ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾದಾಯ್ಜ್ - 16
ನಂದಿನಿ
ದೊರಿ
ನಾಂವ್: ಸ್ಟೆಲ್ಲಾ ಡಿ’ಕೋಸ್ತಾ
ಲಿಖ್ಣೆ ನಾಂವಾಂ: ನಂದಿನಿ.
ಜನನ್: 6 ಮಾಯ್ 1949.
ಜಲ್ಮಾಲ್ಲೊ ಗಾಂವ್: ಮಂಗ್ಳುರ್.
ಆವಯ್-ಬಾಪುಯ್: ದೆ|ಹೆಲೆನ್ ಪಿಂಟೊ ಆನಿ ದೆ|ತೋಮಸ್ ಪಾಯ್ಸ್.
ಪತಿ: ದೆ|ಚಾ.ಫ್ರಾ.ದೆ’ಕೋಸ್ತಾ.
ಧುವ್: ಸೋನಿಯಾ ದೆ’ಕೋಸ್ತಾ.
ವಳೊಕ್:
ಮಟ್ವ್ಯಾ
ಕಾಣ್ಯಾಂಚೆ ಬೂಕ್:
ಆಕಾಂತ್ (1987, ಪ್ರಗತಿ
ಪ್ರಕಾಶನ್)
ಮಟ್ವ್ಯೊ ಕಾಣ್ಯೊ: 50 ವಯ್ರ್ [ಥೊಡ್ಯೊ ಕಾಣ್ಯೊ ಇಂಗ್ಲಿಶ್ ಆನಿ ಕಾನಡಿ ಭಾಸಾಂಕ್ ಅನುವಾದ್ ಕೆಲ್ಯಾತ್], ಆಕಾಶ್ವಾಣಿಚೆರ್ ಕೊಂಕ್ಣಿ ಕಾರ್ಯಿಂ ದಿಲ್ಯಾಂತ್.
ಲೇಖನಾಂ: 50 ವಯ್ರ್
ವಿಶೇಸ್ ವಾವ್ರ್:
BA ಪಯ್ಲ್ಯಾ ಆನಿ ದುಸ್ರ್ಯಾ ವರ್ಸಾಂಚ್ಯಾ ಕೊಂಕ್ಣಿ ಕ್ಲಾಸಿಂಚಾ ಪಾಠ್ಯ್ಬೂಕ್ ’ಕೊಂಕಣಿ ಸಿರಿ’ ಸಂಪಾದನ್ ಕೆಲಾಂ.
’ಜಿವಿತ್’ ಪತ್ರಾಚ್ಯಾ ಸಂಪಾದಕೀಯ್ ಮಂಡಳಿಂತ್ ವಾವ್ರ್ ಕೆಲಾ.
ಚಾ.ಫ್ರಾ.ಚೆಂ ಸಾಹಿತ್ಯ್ ಎಕ್ಟಾಂವ್ನ್ ಆಯ್ಲೆವಾರ್ ’ಪಣ್ತೆಚಿ ಪೆಲಿ’ ಆನಿ ’ಉತರಾಂ ಚಾಂದ್ನೆಂ’ ಮ್ಹಳ್ಳೆ ದೋನ್ ಗೃಂಥ್ ಸಂಪಾದನ್ ಕರ್ನ್ ಪರ್ಗಟ್ಲಾಂ.
