ಕವಿತಾकविताPoem
ಪಿಂರ್ಗೊಣ್’
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಮೃತ್:
ಕವಿತಾ ಮ್ಹಳ್ಯಾರ್ ಕಾಳ್ಜಾಚಿ ಭಾಸ್ ಮ್ಹಣ್ ಮಾಂದ್ಚ್ಯಾಂತ್ಲೊಂ ಹಾಂವ್ಯೀ ಎಕ್ಲೊಂ. ಕಿತ್ಯಾಕ್ ಮ್ಹಳ್ಯಾರ್ ಜೊ ಕೊಣ್ ಕವಿ ಜಾವ್ನ್ ಜಿಯೆತಾ, ತಾಚೆಭಿತರ್ ಖರೊಚ್ಚ್ ಎಕ್ಲೊ ಜಿಯೆತಾ. ಆನಿ ಕವಿತಾ ಜಾವ್ನಾಸಾ ಭಿತರ್ಲ್ಯಾ ಮನ್ಶ್ಯಾಚೊ ಉಲೊ.
’ದುವಿಧಾ’ ಕವಿತೆಂತ್ ಫಾಮಾದ್ ಡೋಗ್ರಿ ಕವಿ ಡಾ|ಅರ್ವಿಂದ್ ರೈನಾ ಅಶೆಂ ಸಾಂಗ್ತಾ;
"ಮೇಂ ಬಾದಲ್ ಕಾ ಎಕ್ ನನ್ಹಾ ಸಾ ತುಕ್ಡಾ,
ಬಂಜರ್ ಸಹರಾ ಪೆ ಉಡೂಂ
ಇಸ್ ಉಲ್ಜನ್ ಮೆ ಪಡಾ
ಕಿ ಬರಸೂಂ ಯಾ ನಾ ಬರಸೂಂ,
ಮೇಂ ಬಾದಲ್ ಕಾ ಎಕ್ ನನ್ಹಾ ಸಾ ತುಕ್ಡಾ"
ಸಮಾಜೆಂತ್ ಕವಿ ಕಾಂಯ್ ವೆಗ್ಳ್ಯಾಚ್ಚ್ ರಿತಿರ್ ಹ್ಯಾ ಸಂಸಾರಾಕ್ ಆಯಿಲ್ಲೊ ನ್ಹಯ್, ಬಗಾರ್ ತೆಚ್ಚ್ ಸಮಾಜೆಚೊ ಏಕ್ ವಾಂಟೊ. ಜಿಣಿ ಮ್ಹಳ್ಳ್ಯಾ ಪಯ್ಣಾಂತ್ ಅಪ್ಲೊ ವೆಗ್ಳೊ ಶೆವೊಟ್ ಘೆವ್ನ್ ಪಯ್ಣಾರ್ ಆಸ್ಚೊ ಏಕ್ ಪಯ್ಣಾರಿ. ಜಶೆಂ ಹ್ಯಾ ಸಂಸಾರಾಂತ್ ಜಿಯೆಂವ್ಚೊ ಹರ್ಯೆಕ್ಲೊ ಮನಿಸ್ ಅಪ್ಲೊಚ್ಚ್ ಮ್ಹಳ್ಳೊ ಶೆವೊಟ್ ಧರುನ್ ಚಲ್ಚೊ ಪಯ್ಣಾರಿ, ಕೊಣ್ ಪೊಂತಾಕ್ ಪಾವ್ತಾ ಆನಿ ಕೊಣ್ ವಾಟೆರ್ ಅಪ್ಲೆಂ ಪಯ್ಣ್ ಸಂಪಯ್ತಾ. ಹ್ಯಾ ಪಯ್ಣಾಂತ್ ಅಪ್ಣಾನ್ ಕಿತೆಂ ಜೊಡ್ಲಾಂ, ಕಿತೆಂ ಹೊಗ್ಡಾಯ್ಲಾಂ ಮ್ಹಳ್ಳೆಂ ಫಾಮಾದ್ ಹಿಂದಿ ಕವಿ ಆನಂದ್ ಬಕ್ಶಿನ್ ಬರಯಿಲ್ಲ್ಯಾ ’ಆದ್ಮಿ ಮುಸಾಫಿರ್ ಹೈ’ ಕವಿತೆಚಿಂ ಉತ್ರಾಂ ಹಿಂ;
