ಫಾಂತ್ಯಾಫರಾಚೆಂ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕಥಾಝರ್ - 45. ಫಾಂತ್ಯಾಫರಾಚೆಂ ಸ್ವಪಾಣ್

Placeholder: the original page gave this picture no description, and none has been written yet. It came from daaiz\daaiz\katha\kj\kj45.asp.

ವಾಲ್ಟರ್ ನಂದಳಿಕೆ: ಕೊಂಕ್ಣೆಂತ್ ಆಯ್ಲೆವಾರ್ ಹಾಕಾ ಅಂತರ್‌ಜಾಳ್ ಶಿಲ್ಪಿ ಮ್ಹಣ್ ವೊಲಾಯ್ತಾತ್ ತರ್‌ಯೀ, ಮ್ಹಜ್ಯಾ ಸಾಹಿತಿಕ್ ಸುರ್ವಾತೆಚಾ ವೆಳಾರ್ ಮ್ಹಜೆಸವೆಂ ಹಾಣೆಂಯ್ ಅಪ್ಲ್ಯಾ ಸಾಹಿತ್ಯಾಚಿ ಸುರ್ವಾತ್ ಕೆಲ್ಲಿ. ಶೆಂಭೊರಾಂಲಾಗಿಂ ಮಟ್ವ್ಯೊ ಕಾಣ್ಯೊ ಹಾಣೆಂ ಬರಯ್ಲ್ಯಾತ್. ಅಪ್ಲಿಚ್ಚ್ ಮ್ಹಳ್ಳಿ ಶೈಲಿ ಆಸ್ಚೊ ಹೊ ಪರತ್ ಕೊಂಕ್ಣೆಂತ್ ಸಾಹಿತ್ಯ್ ರಚುಂಕ್ ಸಕ್ಲೊ ತರ್ ಕೊಂಕ್ಣೆಕ್ ಗ್ರೇಸ್ತ್ ಕರ್ಚಾಂತ್ ವರ್ತಿ ದೇಣ್ದಿ ದಿಂವ್ಚಾಂತ್ ಕಾಂಯ್ ದುಭಾವ್ ನಾ.

ವಾಲ್ಟರ್ ನಂದಳಿಕೆ

ಪಾರ್ವತಿ ಹಳ್ಳಿ ಶ್ಹೆರಾಚೊ ವಿಶೇಸ್ ಸಂಪರ್ಕ್ ನಾತ್‌ಲ್ಲಿ ಏಕ್ ಲ್ಹಾನ್‌ಶಿ ಹಳ್ಳಿ. ಪಾರ್ವತಿ ನಂಯ್ ಹಾಂಗಾಸರ್ ಮಜ್ಭೂತ್ ರಿತಿರ್ ವ್ಹಾಳ್ತಾ ಜಾಲ್ಲ್ಯಾನ್, ನಂಯ್ಚೆಂ ನಾಂವ್‌ಯೀ ಹಳ್ಳೆಕೀ ಪಡ್ಲೆಂ ಕಂಯ್. ಪ್ರಾಕೃತಿಕ್ ಸೊಭಾಯೆಚೆಂ ಭಂಡಾರ್‌ಚ್ ಹಿ ಹಳ್ಳಿ ಜಾವ್ನಾಸ್‌ಲ್ಲಿ. ಫಾಂತ್ಯಾಫಾರಾಚಾ ತೀನ್ ವೊರಾಂಚೆರ್ ವ್ಹಾಳ್ಚಾ ನಂಯ್ ಥಾವ್ನ್ "ಜುಳುಜುಳು" ಆವಾಜಾಸವೆಂ ಥಂಯ್ ಥಂಯ್ ಥೊಡ್ಯಾ ಕಂಟ್ರಿ ಪೆಟ್ಯಾಂಚ್ಯೊ ಬೊಬೊ ಸೊಡ್ಲ್ಯಾರ್ ಹೆರ್ ಕಸಲೊಚ್ ಆವಾಜ್ ಆಯ್ಕಾನಾತ್‌ಲ್ಲೊ. ಸಗ್ಳಿ ಹಳ್ಳಿ ನಿದೆಂತ್ ಘೊರೆತಾಲಿ.

