ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜಾಯ್ತೊ ಲೋಕ್ ಮೊರೊಂಕ್ ತರ್ಯೀ ತಯಾರ್ ಪುಣ್ ಚಿಂತುಂಕ್ ನ್ಹಂಯ್ - ಬರ್ಟ್ರ್ಯಾಂಡ್ ರಸ್ಸಲ್’
ಆಯ್ಚಿ ಕೊಂಕ್ಣಿ ಆನಿ ಕೊಂಕ್ಣೆಂತ್ಲಿ ಬದ್ಲಾವಣ್
ವರಸ್ : 2007
ಅಂಕೊ : 39
ಮಯ್ನೊ : ಸಪ್ತೆಂಬರ್
ಸಂಪಾದಕೀಯ್ - 39.
ವಲ್ಲಿ ಕ್ವಾಡ್ರಸ್
ದಿಸಾನ್ ದೀಸ್ ಕಿತ್ಯಾಕ್, ಘಡ್ಯೆನ್ ಘಡಿ ಬದ್ಲೊನ್ ಯೆಂವ್ಚ್ಯಾ ಸಂಸಾರಾಂತ್ ಆಜ್ ಜಿಯೆವ್ನ್ ಆಸ್ಚ್ಯಾ ಮನ್ಶಾ ಕುಳಾಕ್ ಬದ್ಲಾವಣ್ ಕಾಂಯ್ ಅಥ್ವಿ ನ್ಹಂಯ್. ಹರ್ಯೆಕಾ ವರ್ಗಾಂತ್, ಹರ್ಯೆಕಾ ಪ್ರಕಾರಾಂತ್ ಸಂಸಾರ್ ಬದ್ಲೊನ್ ಆಸಾ, ಸಮಾಜ್ ಬದ್ಲೊನ್ ಆಸಾ, ದೇಸ್ ಬದ್ಲೊನ್ ಆಸಾ. ಹಾಕಾ ಮನಿಸ್ ಪ್ರಗತಿ ಮ್ಹಣೊಂದಿ, ತಾಂತ್ರಿಕತಾ ಮ್ಹಣೊಂದಿ ವಾ ವಿಗ್ಯಾನ್ ಮ್ಹಣೊಂದಿ, ಪುಣ್ ಬದ್ಲಾವಣ್ ಸ್ವಾಭಾವಿಕ್ ದೆಕುನ್ ಮನ್ಶ್ಯಾಚಿ ಚಿಂತ್ಪಾ ದಿಶಾ ಸಯ್ತ್ ಹಳ್ತಾರ್ ಬದ್ಲೊನ್ ಆಸಾ.
ಬದ್ಲಾವಣ್ ಸ್ವಾಭಾವಿಕ್!
ಆಮಿಂ ಯುಗಾಂದಿಂ ಮನಿಸ್ ಕಸೊ, ಖೈಂ ಜಿಯೆತಾಲೊ? ಕಿತೆಂ ಖಾತಾಲೊ? ಪಿಯೆತಾಲೊ? ಜಿಯೆತಾಲೊ? ಮ್ಹಳ್ಳೆಂ ಚಿಂತುಂಕ್ ವೆಚೆಂ ನಾಕಾ, ಪುಣ್ ಆಮ್ಚಾ ಕಾಳಾರ್, ಆಮ್ಚ್ಯಾ ಭುರ್ಗ್ಯಾಪಣಾಲ್ಯಾ ದಿಸಾಕ್ ಆನಿ ಆಜ್ ಜಾಲ್ಲ್ಯಾ ಬದ್ಲಾವಣೆಕ್ ಎಕೊಡಿ ನದರ್ ಮಾರ್ಲಿ ತರ್, ನಿಜಾಯ್ಕೀ ಜಾಲ್ಲಿ ಚಡ್ತಾವ್ ಬದ್ಲಾವಣ್ ಸಂತೊಸಾಚಿಚ್ ಮ್ಹಣೊಂಕ್ ಜಾಯ್ತೆ ಧಾಖ್ಲೆ ಆಸಾತ್.