ಕ್ಯಾ ಸಾತ್ ಲಾಯೆ, ಕ್ಯಾ ತೋಡ್ ಆಯೆ
ರಸ್ತೆ ಮೇಂ ಹಮ್ ಕ್ಯಾ ಕ್ಯಾ ಚೋಡ್ ಆಯೆ
ಮನ್ಜಿಲ್ ಪೆ ಜಾಕೆ ಯಾದ್ ಆತಾ ಹೈ
ಆದ್ಮೀ ಮುಸಾಫ಼ಿರ್ ಹೈ, ಆತಾ ಹೈ, ಜಾತಾ ಹೈ
ಆತೆ ಜಾತೆ ರಸ್ತೆ ಮೆ, ಯಾದೇಂ ಚೋಡ್ ಜಾತಾ ಹೈ
[ಕಿತೆಂ ಆಮ್ಚೆಸವೆಂ ಹಾಡ್ಲೆಂ, ಕಿತೆಂ ಮೋಡ್ನ್ ಆಯ್ಲ್ಯಾಂವ್, ರಸ್ತ್ಯಾಚೆರ್ ಆಮಿ ಕಿತೆಂ ಕಿತೆಂ ಸೊಡ್ನ್ ಆಯ್ಲ್ಯಾಂವ್, ಶೆವೊಟಾಕ್ ವೆತೆಚ್ಚ್ ಉಡಾಸಾಕ್ ಯೆತೆಲೆಂ. ಮನಿಸ್ ಪಯ್ಣಾರಿ ಜಾವ್ನಾಸಾ, ಯೆತಲೊ ಆನಿ ವೆತಲೊ, ಯೆತಾ ವೆತಾನಾ ವಾಟೆರ್ ಉಡಾಸ್ ಸೊಡ್ನ್ ವೆತಲೊ]. ಉತ್ರಾಂ ಉತ್ರಾಂಚೊ ನಿಯಾಳ್ ಕೆಲೊ ತರ್, ಹ್ಯಾ ಸಂಸಾರಾಂತ್ಲ್ಯಾ ಪಯ್ಣಾರ್ ಎಕಾಮೆಕಾಚಿಂ ಮೆಟಾ ಮೆಟಾರ್ ಚಲ್ಚ್ಯಾ ಸ್ಪರ್ಧ್ಯಾಚೆ ಮಿಸ್ತೆರ್ ಉಗ್ಡಾಪೆ ಜಾಯ್ನಾಂತ್?ಸೊಭಿತ್
ಸೊಭಿತ್ ಉತ್ರಾಂನಿ ಅರ್ಥ್ ನಾತ್ಲ್ಲಿಂ ಸ್ವಪ್ಣಾಂ ಗುಂತುನ್ ಬರಂವ್ಚಿ ಕವಿತಾ ಮ್ಹಾಕಾ ಕಿತ್ಯಾಕ್ಗೀ ಆವಡ್ನಾ, ತಶೆಂ ಬರವ್ನ್ ಲೊಕಾಮೊಗಾಳ್ ಜಾಂವ್ಚಿ ಪಿಸಾಯ್ಯೀ ಮ್ಹಾಕಾ ನಾ. ಮ್ಹಜ್ಯೊ ಕವಿತಾ ಜರ್ ಮ್ಹಜೆ ಭಿತರ್ಲ್ಯಾ ಕವಿಕ್ ಪ್ರಾಮಾಣಿಕ್ ಅಭಿವ್ಯಕ್ತಿ ಮ್ಹಣ್ ದಿಸ್ತಿತ್ ತರ್ ಮ್ಹಾಕಾ ತಿತ್ಲೆಂಚ್ ಪುರೊ, ಭಿಲ್ಕುಲ್ ತಾಚ್ಯಾಕೀ ಚಡ್ ಕಿತೆಂಚ್ ನಾಕಾ.
