ಕವಿತಾकविताPoem
ಪೆಟ್ಲಾ
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಕಾಣಿಂ ಎಕಾ ವಾಚ್ಪ್ಯಾಕ್ ಸ್ವಪ್ಣಾಂಚಾ ಸಾಗೊರಾಲಾಗಿಂ ಪಾವಂವ್ಕ್ ಸಕ್ತಾ ತರ್ ಕವಿತಾ ತಾಂತುಂ ಉಪ್ಯೆಂವ್ಚೊ ಅನ್ಭೋಗ್ ದಿತಾ’
ಕವಿತಾಪಾಠ್ - 8
ಲಿಸಾಂವ್ -8. ದರ್ಯಾಕ್ ಉಜೊ ಪೆಟ್ಲಾ
ಕವಿತಾ - ದರ್ಯಾಕ್ ಉಜೊ ಪೆಟ್ಲಾ
ಕವಿ: ಚಾ.ಫ್ರಾ.ದೆ’ಕೋಸ್ತಾ
ಬೂಕ್: ಸೊಂಶ್ಯಾಚೆ ಕಾನ್
ಪ್ರಕಾಶಕ್: ಪ್ರಗತಿ ಪ್ರಕಾಶನ್
ಪಾಠ್ ಚಲವ್ಪಿ: ವಲ್ಲಿ ಕ್ವಾಡ್ರಸ್
ತಾರಿಕ್: 9 ಸಪ್ತೆಂಬರ್ 2005
ಜಾಗೊ: ಕಾರ್ಮೆಲ್ ಇಸ್ಕೊಲ್, ಖೈತಾನ್
ಸುಶೆಗಾಚ್ಯಾ ಆಮ್ಚ್ಯಾ ಗಾಂವಾಂತ್
ಆಜ್ ಆಕಾಂತ್ ಸುಟ್ಲಾ
ಕಾಳ್ಜಾಕ್ ಘಾಮ್ ಫುಟ್ಲಾ
ಏಕ್ಚ್ ಬೊಬಾಳ್ ಉಟ್ಲಾ
ದರ್ಯಾಕ್ ಉಜೊ ಪೆಟ್ಲಾ!
ದೊತೊರ್ಸಾಯ್ಬ್, ವಕೀಲ್ಸಾಯ್ಬ್
ಮಂತ್ರಿಸಾಯ್ಬ್, ತಂತ್ರಿಸಾಯ್ಬ್
ಪಾದ್ರಿಸಾಯ್ಬ್, ಬೀಪ್ಸಾಯ್ಬ್
ಪಾರ್ಕೆಟಿಂತ್ಲೊ ಮಟನ್ಸಾಯ್ಬ್
ಥರ್ಥರ್ಯಾಂನಿ ಆಟ್ಲಾ.
ಮಾದ್ರಿಬಾಯ್, ವ್ಹಡ್ಲಿಬಾಯ್
ಒಫಿಸಾಂತ್ಲಿ ಅಪುಟ್ಬಾಯ್
ಮುಕ್ರಿಬಾಯ್, ಮೆಸ್ತಿರ್ಣ್ಬಾಯ್
ಆಡ್ ಪಡ್ಲಾ ತಾಂಚೊ ಪಾಯ್
ಪೆಂಕ್ಟಾನಾಡೊ ತುಟ್ಲಾ.
ಆಕಾಂತಾಂಕ್ ವೊಡ್ಕೊ ನಾ
ಪೆಂಕ್ಟಾರ್ ತಾಂಚ್ಯಾ ಕುಡ್ಕೊ ನಾ
ಗಾಂವ್ಚೊ ಸುಶೇಗ್ ಲುಟ್ಲಾ
ಆಜ್ ಆಕಾಂತ್ ಸುಟ್ಲಾ
ಏಕ್ಚ್ ಬೊಬಾಳ್ ಉಟ್ಲಾ
ದರ್ಯಾಕ್ ಉಜೊ ಪೆಟ್ಲಾ.
ಹಾಂವ್ಗಾ ಕೊಣ್, ಕಡ್ಚೆಂ ಮೆಣ್
ಗಾಂವಾಕ್ ಸಾಂಗೊಂಕ್ ಭಿಯಾವೀಣ್
ಜಳ್ಟಾ ಜೀಣ್ ಕರ್ತಿತ್ ಮ್ಹಣ್
ಸಾಯ್ಬ್-ಸಾಯ್ಬಿಣಿ ರಾಗ್ ಶಿಣ್
ರಗ್ತಾಶೆಳೇರ್ ಆಟ್ಲಾ.
ದರ್ಯಾಕ್ ಉಜೊ ಪೆಟಾನಾಂಗಾ
ಸಾಂಗೊಂಕ್ ಉತಾರ್ ಸುಟಾನಾಂಗಾ
ತರ್ಯ್ ತಾಂಚ್ಯಾ ಆಗ್ಟ್ಯಾಫುಡೆಂ
ಮ್ಹಜೊ ಧಂವರ್ ಉಟನಾಂಗಾ.
ದೆಕುನ್ ಮೊಣ್ಕೊ ಘೊಟ್ಲಾ
ರಾಜಾಂವ್ ಪೆಲ್ಯಾನ್ ಲೊಟ್ಲಾ
ಅತ್ಮೊ ಫಿಂರ್ಗತ್ ಸುಟ್ಲಾ
ದರ್ಯಾಕ್ ಉಜೊ ಪೆಟ್ಲಾ!