ತ್ಯಾ ದಿಸಾಂನಿ ಗಾಂವಾಂತ್ ತಶೆಂ ಪರ್ಗಾಂವಾಂನಿ ಚಡ್ತಾವ್ ಲೋಕ್ ಎಕಾ ದಿಸಾಚ್ಯಾ ಜೊಡಿ ಖಾತಿರ್ ಕಸ್ಟ್ ಮಿನತ್ ಕಾಡ್ತಾಲೊ, ಸಂಪರ್ಕ್ ಮಾಧ್ಯಮಾಂ ತಿತ್ಲಿಂ ಬಳ್ವಂತ್ ನಾಸ್ಲಿಂ. ತಪ್ಪಾಲ್ ಸೊಡ್ಲ್ಯಾರ್ ಟೆಲಿಗ್ರಾಮ್ ಮಾತ್ರ್ ಸಾದ್ಯಾ ಲೊಕಾಕ್ ಫಾವೊ ಜಾತಾಲೆಂ. ಗಾಂವ್ಚಾ ಪೊಸ್ಟ್ ಆಫಿಸಾಂನಿ ಮಾತ್ರ್ ಟೆಲಿಫೊನಾಂಚಿ ಸೌಲತಾಯ್ ಆಸ್ತಾಲಿ. ಘರಾಂತ್ ದೀಸ್ಭರ್ ಕಾಮ್ ಆಸ್ತಾಲೆಂ, ಘರ್ಚೆಂ, ತೊಟಾಚೆಂ, ಆನಿ ತೋಟ್ ನಾತ್ಲ್ಲಿಂ ಹೆರಾಂಗೆರ್ ಕಾಮಾಕ್ ವೆತಾಲಿಂ.
ಭುರ್ಗಿಂ ಬಾಳಾಂ ಇಸ್ಕೊಲಾಕ್ ವಚೊಂ ಮಯ್ಲಾಂಗಟ್ಲೆ ಚಲೊನ್ ವೆತಾಲಿಂ, ಯೆತಾಲಿಂ. ರಜೆಚ್ಯಾ ದಿಸಾಂನಿ ಕಾಮಾಕ್ ವಚೊಂಕ್ ಆಸ್ತಾಲೆಂ. ಥೊಡ್ಯಾಂಕ್ ಹೆರಾಂಗೆರ್ ತರ್ ಥೊಡಿಂ ಆಪ್ಲ್ಯಾಚ್ ಘರ್ಚ್ಯಾ ತೊಟಾಂತ್, ಗಾದ್ಯಾಂನಿ ಕಾಮ್ ಕರುಂಕ್ ಪಡ್ತಾಲೆಂ. ರಾಂದ್ವಯ್ ಲಾಂವ್ಚಿ ಜಾವ್ಯೆತ್, ವೊಳಿ ಕಾಡ್ಚ್ಯೊ ಜಾವ್ಯೆತ್, ಗೊಟ್ಯಾಂತ್ಲೆಂ ಸಾರೆಂ ಕಾಡ್ಚೆಂ ಜಾವ್ಯೆತ್, ಮಾಡಾಂಕ್ ಮುಳಾಕ್ ಘಾಲ್ಚೆಂ ಜಾವ್ಯೆತ್, ಲಾಂಕುಡ್/ಆಡಾರಾಂ ಜಮಂವ್ಚೆಂ ಜಾವ್ಯೆತ್, ತಣ್ ಕಾಡ್ಚೆಂ ಜಾವ್ಯೆತ್, ಗುಡ್ಯಾವಯ್ಲೊ ಪಾಲೊ ಕಾಡ್ಚೊ ಜಾವ್ಯೆತ್, ಶ್ಹೆಣ್ ವಿಂಚುನ್ ಹಾಡ್ಚೆಂ ಜಾವ್ಯೆತ್ ವಾ ಹೆರ್ ರಿತಿಚಿಂ ಕಾಮಾಂ ಆಸ್ತಾಲಿಂ.
ದಿಸಾ ಸಾಂಜೆರ್ ಕುಟ್ಮಾಚಿಂ ಮಾಗ್ಣಿಂ, ಆಮೊರಿ ತೇರ್ಸ್, ಕಾಂತಾರಾಂ, ಬೆಸಾಂವಾಂ. ದಿಸಾಚೆಂ ವಾ ಹಫ್ತ್ಯಾಕ್ ಏಕ್ ಪಾವ್ಟಿಂ ತರ್ಯೀ ಮೀಸ್, ದೊತೊರ್ನ್. ವರ್ಸಾನ್ ವರಸ್ ತವಳ್ ತವಳ್ ಯೆಂವ್ಚಿಂ ವೆವೆಗ್ಳಿಂ ಫೆಸ್ತಾಂಚೊ ಸಂಭ್ರಮ್, ಜಾಂವ್ ಕುಟ್ಮಾಚಿಂ, ಜಾಂವ್ ಫಿರ್ಗಜೆಚಿಂ ಜಾಂವ್ ವಾರಾಡ್ಯಾಚಿಂ, ಜಾಂವ್ ಹೆರ್ ಫಿರ್ಗಜೆಚಿಂ ಫೆಸ್ತಾಂ.
