4. ಖಲ್ಲಾ ಎಕ - ದೋ ಗ್ಯಾರಾ [ವೆಂಕಟೇಶ್ ನಾಯಕ್, ಮಂಗ್ಳುರ್]
ಪಟಿಯಾಲಾಚೆ ಆತ್ಮೀಯತಾ..
ಹ್ಯಾ ಭೇಟಿಚೆ ಉಪರಾಂತ ಹಾಂವ ಆನೀ ಪೈ ಥಂಯ ದಾಕೂನ ಭಾಯರ ಸರಲೆ, ದನಪಾರ ಥೋಡೆ ಖಾವನು ರಿಕ್ಷಾರಿ ಸೀದಾ ಬಸ ಸ್ಟಾಂಡಾಕ ವಚೂನ ಪಟಿಯಾಲಾಚೆ ಬಸ ಶೋಧೂನ ಬಸಲೆ, ಆತಾ ಸೋಡತಾ, ಆತಾ ಸೋಡತಾ ಮ್ಹಣ ಸಾಧಾರಣ ಎಕ ಗಂಟೋ ಭರ ಬಸ ಚಾಲೂ ಕರಚೆ ರಾಬೊವಚೆ ಚಾಲೂ ಕರಚೆ ರಾಬೊವಚೆ ಚಲತಾ ಚಲತಾ ಸಾಧಾರಣ ದನಪಾರಾ ಎಕ ಗಂಟೇಕ ಆಮಗೆಲೆ ಪ್ರಯಾಣ ಪ್ರಾರಂಭ ಜಾಲೆ, ಸೇಮಿ ಸ್ಲಿಪರ ಬಸ ಹಾಂಗಾ ವಿಶಿಷ್ಟ ಅನುಭವ ಮ್ಹಳ್ಯಾರಿ ಕ್ರಮಬದ್ದ ಜಾವನು ರಾಗಾರಿ ಬಸಾ ಚಾಲಕಾನ ಗಾಲಚೆ ಹೊರ್ನ, ಆಮಕಾ ತೇ ನ್ಹವೋ ಅನುಭವ ಸಾದಾರಣ ದೋನ ತೀನ ನಿಮಿಷ ತೋ ವಾಜಾಯತಾ ವತಾ, ಆಮೀ ಸುರವೇಕ ಹೋ ಬಸಾಚೊ ಮಾತ್ರ ಮ್ಹಣ ಲೆಕಿಲೆ ಪಳಯಲ್ಯಾರಿ ಸಕ್ಕಡ ಚಾಲಕ ಆಸಲೆಚ ಹೋರ್ನ ಗಾಲತಲೆ ತೇ ಕರ್ಕಶ ಮ್ಹಣ ಜಾಯನಾ, ಲಯಬದ್ದ ಜಾವನು ತೋ ತೇ ಗಾಲತಾ, ಬಸಾರ ಗಾಂವ ಪಳಯತಾ ಪಳಯತಾ ಥಂಯ ತೋಡೆ ವೇಳ ನೀದ ಲಾಗಲೆ ಸಾಧಾರಣ ಸಾಂಜವೇಳ ಮ್ಹಣತನಾ ಆಮೀ ಪಟಿಯಾಲಾ ಪಾವಲೆ, ಪುಡೆಕಚಿ ನಿಗದಿ ಜಾಲೇಲ ವರೀ ಸೀದಾ ಡಾ. ಮನಮೋಹನ ಸಿಂಗ ಹಾಂಕಾ ಪೋನ ಕರೂನ ಪಾವಿಲೆ ವಿಶಯ ಸಾಂಗಲೆ ತಾನೀ ಪಟಿಯಾಲಾ ಪಂಜಾಬಿ ವಿಶ್ವವಿದ್ಯಾನಿಲಯಾಚೆ ಗೆಸ್ಟ ಹೌಸಾಂತು ಆಮಕಾ ರೂಮ ಕೆಲೆಲ, ತಶೀ ಸೀದಾ ಆಮೀ ಗೆಸ್ಟ ಹೌಸಾಕ ವಚೂನ ಆಮಕಾ ದಿಲೇಲ ರೂಮಾಂತು ರಾಬಲೆ. ವಿಸ್ತಾರ ಜಾಲೇಲ ಪಂಜಾಬಿ ವಿಶ್ವವಿದ್ಯಾನಿಲಯಾಚೆ ಆವರಣ ಆಮೀ ಎಕ ಪಂತಾಕ ಫ್ರೇಶ್ ಜಾವನು ಸಾಂವೇಳ ಭೋಂವತ ವಚೂನ ಕ್ಯಾಂಪಸಾಂತು ಆಸಚೆ ಎಕ ಕ್ಯಾಂಟೀನಾಂತು ಲಸ್ಸಿ ಪೀವನು ಪರತ ರೂಮಾಕ ಯೆವನು ಟಿವಿ ಪಳೋವನು ಥೋಡೆ ವೇಳ ಆಡ ಸರಲೆ, ಅಶೆ ಪಳಯತನಾ ಧರಾಂಧರ ಪಾವ್ಸ ರೋಕವಲೊ, ಧಾಟು ಪಾವಸು ಥೇ ಶೀಂಯಾ ವೇಳೂ ಆಯಲೊ ಆನೀ ರಾಬಲೋ ತ್ಯಾ ದಿವಸ ಪಂಜಾಬಾಂತು ಪಾವಸು ಪಳೋವಚಾಕಯ ಮೆಳೆ. ಥೋಡೆ ವೇಳಾನ ಡಾ. ದೀಪಕ ಮನಮೋಹನ ಸಿಂಗ ಹಾನಿ ಪೋನ ಕೋರನು ದೋಗ ಜನ ತುಮಕಾ ಮೆಳಚಾಕ ಯೆತಾಂಚೀ ಮ್ಹಣ ಸಾಂಗಲೆ. ತಾನಿ ಪಂಜಾಬಿ ಚಲನಚಿತ್ರಾ ವಿಶಯಾರಿ ಸಂಶೋಧನ ಕೋರನು ಆಸಚೆ ವೀರ ದವಿಂದರ ಆನೀ ತಶೆ ಪಂಜಾಬಿ ಭಾಸ ಅನೀ ತಾಜೆ ವಿನ್ಯಾಸಾ ವಿಶಯಾರಿ ಸಂಶೋಧನ ಕೋರನು ಆಸಚೆ, ಆನೀ ಗಝಲ ಕವಿ ಸತ್ಪಾಲ ಸಿಂಗ ಚಾಹಲ ಆಯಲೆ. ದೋಗಯ ಆತ್ಮೀಯ ಜಾವನು ಉಲಯಲೆ, ಸುರವೇಕ ವೀರ ದವಿಂದರ ಹಾನಿ ಮನೋರಂಜನ ಮಾಧ್ಯಮಾರಿ ಪಂಜಾಬಿ ಭಾಸ ಆನೀ ಪಂಜಾಬಿ ಸಿನೆಮಾ ಸಾಹಿತ್ಯ ತಾಂತೂ ಹಿಂದಿ ಸಿನೆಮಾಚೆ ಪ್ರಭಾವ ವಿಶಯಾರಿ ಉಲಯಲೆ, ಕೊಂಕಣಿ ಸಿನೆಮಾಂತು ತಿಟಲೇಕ ಸಮಜಣಿ ನಾತಿಲೆ ನಿಮಿತ ಕನ್ನಡ ಭಾಸೇಚೆ ಸಿನೆಮಾ ಆನೀ ತ್ಯಾ ವೇಳಾರ ಆಯಿಲೆ ಥೊಡೆ ತುಳು ಸಿನೆಮಾ ವಿಸಯಾರಿ ಆಮೀ ಭಾಸಾ ಭಾಸ ಕೆಲೆ. ಸಿನೆಮಾ ಕ್ಷೇತ್ರಾಂತು ವಿಶೇಷ ಆಸಕ್ತ ಜಾವನು ಆಸೂನ ಸಂಶೋಧನ ಕರತಾ ಆಸಚೆ ವೀರ ದವಿಂದರಾನ ಪಂಜಾಬಿ ಸಿನೆಮಾಚೀ ವ್ಯಾಪಿ, ತಶೇ ಭೋಜಪುರಿ ಸಿನೆಮಾ ಆನೀ ಹಿಂದಿ ಸಿನೆಮಾ ಕಶೇ ಪ್ರಭಾವಿ ಜಾವನು ಆಸಾ ಮ್ಹಣ ಸಾಂಗಲೆ. ತ್ಯಾ ನಂತಾ ಗುರು ಅಂಗದ ದೆವ್ ಹಾಂಗೆಲೆ ಸಾಹಿತ್ಯಾಚೆ ಕಾಮ, ಪಂಜಾಬಿಂತೂಲೆ ಗುರುಮುಖಿ ಆನೀ ಶ್ಹಾಮುಖಿ ರೀತ, ಉರ್ದುಭಾಶೇಚೊ ಪ್ರಭಾವ, ಹ್ಯಾ ಸಕ್ಕಡ ವಿಶಯಾರಿ ಮಾಹಿತಿ ದಿಲೆ ತಾಜೆ ಸಂಗಾತ ಹಾಂವಯ ಕೊಂಕಣಿ ಭಾಸ ಆನೀ ಕನ್ನಡ ಭಾಶೇಚೆ ಸಾಹಿತ್ಯ ,ಸಿನೆಮಾ ವಿಶಯ ಕೊಂಕಣಿಚೆ ಭೋಲಿ, ಆಮಗೆಲೆ ಚರಿತ್ರಾ ಮರಾಠಿ - ಕೊಂಕಣಿ ಸಂಬಂಧ, ತಶೆ ಲಿಪಿ ವಿವಾದ ಸಕ್ಕಡ ಉಲಯಲೆ.
