ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ ’ದಾಯ್ಜ್’ ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಸವಾಲಾಂಕ್ ಜಾಪಿ
ಹ್ಯಾ ಅಂಕಣಾಂತ್ ಇನಾಮಾಂಕ್ ಫಾವೊ ಜಾಲ್ಲ್ಯಾ ಸವಾಲಾಂಚೆಂ ಪೋಶಕ್ ಜಾವ್ನಾಸಾತ್ ಹಿಂ ಕೊಂಕ್ಣಿ ಪತ್ರಾಂ
ದಿವೊ ಹಾಫ್ತ್ಯಾಳೆಂ
ಮಿತ್ರ್ ಹಾಫ್ತಾಳೆಂ
ಸೆವಕ್ ಮಯ್ನ್ಯಾಳೆಂ
ಯಾತ್ರಿ ವಿಶ್ಯಾಂತ್
ಕೊಂಕ್ಣೆಂತ್ ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಉದೆವ್ನ್ ಆಯಿಲ್ಲ್ಯಾ ಥೊಡ್ಯಾ ಭರ್ವಶ್ಯಾಚ್ಯಾ ಬರವ್ಪ್ಯಾಂ ಪಯ್ಕಿಂತ್ಲೊ ಎಕ್ಲೊ ’ಮೆಲ್ವಿನ್ ಪೆರ್ನಾಲ್’ ಕವಿ, ನಾಟಕಿಸ್ತ್, ಕಾಣ್ಯೆಗಾರ್, ವಿಡಂಬನ್ಕಾರ್ ತಶೆಂಚ್ ವಾವ್ರಾಡಿ. ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಸಯ್ತ್ ಹಾಣೆಂ ಅಪ್ಲೊ ಹಾತ್ ಭಂವ್ಡಾಯ್ಲಾ ದೆಖುನ್ ಕೊಂಕ್ಣಿ ಲೊಕಾಂಚಾ ಕಾಳ್ಜಾಚೊ ಉಲೊ ಲಾಗ್ಶಿಲ್ಯಾನ್ ಆಯ್ಕೊಂಕ್ ಸಕ್ತಾ. ಹ್ಯಾ ವರ್ಸಾಂತ್ ವಾಚ್ಪ್ಯಾಂಚ್ಯಾ ಸವಾಲಾಂಕ್ ಅಪುರ್ಭಾಯೆಚ್ಯೊ ಜಾಪಿ ದೀಂವ್ಕ್ ಹೊ ಸಕ್ತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ.
[ಹೆಂ ಮಯ್ನ್ಯಾಳೆಂ ಅಂಕಣ್ ಜಾವ್ನಾಸಾ, ತುಮ್ಚಿಂ ಸವಾಲಾಂ ವಿಚಾರಾ, ಇನಾಮಾಂ ಜೊಡಾ]
ಜಾಪಿ ದಿತಾ: ಯಾತ್ರಿ
1. ಮೊಂತಿ ಫೆಸ್ತಾಕ್ ಮೊಂತು ಫೆಸ್ತ್ ಮ್ಹಳ್ಯಾರ್ ಕಶೆಂಗಾ [ಮೊಂತು, ಶಾಂತಿಪುರ್]
ಜಾಪ್: - ತುಕಾ ’ಮೊಂತು’ಕ್ ಮೊಂತಿ ಮ್ಹಣ್ ಆಪಯ್ಲ್ಯಾರ್ ಕಶೆಂ ಜಾಯ್ತ್ ಗಾ..?
2. ಹಾಂಗಾ ಥೊಡೆ ರುಕಾಮುಳಾ ಖುರಿಸ್ ದವರ್ನ್ ಕೊಂಕ್ಣಿ ಭಜನಾಂ ಕರುಂಕ್ ಲಾಗ್ಲ್ಯಾತ್ಗಾ, ಅನ್ಯೇಕ್ ದಾಂಗ್ರೊ ಮಾರ್ಚಾಕ್ ಪುಣಿಂ ನ್ಹಂಯ್ ಮೂ? [ಅಧಿಕ ಪ್ರಸಂಗಿ, ಅತ್ತೂರ್]
ಜಾಪ್: ತೆ ಕೊಂಕ್ಣಿ ಸಂಗೀತಾಂತ್ ನವೆಂಸಾಂವ್ ಕರುಂಕ್ ಲಾಗ್ಲ್ಯಾತ್ ಆಸ್ಯೆತ್, ಪುಣ್ ತಾಂಚ್ಯಾ ದಾಂಗ್ರ್ಯಾಕ್ ತುಂ ಕಿತ್ಯಾಕ್ ಭಿಯೆತಾಯ್ಗಾ?