ಘರಾಂನಿ ಸುಣಿಂ, ಮಾಜ್ರಾಂ, ಕುಂಕ್ಡಾಂ, ಗಾಯೊ, ಪಾಡೆ, ಥೊಡ್ಯಾಂಗೆರ್ ಬೊಕ್ರೆ, ದುಕೊರ್ ಪೊಸ್ತೆಲ್ಯಾಂಕ್ ಸಯ್ತ್ ಹಿಂ ಸರ್ವ್ ಜಾನ್ವಾರಾಂ ಅಪ್ಲ್ಯಾಚ್ ಕುಟ್ಮಾಚೊ ವಾಂಟೊ ಮ್ಹಳ್ಳೆಂ ಭಗಾಪ್.
ಆನಿ ತ್ಯಾ ದಿಸಾಚಿಂ ಖಾಣಾಂ, ಮುಟ್ಲಿಂ, ಸನ್ನಾಂ, ಪಾತೊಳ್ಯೊ, ಉಕಡ್ಲೆಲ್ಯೊ ಕಣ್ಗ್ಯೊ, ಬಿಕ್ಣಾಂ, ವೆವೆಗ್ಳ್ಯೊ ಪೊಳಿಯೊ. ಆಂಬಿಲ್ ಪೇಜ್ ಜೇಂವ್ಕ್ ನಾತ್ಲ್ಲ್ಯಾಂನಿ ನೀಸ್-ಪೇಜ್ ಪುಣಿಂ ಜೆವ್ಲ್ಯಾಸ್ತೆಲಿ. ಮಿಟಾಕ್ ಘಾಲ್ಲೊ ಆಂಬೊ, ವಾ ಲೊಣ್ಚೆಂ, ವಾ ಮೀಟ್ ಮಿರ್ಸಾಂಗ್ ಚಿಡ್ಡುನ್ ಜೆಂವ್ಚಿ ಸೊಭಾಯ್ ತರ್ಯೀ ಕಿತ್ಲಿ? ತೆಂಯ್ ತಿ ಪೇಜ್ ಮಾಲ್ತೆಂತ್ ಜೆವ್ಲ್ಯಾರ್, ತಾಚಿ ರೂಚ್ ವೆಗ್ಳಿಚ್ಚ್.
ಸೆಜ್ ಸಾಂಭಾರ್ ಎಕಾಮೆಕಾ ಆಧಾರ್ ದಿತಾಲೊ, ಘೆತಾಲೊ. ವಾಡ್ಯಾಚೊ ಎಕ್ವಟ್, ಫಿರ್ಗಜೆಚೊ ಎಕ್ವಟ್, ವಾರಾಡ್ಯಾಚೊ ಎಕ್ವಟ್... ತವಳ್ ಎಕಾಮೆಕಾ ಮನ್ಶಾ ಮೊಗಾನ್ ಜಿಯೆಂವ್ಕ್ ಸಭಾರ್ ಕಾರಣಾಂ ಆಸ್ಲಿಂ.
