ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[ಸಪ್ತೆಂಬರ್ 23 ತಾರಿಕೆರ್ ಅಪ್ಲೊ 41ವೊ ಜಲ್ಮಾದಿವಸ್ ಆಚರಣ್ ಕರ್ಚಾ ಆಂಡ್ರು ತುಕಾ ಹೆಂ ಅಂಕಣ್ ಅರ್ಪಣ್]
ಸತಾಂ ಆನಿ ಖತಾಂ - 1. ಫಯ್ಸಲ್
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಬಾಸ್ಕಳ್ ಜಿಣಿ ಜಿಯೆವ್ನ್ ಆಸ್ಲ್ಲ್ಯಾ ಎಕಾ ಚಲಿಯೆಕ್ ಎಕಾ ರೆತಿರೆವರ್ವಿಂ ಆಪ್ಲ್ಯಾ ಜಿಣ್ಯೆಂತ್ ಆಪ್ಣಾನ್ ಚಲೊನ್ ಆಯಿಲ್ಲಿ
ವಾಟ್ ತಿಳುಂಕ್ ಆವ್ಕಾಸ್ ಮೆಳ್ಳೊ. ಆಪುಣ್ ವಾಟ್ ಚುಕೊನ್ ಇತ್ತುನ್
ಪಾವ್ಲಿಂಗಾಯ್ ಮ್ಹಳ್ಳೆ ಚುರ್ಚುರೆ ತಾಕಾ ಭೊಗ್ಲೆ. ಇತ್ಲೆಂ
ಮಾತ್ರ್ ನ್ಹಂಯ್, ಆಯ್ಚಾನ್ ಕೆದಿಂಕ್ಚ್ಚ್ ಹ್ಯೆ ವಾಟೆರ್ ಚಲೊಂಕ್
ನಜೊ ಮ್ಹಳ್ಳೊ ನಿರ್ಧಾರ್ ಕರುನ್ ಸದಾಂಚಾ ಮಾಗ್ಣ್ಯಾ-ವೊರೆಸಾಂವಾಂತ್
ಪಾತ್ರ್ ಘೆಂವ್ಕ್ ಲಾಗ್ಲಿ. ಆನಿಂ ಇಗರ್ಜೆಂತ್ಲ್ಯಾ ಹರ್ಯೆಕಾ ಲಿತುರ್ಜಿಕ್ ಕಾರ್ಯಾನಿಂ
ಮೆತೆರ್ ಜಾಂವ್ಕ್ ಲಾಗ್ಲಿ.
ತ್ಯೆಚ್ಚ್ ಇಗರ್ಜೆಂತ್ಲ್ಯಾ ಎಕಾ ದೇವ್-ಭಕ್ತ್ ಘರಾಣ್ಯಾಚೊ ಚಲೊ ಹಿಚಾ
ಮೊಗಾರ್ ಪಡ್ಲೊ. ತಿಚಿ ಬದ್ಲಾಲ್ಲಿ ಚಾಲ್-ಚಮ್ಕೊಣ್ ದೆಖೊನ್ ತಿಚಾ
ಹ್ಯಾ ಬದ್ಲಾವಣಾ ಥಂಯ್ ಸಂತೊಸ್ ಪಾವೊನ್ ತಿಚಾಲಾಗಿಂ
ಸಳಾವಳೆನ್ ರಾವ್ಲೊ.
ವೆಳಾಚಿಂ ರೊದಾಂ ಘುಂವ್ಲ್ಲೆ ಪರಿಂಚ್ ಹಿ ಸಳಾವಳ್ ಮೊಗಾಚಿಂ ರುಪಾಂ ಘೆವುನ್ ದೊಗಾಂಯ್ನೀ ಎಕಾಮೆಕಾಚಾ ಕಾಳ್ಜಾಂನಿ ಎಕಾಮೆಕಾಕ್
ಸ್ಥಾನ್ ದಿಲೆಂ.
ಸಮಾಜೆಚೊ ಹಾಡಾಂ ನಾತ್ಲ್ಲ್ಯೊ ಜಿಬೊ, ದೊಳ್ಯಾಂತ್ ರಗಾತ್
ನಾತ್ಲೆಲ್ಯಾಂಚೊ ಜಿಬೊ ನಾನಾ ರಿತಿಚೊ ಖಬ್ರೊ ಕರ್ತಾಲ್ಯೊ. ತೊ,
ಹೊ, ತೆಂ, ಹೆ ಮ್ಹಣೊನ್ ಎಕೆಕ್ಚ್ಚ್ ಖಬ್ರೊ ಪಾಕಾಂರುಪಿಂ ಉದೆಲ್ಯೊ ಆನಿಂ ತಿಂ
ಪಾಕಾಂ ಮೆಳೊನ್ ಪಾಕಾಟೆ ಉಬ್ಜಾಲೆ ಆನಿಂ ಅಶೆಂಚ್ಚ್ ಖಬ್ರಾಂಚೆಂ
ಸುಕ್ಣೆಂ ಜಲ್ಮಾಲೆಂ ಆನಿಂ ಥಂಯ್ ಹಾಂಗಾ ಮ್ಹಣೊನ್ ಉಭಾಲಾಗ್ಲೆಂ.