ಸತ್ಪಾಲ ಸಿಂಗ ಹಾನಿ ೮೦೦ ಅ.ಡೊ ವರಸ ಪುಡಲೆ ಉಗಮ, ಜಾವನು ಸಾಧಾ ಭಾಸ ಜಾವನು ಆಸೂನ ಪಂಜಾಬಿ ಭಾಸ ಜಾಲೇಲ ರೀತ. ಭಾಸೇಂತುಲೆ ತೀನ ಆವಾಜ, ವ್ಯಾಕರಣ - ಚಂದ್, ವರ್ಣೀಕ್, ಮಾತ್ರೀಕ್ ತಶೆ ಪಂಜಾಬಿ ಸಾಹಿತ್ಯಾಂತುಲೆ ’ಟಪ್ಪೆ’, ’ಗಜ್ಲಗೊ’ ’ರಮಲ್’ ಆನೀ ಹಜಸ ವಿಚಾರ ಆನೀ ಅವ್ತಾರ ಪಾಶಾ ಆನೀ ಸಾಂತ್ರಾಮ ಉದಾಸಿ ಸಮಕಾಲೀನ ಕ್ರಾಂತಿಕಾರಿ ಸಾಹಿತ್ಯ ವಿಚಾರ ಕೋರನು ಸತ್ಪಾಲ ಹಾನಿ ಪಂಜಾಬಿ ಗಝಲ ಸಾಂಗೂನ ತಾಜೆ ಅರ್ಥ ಆನೀ ಹಾಂವಯ ಕೊಂಕಣಿ ಕವಿತಾ ವಾಚೂನ ತಾಜೆ ಅರ್ಥ ತಾಂಕಾ ಸಾಂಗಲೆ ಸಂಭಾಷಣ ಸಕ್ಕಡ ಹಿಂದಿ ಆನೀ ಇಂಗ್ಲೀಷ ಭಾಶೇರ ಚಲ್ಲೇ.
ತಾನೀ ದೋಗ ಆನೀ ಆಮೀಯ ದೋಗ ತಶೇ ವೀರ ದವೀಂದರಾನ ’ಖಲ್ಲಾ ಎಕ, ದೋ ಗ್ಯಾರಾ’ (ಎಕ ಮ್ಹಳ್ಯಾರ ಎಕಳೋ, ದೋಗ ಮೆಳ್ಯಾರ ಇಕರಾ ಜಾತಾ) ಮ್ಹಣ ಸಾಂಗೂನ ಆಮೀ ಸಕ್ಕಡ ಜೆವಣ ಕೆಲೆ. ಅವ್ತಾರ ಪಾಶಾ ತಸಲೆ ಕವಿ ಕಾಂತ್ರಿಕಾರಿ ಜಾವನು ಲೋಕಾ ಮಧೇಂತು ಉಜ್ವಾಡ ಜಾವನು ಆಸೂನ ತಾಂಕಾ ಗೋಲಿ ಮಾರೂನ ಖೂನ ಕೆಲೆಲೆ ತಾಂಗೇಲೆ ಲೇಖನಿಚೆ ಶೂರತ್ವ ದಾಕಯಿತಾ. ತಶೀಚ ಸಂತ್ರಾಮ ಉದಾಸಿ ತಾಂಗೇಲೆ ’ರಗತಾಂತು ಬೂಡಿಲೆ ಉತ್ರಾಂ’ ತಸಲೆ ಕೃತಿ ಪಂಜಾಬಿ ಸಾಹಿತ್ಯಾಂತು ಅಮೋಘ ಜಾವನು ಆಸಚೆ ಆಮೀ ಪಳೋವೇತ.