ಆಯ್ಚಾ ಕಾಳಾರ್ ಹ್ಯಾ ಬದ್ಲಾವಣೆಂತ್ ಮನ್ಶಾಪಣ್ ಲುಟ್ಲಾಂ, ಮನ್ಶಾಮೋಗ್ ಚಿಂವ್ಲಾ, ಮನ್ಶಾ ಮೌಲ್ಯಾಂ ಲುಂವ್ಲಾ. ಆಯ್ಚಾ ಕಾಳಾರ್ ಮನಿಸ್ ದುಡ್ವಾಕ್ ಮುಟಿಂತ್ ಧರ್ನ್ ಜಿಯೆತಾ, ತಾಕಾ ದುಡು ಆಸ್ಚಿ ಮಾತ್ರ್ ಖಂತ್ ಕೆಲ್ಯಾರ್ ಪುರೊ, ಬಾಕಿಚೆಂ ಸರ್ವ್ ದುಡ್ವಾನ್ ಮೊಲಾಕ್ ಘೆವ್ಯೆತಾ. ದುಡ್ವಾನ್ ಕುಂಕ್ಡಾಂ, ದುಕೊರ್, ಬೊಕ್ರೆ..... ಮೆಳ್ತಾತ್, ತೆಂಯೀ ಖಾತರ್ನ್, ಸುಟಿ ಕರ್ನ್ ದಿತಾತ್, ರಾಂದುನ್ ಸಯ್ತ್ ದಿತಾತ್. ಪೊಳಿ ಆತಾಂ ರುಚಾನಾ, ಪ್ಯಾಟಿಸಾಂ, ಪಿಜ್ಜಾ, ಸೊಸೆಜ್, ಹ್ಯಾಮ್ ಬರ್ಗರ್, ಕಬಾಬ್ ರೆಡಿಮೇಡ್ ಮೆಳ್ತಾನಾ ಹೆಂ ಕಿತ್ಯಾಕ್?
ಮನ್ಶ್ಯಾಕ್ ಆಜ್ ಸಕ್ಕಡ್ ಆಸಾ, ಟಿವಿ, ವಿಡಿಯೊ, ಇಂಟರ್ನೆಟ್, ಮೊಬಾಯ್ಲ್. ಹೊ ಡಿಜಿಟಲ್ ಸಂಸಾರ್. ದೆಕುನ್ ಮೊಬಾಯ್ಲಾಚೆರ್ ಉಲವ್ಯೆತಾ, ಪಳೆವ್ಯೆತಾ, ವಾ ಉಲಯಿಲ್ಲೆಂ ಪರತ್ ಪರತ್ ಆಯ್ಕೊವ್ಯೆತಾ.
ಆಜ್ ಭುರ್ಗ್ಯಾಂನಿ ಮಯ್ಲಾಂ ಚಲ್ಚಿ ಗರ್ಜ್ ನಾ, ತಾಂಕಾಂ ಘರಾಂ ಸಕ್ಲಾ ಥಾವ್ನ್ ಇಸ್ಕೊಲಾಕ್ ಪಾವಂವ್ಚ್ಯೊ ಗಾಡಿಯೊ ಆಸಾತ್. ಚಲ್ಚೆಂ ಸೊಡ್ಯಾಂ, ಆಯ್ಚಾ ಕಿತ್ಲೆಶ್ಯಾ ಭುರ್ಗ್ಯಾಂಕ್ ’ಮಯ್ಲ್’ ಖಂಚೆಂ? ’ಫರ್ಲಾಂಗ್’ ಖಂಚೆಂ ಮ್ಹಣ್ ಕಳಿತ್ ಆಸ್ಚೆಂ ನಾ. ಭಿಲ್ಕುಲ್ ಆಮ್ಚೆಪರಿಂ, ಆಮ್ಕಾಂ ಭುರ್ಗ್ಯಾಪಣಾರ್ ಕಶೆಂ ’ಆಡುಕೊ’, ’ಕೆವೊ’, ’ರುಕೊ’, ’ಬಾರ್ನಿ’ ಮ್ಹಳ್ಯಾರ್ ಕಳಿತ್ ಆಸ್ಲ್ಲೆಂ? ಚಡ್ ಮ್ಹಳ್ಯಾರ್ ’ಆಣೊ’ ಮ್ಹಳ್ಯಾರ್ ಆಮ್ಕಾಂ ಕಳಿತ್ ಆಸ್ಲೆಂ, ಕಿತ್ಯಾಕ್ ಮ್ಹಳ್ಯಾರ್ ಪಾಂಚ್ ಆಣ್ಯಾಕ್ ಏಕ್ ಐಸ್ ಕ್ಯಾಂಡಿ ಮೆಳ್ತಾಲಿ, ಆನಿ ಏಕ್ ಹಫ್ತೊಭರ್ ಖಳಾನಾಸ್ತಾಂ ಸದಾಂಚ್ಯಾ ಮಿಸಾಕ್ ಗೆಲ್ಯಾರ್ ಹಫ್ತ್ಯಾಕ್ ಮ್ಹಜೊ ಪಪ್ಪಾ ಮ್ಹಾಕಾ ಪಾಂಚ್ ಆಣ್ಯಾಚೆಂ ನಾಣೆಂ ದಿತಾಲೊ.