ಸುಮಾರ್ ತೆಂಪಾ ಉಪ್ರಾಂತ್ ಹಾಂವ್ ಆಯ್ಲೆವಾರ್ ಮುಂಬಯ್ಚ್ಯಾ ಮಹಿಮ್ ರೈಲ್ವೆ ಸ್ಟೆಶನಾಕ್ ಪಾವ್ಲೊಂ. ಸುಮಾರ್ ಪಾಂಚ್-ಸ ವರ್ಸಾಧಿಂ ಮಾಹಿಮ್ ರೈಲ್ವೆ ಸ್ಟೆಶನಾ ಬಗ್ಲೆಕ್ ಆಸ್ಲ್ಲಿಂ ಜೊಪ್ಡಿಂ ನಪಂಯ್ಚ್ ಜಾಲ್ಲಿಂ. ಎಕಾ ತೆಂಪಾರ್ ತ್ಯಾ ರಸ್ತ್ಯಾಂನಿ ಪಾಶಾರ್ ಜಾತಾಸ್ತಾಂ ಲೊಕಾಂನ್ ಮಾನ್ ಧಾಂಪ್ಚೊ, ಕಿರ್ಮೆಂ ಗಳಂವ್ಚೊ, ಭಿಕ್ ಮಾಗೊಂಕ್ ಶಿಕ್ಚೊ-ಶಿಕಂವ್ಚೊ ಖೆಳ್ ಆಜ್ ಪಳೆಂವ್ಕ್ ಮೆಳ್ಳೊನಾ. ಪುಣ್ ಎಕಾ ದೆಗೆರ್ ಖಂಚ್ಯಾಕೀ ಪಾಡ್ತೆಚೊ ಬಾವ್ಟೊ ಪಾಕೆಂ ಕರುನ್ ತಾಚೆ ಇಡ್ಯಾಕ್ ತ್ಯಾ ದಿಸಾಚ್ಯಾ ಮಧ್ಯಾನೆರ್ ಸುಶೆಗಾತ್, ಸಮಧಾನೆನ್ ನಿದ್ಲ್ಲ್ಯಾಂಚಿಂ ರುಪ್ಣಿಂ ಮ್ಹಜ್ಯಾ ಮತಿಂತ್ಚ್ಚ್ ಖಂಚೊನ್ ಉರ್ಲಿಂ.
ಫುಡ್ಲ್ಯಾ ಹಾಫ್ತ್ಯಾಂತ್ ಕುವೆಯ್ಟಾಕ್ ಪಾವ್ತಚ್ಚ್, ರಸ್ತ್ಯಾರ್ ಎಕಾ ಸಿಗ್ನಲಾಕ್ ರಾವ್ಲ್ಲೊಂಚ್, ಅಪ್ರೂಪ್ ಜಾವ್ನ್ ಅಸಲೆಂಚ್ ಏಕ್ ಟೆಂಟ್ ಮ್ಹಾಕಾ ದಿಸ್ಲೆಂ. ರಸ್ತ್ಯಾ ದೆಗೆಂತ್ ಖೊಂಡ್ಲ್ಲ್ಯಾ ಫೊಂಡಾಚೆರ್ ಆಸ್ಚೆಂ ಟೆಂಟ್, ಆನಿ ತ್ಯಾ ಫೊಂಡಾಂತ್ ಕಾಮ್ ಕರ್ಚಿಂ ಥೊಡಿಂ. ಹಾಂವ್ ಏಕ್ ಘಡಿಭರ್ ಮ್ಹಾಕಾಚ್ಚ್ ಸವಾಲ್ ಕರಿಲಾಗ್ಲೊಂ; ಹ್ಯಾ ಪರ್ಗಾಂವ್ಚಾ ದುಡ್ವಾಧಿಕ್ ಲೊಕಾಂಕ್ ಆನಿ ಹ್ಯಾ ಟೆಂಟಾಂನಿ ವಸ್ತಿ ಕರ್ತೆಲ್ಯಾಂಕ್ ಆಸ್ಚೊ ತಫಾವತ್ ಕಸ್ಲೊ?. ಏಕ್ ಘಡಿ ಹಾಂವ್ ಮ್ಹಾಕಾ ಸೊಧ್ಚ್ಯಾರ್ ಪಡ್ಲೊಂ, ತೆದ್ನಾಂ ಉದೆಲ್ಲೆಂ ಕವಿತಾ ಹೆಂ;
ಸ್ಪರ್ಧೊ
ಸಾತ್ ದರ್ಯಾಂ ಭಾಯ್ಲ್ಯಾ
ಹ್ಯಾ ಗಾಂವಾಂತ್ಯೀ
ಸ್ಪರ್ಧೊ... ಸದಾಂಚೊ...