ಮೂಡ್ ಪಾತ್ಯೆಣೆಂತ್ ಹಿ ಹಳ್ಳಿ ಏಕ್ಧಮ್ ನಾಂವಾಡ್ದಿಕ್. ಹೆರ್ ಖಂಚಾಯೀ ಹಳ್ಳೆಂನಿ ಪಾತ್ಯೆನಾತ್‌ಲ್ಲ್ಯೊ ವಾ ಪಾಳಿನಾತ್‌ಲ್ಲ್ಯೊ ವಿಶೇಷ್ ಥೊಡ್ಯೊ ರಿವಾಜಿ ಹ್ಯಾ ಹಳ್ಳೆಚೊ ಲೋಕ್ ಪಾಳ್ತಾಲೊ. ಆಧ್ಲ್ಯಾ ಕಾಳಾರ್ ಥಾವ್ನ್ ಪಾತ್ಯೆವ್ನ್ ಆಯಿಲ್ಲ್ಯೊ ಥೊಡ್ಯೊ ಸಂಗ್ತ್ಯೊ ಹ್ಯಾ ಹಳ್ಳೆಚೊ ಲೋಕ್ ಚುಕಾನಾಸ್ತಾಂ ಪಾಳ್ತಾಲೊ. ಹಾಕಾ ಮುಖ್ಯ ಕಾರಾಣ್ - ಅಶಿಕ್ಪಿ ಜಾವ್ನಾಸ್ಚೊ ಲೋಕ್.

ಶಿಕಾಪ್ ಜೊಡಿಜಾಯ್ ತರ್ ಹ್ಯಾ ಹಳ್ಳೆಚಾ ಲೊಕಾಂನಿ ಶ್ಹೆರಾಕ್ ವಚಾಜಯ್ ಆಸ್‌ಲ್ಲೆಂ. ಶ್ಹೆರಾಕ್ ಆನಿ ಹ್ಯಾ ಹಳ್ಳೆ ಮಧ್ಲೊ ಅಂತರ್ ಸುಮಾರ್ ಚಾಳೀಸ್ ಮಯ್ಲಾಂಚ್ಯಾಕೀ ಚಡ್, ತಶೆಂ ಜಾಲ್ಲ್ಯಾನ್ ಶ್ಹೆರಾಚೊ ಸಂಪರ್ಕ್ ಜೊಡುಂಕ್ ಹ್ಯಾ ಹಳ್ಳೆಚಾ ಲೊಕಾಕ್ ಅಸಾಧ್ಯ್ ಜಾಲ್ಲೆಂ.

ಪಾರ್ವತಿ ನಂಯ್ಚಾ ತಡಿರ್‌ಚ್ ಮ್ಹಳ್ಳ್ಯಾಪರಿಂ ಶಾಂಭವಿಚೆಂ ಘರ್ ಆಸ್‌ಲ್ಲೆಂ. ಸುಮಾರ್ ಚಾಳೀಸ್ ಆನಿ ಪಾಂಚ್ ವರ್ಸಾಂಚೆಂ ಶಾಂಭವಿ ಆಪ್ಲ್ಯಾ ಎಕಾಚ್ ಪುತಾಸವೆಂ ವಸ್ತಿ ಕರ್ತಾಲಿ. ಕಾಜಾರ್ ಜಾಲ್ಲ್ಯಾ ಫಕತ್ ಪಾಂಚ್ ವರ್ಸಾಂನಿ ಶಾಂಭವಿಚೊ ಘೊವ್ ತಿಕಾ ಸೊಡ್ನ್ ಧಾಂವ್‌ಲ್ಲೊ ಜಾಲ್ಲ್ಯಾನ್ ಶಾಂಭವಿ ಪತಿ ಜಿವಂತ್ ಆಸೊನೀ ವಿಧವ್ ಜಾಲ್ಲಿ. ದುಸ್ರೆಂ ಕಾಜಾರ್ ಜಾಂವ್ಕ್‌ಯೀ ತಿ ಆಶೆಲಿ ನಾ.