ಸೊಸ್ಚೆಂ ಪುರ್ಯಾನ್ಪುರೊ ಸೊಸ್ಲಾಂ
ಆತಾಂ ದರ್ಯಾವೆಳೆರ್ ಬಸ್ಲಾಂ
ಶಿಂತಿದ್ ತಾಸ್ಲಾಂ, ಸಯ್ರಾಣ್ ಲಾಸ್ಲಾಂ
ಮನಾಂತ್ ಮೆಕ್ಳೆಂ ಚಿಂತಾಪ್ ಮೊಸ್ಲಾಂ
ಒಕ್ತಾಉಂಡೊ ವಾಟ್ಲಾ.
ರಡೊನ್ ರಡೊನ್ ರಡೊನ್ ರಡೊನ್
ದೊಳ್ಯಾಂತುಲಿಂ ದುಕಾಂ ತಾಂಡೂನ್
ದರ್ಯಾಮಾತ್ಯಾರ್ ಒತ್ತಾಂ ಒತ್ತಾಂ
ದರ್ಯಾಉಜೊ ಪಾಲ್ವಂವ್ಕ್ ಸೊದ್ತಾಂ
ಸಾಯ್ಬಾಬಾಬಾ, ಸಾಯ್ಬಿಣ್ ಮಾನಾ
ಮ್ಹಣುನಾಕಾ ಮನಾ ಮನಾ
ಫಿರ್ಕಿಸ್ ಆಮ್ಕಾಂ ಭೆಟ್ಲಾ
ದುಭಾವ್ ತುಮ್ಕಾಂ ಉಟ್ಲಾ
ಕಾಳ್ಜಾಕ್ ಘಾಮ್ ಫುಟ್ಲಾ
ದರ್ಯಾಕ್ ಉಜೊ ಪೆಟ್ಲಾ?
ಕವಿಚಿ ವ್ಹಳೊಕ್:
ದೆ|ಚಾ.ಫ್ರಾ ದೆ’ಕೋಸ್ತಾ ಏಕ್ ನಾಟಕಿಸ್ತ್, ಕಾಣ್ಯೆಗಾರ್, ಚಿಂತ್ಪಿ, ಆನಿ ಕವಿ ಮಾತ್ರ್ ನ್ಹಯ್, ಕೊಂಕ್ಣಿ ಕವಿತಾಂಚೊ ದರ್ಯೊಚ್ ಮ್ಹಳ್ಯಾರ್ಯ್ ಕಾಂಯ್ ಚೂಕ್ ಜಾಂವ್ಚಿನಾ. ಚಡ್ ಜಾವ್ನ್ ಕ್ರಾಂತಿಕಾರಿ ಚಿಂತ್ಪಾಕ್ ಅಪ್ಲ್ಯಾ ಬರ್ಪಾಂನಿ ಹಾಡ್ಚೊ ಚಾ.ಫ್ರಾ. ಕೊಂಕ್ಣೆಂತ್ಲೊ ಪಯ್ಲೊ ಬಂಡಾಯ್ ಕವಿ ಮ್ಹಣ್ ನಾಂವಾಡ್ಲಾ. ಆಪ್ಲ್ಯಾ ’ಸೊಂಶ್ಯಾಚೆ ಕಾನ್’ ಕವಿತಾಜಮ್ಯಾಕ್ ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಥಾವ್ನ್ ಪ್ರಶಸ್ಥಿ ಜಿಕ್ಲ್ಲ್ಯಾ ಹಾಚಾ ಕವಿತಾಚೆಂ ಅಧ್ಯಯನ್ ಆಜ್ ಪರ್ಯಾಂತ್ ಜಾಯ್ತೆ ಕವಿ ಕರುನ್ ಆಸಾತ್.
ಆಧ್ಲ್ಯಾ ಕವಿತಾಪಾಠಾಂಚೊ ವಿವರ್
ಕವಿತಾಪಾಠ್ - 7 . ಮನಿಸ್ ಮ್ಹಣ್ಜೆ ಕಿತೆಂ (ಲುವಿಸ್ ಮಸ್ಕರೇಞ್)
ಕವಿತಾಪಾಠ್ - 6 . ಮ್ಹಜೊ ದಿವೊ (ಮಾವ್ರಿಸ್ ಶಾಂತಿಪುರ್)
ಕವಿತಾಪಾಠ್ - 5 . ಬಾಂಯ್ (ಆಂಡ್ರು ಎಲ್. ಡಿ’ಕುನ್ಹಾ)
ಕವಿತಾಪಾಠ್ - 4 . ಆಜ್ (ವಲ್ಲಿ ಕ್ವಾಡ್ರಸ್)
ಕವಿತಾಪಾಠ್ - 3 . ಸಲ್ವಣಿ (ಫ್ರೆಡ್ ಕುಮಾರ್)
ಕವಿತಾಪಾಠ್ - 2 . ಕಯ್ದ್ಯಾಚಿ ಕವಿತಾ (ಎಚ್ಚೆಮ್)
ಕವಿತಾಪಾಠ್ - 1 . ವಾಟ್ (ಮೆಲ್ವಿನ್ ರೊಡ್ರಿಗಸ್)
ಕಾಳ್ಜಾ-ಮನಾಂತ್ ಘಾಮ್ ಸುಟಂವ್ಚೆಂ ಕವಿತಾ [ - ವಲ್ಲಿ ಕ್ವಾಡ್ರಸ್, ಅಜೆಕಾರ್]
ಚಾ.ಫ್ರಾ ಕೊಂಕ್ಣಿ ಕವಿತಾಂಚೊ ದರ್ಯೊ ಮ್ಹಣ್ ಒಪ್ಚಾ ಚಡ್ತಾವ್ ಕವಿಂ ಪಯ್ಕಿ ಹಾಂವ್ಯ್ ಎಕ್ಲೊಂ.