ಪುಣ್ ಆಜ್ ಮನಿಸ್, ವಾರಾಡೊ, ಫಿರ್ಗಜ್, ಸೆಜಾರ್ ಸೊಡ್ಯಾಂ, ಆಪ್ಲ್ಯಾಚ್ ಘರ್ಚಾ ಕುಟ್ಮಾದಾರಾಂಕ್ ಕಸ್ಟಾಂನಿ ವಳ್ಕಾತಾ. ಸಕ್ಕಡ್ ಯಾಂತ್ರಿಕ್ ದೆಕುನ್ ಆಮ್ಚ್ಯಾ ಕಿತ್ಲೆಶ್ಯಾಂಗೀ ಭುರ್ಗ್ಯಾಂಚಿಂ ಆವಯ್ ಬಾಪುಯ್ ಆಜ್ ಆಶ್ರ್ಯಾಂತ್ ಆಸಾತ್, ವರ್ಸಾಕ್ ಏಕ್ ಪಾವ್ಟಿಂ ಆವಯ್ಚಾ ದಿಸಾ ವಾ ಬಾಪಾಯ್ಚಾ ದಿಸಾ ತಾಂಚಿಂ ಭೆಟ್ ಕರುಂಕ್ ಥೊಡಿಂ ವೆತಾತ್, ಥೊಡ್ಯಾಂಕ್ ತಾಕಾಯ್ ಪುರ್ಸತ್ ನಾ. ಹಾಂ! ದುಡು ಆಸಾ! ದರಬಸ್ತ್ ದುಡು ಆಸಾ, ಪೊಸುಂಕ್, ತಶೆಂಚ್ ಲಾಸುಂಕ್, ದುಡು ಕುಸ್ತಾತಿತ್ಲೊ ಆಸಾ.
ಪುಣ್ ಹ್ಯಾ ದುಡ್ವಾನಿಮ್ತಿಂ ಮನಿಸ್ ಮನ್ಶಾಕ್ ವಳ್ಕಾನಾ, ಸಂಬಂಧ್ ಸಂಬಂಧಾಕ್ ವಳ್ಕಾನಾ, ಭಾವ್ ಭಾವಾಕ್ ವಳ್ಕಾನಾ, ಪೂತ್ ಬಾಪಾಯ್ಕ್ ವಳ್ಕಾನಾ. ಹರ್ಯೆಕ್ಲೊ ಸ್ವಾವಲಂಬಿ ಆನಿ ಕೊಣಾಕ್ಚ್ ಕೊಣ್ಚ್ ಪಡೊನ್ ವಚೊಂಕ್ ನಾ. ಸಯ್ರಿಂ ಧಯ್ರಿಂ ಕಿತ್ಯಾಕ್? ಇಷ್ಟ್ ಮಂತ್ರ್ ಕಿತ್ಯಾಕ್? ಆಜ್ ಕಾಲ್ ಈಷ್ಟ್ ಮಂತ್ರ್ ಮ್ಹಳ್ಯಾರ್ ಅಥ್ವೊಚ್ ಅರ್ಥ್ ಸೊಧುನ್ ಕಾಡ್ಲಾ, ಫಕತ್ತ್ ಕುಡಿಚಿ ಖುಶಾಲಾಯ್ ಮತಿಚಿ ವಿರಾರಾಯ್ ಪಯ್ಸ್ ಕರ್ಚೆಂ ಏಕ್ ಮಾಧ್ಯಮ್ ಕರ್ನ್ ಘೆತ್ಲಾಂ ಶಿವಾಯ್ ’ಭಾಂದ್’ ಮ್ಹಳ್ಳೊ ನಾ ಜಾಲಾ.
ಹ್ಯಾ ಪರಿಗತೆಂತ್ ಆಮ್ಚಿ ’ಕೊಂಕ್ಣಿ’ ಕಿತ್ತುನ್ ಪಾವ್ಲ್ಯಾ?