ಭಿತರ್ಲ್ಯಾ ಗಾಂವಾಂಪರಿಂಚ್
ಹಾಂಗಾಯೀ ಮೊಳ್ಬಾಕ್ ವೆಂಗ್ಚಿಂ
ಕುಪಾಂಕ್ ಪಾಟ್ ತೆಂಕ್ಚಿಂ
ಮನ್ಶಾ ರಾವ್ಳೆರಾಂಚಿಂ
ಉಭಾರ್ ಭಾಂದ್ಪಾಂ
ದಿಸಾನ್ದೀಸ್ ದೋನ್ ಆಸ್ಚೆ ಚ್ಯಾರ್
ಚ್ಯಾರಾ ಥಾವ್ನ್ ಆಟ್
ಮನ್ಶಾ ದಳ್ಬಾರಾಂಚೆ
ಮೊಟೆ ಹರಾಮಿ ರಸ್ತೆ
ಸುರ್ಯಾಳ್ ಉಜ್ಯಾ ಜಿಬಾಂನಿ
ಖಿಣಾನ್ ಸುಕ್ಚೆಂ ಸರ್ವಸ್ವ್
ರಸ್ತ್ಯಾರ್ ದಿವ್ಯಾಂ ವೊರ್
ಕ್ಯಾಮರಾಂಚೆ ಪಾರೊತ್
ಹ್ಯಾ ಮಧೆಂಯೀ
ರಸ್ತ್ಯಾ ಕೊನ್ಶಾಂತ್ಲ್ಯಾ ಟೆಂಟಾಂನಿ
ಚಿಮ್ಣೆಚ್ಯಾ ಕಾಳೊಕಾಂತ್
ಸುಕಾನಾಂತ್ ದೊಳ್ಯಾಂ ದುಃಖಾಂ
ಮಾಸಾಂ ಕಾತಿ ಝರ್ತಾತ್
ದವ್ಲೆತೆಚಿ ಭುಕ್ ಥಾಂಬ್ತಾನಾ
ವಯ್ಲ್ಯಾ ವಿಣ್ಗ್ಯಾಂಕ್
ಸಕಯ್ಲ್ಯಾಂ ಸವೆಂ
ಹ್ಯಾ ಗಾಂವಾಂತ್ಲೊ
ಸದಾಂಚೊ ಸ್ಪರ್ಧೊ
ನಮುನ್ಯಾವಾರ್ ರಂಗಾಚ್ಯಾ
ವಿವಿಧ್ ಕಾತಿಂ ಮಧ್ಲೊ
ಬಂಗ್ಲೆ ರಾವ್ಳೆರ್
ಸುಖಾ ಸಾಗೊರ್ ಥಂಡ್ ಹವೊ
ಮನ್ಶಾ ಆಸ್ತ್ ದುಡ್ವಾ ವಸ್ತ್
ಅಸೊನ್ಯೀ ಮೊಗಾ ದುಕೊಳ್
ಆಸ್ಲ್ಲೆ ಸರ್ವ್ ರಿತೆ
ಹ್ಯಾ ಚಿಮ್ಣೆಂತ್
ಕರಿ ಆಸಾ ಕಾಳೊಕ್ ಆಸಾ
ಪುಣ್ ಥಂಡಾಯ್ ಆಸಾ
ವಯ್ರ್ ಉಜೊ ಭಾಯ್ಲೊ
ಫಿಂತಾಂ ಭಸ್ಮ್ ಕರಿತ್
ಹಾಂಗಾ ಭಿತರ್ಲೊ ಉಜೊ
ಆಂತಾಂ ಗೊಬೊರ್ ಕರಿತ್
ಥಂಯ್ಚಿ ವಯ್ಲಿಂ ವಯ್ರ್ ಗೆಲ್ಲೆಪರಿಂ
ಹಾಂಗಾಚಿಂ ಸಕಯ್ಲಿಂ ಸಕಯ್ಲ್
ಥಂಯ್ ದಿಸಾಕ್ ಜಿತ್ಲೆಂ ಭಾಜ್ತಾ
ಹಾಂಗಾ ರಾತಿಕ್ ತಿತ್ಲೆಂಚ್ ಭಿಜ್ತಾ
ಸಾತ್ ದರ್ಯಾಂ ಭಾಯ್ಲ್ಯಾ
ಹ್ಯಾ ಗಾಂವಾಂತ್ಲೊ
ಸ್ಪರ್ಧೊ ಹೊ ಸದಾಂಚೊ
ಸ್ಪರ್ಧೊ ಹೊ ಸರ್ವಾಂಚೊ
ವಯ್ಲ್ಯಾ ಆನಿ ಸಕಯ್ಲ್ಯಾಂಚೊ
ಭಾಯ್ಲ್ಯಾ ತಶೆಂಚ್ ಭಿತರ್ಲ್ಯಾಂಚೊ
ನೆಸ್ಲ್ಲ್ಯಾ ಆನಿ ವಿಣ್ಗ್ಯಾಂಚೊ
ತಾನೆಲ್ಲ್ಯಾ ಆನಿ ಥಾಂಬಂವ್ಚ್ಯಾಂಚೊ
ಕವಿತಾಮೃತ್ - 9
ವಲ್ಲಿ ಕ್ವಾಡ್ರಸ್
ಜನನ್: 23
ಜುಲಾಯ್ 1967
ಇಮೇಯ್ಲ್: valleyquadras@gmail.com
ಪರ್ಗಟ್ ಜಾಲ್ಲೆ ಸ್ವತಾಚೆ
ಕವಿತಾಜಮೆ:
’ಚ್ಯಾರ್ ಮುಖಾಂ’ (2002,
ಆಶಾವಾದಿ ಪ್ರಕಾಶನ್).
