[Khobor] DKA-n Pio Fernandes-ak omplim arga
‘Romanxincho Pai’ Caridade Damasceno Fernandes-ak DKA-n Omplim Argam
Aldona : Aldona ganvchea zaitea
mon’xamni Konknni bhaxek khub yogdan dilam
tantuntlo ek zaun asa Caridade Damasceno
Fernandes zannem potrkaritechea, songit ani
sahityachea mollar khub vaur kela. Tannem
Romi Konknnintlean xembhor voir romanxi
booroileat, dekun taka Romanxicho Pai mhonn
pachartat. Tachem itlem yogdan asunui tacher
visor poddla, dekun Dalgado Konknni Akademi
(DKA) sorgest Caridade Damasceno Fernandes
haka argam ompta.” Oxe udgar DKA-cho Odheokx
Tomazinho Cardozo hannem kaddle. To DKA-n
ghoddoun haddlolie ‘Sorgest Boroinnarank
Argam’ hie karyavollint 07 Otubr disa St.
Thomas Igorjechea vosreant uloitalo. Tache
borabor Aldoncho Sorponch Francis D’ Souza,
Padr Vigar Fr. Thomas Lobo, DKA-cho Chittnis
Vincy Quadros, Vavurpi Somiti Vangddi Afonso
Braganza, Mathew D’Costa ani Seby Fernandes
hajir asle.
Tomazinhon mukhar
sanglem ki ‘Julus Patxai’ sarki fanki romanx
borovpiCaridadachem Konknnichem yogdan
koench visronk zainam. He khatir to
sodankalomor uronk Aldona ganvchea tachea
vaddea velea rosteak vo anik khuinsorui nanv
ghalunk yotn korcho mhonn tannem sorponcheak
vinonti keli. Tacher vichear korunk
sorponchean utor dilem. Hea vellar
Caridade Damasceno Fernandes-achi vollokh
divpi eke pustikechi uzvaddavnni zali.
Uprant Sorponch Francis D’ Souza, Padr Vigar
Thomas Lobo, Seby Fernandes hachim ulovpam
zalim. Survatek Caridadachea fottvak
fulam ghalun taka argam omplim. Te adim
ghoddoun haddlolie sonskrutik karyavollint
Fr. Thomas Lobo-n ghoddlolim don kantaram
bhurgeamni gailim, Valu Fernandesachem ek
kantar, Aldonkarancho ek manddo ani anik don
kantaram mhunnlim. Tantuntuch Konknni
borovpi Felix D’ Cruz hannem khasa ghoddloli
kovita sador keli. Afonso Braganzan
soglleank yeukar dilo zalear Mathew D’Costan
hajir asloleanche upkar mandle. Vincy
Quadrosan sutrsonchealon kelem ani modem
modem Caridadachea sahityachi vollokh korun
dili. Raxttrgit mhunnon karyavoll sompli.