ಜಸೊ ದರ್ಯಾಕ್ ವಳ್ಕಾನಾತ್ಲ್ಲಿಂ ಕೊಣ್ಂಚ್ ನಾಂತ್ ತರ್ಯ್ ದರ್ಯಾಕ್ ಸಮ್ಜಾಲ್ಲಿಂ ಸಯ್ತ್ ಕೊಣ್ಯ್ ನಾಂತ್. ಆತಾಂ ಕೊಂಕ್ಣಿ ಕವಿತಾಚಾ ದರ್ಯಾನ್ ಉಭೊ ಕೆಲ್ಲೊ ದರ್ಯೊ ವಾಚ್ಪ್ಯಾಂಚಾ, ಕವಿಂಚಾ, ಚಿಂತ್ಪ್ಯಾಂಚಾ ಕಾಳ್ಜಾ-ಮನಾಂನಿ ಅಸೊಯ್ ಘಾಮ್ ಸುಟಯ್ತಾ ಮ್ಹಳ್ಯಾರ್ ಹೊ ಘಾಮ್ಂಚ್ ಕಾಂಯ್ ಅನ್ಯೇಕ್ ದರ್ಯೊ ಜಾಯ್ತ್ ಕೊಣ್ಣಾ ಮ್ಹಳ್ಳೊ ದುಭಾವ್ಯ್ ಯೆತಾ.
ಆತಾಂ ಹ್ಯಾ ಕವಿತಾಚಾ ಎಕೆಕಾ ಪಂಗ್ತೆಕ್ ಶಿಂದುನ್ ತಾಚೆಂ ಅಧ್ಯಯನ್ ಕರ್ಚೆಂ ತರ್;
’ಸುಶೆಗಾಚ್ಯಾ ಆಮ್ಚ್ಯಾ ಗಾಂವಾಂತ್
ಆಜ್ ಆಕಾಂತ್ ಸುಟ್ಲಾ
ಕಾಳ್ಜಾಕ್ ಘಾಮ್ ಫುಟ್ಲಾ
ಏಕ್ಚ್ ಬೊಬಾಳ್ ಉಟ್ಲಾ
ದರ್ಯಾಕ್ ಉಜೊ ಪೆಟ್ಲಾ!’
ಆಮ್ಚೊ ಗಾಂವ್ ಕೆದ್ನಾಂಯ್ ಸುಶೆಗಾಚೊಚ್. ಜೆಮೆಂವ್ಚೊ, ನೀದ್ ಕಾಡ್ಚೊ, ಘೊರೆಂವ್ಚೊ. ಅಮ್ಕಾಂಚ್ ಪರ್ಕ್ಯಾಂನಿ ಯೇವ್ನ್ ಉಕ್ಲುನ್ ವೆಲೊ ತರ್ಯ್ ಆಮ್ಕಾಂ ಕಿತೆಂಚ್ ಫಿಕಿರ್ ನಾ, ಆಮ್ಕಾಂ ಕಸಲಿಚ್ ಖಬಾರ್ ನಾ. ಆಮ್ಕಾಂ ಸುಶೆಗ್ ಜಾಯ್ ಜಸೊ ಆಮ್ಚಾ ಗಾಂವಾಪರಿಂ.ಹಾಂಗಾಸರ್ ಕವಿಚಾ ನದ್ರೆಂತ್, ಇತ್ಲ್ಯಾ ಸುಶೆಗಾಚಾ ಗಾಂವಾಂತ್ ದರ್ಯಾಕ್ ಉಜೊ ಪೆಟಯ್ಲಾ..
ಕಸೊ?
ಮುಖಾರ್ ಪಳೆವ್ಯಾಂ;
’ದೊತೊರ್ಸಾಯ್ಬ್, ವಕೀಲ್ಸಾಯ್ಬ್
ಮಂತ್ರಿಸಾಯ್ಬ್, ತಂತ್ರಿಸಾಯ್ಬ್
ಪಾದ್ರಿಸಾಯ್ಬ್, ಬೀಪ್ಸಾಯ್ಬ್
ಮಾರ್ಕೆಟಿಂತ್ಲೊ ಮಟನ್ಸಾಯ್ಬ್
ಥರ್ಥರ್ಯಾಂನಿ ಆಟ್ಲಾ.
ಮಾದ್ರಿಬಾಯ್, ವ್ಹಡ್ಲಿಬಾಯ್
ಒಫಿಸಾಂತ್ಲಿ ಅಪುಟ್ಬಾಯ್
ಮುಕ್ರಿಬಾಯ್, ಮೆಸ್ತಿರ್ಣ್ಬಾಯ್
ಆಡ್ ಪಡ್ಲಾ ತಾಂಚೊ ಪಾಯ್
ಪೆಂಕ್ಟಾನಾಡೊ ತುಟ್ಲಾ.’
ಆಮ್ಚಾ ಗಾಂವಾಕ್ ಸುಶೆಗಾಚಿ ನೀದ್ ಕಾಡಂವ್ಚೆ ವಯ್ಲೆ ಸಗ್ಳೆ ’ಬಾಬ್’ ಆನಿಂ ’ಬಾಯೊ’ ಸಗ್ಳಿಂ ಥರ್ಥರ್ಯಾಂನಿ ಆಟ್ಲ್ಯಾತ್, ಉಟ್ಲ್ಯಾತ್ ಆನಿಂ ಎಕಾಮೆಕಾ ಭೆಟ್ಲ್ಯಾತ್.
ಉಜೊ ಕಸೊ ಪೆಟ್ಲಾ? ಪಾಯ್ ಆಡ್ ಪಡ್ಲ್ಯಾತ್ - ಪಾಯ್ ಮ್ಹಳ್ಯಾರ್ ಬಾಪುಯ್, ವಡಿಲ್, ಘುರ್ಕಾರ್, ಯೆಜ್ಮಾನ್, ಪತಿ ವ ಕಸಲೀಂಯ್ ಲೊರಾಂ ಆಸೊಂ, ಪುಣ್ ಜೆದ್ನಾಂ ವಡಿಲ್ ಆಡ್ ಪಡ್ಲಾ ವ ಥಾರ್ಯಾರ್ ನಾ ವಾ ತಾಚಿ ತಕ್ಲಿ ಪಿರ್ಕಿ ಜಾತಾ ತೆದ್ನಾಂ ಪೆಂಕ್ಟಾನಾಡೊ ತುಟ್ತಾ.
ಚಾ.ಫ್ರಾಚಾ ಕವಿತಾಂನಿ ತಾಚಿ ನದರ್ ಬಾಯಾಂಚೆರ್, ಆನಿ ಮಾಂದ್ರೆಚೆರ್, ಪೆಂಕ್ಟಾನಾಡ್ಯಾಚೆರ್ ಪಡ್ಚಿ ಅನ್ಯೇಕ್ ಕವಿತಾ ’ಹಾಡ್ ಚೆಡ್ವಾ ಬುಡ್ಕುಲೊ’ ಕವಿತೆಂತ್. ತಾಂತುಂ ತೊ ಅಶೆಂ ಸಾಂಗ್ತಾ;
’ಉಟಾಗೊ ಬಾಯಾನೊ ಮಾಂದ್ರಿ ಖೊವ್ಳಿಯಾ’
ಹ್ಯಾ ಕವಿತೆನ್ ಅಜಿಕ್ ಚಡುಣೆಂ ತೀಸ್-ಚಾಳಿಸ್ ವರ್ಸಾಂಧಿಂ ಕೊಂಕ್ಣೆಂತ್ ವಾದಾಳ್ ಉಟಯಿಲ್ಲೆಂ ಖೈಂ. ಆನಿಂ ಹ್ಯಾ ಕವಿತೆಂತ್ ತೆಚ್ಚ್ ಚಿಂತ್ಪಾಚೆಂ ಪರತ್ ಯೆಣೆಂ ಜಾತಾ ಅಥ್ವ್ಯಾ ರುಪಾರ್;
’ಪೆಂಕ್ಟಾನಾಡೊ ತುಟ್ಲಾ’ ಕವಿನ್ ’ಕೊಣಾಚೊ ಪೆಂಕ್ಟಾನಾಡೊ? ಕೊಣೆ ಸುಟಯ್ಲಾ? ವಾ ತುಟಯ್ಲಾ? ಕಸೊ ತುಟ್ಲೊ?’ ಮ್ಹಳ್ಳೆಂ ಸಾರ್ಕೆಂ ಸ್ಪಶ್ಟ್ ಕರುಂಕ್ ನಾ ತರ್ಯ್ ಕವಿಚಾ ದರ್ಯಾಚೊ ಉಜೊ ಮಾತ್ರ್ ಝಳ್ಳಾ. ಫುಡ್ಲಿ ಪಂಗತ್ ಪಳೆವ್ಯಾಂ;
’ಆಕಾಂತಾಂಕ್ ವೊಡ್ಕೊ ನಾ
ಪೆಂಕ್ಟಾರ್ ತಾಂಚ್ಯಾ ಕುಡ್ಕೊ ನಾ
ಗಾಂವ್ಚೊ ಸುಶೇಗ್ ಲುಟ್ಲಾ
ಆಜ್ ಆಕಾಂತ್ ಸುಟ್ಲಾ
ಏಕ್ಚ್ ಬೊಬಾಳ್ ಉಟ್ಲಾ
ದರ್ಯಾಕ್ ಉಜೊ ಪೆಟ್ಲಾ.’
ಹಾಂಗಾಸರ್ ಕವಿಚೆ ವಿಚಾರ್ ಭೋವ್ ಸಂಕೀರ್ಣ್ ಮಾಪಾನ್ ಉಭೆ ಜಾತಾತ್, ಮ್ಹಳ್ಯಾರ್ ಪೆಂಕ್ಟಾನಾಡೊ ಮ್ಹಳ್ಯಾರ್ ಮರ್ಯಾದೆಚೊ ಘುರ್ತ್. ಆನಿಂ ಹ್ಯಾ ನಾಡ್ಯಾಚೆರ್ ಮನಿಸ್ ಅಪ್ಲೊ ಮಾನ್ ಧಾಂಪ್ತಾ. ಪುಣ್ ಜೆದ್ನಾಂ ಹೊ ನಾಡೊಚ್ ತುಟ್ತಾ, ಮ್ಹಳ್ಯಾರ್ ಮರ್ಯಾದ್ಚ್ ಉಭ್ತಾ, ತೆದ್ನಾಂ ಗಾಂವಾಂತ್ ಸುಶೆಗ್ ಉರ್ಚೊ ತರ್ಯ್ ಕಸೊ?
ಆಕಾಂತ್ ಉಟಾನಾಂಯ್ ರಾಂವ್ಚೊ ತರ್ಯ್ ಕಸೊ? ಪುಣ್ ಕವಿ ಕೊಣ್? ತೊಚ್ಚ್ ಸಾಂಗ್ತಾ;
’ಹಾಂವ್ಗಾ ಕೊಣ್, ಕಡ್ಚೆಂ ಮೆಣ್
ಗಾಂವಾಕ್ ಸಾಂಗೊಂಕ್ ಭಿಯಾವೀಣ್
ಜಳ್ಟಾ ಜೀಣ್ ಕರ್ತಿತ್ ಮ್ಹಣ್
ಸಾಯ್ಬ್-ಸಾಯ್ಬಿಣಿ ರಾಗ್ ಶಿಣ್
ರಗ್ತಾಶೆಳೇರ್ ಆಟ್ಲಾ.’