3. ಕೊಂಕ್ಣಿ ಕವಿತೆಂನಿ ಆವಾಜ್ ಆಸಾಜಯ್ ಮ್ಹಣ್ತಾತ್ - ಮ್ಹಜ್ಯಾ ಕಾನಾಂಕ್ ಕಿತ್ಲಿಂ ಕವಿತಾ ವಾಚ್ಲ್ಯಾರೀ ಆಯ್ಕಾನಾಮೂ? [ಬೆಪ್ಪು ತಕ್ಕಡಿ]
ಜಾಪ್: ತುಂ ಕೊಣಾಚಿಂ ಕವಿತಾ ವಾಚುನ್ ಆಸಾಯ್ ಮ್ಹಳ್ಳೆಂ ಪಯ್ಲೆಂ ಸಾಂಗ್ - ತವಳ್ ಹಾಂವ್ ಸಾಂಗೊಂಕ್ ಸಕ್ತಾಂ ತಾಂತುಂ ಆವಾಜ್ ಆಸಾಗಿ ಯಾ ಸಂಕ್ ಪಾಶಣ್ ಆಸಾಗಿ ಮ್ಹಣ್.
4.ಹಾಂವೆಂಯ್ ಏಕ್ ಕೊಂಕ್ಣಿ ಪತ್ರ್ ಕಾಡುಂಕ್ ಚಿಂತ್ಲಾಂ - ವರ್ಗಣ್ದಾರ್ ಕರ್ಚಿ ಸಲೀಸಾಯೆಚಿ ವಾಟ್ ಖಂಯ್ಚಿ ಮ್ಹಳ್ಳೆಂ ಮ್ಹಾಕಾ ಸಾಂಗ್ಶಿವೆ? [ಬೋರಿ ಬಸವ]
ಜಾಪ್: - ಎಕಾ ವರ್ಸಾಚ್ಯಾ ವರ್ಗಣೆ ಸವೆಂ ಏಕ್ ಕಿಲೊ ದುಕ್ರಾಮಾಸ್ ಆನಿ ಏಕ್ ಬೋತ್ಲ್ ಕಾಜುಚೊ ಫ್ರೀ ಮ್ಹಣ್ ಜಾಹೀರಾತ್ ದೀವ್ನ್ ಪಳೆ.
5. ಗುಜ್ರಾತಿಂಕ್ ದಾಂಡಿಯಾ, ಮಲ್ಬಾರಿಂಕ್ ಕಥಕ್ಕಳಿ, ತಮ್ಳಾಂಕ್ ಭರತನಾಟ್ಯ, ಆಂದ್ರ್ಯಚ್ಯಾಂಕ್ ಕೂಚುಪುಡಿ ತರ್ ಕೊಂಕ್ಣ್ಯಾಂಕ್ ಕಾಲೆಂಗಾ ಯಾತ್ರಿ? [ಕುಮಾದ್ರ್, ಕುಂದಾಪುರ್] (ಎಕಾ ವರ್ಸಾಚಿ ಮಿತ್ರ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಜಾಪ್: - ’ಕೆ - ಡ್ಯಾನ್ಸ್’. ಕಿತೆಂ? ಕೆ ಮ್ಹಳ್ಯಾರ್ ’ಕೇಕ್ಡಾ’, ಕೇಕ್ಡಾ ಮ್ಹಳ್ಯಾರ್ ಕುರ್ಲ್ಯೊ. ಕೆ - ಡ್ಯಾನ್ಸ್ ಮ್ಹಳ್ಯಾರ್ ಕುರ್ಲ್ಯಾಂಚೊ ಡ್ಯಾನ್ಸ್. ಕೊಂಕ್ಣೆಂತ್ ಕಾಂಯ್ ತರೀ ಕರುಂಕ್ ಸುರು ಕರ್ - ತುಕಾ ಅಪ್ಶೆಂಚ್ ಕಳ್ತೆಲೆಂ.
