ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ರಾಂದ್ಪಾವೋಳ್
ದಾಯ್ಜ್ ಕುಜ್ನ್:ದಾಯ್ಜ್ಚೊ
ಪ್ರಮುಖ್ ಇರಾದೊ ಕೊಂಕ್ಣಿ ಸಾಹಿತ್ಯಾಚೊ ತರ್ಯ್ ವಾಚ್ಪ್ಯಾಂಚಾ ಪಸಂದೆಖಾತಿರ್ ಆಸಾ ಕೆಲ್ಲ್ಯಾ ದಾಯ್ಜ್ ಕುಜ್ನಾಂತ್ ಆಮ್ಚಾ ಮಾಂಯ್ಗಾಂವ್ಚಾ ಎಕೆಕಾಚ್ ಖಾಣಾ-ರಾಂದ್ಪಾಚೊ, ತಾಚಾ ತಯಾರಾಯೆಕ್ ಗರ್ಜೆಚ್ಯೊ ವಸ್ತು ತಶೆಂಚ್ ತೆಂ ಕಶೆಂ ರಾಂದ್ಚೆಂ ಮ್ಹಳ್ಳೆಂ ವಿವರ್ಚಾ ಇರಾದ್ಯಾನ್ ಹಿ ವೋಳ್ ಆಸಾ ಕೆಲ್ಯಾ,
ರಾಂದ್ಪಿಣ್: ಹರ್ಯೆಕಾ ಮಯ್ನ್ಯಾಂತ್, ತಿಚೆಂ ತಶೆಂಚ್ ಸಂಪಾದನ್ ಕೆಲ್ಲೆಂ ಹೆರಾಂಚೆಂ ಎಕೆಕ್ ನವೆಂ ರಾಂದಾಪ್ ತುಮ್ಚೆಮುಖಾರ್ ಹಾಡ್ನ್ ಯೆತೆಲೆಂ ಫೆರಾರ್ ಫಿರ್ಗಜೆಚೆಂ ಬಾಯ್ ಪ್ರಿಯಾ ಸಿಕ್ವೇರಾ. ತುಮ್ಕಾಂಯ್ ಹಾಂತುಂ ತುಮ್ಚಿಂ ರಾಂದ್ಪಾಂ ಧಾಡುಂಕ್ ಆಸಾತ್ ತರ್ ತಿಂ ತುಮಿಂ priya@daaiz.com ವಿಳಾಸಾಕ್ ಧಾಡ್ಯೆತಾ. ವಿಂಚ್ಣಾರ್ ಬರ್ಪಾಂಕ್ ಎಕ್ಟಾಂವ್ನ್ ಎಕಾ ಬುಕಾರುಪಾರ್ ಪರ್ಗಟ್ ಕರ್ಚೆಂ ಯೋಜನ್ಯ್ ಆಸ್ತೆಲೆಂ.
ರಾಂದ್ಪಾವೋಳ್ - 5. ಚಿಕನ್ ಪೆಪ್ಪರ್ [ಕುಂಕಾಡ್ ಮಿರಿಂ] [- ಟ್ರೀಜಾ ಮಿನೇಜಸ್, ಲೊರೆಟ್ಟೊ]
ರಾಂದ್ಪಿಣೆಚಿ ಮಟ್ವ್ಯಾನ್ ವಳೊಕ್:ಲೊರೆಟ್ಟೊ
ಫಿರ್ಗಜೆಚಿ ಟ್ರೀಜಾ ಮಿನೇಜಸ್ ರಾಂದ್ಪಾಂತ್ ಭೋವ್ ಹುಶ್ಯಾರ್, ಮಂಗ್ಳುರ್ಚಾ ಕಪಿತಾನಿಯೊಂತ್ ಟೀಚೆರಿಚೆಂ ಕಾಮ್ ಕೆಲ್ಲ್ಯಾ ಹಿಕಾ ವಾಸ್ಚೆಂ, ಫುಲಾಂ ಝಡಾಂ ಲಾಂವ್ಚೆಂ ಹವ್ಯಾಸ್ಯೀ ಆಸಾ, ಫಕತ್ತ್ ರಾಂದ್ಪಾಂತ್ ಮಾತ್ರ್ ನ್ಹಯ್, ಲೊಣ್ಚಿಂ ಘಾಲ್ಚಾಂತ್, ಪೊಳಿ ಕರ್ಚಾಂತ್ಯ್ ಹಿ ಹೆಳ್ಲ್ಲಿ.