ಹಾಂಗಾಸರ್ ಕವಿ ಅಪುಣ್ ಸತ್ಚ್ ಸಾಂಗೊಂಕ್ ಆಶೆತಾಂ ಪುಣ್ ಮ್ಹಜೆಂ ಸತ್ ಆಯ್ಕೊಂಕ್ ಕೊಣಾಕ್ಚ್ ನಾಕಾ, ಅಪ್ಲೆಂ ಸತ್ ಹುನ್ ಮೆಣಾಪರಿಂ ಮ್ಹಣ್ತಾ, ಕವಿ ಭಿವ್ಕುರೊ ನ್ಹಯ್, ದಾಕ್ಶೆತಾ, ಕಾಂಯ್ ಅಪ್ಣಾನ್ ಸತ್ ಉಚಾರ್ಲೆಂ ತರ್ ’ಸಾಯ್ಬ್-ಸಾಯ್ಬಿಣ್’ ರಾಗಾರ್ ಜಾತಿತ್ ಕೊಣ್ಣಾ ಮ್ಹಣ್. ಹೆಂ ಚಿಂತುನ್ ಚಿಂತುನ್ ಕವಿ ಮನಾಂತ್ಚ್ ಖರ್ಗತಾ ಆನಿಂ ಚಿಂತ್ನಾಂ ಮತಿಂತ್ಚ್ ಆಟಯ್ತಾ. ಅಶೆಂ ಅಟೊವ್ನ್ ಆಟೊವ್ನ್ ರಗ್ತಾಶೆಳೆರ್ ಆಟ್ತಾ.
ಮುಖ್ಲಿ ಪಂಗತ್ ಪಳೆಯಾಂ;
’ದರ್ಯಾಕ್ ಉಜೊ ಪೆಟಾನಾಂಗಾ
ಸಾಂಗೊಂಕ್ ಉತಾರ್ ಸುಟಾನಾಂಗಾ
ತರ್ಯ್ ತಾಂಚ್ಯಾ ಆಗ್ಟ್ಯಾಫುಡೆಂ
ಮ್ಹಜೊ ಧಂವರ್ ಉಟನಾಂಗಾ.’
ಹಾಂಗಾಸರ್ ಕವಿ ವ್ಯಂಗ್ಯ್ ರೂಪ್ ಘೆತಾ ಆನಿಂ ಆಪ್ಲ್ಯಾ ಸುರ್ವಿಲ್ಲ್ಯಾ ದಿಶಾಕ್ ನವಿ ದಿಶಾ ದಿತಾ, ಮ್ಹಳ್ಯಾರ್ ಕವಿನ್ ಎದೊಳ್ಚ್ ಅಪ್ಲೊ ದರ್ಯೊ, ಆನಿಂ ತಾಂತುಂ ಪೆಟ್ಚೊ ಉಜೊ ಉಲ್ಲೇಕ್ ಕೆಲಾ, ಆತಾಂ ಹೊ ಉಜೊ ಪೆಟಯ್ತೆಲ್ಯಾಂಕ್ ದಾಕಯ್ತಾ, ತಾಂಚಾ ಆಗ್ಟ್ಯಾಂಫುಡೆಂ ಮ್ಹಜೊ ಧುಂವರ್ ಉಟಾನಾಂಗಾ..
’ಆಗ್ಟೆಂ’ ಮ್ಹಳ್ಯಾರ್ ಉಜೊ ಕರ್ಚಾಕ್ಚ್ ಆಸಾ ಕೆಲ್ಲೆಂ ವ್ಹಡ್ಲೆಂ ರೂಪ್. ಮ್ಹಳ್ಯಾರ್ ಅಪ್ಲ್ಯಾ ಉತ್ರಾಂಚೊ ಧುಂವರ್ ಉಟೊಂಕ್ ತೆ (?) ಯಾ ತಾಂಚೊ (?) ಆಗ್ಟ್ಯೊ ಸೊಡಿನಾಂತ್ ಮ್ಹಣ್ತಾ. ದೆಕುನ್ ಕಿತೆಂ ಕರ್ಚೆಂ?
ಕವಿಚಾಚ್ ಉತ್ರಾಂನಿ ಆಯ್ಕೊಂವ್ಚೆಂ ತರ್;
’ದೆಕುನ್ ಮೊಣ್ಕೊ ಘೊಟ್ಲಾ
ರಾಜಾಂವ್ ಪೆಲ್ಯಾನ್ ಲೊಟ್ಲಾ
ಅತ್ಮೊ ಫಿಂರ್ಗತ್ ಸುಟ್ಲಾ
ದರ್ಯಾಕ್ ಉಜೊ ಪೆಟ್ಲಾ!’
ಕವಿ ಹಾಂಗಾಸರ್ ಅಪ್ಲೆಂ ಅಸಮಧಾನ್, ಸಲ್ವಣ್ ಸ್ವೀಕಾರ್ ಕರುಂಕ್ ಜಾಯ್ನಾಸ್ತಾನಾ ನಿರಾಸೊನ್ ಸಾಂಗ್ತಾ; ಅಪ್ಣಾನ್ ಮೊಣ್ಕೊ ಘೊಟ್ಲಾ, ಮೊಣ್ಕೊ ಮ್ಹಣ್ಜೆ ಆಮಾಲ್. ಆನಿಂ ಕಿತ್ಯಾಕ್ ಮೊಣ್ಕೊ ಘೊಟ್ಲಾ? ರಾಜಾಂವ್ ಪೆಲ್ಯಾಕ್ ಲೊಟ್ಚಾಕ್..
