ್ ವಳ್ಕೆಚೊ. ಅಪ್ರೂಪಾಯೆನ್ ಕಾಣ್ಯೊ, ಕವಿತಾ ಬರವ್ನ್ ಆಸ್ಲ್ಲೊ ಹೊ ವಿಮರ್ಶಕ್/ಸಮೀಕ್ಶಕ್ ಜಾವ್ನ್ ಉದೆಲ್ಲೊ ಆಯ್ಲೆವಾರ್ಚ್ ತರ್ಯ್ ಚಿಂತ್ಪಾಚಿ ಪರಿಪಕ್ವತಾ ಆಸ್ಚೊ ಹೊ ಏಕ್ ಗೂಂಡ್ ಚಿಂತ್ಪಿಯ್ ಜಾವ್ನಾಸಾ.
ಹಾಣೆಂ ಕೊಂಕ್ಣೆಂತ್ ತಶೆಂಚ್ ಕಾನಡಿ, ಉರ್ದು, ಹಿಂದಿ ಭಾಸಾಂನಿ ಕವಿತಾ ಲಿಖ್ಲ್ಯಾತ್ ತಶೆಂಚ್ ಅನುವಾದ್ಯೀ ಕೆಲ್ಯಾತ್. ವೆಗಿಂಚ್ ಹಾಚೆಂ ಕವಿತಾಚೆಂ ಅಂಕಣ್ ದಾಯ್ಜ್ಚೆರ್ ಸುರು ಜಾತೆಲೆಂ.
ಏಕ್ ಅಧುರ್ಯಾ ಹೊಡ್ಯಾಚಿಂ ಸೊಧ್ನಾಂ! [ - ವಲ್ಲಿ ಕ್ವಾಡ್ರಸ್, ಅಜೆಕಾರ್]
ಮನಿಸ್ ಜಲ್ಮಲ್ಲ್ಯಾ ದಿಸಾಥಾವ್ನ್ ಮೊರ್ನಾಪರ್ಯಾಂತ್ಲ್ಯಾ ಆವ್ದೆಕ್ ಜರ್ ’ಜಿಣಿ’ ಮ್ಹಣ್ ವೊಲಾಯ್ತಾ ತರ್ ಹ್ಯಾ ಆವ್ದೆಂತ್ ತಾಣೆಂ ಕರ್ಚಾ ಕ್ರಿಯಾಕ್ ಹಾಂವ್ ಸೊಧ್ನಾಂ ಮ್ಹಣ್ಚೆಂ ಧಯ್ರ್ ಘೆತಾಂ. ಆನಿ ಜಸೊ ಮನಿಸ್ ಯೆತಾನಾ ವೆತಾನಾ ಎಕ್ಸುರೊಗೀ ತಶೆಂಚ್ ಹ್ಯಾ ಜಿಣ್ಯೆಆವ್ದೆಂತ್ ಎಕೆಕ್ ಸೊಧ್ನಾಂ ಕರ್ತಾಯ್ ಎಕ್ಸುರೊಚ್ ಜಾವ್ನ್... ಹ್ಯಾ ಸೊಧ್ನಾಂಚೊ ಶೆವೊಟ್ ವಾ ಇರಾದೊ ತ್ಯಾ ತ್ಯಾ ಮನ್ಶಾಚೆರ್, ತ್ಯಾ ತ್ಯಾ ಸಂದರ್ಭಾಚೆರ್ ಹೊಂದ್ವೊನ್ ಆಸ್ಯೆತಾ. ಜಶೆಂ ಭುಕೆಲ್ಲೊ ಮನಿಸ್ ಖಾಣಾಚಿಂ ಸೊಧ್ನಾಂ ಕರ್ತಾ ತರ್ ತಾನೆಲ್ಲೊ ಮನಿಸ್ ಉದ್ಕಾಚಿ ಸೊಧ್ನಾಂ ಕರ್ತಾ.
ಎಕಾ ಸಾದ್ಯಾ ಪುಣ್ ಗೂಂಡ್ ಅರ್ಥಾಚಾ ವಿಚಾರಾಕ್, ವೆವೆಗ್ಳ್ಯಾ ಇಮಾಜೆಂನಿ ಸೊಭವ್ನ್ ಉತ್ರಾಂ ಉತ್ರಾಂನಿ ತಿ ಗುಂಡಾಯ್ ವ್ಹಾಡಯಿತ್ತ್ ಕವಿತಾ ಲಿಖ್ಚಿ ಕಲಾ ಜಾಣಾಸ್ಚಾ ಥೊಡ್ಯಾ ಕವಿಂ ಪಯ್ಕಿ ಹಾಂವ್ ಮೆಲ್ವಿನ್ ಜೆ. ವಾಸ್ ಕೆಲರಾಯ್ ಹಾಕಾ ಎಕ್ಲೊ ಮ್ಹಣ್ ಖರೆಂಪಣಿಂ ಮಾಂಧ್ತಾಂ. ಕವಿತಾ ಬರಂವ್ಚಾಕ್ ಕುಪಾಂಚೆರ್ ಚಡ್ಚಿ ಗರ್ಜ್ ನಾ ಮ್ಹಣ್ಚಾಕ್ ವರ್ತಿ ರುಜ್ವಾತ್ ದಿಂವ್ಚಾಕ್ ಹೆಂ ಕವಿತಾ ಕಾಂಯ್ ಪಾಟಿಂ ಸರಾನಾ. ಆತಾಂ ಹೆಂ ’ಸೊಧ್ನಾಂ’ ಕವಿತಾಯ್ ತೆಚ್ಚ್ ಮೆಳಿಂತ್ ಆಸಾ, ತೆಚ್ಚ್ ಗುಂಡಾಯೆನ್ ಆಸಾ ಮ್ಹಳ್ಳೆಂ ಹ್ಯಾ ಕವಿತೆಚೊ ಎಕೆಕ್ ಪಂಗ್ತ್ಯೊ ಶಿಂದುನ್ ಅಧ್ಯಯನ್ ಕರ್ತಾಸ್ತಾಂ ಸಮ್ಜಾತೆಲೆಂ.
’ಉಗ್ಡಾಸಾ ಭಾಯ್ಲ್ಯಾ ಹ್ಯಾ ವಾಟೆರ್
ಥಂಯ್ ಹಾಂಗಾ ವಳ್ಕೊಂಚಿಂ ಪಾವ್ಲಾಂ
ಥೊಡಿಂ ಹಾಸ್ತಿಂ ಥೊಡಿಂ ಲಕ್ಚಿಂ
ಥಂಯ್ ಹಾಸ್ಚಿಂ ಹಾಂಗಾ ರಡ್ಚಿಂ
ಎಕೇಕ್ ಅಪ್ಲಿ ಕೂಸ್ ಬದ್ಲುಂಚಿಂ’
ಕವಿಚಾ ಉತ್ರಾಂಚಿ ಶ್ಯಾಥಿ ಪಾರ್ಕುಂಚೆಂ ತರ್, ಹ್ಯಾ ಉಡಾಸ್ ವಿಸ್ರೊನ್ ಗೆಲ್ಲ್ಯಾ ವಾಟೆರ್ ಕವಿಕ್ ದಿಸ್ಚಾ ಪಾವ್ಲಾಂನಿ ಸಯ್ತ್ ಹಾಸ್ಚಿಂ ಖಂಯ್ಚಿಂ ರಡ್ಚಿಂ ಖಂಯ್ಚಿ ಮ್ಹಳ್ಳೆಂ ಕಾರ್ಕುಂಚಿ ಶ್ಯಾಥಿ ಆಸಾ ಮ್ಹಣ್ತಾನಾ ಕವಿಚಾ ಕಲ್ಪನಾಂಚೊ ಅಂದಾಜ್ ಜಾತಾ. ಹೆಂ ಸಂಸಾರಿ ಜಿವಿತ್ ಏಕ್ ಪಯ್ಣ್, ಆನಿ ಹ್ಯಾ ಪಯ್ಣಾಂತ್ ಆಮ್ಚೆಸವೆಂ ಜಾಯ್ತೆ ಎಕಾ ವೆಳೆಚೊ ಸಾಂಗಾತ್ ದಿತಾತ್, ಕೊಣ್ ಖಿಣಾಂಚೊ ತರ್ ಕೊಣ್ ಜಿಣ್ಯೆಚೊ.. ಕೊಣ್ ವಳ್ಕೆಚೊ ಜಾತಾನಾ ಕೊಣ್ ಪರ್ಕಿಚ್ ಜಾವ್ನ್ ಉರ್ತಾ.. ಜಿಣ್ಯೆಚೆಂ ಲಿಸಾಂವ್ ಹೆಂ ಕಾಂಯ್ ವಿಪರ್ಯಾಸ್ ನ್ಹಯ್..