( ವೀರ ದವಿಂದರ ಆನೀ ಸತ್ಪಾಲ ಸಿಂಗ, ಸಂಶೋಧನಾರ್ಥಿ, ಪಂಜಾಬಿ ವಿಶ್ವವಿದ್ಯಾನಿಲಯ, ಪಟಿಯಾಲ)
೧೩ ತಾರೀಕೇಕ ಸಕಾಳೀ ವಿಸ್ತಾರ ಪಟಿಯಾಲಾ ಪಂಜಾಬಿ ವಿಶ್ವವಿದ್ಯಾನಲಿಯಾಚೆ ಆವರಣಾಂತು ಆಸಚೆ ವಿಶ್ವ ಪಂಜಾಬಿ ಕೇಂದ್ರಾಂಕ ಭೇಟ ದಿಲೆ, ಥಂಯ ಕಾರ್ಯ ಸಾಂಬಾಳೂನ ಆಸಚೆ ವೀರ ದವಿಂದರಾಲೆ ಸಾಂಗಾತ ಪರತ ಭೇಟ ಜಾಲೆ ಆನೀ ತ್ಯಾ ದಿವಸ ಪಂಜಾಬಿ ಲೋಕವೇದ ತಶೇ ಪಂಜಾಬಿ ನೃತ್ಯ ಹ್ಯಾ ವಿಶಯಾರಿ ಉಲಯಲೆ, ಪಂಜಾಬಿಚೆ ಪುರುಷ ಪ್ರಧಾನ ಭೂಮಿಕೇಚೆ ಭಾಂಗ್ಡಾ ಆನೀ ಸ್ತ್ರೀ ಪ್ರಧಾನ ಜಾವನು ಗಿಡ್ಢಾ ನೃತ್ಯ ತಾಜೆ ವಸ್ತ್ರ ವಿನ್ಯಾಸ, ಸಂಗೀತ ತಶೇಂಚಿ ಜುಮರ ನೃತ್ಯ ಆನೀ ಕಿಕ್ಕಿ ನೃತ್ಯಾ ವಿಶಯಾರಿ ಸಾಂಗಲೆ ಆನೀ ತಾಜೆ ವಿಡಿಯೋ ಪಳಯಲೆ. ಆಮಗೆಲೆ ವಿಶ್ವ ಕೊಂಕಣಿ ಕೇಂದ್ರ ಜವೋ ಕಲಾಂಗಣ ತಸಲೆ ಫಕತ ಪಂಜಾಬಿ ಭಾಸೇಚೆ ಉದರಗತೇಕ ವಾವ್ರ ಕೋರನು ಆಸಚೆ ವಿಶ್ವ ಪಂಜಾಬಿ ಕೇಂದ್ರಾನ ಸಾಬಾರ ಕಾಮ ಕೆಲೆಲ ಆಸಾ. ಪಾಕಿಸ್ತಾನಾಚೆ ಲಾಹೋರಾಂತು ಸಮೇತ ವಿಶ್ವ ಪಂಜಾಬಿ ಸಮ್ಮೇಳನ ಮಾಂಡೂನ ಹಾಡಲೆಲೆ ಕೀರ್ತಿ ಹ್ಯಾ ಕೇಂದ್ರಾಕ. ದೇಶ - ದೇಶಾ ಮಧೇಂತು ಕಿತೆ ಆಸೊ ಪುಣ ಭಾಶಾದ್ವಾರಿ ಎಕತಾ ಮ್ಹಳೇವರೀ ಪಂಜಾಬಾಂತುಲೆ ಪಂಜಾಬಿ ತಶೇ ಪಾಕಿಸ್ತಾನಾಂತು ಆಸಚೆ ಪಂಜಾಬಿ ಭಾಷೀಕ ಲೋಕ ಭಾಸಾ ಮುಖಾಂತರ ಎಕತ್ರ ಜಾವೂನ ಸಾಂಗಾತ ಮೆಳೂನ ಕರಚೆ ಕಾಮ ನಿಜಾವನೂಯ ಭಾಶಾ ಪ್ರೇಮಾಕ ಪುರಾವ ದಿತಾ. ತ್ಯಾ ನಂತಾ ಅಶೆ ಉಲಯತನಾ ಭಗತ ಸಿಂಗ ಹಾಂಗೇಲ ವಿಚಾರ ಆಯಲೆ, ಆನೀ ಹಾಂವೆ ವೀರ ದವಿಂದರಾಕ ತಾಂಗೇಲ ವಿಶಯಾರ ಉಲಯತನಾ, ಸಗಳೇ ಭಗತ ಸಿಂಗಾಲೆ ವ್ಯಕ್ತಿತ್ವಾಚೆ ಚಿತ್ರಣ ತಾನಿ ತಾಂಗೇಲ ಉತ್ರಾಂತು ಬಾಂದೂನ ದಿಲೆ, ತ್ಯಾ ತಾಂಗೇಲ ಭರಮ ಉತ್ರಾಂತು ದಿಸತಾ ಆಶಿಲೆ. ದೇಶಾ ಖಾತೀರ ಚಿಂತನ ದವರೂನ ಕಾರಾಗೃಹಾಂತು ಅಸಲ್ಯಾರೀಯ ನಿರಂತರ ಅಧ್ಯಯನಶೀಲ ಜಾವನು ಆಶಿಲೆ ತಶೇ ತಾಂಗೇಲ ಆಖೇರಿಚೆ ದೀಸಾಂತು ತಾಂಕಾ ಪಾಶಿ ದಿಲೆಲ ಹರಯೆಕ ವಿಚಾರ ತಾರ್ಕಿಕ ಜಾವನು ಮುಖಾರ ದವರತಚೀ ವೀರದವಿಂದರಾಲೆ ಉತ್ರಾಂತು ಖತ ಖತ ಆಯಲೆ, ತಾಜೆ ಉಪರಾಂತ ತಾನಿ ಮಾಕಾ ವಿಶ್ವ ಪಂಜಾಬಿ ಕೇಂದ್ರಾಚೆ ಕಾರ್ಯ ವ್ಯಾಪ್ತಿ ತಶೆ ಲೋಕ ವೇದಾಕ ಸಂಬಂಧ ಪಾವಿಲೆ ಥೋಡೆ ವಿಡಿಯೋ ಸಕ್ಕಡ ದಾಕಯಿಲೆ, ಮಾಕಾ ತ್ಯಾ ದೀಸ ರಾತಿ ಅಮೃತಸರಾಕ ಪಾವಕಾ ಆಶೀಲೆ, ತ್ಯಾ ದಾಕೂನ ಡಾ. ಮನಮೋಹನ ಸಿಂಗ ಹಾಂಗೇಲ ಪ್ರಮುಖ ಭೇಟ ಬಾಕಿ ಆಶಿಲೆ ನಿಮಿತ ಥಂಯ ಲಾಗಿ ಆಶಿಲೆ ತಾಂಗೆಲ ಘರಾಕ ಆಮೀ ಚಮಕಲೆ.