ಅನುವಾದ್: 20 ವಯ್ರ್
ಚಿಂತಾಪ್: ಕೊಂಕ್ಣಿ ಸಾಹಿತ್ಯಾಂತ್ ನಂದಿನಿಚಿ ಪ್ರತಿಭಾ ಚಾ.ಫ್ರಾ.ದೆ’ಕೋಸ್ತಾಚ್ಯಾ ಸಾಹಿತಿಕ್ ಉಜ್ವಾಡಾಮುಖಾರ್ ಪರ್ಜಳೊಂಕ್ ನಾ ತರ್ಯೀ ತಿಚೆಲಾಗಿಂ ಆಸ್ಚ್ಯಾ ಸಾಹಿತಿಕ್ ಪ್ರತಿಭೆಕ್ ವಳ್ಕಾಲ್ಲೆ ಥೊಡೆ ಆಸಾತ್. ದೊ|ವಿಲ್ಲಿ ಡಿ’ಸಿಲ್ವಾ ತಾಂತ್ಲೊ ಎಕ್ಲೊ. ನಂದಿನಿಚ್ಯೊ ಮಟ್ವ್ಯೊ ಕಾಣ್ಯೊ ವೆಗ್ಳ್ಯಾಚ್ ವರ್ಗಾಚ್ಯೊ ಆನಿ ಪ್ರಕಾರಾಚ್ಯೊ, ಚಡ್ತಾವ್ ಸಾಮಾಜಿಕ್ ಚಿಂತ್ಪಾಚ್ಯೊ ತರ್ಯೀ, ಕೊಂಕ್ಣೆಂತ್ಲ್ಯಾ ಸ್ತ್ರೀ ಲೇಖಿಕಾಂ ಪಯ್ಕಿ ಉಂಚ್ಲ್ಯಾ ಮಟ್ಟಾರ್ ದವರ್ಯೆತಾ ಜಾಲ್ಲ್ಯೊ. ಪಾಟ್ಲ್ಯಾ ಸಭಾರ್ ತೆಂಪಾ ಥಾವ್ನ್ ಕೊಂಕ್ಣಿ ವಾವ್ರ್ ಕರ್ನ್ ಆಸ್ಚ್ಯಾ ಹಿಣೆಂ ವಿಮರ್ಸೊ, ಕವಿತಾಂ, ಲೇಖನಾಂ, ಕಾಣ್ಯೊ - ಅಶೆಂ ಸಭಾರ್ ಪ್ರಕಾರಾಚೆಂ ಸಾಹಿತ್ಯ್ ಹಿಣೆಂ ರಚ್ಲಾಂ ತರ್ಯೀ ಮ್ಹಾಕಾ ಹಿ ಏಕ್ ಕಾಣ್ಯೆಗಾರ್ನ್ ಮ್ಹಳ್ಳೆಪರಿಂ ಭಗ್ತಾ.
- ವಲ್ಲಿ ಕ್ವಾಡ್ರಸ್
ಕಥಾದಾಯ್ಜ್ - 16. ದೊರಿ
ರಾತಿಚಾ ಸಾಡೆನೊವಾ೦ಕ್ ದೊರಿ ಹಾಡುಂಕ್ ಭಾಯ್ರ್ ಸರ್ಲ್ಲೊ ಜೊಕಿ
ಬರೊಚ್ಚ್ ಹುನ್ ಜಾಲ್ಲೊ. ಯೇರೆ ಮ್ಹಜಾ ಸಾ೦ಗಾತಾ.”ಮ್ಹಳ್ಳ್ಯಾ ತಕ್ಷಣ್ ಕಿತ್ಯಾಕ್? ಖ೦ಯ್? ಮ್ಹಣ್ ವಿಚಾರಿನಾಸ್ತಾನಾ ಧಾವೊನ್ ಆಯಿಲ್ಲೊ ತಾಚೊ ಇಶ್ಟ್ ಆತಾ೦ ಹಾಚಾ ಸಾ೦ಗಾತಾ ಕಿತ್ಯಾಕ್ ತರಿ ಆಯ್ಲೊ೦ ಮ್ಹಣ್ ತಕ್ಲಿ ಖೊರ್ಪಿತಾಲೊ.
"ವ್ಹಯ್ರೆ, ಜೊಕಿ ಖ೦ಯ್ ವೆತಾಯ್ ತೆ೦ ಪುಣಿ ಸಾ೦ಗ್ರೆ!"”ಮ್ಹಣಾಲೊ ಕ೦ಗಾಲ್ ಜಾವ್ನ್.
"ವೆತಾ೦ವ್ ದೊರಿ ಕಾಣ್ಘೆ೦ವ್ಕ್!" ಜೊಕಿ ಮ್ಹಣಾಲೊ.
"ದೊರಿ! ಕಹಲಿ ದೊರಿ?"”ರೊನಿನ್ ವಿಚಾರ್ಲೆ೦.
ಮ್ಹಜೆ೦ ಮೊಡೆ೦ ಬಾ೦ದ್ಚಿ ದೊರಿ !”
ಮೊಡೆ೦ ಕಿತ್ಯಾಕ್ ಬಾಂದ್ಚೆಂರೆ?