ಆನಿ ಹ್ಯಾ ಸಾಂಗಾತಾಂತ್ ತರ್ಯ್ ಎಕೆಕಾ ಸಾಂಗಾತಾಂತ್ ಎಕೆಕ್ ಮತ್ಲಬ್, ಎಕೆರ್ ಇರಾದೆ, ಎಕೆಕ್ ಶೆವೊಟ್, ಆನಿ ಎಕೆಕ್ ಸಂಬಂಧ್.. ಜಿಣ್ಯೆಚಾ ಎಕೆಕಾ ಸಂದರ್ಭಾಂನಿ ಕೆದ್ನಾಂ ಹೆಚ್ಚ್ ಶೆವೊಟ್ ಬದಲ್ತಾತ್ ತರ್ ಕೆದ್ನಾಂ ಶೆವೊಟ್ ಬದ್ಲಿತಾತ್, ಕೆದ್ನಾಂ ಸಂಬಂಧ್ ಬದ್ಲತ್ ತರ್ ಕೆದ್ನಾಂ ಸಂಬಂಧ್ಯೀ ಬದ್ಲತಾತ್.
ಆಬ್ಳೆ ಕವಿಚಿಂ ಸೊಧ್ನಾಂ ಹಾಂಗಾಸರ್ ಸುರು ಜಾತಾತ್, ಫುಡೆಂ ವಾಚ್ಯಾಂ;
’ಹ್ಯಾ ವಾಟೆವಯ್ಲ್ಯಾ ಮೊಳ್ಬಾ ವೆಂಗೆಂತ್
ಘಡಿ ದೋನ್ ಘಡಿಯಾಂಚಿ ಸುಂದರ್ ಸಪ್ಣಾಂ
ಏಕ್ ಹಾಸ್ಚೆಂ ಏಕ್ ದಡ್ಬಡ್ಚೆಂ
ಹಾಂಗಾ ಚಲ್ಚೆಂ ಥಂಯ್ ತುಟ್ಚೆಂ
ಎಕೇಕ್ ಮಧುರ್ ತಾಳ್ಯಾನ್ ಘುಣ್ಗುಣ್ಚೆಂ’
ಕವಿಚಾ ಸೊಧ್ನೆಕ್ ಹಾಂಗಾಸರ್ ರೂಪ್ ದಿಸ್ತಾ, ಕಾನ್ ದಿಸ್ತಾತ್. ರೂಪ್ ದಿಸ್ತಾ ಸುಂದರ್ ಸ್ವಪ್ಣಾಂನಿ - ಮ್ಹಣ್ಜೆ ಹ್ಯಾ ವಾಟೆವಯ್ಲ್ಯಾ ಮೊಳ್ಬಾಚಾ ವೆಂಗೆಂತ್ ದೋನ್ ಘಡಿಯಾಂಚಿಂ ಸುಂದರ್ ಸ್ವಪ್ಣಾಂ. ಮೊಳಾಬ್ ಮ್ಹಳ್ಯಾರ್ ಉಂಚಾಯೆಚೊ ಸಾಂಕೆತ್, ಆನಿ ಹ್ಯಾ ಉಂಚಾಯೆಚಿಂ ಸ್ವಪ್ಣಾಂ ಏಕ್ ದೋನ್ ಘಡಿಯಾಂಚಿ ಮ್ಹಣ್ತಾ ಕವಿ ಫುಡ್ಲ್ಯಾ ವೊಳಿಂನಿ;
ಹಾಂಗಾ ಚಲ್ಚೆಂ - ಕಿತ್ಯಾಕ್ ಮ್ಹಳ್ಯಾರ್ ಹಾಸ್ಚೆಂ, ಆನಿ ಥಂಯ್ ತುಟ್ಚೆಂ ಕಿತ್ಯಾಕ್ ಮ್ಹಳ್ಯಾರ್ ದರ್ವಡಾಚೆಂ..
ಎಕೆಕಾ ಮಧುರ್ ತಾಳ್ಯಾನ್ ಗುಣ್ಗುಣಾಂವ್ಚಿಂ ಸುಂದರ್ ಸ್ವಪ್ಣಾಂ....
ಮ್ಹಳ್ಯಾರ್ ಹ್ಯಾ ವಾಟೆವಯ್ಲ್ಯಾ ಮೊಳ್ಬಾಚಾ ವೆಂಗೆಂತ್ ಕವಿಚಿಂ ಸುಂದರ್ ಸ್ವಪ್ಣಾಂ ಲಿಪ್ಲ್ಯಾಂತ್, ಆನಿ ತಿಂ ಜಶಿಂ ಆಮ್ಚಿಂ ಪಾವ್ಲಾಂ ತಶಿಂ ತಿಂ ಸೊಭ್ತಾತ್ ಮ್ಹಣ್ತಾ ಕವಿ. ಫುಡ್ಲಿ ಪಂಗತ್ ವಾಚ್ಯಾಂ;
’ಉಗ್ಡಾಸಾ ಭಾಯ್ಲ್ಯಾ ತ್ಯಾ ಧೊಮ್ಸಾ ಪಾಟ್ಲ್ಯಾ ದರ್ಯಾಂತ್
ನೆಣ್ತೆಂ ಹೊಡೆಂ
ಆಪ್ಲ್ಯಾ ಪಾವ್ಲಾಂಚಿ ವಳೊಕ್ ಧರಿತ್ತ್
ಸಪ್ಣಾಂ ದೊಳ್ಯಾಂನಿ ಸೊಭಯಿತ್ತ್
ವ್ಹಳೂ ವ್ಹಳೂ ಸವ್ಕಾಸ್ ಸವ್ಕಾಸ್
ಎಕ್ಸುರೆಂ ಚಲೊನ್ ಚಲೊನ್
ಪಯ್ಣಾರ್ಯಾಚಿಂ ಸೊಧ್ನಾಂ ಕರೀತ್ತ್
ಲ್ಹಾರಾಂಸವೆಂ
ವೆಳೆಕ್ ಪಾಂವ್ಚಾಕ್..’
ಹಾಂಗಾ ಧೊಮಸ್ ಮ್ಹಣ್ಜೆ ಆಧಾರ್ ಮ್ಹಳ್ಳೊ ಸಾಂಕೇತ್ ಜಾವ್ಯೆತ್, ಕಿತ್ಯಾಕ್ ಮ್ಹಳ್ಯಾರ್ ಧೊಮ್ಸಾ ಪಾಟ್ಲೊ ದರ್ಯೊ ವ ದರ್ಯಾ ಮುಖ್ಲೊ ಧೊಮಸ್..
ಹಾಂಗಾಸರ್ ಕವಿಚಾ ಸೊಧ್ನಾಂಕ್ ಶೆವೊಟಾಚಿ ಕುರುಃ ಮೆಳ್ಚಿ ದಿಸೊನ್ ಯೆತಾ, ಹೆಂ ಹೊಡೆಂ ನೆಣ್ತೆಂ, ಕಿತ್ಯಾಕ್ ಧೊಮ್ಸಾ ಪಾಟ್ಲ್ಯಾ ತೇಂಯೀ ಉಡಾಸಾಭಾಯ್ಲ್ಯಾ ದರ್ಯಾಂತ್ ಹೆಂ ಹೊಡೆಂ ಅಪ್ಲ್ಯಾ ಕಾಲ್ಚಾ ಪಾವ್ಲಾಂಚಿ ವಳೊಕ್ ಧರಿತ್ ದೊಳ್ಯಾಂನಿ ಸೊಭಿತ್ ಸ್ವಪ್ಣಾಂ ಸಜಯಿತ್ತ್, ಎಕ್ಸುರೆಂ ಚಲೊನ್, ಅಪ್ಲ್ಯಾ ಪಯ್ಣಾರ್ಯಾಚಿಂ ಸೊಧ್ನಾಂ ಕರುನ್ ಲ್ಹಾರಾಂಸವೆಂ ಸೊಧ್ನಾಂ ಕರ್ತಾ ಭೋವ್ಶಾ ಸಾಂಗಾತಾಕ್.. ತರ್ ಹ್ಯಾ ಹೊಡ್ಯಾಚಿ ವೇಳ್ ಕಸಲಿ?? ಶೆವೊಟ್ ಕಸಲೊ??
ಮ್ಹಳ್ಯಾರ್ ಕೊಣಾಚಾಗೀ ಜಿಣ್ಯೆಚೊ ಸಾಂಗಾತ್ ದೀಂವ್ಕ್ ಸಕ್ಚೆಂ ಹೆಂ ಹೊಡೆಂ ಅಪ್ಲ್ಯಾ ಸಾಂಗಾತಿ ವಾಟ್ಸುರಿಕ್ ಸೊಧುನ್ ಬೊಸ್ಲಾ, ಅಪ್ಲಿ ಎಕ್ಸುರಿ ಜಿಣಿ ಅಪ್ಲ್ಯಾ ಶ್ಯಾಥಿಯೆಕ್ ವ್ಯರ್ಥ್ ಕರ್ತಾಮೂ? ಅಪ್ಲ್ಯಾ ದೊಳ್ಯಾಂನಿ ಪಳೆಲ್ಲಿಂ ಸುಂದರ್ ಸ್ವಪ್ಣಾಂ ಜರ್ ಕಾರ್ಯಗತ್ ಜಾಯ್ಜಯ್ ತರ್ ಅಪ್ಣಾಕ್ ಅಪ್ಲೊ ಪಯ್ಣಾರಿ ಸಾಂಗಾತಿ ಗರ್ಜ್ ಆಸಾ ಮ್ಹಳ್ಳಿಂ ಸೊಧ್ನಾಂ ಕರೀತ್ ವೆತಾ.