ಆಮ್ಚಾ ಕೊಂಕ್ಣೆಂತ್ ಆಜ್ ದಾಂಗ್ರೊ ಮಾರ್ಚೆಂ ಯಥೇಶ್ಟ್ ಮಾಪಾನ್ ಆಸಾ, ಡಜನ್ಗಟ್ಲೆ ಪತ್ರಾಂ ಆಸಾತ್, ಗಾಂವಾಂತ್ ತಶೆಂ ವಿದೇಶಾಂನಿ ಮೆಟಾಂ ಮೆಟಾಂಕ್ ಕೊಂಕ್ಣಿ ನಾಂವಾಚಿಂ ಸಂಚಾಲನಾಂ ಆಸಾತ್, ಇಂಟರ್ನೆಟ್ ಆಸಾ, ಆಮ್ಚೆಲಾಗಿಂ ಆತಾಂ ಇ-ಕಾದಂಬರಿ ಆಸಾತ್, ಇ-ಬೂಕ್ ಆಸಾತ್, ಇ-ಫಿಲ್ಮಾಂ ಆಸಾತ್, ಸಕ್ಕಡ್ ’ಇ’ ಜಾಲ್ಲ್ಯಾ ಹ್ಯಾ ದಿಸಾಂನಿ, ಹೊಕ್ಲೆಕ್ ನವ್ರೆ, ನವ್ರ್ಯಾಂಕ್ ಹೊಕ್ಲೊ ಸಯ್ತ್ ’ಇ’ ಥಾವ್ನ್ ಮೆಳ್ತಾತ್. ಹ್ಯಾ ’ಇ’ ವರ್ವಿಂ ಇ-ಮಿತ್ರಾಂ, ಇ-ಮಿತ್ರಿಣ್ಯೊ, ಇ-ಪಾರ್ಟಿ, ಇ-ಕ್ಲಬ್ಬಾಂ, ಇ-ಪಿಕ್ನಿಕಾಂ, ಚಾಟಿಂಗ್...... ಎಕಾ ಕೊನ್ಶ್ಯಾರ್ ಬೊಸೊನ್ ಅನ್ಯೇಕಾ ಕೊನ್ಶ್ಯಾರ್ ಆಸ್ಚಾಂಕ್ ಪಳೇವ್ಯೆತಾ, ಉಲವ್ಯೆತಾ. ದೆಕುನ್ ಘಡ್ಯೆನ್ ಸಂಬಂಧ್ (?) ಘಡ್ತಾತ್ ತಶೆಚ್ ಮೊಡ್ತಾತ್.
ಪುಣ್ ಹಕೀಗತೆಂತ್ ಅಮಿ ಅಜೂನ್ ಪೊಕೊಳ್ ಜಿಣಿ ಜಿಯೆವ್ನ್ ಆಸಾಂವ್, ಆಮ್ಚಿಂ ಚಾಲ್, ಆಮ್ಚೆ ಸಂಸ್ಕಾರ್, ಆಮ್ಚಿ ಸಂಸ್ಕೃತಿ, ಆಮ್ಚಿಂ ಆಚರಣಾಂ ಫಕತ್ತ್ ಧಾಖವ್ಣೆಚೊ (ಪೊಕೊಳ್) ಶಿವಾಯ್ ಆಮ್ಚಾ ಕಾಳ್ಜಾಂತ್ ಕೊಂಕ್ಣಿ ಭಿಲ್ಕುಲ್ ನಾ. ಆಜ್ ಕೊಂಕ್ಣಿ ಕೊಂಕ್ಣಿ ಮ್ಹಣ್ ರಾತ್ ದೀಸ್ ಭಜನ್ ಕರ್ತೆಲ್ಯಾಂಚಿಂ ಪೊಟಾಂ ರಿತಿಂ.
ಹೆಂ ವಿಪರ್ಯಾಸ್ ನ್ಹಂಯ್?
ಆಮ್ಚೆಲಾಗಿಂ ಅನಿಕೀ ಚ್ಯಾರ್ ಡಜನಾಂ ಪತ್ರಾಂ ಆಸೊಂಕ್ ಪುರೊ, ಆಸೊಂದಿತ್, ಪುಣ್ ಖರಿ ಗಜಾಲಿ ಕೀ - ವಾಚ್ಪಿ ನಾಂತ್. ಆಸ್ಚೆ ಕಶೆ? ಜೆದ್ನಾಂ ಹಿಂ ಪತ್ರಾಂ ಕೊಣಾ ಕೊಣಾಕ್ ಧುಂಪಂವ್ಕ್, ಕೊಣಾ ಕೊಣಾಕ್ ತಾಸುಂಕ್ ಧರ್ನ್ ಹೆಂಚ್ ’ಪತ್ರಿಕೋಧ್ಯಮ್’ ಮ್ಹಣ್ತಾನಾ?