“ತುಂ ತಿಕೆ ತೊಂಡ್ ಧಾಂಪುನ್ ಯೇರೆ
ಜಾಲೆಂ, ರೊನಿನ್ ತೋಂಡ್ ಧಾಂಪ್ಲೆಂ. ಪುಣ್ ಚಿಂತ್ನಾಂಚಿ ಸರ್ವಯ್ ದಾರಾಂ ಉಗ್ತಿಂ ಕೆಲಿಂ. ಹಾಕಾ ಕಿತ್ಯಾಕ್ ದೊರಿ? ಹೊ ಕಾಂಯ್ ಜೀವ್ಘಾತ್ ಕರ್ಚೊ ಪೂತ್ ನ್ಹಂಯ್. ಹಾಚೆ ಸಾಂಗಾತಾ ದೀಸ್ಕಾಡ್ತೆಲ್ಯಾಂನಿಂಚ್ ವಿರಾರ್ ಜಾವ್ನ್ ಜೀವ್ಘಾತ್ ಕರಿಜೆ, ತಸಲೊ ಅಟಂಬಾಂಬ್ ಹೊ! ಹ್ಯಾ ರಾತಿಂ ದೊರಿ ಕಿತ್ಯಾಕ್? ಜೊಕಿ ಹೆಣೆಂ ತೆಣೆಂ ಪಳಯ್ನಾಸ್ತಾನಾ ರೊನಿ ಆಪ್ಣಾ ಸಾಂಗಾತಾ ಖಂಡಿತ್ ಆಸಾ ಮ್ಹಣ್ ಚಿಂತುನ್ ಘೊಡ್ಯಾ ಬರಿ ಚಲ್ತಾಲೊ. ಆಪ್ಣೆಂ ಸಾಂಗ್ಲ್ಲ್ಯಾಕ್ ದುಸ್ರೆಂ ಉಲಂವ್ಚೊ ನ್ಹಂಯ್ ತಾಚೊ ಇಷ್ಟ್. ಉಲಯ್ತ್ ತರ್ ಸಾಡೆತೀನ್ ಕುಡ್ಕೆ ಕರುಂಕ್ ಆಸಾ. ಹಿಂ ಮ್ಹಳ್ಯಾರ್ ಘರ್ಚಿಂ ಸಗ್ಳೊ ದೀಸ್ ಮೆಲ್ಲಿಂ. ಆತಾಂ ರಾತಿಕ್ ಉದಕ್ ಭರುಂಕ್ ಭಾಯ್ರ್ ಸರ್ಲ್ಯಾಂತ್. ಆಜ್ಚ್ ಪಂಪ್ ಪಾಡ್ ಜಾಯ್ಜೆಗಿ? ಕೊಳ್ಸೊ ದೆವವ್ನ್ ಉದಕ್ ವೋಯ್ರ್ ವೊಡ್ತಾನಾ ದೊರಿ ತುಟಾಜೆಗಿ? ಥೂ! ಭಾಸ್ ನಾತ್ಲ್ಲಿ ಜಾತ್!
ಎಕೆಕ್ಲ್ಯಾಕ್ಚ್ ಧರ್ನ್ ಖಾಲಿ ಕಾರ್ ತೇಲ್ ಘಾಲ್ನಾಸ್ತಾನಾ ಭಾಜುನ್ ಕಾಡಿಜೆ.
ತಾಚಾ ಪಾಟ್ಲ್ಯಾನ್ ಧಾವೊನ್ ಮ್ಹಣ್ಚೆಬರಿ ಯೆಂವ್ಚಾ ರೊನಿಕ್ ಜಿಣಿಯೆಂತ್ ಪಯ್ಲೆ ಪಾವ್ಟಿ ತಾಚಾ ಇಷ್ಟಾಚೊ ರಾಗ್ ಆಯ್ಲೊ. “ಥೂ!ಪಾಡಾರಿ ಪಾಡೊ ಖಂಯ್ಚೊ! ಇಷ್ಟ್ ಮ್ಹಣ್ ಇಲ್ಲಿ ಮರ್ಯಾದ್, ಇಲ್ಲೊ ಮೋಗ್ ಹಾಚಾ ಕಾಳ್ಜಾಂತ್ ಆಸ್ತೊ? ಪೆಟ್ಯಾಕ್ ಆಪಯಿಲ್ಲೆಬರಿ ಆಪಯ್ತಾ. ಮ್ಹಾಕಾ ದೀಜೆ ಸಾತ್ ಫಾಂಟ್ಯಾಂಚಾ ಆಡಾರಾನ್! ಹ್ಯಾ ಸೈತಾನಾಕ್ ಅಶೆಂಚ್ ಸೊಡ್ಲ್ಯಾರ್ ಶಿಂಗಾ ಫುಟೊಂಕ್ ಆಸಾತ್ ಆನಿ ಮಾಗಿರ್ ತಾಂಕಾ ಫಾಂಟೆ.....ಹಾಕಾ ಬೂದ್ ಶಿಕಯ್ಜೆ, ನಾ ತರ್ ಹಾಂವ್ ಹಾಚೊ ಇಷ್ಟ್ ಜಾವ್ನ್ ಫಾಯ್ದೊ ನಾ. ಚಿಂತ್ಲೆಂ ರೊನಿನ್ ಆಪ್ಲ್ಯಾ ಮತಿಂತ್.