ಕವಿ ಆಪ್ಲ್ಯಾ ಸೊಧ್ನೆಚೆ ಮಿಸ್ತೆರ್ ಜರೂರ್ ಉಗ್ತೆ ಕರ್ತಾ ತರ್ಯೀ ಉಗ್ಡಾಪಿಂ ಕರಿನಾ. ಫುಡ್ಲಿ ಪಂಗತ್ ವಾಚ್ಯಾಂ;
’ಲ್ಹಾರಾಂ ಉಟ್ತಾತ್
ವೆಳೆಕ್ ವೆಂಗುನ್ ಯೆತಾತ್
ಸೊಧುನ್ಂಚ್ ಆಸಾಂ ಹ್ಯಾಚ್ ಲ್ಹಾರಾಂನಿ
ತ್ಯಾ ಸಪ್ಣಾಂಕ್ ನ್ಹಯ್ ತ್ಯಾ ವಾಟೆಕ್ ನ್ಹಯ್
ಸೊಧುನ್ ಆಸಾಂ ತ್ಯಾಚ್ ಹೊಡ್ಯಾಕ್
ಕಿತ್ಯಾಕ್ ಹಾಂವ್ಂಚ್ ತಾಚೊ ಸಾಂಗಾತಿ
ಹಾಂವ್ಂಚ್ ತಾಚೊ ಪಯ್ಣಾರಿ’
ಅಖ್ರೇಕ್ ಕವಿ ಅಪ್ಲೊ ಮಿಸ್ತೆರ್ ಉಗ್ಡಾಪೊ ಕರ್ತಾ, ಹ್ಯಾ ವೆಳೆಕ್ ವೆಂಗುಂಕ್ ಯೆಂವ್ಚಾ ಲ್ಹಾರಾಂನಿ, ಏಕ್ ಹೊಡೆಂ ಕಿತೆಂ ಸೊಧ್ತಾ? ಕವಿ ಮ್ಹಣ್ತಾ ನ್ಹಯ್ ಸ್ವಪ್ಣಾಂಕ್, ನ್ಹಯ್ ವಾಟೆಕ್.. ಬಗಾರ್ ಸೊಧುನ್ ಆಸಾಂ ಅಪ್ಣಾಚೊ ಸಾಂಗಾತ್ ಚುಕ್ಲ್ಲ್ಯಾ ತ್ಯಾಚ್ಚ್ ಹೊಡ್ಯಾಕ್.. ಕಿತ್ಯಾಕ್ ಅಪುಣ್ಂಚ್ ತಾಚೊ ಸಾಂಗಾತಿ ಆನಿ ಅಪುಣ್ಂಚ್ ತಾಚೊ ಪಯ್ಣಾರಿ ಮ್ಹಣ್.
ಏಕ್ ಸೊಭಿತ್ ಕವಿತಾ ಬರಂವ್ಚಾಕ್ ಏಕ್ ಗಂಭೀರ್ ವಿಶಯ್ ವ ನಿಗೂಡ್ ವಿಶಯ್ ಜಾಯ್ಜಯ್ ಮ್ಹಣ್ ನಾ ಬಗಾರ್ ಎಕಾ ಭೋವ್ ಸಾದ್ಯಾ ವಿಶಯಾಕ್ ಕವಿತೆಚೆಂ ರೂಪ್ ದೀಂವ್ಕ್ ಸಾಧ್ಯ್ ಆಸಾ ಮ್ಹಣ್ ಹೆಂ ಕವಿತಾ ಗೊವಾಯ್ ದಿತಾನಾ ಕವಿತೆಚಿ ಸೊಭಾಯ್ ಕವಿತಾರಸಿಕಾಂಕ್ ಖೂಬ್ ಆವಡ್ತಾ.
ಸಂಪ್ಯಾ ರಿತಿನ್ ಸಾಂಗ್ಚೆಂ ತರ್ ಏಕ್ ಹೊಡೆಂ ದರ್ಯಾಂತ್ ಭಾಯ್ರ್ ಪಡ್ಲಾಂ, ಆತಾಂ ತ್ಯಾ ಹೊಡ್ಯಾಚೆಂ ಸಾಂಗಾತಿ ಹೊಡೆಂ ತ್ಯಾ ಹೊಡ್ಯಾಕ್ ಸೊಧ್ತಾ.
ಹೆಂಚ್ ಕವಿತಾ ಜೆದ್ನಾಂ ಸಾಂಕೇತಿಕ್ ರಿತಿನ್ ಗಳ್ಸುನ್ ಜಿಣ್ಯೆಲಿಸಾಂವಾಚಾ ಲೆಕಾರ್ ಘೆತ್ಲೆಂ ತರ್ ಜಾಯ್ತೊ ಗೂಂಡ್ ಅರ್ಥ್ ದಿಂವ್ಚಾಂತ್ ಜಯ್ತೆವಂತ್ ಜಾತಾ. ಹಿಚ್ಚ್ ಕವಿತಾಚಿ
ಸೊಭಾಯ್..
ಲ್ಹಾರಾಂಸವೆಂ ಕವಿಚಿಂ ವಿಚಿತ್ರ್ ಸೊಧ್ನಾಂ! [ - ಪ್ರಿಯಾ ಸಿಕ್ವೇರಾ, ಫೆರಾರ್]
ಸೊಧ್ನಾಂ ಕವಿತಾ ವಾಚುನ್ ಹಾಚೊ ಮೂಳ್ ಅರ್ಥ್ ಸಮ್ಜೊಂಕ್ ಹಾಂವೆ ಹೆಂ ಕವಿತಾ ಧಾ ಪಾವ್ಟಿಂಚಾಕಿ ಚಡ್ ಪಾವ್ಟಿಂ ವಾಚಿಜಾಯ್ ಪಡ್ಲೆಂ. ಹ್ಯಾ ಕವಿತಾಚೊ ಅರ್ಥ್ ಸಮ್ಜೊಂಕ್ ಹಾಂವೆಂ ಏಕ್ ಸಾಹಸ್ಚ್ ಕೆಲಾಂ. ಕಶೆಂ ತಾಂದುಳ್ ತೊಪ್ಲ್ಯಾಂತ್ ಘಾಲ್ನ್ ನೆರಾವ್ನ್ ಫಾತ್ರಾಚಿಂ ಸೊಧ್ನಾಂ ಕರ್ನ್ ವಿಂಗಡ್ ಕರ್ತಾತ್ಗಿ ತಶೆಂಚ್ ಹೆಂ ಕವಿತಾ ವಾಚುನ್ ನೆರಾಯ್ಲೆಂ,...ಆರಾಯ್ಲೆಂ... ಕವಿ ಮೆಲ್ವಿನಾಚಾ ಹ್ಯಾ ಕವಿತೆಧ್ವಾರಿಂ ಏಕಾ ಥರಾಚಿಂ ಸೊಧ್ನಾಂ ಆನಿಂ ಮ್ಹಜಿ ಹ್ಯಾ ಕವಿತೆಂತ್ ಅರ್ಥ್ ಸೊಧ್ಚಿಂ ಸೊಧ್ನಾಂ.
ಮನಿಸ್ ಜಾಲ್ಲ್ಯಾಂಕ್ ಹ್ಯಾ ಸಂಸಾರಿಂ ಸೊಧ್ನಾಂ ಕೆದಿಂಕ್ಚ್ ಮುಗ್ದಾಲ್ಲಿಂ ನಾಂತ್, ಸರ್ವಾಂಚಿ ಎಕೇಕ್ ಥರಾಂಚಿ ಸೊಧ್ನಾಂ. ಥೊಡ್ಯಾಂಕ್ ಪಯ್ಶೆಂ ಕರ್ಚ್ಯಾ ವಾಟೆಚಿಂ ಸೊಧ್ನಾಂ ಆನಿಂ ಥೊಡ್ಯಾಂಕ್ ಕಾಮಾಚಿಂ ಸೊಧ್ನಾಂ, ಶಾಂತಿ ಸಮಧಾನಾಚಿಂ ಸೊಧ್ನಾಂ ...ಆಶೆಂ ನಾನಾ ಥರಾಂಚಿಂ ಸೊಧ್ನಾಂ.
ಜಿಣ್ಯೆಂತ್ ಘಡ್ಚಿಂ ಘಡಿತಾಂ ಸಭಾರ್. ಜಿಣಿ ಏಕ್ ಪಯ್ಣ್. ಪಯ್ಣಾರ್ ಆಮ್ಕಾಂ ಕಶೆಂ ಸಬಾರ್ ಜಣಾಂಚಿ ವಳಕ್ ಮಿಲಾಗತ್ ಜಾತಾಗಿ ತಶೆಂಚ್ ಜಿಣ್ಯೆ ಪಯ್ಣಾಂತ್. ಹರ್ಯೇಕಾ ಘಡ್ಯೆ ಜಿಣಿ ಲಿಸಾಂವ್ ಶಿಕಯ್ತಾ. ಜಿಣ್ಯೆ ಪಯ್ಣಾ ವಿಶ್ಯಾಂತ್ ಆಪ್ಣಾಂಚಿ ಭಗ್ಣಾಂ ಕವಿತೆಂತ್ಲ್ಯಾ ಕವಿನ್ ಹ್ಯಾ ಕವಿತಾಂತ್ ಉಚಾರ್ಲ್ಯಾತ್.
