[ಖಬರ್:] ಮುಂಬಯ್ ಥಾವ್ನ್ ಸ ಭುರ್ಗಿಂ ಫೈನಲಾಕ್
(ಮುಂಬಯ್, ನವೆಂಬರ್ 25): ಕವಿತಾ ಟ್ರಸ್ಟಾನ್ ವರ್ಸಾನ್ ವರಸ್ ಚಲಂವ್ಚ್ಯಾ ಕೊಂಕಣಿ ಕವಿತಾಸಾದರ್ ಸ್ಪರ್ಧ್ಯಾಕ್ ಮುಂಬಯಾಂತ್ ಆಶಾವಾದಿ ಪ್ರಕಾಶನಾಸವೆಂ ಮುಂಬಯ್ಚ್ಯಾ ಹೆರ್ ಫಿರ್ಗಜೆಚ್ಯಾ ಸಂಘಟನಾಂಚ್ಯಾ ಮಜತೆನ್ ಒಕ್ಟೋಬರ್ 11 ಥಾವ್ನ್ ನವೆಂಬರ್ 18 ಪರ್ಯಾಂತ್ ಪ್ರಾಥಮಿಕ್ ಸರ್ತಿ ಚಲವ್ನ್, ತಾಂತುಂ ಜಿಕೊನ್ ಆಯಿಲ್ಲ್ಯಾಂನಿ ನವೆಂಬರ್ 25 ತಾರಿಕೆರ್ ಅಂಧೇರಿಚ್ಯಾ ’ಆತ್ಮ ದರ್ಶನಾಂತ್’ ಮುಂಬಯ್ ಹಂತಾಚೆಂ ಫೈನಲ್ ಸ್ಪರ್ಧೊ ಆಸ್ಲೊ, ತಾಂತುಂ ವೆವೆಗ್ಳ್ಯಾ ಫಿರ್ಗಜೆಚಿಂ ಸ ಭುರ್ಗಿಂ, ಜನೆರ್ 13 ತಾರಿಕೆರ್ ಮಂಗ್ಳುರಾಂತ್ ಚಲುಂಕ್ ಆಸ್ಚ್ಯಾ ’ಅಖಿಲ್ ಭಾರತೀಯ್ ಹಂತಾರ್’ ಚಲ್ಚ್ಯಾ ಫೈನಲಾಕ್ ವಿಂಚುನ್ ಆಯ್ಲಿಂ;
ಭುರ್ಗಿಂ (15 ವರ್ಸಾಂ ಪ್ರಾಯೆ ಸಕಯ್ಲಿಂ)
ಸಿಯೋನಾ ಸಾರಂಗ್ಪಾಣಿ (ಥಾಣೆ)
ನಿಯೋಮಿ ಮಾರ್ಟಿಸ್ (ಓರ್ಲೆಮ್, ಮಲಾಡ್)
ರಿಯೋನಾ ಒಲಿವೆರಾ (ಓರ್ಲೆಮ್, ಮಲಾಡ್)
ಲೀನಲ್ ಸೆರಾವೊ
ಯುವಜಣ್ (ಪ್ರಾಯ್ 15 ಥಾವ್ನ್ 30 ಪರ್ಯಾಂತ್ಲಿಂ)
ಸೋನಲ್ ಡಿ’ಸೋಜ್ (ಕಾಂದಿವಲಿ)
ರೋಯ್ಡನ್ ಮಿನೇಜಸ್ (ಜೆರಿಮೆರಿ)
ರೇಚಲ್ ಡಿ’ಸೋಜ್ (ವಸಯ್)
ಸಕಾಳಿಂ ಧಾ ವೊರಾಂಚೆರ್ ಸುರು ಜಾಲ್ಲ್ಯಾ ಹ್ಯಾ ಸ್ಪರ್ಧ್ಯಾಚೆಂ ಉಗ್ತಾವಣ್ ಕರುನ್ ಮುಖೆಲ್ ಸಯ್ರೊ ಜಾವ್ನ್ ಆಯಿಲ್ಲೊ ಮಂಗಳೂರ್ ವಿಶ್ವ್ವಿಧ್ಯಾನಿಲಯಾಚ್ಯಾ ಕೊಂಕಣಿ ಅಧ್ಯಯನ ಪೀಠಚೊ ಸಂಯೋಜಕ್ ಡಾ|ಜಯವಂತ ನಾಯಕ್ ಅಪ್ಲ್ಯಾ ಉಲವ್ಪಾಂತ್ ಆಮಿ ಕೊಂಕಣಿ ಭಾಶೆಕ್ ಆಮ್ಚ್ಯಾ ಜಿವಿತಾಂತ್ ಚಡಿತ್ ಪ್ರಾಮುಖ್ಯತಾ ದಿಲಿ ತರ್ ಕೊಂಕಣಿ ಭಾದ್ ಕೆದಿಂಚ್ ಆಳ್ವೊನ್ ವೆಚಿನಾ’ ಮ್ಹಣುನ್ ತಾಣೆಂ ಸ್ಪರ್ಧಿಕಾಂಕ್ ಉಲ್ಲಾಸ್ ಪಾಠಯ್ಲೆ.