ಮ್ಹಳ್ಯಾರ್ ಅಪ್ಣಾಲಾಗಿಂ ಆಸ್ಚಿಂ ಕಿತ್ಯಾಕ್? ಕಶಿಂ? ಮ್ಹಳ್ಳಿಂ ಸವಾಲಾಂ ಸಂಪಂವ್ಚಾಕ್ ವಾ ಶಾಂತ್ ಕರ್ಚಾಕ್ ಕವಿನ್ ಮೊಣ್ಕೊ ಘೊಟ್ಲಾ. ಕುಡಿಕ್ ಅಪ್ಣೆಂ ವಿಶೆವ್ ದಿಲಾ. ಪುಣ್ ಅತ್ಮ್ಯಾಕ್?? ಅತ್ಮೊ ಜಿವೊಚ್ ಆಸಾ, ಅತ್ಮ್ಯಾಕ್ ತ್ಯಾ ಮೊಣ್ಕ್ಯಾನ್ ಜಾಂವ್ ತೊಣ್ಕ್ಯಾನ್ ಜಾಂವ್ ಕಿತೆಂಚ್ ಕರುಂಕ್ ಜಾಯ್ನಾಂ ದೆಕುನ್ ಅತ್ಮೊ ಫಿರ್ಗತ್ ಸುಟ್ಲಾ, ದರ್ಯಾಕ್ ಉಜೊ ಪೆಟ್ಲಾ... ಮುಖಾರ್ ಕಿತೆಂ ಸಾಂಗ್ತಾ ಕವಿ ಪಳೆಯಾಂ;
’ಸೊಸ್ಚೆಂ ಪುರ್ಯಾನ್ಪುರೊ ಸೊಸ್ಲಾಂ
ಆತಾಂ ದರ್ಯಾವೆಳೆರ್ ಬಸ್ಲಾಂ
ಶಿಂತಿದ್ ತಾಸ್ಲಾಂ, ಸಯ್ರಾಣ್ ಲಾಸ್ಲಾಂ
ಮನಾಂತ್ ಮೆಕ್ಳೆಂ ಚಿಂತಾಪ್ ಮೊಸ್ಲಾಂ
ಒಕ್ತಾಉಂಡೊ ವಾಟ್ಲಾ.’
ಕವಿನ್ ದರ್ಯಾವೆಳೆರ್ ಬೊಸೊನ್, ಅಪ್ಲೆಂ ರಾಜಾಂವ್ ಸಂಪಂವ್ಕ್, ವಾ ಲಿಪಂವ್ಕ್ ಮೊಣ್ಕೊ ಘೊಟ್ಲೊ ತರ್ಯ್ ಕವಿಕ್ ಸುಶೆಗ್ ನಾ ದೆಕುನ್ ಅಥ್ವೊಚ್ ಉಪಾವ್ ತೊ ಸೊಧ್ತಾ, ಶಿಂತಿದ್ ತಾಸ್ಲಾಂ, ಸಯ್ರಾಣ್ ಲಾಸ್ಲಾಂ, ಆನಿಂ ಮನಾಂತ್ ಮೆಕ್ಳೆಂ ಚಿಂತಾಪ್ ಮೊಸ್ಲಾಂ ಆನಿಂ ಒಕ್ತಾಉಂಡೊ ವಾಟ್ಲಾ.. ಕಸಲೆಂ ತೆಂ ಒಕಾತ್?
’ರಡೊನ್ ರಡೊನ್ ರಡೊನ್ ರಡೊನ್
ದೊಳ್ಯಾಂತುಲಿಂ ದುಕಾಂ ತಾಂಡೂನ್
ದರ್ಯಾಮಾತ್ಯಾರ್ ಒತ್ತಾಂ ಒತ್ತಾಂ
ದರ್ಯಾಉಜೊ ಪಾಲ್ವಂವ್ಕ್ ಸೊದ್ತಾಂ
ಸಾಯ್ಬಾಬಾಬಾ, ಸಾಯ್ಬಿಣ್ ಮಾನಾ
ಮ್ಹಣುನಾಕಾ ಮನಾ ಮನಾ
ಫಿರ್ಕಿಸ್ ಆಮ್ಕಾಂ ಭೆಟ್ಲಾ
ದುಭಾವ್ ತುಮ್ಕಾಂ ಉಟ್ಲಾ
ಕಾಳ್ಜಾಕ್ ಘಾಮ್ ಫುಟ್ಲಾ
ದರ್ಯಾಕ್ ಉಜೊ ಪೆಟ್ಲಾ?’
ರಡೊನ್ ರಡೊನ್ ರಡೊನ್ ರಡೊನ್ ಮ್ಹಳ್ಯಾರ್ ಪರತ್ ಪರತ್ ತೆಂಚ್ ನಿಹಾಳುನ್, ರಡೊನ್ ಹ್ಯಾ ದರ್ಯಾಂತ್ ಪೆಟ್ಲೆಲ್ಯಾ ಉಜ್ಯಾಕ್ ಅಪ್ಲೆಂ ದೂಕ್ ವ್ಹಾಳವ್ನ್ ಕಾಂಯ್ ತೊ ಉಜೊ ಪಾಲ್ವತ್ಗಾಯ್ ಮ್ಹಳ್ಳ್ಯಾ ಚಿಂತ್ಪಾನ್ ಕವಿನ್ ಸಾಯ್ಬಿಣ್-ಸಾಯ್ಭಾಂನಿ ಪೆಟಯಿಲ್ಲ್ಯಾ ಉಜ್ಯಾಕ್ ಕೊಲಾಯಿತ್ತ್, ಅಖ್ರೇಕ್ ಅಪ್ಣಾಕ್ ’ಪಿಸೊ ಭೆಟ್ಲಾ’ ಮ್ಹಳ್ಳೊ ಬದ್ನಾಮ್ ಘಾಲುನ್ ಕಾಳ್ಜಾ-ಮನಾಕ್ ಘಮ್ ಫುಟವ್ನ್ ಸಲ್ವಲ್ಲ್ಯಾ ಜಿನ್ಸಾರ್ ಜೀಕ್ ಜೊಡ್ತಾ ಆನಿಂ ಹ್ಯಾ ಉಜ್ಯಾಕ್ ಅಪ್ಲೊ ಉಜೊ ಪೆಟಯ್ತಾ.