”ಉಗ್ಡಾಸಾ ಭಾಯ್ಲ್ಯಾ ಹ್ಯಾ ವಾಟೆರ್’
ಜೀವನಾಂಚಿಂ ಹಂತಾಂ ಸಭಾರ್. ಪಯ್ಲೆಂ ಬಾಳ್ಪಣ್, ಭುರ್ಗೆಂಪಣ್, ತರ್ನಾಟ್ಪಣ್ ಆನಿಂ ಮಾತಾರ್ಪಣ್. ಜಿಣಿ ಏಕ್ ಪಯ್ಣ್. ಜಿಣ್ಯೆಚಾ ಪಯ್ಣಾಚಾ ಲಾಂಬ್ ವಾಟೆಚೆರ್ ಘಡ್ಚೆಂ ಹರ್ಯೇಕ್ ಘಡಿತ್ ಉಗ್ಡಾಸಾಂತ್ ಉರ್ತಾತ್ ಮ್ಹಣ್ ಸಾಂಗೊಂಕ್ ಜಾಯ್ನಾಂ. ಚಲೊನ್ ಆಯಿಲ್ಲಿ ವಾಟ್ ಉಗ್ಡಾಸಾ ಭಾಯ್ಲಿ ಮ್ಹಣ್ ಕವಿತೆಂತ್ಲೊ ಕವಿ ಸಾಂಗ್ತಾ. ಕವಿನ್ ಮಟ್ವ್ಯಾ ರಿತಿನ್ ಚಾಲ್ತ್ಯಾ ಜಿಣ್ಯೆಂತ್ ಘಡ್ಚಿಂ ಘಡಿತಾಂ ಹಾಂಗಾ ಉಚಾರ್ಲ್ಯಾಂತ್.
”ಥೊಡಿಂ ಹಾಸ್ತಿಂ ಥೊಡಿಂ ಲಕ್ಚಿಂ
'ಥಂಯ್ ಹಾಸ್ಚಿಂ ಹಾಂಗಾ ರಡ್ಚಿಂ
'ಎಕೇಕ್ ಆಪ್ಲಿ ಕೂಸ್ ಬದ್ಲುಂಚಿ’
ವಳ್ಕೊಂಚಿ ಪಾವ್ಲಾಂ ಮ್ಹಳ್ಯಾರ್ ಜಿಣ್ಯೆಂತ್ಲಿ ಹರ್ಯೇಕ್ ಘಡಿ; ಸುಖಾಚಿ, ಸಂತೊಸಾಚಿ, ದುಃಖಾಚಿ, ಅನ್ವಾರಾಚಿ. ಹರ್ಯೆಕ್ ಪಾವ್ಟಿಂ ಜಿಣ್ಯೆಂತ್ ಸುಖ್ಚ್ ಆಸ್ತಾ ಮ್ಹಣ್ ಸಾಂಗೊಂಕ್ ಸಾಧ್ಯ್ ನಾ. ನಿಸ್ತ್ಯಾಂತ್ ಕಶೆಂ ಇಲ್ಲೆಂ ಆಮ್ಶೆಂ, ಇಲ್ಲೆಂ ತಿಕ್ಶೆ ಆಸ್ಲಾರ್ ತಾಕಾ ರೂಚ್ಗಿ ತಶೆಂಚ್ ಜಿಣ್ಯೆಂತ್. ಕಷ್ಟ್, ಸುಖ್ ಅಸ್ಲ್ಯಾರ್ ಮಾತ್ರ್ ಜಿಣಿ ಸುಂದರ್. ಕಾಳೊಕಾಂತ್ ಉಜ್ವಾಡ್ ಫಾಂಕ್ತಾನಾ ಕಶೆಂ ಉಜ್ವಾಡಾಚೊ ಮಹತ್ವ್ ಕಳ್ತಾಗಿ ತಶೆಂಚ್ ಕಷ್ಟಾ ಉಪ್ರಾಂತ್ ಸುಖ್ ಆಯ್ಲ್ಯಾರ್ ಮಾತ್ರ್ ಸುಖಾಚೊ ಮಹತ್ವ್ ಕಳ್ತಾ. ಥೊಡಿಂ ಘಡಿತಾಂ ಸಂತೊಸ್ ಹಾಡ್ತಾನಾ, ಥೊಡೆಂ ಪಾವ್ಟಿಂ ನಿರಾಶೆನ್ ಲಕೊನ್ ಪಡ್ಚೆಂಯ್ ಸಹಜ್. ಹ್ಯಾ ವೆಳಾರ್ ಫಳಾಫಳ್ ಘೆಂವ್ಕ್ ಆಶೆಂವ್ಚೆಂ ಚಡ್. ನಿರ್ಧಿಷ್ಟ್ ದ್ಯೇಯ್ ಸೊಡ್ನ್ ಭಿರಾಂತೆನ್ ಜಿಣ್ಯೆಚೆಂ ರೂಪ್/ ಕೂಸ್ ಬದ್ಲುಂಚಿ. ಆಸಲಿಂ ಸರ್ವ್ ಘಡಿತಾಂ ಕವಿ ಹಾಂಗಾಸರ್ ಉಲ್ಲೇಕ್ ಕರ್ತಾ.
”ಹ್ಯಾ ವಾಟೆ ವಯ್ಲ್ಯಾ ಮೊಳ್ಬಾ ವೆಂಗೆಂತ್
'ಘಡಿ ದೋನ್ ಘಡಿಯಾಂಚಿ ಸುಂದರ್ ಸಪ್ಣಾಂ’
ಮೊಳಾಬ್ ವಿಸ್ತಾರ್ ಆನಿಂ ವಿಶಾಲ್. ಮೊಳಾಬ್ ಮ್ಹಳ್ಯಾರ್ ಮ್ಹಾಕಾ ಅರ್ಥ್ ಜಾಂವ್ಚೆ ಫರ್ಮಾಣೆಂ ಜಿಣಿಂ. ಜಿಣ್ಯೆ ಪಯ್ಣಾಚ್ಯಾ ವಾಟೆರ್ ದೋನ್ ಘಡಿಯಾಂಚಿ ಸುಂದರ್ ಸಪ್ಣಾಂ. ಸಪ್ಣಾಂ ದೆಖ್ಚೆಂ ಸಹಜ್. ಸ್ವಪಾಣ್ ತೆಂ ದೋನ್ ಘಡಿಯಾಂಚೆಂ. ಜಾಗ್ ಜಾತಾನಾ ಕೇವಲ್ ಹಕೀಗತ್. ಜಾಲ್ಯಾರಿ ತೆಂ ಸ್ವಪಾಣ್ ಸಭಾರ್ ಪಾವ್ಟಿಂ ಆಮ್ಕಾಂ ಧಯ್ರಾನ್ ಭರ್ತಾ. ತೆಂ ಹಕೀಗತೆಂತ್ ಬದ್ಲುಂಕ್ ಖರೆಂ ಪ್ರಯತ್ನ್ ಕರ್ತಾಂವ್. ಹಾಂಗಾಸಾರ್ ಪಳೆಯಾ ಕವಿ ಮ್ಹಣ್ತಾ "ದೋನ್ ಘಡಿಯೊ" ಮ್ಹಳ್ಯಾರ್ ಜಿಣ್ಯೆಚಿ ಹಂತಾಂ. ಜಿಣ್ಯೆಂತ್ ಥೊಡೆಂ ಪಾವ್ಟಿಂ ಸಂತೊಸ್. ಆನಿಂ ತೊ ಸಂತೊಸ್ ಸ್ವಪಾಣ್ ದೆಖ್ಲ್ಲ್ಯಾಬರಿ ಮಾಯಾಕ್ ಜಾಂವ್ಕ್ ವೇಳ್ ಲಾಗಾನಾ. ದುಸ್ರ್ಯಾ ಘಡಿಯೆ ದೂಕ್, ಕಷ್ಟ್ ಮ್ಹಣ್ ಕವಿತೆಂತ್ಲೊ ಕವಿ "ಏಕ್ ಹಾಸ್ಚೆಂ ಏಕ್ ದಡ್ಬಡ್ಚೆಂ" ಹಾಂಗಾಸಾರ್ ಸಾಂಗ್ತಾ.