ಫಾಂತ್ಯಾಫಾರಾರ್ ಗಡ್ ನಿದೆಂತ್ ಆಸ್‌ಲ್ಲಿ ಶಾಂಭವಿ ಎಕಾಚ್ಫಾರಾ ಉಡೊನ್ ಪಡ್ಳಿ. ಎಕಾ ಭಿರಾಂಕುಳ್ ಸ್ವಪ್ಣಾನ್ ತಿಕಾ ಜಾಗಯ್ಲೆಂ. ಶಾಂಭವಿ ಸಗ್ಳಿಚ್ ಭಿಂಯೆಲಿ, ಶೀತಳ್ ವಾರೆಂ ವ್ಹಾಳ್ತಾಲೆಂ ತರೀ ತಿ ಘಾಮೆಂವ್ಕ್ ಲಾಗ್ಲಿ.

ವ್ಹಯ್..

ಪಾರ್ವತಿ ನಂಯ್ತ್ ಕೊಣ್‌ಗೀ ಉಡೊನ್ ಜೀವ್ ಕಾಡ್ನ್ ಕಾಣ್ಘೆಲ್ಲೆಂ ಸ್ವಪಾಣ್ ತಿಕಾ ಪಡ್‌ಲ್ಲೆಂ. ಏಕ್ ಗ್ಲಾಸ್ ಶೆಳೆಂ ಉದಾಖ್ ಪಿಯೆವ್ನ್ ಪರತ್ ಆಡ್ ಪಡ್ಲಿ. ತರೀ ತಿಕಾ ಭ್ಯೆಂ ದಿಸ್ತಾಲೆಂ. ಪರತ್ ಉಟೊನ್ ತಿಣೆಂ ಘಡಿಯಾಳಾಚೆರ್ ದೀಷ್ಟ್ ವ್ಹೆಲಿ.

ವೊರಾಂ ಫಾಂತ್ಯಾಫಾರಾಚಿಂ ತೀನ್ ಜಾವ್ನ್ ಪಾಂಚ್ ಮಿನುಟಾಂ!

"ಹಾಂ! ಕಸಲೆಂ ಸ್ವಪಾಣ್?" ಅಪ್ಣಾಯಿತ್ಲ್ಯಾಕ್ ಉಧ್ಘಾರ್ಲಿ ಶಾಂಭವಿ. ಆತಾಂ ಎಕಾ ಥರಾಚೆಂ ಭ್ಯೆಂ ತಿಚೆಥಂಯ್ ರಾಜ್ ಕರಿಲಾಗ್ಲೆಂ.

ವ್ಹಯ್..