ಸಾಹಿತ್ಯ ಅಕಾಡೆಮಿಚೆ ಅದಲೆ ಪಂಜಾಬಿ ಭಾಶೆಚೆ ಕನ್ವಿನಿಯರ ತಶೆ ಪಂಜಾಬಿ ಸಲಹಾ ಸಮಿತಿಚೆ ಸಾಂದೋ ಜಾವನು ಆಸಚೆ ಸಾಹಿತಿ, ಲೇಖಕ ತಶೆ ಮಾರ್ಗದರ್ಶಕ ಡಾ. ದೀಪಕ ಮನಮೋಹನ ಸಿಂಗ ಹಾಂಕಾ ಮೆಳೋ, ಹಾನಿ ಪಂಜಾಬಿ ಕಾವ್ಯ ತಶೆ ಸಾಹಿತ್ಯ, ವ್ಯವಸ್ಥಾಚೆ ವಿರುದ್ದ ಆವಾಜ ಕಾಡಚೆ, ಅಸಹಿಷ್ಣುತಾ ಪಂಜಾಬೀ ಸಾಹಿತ್ಯಾಚೆ ಲಕ್ಷಣ, ಸೀಮಾ ಪ್ರದೇಶ ಜಾಲೆ ದಾಕೂನ ನಿರಂತರ ಆಕ್ರಮಣ ಜಾತಾನ ಸಾಹಿತ್ಯ ಅಸ್ತ್ರ ಜಾವನು ಪಂಜಾಬಿ ಭಾಸ ವಾಡ್ಡಿಲೆ ರೀತ, ಸಮಾಜಮುಖಿ ಜಾವನು ಆಸಚೆ ಸಾಹಿತಿಲೆ ಜವಾಬ್ದಾರಿ ಆನೀ ತಾಂಗೇಲ ಸಾಹಿತ್ಯ ರಚನಾ ವಿಶಯಾರಿ ಉಲಯಲೆ, ಆತ್ಮೀಯ ಜಾವನು ತ್ಯಾ ಪ್ರಾಯೇರೀಯ ತೇ ಉತ್ರಾಂ ತಾಂಗೇಲ ಜೀವನ ಶೈಲಿ ’ ವಿದ್ಯಾ ದದಾತಿ ವಿನಯಂ’ ಮ್ಹಳೆ ಉತ್ರಾರ ಸಾಕಾರ ಮೂರ್ತಿ ಜಾವನು ಆಸಂಚೀ. ತ್ಯಾಚ ದೀಸ ಪಂಜಾಬಾಂತು ಲೊಹರಿ ಪರಬ, ಶೀಂಯಾಚೆ ಕಾಳ ಸಮಾಪ್ತ ಜಾತಾನ ಸಂಭ್ರಮ ಕರಚೆ ವೇಳ (ಜನವರಿ ೧೩) ತ್ಯಾ ಪರಬೆಕ ವೆಗವೆಗಳೆ ಗೋಡ ಖಾಣ ಕರಚೆ ರೀವಾಜ ತಶೇ ತಾಂಗೇಲ ಘರಕಡೆ ತ್ಯಾ ದಿವಸ ವೆಗವೆಗಳೇ ಪ್ರಕಾರಾಚೆ ಆಕಾರಾಚೆ ತಶೇ ರುಚೀಚೆ ಗೋಡ ಖಾಣ ಕಾವಚಾಕ ಮೆಳೇ. ಆಮೀ ಮಕರ ಸಂಕ್ರಮಣ ಕಶೇ ಆಚರಣ ಕರತಾಚಿ ಕೀ ತಸೇ ಸಂಕ್ರಮಣ ವೆಳಾಕ ತಾನಿ ಲೋಹರಿ ಪರಬ ಕರತಾಂಚೀ. ಆಮಕಾ ತಾಂಗೇಲ ಘರಾ ದಾಕೂನ ಬಸ ಸ್ಟೇಷನ ತಾಂಯ ತಾಂಗೇಲ ಕಾರಾಕ ವ್ಯವಸ್ಥಾ ಕೆಲೆ ಭಾರಿ ಆತ್ಮೀಯತಾ ಆನೀ ಮೋಗ ತಾಂಗೇಲ ಉತ್ರಾಂತು ಆಶೀಲೆ,
ಪಂಜಾಬಾಚೆ ಪಟಿಯಾಲಾ ಮಾಕಾ ಮಸ್ತ ಆತ್ಮೀಯ ಜಾಲೆ, ವೀರ ದವಿಂದರ ತಶೆ ಸತ್ಪಲ ಸಿಂಗ ಆನೀ ಡಾ. ದೀಪಕ ಮನಮೋಹನ ಸಿಂಗ ಆಜೀಕಯ ಸಂಪರ್ಕಾರ ಆಸೂನ ಥಂಯ ರಾಬಿಲೆ ತ್ಯಾ ದಿಸ ಅವಿಸ್ಮರಣೀಯ ಜಾವನು ಆಸಾ. ಪಂಜಾಬಾಚೆ ಲೋಕ ದಿಲದಾರ ಮ್ಹಳೇಲ ನಿಜಾವನೂಯ ಖರೆ ಮ್ಹಳೆಲ ಸತ್ಯ ಮಾಕಾ ಭಾಸ ಜಾಲೆ. ತ್ಯಾ ನಂತಾ ವೀರ ದವಿಂದರಾಲೆ ಉತ್ರಾಂ. - ಕಸಲೆ ಸಂದರ್ಭಾರ ಜೀವಾಕ ಕಸಲೆ ಆಘಾತ ಜಾವಚೆ ಜವೋ ಆಕ್ರಮಣಾಚೆ ವೇಳಾರ ಲಾಗೀ ಸರದಾರಜೀ ರಾಬಲಾ ಮ್ಹಣ ಜಾಲ್ಯಾರ ತಾಗೇಲಾಗಿ ವಚೂನ ರಾಬ ತೋ ತುಗೇಲ ರಕ್ಷಣ ಕರತಾ, ತಾಕಾ ಸುರವೇಕ ತುಗೆಲ ಜೀವ ಪ್ರಮುಖ ಜಾತಾ ಉಪರಾಂತ ತಾಗೇಲ ಮ್ಹಳೆಲೆ. ಧೈರ್ಯ ಶೌರ್ಯಾಚೆ ಜೀವನ ಸರದಾರ ಲೋಕಾಂಗೆಲೆ ಮಳೇಲ ನಿಜಾವನೂಯ ಮನನ ಜಾತಾ.
ಆಮೀ ದನ್ಪಾರಾ ಪಟಿಯಾಲಾ ದಾಕೂನ ಅಮೃತ ಸರಾಕ ಭಾಯರ ಸರಲೆ ರಾತಿ ಮ್ಹಣತನಾ ಧೋವ ಪಡತಾ ಆನೀ ವಾಟ ಬಂಧ ಜಾತಾ ಮ್ಹಣ ವೆಗೀಚ ಭಾಯರ ಸರಲೆ ತೇ ಭಾರೀ ಶೀಂಯಾ ದೀಸ ದೋನಪಾರಾ ಪೋಟಾಕ ಥೋಡೆ ಖಾಲೆ, ಲೊಹರಿಚೆ ಗೋಡ ಖಾವನೂಚ ಅರ್ಧ ಪೊಟ ಬೋರನು ಆಶಿಲೆ ಪಟಿಯಾಲಾ ದಾಕೂನ ಅಮೃತಸರ ಮಸ್ತ ದೂರ ತ್ಯಾ ದಾಕೂನ ಗೋತನಾ ನಾತಿಲೆ ಗಾಂವಾ ಜಾಲೆ ದಾಕೂನ ಜಾವಚೆ ತಿಟಲೆ ವೇಗಿ ಆಮೀ ಭಾಯರ ಸರಲೆ, ವತಾ ವತಾ ಕಾಳೋಕ ಜಾತಾ ಗೆಲೆ ಅಂತೂ ಇಂತೂ ರಾತಿ ಆಟ ಸಾಡೆ ಆಟ ಮ್ಹಣತನಾ ಆಮೀ ಅಮೃತಸರಾಂತು ಪಾವಲೆ. ನಿಗದಿ ಪ್ರಮಾಣ