”ಹಾಂಗಾ ಚಲ್ಚೆಂ ಥಂಯ್ ತುಟ್ಚೆಂ’
ಅರ್ಥ್ ನಾತ್ಲ್ಲಿ ಸ್ವಪ್ಣಾಂ ವೆಳೆರ್ ಬಾಂದ್ಲ್ಲ್ಯಾ ರೆಂವೆಚ್ಯಾ ಭಾಂದ್ಪಾಪರಿ. ತೆಂ ಕೊಸ್ಳೊಂಕ್ ಚಡ್ ವೇಳ್ ಲಾಗಾನಾ. ಅಸಲಿಂ ಸಪ್ಣಾಂ ಮತಿ ಪಡ್ದ್ಯಾರ್ ಘುಂವೊನ್ಂಚ್ ಆಸ್ತಾತ್. ಪುಣ್ ನಿರ್ಧಿಷ್ಟ್ ಧ್ಯೇಯ್ ಆಸೊನ್ ಸಪ್ಣಾಂ ದೆಕ್ಚೆಂ ಆನಿಂ ತೆಂ ಸ್ವಪಾಣ್ ತುಟ್ಲ್ಲ್ಯಾವೆಳಾರ್ ಜಾಂವ್ಚಿ ದೂಕ್ ಆಪಾರ್. ಹೆಂ ಜಿಣ್ಯೆಚೆಂ ಹಕೀಗತ್. ಸದಾಂ ಘಡ್ಚೆಂ ಆನಿಂ ಘಡೊನ್ ಆಸ್ಚೆಂ.
”ಎಕೇಕ್ ಮಧುರ್ ತಾಳ್ಯಾನ್ ಘುಣ್ಗುಣ್ಚೆಂ’
ಜಿಣ್ಯೆಂತ್ ಘಡ್ಚೆಂ ಹರ್ಯೇಕ್ ಘಡಿತಾಂ ಲಿಸಾಂವ್ ದಿತಾತ್. ಏಕ್ ನಿರ್ದಿಷ್ಟ್ ಸಂದೇಶ್ ದಿತಾತ್ ಮ್ಹಣ್ ಕವಿ ವಯ್ಲ್ಯಾ ಉತ್ರಾಂನಿ ಸಾಂಗ್ತಾಂ.
ಪಯ್ಲೆಂಚಾ ದೋನ್ ವೊಳಿಂನಿ ಜಿಣ್ಯೆಚೆಂ ಪಯ್ಣ್, ಜಿಣ್ಯೆಚಿ ಘಡಿತಾಂ ಹ್ಯಾ ವಿಷ್ಯಾಂತ್ ಉಲಯ್ಲೊ ಕವಿತಾಂತ್ಲೊ ಕವಿ ಸಕಯ್ಲ್ಯಾ ತೀನ್ ಪಂಗ್ತಿನಿಂ ಸೊಧ್ನಾಂ ಕರ್ಚಿಂ ಆಮಿಂ ಪಳೆವ್ಯೆತ್.
”ಉಗ್ಡಾಸಾ ಭಾಯ್ಲ್ಯಾ ತ್ಯಾ ಧೊಮ್ಸಾ ಫಾಟ್ಲ್ಯಾ ದರ್ಯಾಂತ್’
ಧೊಮಸ್ ಮ್ಹಳ್ಯಾರ್ ಏಕ್ ಉಭಾರ್ ಗುಡ್ಯಾ ಸುವಾತ್. ಹ್ಯಾ ಉಭಾರಾಯೆಚ್ಯಾ ಸುವಾತೆ ಪಾಟ್ಲೊ ದರ್ಯೊ ಆಮಿಂ ಪಳೆಂವ್ಕ್ ಸಾಧ್ಯ್ ಆಸಾಗಿ. ನಾ. ಹ್ಯಾ ದರ್ಯಾಂತ್ ಆಸಾ ನೆಣ್ತೆಂ ಹೊಡೆಂ. ಮ್ಹಳ್ಯಾರ್ ದೊಳ್ಯಾಂಕ್ ದಿಸಾನಾತ್ಲ್ಲಿ ಆದೃಶ್ಯ್ ಸಕತ್. ಪುಣ್ ಅಸ್ತಿತ್ವಾಂತ್ ಆಸ್ಚಿ, ಆನಿ ಥಂಯ್ ಆಸ್ಚಾ ನೆಣ್ತ್ಯಾ ಹೊಡ್ಯಾಕ್ ಸೊಧ್ಚೆಂಚ್ ಕವಿಚಿಂ ಸೊಧ್ನಾಂ. ಹೆಂ ಹೊಡೆಂ ಸವ್ಕಾಸ್ ಎಕ್ಸುರೆಂಚ್ ಚಲೊನ್ ಪಯ್ಣ್ಯಾರಾಂಚಿ ಸೊಧ್ನಾಂ ಕರಿತ್ತ್ ಆಸಾ. ಹ್ಯಾ ಹೊಡ್ಯಾಕ್ ನಿರ್ಧಿಶ್ಟ್ ಧ್ಯೇಯ್ ಆಸಾ. ಆನಿಂ ಹೊ ಧ್ಯೇಯ್ ಜಾವ್ನಾಸಾ ಲ್ಹಾರಾಂಸಂಗಿ ಉಪ್ಯೆವ್ನ್ ವೆಳೆಕ್/ ತಡಿಕ್ ಪಾಂವ್ಚೊ. ಮ್ಹಳ್ಯಾರ್ ಏಕ್ ನಿರ್ಧಿಷ್ಟ್ ಶೆವೊಟ್.
ಆಖೆರಿಚ್ಯಾ ಪಂಗ್ತಿರ್ ಕವಿ ಕಿತೆಂ ಸೊಧ್ತಾ ಮ್ಹಳ್ಳೆಂ ಪಳೆವ್ಯೆತ್. ಕವಿ ಸಪ್ಣೆಲ್ಯ್ಯಾ ಸಪ್ಣಾಂಕ್ ನ್ಹಂಯ್ ಯಾ ಚಲೊನ್ ಆಯಿಲ್ಲ್ಯಾ ವಾಟೆನ್ಯಿ ನ್ಹಂಯ್. ಬಗಾರ್ ವೆಳೆಕ್ ಮಾರ್ಚಾ ಲ್ಹಾರಾಂನಿ ತ್ಯಾ ಹೊಡ್ಯಾಕ್ ಸೊಧುನ್ ಆಸಾ. ಕಿತ್ಯಾಕ್ ತ್ಯಾ ಹೊಡ್ಯಾಚೊ ತೊಚ್ಚ್ ಸಾಂಗಾಂತಿ ಆನಿಂ ತೊಚ್ಚ್ ಪಯ್ಣಾರಿ. ಪುಣ್ ಹೆ ಹೊಡೆಂ ಚುಕೊನ್ ಗೆಲಾಂ ಮ್ಹಣ್ ಕವಿನ್ ಖಂಯ್ಸರ್ ಉಲ್ಲೇಖ್ ಕರುಂಕ್ ನಾಂ. ಮ್ಹಳ್ಯಾರ್ ಹೆಂ ಹೊಡೆಂ ತಾಚೆಲಾಗಿಂಚ್ ಆಸಾ. ಜಾಲ್ಯಾರೀ ತಾಚಿ ಸೊಧ್ನಾಂ. ಕಸಲೊಗಿ ಗುಸ್ಫೊಡ್. ತರ್ ಹೆಂ ಹೊಡೆಂ ಕಸಲೆಂ ಮ್ಹಣ್ ಸಮ್ಜೊಂಚೆ? ಹೊಡೆಂ ಮ್ಹಳ್ಯಾರ್ ದೋಣ್ ವೊಚ್ಚಿತಾನಾ ಉಪಯೋಗ್ಸುಂಚೊ ರೂಕಾಚೊ ಕುಡ್ಕೊ. ದೋಣ್ ಚಲಜಾಯ್ ತರ್ ಹೆಂ ಹೊಡೆಂ ಗರ್ಜೆಚೆಂ. ಆಸಲ್ಯಾಚ್, ಜಿಣಿ ಚಲೊಂಕ್ ಗರ್ಜ್ ಆಸ್ಲ್ಲ್ಯಾ, ಆಧಾರ್ ಜಾಂವ್ಚಾ ತ್ಯಾ ಹೊಡ್ಯಾಚಿಂ ಸೊಧ್ನಾಂ ಕವಿ ಹಾಂಗಾಸರ್ ಕರ್ತಾ.
ಹಾಂಗಾಸರ್ ಹೊಡೆಂ ಸಾಂಕೇತಿಕ್ ರಿತಿನ್ ಕಿತೆಂ ಮ್ಹಣ್ ಕವಿ ಮಾತ್ರ್ ಜಾಣಾಂ. ಜಾಲ್ಯಾರೀ ಹೆಂ ಹೊಡೆಂ ಕಸಲೆಂ ಜಾಂವ್ಕ್ ಪುರೊ ಮ್ಹಣ್ ಹಾಂವೆಂ ಜಾಯ್ತೆಂ ಆಟಾಯ್ಲೆಂ. ತರ್ ವಿದ್ಯಾರ್ಥಿ ಜಾಲ್ಲ್ಯಾ ಹಾಂವೆಂ ಮ್ಹಾಕಾ ಕಿತೆಂ ಭೊಗ್ಲೆಂ ಮ್ಹಣ್ ಸಾಂಗಾನಾ ತರ್ ತೆಂ ಸಾರ್ಕೆಂ ಜಾಂವ್ಚೆನಾ. ಖುದ್ಧ್ ಹೆಂ ಕವಿತಾ ಲಿಖ್ಲ್ಲ್ಯಾ ಕವಿನ್ ಆನಿಂ ಹೆರಾಂನಿ ಒಪ್ವೊಂಚೆಂ ಯಾ ಸೊಡ್ಚೆಂ ತಾಂಚೆರ್ ಹೊಂದುನ್ ಆಸಾ.