6. ಇಗರ್ಜೆಚಿ ಘಾಂಟ್ ಮಾರ್ಚಿ ಕಿತ್ಯಾಕ್ಗಾ? [ಬೊಂಬಿಲ್ ಬಾಬುಟಿ]
ಜಾಪ್: - ಆದಿಂ ಘಡಿಯಾಳಾಂ ನಾತ್ಲಿಂ ದೆಕುನ್, ಮಿಸಾಕ್ ಆನಿ ಆಮೊರೆಕ್ ವೇಳ್ ಕಳಂವ್ಚ್ಯಾ ಖಾತಿರ್ ಮ್ಹಣ್ ಮ್ಹಜೊ ಆಬ್ ಸಾಂಗ್ತಾಲೊ, ಆತಾಂ ಇಗರ್ಜೆಂತ್ ಘಾಂಟ್ ಆಜೂನ್ ಆಸಾ ಮ್ಹಣ್ ಕಳಂವ್ಕ್ ಮ್ಹಣ್ ಮ್ಹಾಕಾ ಭೊಗ್ತಾ..! ಪೂಣ್ ಪಾದ್ರ್ಯಾಬ್ ಮ್ಹಣ್ತಾ, ಥೊಡ್ಯಾ ಸಯ್ತಾನಾಂಚ್ಯಾ ಆತ್ಮ್ಯಾಂಕ್ ಧಾಂವ್ಡಾಂವ್ಕ್ ಖೈಂ..!. ಪುಣ್ ಎಕ್ಲೊ ಬೊಟ್ಲೆರ್ ಮ್ಹಣ್ತಾ ’ಪಾದ್ರ್ಯಾಬಾಚಿ ನೀದ್ ಸುಟಂವ್ಕ್ ಅಲರಾಮ್ ಖೈಂ’
7. ಕಾಜಾರಾ ಆಧಿಂ ಖಂಚೇಂಯ್ ನೆಸ್ಚಾ ವೊಕ್ಲಾಂಕ್ ಕಾಜಾರಾವೆಳಾರ್ ಮಾತ್ರ್ ಧವೆಂ ನೆಸೊಂಕ್ ದಿಂವ್ಚೆಂ ಕಿತ್ಯಾಕ್ ಸಾಡ್ವಾನೊ? [ಕೊಂಕ್ಣಿ ಬೊಕುಲ್]
ಜಾಪ್: - ಅಂಕ್ವಾರ್ಪಣಾಚೊ ಆನಿ ನಿಸ್ಕಳ್ಪಣಾಚೊ ಪವಿತ್ರ್ ಸಂಕೇತ್ ತೊ (ಅರೇ ಪೆದ್ದಾ - ಲೊಕಾಂಕ್ ಧಾಖಂವ್ಕ್). ಆನಿ ಕೊಣೀ ಹೊಕ್ಲೊ ಆಪುಣ್ ಧವೆಂ ನೆಸಾನಾಂ ಮ್ಹಣ್ತಿತ್ ತರ್, ತಿ ತಾಂಚಿ ಖುಶಿ ಆನಿ ಮರ್ಜಿ.
8. ತುಜಿಂ ಸವಾಲಾಂ-ಜಾಪಿ ವಾಚುನ್ ಹಾಂಗಾ ಥೊಡೆ ಹಾತ್ ಪಾಂಯ್ ಖೊರ್ಪುನ್ ದಾಂತ್ ಖಿರ್ಲಿತಾತ್ ಕಿತ್ಯಾ? [ಆಲ್ಫ್, ಬಾಹ್ರೇಯ್ನ್]
ಜಾಪ್: - ತಾಂಚೆಂ ಮೂಳ್ಚ್ ಉಸ್ತುನ್ ಘಾಲ್ತಾನಾ ಕೊಣಾಕ್ ಸೊಸ್ತಾ ಸಾಂಗ್ ತುಂ ಮ್ಹಾಕಾ.
9. ಹಾಂಗಾ ಥೊಡೆ ಕೊಂಕ್ಣಿ ಪತ್ರಾಂಕ್ ಪಾಟಿಂಬೊ ದಿಂವ್ಚ್ಯಾ ಬದ್ಲಾಕ್ ಕಾರ್ಕಳ್ಚಾ ಗುಮ್ಟ್ಯಾಕ್ ಚಡ್ಡಿ ಶಿವಂವ್ಚೆವಿಶಿಂ ತರ್ಕ್ ಕರುನ್ ಬಸ್ಲ್ಯಾತ್ - ಕಹಲಿಗಾ ಫಜಿಂತ್? [ಸಾಡೆ ಸಾತ್ ದುಮ್ಗಾ]
ಜಾಪ್: - ಆದಿಂ ಪಾಟಿಂಬೊ ದೀಂವ್ಕ್ ವಚೊನ್ ಪಾಟ್ ಮೊಡ್ಲ್ಲ್ಯಾವಿಶಿಂ ಹಾಣಿಂ ಜಾಯ್ತೆಂ ಆಯ್ಕಾಲಾಂ ಆಸ್ತೆಲೆಂ. ಪುಣ್ ಮ್ಹಜೊ ದುಭಾವ್, ಭೋವ್ಶಾ ಹಾಂಕಾಂಯ್ ಏಕ್ ’ಕೊಂಕ್ಣಿ ಪುರಸ್ಕಾರ್’ ದಿವಯ್ತಾಂ ಮ್ಹಣ್ ಕೊಣೆಂ ತರೀ ಕಾನ್ ಫುಂಕ್ಲ್ಯಾತ್ ಆಸ್ಯೆತಾ.