- ಪ್ರಿಯಾ ಸಿಕ್ವೇರಾ, ಫೆರಾರ್
ಟ್ರೀಜಾ ಮಿನೇಜಸ್, ಲೊರೆಟ್ಟೊ
ಗರ್ಜೆಚ್ಯೊ ವಸ್ತು:
1 ಕಿಲೊಭರ್ ಕುಂಕಾಡ್ - ಹಳ್ತಾಚೆ ಕುಡ್ಕೆ ಕರ್.
1/2 ಕಿಲೊಭರ್ ಪಿಯಾವಾಚೆ ಶಿಂದಾಪ್(ಚಡ್ ಬಾರಿಕ್ ಕರಿನಾಕಾ)
100 ಗ್ರಾಮ್ಭರ್ ಟೊಮೆಟ್ಯಾಚೆಂ ಶಿಂದಾಪ್
25 ಗ್ರಾಮ್ಭರ್ ಮಿರಿಯಾಂ ಪಿಟೊ
100 ಗ್ರಾಮ್ಭರ್ ತೂಪ್ ಯಾ ನಾರ್ಲಾಚೆಂ ತೇಲ್
20 ಗ್ರಾಮ್ಭರ್ ಹಳ್ದಿಚೊ ಪಿಟೊ
50 ಗ್ರಾಮ್ಭರ್ ಶಿರ್ಕೊ
50 ಗ್ರಾಮ್ಭರ್ ಲೊಸುಣ್-ದೋನ್ ಅರ್ಧಾಂ ಕರ್ನ್ ಶಿಂದ್
20 ಗ್ರಾಮ್ಭರ್ ಆಲೆಂ - ಬಾರಿಕ್ ಶಿಂದ್
ರುಚಿಕ್ ತೆಕಿದ್ ಮೀಟ್
ಕರ್ಚಿ ರೀತ್:
ಮಾಸ್ ಧುವ್ನ್ ತಾಕಾ ಶಿರ್ಕೊ, ಮೀಟ್ ಭರ್ಸುನ್ ಎಕಾ ಆಯ್ದಾನಾಂತ್ ಅರ್ಧೆಂ ವೋರ್ಭರ್ ದವರ್.
ತೊಪ್ಲ್ಯಾಂತ್ ತೇಲ್ ಯಾ ತೂಪ್ ತಾಪವ್ನ್ ಪಿಯಾವ್, ಮಿರಿಯಾಂಚೊ ಪಿಟೊ, ಹಳ್ದಿಚೊ ಪಿಟೊ, ಲೊಸುಣ್ಯೊ, ಆಲೆಂ ಘಾಲ್ನ್ ಪಿಯಾವ್ ತಾಂಬ್ಡೊ ಜಾತಾ ಮ್ಹಣಾಸರ್ ಬಾರಿಕ್ ಉಜ್ಯಾರ್ ಬಾಜ್. ಉಪ್ರಾಂತ್ ಖಾತರ್ಲೆಲೆ ಟೊಮೆಟೊ ಘಾಲ್ನ್ ಚಾಳ್. ಟೊಮೆಟ್ಯಾಚೊ ಬರೊ ಪೇಸ್ಟ್ ಜಾತಾ ಮ್ಹಣಾಸರ್ ಚಾಳ್ನ್ ರಾವ್. ಉಪ್ರಾಂತ್ ಮಾಸ್ ಘಾಲ್ನ್ ಬರೆಂ ಕರ್ನ್ ಉಕಡ್. ರುಚಿ ಪರ್ಮಾಣೆಂ ಮೀಟ್ ಘಾಲ್ನ್ ಭುಂಯ್ ದವರ್.
ಸುಚನ್: ಕನ್ಪಿರ್ ಬಾಜಿ ಬಾರಿಕ್ ಕುಡ್ಕೆ ಕರ್ನ್ ಘಾಲ್ಯೆತಾ. ಕುಂಕ್ಡಾ ಮಾಸಾ ಬದ್ಲಾಕ್ ದುಕ್ರಾ ಮಾಸ್ಯ್ ಘಾಲ್ಯೆತ್. ಪುಣ್ ಮಾಸ್ ಚಡ್ ಜೂನ್ ಆಸಲ್ಯಾರ್ ಪಯ್ಲೆಂ ತೆಂ ಹಳ್ತ್ ಉಕಡ್ಚೆಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