ಹೊಡೆಂ ಮ್ಹಳ್ಯಾರ್ ಮ್ಹಾಕಾ ಬೊಗ್ಲ್ಲ್ಯಾ ಪರ್ಮಾಣೆಂ ಆತ್ಮ್ವಿಶ್ವಾಸ್.
”ನೆಣ್ತೆಂ ಹೊಡೆಂ
'ಆಪ್ಲ್ಯಾ ಪಾವ್ಲಾಂಚಿ ವಳಕ್ ದರಿತ್’
ಆತ್ಮ್ವಿಶ್ವಾಸ್ ಜಿಣ್ಯೆಚೆ ಹರ್ಯೇಕ್ ಮೇಟ್ ಧೈರಾನ್ ಮುಖಾರ್ ದವರುಂಕ್ ಆಧಾರ್ ದಿತಾ. ಹರ್ಯೇಕ್ ಪಾವ್ಲಾಂ ಚಿಂತುಂನ್ ಕಾಡುಂಕ್ ಕುಮಕ್ ಕರ್ತಾ. ಮುಖ್ಲೆಂ ಮೇಟ್ ಕಶೆಂ ರಾವತ್ ಮ್ಹಳ್ಳಿ ಜಾಗ್ವಣ್ ದಿತಾ. ಖಂಚೆಯ್ ಕಾಮ್ ಹಾತಿಂ ಧರ್ಲ್ಯಾರ್ ತೆಂ ಪೊಂತಾಕ್ ಪಾವೊಂಕ್ ಆತ್ಮ್ವಿಶ್ವಾಸ್ ಗರ್ಜ್. ಜ್ಯಾ ಮನ್ಶಾ ಥಂಯ್ ಆತ್ಮ್ವಿಶ್ವಾಸ್ ಆಸಾನಾ ತಾಕಾ ಏಕಾ ಪೊಟ್ಟು ಬಾಂಯ್ಕ್ ಸರಿ ಕರ್ಯೆತ್. ತಿ ನಾಂವಾಕ್ ಮಾತ್ರ್ ಬಾಂಯ್. ಥಂಯ್ಸರ್ ಉದಾಕ್ ಆಸಾನಾ.
”ಸಪ್ಣಾಂ ದೊಳ್ಯಾಂನಿ ಸೊಭಯಿತ್ತ್’
ಸಪ್ಣಾಂ ಮ್ಹಳ್ಯಾರ್ imagination ಜೆಂ ಕಾಳ್ಜಾಂತ್ ಆನಿಂ ಮತಿಂತ್ ರೊಂಬೊನ್ ಆಸ್ಚೆಂ. ಆನಿಂ ಹೆಂ ಹಕೀಗತೆಂತ್ ಬದ್ಲುಂಕ್ ಕಠಿಣ್ ಪರಿಶ್ರಮ್ ಆನಿಂ ಆತ್ಮ್ವಿಶ್ವಾಸ್ ಗರ್ಜೆಚೊ. ಹೊ ಆತ್ಮ್ವಿಶ್ವಾಸ್ ಎಕ್ಲ್ಯಾಕ್ ಆಶಾವಾದಿ ಕರ್ತಾ. ಆತ್ಮ್ವಿಶ್ವಾಸ್ ಆಸಾ ತರ್ ನಿರ್ಧಿಷ್ಟ್ ಧ್ಯೇಯ್ ಪೊಂತಾಕ್ ಪಾವಂವ್ಕ್ ಕಷ್ಟ್ ಲಾಗಾನಾಂತ್.
”ವ್ಹಳೂ ವ್ಹಳೂ ಸವ್ಕಾಸ್ ಸವ್ಕಾಸ್
’ಎಕ್ಸುರೆಂ ಚಲೊನ್ ಚಲೊನ್
’ಪಯ್ಣಾರ್ಯಾಂಚಿ ಸೊಧ್ನಾಂ ಕರಿತ್ತ್
’ಲ್ಹಾರಾಂ ಸವೆಂ
’ವೆಳೆಕ್ ಪಾಂವ್ಚಾಕ್’
ಆಮ್ಚೊ ಆತ್ಮ್ವಿಶ್ವಾಸ್ ಜಿಣ್ಯೆಂತ್ ಕಿತ್ಲಿಂಯ್ ಆನ್ವಾರಾಂ ಆಯ್ಲ್ಯಾರ್ಯಿ
ಸವ್ಕಾಸ್ ತರೀ ಧಯ್ರಾನ್ ಮೇಟ್ ಮುಖಾರ್ ದವರುಂಕ್ ಆಧಾರ್ ದಿತಾ.
”ಲ್ಹಾರಾಂ ಸವೆಂ
’ವೆಳೆಕ್ ಪಾಂವ್ಚಾಕ್’
ಲ್ಹಾರಾಂ ಉಟ್ತಾತ್ ವೆಳೆಕ್
ವೆಂಗ್ತಾತ್ ಆನಿಂ ಪಯ್ಸ್ ಸರ್ತಾತ್. ಮ್ಹಳ್ಯಾರ್ ಜಿಣ್ಯೆಂತ್ಲೆ ಕಷ್ಟ್ ಅನ್ವಾರ್,
ಸುಖ್, ದುಃಕ್. ಜೆಂ ಜಿಣಿ ಮ್ಹಳ್ಯಾ ಪಯ್ಣಾಕ್ ವೆಂಗ್ತಾ ಆನಿಂ
ಹೆಂ ತಾತ್ಕಾಲಿಕ್. ಜಶೆಂ ಕಾಳೊಕಾ ಪಾಟ್ಲ್ಯಾನ್ ಉಜ್ವಾಡ್ ಜರೂರ್ ಫಾವೊ ಜಾತಾಗಿ ತಶೆಂ ಕಷ್ಟಾಂ ಉಪ್ರಾಂತ್
ಸುಖ್ ಜರೂರ್ ಮೆಳ್ತಾ. ಹಿಂ ಜಿಣ್ಯೆಚಿಂ ಹಂತಾಂ. ಜಿಂ ತಾತ್ಕಾಲಿಕ್. ಜಶೆಂ ಕವಿನ್
ಹಾಂಗಾಸರ್ ಲ್ಹಾರಾಂಕ್ ಸರಿ ಕೆಲ್ಲ್ಯಾಪರಿಂ ಆಸಲ್ಯಾ ಕಷ್ಟಾಂ ವೆಳಾರ್
ಹೊ ಆತ್ಮ್ವಿಶ್ವಾಸ್ ವ್ಯಕ್ತಿಂಕ್ ಭರ್ಪೂರ್ ಧಯ್ರಾನ್ ಭರ್ತಾ. ಆನಿಂ
ಹ್ಯಾ ಲ್ಹಾರಾಂಸವೆಂ ಸವ್ಕಾಸ್ ತರೀ ಧಯ್ರಾನ್ ಸಪ್ಣಾಂ ದೊಳ್ಯಾಂನಿ ಭರೊನ್, ತಿಂ ಜಾರಿಯೆಕ್
ಹಾಡುಂಕ್ ಆನಿಂ ಶೆವೊಟಾಕ್ ಪಾವೊಂಕ್ ಆತ್ಮ್ವಿಶ್ವಾಸ್ ಆಧಾರ್ ದಿತಾ.
ಕಶ್ಟಾಂಚ್ಯಾ ಘಡ್ಯೆಂ ನಿರಾಸ್ಪಣ್ ಸಹಜ್. ತ್ಯಾ ನಿರಾಸ್ಪಣಾಂತ್ ಸಲ್ವಣಿಂ. ಸಲ್ವಣಿಂ ಮನ್ಶಾಕ್ ತಗ್ಸಿತಾ. ಆನಿಂ ಆಸ್ಲ್ಯಾಚ್ಚ್ ಸಂಧಿಗ್ದ್ ಪರಿಸ್ಥಿತೆಂತ್ ಆಸ್ಲ್ಲ್ಯಾ ವೆಳಾರ್ ಕವಿನ್ ಹೆಂ ಕವಿತಾ ಬರಯ್ಲಾಂ ಜಾಂವ್ಕ್ ಪುರೊ. ಸಲ್ವಣಿ ಜಯ್ತಾಚೆಂ ಕಾರಣ್ ಮ್ಹಣ್ ಘೆಂವ್ಚೆಂ ಬುದ್ವಂತ್ ಮನ್ಶಾಂಚೆಂ ಲಕ್ಶಣ್. ಆನಿಂ ಹೆಂ ಚಿಂತಾಂಪ್ ಯೇಜಾಯ್ ತರ್ ಆತ್ಮ್ವಿಶ್ವಾಸ್ ಗರ್ಜೆಚೊ. ಕಷ್ಟಾಂ ಥಾವ್ನ್ ಭಾಯ್ರ್ ಯೇಂವ್ಕ್, ಮುಖ್ಲೆಂ ಮೇಟ್ ದವ್ರುಂಕ್ ಕವಿಕ್ ಧಯ್ರ್ ಪಾವಾನಾಸ್ತಾಂ, ಜಿಣ್ಯೆಚ್ಯಾ ಹರ್ಯೇಕಾ ಮೆಟಾಂನಿ ಧಯ್ರಾನ್ ಭರ್ಚ್ಯಾ ಆತ್ಮ್ವಿಶ್ವಾಸಾಚಿ ಕವಿನ್ ಸೊಧ್ನಾಂ ಚಲಯ್ಲ್ಯಾಂತ್. ನಿರಾಸ್ಪಣಾಂತ್ ಕವಿ ಉಪ್ಯೆತಾ ಲ್ಹಾರಾಂಸವೆಂ. ಆಪ್ಲ್ಯಾ ಶೆವೊಟಾಕ್ ಪಾವೊಂಕ್ ಜಿಣಿ ಮ್ಹಳ್ಯಾ ದರ್ಯಾಂತ್, ಕಷ್ಟ್ ಅನ್ವಾರಾಂ ತಸಲ್ಯಾ ಲ್ಹಾರಾಂಮಧೆಂ ಉಪ್ಯೆವ್ನ್ ಅತ್ವಿಶ್ವಾಸಾನ್ ಜಿಣಿ ಸಾರುಂಕ್ ಕವಿ ಪ್ರಯತ್ನ್ ಆನಿಂ ಸೊಧ್ನಾಂ ಕರ್ತಾ.