10. ಹಿಂದ್ವಾಂಕ್ ಲಾಸ್ತಾತ್ ಆನಿ ಕಿರಿಸ್ತಾಂವಾಂಕ್ ಪುರ್ಚೆಂ ಕಿತ್ಯಾಕ್ ಯಾತ್ರಿ ಅಂಕಲ್? [ಅಸ್ಕತ್ ಪಿಲೊ, ಮಸ್ಕತ್] (ಎಕಾ ವರ್ಸಾಚಿ ದಿವೊ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಜಾಪ್: - ತೀನ್ ದಿಸಾಂನಿ ಪುನರ್ಜಿವಂತ್ ಜಾವ್ನ್ ಆಯ್ಲ್ಯಾರೀ ಆಯ್ಲೊ ಮ್ಹಳ್ಳ್ಯಾ ಭರ್ವಶ್ಯಾನ್ ಜಾವ್ಯೆತ್!
11. ಕೊಂಕ್ಣಿ ಸಂಸಾರಾಚೆರ್ ರಾಜ್ವಟ್ಕಿ ಚಲಂವ್ಕ್ ಕಿತೆಂ ಸಕ್ಕಡ್ ಗರ್ಜೆಚೆಂ ಯಾತ್ರಿ? [ಸಹನಾ, ಕುವೇಯ್ಟ್] (ಎಕಾ ವರ್ಸಾಚಿ ಸೆವಕ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಜಾಪ್: - ಏಕ್ ಪತ್ರ್ ಆಸೊಂಕ್ ಜಾಯ್, ಏಕ್ ಸಾಯ್ಟ್ ಆಸೊಂಕ್ ಜಾಯ್ ಆನಿ ವಿಜಿಟಿಂಗ್ ಕಾರ್ಡಾಂ - ಇತ್ಲೆಂ ಆಸ್ಲ್ಯಾರ್ ಪುರೊ. ಬಾಖಿಚೊ ಖಚ್ರೊ ಅಪ್ಚೊಚ್ ಉಭ್ಜಾತಾ. ಹಾಂ! ಅಪ್ರೂಪಾಯೆನ್ (ಆಮಾಸೆಕ್ ಏಕ್ ಪಾವ್ಟಿಂ ಪುನ್ವೆಕ್ ಏಕ್ ಪಾವ್ಟಿಂ) ಕೊಂಕ್ಣಿ ದಿವಸ್ ಆಚರಣ್ ಜರೂರ್ ಕರಿಜೆ.
12. ತುಂ ಇತ್ಲೊ ತೇಂಪ್ ಪರ್ದ್ಯಾ ಪಾಟ್ಲ್ಯಾನ್ ಲಿಪೊನ್ ಬಸ್ಲ್ಲೊಯ್ ಕಿತ್ಯಾಕ್ ಯಾತ್ರಿ? [ಸೆವ್ರಿನ್ ಶಿರ್ವಾಂ]
ಜಾಪ್: - ಪರ್ದೊ ಉಕ್ಲುಂಕ್ ಕೊಣೆಂಯ್ ಸಾಂಗಾತ್ ದಿಲೊನಾಂ ಮ್ಹಣ್ತಾಂ..!
13. ಹಾಂಗಾ ಥೊಡೆ ಕೊಂಕ್ಣೆಚಿ ಆರುಮೂರು ಕಳಿತ್ ನಾತ್ಲ್ಲೆ ಕೊಂಕ್ಣಿ ಶಿಕಂವ್ಕ್ ಭಾಯ್ರ್ ಸರ್ಲ್ಯಾತ್ಗಾ! ಹಿ ಕಸಲಿ ಫಜಿಂತ್! [ಎಸ್ಸೆಮ್, ಯುಕೆ]
ಜಾಪ್: - ಭೋವ್ಶಾ ಕೊಂಕ್ಣೆಂತ್ಲೆಂ ಆಟ್ವೆಂ ಆಚರ್ಯೆಂ ಆಸ್ಯೆತ್. ಗಾಂವಾಂತ್ ಕೊಣೆಂಗೀ ಎದೊಳ್ಚ್ಚ್ ಸಾತ್ ಅಚರ್ಯಿಂ ಸೊಧುನ್ ಜಾಲ್ಯಾಂತ್ ಖಂಯ್.
