[Khobor]  ‘Fr. Conceicao D’ Silva, Ek Yatra’

‘Fr. Conceicao D’ Silva, Ek Yatra’ Vincy Quadros-achem Anik Ek Pustok Uzvaddailem

Raia: Dalgado Konknni Akademicho Odheokx ani Kendr Sahitya Akademi Puroskar vijeto Vincy Quadros hachea penantlean utorlolem ‘‘Fr. Conceicao D’ Silva, Ek Yatra’ hem anik ek pustok 13 Febrer 2020 disa Kuddttorecho amdar Aleixo Reginaldo Lourenco hachea hatantlean Raichea Snows Multipurpose Hall-ant uzvaddailem. Hea vellar tache sangata borovpi Vincy Quadros, Raia firgojecho Padr Vigar Fr. Conceicao D’ Silva, Padrkur Fr. Pedro Costa, Fr. Rosario ani her manest machier hajir asle. Zalear machie sokol Gõy rajyacho Up-mukhel Montri Babu Kawalekar, khasdar Francisco Sardinha, adlo Mukhel Montri Luizinho Faleiro, adlo kendr montri Eduardo Faleiro, adlo montri Aleixo Sequeira, GPCC Odheokx Girish Chodankar, Canon Alfred Vaz, DKA adlo Odheokx Premanand A. Lotlikar, Raia Sarpanch Esmeralda Gomes, Ponda varaddacho Dean Fr. Manuel Gomes, Jil’lo odhikari Agnel Fernandes, mamlatdar John Fernandes, her sorkari odhikari toxech Gõyche nanvadik padri ani ganvche manest hajir asle.

Fr. Conceicao-achea 65vea vadd’disa nimtan toyar kelolea hea pustokant tannem vividh igorzamni kelolo vaur nomud asa. Xivai, tachem bhurgeponn ani thoddi kuttumbik mahiti, tannem pel’lolim avahanam ani tachem borem kar’ya dilolem asa. Hea adim Fr. Conceicao-achea jivitacher pustokam aileant punn hem pustok thoddem vegllem asa oxem Fr. Conceicao-achem mot asa. Tantunt to vaurlolea igorzanche ani tache borabor vaurtoleanche fottu ghalole asat. Tachea vadd’disak itle rajki monis kiteak astat hea prosnank zap ditanam, apunn lokanchim kamam gheun tanche fuddeant vetam ani te apnna koddlean ek poiso ghenastanam kam’ kortat hea atesanvank lagun tankam sodanch aplea vadd’disak amontronn asa mhonn sanglem.

Survatek Raia Firgoz Attorney William Fernandes ani Raia PPC Vice Moderator Xanthi Fernandes hannim hajir aslolea manestank yeukar dilo zalear Fr. Conceicao-an soglleanche upkar mandle. Vincy Quadrosan sutrsonchealon kelem. Pustok uzvaddauncho suvall suru zaunche adim ek lhan’xi sonskrutik karyavoll zali tantunt Raichea Tornatteamni ani dotornichea bhurgeamni protieki ek-ek nach sador kelo zalear Seby Mendes ani Camilo Pango hannim gitam sador kelim.