ಜೊಕಿ ಆಂಗ್ಡಿ ಮುಕಾರ್ ರಾವ್ಲೊ; ಬಾಂಯ್ಚಿ ದೊರಿ ಕಾಣ್ಘೆಲಿ, ಪಯ್ಶೆ ಯೆಟ್ಲೆ. ಉಪ್ರಾಂತ್ ದೊರಿ ರೊನಿಚಾ ಹರ್ಧ್ಯಾರ್ ಧಾಡವ್ನ್ “ಕಾಣ್ಘೆರೆ! ಮ್ಹಣ್ ಗುಲಾಮಾಕ್ ಫರ್ಮಾಯಿಲ್ಲ್ಯಾ ಬರಿ ಫರ್ಮಾವ್ನ್ ಹರ್ಧೆಂ ಆನಿ ಹರ್ಧ್ಯಾಚಾಕಿ ಪೋಟ್ ಮುಕಾರ್ ಕರ್ನ್ ಹಾತ್ ಪಾಯ್ ಕಾಡ್ನ್ ಉಡಯಿತ್ ಚಲಾಲಾಗ್ಲೊ. ರೊನಿಕ್ ಆತಾಂ ಸತ್ತ್ ಪೀಂತ್ ಕದ್ವಳ್ಳೆಂ.
“ವ್ಹಯ್ರೆ ಜೊಕಿ , ಮ್ಹಣಾಲೊ ತಿಕ್ಸಾಣೆನ್. “ಹಾಂವ್ ತುಜೊ ಇಷ್ಟ್ರೆ ಗುಲಾಮ್?
“ದೊನೀ.
ದೊನೀ ತುಜೊ ಬಾಬ್ರೆ ರೊನಿ ಖೆಂವ್ಚೆಲೊ.
“ತುಜೊ ಬಾಬ್, ತುಜಾ ಬಾಬಾಚೊ ಬಾಬ್, ತುಜಾ ಆಜಾಚೊ ಬಾಬ್, ತುಜಾ ಪೊಣ್ಜಾಚೊ ಬಾಬ್ ಜೊಕಿನ್ ಜಾಪ್ ದಿಲಿ.
“ದೊನೀ ತುಜೆಂ ಸಗ್ಳೆಂ ಸಂತಾನ್ ಕುಟಾಮ್ರೆ ರೊನಿ ಆಪ್ಣಾಕ್ ರಾಗ್ ಆಯ್ಲಾ ಮ್ಹಣ್ ದಾಕಂವ್ಚೆ ಪ್ರೇತನ್ ಕರೀತ್ ಮ್ಹಣಾಲೊ.
“ಹ್ಹಿ.....ಹ್ಹಿ..ಹ್ಹಿ..ಕಿತ್ಲೊ ಹುಶಾರ್ ಆಸಾಯ್ರೆ ಭಾಂಗಾರಾ, ದೊರಿ ಸಮಾ ಧರ್ರೆ. ಜೊಕಿ ಕಿಡ್ಕಿಡ್ಲೊ
“ತುಜಿ ದೊರಿ ತುಜಾ ತಕ್ಲೆಕ್ ಧಾಡಯ್..ಹಾಂವ್ ವ್ಹಾವಯ್ನಾಂ
“ಪರ್ದೆಶ್ಯಾ, ದೊರಿ ಕಾಣ್ಘೆನಾಂಯ್ ಜಾಲ್ಯಾರ್ ಕಿತೆಂ ಕರ್ತಾಂ ಪಳೆ..
“ಕಿತೆಂ ಕರ್ತಾಯ್?
“ಕೆಲ್ಯಾ ಮಾಗಿರ್ ಕಳ್ತೆಲೆಂ.
ರೊನಿ ಆತಾಂ ತಿಕೆ ಭಿಯೆಲೊ. ಮಾಟ್ ಪಡ್ಲ್ಲೊ ಕಿತೆಂಯೀ ಕರಿತ್ ಮ್ಹಣ್ಚಾಕ್ ದುಬಾವ್ ನಾ. ಆನಿ ಕಿತೆಂ ಕರಿತ್ ಮ್ಹಣ್ ಚಿಂತುಂಕ್ ರೊನಿಕ್ ಜಾಲೆಂಚ್ ನಾ. ಹ್ಯಾ ಕಂಗಾಲ್ ಪರಿಸ್ಥಿತೆಂತ್ ಜೊಕಿಕ್ ಬೂದ್ ಶಿಕಯ್ಜೆ ನಾ ತರ್ ಆಪುಣ್ ಜಲ್ಮೊನ್ ಪ್ರಯೋಜನ್ ನಾ ಮ್ಹಳ್ಳೆಂ ಚಿಂತಾಪ್ ಘಟ್ ಜಾಲೆಂ.