’ಫಾಂತ್ಯಾಫಾರಾಚೆಂ ಸ್ವಪಾಣ್ ಖರೆಂ ಜಾತಾ-ಹಿಂ’ ಅಪ್ಲೇಸ್ತಕಿಂ ಚಿಂತಿಲಾಗ್ಲಿ ಶಾಂಭವಿ. ಪಾರ್ವತಿ ನಂಯ್ತ್ ಎಕ್ಲೊ ತರ್ನಾಟೊ ವಳ್ವಳೊನ್, ದಡ್ಬಡೊನ್ ಜೀವ್ ವಾಂಚಂವ್ಕ್ ಉರ್ಡೊಂಚೆಂ ದೃಶ್ಯ್ ಸ್ವಪ್ಣಾಂತ್ ಶಾಂಭವಿನ್ ದೆಖ್‌ಲ್ಲೆಂ. ಶಾಂಭವಿ ಎಕಾಚ್ಫಾರಾ ಉಟ್ಲಿ ಆನಿ ಆಪ್ಲ್ಯಾ ಎಕಾಚ್ ಪುತಾಕ್ ಸಿದ್ದಾಕ್ ಉಟಯ್ಲಾಗ್ಲಿ. ’ಸಿದ್ದ’ ಫಾಂತ್ಯಾಫಾರಾಚಾ ಸುಶೆಗ್ ನಿದೆಂತ್ ಆಸ್‌ಲ್ಲೊ, ಆವಯ್ಚ್ಯಾ ತಾಳ್ಯಾಕ್ ಎಕ್‌ಚ್ ಪಾವ್ಟಿಂ ಜಾಗ್ ಜಾಳಿ ತಾಕಾ. ದೊಳೆ ಘಸ್ಟುನ್ ಉಟೊನ್ ಉಬೊ ರಾವ್ಲೊ ಸಿದ್ದ.

"ಕಿತೆಂ ಅಮ್ಮಾ..." ನಿದೆಚಾ ಆಮಾಲಾರ್‌ಚ್ ಉಲಯ್ಲೊ ತೊ.

"ಸಿದ್ದಾ, ಮ್ಹಾಕಾ ಭ್ಯೆಂ ದಿಸ್ತಾರೆ, ಏಕ್ ಭಿರಾಂಕುಳ್ ಸ್ವಪಾಣ್ ಪಡ್ಲೆಂ. ಎಕ್ಲೊ ತರ್ನಾಟೊ, ಪಾರ್ವತಿ ನಂಯ್ತ್ ಆಸಾ ಮ್ಹಣ್ ಸ್ವಪ್ಣೆಲಿಂರೆ ಹಾಂವ್. ಫಾಂತ್ಯಾಫಾರಾಚೆಂ ಸ್ವಪಾಣ್ ಖರೆಂ ಜಾತಾ ಕಂಯ್. ಕೊಣ್ ತರೀ ಪಾರ್ವತಿ ನಂಯ್ತ್ ದಡ್ಬಡೊನ್ ಆಸಾ. ತಾಕಾ ಆಮಿ ಬಚಾವ್ ಕರಿಜಾಯ್‌ರೆ.." ಇತ್ಲೆಂಚ್ ಸಾಂಗಾಲಾಗ್ಲಿ ಶಾಂಭವಿ. ಸಿದ್ದ ಅಪ್ಲೆಂ ಖೊಮಿಸ್ ಶಿರ್ಕಾವ್ನ್, ಎಕಾಚ್ ಬಾಕ್ಕಾರಾಣ್ ಭಾಯ್ಲ್ಯಾ ಬಾಗ್ಲಾಲಾಗಿಂ ಪಾವ್ಲೊ ಆನಿ ಚಾಂದ್ನ್ಯಾಚಾ ಉಜ್ವಾಡಾಕ್ ಧಾಂವಾಲಾಗ್ಲೊ - ಪಾರ್ವತಿ ನಂಯ್ ಕುಶಿನ್.

ತ್ಯಾಚ್ ಆವಯ್ಚೊ ಪೂತ್ ನ್ಹಂಯ್‌ಗೀ ಸಿದ್ದ? ಫಾಂತ್ಯಾಫಾರಾಚೆಂ ಸ್ವಪಾಣ್ ಖರೆಂ ಜಾತಾ ಮ್ಹಣ್ ಆವಯ್ ಪಾತ್ಯೆತಾನಾ ಪೂತ್ ಪಾತ್ಯೆನಾಸ್ತಾಂ ರಾವಾತ್?

