[ಖಬರ್:] ಕೊಂಕಣ್ ತಾರಾಂ ಜೆರಿಮೆರಿ- ವಾರ್ಶಿಕೋತ್ಸವ್ ಆನಿ ಮೊಂತಿ ಫೆಸ್ತ್.
ಕೊಂಕಣ್ ತಾರಾಂ ಜೆರಿಮೆರಿ ಹಾಣಿಂ ಆಪ್ಲೊ 27ವೊ ವಾರ್ಶಿಕೋತ್ಸವ್, ಹ್ಯಾಚ್ ಸಪ್ಟೆಂಬರ್ 9 ತಾರಿಕೆರ್ ಮೊಂತಿ ಫೆಸ್ತಾಚ್ಯಾ ಸುವಾಳ್ಯಾರ್ ವ್ಹಡಾ ಗದ್ದಳಾಯೆನ್ ಆಚರ್ಸಿಲೊ.
ಸಕಾಳಿಂ ಮರಿಯೆಮಾಯೆಕ್ ವ್ಹಡಾ ಸಂಖ್ಯಾನ್ ಭುರ್ಗ್ಯಾನಿಂ ಫುಲಾಂ ಉಡವ್ನ್ ಮಾನ್ ಕೆಲೊ. ಕೊಂಕ್ಣಿ ಮಿಸಾಚ್ಯಾ ಬಲಿದಾನಾಂತ್ ಯುವಕಾನಿಂ, ಸುಡಾಳ್ ಕೊಂಕ್ಣೆಂತ್ ಮಾರ್ಗರೆಟ್ ಆನಿ ಜುಲಿಯಾನಾ ಹಾಂಚ್ಯಾ ನೇತ್ರತ್ವಾಖಾಲ್ ಕ್ರಿಯಾತ್ಮಕ್ ಪಾತ್ರ್ ಘೆತ್ಲ್ಲೊ. ಮಿಸಾರ್ ಮಧುರ್ ಗಿತಾಂ ’ಕೊಯರ್ ಮಾಸ್ಟರ್’ ಜೊನ್ ಮಸ್ಕರೆನ್ಹಾಸ್ ಆನಿ ಪಂಗ್ಡಾನ್ ತಯಾರ್ ಕೆಲ್ಲಿಂ. ಫಿರ್ಗಜ್ ವಿಗಾರ್ ಬಾಪ್ ಲೆಯೊನಾರ್ಡ್ ನೊರೊನ್ಹಾ ಸಂಗಿಂ ದೊತೊರ್ ಬಾಪ್ ಚಾರ್ಲ್ಸ್ ವಾಸ್ ಹಾಣಿಂ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ ಆನಿಂ ಆಪುರ್ಬಾಯೆಚೊ ಸಂದೇಶ್ ದಿಲೊ.
ಮಿಸಾ ಉಪ್ರಾಂತ್ ಫಿರ್ಗಜೆಚ್ಯಾ ಸಿಸ್ಟರಾಂಕ್ ಆನಿ ಯಾಜಕಾಂಕ್ ತಸೆಂಚ್ ’ಪವರ್ ಲಿಫ್ಟಿಂಗ್’ ಗೋಲ್ಡ್ ಮೆಡಲ್ ಜಿಕ್ಲ್ಲ್ಯಾ ಡೆನ್ಜಿಲ್, ಹಾಂಕಾ ಫುಲಾಂ ತುರೆ ದೀವ್ನ್ ಮಾನ್ ಕೆಲೊ. ಎಸ್.ಎಸ್.ಸಿ.ಂತ್ 70% ಆನಿ ವಯ್ರ್ ಆಂಕ್ ಜೊಡ್ಲ್ಲ್ಯಾ ವಿಧ್ಯಾರ್ಥಿಂಕ್, ಆರ್ಥಿಕ್ ಕಾಣಿಕ್ ಆನಿ ಸರ್ಟಿಫಿಕೆಟ್ ದೀವ್ನ್ ಪ್ರಶಂಸಾ ಕೆಲಿ.
ಸಾಂಜೆರ್ 27ವೊ ವಾರ್ಶಿಕೋತ್ಸವಾಚೊ ಅಂಗ್ ಜಾವ್ನ್ ವೆದಿರ್ ಅಧ್ಯಕ್ಶ್ ವಾಲ್ಟರ್ ಡಿ’ಸೊಜಾ, ಜೆರಾಲ್ ಕಾರ್ಯದರ್ಶಿ ಜೊನ್ ಮಸ್ಕರೆನ್ಹಸ್ ಹಾಣಿಂ ಸಯ್ರ್ಯಾಂಚೊ ಸ್ವಾಗತ್ ಕೆಲೊ.
ಮುಖೆಲ್ ಸಯ್ರೊ ಬಾಪ್ ನೆಲ್ಸನ್ ಸಲ್ಡಾನ್ಹಾ ಹಾಣಿ ಪಂಟಿ ಪೆಟಾವ್ನ್, ವಿಗಾರ್ ಬಾಪ್ ಲೆಯೊನಾರ್ಡ್ ಹಾಣಿಂ ಮಾಗ್ಣ್ಯಾದ್ವಾರಿಂ ಸುರ್ವಾತ್ ಕೆಲಿ. ಆನಿ ಹರ್ ವರ್ಸಾ ಸಂಘಾನ್ ಮಾಂಡುನ್ ಹಾಡ್ಚ್ಯಾ ಸರ್ವ್ ಚಟುವಟಿಕೆಂಚಿ ಹೊಗ್ಳಿಕ್ ಪಾಟಯ್ಲಿ.
ಗಾಂವ್ಚ್ಯಾ ರಿತಿ-ರಿವಾಜಿ ಪ್ರಕಾರ್, ’ನೊವೆಂ ಜೆವಾಣ್’, ಕೆಂಳ್ಬ್ಯಾ ಖೊಲ್ಯಾನಿಂ ಜೆಂವ್ಚೆ ಬರಾಬರ್ ಕಾರ್ಯೆಂ ಆಕೇರ್ ಜಾಲೆಂ.
ಭಾತ್ಮಿ: ಜೋನ್ ಮಸ್ಕರೇನ್ಹಸ್, ಜೆರಿಮೆರಿ
ಹೆರ್ ತಸ್ವೀರೊ