ಚಿಂತಾ ಚಿಂತಾ ಆಪುಣ್ ಜೊಕಿ ತಸಲ್ಯಾ ಹರಾಮಿ ಪಾಡ್ಯಾಕ್ ಬೂದ್ ಶಿಕಂವ್ಕ್ಚ್ ಜಲ್ಮೊನ್ ಆಯ್ಲಾಂ ಮ್ಹಳ್ಳೆಂ ಸತ್ ತಾಚೆ ಥಂಯ್ ಖಂಡಿತ್ ಜಾಲೆಂ.
ದೊಗೀ ಶೆಜಾರಿ. ರಾಜ್ ರಸ್ತ್ಯಾರ್ ಥಾವ್ನ್ ದಾವ್ಯಾಕ್ ಘುಂವ್ಚಾ ಮಾರ್ಗಾರ್ ಪಂದ್ರಾಂ ಮಿನುಟಾಂ ಚಲ್ಲ್ಯಾರ್ ತಾಂಚಿಂ ಘರಾಂ. ಉಜ್ವ್ಯಾಕ್ ಗೂಂಡ್ ಬಾಂಯ್. ತ್ಯಾ ಬಾಂಯ್ ಲಾಗಿಂ ಪಾವ್ತಾನಾ ರೊನಿಕ್ ಏಕ್ ಉಪಾಯ್ ಝಳ್ಕಾಲೊ.
“ಜೊಕಿ, ಮ್ಹಾಕಾ ತುಜಿ ಇಜಾ ಸೊಸುಂಕ್ ತಾಂಕಾನಾ ರೆ, ತುಂ ಅಶೆಂಚ್ ಕರ್ಶಿ ಜಾಲ್ಯಾರ್ ಹಾಂವ್ ಜೀವ್ ದಿತಾಂ, ಮೊರ್ತಾಂ ಮ್ಹಣಾಲೊ.
“ವ್ಹಾಹ್! ಮೊರ್ರೆ , ಬರೆಂ ಗುಡ್ಡಾವ್ನ್ ಪುರ್ತಾಂ ತುಕಾ ಮ್ಹಣಾಲೊ ಜೊಕಿ.
ಇಶ್ಶೀ..! ಕಸಲೊ ಮನಿಸ್! ರೊನಿಕ್ ಕಾಳ್ಜಾಚೆ ಗುಂಡಾಯೆ ಥಾವ್ನ್ ಜೊಕಿಚೊ ಕಾಂಠಾಳೊ ಆಯ್ಲೊ. ತಾಚೆ ಪಾಟಾಪಾಟ್ ದೂಕ್ ಆಯ್ಲೆಂ ಆನಿ ತಾಚೆ ಪಾಟಾಪಾಟ್ ಖತ್ಕತೊ ರಾಗ್ ಆಯ್ಲೊ.
“ಖಂಡಿತ್ಗಿ? ತಾಣೆಂ ವಿಚಾರ್ಲೆಂ.
“ವ್ಹಯ್ ರೆ. ಖಂಡಿತ್. ಗುಡ್ಡಾವ್ನ್ ಪುರ್ತಾಂ
“ಪಳೆ, ಬಾಂಯ್ ಹಾಂಗಾಚ್ ಆಸಾ. ಉಡ್ತಾಂ.. ಮೊರ್ತಾಂ.
“ಊಡ್ರೆ, ಮೊರ್ರೆ. ತಾಕಾ ಪುರಾ ಧೈರ್ ಜಾಯ್ರೆ ಪುತಾ. ತುಜಾ ಹರ್ಧ್ಯಾಚಾ ಗುಡಾಂತ್ ಕಾಳಿಜ್ ಆಸಾಯೆರೆ?