14. ತುಕಾ ಗಾಂವ್ಚೆಂ ಪರ್ಗಾಂವ್ಚೆಂ ಹಣೆಬರಾಪ್ ಪುರ್ತೆಂ ಕಳಿತ್ ಆಸ್ಚೆಪರಿಂ ದಿಸ್ತಾ - ತೆಂ ಕಶೆಂಗಾ [ಬೊನಾ, ಬೆಳ್ವೆ]
ಜಾಪ್: - ದೋನ್ ಆಣ್ಯಾಚೊ ಅಕ್ಕಲ್ ಆಸ್ಚಾಂಕ್ ತೀನ್ ಕಾಸಾಚ್ಯಾಂನಿ ಕರ್ಚಿಂ ಚ್ಯಾರ್ ಕಾಸ್ತಾಚಿಂ ಕಾಮಾಂ ಕಿತ್ಲಿಂ ಲಿಪಯ್ಲ್ಯಾರೀ ದಿಸಾನಾವೆ ತರ್?.
15. ಗಡಂಗಾ ಭಾಯ್ರ್ ತೊಂಡಾಕ್ ಆಯಿಲ್ಲೆಂ ಬೊಗೊಳ್ತೆಲ್ಯಾಂಕ್ ರಾವವ್ನ್ ಹಾಂಗಾ ಥೊಡೆ ಸಮ್ಜಾಂವ್ಕ್ ಲಾಗ್ಲ್ಯಾತ್ - ಗಜಾಲ್ ಕಹಲಿ ಜಾವ್ಯೆತ್? [ಸಿ.ಎಲ್.ಕರಾಮಾ]
ಜಾಪ್: - ಕಾಂಯ್ ಕೊಂಕ್ಣಿ ಸಾಹಿತ್ಯಾಚೊ ವಿಮರ್ಸೊ ಬರಂವ್ಕ್ ಆನಿ ’ಅನ್ಯೇಕ್ ಅರೆಮರ್ಲ ವಿಮರ್ಶಕ್’ ತಯಾರ್ ಕರ್ಚಿ ಸರ್ಭರಾಯ್ ಆಸೊಂಕ್ ಪುರೊ. ಶ್ಶ್! ವೊಗೆಚ್ಚ್ ರಾವ್ ಆನಿ ಪಳೆ. ಹಾಕಾಚ್ಚ್ ಮ್ಹಣ್ಚೆಂ ’ಯೇಡಾ ಬನ್ಕೆ ಪೇಡಾ ಖಾ’ ಮ್ಹಣ್.
16. ಆಮ್ಚೆ ಥೊಡೆ ತರ್ನಾಟೆ ಬೂಕ್ ಆನಿ ಪೆನ್ನ್ ಘೆವ್ನ್ ರಾನಾಕ್ ವಚೊಂಕ್ ಭಾಯ್ರ್ ಸರ್ಲ್ಯಾತ್ - ಕಾಂಯ್ ಕೊಂಕ್ಣಿ ಚಳ್ವಳ್ ಪುಣಿಂ ನ್ಹಂಯ್ಮೂ? [ಕೊಂಕ್ಣಿ ಪೆರ್ಮಾರಿ]
ಜಾಪ್: - ಕೊಂಕ್ಣಿ ಮಾನ್ಯತಾ ದಿಸಾ ತಾಂಕಾಂಯ್ ಥೊಡ್ಯೊ ಬಿರುದೊ ದೀಂವ್ಕ್ ಮನ್ ಜಾಲಾಂ ಕಂಯ್. ಎದೊಳ್ಚ್ಚ್ ’ಕೊಂಕ್ಣಿ ವಾಗ್’, ’ಕೊಂಕ್ಣಿ ಬೊಲ್ಪೊ’, ’ಕೊಂಕ್ಣಿ ಉಂದಿರ್’, ’ಕೊಂಕ್ಣಿ ಮಾಂಕೊಡ್’, ’ಕೊಂಕ್ಣಿ ಆಗ್ಗ್ಯೊ’, ’ಕೊಂಕ್ಣಿ ಸೊರೊಪ್’, ’ಕೊಂಕ್ಣಿ ಕಂದೊಡಿ’, ’ಕೊಂಕ್ಣಿ ಕೊಂಬೊ’, ’ಕೊಂಕ್ಣಿ ಹಸ್ತ್’..... ಬಿರುದೊ ದೀವ್ನ್ ಆತಾಂ ದೀಂವ್ಕ್ ಬಿರುದೊ ಉಣ್ಯೊ ಪಡ್ಲ್ಯಾತ್ ಆಸ್ತೆಲ್ಯೊ, ದೆಕುನ್ ಕಾಂಯ್ ಸೊಧುನ್ ಗೆಲ್ಯಾತ್ ಜಾವ್ಯೆತಾ. ಪುಣ್ ತುಕಾ ಕಶೀಯ್ ಮೆಳ್ಲ್ಲೆಪರಿಂ ಮ್ಹಾಕಾಯ್ ಮೆಳೊಂಕ್ ಕೊಣಾಕ್ ಧುಂಪಯ್ಜೆ ಸಾಂಗ್ಶಿವೆ?