ಮ್ಹಳ್ಯಾರ್ ಕವಿ ’ಉಜ್ಯಾಕ್ ಉಜೊ ಪೆಟಯ್ತಾ’ ಅಪ್ಲ್ಯಾ ಕವಿತೆಧ್ವಾರಿಂ.
ಹೆಂ ಚಾ.ಫ್ರಾ.ದೆಕೋಸ್ತಾಚಾ ಸಭಾರ್ ಬಂಡಾಯ್ ಕವಿತಾಂ ಪಯ್ಕಿ ಏಕ್ ಮ್ಹಣ್ತಾ ಮಾಲ್ಘಡೊ ಕವಿ ಮಾನೆಸ್ತ್ ಜೆ.ಬಿ.ಮೊರಾಯಸ್.
ದುಸ್ರೊ ಭಾಗ್ - ಕವಿತಾ ಅಧ್ಯಯನ್ [ಕವಿತಾಚೊ ಪ್ರಕಾರ್]: ’ಫ್ರೀ ವರ್ಸಾಸ್’ ಕವಿತಾ
ಫ್ರೀ ವರ್ಸ್ [ಸುಡಾಳ್ ರಿತಿನ್ ಕವಿತಾ ಬರಂವ್ಚಿ ಶೈಲಿ] ಆಜ್ಕಾಲ್ ಚಡ್ತಾವ್ ಕವಿ ಫ್ರೀ ವರ್ಸಾಚೆರ್ ಕವಿತಾ ಬರಯ್ತಾತ್. ಕವಿತಾಚಾ ನದ್ರೆನ್ ಹೆಂ ತಿತ್ಲೆಂ ಉಪ್ಕಾರಾಕ್ ಪಡ್ಚೆಂ ಮ್ಹಣ್ ಸಾಂಗೊಂಕ್ ತ್ರಾಸ್ ತರ್ಯ್ ಫ್ರೀ ವರ್ಸಾಚೆರ್ ಬರಯಿಲ್ಲಿಂ ಕವಿತಾ ಕವಿತಾ ನ್ಹಯ್ ಮ್ಹಣೊಂಕ್ ಬಿಲ್ಕುಲ್ ಜಾಯ್ನಾಂ.
ಫ್ರೀ ವರ್ಸಾಚೆರ್ ಕವಿತಾಂತ್ ಉತ್ರಾಂಚೊ ಅಲಂಕಾರ್ ಇಲ್ಲೊ ಉಣೊ ದಿಸೊಂಕ್ ಪುರೊ, ಉತ್ರಾಂಚೊ ವ್ಹಾಳೊ ಇಲ್ಲೊ ಪಾಟಿಂ ಮುಖಾರ್ ದಿಸೊಂಕ್ ಪುರೊ ತರ್ಯ್ ಫ್ರೀ ವರ್ಸಾಂತ್ ಕವಿತಾ ಬರಯ್ತಾನಾ ಕವಿಕ್ ಪ್ರಾಸ್ ಜಾಂವ್, ಮಾತ್ರಂ-ಛಂದಸ್ಸಾಂವಿಶಿಂ ಚಡ್ ಗಮನ್ ದೀಜಾಯ್ ಮ್ಹಣ್ ನಾ. ಜೆಂ ಕಿತೆಂ ಸಾಂಗೊಂಕ್ ಆಸಾ ತೆಂ ಸಾಂಗೊಂಕ್ ಜೊಕ್ತ್ಯಾ ಉತ್ರಾಂಚೊ ವಾಪಾರ್ ಕರ್ನ್ ಸಾಂಗ್ಯೆತಾ. ದಾಕ್ಲೊ ದಿಂವ್ಚೊ ತರ್ ಚಾ.ಫ್ರಾಚೆಂ ಹೆಂಚ್ ’ದರ್ಯಾಕ್ ಉಜೊ ಪೆಟ್ಲಾ’ ಕವಿತಾಚಾ ಪಯ್ಲ್ಯಾ ಪಂಗ್ತೆಕ್ ಘೆವ್ಯಾಂ,
’ಸುಶೆಗಾಚ್ಯಾ ಆಮ್ಚ್ಯಾ ಗಾಂವಾಂತ್’
ಮ್ಹಣ್ ಸುರ್ವಾತ್ ಜಾತಾ ತರ್ಯ್ ಉಪ್ರಾಂತ್ಲ್ಯಾ ವೊಳಿಂಚೆ ಅಖ್ರೇಚೆ ಸಬ್ಧ್ ’ಸುಟ್ಲಾ, ಫುಟ್ಲಾ, ಉಟ್ಲಾ, ಪೆಟ್ಲಾ’.
ತಶೆಂ ಮ್ಹಣ್ ಹ್ಯಾ ಕವಿತಾಂತ್ ಅಲಂಕಾರ್-ಪ್ರಾಸ್ ನಾ ಮ್ಹಣ್ ನಾ, ಮಧ್ಲ್ಯಾ ಪಂಗ್ತ್ಯಾಂನಿ ಅಪುರ್ಭಾಯೆಚೊ ಪ್ರಾಸ್ ಆಸಾ;
’ದರ್ಯಾಕ್ ಉಜೊ ಪೆಟಾನಾಂಗಾ
ಸಾಂಗೊಂಕ್ ಉತಾರ್ ಸುಟಾನಾಂಗಾ
ತರ್ಯ್ ತಾಂಚ್ಯಾ ಆಗ್ಟ್ಯಾಫುಡೆಂ
ಮ್ಹಜೊ ಧಂವರ್ ಉಟನಾಂಗಾ.’