’ಕಟ್ಪುತ್ಳಿ’ (2004, ಆಶಾವಾದಿ ಪ್ರಕಾಶನ್).
’ದರ್ಭಾರಾಂತ್ಲಿ ಪಿಂರ್ಗೊಣ್’ (2006, ಆಶಾವಾದಿ ಪ್ರಕಾಶನ್).
ಸಂಪಾದನ್
ಕರುನ್ ಪರ್ಗಟ್ ಕೆಲ್ಲೆ ಕೊಂಕ್ಣಿ
ಕವಿತಾಜಮೆ:
’ಕುಪಾಂ ಪೊಂದ್ಲಿಂ ಮುಖಾಂ’ (2003,
ಸಂ: ಮೆಲ್ವಿನ್ ರೊಡ್ರಿಗಸ್).
’ಕವಿತಾಪಾಠ್ ಭಾಗ್ - 1’ (2005, ಸಂ: ವಲ್ಲಿ ಕ್ವಾಡ್ರಸ್).
’ಕಾಳೊಕಾಂತ್ಲಿಂ ಕಾಂತಾರಾಂ’ (2005, ಸಂ: ಮೆಲ್ವಿನ್ ರೊಡ್ರಿಗಸ್).
’ದರ್ಯಾಕ್ ಉದಾಕ್’ (2006, ಕವಿ: ವಿಂಚ್ಣಾರ್ ಕವಿ).
’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ (2006, ಸಂ: ವಲ್ಲಿ ಕ್ವಾಡ್ರಸ್).
’ಶೆಕ್ಡ್ಯಾಚ್ಯೊ ಕೊಂಕ್ಣಿ ಕವಿತಾ’ (2007, ಸಂ: ಮೆಲ್ವಿನ್ ರೊಡ್ರಿಗಸ್).
’ತಿಂತೆರಾಂತ್ ಪಿಂತುರಾಂ’ (2007, ಕವಿ: ವಿಂಚ್ಣಾರ್ ಕವಿ).
’ಕಾಳೊಕ್ ನಾತ್ಲ್ಲೊ ಗಾಂವ್’ (2007, ಕವಿ: ವಿಂಚ್ಣಾರ್ ಕವಿ).
ಸಂಪಾದನ್
ಕರುನ್ ಪರ್ಗಟ್ ಕೆಲ್ಲೆ ಹೆರಾಂಚೆ ಕೊಂಕ್ಣಿ
ಕವಿತಾಜಮೆ:
’ಜಿವಿತಾ ಸೊಭಾಣ್’ (2002,
ಕವಿ: ಜೊರ್ಜಿ ಪೀಂತ್ ಆಯ್ಕೊಳ್).
’ಕಯ್ದ್ಯಾಚ್ಯೊ ಕವಿತಾ’ (2004, ಕವಿ: ಎಚ್ಚೆಮ್).
’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’ (2004, ಕವಿ: ಆಂಡ್ರು ಎಲ್. ಡಿ’ಕುನ್ಹಾ).
’ಮೊತಿಯಾಂ ಆನಿ ತಾರಾಂ’ (2005, ಕವಿ: ವಿಂಚ್ಣಾರ್ ಇಕ್ರಾ ಕವಿ).
’ಬಾಮುಣಾಂಚೆಂ ಚೆಡುಂ’ (2006, ಕವಿ: ಎಚ್ಚೆಮ್).