17. ತುಜ್ಯೊ ಜಾಪಿ ವಾಚುನ್ ಮ್ಹಜಿ ನಾತ್ ಮ್ಹಣ್ತಾ ’ತುಂ ಭೋವ್ ರಾಗಿಷ್ಟ್’ ಮ್ಹಣೊನ್. ಹೆಂ ಸತ್ವೆ? [ಚೂಡ್ ಕೊತ್ರು]
ಜಾಪ್: - ಇಲ್ಲೆಂ ಮ್ಹಜೆಲಾಗಿಂ ಧಾಡ್ ತಿಕಾ, ಮೊಗಾನ್ ಸಮ್ಜಾಯ್ತಾಂ ಹಾಂವ್!.
18. ಆಮ್ಚಾ ಗಾಂವಾಂತ್ ಪೊಪ್ಳಾಂಚ್ಯಾಕೀ ಚಡ್ ಪೊವ್ಲ್ಯಾಂಕ್ ಆಜ್ಕಾಲ್ ಮೊಸ್ತ್ ಡಿಮಾಂಡ್ ಕಶೆಂಗಾ? [ಸೈಮನ್, ಕಟೀಲ್]
ಜಾಪ್: - ಕೊಂಕ್ಣೆಚ್ಯಾ ಮಹಾನ್ ಸಾಹಿತಿಂಚ್ಯಾ ಸಾಹಿತ್ಯಾವಿಶಿಂ ವಿಮರ್ಸೊ ಕೆಲ್ಲ್ಯಾಂಚ್ಯಾ ಪಾಟಿಕ್ ಭಾಂಧುಂಕ್ ಪೊವ್ಲ್ಯೊ ನಾಕಾತ್ವೆ ತರ್?.
ಎಕಾ ವರ್ಸಾಚಿ ದೇಶಿ ವರ್ಗಣಿ ಹ್ಯಾ ಸಕಯ್ಲ್ಯಾಂಕ್ ಫಾವೊ ಜಾತಾ
’ಮಿತ್ರ್ ಹಾಪ್ತ್ಯಾಳೆಂ’
ಕುಮಾದ್ರ್, ಕುಂದಪುರ್
’ದಿವೊ ಹಾಪ್ತ್ಯಾಳೆಂ’
ಅಸ್ಕತ್ ಪಿಲೊ, ಮಸ್ಕತ್
’ಸೆವಕ್ ಮಯ್ನ್ಯಾಳೆಂ’
ಸಹನಾ, ಕುವೇಯ್ಟ್
(ಇನಾಮಾಂ ಜಿಕ್ಪ್ಯಾಂಕ್ ತಾಂಚಿಂ ಇನಾಮಾಂ ತಾಣಿಂ ದಿಲ್ಲ್ಯಾ ವಿಳಾಸಾಕ್ ಪಾವ್ತೆಲಿಂ, ಚೂಕ್ ವಿಳಾಸಾಕ್ ಆಮಿ ಜವಾಬ್ಧಾರ್ ನಾಂವ್) - ಸಂ.
ತುಮ್ಚಿಂ ಸವಾಲಾಂ ಧಾಡುಂಕ್ ವಿಳಾಸ್: info@daaiz.com
ಅಧ್ಲಿಂ ಸವಾಲಾಂ-ಜಾಪಿ: 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
