[खबर] मिरारोडांत "झूज"
मिरारोड (मुंबय), मार्च १६: सां. जुजे कोंकणी वेलफेर एसोशियेशन मिरारोड आनी सां. जोसेफ फिर्गज मिरारोड हांच्या जोड आश्रयान सादर केल्लो लोकामोगाळ धार्मीक नाटक "झूज" हाचें २४ वें प्रदर्शन मर्च्याच्या १६ वेर सांजेर ७ वोरांक इगर्जेच्या सालांत बोव यशस्वी थरान प्रदर्शीत केलें. मानाधीक बाप आलवीन सेरावोच्या लिखणेथावन उदेल्लो आनी क्रिसटी निनासम हाच्या निर्देशनार, क्ल्यान्वीन फेर्नांडीस आनी पदुवा रंग आध्यायन केंद्र मंगळूर हांच्या सांगोड्या सवें करेज्माच्या आयिन्न वेळाक सरी जावन, लोकाक आपलें अंतसकर्न जेजू थंय पर्तुंक एक बरो संदर्भ उदेलो मणच्याक कांय दुबाव ना. मिरारोडांत पयले पावटीं आसल्या ऊंच धार्मीक नाटकाध्वारीं, क्रिसटी आनी ताच्या पंगडान आपल्या आपुरबायेच्या नटनान लोकाक जेजुविशीं चिंतुंक आनी आमचो भर्वसो गूंड करुंक आदार जायशें केलें. नाटक चल्ताना लोकाचे गमन फकत नाटकाच्या पात्रदारीं वयर केंद्रीक्रत जाल्लें आसोन, ९० मिनुटांचो हो नाटक कसो संपलो म्हळ्ळेंच कळीत जालेंना.
नाटकाच्या पयलें एसोशियेशनाचो आत्मीक दिरेक्तोर आनी फिर्गज विगार बाप मेलवीन डी’कुन्हा, अध्यक्ष डायगो रोड्रिगस, कारयदर्शी जेरालड डी’सोजा, सांसक्रतीक कारयदर्शी जोस्सी गोन्सालवीस, खजानदार लारेन्स मथायस वेदीर आसोन, झूज नाटक बरयणार मानाधीक अलवीन सेरावोक शाल पांग्रून, आनी सर्व पोषकांक तसेंच हितचिंतकांक फुलां तुरे दीवन मान केलो.
बाप मेलवीन दोन उत्रां उलवन, असलो एक मौल्यांचो धार्मीक नाटक आपरूप मेळच्या ह्या काळार, सर्व कोंकणी लोकानी केदिंच आसलो नाटक सोडुंक न्हजो, प्रतेक थरान ह्या करेज्माच्या बरया संधरबार आनी मानाधीक बाप आलवीन सेरावोक उल्लास पाटावन ताणीं कर्च्या सुवार्ता प्रसाराच्या आनी कोंकणी भासेथंय कर्च्या तांच्या कामांक शाभासकी पाटयली, तसेंच हांतू पात्र घेतल्ल्या सव कलाकारांक आनी तांत्रीक सहाय कर्च्या सर्वांक बरें मागलें.