ಕವಿಚಾ
ಕಾಳ್ಜಾಂತ್ಲಿಂ ಸೊಧ್ನಾಂ:
(ಸೊಧ್ನೆಚೆಂ ಆರಂಭ್......!)
ಮನ್ಶಾಂಚಾ ಇಂದ್ರಿಯಾಂಕ್ ಜ್ಯೆಂ ಕಿತೆಂ ಅವಡ್ಟಾ ಯಾ ಸ್ಪಂದನ್ ಕರ್ತಾ ತೆಂಚ್ ಏಕ್ ಕಲೆಚಾ ಉತ್ಪತ್ತಿಕ್ ಮೂಳ್ ಜಾವ್ನ್ ರೂಪ್ ಘೆಂವ್ಕ್ ಉಡ್ಡಾತಾನಾ
ಸಭಾರ್ ಕಲಾಕಾರಾಂಚಾ ಹಾತಾಂತ್ಲ್ಯಾ ವಿವಿಧ್ ನಮುನ್ಯಾಚಾ
ಪ್ರಕಾರಾಂ ಮುಖಾಂತ್ರ್ ತೆಂ ಸಮಾಜೆ ಮುಖಾರ್ ರಾವ್ತಾ. ಆಶೆಂಚ್ ಕವಿತಾ.
ಚಾಲ್ತ್ಯಾ ಜಿಣ್ಯೆಂತ್ ಮನ್ಶಾಚಾ ಗುಣಾ ತೆಕಿದ್ ಚಾಲ್ತಿಂ ಘಡಿತಾಂ ತಿತ್ಲ್ಯಾಚ್
ಪ್ರಮಾಣಾಂತ್ ಸಿಂತೆಮೆಂತಾಕ್ ಸ್ಪಂದನ್ ಕರ್ತಾತ್. ಹ್ಯಾಚ್
ಸ್ಪಂದನಾಕ್ ಸೊಧ್ನಾಂ ಕರ್ಚೆಂ ಹೆ ಮ್ಹಜೆಂ ಪ್ರಯತ್ನ್.
ಹಾಕಾ ಕಾರಣ್ಯ್ ಭೋವ್ ಸಂಪೆಂ. ಮ್ಹಜ್ಯಾ ಜಿವಿತಾಚಾ
ಮೆಟಾಂನಿ ಹಾಂವೆಂ ಪಳೆಲಾಂ. ಮ್ಹಜ್ಯಾ ಆವಯ್ಚಾ ಉದರಾ ಥಾವ್ನ್ ಪಾಳ್ಣ್ಯಾಕ್. ಪಾಳ್ಣ್ಯಾ ಥಾವ್ನ್ ಗೊಟ್ಯಾಕ್. ಆನಿಂ ಗೊಟ್ಯಾ ಥಾವ್ನ್
ಮ್ಹಜ್ಯಾ ಮಾತ್ಯಾಕ್ ಸಾವ್ಳಿ ದೀಂವ್ಕ್ ಏಕ್ ಪಾಕೆಂ ವೊಡ್ಚಾ ಜಿಣಿಯೆ ಝುಜಾಂಕ್
ಹಾಂವೆಂ ಮ್ಹಜ್ಯಾ ಆವಯ್ ಬಾಪಾಯ್ನ್ ಕೆಲ್ಲಿಂ ಸೊಧ್ನಾಂ ಪಳೆಲ್ಯಾಂತ್.
ಸಿರ್ಲಿ ಖೊಲಿಯೆ ಪಂದಾಕ್ಚ್ ಕಿತ್ಯಾಕ್ ಲಿಪ್ತಾ. ಸಿರ್ಲೊ ಮನ್ಶಾಕ್ ಪಳೆತಾನಾ ತಾಂಬ್ಡೊ ಕಿತ್ಯಾಕ್ ಜಾತಾ?
ಹ್ಯಾ ಸವಲಾಂಕ್ ಜಾಪ್ ಹಾಂವೆಂ ಸೊಧ್ಲ್ಲ್ಯಾ ತೆದ್ನಾಂ.
ಮ್ಹಜ್ಯಾ ಲ್ಹಾನ್ಪಣಾರ್ ಹ್ಯಾ ಸಮಾಜೆ ಥಾವ್ನ್ ಹಾಂವ್ ಎಕ್ಸುರೊಂ ಜಾಲ್ಲೊಂ.
ಹಾಂವೆಂ ಲಿಖ್ಣಿಂ ಝರಂವ್ಕ್ ಧರ್ಲ್ಲಿ ಕಾನಡಿ ಬಾಶೆಂತ್ ಜಾಲ್ಯಾರೀ ಕೊಂಕಣೆಂತ್ ತೆಂ
ಪಯ್ಲೆಂ ಪರ್ಗಟ್ ಜಾಲೆಂ ಜಾಲ್ಲ್ಯಾನ್ ಕಾನಡಿ ಸಾಹಿತ್ಯ್ ಫಕತ್ತ್
ಮ್ಹಜ್ಯಾ ಕಾಲೇಜಿಚ್ಯಾ ಮ್ಯಾಗಜೀನ್ ಪತ್ರಾಂ ವರೆಗ್ ಮಾತ್ರ್ ಸೀಮಿತ್ ಜಾವ್ನ್ ಉರ್ಲೆಂ.
ಹಾಂಗಾಸರ್ ಹಾಂವ್ ಹೆಂ ಉಲ್ಲೇಖ್ ಕರುಂಕ್ ಆಶೆತಾಂ ಕಿ ಮ್ಹಜ್ಯಾ ಉಶ್ಯಾ
ಪಂದ್ಲ್ಯಾ ಸಾಹಿತ್ಯಾಕ್ ಉಜ್ವಾಡಾಕ್ ಹಾಡಯಿಲ್ಲೆಂಚ್ ಮ್ಹಜ್ಯಾ ಜಿವಿತಾಂತ್ ಆಯಿಲ್ಲ್ಯಾ
ಪಯ್ಲ್ಯಾ ತಶೆಂಚ್ ನಿಮಾಣ್ಯಾ ಚಲಿಯೆನ್. ಆಜ್ ದಾಯ್ಜಾನ್
ಮ್ಹಾಕಾ ಸ್ವಾಗತ್ ದಿಲಾ ಜಾಲ್ಯಾರ್ಯಿ ಹಾಚ್ಯಾ ಪಾಟ್ಲ್ಯಾನ್ ತ್ಯಾಚ್ ಚಲಿಯೆಚೊ
ಹಾತ್ ಆಸಾ.
ಕವಿತೆಂಚಾ ವಿಶಿಂ ಮ್ಹಜೆಂ ವಿಚಾರ್ ಸಂಪೂರ್ಣ್ ವೆಗ್ಳಿ ಆಸಾತ್. ಕವಿತೆಕ್ ಆನಿಂ ಚಾಲ್ತ್ಯಾ ಜಿವಿತಾಂತ್ಲ್ಯಾ
ಸ್ಪಂದನಾಕ್ ಹಾಂವ್ ಲಾಗು ಕರಿನಾ. ಪುಣ್ ಹಾಂ ಜೆಂ ಕಿತೆಂ
ಮ್ಹಜ್ಯಾ ಸಿಂತೆಮೆತಾಕ್ ಸ್ಪಂದನ್ ಕರ್ತಾ ತೆಂ ಸಮಾಜೆಕ್ಯಿ ಆಡೂಕ್ ಕರ್ತಾ ಜಾಲ್ಯಾರ್ ತ್ಯಾ ವಿಚಾರಾಕ್
ಹಾಂವ್ ಮ್ಹಜ್ಯಾ ಸಾಹಿತ್ಯಾಂತ್ ಘೆತಾಂ. ವ್ಯಕ್ತಿಗತ್ ಜಾವ್ನ್
ನ್ಹಂಯ್ ಬಗಾರ್ ಸಮಾಜೆಚಾ ಜೆರಾಲ್ಪಣಾಕ್ ಲಾಗು ಜಾವ್ನ್.....