ತಶೆಂಚ್ ಗೊಯಾಂ ಥಾವ್ನ್ ಆಯಿಲ್ಲಿ ಕೊಂಕಣಿ ಕವಯತ್ರಿ ಬಾಯ್ ಉರ್ಜಿತಾ ಭೊಬೆನ್ ಅಪ್ಲ್ಯಾ ದೋನ್ ಉತ್ರಾಂನಿ ಕೊಂಕಣಿ ಕವಿತೆಂಕ್ ಇತ್ಲ್ಯಾ ಮೊಗಾನ್ ಆರಾಯಿಲ್ಲ್ಯಾ ಸಮೇಸ್ತ್ ಕೊಂಕಣಿ ಭುರ್ಗ್ಯಾಂಕ್ ಉಲ್ಲಾಸ್ ಪಾಠಯ್ತಚ್ ಕೊಚ್ಚಿ ಥಾವ್ನ್ ಆಯಿಲ್ಲೊ ನಾಮ್ಣೆಚೊ ಕವಿ ಬಾಬ್ ಆರ್. ಎಸ್. ಭಾಸ್ಕರ್ ಹಾಣೆಂ ಕವಿತಾ ಜರ್ ಸಂಸಾರಾಚ್ಯಾ ವೆವೆಗ್ಳ್ಯಾ ಪ್ರಾಂತ್ಯಾಚ್ಯಾ ಲೊಕಾಕ್ ಲಾಗಿಂ ಹಾಡುಂಕ್ ಸಕ್ತಾ ತರ್ ಕವಿತೆಚಿ ತಾಂಕ್ ಮ್ಹಳ್ಯಾರ್ ಕಿತೆಂ ಮ್ಹಣುನ್ ಸಮ್ಜುಯೆತಾ ಮ್ಹಣಾಲೊ. ಮಾನೆಸ್ತ್ ಹೆನ್ರಿ ಪಾಂಗ್ಳಾ ಹಾಣೆಂ ಕೊಂಕಣಿ ಪದಾಂ ಗಾಯ್ಲಿಂ.
ಕವಿತಾ ಟ್ರಸ್ಟಾಚೊ ಸ್ಥಾಪಕ್ ಬಾಬ್ ಮೆಲ್ವಿನ್ ರೊಡ್ರಿಗಸಾನ್ ಕವಿತಾಸಾದರ್ ಸ್ಪರ್ಧ್ಯಾಚ್ಯೊ ಜೆರಾಲ್ ರೆಗ್ರೊ ಆನಿ ನೇಮಾಂವಿಶಿಂ ವಿವರ್ ದಿತಚ್ ಸೊಳಾ ಭುರ್ಗಿಂ ತಶೆಂಚ್ ಇಕ್ರಾ ಯುವಜಣಾಂನಿ ಹ್ಯಾ ಕವಿತಾಸಾದರ್ ಸರ್ತೆಂತ್ ವಾಂಟೊ ಘೆತ್ಲೊ. ವಾಂಟೊ ಘೆತ್ಲೆಲ್ಯಾ ಸಮೇಸ್ತ್ ಸ್ಪರ್ಧಿಕಾಂಕ್ ತಶೆಂಚ್ ಇನಾಮಾಂ ಜೊಡ್ಲೆಲ್ಯಾಂಕ್ ಕೊಂಕಣಿ ಭಾಶಾ ಮಂಡಳ್ ಮಹಾರಾಷ್ಟ್ರಚೊ ಅಧ್ಯಕ್ಷ್ ಬಾಬ್ ಜೋನ್ ಡಿ’ಸಿಲ್ವ ಆನಿ ಕಾರ್ಯದರ್ಶಿ ಬಾಬ್ ಲಾರೆನ್ಸ್ ಡಿ’ಸೋಜ್ ಕಮಾನಿ ಹಾಣಿಂ ಇನಾಮಾಂ ಆನಿ ಸರ್ಟಿಫಿಕೆಟ್ಯೊ ವಾಂಟ್ಲ್ಯೊ.
ವೆದಿಚೆರ್ ಆಶಾವಾದಿ ಪ್ರಕಾಶನ್ ತರ್ಫೆನ್ ಬಾಬ್ ಹಿಲರಿ ಡಿ’ಸಿಲ್ವಾ ಉಪಸ್ತಿತ್ ಆಸ್ಲೊ. ಶಾರಲ್ ಡಿ’ಸೋಜ್ ಕಾಂದಿವಲಿ ಹಿಣೆಂ ಹೆಂ ಕಾರ್ಯೆಂ ಚಲವ್ನ್ ವ್ಹೆಲೆಂ.