ಇತ್ಲ್ಯಾರ್ ರೊನಿಚೆಂ ಸಯ್ರಾಣ್ ಚುಕ್ಲೆಂ. ದೊರಿ ಜೊಕಿಚಾ ಮುಸ್ಕಾರಾಕ್ ಧಾಡಾವ್ನ್, ಧಾವೊನ್ ವಚೊನ್ ಬಾಂಯ್ತ್ ಉಡ್ಲೊಚ್. ದೊರಿ ಪಾಯಾಂಕಡೆನ್ ಆಪ್ಟಾತಾನಾ ರೊನಿ ಉದ್ಕಾಕ್ ಆಪ್ಟಾಲ್ಲೊ ಆವಾಜ್ ತಾಚಾ ಕಾನಾಂಕ್ ಮಾರ್ಲೊ. ತೊ ರಾವ್ಲ್ಲೆ ಕಡೆಚ್ ರೂಕ್ ಜಾಲೊ. ಆಂಗ್ ಥಂಡ್ ಜಾಲೆಂ. ಕಪಾಲಾರ್ ಶೆಳೊ ಘಾಮ್ ಸುಟ್ಲೊ. ಪುಣ್ ಘಡಿಯೆನ್ ಸನಿನ್ ಜಾವ್ನ್ ಮಾರ್ಗಾಚಾ ಉಜ್ವ್ಯಾ ಪೊಂತಾಕ್ ಧಾವ್ಲೊ. ಕಾಟೆಂ ನಾತ್ಲ್ಲಿ ಬಾಂಯ್, ಲಾಗ್ಸಾರ್ ಸರ್ಕಾರಾಚೆ ದಿವೆ ನಾತ್ಲ್ಲ್ಯಾನ್ ಬಾಂಯ್ತ್ ಕಿತೆಂಚ್ ದಿಸ್ಲೆಂನಾ. ರೊನಿಕ್ ಇತ್ಲೆಂ ಧೈರ್ ಖಂಯ್ ಥಾವ್ನ್ ಆಯ್ಲೆಂ? ಬಾಂಯ್ ಸೊಡ್, ಭಾಣಾಂತ್ ತಕ್ಲಿ ರಿಗಂವ್ಕ್ ಭಿಯೆಂವ್ಚೊ ಪೂತ್! ನೀಜ್ ಜಾವ್ನ್ ಬಾಂಯ್ತ್ ಉಡ್ಲೊಗಿ? ನ್ಹಂಯ್ ಹಾಂವ್ ಜೀವ್ ಆಸ್ತಾನಾ ಹಾಕಾ ಕಿತ್ಯಾಕ್ ಬಾಂಯ್ತ್ ಉಡ್ಚಿ ಗತ್ ಆಯ್ಲಿ? ಖಂಯ್ಚೊ ಮತ್ ನಾತ್ಲ್ಲೊ ಮ್ಹಾಕಾ ಸರ್ಪಿತ್ ಜಾಲೊ ದೆವಾ? ತಾಣೆಂ ಹೆಣೆಂ ತೆಣೆಂ ಪಳಯ್ಲೆಂ. ಕೊಣಿ ನಾ. ಬಾಂಯ್ತ್ ತಿಳ್ಳೆಂ.
ಕಸಲೊಗಿ ಆವಾಜ್ ಆಯ್ಕಾಲೊ. ಜೊಕಿ ಉಡೊನ್ ಪಡೊನ್ ಘರಾ ಧಾವ್ಲೊ.“ವ್ಹಯ್ಗೆ ಮಾಂಯ್,....ರೊನಿ.... ಮ್ಹಣ್ತಾನಾ ತಾಚಿ ಮಾಂಯ್ ತಾಚ್ಯಾಕಿ ವ್ಹಡಾ ತಾಳ್ಯಾನ್ ಬೊಬಾಟ್ಲಿ. “ದೊರಿ ಖಂಯ್ ಆಸಾರೆ? ಆಜ್ ಕಿತೆಂ ನ್ಹಾಂವ್ಚೆಂ ನಾಕಾರೆ ಜೆಂವ್ಚೆಂ ನಾಕಾರೆ, ರೊನಿ ಖಂಯ್ ತೊ ರೊನಿ...
“ಮ್ಹಜೆಂ ಇಲ್ಲೆಂ ಆಯ್ಕ್ಗೆ ಮಾಂಯ್. ರೊನಿ ತ್ಯಾ ಕಾಟೆಂ ನಾತ್ಲ್ಲ್ಯಾ ಬಾಂಯ್ತ್ ಪಡ್ಲೊಗೆ
“ವ್ಹಯ್ರೆ, ತುಕಾ ಹಾಂವೆಂ ದೊರಿ ಹಾಡುಂಕ್ ಧಾಡ್ಲ್ಲೆಂರೆ, ರೊನಿಕಡೆ ಮೇಳ್ ಘಾಲುಂಕ್ ಧಾಡ್ಲ್ಲೆಂ? ಹರ್ಏಕ್ ಕಾಮ್ ಹಾವೆಂಚ್ ಕರ್ನ್ ಮೊರಾಜೆ, ಗೊಲಿಯಾತಾಬರಿ ವಾಡ್ಲಾಯ್, ಅನಿಕೀ ತ್ಯಾ ರೊನಿ ಸಾಂಗಾತಾ ಖೆಳ್ತಾಯ್?