ಆಯ್ಚ್ಯಾ ಕವಿತಾಪಾಟಾಂತ್ ದಾಯ್ಜ್ ಪಂಗ್ಡಾನ್ ವಿಂಚ್ಲ್ಲೆಂ
ಮ್ಹಜೆಂ ಕವಿತಾ ’ಸೊಧ್ನಾಂ’ ಮೂಳ್ ಕೊಂಕ್ಣೆಂತ್ ಬರಯಿಲ್ಲೆಂ ಕವಿತಾ
ನ್ಹಂಯ್. ಹೆಂ ಕವಿತಾ ಹಾವೆಂಚ್ ಬರಯ್ಲೆಲ್ಯಾ ಉರ್ದು ಕವಿತಾ
’ಅಂಜಾನಾ ಸಫರ್’ ಹಾಚೊ ಕೊಂಕ್ಣೆಂತ್ ಹಾವೆಂಚ್ ಕೆಲ್ಲೊ ಅನುವಾದ್.
ಉರ್ದು ಭಾಶೆಚ್ಯಾ ಉತ್ರಾಂಚಿ ಸೊಭಾಯ್ ಭೋವ್ಶಾ ಕೊಂಕ್ಣೆಂತ್ ಅನುವಾದ್ ಕರ್ತಾನಾ ಉಣಿಂ ಜಾಲ್ಯಾ ಜಾಂವ್ಕ್
ಪುರೊ. ಆಶೆಂ ಕರ್ತಾನಾ ವಿಚಾರಾಂತ್ ಉಣೆಂಪಣ್ ಜಾಂವ್ಕ್ ಹಾಂವೆಂ
ದೀಂವ್ಕ್ ನಾ.
ಮನ್ಶಾ ಕುಳಾಕ್ ಏಕ್ ಜಾತ್. ಏಕ್ ಧರ್ಮ್. ಏಕ್ ಸಮಾಜ್
ಮ್ಹಣೊನ್ ವಿಗ್ಯಾನಿಕ್ (scientific) ರಿತಿನ್
ಹಾಂವ್ ಮಾಂಧ್ತಾ ಜಾಲ್ಯಾರ್ಯೀ, ವೇಳ್ ಆನಿಂ ಕಾಳಾಚಿ ರೊದಾಂ ಘುಂವ್ತಾನಾ
ಹ್ಯಾಚ್ ವಿಗ್ಯಾನಿಕ್ ವಾದಾಳಾಚೆರ್ ಮ್ಹಜ್ಯಾ ಸಮಾಜೆಕ್ ಜೆಂ ಕಿತೆಂ
universal
ಪಣಾಂತ್ ಎಕಾಚ್ ನದ್ರೆಂತ್. ಎಕಾಚ್ ವಿಚಾರಾಂತ್ ಹ್ಯಾ ಸಮಾಜೆಂತ್ಲ್ಯಾ
ಲ್ಹಾನಾಂತ್ಲ್ಯಾ, ಲ್ಹಾನಾಂಕ್ ಸಂಬಂಧ್ ರಚುಂಕ್ ಮ್ಹಾಕಾ
ಸಾದ್ಯ್ ಜಾತಾ ತೆಂಚ್ ಮ್ಹಜೆಂ ’ಅಂಜಾನಾ ಸಫರ್’ ಯಾ ’
ನೆಣಾಂ ಅಸ್ಲ್ಲೆಂ ಪಯ್ಣ್.
ಹೆಂ ಪಯ್ಣ್ ನಿರಾಸ್ವಾದಾಚೆಂ ನ್ಹಂಯ್. ಕಾರಾಣ್ ತೆಂ ಮ್ಹಜೆಂ
ಹೊಡೆಂ ಹಾಂವ್ ಜಾಣಾಂ ಅಸೊನ್ಯಿ ತಾಕಾಚ್ ಸೊಧ್ತಾಂ. ಹೊಡೆಂ ಆಶಾದಾಚೆಂ
ನ್ಹಂಯ್ ಕಿತ್ಯಾಕ್ ತ್ಯಾ ಹೊಡ್ಯಾರ್ ಬಸೊಂಕ್ ಹಾಂವೆಂ ಉದ್ಕಾಂತ್ ದೆಂವೊನ್ ಉಪ್ಯೆಂವ್ಕ್ ಆಸಾ. ಆಶೆಂ ಉಪ್ಯೆತಾನಾ
ಹಾಂವೆಂ ವಾಸ್ತವಾಕ್ ಮೆಳೊಂಕ್ ಅಸಾ ಮ್ಹಜ್ಯಾ ನೆಣಾಂ ಅಸ್ಲ್ಯಾ
ಪಯ್ಣಾಕ್.
ಜಿವಿತ್ ಮ್ಹಳ್ಯಾರ್ ಫಾಲ್ಯಾಂಚೆಂ ನೆಣಾಂ ಅಸ್ಲ್ಲೆಂ ಪಯ್ಣಾಕ್
ಬಿವ್ಕುರೊ ಕರ್ತಾ. ಹ್ಯಾ ಅಥೀತಾಕ್ ಜಯ್ತ್ ಫಕತ್ತ್ ಧಯ್ರ್
ಮಾತ್ರ್ ದೀಂವ್ಕ್ ಸಕ್ತಾ. ಆನಿಂ ಹೆಂ ಧಯ್ರ್ ವರ್ತಮಾನಾಂತ್ ಆನಿಂ ಭವಿಶ್ಯಾಂತ್
ಸಂತೊಸ್ ಹಾಡುಂಕ್ ಸಕ್ತಾ. ಹ್ಯಾಚ್ ಸಂತೊಸಾಕ್ ತಲಾಸ್ ಕರ್ಚೆಂ
ಹೆಂ ಮಿಸಾಂವ್.
ಉರ್ದು ಸಾಹಿತ್ಯ್ ಅನಿಂ ಉರ್ದು ಭಾಸ್ ಮ್ಹಾಕಾ ಮೊಗಾಚಿ ತರೀ ಕೊಂಕಣಿ
ಸದಾಂ ಮ್ಹಾಕಾ ಮ್ಹಜ್ಯಾ ಆವಯ್ಪರಿಂ ಹಾಂವೆಂ ಮಾನ್
ಬಾಗಾಂವ್ಚಿ. ಹಾಂಗಾಸರ್ ಮೋಗ್ ಆನಿಂ ಮಾನ್ ಸಾಂಗಾತಾ ಮೆಳ್ತಾ ದೆಕುನ್
ಮ್ಹಜ್ಯಾ ಸಾಹಿತ್ಯಾಂತ್ ಕೊಂಕಣಿಚಿ ಗಡ್ ಉತ್ರಾಲ್ಲ್ಯಾ ಉತ್ರೊವ್ಣೆಚೊ ಅಂದಾಜ್
ವಾಚ್ಪ್ಯಾಂಕ್ ಮೆಳ್ತಲೊ.
ಕೊಂಕಣಿ ಆನಿಂ ಉರ್ದು ಸಾಹಿತ್ಯಾಕ್ ಎಕಾಮೆಕಾ ಸಾಂಗಾಂತಾ ಮಾನಾಕ್
ಬಸಂವ್ಚೆಂ ಹೆಂ ಪ್ರಾಮಾಣಿಕ್ ಪ್ರಯತ್ನ್ ಮ್ಹಜೆಂ ಜಾಂವ್ಕ್ಯಿ
ಸಕ್ತಾ. ಕಿತ್ಯಾಕ್ ಹಾಂವ್ ಕಿರ್ಯಾತ್ಮತಾ (creativity) ಯಾ
ಸೃಜನಶೀಲತಾ ತೆವ್ಶಿಂ ಚಡ್ ಧ್ಯಾನ್ ದಿತಾಂ ಆನಿಂ ಹೆಂ ಧ್ಯಾನ್ ಫುಡೆಂ
ವರುನ್ abstract ರೂಪಾಂತ್
ಹಾಂವ್ ಸೊಭಯ್ತಾಂ. ಹೆಂ abstract ರೂಪ್ ಕೊಂಕ್ಣೆಂಕ್ ತಿಕ್ಶೆಂ
ಮಿಸ್ತೆರ್ ಜಶೆಂ ದಿಸ್ತಾ ತರಿ ಉರ್ದುಂತ್ ಮಿಸ್ತೆರಾಚ್ಯಾಕ್ಯ್ ಚಡ್
ಸೊಭಿತ್ ಮ್ಹಳ್ಯಾ ಪರಿಂ ದಿಸ್ತಾಂ. ಆನಿಂ ಮಿಸ್ತೆರ್ ಆನಿಂ ಸೊಭಾಯ್
ಸಾಂಗಾತಾ ಮೆಳ್ತಾನಾ ನಿಜಾಯ್ಕ್ಯಿ ಜಿವಿತ್ ಏಕ್ ನೆಣಾ ಅಸ್ಲ್ಲ್ಯಾ
ಪಯ್ಣಾಚೆಂ ಸೊಭಿತ್ ಶೋಧನ್......
ದೇವ್ ಬರೆಂ ಕರುಂ,
ಮೆಲ್ವಿನ್ ಜೆ. ವಾಸ್ ಕೆಲರಾಯ್, ಕುವೇಯ್ಟ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.