ವ
’ದೆಕುನ್ ಮೊಣ್ಕೊ ಘೊಟ್ಲಾ
ರಾಜಾಂವ್ ಪೆಲ್ಯಾನ್ ಲೊಟ್ಲಾ
ಅತ್ಮೊ ಫಿಂರ್ಗತ್ ಸುಟ್ಲಾ
ದರ್ಯಾಕ್ ಉಜೊ ಪೆಟ್ಲಾ!’
ಫ್ರೀ ವರ್ಸಾಂತ್ ಕವಿತಾ ಬರಂವ್ಕ್ ಕಸಲ್ಯೊ ರೆಗ್ರೊ ಆಸಾಜಯ್ ಮ್ಹಣೊನ್ ನಾ, ರುಪಾಕ್ ಜಾಂವ್, ಲಾಂಭಾಯೆಕ್ ಜಾಂವ್, ಮಿಟರಾಂಕ್ ಜಾಂವ್, ಮಾತ್ರಾಂ-ಛಂದಸ್ಸಾಂಕ್, ಭಾಸೆಚಾ ವಾಪಾರಾಕ್ ವಾ ಇಮಾಜಿಂಕ್. ಚಾ.ಫ್ರಾಚೆಂ ’ಕೊಡ್ಯಾಳ್ಚಿಂ ಬಸ್ಸಾಂ’ ಕವಿತಾ ಚಡುಣೆಂ ಅಡೇಜ್ ಪಾನಾಂಚೆಂ, ಆನಿಂ ಫ್ರೀ ವರ್ಸಾಂಚೆರ್ ಬರಯಿಲ್ಲೆಂ ಜಾವ್ನಾಸಾ.
ಕೊಂಕ್ಣೆಂತ್ ಚಡ್ತಾವ್ ಜಾವ್ನ್ ಸಗ್ಳ್ಯಾಂನಿ ಫ್ರೀ ವರ್ಸಾಚೆರ್ ಕವಿತಾ ಬರಯ್ಲ್ಯಾಂತ್. ಆಯ್ಲೆವಾರ್ ಪರ್ಗಟ್ ಜಾಲ್ಲೆ ಆಂಡ್ರು ಎಲ್ ಡಿ’ಕುನ್ಹಾಚೊ ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’ ಜಮ್ಯಾಂತ್ ಜಾಂವ್, ಎಚ್ಚೆಮಾಚೊ ’ಕಯ್ದ್ಯಾಚ್ಯೊ ಕವಿತಾ’ ಜಮ್ಯಾಂತ್ ಜಾಂವ್ ವ ವಲ್ಲಿ ಕ್ವಾಡ್ರಸಾಚಾ ’ಕಟ್ಪುತ್ಳಿ’ ಜಮ್ಯಾಂತ್ ಜಾಂವ್ ಆಸ್ಚೊ ಚಡ್ತಾವ್ ಕವಿತಾ ಫ್ರೀ ವರ್ಸಾಚ್ಯೊಚ್.
ಪುಣ್ ಕವಿತಾಕ್ ಜೊಕ್ತೆ ಪ್ರಾಸ್ ಆಸ್ಲ್ಯಾರ್ ತೆಂ ಖಂಡಿತ್ ಸೊಭ್ಚಾಂತ್ ದುಭಾವ್ ನಾ. ಜಶೆಂ ಚಾ.ಫ್ರಾಚೆಂಚ್ ಅನ್ಯೇಕ್ ಕವಿತಾ
’ಹಾಡ್ ಚೆಡ್ವಾ ಬುಡ್ಕುಲೊ ಲಕಯ್ ತಳ್ಯಾಂತ್,
ಮ್ಹಜೆಂ ತುಜೆಂ ಉತಾರ್ ಜಾಲಾಂ ಕಾಚ್ಚಾ ಮಳಾಂತ್’
ವ
ಮೆಲ್ವಿನ್ ರೊಡ್ರಿಗಸಾಚೆಂ
’ಹಾಂವ್ ಕೊಬು ತುಂ ಮ್ಹಜಿ ಪಾಲಿ
ತುಂ ನಾಸ್ತಾನಾ ಸೊಭಾಯ್ ಮ್ಹಜಿ ಖಾಲಿ’
ಪುಣ್ ಕವಿತಾ ರುಪಾನ್ ಕಶೆಂಯ್ ಆಸೊಂ, ಪುಣ್ ತಿರ್ಳಾಂತ್ ಏಕ್ ಕವಿತಾಚಾ ರುಪಾರ್ಚ್ ಆಸೊಂಕ್ ಜಾಯ್ ಶಿವಾಯ್ ಅಸ್ವಾಭಾವಿಕ್ ಸಂಗ್ತ್ಯಾಂಚೆರ್ ಲಿಖ್ಲೆಲೆಂ ನ್ಹಯ್.
ಅಸ್ವಾಭಾವಿಕ್ ಕವಿತಾವಸ್ತುವಿಶಿಂ ಸವಿಸ್ತಾರಿ ರಿತಿನ್ ಮುಖ್ಲ್ಯಾ ಕವಿತಾಪಾಠಾಂನಿ ಸಂವಾದ್ ಕರ್ಯೆತ್. ಹಾಂಗಾಸರ್ ತೆಂ ಗರ್ಜೆಭಾಯ್ಲೆಂ. - ವಲ್ಲಿ ಕ್ವಾಡ್ರಸ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.