[ಖಬರ್:] ಮಿರಾರೊಡಾಂತ್ ಕವಿತಾಸಾದರ್ ಸರ್ತ್
ಕವಿತಾ ಟ್ರಸ್ಟ್ ಆನಿ ಆಶಾವಾದಿ ಪ್ರಕಾಶನಾಚ್ಯಾ ಜೋಡ್ ಆಶ್ರಯಾಖಾಲ್, ಸಾ. ಜುಜೆ ಕೊಂಕಣಿ ವೆಲ್ಫೇರ್ ಎಸೊಶಿಯೆಶನ್ ಮಿರಾರೊಡ್ ಹಾಣಿ ಒಕ್ಟೊಬರ್ 21 ತಾರಿಕೆರ್ ಸಾಂಜೆರ್ 4:30 ವರಾರ್ ಇಗರ್ಜೆಚ್ಯಾ ಇನ್ಫ಼ೆಂಟ್ ಜೀಸಸ್ ಹೊಲಾಂತ್, ಮುಂಬಯ್ ಪ್ರಾಥಮಿಕ್ ಹಂತಾಚಿ ಕೊಂಕಣಿ ಕವಿತಾಸಾದರ್ ಸರ್ತಿ ಮಾಂಡುನ್ ಹಾಡ್ಲಿ.
ಮಾನಾಧಿಕ್ ಬಾಪ್ ನೆಲ್ಸನ್ ಕಾರ್ಡೊಜಾ (ಫಿರ್ಗಜೆಚೆ ಸಹಾಯಕ್ ವಿಗಾರ್) ಮುಖೆಲ್ ಸಯ್ರೆ ಜಾವ್ನಾಸ್ಲೆ, ಹಾಣಿ ಕಾರ್ಯಾಚಿ ಸುರ್ವಾತ್ ಮಾಗ್ಣ್ಯಾನ್ ಕರ್ತಚ್. ಸಂಘಾಚೊ ಅಧ್ಯಕ್ಶ್ ಮಾನೆಸ್ತ್ ಡಾಯ್ಗೊ ರೊಡ್ರಿಗಸಾನ್ ಸ್ಪರ್ಧಿಕಾಂಕ್ ಸ್ವಾಗತ್ ಕೆಲೊ. ಮಾನೆಸ್ತ್ ವಲ್ಲಿ ಕ್ವಾಡ್ರಸಾನ್ ಕವಿತಾಸಾದರ್ ಸರ್ತೆಚ್ಯೊ ರೆಗ್ರೊ ಆನಿ ನೇಮಾಂವಿಶಿಂ ಸಮ್ಜೊಣಿ ದಿಲಿ.
ಸುಮಾರ್ ಧಾ ಭುರ್ಗ್ಯಾನಿಂ ಹ್ಯಾ ಸರ್ತೆಂತ್ ಲ್ಹಾನಾಂಚ್ಯಾ ವಿಭಾಗಾಂತ್ ಪಾತ್ರ್ ಘೆತ್ಲ್ಲೊ. ಸರ್ವ್ ಸ್ಪರ್ಧಿಕಾನಿಂ ಬೋವ್ ಆಪುರ್ಬಾಯೆನ್ ಆಪಾಪ್ಲ್ಯೊ ಕವಿತಾ ಸಾದರ್ ಕೆಲ್ಯೊ. ಹಾಂಚೆಪಯ್ಕಿಂತ್ಲಿಂ ತೆಗಾಂ ಮುಂಬಯ್ ಹಂತಾಚ್ಯಾ ಅಂತಿಮ್ ಸರ್ತೆಕ್ ಜಿಕುನ್ ಆಯ್ಲಿಂ.
ಪಯ್ಲೆಂ ಸ್ಥಾನ್: ಜೊಯೆಲ್ಲಾ ಮಥಾಯಸ್ (ಕವಿತಾ: ತುಂ ಉಪ್ಯೆಂವ್ಕ್ ಶಿಕ್ತಲೊಯ್, ಕವಿ: ಫ್ರಾದ್ ರೋಶನ್)
ದುಸ್ರೆಂ ಸ್ಥಾನ್: ಏಂಜಲ್ ಪಿಂಟೊ (ಕವಿತಾ: ಚೆಡೊ ಆನಿ ಚೆಡುಂ, ಕವಿ: ಬಾಬ್ ಪ್ರಸನ್ನ್ ನಿಡ್ಡೋಡಿ)
ತಿಸ್ರೆಂ ಸ್ಥಾನ್: ಲೀನಲ್ ಸೆರಾವೊ (ಕವಿತಾ: ಕಾಡಿ ಆನಿ ವಾತ್, ಕವಿ: ಬಾಬ್ ಪ್ರಸನ್ನ್ ನಿಡ್ಡೋಡಿ)
ಹ್ಯಾ ಸರ್ತೆಂತ್ ಮಾನೆಸ್ತ್ ವಲ್ಲಿ ಕ್ವಾಡ್ರಸ್ ಆನಿ ಮಾನೆಸ್ತ್ ಹಿಲರಿ ಡಿ’ಸಿಲ್ವಾ ವೊರಯ್ಣಾರ್ ಜಾವ್ನ್ ಆಸ್ಲ್ಲೆ. ಸಂಘಾಚೆ ಸಾಂದೆ ಆನಿ ಕಮಿಟಿ ಕಾರ್ಯಕರ್ತ್ ಹಾಜರ್ ಆಸ್ಲ್ಲೆ. ಸಾಂದೊ ಮಾನೆಸ್ತ್ ಹೆನ್ರಿ ಸಲ್ಡಾನ್ಹಾ ಹಾಣೆ ಕೊಂಕ್ಣಿ ಪೋದ್ ಗಾವ್ನ್ ಹಾಜಾರ್ ಆಸ್ಲ್ಲ್ಯಾಂಕ್ ಮನೊರಂಜನ್ ಕೆಲೆಂ.
ಸಗ್ಳೆಂ ಕಾರ್ಯೆಂ ಬೋವ್ ಆಪುರ್ಬಾಯೆನ್ ಮಾನೆಸ್ತ್ ಜೆರಿ ಡಿ’ಸೊಜಾ ಹಾಣೆ ಚಲವ್ನ್ ವೆಲೆಂ.