ಚೊವ್ದಾ ವರ್ಸಾಂಚೊ ಚೆರ್ಕೊ ಸಿದ್ದ, ಸ್ವಭಾವಾನ್ ಏಕ್ಧಮ್ ಧಯ್ರಾಧಿಕ್ ಜಾವ್ನಾಸ್‌ಲ್ಲೊ. ನಾ ತರ್ ಹ್ಯಾ ವೆಳಾ ಕೊಣ್ ಪುಣಿ ಎಕ್ಸುರೊ ಧಾಂವಾತ್‌ಗಿ? ಆಪ್ಲ್ಯಾ ಪುತಾಚಾ ಧಯ್ರಾ ಆನಿ ಸಾಹಸಾ ಥಂಯ್ ಆವಯ್ಕ್ ಗವ್ರವ್ ಆಸ್‌ಲ್ಲೊ. ತಿ ಸದಾಂನೀತ್ ಆಪ್ಲ್ಯಾ ಚೆರ್ಕ್ಯಾಕ್ ಚುರುಕ್ ಆನಿ ಚಲಾಕ್ ಕರುಂಕ್ ಪೆಚಾಡ್ತಾಲಿ. ಧಯ್ರಾಧಿಕ್, ವೀರ್ ಜಾಯ್ಜಯ್ ಮ್ಹಣ್ ತಾಕಾ ಸಾಹಸಿ ರಾಯಾಂಚ್ಯೊ ಕಾಣ್ಯೊ ಸಾಂಗೊನ್ ವಾಗಯ್ತಾಲಿ. ಸಿದ್ದ ಗೆಲ್ಯಾ ಉಪ್ರಾಂತ್ ಶಾಂಭವಿನ್ ಚಿಮ್ಣಿ ಪಾಲ್ವವ್ನ್ ಪರತ್ ಮಾಂದ್ರೆಕ್ ಪಾಟ್ ತೆಂಕ್ಲಿ. ತಿಚಿ ನಿದೆಚಿ ಝೆಮ್ ಆತಾಂ ಪಯ್ಸ್ ಗೆಲ್ಲಿ. ಎಕಾ ತರ್ನಾಟ್ಯಾಚೊ ಜೀವ್ ಆಪ್ಣಾಚೊ ಪುತ್ ವಾಂಚಯ್ತಾಲೊ ಮ್ಹಣ್ ತಿಕಾ ಭರ್ವಸೊ ಆಸ್‌ಲ್ಲೊ.

ಫಾಂತೆಂ ಹಳ್ತಾರ್ ಪಿಕೊನ್ ಯೆತಾಲೆಂ, ವೊರಾಂ ಪಾವ್ಣೆಂ ಚಾರ್ ಜಾವ್ನ್ ಆಯ್ಲಿಂ ತರೀ ಸಿದ್ದ ಅಜೂನ್ ಪಾಟಿಂ ಯೇಂವ್ಕ್ ನಾತ್‌ಲ್ಲೊ.

ಆತಾಂ ಶಾಂಭವಿಕ್ ಎಕಾ ಥರಾಚೆ ದಡ್ದಡೆ ಆರಂಬ್ ಜಾಲೆ. ಪರತ್ ತಿಚೆ ಥಂಯ್ ಭ್ಯೆಂ ರಾಜ್ ಕರಿಲಾಗ್ಲೆಂ ವಳೂ ಉಟೊನ್ ಚಿಮ್ಣಿ ಪೆಟಯ್ಲಾಗ್ಲಿ.

ಪರತ್ ಪಂದ್ರಾ ಮಿನುಟಾಂ ಪಾಶಾರ್ ಜಾಲಿಂ.

ಹ್ಯಾ ಮಧೆಂ ಸಿದ್ದಚೆಂ ಯೆಣೆಂ ಜಾಲೆಂನಾ. ಶಾಂಭವಿ ಸಂಪೂರ್ಣ್ ಭಿಂಯೆಲಿ. ಬಾಗಿಲ್ ಉಗ್ತೆಂ ಕರ್ನ್ ಆಂಗ್ಣಾಕ್ ಪಾಂಯ್ ತೆಂಕ್ಲೊ ತಿಣೆಂ ಧಯ್ರಾಚಿಂ ಪಾವ್ಲಾಂ ಕಾಡ್ಲಿಂ ಪಾರ್ವತಿ ನಂಯ್ ಕುಶಿನ್.