ಆಮ್ಚೆಲಾಗಿಂ ಕೊಂಕ್ಣಿ ಸಂಚಾಲನಾಂ ಮೆಟಾಂ ಮೆಟಾಂಕ್ ಆಸ್ತಿತ್, ಪುಣ್ ಕೊಂಕ್ಣಿ ಸ್ಪಿರಿತ್/ಕೊಂಕ್ಣಿ ಎಕ್ವಟ್ ಮ್ಹಳ್ಳೊ ನಾ. ಎಕ್ವಟ್ ಆಸ್ಚೊ ತರ್ಯೀ ಕಸೊ? ಜೆದ್ನಾಂ ನೈತಿಕ್ ಮೌಲ್ಯಾಂಚಿ ವಳೊಕ್ ನಾಸ್ಚಿಂ ಅಸಲ್ಯಾ ಸಂಚಾಲನಾಂನಿ ಭರೊನ್ ಆಸ್ತಾನಾ?
ಆಮ್ಚೆಲಾಗಿಂ ಎಕ್, ದೋನ್, ತೀನ್, ಚ್ಯಾರ್ ವಾ ಡಜನ್ಗಟ್ಲೆ ಪ್ರಶಸ್ತಿ/ಪುರಸ್ಕಾರ್ ಆಸ್ಚೆ ’ಮಹಾನ್’ ವರ್ಗಾಕ್ ಸೆರ್ವಲ್ಲೆ (ಕೇಸ್ ಪಿಕ್ಲ್ಲೆ, ಕೇಸ್ ಝಡ್ಲ್ಲೆ) ಚ್ಯಾರ್, ಆಟ್ ಕಾತ್ತ್ಯಾಚ್ಯಾ ಪ್ರಾಯೆಚೆ ಸಾಹಿತಿ (ತಾಂತ್ಲೆ ಥೊಡೆ ಸ್ವಘೋಶಿತ್ ಸಾಹಿತಿ) ಆಸ್ತಿತ್, ತಾಂತ್ಲೆಂ ಥೊಡೆ ಅಜೂನ್ ಅಭಿಮಾನಿ ಪಂಗಡ್ ಭಾಂದ್ಚಾರ್, ವೆದಿ ಕಾರ್ಯಿಂ ಕರ್ಚಾಂತ್ ಆನಿ ಮಾನ್-ಸನ್ಮಾನಾಂತ್ ವೆಸ್ತ್ ಜಾಲ್ಯಾತ್ ಸೊಡ್ಲ್ಯಾರ್ ಕೊಂಕ್ಣೆಚೆಂ ತಾಂಕಾಂ ಕಿತೆಂಯ್ ಪಡೊನ್ ಗೆಲ್ಲೆಂ ನಾ, (ಪಡೊನ್ ವೆಚೆಂಯೀ ನಾ - ತೆಂ ಮಾತ್ರ್ ನಖ್ಖೆಂ ಸಾಂಗ್ತಾಂ). ಕಿತ್ಯಾಕ್ ಮ್ಹಳ್ಯಾರ್ ತಾಣಿಂ ಕೆಲ್ಲೆಂಚ್ ಕೊಂಕ್ಣಿ, ತಾಣಿಂ ಘಾಣಿಚಿ ಏಕ್ ಪುಸ್ಕಿ ಸೊಡ್ಲ್ಯಾರೀ ತಿ ’ಕೊಂಕ್ಣಿ ವಾಯ್’ - ವ್ಹಾ ವ್ಹಾ ಮ್ಹಣ್ ಹುಂಗ್ಚಿಂ ಆಸ್ತಾಸರ್?. ದೆಕುನ್ ಆಮ್ಚಾ ಕೊಂಕ್ಣೆಂತ್ ಪರತ್ ಪರತ್ ಕುಡ್ಕೆ, ಏಕ್ ಆಸ್ಚೆಂ ದೋನ್, ದೋನ್ ಆಸ್ಚೆಂ ಚ್ಯಾರ್, ಚ್ಯಾರ್ ಆಸ್ಚೆಂ ಶೆಂಭೊರಾಂನಿ ಚುರಾನ್ ಚೂರ್.