ರಾತಿ ಆಮೀ ಅಮೃತಸರ ಪಾವಲೆ, ಥಂಯ ಖಾಲ್ಸಾ ಕಾಲೇಜಾಚೆ ಗೆಸ್ಟ ಹೌಸಾಂತ ರೂಮ ಆಶಿಲೆ, ಸಕ್ಕಡ ಧರ್ಮ ಕ್ಷೇತ್ರಾಚೆ ಹಣೆಬರಪ ಎಕಚೀ ಮ್ಹಳೇವರೀ ರಾತಿ ಬಸ ಸ್ಟಾಂಡಾ ದಾಕೂನ ರುಮಾಕ ವಚೂಕಾ ಜಾಲ್ಯಾರಿ ತ್ಯಾ ಅಮೃತಸರಾಚೆ ರಿಕ್ಷಾವಾಲಾನೀ ಸ್ಪಷ್ಟ ಕೆಲೆ, ಸಾಬಾರ ಲೋಕಾಂಕ ಆಮೀ ವಿಚಾರ ಕೆಲೆ ಆಮಕಾ ವಚಾಕ ಆಶಿಲೆ, ಪ್ರಸಿದ್ದ ಖಾಲ್ಸಾ ಕಾಲೇಜಾಕ, ಖಾಲ್ಸಾ ಕಾಲೇಜಾಚೆ ಡಾ. ರಾಮಿಂದರ ಕೌರ ಹಾಂಕಾ ಭೇಟ ಜಾವಚಾಕ ಆಶಿಲೆ ತ್ಯಾ ದಾಕೂನ ಹ್ಯಾ ವಿಚಾರ ಪಟಿಯಾಲಾಂತು ಡಾ. ದೀಪಕ ಮನಮೋಹನ ಸಿಂಗ ಹಾಂಕಾ ಸಾಂಗತರಿ ತಾನಿ ಸೀದಾ ಉಲೋವನು ಆಮಕಾ ಖಲ್ಸಾ ಕಾಳೇಜಾಚೆ ಅತಿಥಿ ಗೃಹಾಂತು ರಾಬಚಾಕ ವ್ಯವಸ್ಥಾ ಕೋರನು ದಿಲೆ, ಚಂಢೀಗಡಾಂತು ಚಡ ವೇಳ ನಾತ್ಲಾರೀಯ ಪಟಿಯಾಲಾಂತು ಸಾವಕಾಶ ರಾಬೂನ ಪಂಜಾಬಿ ಲೋಕ ದಿಲದಾರ ಮ್ಹಳೇಲ ಸತ್ಯ ಮಾನೂನ ಗೇವೂನ ಅಮೃತಸರಾಕ ಯೇವನು ಪಾವತರೀ ತೋಡೆ ತೋಡೆ ತಿಕಶೆ ಅನುಭವ ಆಯಲೆ, ಪಯಲೆ ರಿಕ್ಷಾವಾಲಾಕ ಆಮಕಾ ಖಾಲ್ಸಾ ಕಾಲೇಜಾಕ ಪಾವಯಿ ಮ್ಹಣತರೀ ೧೦೦ ರೂಪಯೀ ಮ್ಹಣಾಲೊ, ರಾತಿ ಜಾಲಾ ಜಾಗೊ ಗೊತನಾ ಖರೆ ಮ್ಹಣು ಆಮೀ ಬ್ಯಾಗ ಸಮೇತ ದೋಗ ಜನ ರಿಕ್ಷಾಂತು ಬಸಲೆ, ಆಮಕಾ ಸುರವೇಕಚೀ ವೆಳ ಜಾಲಾ, ಸಾದಾರಣ ರಾತಿ ೯ ಜಾಲಾ ಚಿಕೆ ಮುಖಾರಿ ವರೂನ ರಾಬೂನ ಪರತ ಲೋಕಾಂಕ ಆಪೋವನು ಬಾಡೆ ಗಾಲಚಾಕ ಲಾಗಲೊ, ವಿಶ್ವಾಸಾಕ ಥೋಡೆ ಕೋಪು ಆಯಲೆ, ದೋಗ ಲೋಕ ಬಯಸಲೆ, ವ್ಹಿಂಗಡ ಗಾಂವ ಆಮಕಾ ಕಾಂಯ ಕರಚಾಕ ಜಾಯನಾ ಆಮಚಿಗೇಲೇಂತು ಉಲೋನು ತಾಕಾ ಸೊವತಾ ಬಸಲೆ, ತಾಂತೂಯ ಆಖೇರಿಕ ಖಾಲ್ಸಾ ಕಾಲೇಜಾಲಾಗೀ ಪಾವ, ಪಳಯಲ್ಯಾರಿ ಖಾಲ್ಸಾ ಕಾಲೇಜಾಕ ಸಾಬರ ದ್ವಾರ ಆಸಾ, ಸಾದಾರಣ ಆಮಗೆಲೆ ಹಂಪನಕಟ್ಟೇ ದಾಕೂನ ಸ್ಟೇಟಬ್ಯಾಂಕ ಥಾಂಯ ವಿಸ್ತಾರ ಜಾಲೇಲ ಜಾಗೊ ಆಮಕಾ ಗೇಟ ನಂಬರ ಗೊತನಾ, ರಾಮಿಂದರ ಕೌರ ಹಾಂಕಾ ಪೋನ ಕೋರನು ತಾನಿ ಸಾಂಗಿಲೆ ಪ್ರಕಾರ ತ್ಯಾ ರಿಕ್ಷಾವಾಲಾಕ ಸಾಂಗೂನ ಗೇಟಾ ಲಾಗಿ ಪಾವಲೆ, ಆಮಕಾ ಅತಿಥಿ ಗೃಹಾಕ ವಚಾಕ ಆಶಿಲೆ ನಿಮಿತ ಗೇಟಾ ಲಾಗಿ ವಾಚ್ ಮೆನಾಕ ನಿಮಗಿತನಾ, ತೇ ಗೇಟಾ ದಾಕೂನ ಸಾಬಾರ ಭಿತರ ಆಸಾ ಮ್ಹಣ ಸಾಂಗಲೊ, ಎಕ ದನಪಾರಾ ಪೋಟಾಕ ಖಾಲೇಲೆ, ಪೋಟಾಕ ಲಾಯಕ ಭೂಕ ಜಾವನೂಯ ಆಶಿಲೆ, ಚಮಕೂನ ವಚಾಕ ತ್ರಾಣ ನಾಶೀಲೆ ಶೀಂಯ ವಿಂಗಡ, ರಿಕ್ಷಾವಾಲಾಕ ಭೀತರ ಸೋಡಚಾಕ ಸಾಂಗಲೆ, ತೊ ಭಿಲಕುಲ್ ವರಚಾಕ ತಯಾರ ನಾ ಪರತ ೫೦ ದಿವಕಾ ಮ್ಹಣಚಾಕ ಲಾಗಲೊ, ಜಾಯತ ಮ್ಹಣ ಸಾಂಗೂನ ಸೀದಾ ತಾಣೆ ಆಮಕಾ ಅತಿಥಿ ಗೃಹಾಕ ಪಾವಯಲೆ, ಥಂಯ ನರ ಮನೀಶ ನಾ. ರಾಮಿಂದರ ಕೌರ ಹಾಂಕಾ ಪೋನ ಕೆಲೆ ಆನೀ ಆಮಿ ಪಾವಿಲೆ ವಿಚಾರ ಸಾಂಗಲೆ. ಥಂಯ ಲೋಕ ಯೆತಾ ಮ್ಹಣ ಸಾಂಗಲೆ , ಥಂಯ ಆಶಿಲೆ ಕುರ್ಚಿರ ಬಯಸೂನ ರಾಕಚಾಕ ಪ್ರಾರಂಭ ಕೆಲೆ ಅರ್ಧೋ ಗಂಟೆ ಜಾಲೆ, ಎಕ ದಿಕಾನ ಪೋಟಾಕ ಭೂಕ ಚಡತಾ ಗೆಲೆ, ಜನ ಕೋಣಾಯ ಯೆವಚೆ ದಿಸನಾ, ಕಸಲೆ ಕರಚೆ ಮ್ಹಣ ಕಳನೀ ಸಗಳೆ ಅತಿಥೀ ಗೃಹಾಚೆ ಸುತ್ತು ಗಾಲೆ. ಕೋಣಾಯ ದಿಸಚಾಕ ನಾ ಪರತ ರಾಮೀಂದರ ಕೌರ ಹಾಂಕಾ ಪೋನ ಕೆಲೆ, ಕೋಣಾಲೇಯ ಖಬರ ನಾ, ತ್ಯಾ ರಾತಿ ತೀಚ ಸಾದಾರಣ ಎಕ ಗಂಟೇ ನಂತರ ಆಯಲಿ, ಪಳಯಲಾರೀ ಕಾಮಾಚೊ ಎಕಲೊ, ಬಾಯರ ಗೆಲೆಲೊ ಮಾಗಿರ ಆಯಲೊ, ತೀಣೆ ತಾಕಾ ಸಮ ಜೋರ ಕೊರನು, ತಾಣೆ ಆಮಕಾ ರೂಮಾಚೆ ವ್ಯವಸ್ಥಾ ಕೋರನು ದಿಲೆ. ಆನೀ ಆಮಕಾ ಜೆವಣಾ ವ್ಯವಸ್ಥಾ ಕರತಾ ಮ್ಹಣ ಸಾಂಗಲೊ, ತೀಣೆ ತ್ಯಾ ದಿಕಾನ ಗೆಲೆ ಸತಾಂ ಹಾಗೇಲ ದುಸರೇಚ, ತ್ಯಾ ದಿವಸ ಲೊಹರಿ ಪರಬ ಜಾಲೆಲ ಕಾರಣ ದೊಸ್ತಾಲೆ ಘರಾ ವಚೂನ ಬರೆಂ ಕೋರನು ಸುರ ಪೀವನು ಯೆವನ ಆಶೀಲೊ, ಸಾಹೇಬ ಹಾಂವ ರಾಂದಪ ಕಸಲೆ ಕರನಿ, ಮ್ಯಾಡಮಾಕ ಸಾಂಗೂನಕಾತ ಮಾಕಾ ಸಾನ ಸಾನ ಚೆರ್ಡುಂವ ಆಸಾ ಹಾಂಗಾ ಭಾಯರ ಗೆಲ್ಯಾರ ಹೋಟೆಲಾಂತು ಜೆವಣ ಕರಾ ಮ್ಹಣ ಹಾತ ಪಾಯ ಧರೂಂಕ ಲಾಗಲೊ, ರಾತ್ರಿ ಪೋಟಾಭೂಕ ಸುರವೇಕಚೀ ವೇಳ ಜಾಲಾ, ಕಸಲೆ ಕರಚೆ ಆನೀ ತೇಂವಯ ಅತಿಥಿಗೃಹ ಎಕ ಮುಲ್ಯಾಂತು ಆಸಚೆ, ಕಶೆ ವಚಾಕ ಸಾಧ್ಯ ಮ್ಹಣತನಾ ತಾಣೆ ತಾಗೇಲ ಮೋಟಾರ ಬೈಕ ವರಾ ಮ್ಹಣ ಸಾಂಗೆಲೆ, ತಾಂತು ಮೂಳಾಕ ಲಾಗಚೆ ತಸಲೆ ಪೆಟ್ರೋಲ, ಜಾಯತ ಮ್ಹಣ ವಿಶ್ವಾಸಾನ ಕಶಕೀ ತೇ ಬೈಕ ಸ್ಟಾರ್ಟ ಕೋರನು ಆಮೀ ಭಾಯರ ಸರೂನ ಸುರವೇಕ ಪೆಟ್ರೋಲ ಪಂಪ ಶೋದೂನ ತೊಡೆ ಪೆಟ್ರೋಲ ಗಾಲನು ಆಮಗೆಲೆ ಪೋಟಾಕ ಪೆಟ್ರೋಲ ಶೊಧೂನ ವಚೂನ ಪರಾಟ ಆನೀ ಚಿಕನಾಚೆ ರಾಂದಯಿ ಖಾವನು ತ್ಯಾ ಕಾಳಕಾಂತು ಪರತ ರೂಮಾಕ ಯೆವನು ಪಾವಲೆ. ಸಕಾಳಿ ಉಟೋವನು ಅಮೃತಸರಾಂತು ಪ್ರಸಿದ್ದ ಆಸಚೆ ವಿಶ್ವವಿಖ್ಯಾತ ಸ್ವರ್ಣ ಮಂದಿರ ಜವೋ ಗೋಲ್ಡನ ಟೆಂಪಲ ವಚೆ ಮ್ಹಣ ನಿರ್ಧಾರ ಕೋರನು ನಿದ್ದಲೆ, ಸಕಾಳಿ ಮ್ಹಳ್ಯಾರ ಲೋಕ ಉಣೆ ಸಂಖ್ಯಾನ ಆಸತಾ ಆರಾಮೇರ ಭೋಂವನು ಯೆವಚೆ ಮ್ಹಣ ಆಮೀ ಲೆಕಿಲೆ.
ಸಕಾಳಿ ಫಾಂತೇರ ೫ ಮ್ಹಣತನಾ ಅಲರಾಮ್ ದವೋರನು ಸಾಧಾರಣ ೬ ಮ್ಹಣತನಾ ಉಟೋವನು ೭ ಮ್ಹಣತನಾ ಭಾಯರ ಯೆವನು ಪಳಯಲ್ಯಾರಿ ದುವೋರ ಭೋರನು ಗೆಲೆವರಿ ಅನುಭವ ಎಕ ದಿಕ್ಕಾನ ಕಡ ಕಡ ತಸಲೆ ಶೀಂಯ, ರೂಮಾಂತು ತಿಟಲೇಕ ಶೀಂಯ ಮ್ಹಣ ಕಳೇಲ ನಾ ಜಾಲ್ಯಾರಿ ಭಾಯರ ಸಕ್ಕಡ ಧೋವ ಪಡಲಾ, ರೂಮಾ ದಾಕೂನ ಗೇಟ ತಾಂಯ ಚಮಕೂನ ವಚೂಕಾ, ರಾತಿ ಆಯಿಲೆ ಗೆಲೆಲೆ ವಾಟ ಸಕ್ಕಡ ಆತಾ ಧೋವಾಂತು ಆನೀಕಯ ಚಂದ ದಿಸಲೆ, ತೇ ಕಾಲೇಜ ಪಳೋವಚಾಕ ಭವ್ಯ ಜಾಲೇಲ ಅರಮನೆಚವರೀ, ತ್ಯಾ ಚಿರ್ಣೀಕಾ, ಅದ್ಬುತ ಜಾಲೇಲ ಬಾಂದಪ ಮಾಕಾ ಮೈಸೂರಾಚೆ ಅರಮನೆ ಪಳಯಲೇಲ ಅನುಭವ, ಸಗಳೇ ಇಟ್ಟಿಗೇಂತು ಬಾಂದಿಲೆ ಕಾಲೇಜ , ಖಾಲ್ಸಾ ಕಾಲೇಜ. ಆರತಾ ಯು.ಜಿ.ಸಿ ವಿಶ್ವವಿದ್ಯಾನಿಲಯ ಆಯೋಗಾನ ವೆಂಚಿಲೆ ೧೯ ಹೇರಿಟೇಜ ಕಾಲೇಜಾಚೆ ಪಟ್ಟೀಂತ ಖಾಲ್ಯಾ ಕಾಲೇಜಾಕ ಪ್ರಮುಖ ಸ್ಥಾನ ಆಸಾ, ೧೮೯೨ ಇಸವೀಂತ ಬಾಂದಿಲೆ ಕಾಲೇಜ, ಹ್ಯಾಚ ಪಟ್ಟೀಂತ ಆಮಗೆಲೆ ಮಂಗಳೂರಚೆ ಹಂಪನಕಟ್ಟೇರ ಆಸಚೆ ಕೆಂಪುಕೋಟೆ ಮ್ಹಣ ನಾವಾದಿಕ ಜಾಲೇಲ ಮುರ್ಯಾ ಫಾತರಾಂತು ಬಾಂದಿಲೆ ಗೌರಮೆಂಟ ಕಾಲೇಜ ಮ್ಹಣು ನಾಂವ ಆಸಚೆ ವಿಶ್ವವಿದ್ಯಾನಿಲಯ ಕಾಲೇಜಯ ಆಸಾ. ವಿಶ್ವವಿದ್ಯಾನಿಲಯ ಸಂಧ್ಯಾ ಕಾಲೇಜ ಮ್ಹಣ ನವೆ ಅಸ್ತಿತ್ವಾಕ ಆಯಿಲೆ ಕಾಲೇಜಾಂತು ಉಪನ್ಯಾಸಕ ಜಾವನು ಆಸಚೆ ಮಾಕಾ ನಿಜಾವನೂಯ ಎಕ ವಿಶಿಷ್ಟ ಅನುಭವ ವಿಸ್ತಾರ ಜಾಲೇಲ ಕಾಲೇಜಾಚೆ ಆವರಣ ಆಮೀ ದೊಗಾಯ ಚಮಕೂನ ಚಮಕೂನ ತ್ಯಾ ಶೀಂಯಾಕ ಗೇಟಾ ಲಾಗಿ ಪಾವಲೆ , ತಸಲೆ ಸಾಧಾರಣ ಸಾತ- ಆಟ ಗೇಟ ತೇ ಕಾಲೇಜಾಕ ಆಸಾ.