’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ (2006, ಕವಿ: ವಿಂಚ್ಣಾರ್ ಶೆಂಭೊರ್ ಕವಿ).
’ಆಡೊಸಾಂತ್ಲಿಂ ಫುಲಾಂ’ (2007, ಕವಿ: ಆಸ್ಟಿನ್ ಡಿ’ಸೋಜ್ ಪ್ರಭು).
’ಆಟ್ವ್ಯಾ ರಂಗಾಚೊ ಧೊಣು’ (2007, ಕವಿ: ಮೆಲ್ವಿನ್ ಜೆ. ವಾಸ್, ಕೆಲರಾಯ್).
’ಶಿಂಪಡ್ಲೆಲಿಂ ಮೊತಿಯಾಂ’ (2007, ಕವಿ: ವಿಂಚ್ಣಾರ್ ತೆರಾ ಕವಿ).
’ಮುಖಾಂ ಪಾಟ್ಲಿಂ ರುಪಾಂ’ (2007, ಕವಿ: ಅನಿಲ್ ಪೆರ್ನಾಲ್).
’ಕುಲ್ಕುಲೊ’ (2007, ಕವಿ: ಸಿಜ್ಯೆಸ್ ತಾಕೊಡೆ).
ಹೆರ್
ಭಾಸಾಂನಿ ಅನುವಾದ್ ಜಾವ್ನ್ ಪರ್ಗಟ್ ಜಾಲ್ಲೆ
ಕವಿತಾಜಮೆ:
’ನವರತ್ನ’ (2005,
ಅಖಿಲ್ ಭಾರತೀಯ್ ಲೇಖಕಾಂಚ್ಯಾ ಎಕ್ತಾರಾನ್ ಪರ್ಗಟ್ಲ್ಲ್ಯಾ
11 ಭಾರತೀಯ್
ಭಾಸಾಂಚ್ಯಾ ಕವಿತೆಂಚ್ಯಾ ಜಮ್ಯಾಂತ್ ತೀನ್ ಕೊಂಕ್ಣಿ ಕವಿತಾ
ಆನಿ ಇಂಗ್ಲಿಶ್ ಅನುವಾದಾಂ ಪರ್ಗಟ್ಲ್ಯಾಂತ್).
ಲಾಭ್ಲ್ಲಿಂ ಇನಾಮಾಂ/ಪ್ರಶಸ್ಥ್ಯೊ:
ರಾಕ್ಣೊ
ಸಾಹಿತಿಕ್ ಸ್ಪರ್ಧ್ಯಾಂತ್ (ಏಕ್
ಪಾವ್ಟಿಂ ಪಯ್ಲೆಂ ಇನಾಮ್, ಏಕ್ ಪಾವ್ಟಿಂ ತಿಸ್ರೆಂ
ಇನಾಮ್, ಏಕ್ ಪಾವ್ಟಿಂ ವಿಶೇಸ್ ಇನಾಮ್)
ಇಂಟರ್
ನ್ಯಾಶನಲ್ ಲೈಬ್ರೆರಿ ಆಫ್ ಪೋಯೆಟ್ಸ್ ಥಾವ್ನ್ ’ಎಡಿಟರ್ಸ್ ಚೋಯ್ಸ್’
ಪ್ರಶಸ್ಥಿ (2005)
’ದಿವೊ ಸಾಹಿತಿಕ್ ಪುರಸ್ಕಾರ್ 2004’
(ರುಪಯ್ 25,000, ಮಾನ್ಪತ್ರ್
ಆನಿ ಯಾದಿಸ್ತಿಕಾ)
2005 ಇಸ್ವೆಚಿ
ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮೆಚಿ ವಿಶೇಸ್ ಪ್ರಶಸ್ಥಿ
(’ಕವಿತಾಪಾಠ್ ಭಾಗ್-1'
ಅಧ್ಯಯನ್ ಲೇಖನಾಂಕ್).
2006 ಇಸ್ವೆಚಿ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮೆಚಿ ಪ್ರಶಸ್ಥಿ (’ದರ್ಭಾರಾಂತ್ಲಿ ಪಿಂರ್ಗೊಣ್’ ಕವಿತಾಜಮ್ಯಾಕ್).
ಕಥಾಮೃತಾಚೆ ಆಧ್ಲೆ ಥೆಂಬೆ: 1, 2, 3, 4, 5, 6, 7, 8
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.