ಆನಿ ಹೆ ಚುರೆ ತೊಪ್ಚೆ ಕೊಂಕ್ಣಿ ವಾಟೆರ್ ನೆಣಾರ್ಪಣಾಚಿಂ ಪಾವ್ಲಾಂ ಝರಯ್ತೆಲ್ಯಾಂಕ್. ಪುಣ್ ಏಕ್ ಸಂಗತ್ ಸುಡಾಳ್ ಉತ್ರಾಂನಿ ಸಾಂಗ್ಚೆಂ ತರ್, ಚುರೆ ಕರ್ನ್ ಮಜಾ ಭಗ್ಚೆಚ್ ಆಮ್ಚಾ ಕೊಂಕ್ಣೆಂತ್ ಮಹಾನ್, ತಾಂಕಾಂಚ್ ವೆದಿಚೆರ್ ಮಾನ್ ಸಮ್ಮಾನ್, ತಸಲ್ಯಾಂಕ್ಚ್ಚ್ ಪ್ರಶಸ್ಥಿ/ಪುರಸ್ಕಾರ್. ದೆಕುನ್ ತಾಣಿಂ ಭಾಂದ್ಚೆ ದೊರೆ ಆನಿ ಕರ್ಚೆ ಚುರೆ. ಅಸಲೆ ಜೆದ್ನಾಂ ಕೊಂಕ್ಣಿ ರಾಜ್ವಟ್ಕಿ ಚಲಯ್ತಾನಾ ಸಾಂಗೊಂಕ್ ಉರ್ಲಾಂ ತರ್ಯೀ ಕಿತೆಂ?
ತರ್ಯೀ ಅಸಲೆಚ್ಚ್ ಕೊಂಕ್ಣಿ ಮ್ಹಣ್ ಖಾಲ್ತಿಮಾನ್ ಘಾಲ್ಚಾಂತ್ಲೊ ಹಾಂವ್ ತರ್ಯೀ ಭಿಲ್ಕುಲ್ ನ್ಹಂಯ್. ಇತ್ಲೆಂ ಸರ್ವ್ ಚಿಂತುಂಕ್ ಗೆಲ್ಯಾರ್ ಆಮ್ಚೆ ಮುಖಾರ್ ದಿಸ್ಚ್ಯೊ ವಾಟೊ ದೋನ್;
ಪಯ್ಲಿ; ಆಮಿ ಹೆರಾಂನಿ ಕೆಲ್ಲ್ಯಾ ವಾಟೆಂನಿ ಚಲ್ಯಾಂ?
ದುಸ್ರಿ; ಆಮಿ ವಾಟ್ ಕರುನ್ ದಿವ್ಯಾಂ?
ಪಯ್ಲಿ ಸಂಪಿ ಆನಿ ಸಾಸ್ಣಿಕ್ ಸುಖಾಕ್ ಪಾವಂವ್ಚಿ ತರ್ ದುಸ್ರಿ ಭೋವ್ ಕಶ್ಟಾಂಚಿ, ತುವೆ ವಾಟ್ ಕರ್ಚ್ಯಾ ಮಿಸಾಂವಾಂತ್ ತುಕಾ ಪರತ್ ಪರತ್ ಖಾಂಟೆ ಖುಂಟೆ ಗುಡ್ಡಾಂವ್ಕ್ ಮೆಳ್ತೆಲೆ, ತುಜೆರ್ ಹಾಸ್ತೆಲೆ, ಥುಕ್ತೆಲೆ, ತರ್ಯೀ ತಿ ವಾಟ್ ಹಟ್ ಧರುನ್ ಚಲೊಂಕ್ ಆಸಾ. ಹಾಂ! ಕಠೀಣ್ ಎಕ್ಸುರಾಯ್ ಆನಿ ನಿರಾಸ್ಪಣಿಂ. ಪುಣ್ ಕಿತ್ಲೊ ತೇಂಪ್ ಮ್ಹಳ್ಳೆಂ ಕಳಿತ್ ನಾಂ ತರ್ಯೀ ಕಿತ್ಯಾಕ್ಗೀ ಮ್ಹಾಕಾ ದುಸ್ರಿ ವಾಟ್ ಪಸಂದೆಚಿ.
ಆತಾಂ ಏಕ್ ಸವಾಲ್; ತುಕಾಯ್ ಹಿ ವಾಟ್ ಪಿಶಿ ಮ್ಹಣ್ ದಿಸ್ತಾ?
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