“ತಶೆಂ ನ್ಹಯ್ಗೆ ಮಾಂಯ್...ರೊನಿ ಬಾಂಯ್ತ್ ಪಡ್ಲೊಗೆ
“ಮಾಗಿರ್ ತುಂ ಕಿತ್ಯಾಕ್ ಹಾಂಗಾ ಆಸಾಯ್ರೆ? ತುಕಾ ದೊರಿ ಹಾಡುಂಕ್ ಜಾಯ್ನಾತ್ಲ್ಲ್ಯಾಕ್ ಘರ್ ಕಿತ್ಯಾಕ್ರೆ? ರೊನಿ ಸಾಂಗಾತಾ ಬಾಂಯ್ತ್ ಪಡ್..
“ವೊ..ದೆವಾ! ತುಕಾ ಹ್ಯಾ ಜಲ್ಮಾಂತ್ ಬೂದ್ ಯೆನಾಂಗೆ, ತುಂ ಹಾಂವ್ ಮೊರ್ತಾಂ ಮ್ಹಣಾಸರ್ ಸುಧಾರ್ನಾಂಯ್ಗೆ. ತುಮಿ ಸಕ್ಕಡ್ ಬಾಂಯ್ತ್ ಉಡೊನ್ ಉದಕ್ ಕಾಡ್ನ್ ಹಾಡಾಗೆ.....ಹಾಂವ್ ಗೆಲೊಂ.. ಮ್ಹಣೊನ್ ರೊನಿಚಾ ಘರಾ ಧಾವ್ಲೊ.
“ಆಂಟಿ ಆಂಟಿ" ಮ್ಹಣೊನ್ ಮುರ್ಯೊ ದೀತ್ತ್ ಹಿತಾಲ್ ರಿಗ್ತಾನಾ ರೊನಿಚಿ ಆವಯ್ ಭಾಯ್ರ್ ಧಾಂವೊನ್ ಆಯ್ಲಿ.
“ಕಿತೆಂರೆ ಬಾಂಗ್ ದಿತಾಯ್? ರೊನಿ ಖಂಯ್ ಆಸಾರೆ?"
“ರೊನಿ.....ರೊನಿ. ಜೊಕಿ ಖರ್ಶೆತ್ತ್ ಮ್ಹಣಾಲೊ, “ವ್ಹಯ್ಲ್ಯಾ ಕಾಟೆಂ ನಾತ್ಲ್ಲ್ಯಾ ಬಾಂಯ್ತ್ ಪಡ್ಲೊ!"
“ಕಿತೆಂ? ಬಾಂಯ್ತ್ ಪಡ್ಲೊ? ಕಸೊ ಪಡ್ಲೊ? ತೊ ಕಿತೆಂ ನಾರ್ಲ್ರೆ ಪಡೊಂಕ್? ಬಾಂಯ್ ಉಜ್ವ್ಯಾ ಕುಶಿಕ್ ಆಸಾ. ತುಮ್ಕಾಂ ದಾವ್ಯಾಕ್ ಚಲೊನ್ ಯೆಂವ್ಚೆಂ ಕಾಮ್... ಉಜ್ವ್ಯಾಕ್ ಕಿತ್ಯಾಕ್ ಮೊರೊಂಕ್ ಗೆಲ್ಲ್ಯಾತ್?"
“ಆಮಿ ವಚೊಂಕ್ನಾಂ ಗೆ, ತೊ ಮ್ಹಜೆಕಡೆನ್ ಲಡಾಯ್ ಕರ್ನ್ ರಾಗಾನ್ ಧಾಂವೊನ್ ವಚೊನ್ ಬಾಂಯ್ತ್ ಉಡ್ಲೊ.."
“ಕಿತೆಂ ಮ್ಹಳೆಂಯ್ರೆ ಫಟ್ಟಿಂಗಾ? ರೊನಿನ್ ಲಡಾಯ್ ಕೆಲಿ! ರೊನಿಕ್ ರಾಗ್ ಆಯ್ಲೊ? ರೊನಿ ವಚೊನ್ ಬಾಂಯ್ತ್ ಉಡ್ಲೊ! ತುಮಿ 25 ವರ್ಸಾಂ 9 ಮಹಿನೆ ಥಾವ್ನ್ ಎಕಾಮೆಕಾಕ್ ವಳ್ಕಾತಾತ್. ಆಜ್ ಮ್ಹಣಾಸರ್ ಏಕ್ ಪಾವ್ಟಿ ಪುಣಿ ರೊನಿನ್ ತುಜೆ ಕಡೆನ್ ಲಡಾಯ್ ಕೆಲ್ಯಾರೆ? ರೊನಿಕ್ ರಾಗ್ ಆಯ್ಲಾ! ರೊನಿ ಬಾಂಯ್ತ್ ಉಡ್ಲಾ! ವ್ಹಯ್ರೆ ಮಾಂಕ್ಡಾ, ತುಜಾ ಜಲ್ಮಾಂತ್ ತುಕಾ ಹಾಂವ್ ಮ್ಹಾಕಾ ಸತೊಂವ್ಕ್ ಸೊಡ್ಚಿಂನಾ ಕಳ್ಳೆಂಮೂ? ನಿಕಾಳ್ ಚೊರಾ..! ಅಶೆಂ ಮ್ಹಣಾತ್ ತಿಣೆಂ ಬಾಗಿಲ್ ಧಾಡಾವ್ನ್ ಮ್ಹಳ್ಳೆಬರಿ ಧಾಂಪ್ಲೆಂ.