ಭಾಯರ ಯೆವನು ಎಕ ಆಟೋ ದೋರನು ಸೀದಾ, ಗೋಲ್ಡನ ಟೆಂಪಲಾಕ ಪಾವಲೆ ಸಂಪ್ರದಾಯಾಚೆ ವರಿ ದಾರಲೆನ ಮಾತ್ಯಾಕ ಆಂಕಟಿ, ರೂಮಾಲ ಬಾಂದೂನ ತಶೇ ಭಾಯಲಮನಶ್ಯಾನ ಸೆರಗ ಮಾತ್ಯಾರ ಗಾಲನು ಚಲಚೆ ಆಶೀಲೆ, ತಶೇ ಥಂಯ ಆಸಚೆ ಅಂಗಡೀಂತು ಸಿಖ್ಖ ಧರ್ಮಾಚೆ ಲಾಂಛನ ಆಸಚೆ ರೂಮಾಲ ಮೆಳತಾ, ಆನೀ ತೇ ಮಾತ್ಯಾಕ ಬರೇ ಕೋರನು ಬಾಂದೂನ ಸೊಡತಾಂಚಿ. ಇಂದ್ರಲೋಕಾಕ ಗೆಲೆಲೆ ಅನುಭವ, ಶಸ್ತ್ರ ಅಸ್ತ್ರಧಾರಿ ಜಾವನು ಮಾತೇಕ ಹೊಡಲೆ ಹೊಡಲೆ ಮುಂಡಾಸ ಬಾಂದೂನ ಆಸಚೆ ಸಿಖ್ಖ ಲೋಕ, ಧವೊ, ಶೀಂಯ ತಳೇ ಮದೇಂತು ಆಸಚೆ ಸ್ವರ್ಣಮಂದಿರ ತಳೆಂತುಲೆ ಸ್ವರ್ಣ ಸಾಳಕಾವರೀ, ಸ್ತಬ್ದ ಜಾವನು ಆಶಿಲೆ ಉದಾಕ ಸಾಲ ಮಾರನು ರಾಬಿಲೆ ಲೋಕ, ಅದ್ಬುತ ದೃಶ್ಯ ತಳೇಂತು ಬಣ್ಣ ಬಣ್ಣಚೆ ಜಳಕೆ, ತ್ಯಾ ಶೀಂಯಾತು ತೀರ್ಥ ಸ್ನಾನ ಕರಚೆ ಲೋಕ
ಆಮೀ ಗೋಲ್ಡನ ಟೆಂಪಲ ಮ್ಹಣ ಸಾಂಗಲ್ಯಾರೀಯ ಸಿಖ್ಖ ಧರ್ಮೀಯಾಂಕ ತೇ ಹರಮಂದಿರ ಸಾಹೇಬ, ಎಕ ಸುತ್ತು ಕಾಡೂನ ವಚೂನ ಸಾಲಾಂತು ರಾಬಲೆ, ಹರಮಂದಿರ ಸಾಹೇಬಕ ಭೇಟದಿಲೆ, ಸಾಬಾರ ಲೋಕ, ನಿರಂತರ ಗುರು ಗ್ರಂಥ ಪಠಣ, ಆಯಕೂಚಾಕ ಕರ್ಣಮಧುರ, ಸಾಲಾರ ರಾಬೂನ ಗುರು ಗ್ರಂಥ ಸಾಹೇಬ ಪಳೋವನು ಭಾಯರ ಆಯಲೆ.ಸಾಲ ಮಾರೂನ ರಾಬಿಲೆ ಲೋಕ ದೋನ ದಿಕಾನ ಉದಾಕ ಮಧೇಂತು ವಾಟ ತ್ಯಾ ಉದಕಾ ವಯರಿ ಧವೋ ಪಾಂಗರೂನ ನಿದ್ದಲೆ ವರೀ ಧುಂವೋರ ಮಧೂರ ರಾಗಾರ ಗುರುಗ್ರಂಥ ಪಠಣ, ತ್ಯಾಚ ಪುರೋ ಎಕ ಅಲೌಕಿಕ ಪ್ರಪಂಚ ಇಂದ್ರ ನಗರಿಕ ಗೆಲೆಲೆ ಅನುಭವ
ಗೋಲ್ಡನ ಟೆಂಪಲಾಂತ ಗೇಲೆಲ ಸಕ್ಕಡಾಂಕ ಪ್ರಸಾದ ರೂಪಾರ ಲಂಗರ (ರೋಟಿ) ತಾಕಾ ಎಕ ರಾಂದಯಿ, ಆನೀ ಕೀರ ನಿರಂತರ ಜಾವನು ದಿವಚೆ ಪದ್ದತಿ ಆಸಾ, ವಾಟ್ಟೆ, ಎಕ ಬೌಲ ಆನೀ ಎಕ ಚಮಚ ತಾನೀ ದಿತ್ತಾಂಚಿ , ಸಾಲ ಮಾರೂನ ಬಸಚೆ ಲೋಕ, ಪಂಕ್ತಿಭೇಧ ನಾ ಕೋಣಾಯ ಕಸಲೆ ಆಸೋ ಲಂಗರ ಸ್ವೀಕಾರ ಕರಚಾಕ ಬಸತಾ, ಮೆಗಾ ಕಿಚನ ಎಪಿಸೋಡಾಂತೂಯ ಹ್ಯಾ ವಿಚಾರ ಆಯಲಾ, ಆಮಗೆಲೆ ಉಡುಪಿ ಧರ್ಮಸ್ಥಳಾವರೀ ಖೂಬ ಲೋಕ ಯೆತಾ, ನಿತ್ಯ ಅನ್ನದಾನಾವರೀ ರೋಟಿ ಹಾಂಗಾ ಪ್ರಸಾದ ರೂಪಾರ ಲೋಕ ಸ್ವೀಕಾರ ಕರತಾಂಚೀ. ರೊಟಿ ಲಾಟೂಚೆ ಬಾಜೂಚೆ ನಿರಂತರ ಚಲತಾ, ದೇಶಾಂತು ಆಪತ್ತ ವಿಪತ್ತ ಆಯಿಲೆ ವೇಳಾರ ಆನೇಕ ವಿಚಾರ ಮ್ಹಳ್ಯಾರ ಹ್ಯಾ ಖಾಲೇಲ ವಾಟ್ಟೆ ಸಕ್ಕಡ ಧುವಚೆ ರೀತ ಸಕಾಳಿ ಕಾಮಾ ವಚೆ ಜನ ಹಾಂಗಾ ಯೆತಾಂಚಿ ಸೇವಾ ರೂಪಾರ ಕಾಮ ಕರತಾಂಚಿ ಆನೀ ವತಾಂಚಿ. ಕೊಡಿಯಾಲಾ ದಾಕೂನ ವತ್ತಾನಾಚಿ ಕೇಲವ ದೋಸ್ತಾನಿ ಸಾಂಗಿಲೆ ತಶೇಂಚಿ ವೀರ ದವಿಂದರಾನಯ ಸಾಂಗಿಲೆ ಗೋಲ್ಡನ ಟೆಂಪಲ ಗೆಲ್ಯಾರಿ ಲಂಗರ ಖಾವನು ಯೋ ಮ್ಹಣು. ಸ್ವಾದಿಷ್ಟ ಜಾವನು ಆಸಾ ಮ್ಹಣ, ತಾಕಾ ನ್ಹಾಂವಚೀ ಲಂಗರ ಸಾಬಾರ ಲೋಕ ತ್ಯಾ ತಯಾರ ಕರಚಾಂತು ನಿರಂತರ ಕಾಮ ಚಾಲೂ ದವರತಾಂಚಿ. ತಾಕಾ ಜಾವಕಾ ಜಾಲೇಲ ರಾಂದಯಿ ತಯಾರ ಕರಚೆ ತಾಜೆ ಸಾಂಗಾತ ದಿವಚೆ ಕೀರ (ಗೊಡಶೆ) ಹಾಂವ ದೋನ ಪಂತಾ ಗೇವನು ಖಾಲೇಲ ಆಸಾ. ಕಿತಲೆ ಜಾವಕಾ ತಿಟಲೆ ದಿತಾಂಚಿ. ಆಮಕಾ ಸಕ್ಕಡಾಂಕ ವಾಟೆ ಆನೀ ವಾಟೋಲಿ ದಿಲೆ. ಆಮಕಾ ಕಸಲೆ ಕರತಾ ಕಶೀ ಖಾವಕಾ ಮ್ಹಳೇಲ ಗೊತ್ತು ನಾಶಿಲೆ. ತಶೆ ವಿಂಗಡ ಲೋಕ ಕಸಲೆ ಕರತಾಂಚೀ ತಶೀಚ ಆಮೀ ಕರಚಾಕ ಪ್ರಾರಂಭ ಕೆಲೆ.