ಪುಣ್ ಕಸ್ಲ್ಯೋಯ್ ಖಬ್ರೊ ಹಾಂಚಾ ಮೊಗಾ ಬಾಂಧಾಕ್ ತುಟಂವ್ಕ್
ಸಕ್ಲ್ಯೊನಾಂತ್. ಅಶೆಂ ವಿಸ್ತಾರ್ಲೆಲಿ ಖಬಾರ್ ತಾಂಚಾ ವ್ಹಡಿಲಾಂ
ಮುಖಾಂತ್ರ್ ಫಿರ್ಗಜ್ ಪಾದ್ರಿಕ್ ಕಳ್ತಚ್ಚ್ ಎಕಾದಿಸಾ ದೊನೀ ಕುಟ್ಮಾಂ
ಮಧೆಂ, ಸಯ್ರ್ಯಾಂ ಮಧೆಂ, ಸೆಜಾರ್ಯಾಂ ಮಧೆಂ ಹ್ಯಾ ತರ್ನಾಟ್ಯಾಂಕ್ ಉಭೊ ಕರ್ನ್ ವಿಗಾರ್
ಬಾಪಾನ್ ಝಡ್ತಿ ಸುರು ಕೆಲಿ.
ಥಂಯ್ ಜಮೊ ಜಾಲ್ಲ್ಯಾ ಪಾವಣ್ಶೆಂ ಠಕ್ಕೆ ಲೊಕಾಂನಿ ತ್ಯೇ ಚಲಿಯೆಕ್ ಏಕ್ ಬಾಸ್ಕಳ್ ಚಲಿ
ಮ್ಹಣ್ ವೊಲಾಯ್ಲೆಂ ಆನಿಂ ತಿಕಾ ಅಸಲ್ಯಾ ದೇವ್-ಭಿರಾಂತೆಚಾ ಚಲ್ಯಾಕ್ ಆಪ್ಲ್ಯಾ ಜಾಳಾಂತ್
ವೊಡುಂಕ್ ಕಿತೆಂಚ್ ಹಕ್ಕ್ ನಾ ಮ್ಹಳ್ಳೆಂ ಫಯ್ಸಲ್
ದಿಲೆಂ.
ತವಳ್ ಸುಮಾರ್ ವೆಳಾಚಾ ಮೌನಾಉಪ್ರಾಂತ್ ತೊ ಚಲೊ ಉಭೊ ಜಾಲೊ ಆನಿಂ
ಮ್ಹಣಾಲೊ. "ಆತಾಂ ಹಾಂಗಾಸರ್ ಸವಾಲ್ ಹಿ ಚಲಿ ಬಾಸ್ಕಳ್ ಜಿಣಿ ಜಿಯೆತಾಲಿಗೀ ಯಾ
ನಾಂಗೀ ಮ್ಹಣ್ ನ್ಹಂಯ್, ತಿಣೆ ಪಾತ್ಕಾಂ ಕೆಲ್ಯಾಂತ್ಗೀ ಯಾ
ನಾಂಗೀ ಮ್ಹಣ್ ನ್ಹಂಯ್, ಬಗಾರ್ ಖುರ್ಸಾರ್ ಮೆಲ್ಲಾ ಜೆಜುಚಾ
ಪವಿತ್ರ್ ರಗ್ತಾಕ್ ತಿಚಿಂ ಪಾತ್ಕಾಂ ಭೊಗ್ಸುಂಕ್ ಸಾಧ್ಯ್ಗೀ ಯಾ
ನಾಂಗೀ ಮ್ಹಳ್ಳೆಂ."
ಇತ್ಲೆಂ ಆಯ್ಕಲ್ಲ್ಯಾ ಲೊಕಾಂಚಾ ತೊಂಡಾಂತ್ಲಿಂ ಉತ್ರಾಂ ಸುಕ್ಲ್ಲಿಂ.
ಸಂದೇಶ್: ಹ್ಯಾ ಘಡಿತಾಂತ್ಲ್ಯಾ
ಲೊಕಾಂ ಪಯ್ಕಿ ಆಮಿಂಯ್ ಎಕ್ಲಿಂ ನ್ಹಂಯ್ಗೀ? ಹೆರಾಂಕ್
ಸದಾಂ ’ಪಾತ್ಕಿಂ’ ಮ್ಹಣ್ ವೊಲಾವ್ನ್ಂಚ್ ನ್ಹಂಯ್ಗೀ ಆಮಿ ಭಾಗಿ
ಮ್ಹಣ್ ಚಿಂತ್ಚೆಂ? ಹೆಂ ಆಂತರಿಕ್ ಬದ್ಲಾವಣ್ ಅಮ್ಚೆಥಂಯ್ ಜಾಲ್ಲೆ ಖರಿತ್ ಆಮಿ
ದಿಸಾಕ್ ಕಿತ್ಲಿಂಯ್ ಕೊಂತಾಂ ತೇರ್ಸ್ ಕರ್ನ್, ಗಳ್ಯಾರ್ ಕಿತ್ಲ್ಯೋಯ್
ಬೆಂತಿಣ್ಯೊ ಕರ್ನ್, ವರ್ಸಾಕ್ ಕಿತ್ಲೆಯ್ ಉಪಾಸ್ ಕರ್ನ್ ಮಾಗೊನ್ ಕಿತೆಂ ಫಾಯ್ದೊ?
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