ಪಾರ್ವತಿ ನಂಯ್ಕ್ ಲಾಗಿಂ ಜಾತಾನಾ ತಿಕಾ ಕೊಣ್‌ಚ್ ದಿಸ್ಲೆಂನಾ, ಸಿದ್ದಚಿ ಝಳಕ್‌ಚ್ ನಾತ್‌ಲ್ಲಿ.

"ಸಿದ್ದಾ.." ಎಕಾಚ್ಫಾರಾ ಕಿಂಕ್ರಾಟ್ಲಿ ತಿ.

ತಿತ್ಲ್ಯಾರ್..

ತಿಣೆಂ ರಾವ್‌ಲ್ಲ್ಯಾ ಉಜ್ವ್ಯಾ ಕುಶಿನ್ ಥಾವ್ನ್ ಜುಳುಜುಳು ಆವಾಜ್ ಆಯ್ಕಾಲಾಗ್ಲೊ. ಚಾಂದ್ನ್ಯಾಚಾ ಉಜ್ವಾಡಾಕ್ ಏಕ್ ತಕ್ಲಿ ಧಾಡ್ಬಡ್ಚಿ ದಿಸ್ಲಿ ತಿಕಾ.

ವ್ಹಯ್..

ಆವಯ್ಚಾ ಫಾಂತ್ಯಾಫಾರಾಚಾ ಸ್ವಪ್ಣಾಚಾ ಪಿಶ್ಯಾ ದುಬಾವಾಕ್ ಲಾಗೊನ್ ಧಾಂವೊನ್ ಆಯಿಲ್ಲೊ ಸಿದ್ದ, ಸಂಪೂರ್ಣ್ ನಿದೆಚೆಂ ಆಮಾಲ್ ದೆಂವಾನಾಸ್ತಾಂ ಪಾರ್ವತಿ ನಂಯ್ಕ್ ಯೇವ್ನ್ ತಿಳಿಲಾಗ್ಲೊ. ಆನಿ ತ್ಯಾಚ್‌ವೆಳಾ ಖಂಚ್ಯಾಗೀ ಎಕಾ ಸಕ್ತೆನ್ ಲೊಟುನ್ ಘಾಲ್ಲೆಪರಿಂ ತಾಕಾ ಭಗ್ಲೆಂ ಆನಿ ಆಪ್ಲೆಂ ನಿಯಂತ್ರಣ್ ಚುಕೊನ್ ಪಾರ್ವತಿ ನಂಯ್ಚಾ ಉದರಾಖ್ ತೊ ಸೆರ್ವಾಲ್ಲೊ.

ಶಾಂಭವಿಚೆಂ ಫಾಂತ್ಯಾಫಾರಾಚೆಂ ಸ್ವಪಾಣ್ ಖರೆಂ ಜಾಲ್ಲೆಂ -

ಪಾರ್ವತಿ ನಂಯ್ತ್ ದಡ್ಬಡ್ಚಿ ವ್ಯಕ್ತಿ ಅಪ್ಣಾಚೊ ಪೂತ್ ಮ್ಹಣ್ ಕಳೊಂಕ್ ವೇಳ್ ಗೆಲೊನಾ.

ತಿ ಎಕಾಚ್ಫಾರಾ ಕಿಂಕ್ರಾಟ್ಲಿ, ತಿಚೊ ತಾಳೊ ತೆಣೆಂಚ್ ಪ್ರತಿಧ್ವನಿತ್ ಜಾಲೊ!.

ಫಾಂತ್ಯಾಫರಾಚೆಂ

ಅನೇಕ್

ವ್ಯಾ

ಕಾಣ್ಯೆಗಾರ್]