ಎಕ ಪಂತಾ ಬ್ರಾಹ್ಮಣಚಾಲೆ ಜೆವಣಾಕ ಚಮಕಲಲೋ ತೆದನಾ ತೇ ಜೆವಚೆ ರಿವಾಜ ಮಕಾ ಕಳೀತ ನಾಶಿಲೆ, ಶೀತ ಸಾಬಾರ ಪಂತಾ ಯೆತಾ, ಸಾರಾಕ ದುಸರೆ ಸುರವೇಕ ಗೊಡಶೆ, ತಾಕಾಕ ದುಸರೆ ಆನೀ ತಾನಿ ವಾಡಚಾಂತೂಯ ಎಕ ಸಂಪ್ರದಾಯ ಆಸಾ. ತ್ಯಾ ದಾಕೂನ ಸಮಾದಾನೇರ ವಾಡಚೆ ಪಳೋವನು ವಿಂಗಡ ಲೋಕ ಕಶೆ ಖಾತಾಂಚೀ ತಶೀಚ ಖಾವಚಾಕ ಶುರು ಕೆಲೆ, ಜಿಬ್ಬೇಕ ರುಚೀಕ ಜಾಲೇಲ ಸ್ವಾದಿಷ್ಟ ಜಾಲೇಲ ಖಾವನು ತ್ಫಪ್ತ ಜಾಲೆ , ಖಾವನು ಜಾತರಿ ಆಮಗೆಲೆ ವಾಟೆ ಆನೀ ವಾಟೋಲಿ ಆಮೀ ಎಕ ಜಾಗೇರ ಗಾಲಕಾ, ಥಂಯ ದಾಕೂನ ತೇ ದುವಚಾಕ ವತಾ, ತಾಂತೂಯ ಎಕ ವಿಚಾರ ಮಾಕಾ ಖೂಬ ಪಸಂದ ಜಾಲೆ, ಸಕಾಳಿ ದಾಕೂನ ವಿಂಗಡ ವಿಂಗಡ ಕಡೇನ ಆಫೀಸಾಕ ಸಕ್ಕಡ ಕಾಮಾಕ ವಚೆ ಲೋಕ ತಾಂಗೇಲ ಬ್ಯಾಗ ಸಕ್ಕಡ ಎಕ ಕಡೇನ ಲಾಂಬೋವನು ಸೇವಾರ್ಥ ಜಾವನು ಹ್ಯಾ ಕ್ಕಡ ದುವಚೆ ಕಾಮ ಕರತಾಂಚೀ ಅಸಲೆ ಸಾಬಾರ ಸೇವಾ ಕಾರ್ಯಕರ್ತ ಆಮಕಾ ಥಂಯ ಪಳೋವಚಾಕ ಮೆಳತಾ. ಥಂಯ ದಾಕೂನ ಭಾಯರ ಯೆವನು ಮಂದಿರಾಚೆ ಸುತಾಂತು ಭೋಂವಲೆ ಥೋಡೆ ವೇಳ, ಥಂಯ ಲಾಗೀ ಬೃಹತ ಗಾತ್ರಾಚೆ ಗ್ರಂಥಾಲಯ ಆಶಿಲೆ ಆಮೀ ಸಕಾಳೀ ಪುಡೆ ಥಂಯ ಗೆಲೆಲ ಕಾರಣಾನಿ ಆಮಕಾ ತೇ ಪಳೋವಚಾಕ ಸಕ್ಕಡ ಜಾಲೇಲ ನಾ. ಆಮಕಾ ತ್ಯಾ ದೀಸ ಪಂಜಾಬಾಂತು ಆಖೇರಿಚೆ ಜಾವಚೆ ತಿಟಲೆ ಸಕ್ಕಡ ಪಳೋವಕಾ ಮ್ಹಳೇಲ ಎಕ ಟಾರ್ಗೆಟ್ ಮುಖಾರ ಜಲಿಯನ ವಾಲಾ ಭಾಗ್, ವಾಘಾ ಬೋರ್ಡರ ಹಾಜೆ ಮಧೇಂತು ಡಾ. ರಾಮಿಂದರ ಕೌರ ಹಾಂಕಾ ಭೇಟಚೆ. ಆಮಕಾ ಅಮೃರಸರಾ ದಾಕೂನ ಕೊಡಿಯಾಲಾಕ ಸೀದಾ ರೈಲ ಮೆಳೇಲ ನಾ ತ್ಯಾ ದಾಕೂನ ಬಾವಜೀನ ಅಂಬಾಲಾ ದಾಕೂನ ಟಿಕೇಟ ಕಾಡಲೇಲ, ಸಕಾಳೀಚ ಅಂಬಾಲಾ ದಾಕೂನ ರೈಲ, ರಾತಿ ಆಮೀ ಅಮೃತಸರ ಸೊಡಕಾ, ಸೀದಾ ಬಸ ದೋರನು ಅಂಬಾಲಾಕ ಪಾವಕಾ ಆಶೇ ಸಾಬಾರ ಲೇಖ ಗಾಲೂನ ಪರತ ಪರತ ಗೂಂವನು ದೊಳ್ಯಾಂತು ಗೋಲ್ಡನ ಟೆಂಪಲಾಚೆ ಚಂದಾಯ ಭೋರನು ಆಮೀ ಬಾಯರ ಆಯಲೆ, ಮಂದಿರಾಕ ಲಾಗೂನ ಸಾಬಾರ ಸಾನ ಸಾನ ಅಂಗಡಿ ಆಸಾ, ಥಂಯ ದಾಕೂನ ಉಡಗಾಸಾಕ ಗೋಲ್ಡನ ಟೆಂಪಲಾಚೆ ಪ್ರತಿಕೃತಿ ಗೆತಲೆ ಆನೀ ಸಿಖ್ಖ ಧರ್ಮಾಚೆ ಲಾಂಛನ ಆಸಚೆ ಹಾತಾ ಗಾಲಚೆ ಕಡಗ ಗೆತಲೆ ಆನೀ ಥಂಡ ಲಸ್ಸಿ ಪೀವನು ಪೋಟ ಭರಲೆ.