ಜೊಕಿ ನಿಜಾಕಿ ತಾಚಾ ಜಿಣ್ಯೆಂತ್ ಪಯ್ಲೆ ಪಾವ್ಟಿ ಕಂಗಾಲ್ ಜಾಲೊ. ನ್ಹಯ್ ಎಕಾ ಮನ್ಶಾಕ್, ಜಲ್ಮ್ ದಿಲ್ಲೆ ಆವಯ್ಕ್ ಧರ್ನ್ ಎಕಾ ಮನ್ಶಾಕ್ ಪುಣಿ ರೊನಿಚೊ ಮೋಗ್ ಆಸ್ತೊ? ಮ್ಹಾಕಾ ಎಕ್ಲ್ಯಾಕ್ ಮಾತ್ರ್ ರೊನಿಚೊ ಖರೊ ಮೋಗ್, ನೀಜ್, ನಿತಳ್, ಅಪುಟ್ಟ್ ಮೋಗ್ ಆಸ್ಚೊ! ತ್ಯಾ ಭೆಂಕ್ರ್ಯಾಕ್ ಇತ್ಲೆಂಯ್ ಕಳೊಂಕ್ ನಾ ನ್ಹಯ್ಗಿ? ವಚೊನ್ ವಚೊನ್ ಬಾಂಯ್ತ್ ಉಡ್ಲೊಮೂ? ಪಾತ್ಕಿ ಖಂಯ್ಚೊ!
ತಶೆಂ ಮ್ಹಣೊನ್ ರಡೊನ್ ರಾಂವ್ಚೊ ಪೂತ್ ನ್ಹಯ್ ಜೊಕಿ.... ಚಾರ್ ಘರಾಂ ಉತ್ರೊನ್ ತಾಚಾ ಬಾಪ್ಪುಚೆಂ ಘರ್. ಜೊಕಿ ಬಾಪ್ಪುಗೆರ್ ಧಾಂವ್ಲೊ.
“ಬಾಪ್ಪೊ..ಬಾಪ್ಪೋ... ಮ್ಹಣ್ಚಾ ತಾಚಾ ಗಲಾಟ್ಯಾಕ್ ತಾಚಿ ಧಾಟಿಮೊಟಿ ಮಾವ್ಶಿ ಭಾಯ್ರ್ ಆಯ್ಲಿ. ಜೊಕಿಕಡೆನ್ ಕುಟ್ಮಾಂತ್ ಕೊಣ್ ತರಿ ಮೊಗಾನ್ ಉಲಯ್ತಾ ಜಾಲ್ಯಾರ್ ತಿ ತಾಚಿ ಮೊಟಿ ಮೌಶಿ ಮಾತ್ರ್. “ಹೊ ಬಾಬು, ಕಿತೆಂರೆ ಹ್ಯಾ ರಾತಿಂ ಆಯ್ಲೊಯ್? ಜೆವ್ಲೊಯೆರೆ? ನ್ಹಾಲೊಯೆರೆ? ಯೇ..ಯೇ..ಭಿತರ್ ಯೇ....ಬಸ್, ಕಾಫಿ ಕರುಂವೆ? ವ್ಹಯ್ರೆ ಪುತಾ ವೊರಾಂ ಪಳಯ್ಲಿಂಯ್ವೆ? ಇಕ್ರಾ ಜಾಂವ್ಕ್ ಜಾಲಿ. ಆಜ್ ಹಾಂಗಾಚ್ ರಾವ್. ಫಾಲ್ಯಾ ಕಾಮಾಕ್ ವೆತಾನಾ ಆಮ್ಚಾ ಎಡ್ಮಂಡಾಚೆಂ ಪೇಂಟ್ ಶರ್ಟ್ ನ್ಹೆಸ್, ಬಸ್ರೆ.. ಯೇರೆ.. ಮ್ಹಣೊನ್ ಹಾತ್ ಧರ್ನ್ ವೊಡಿಲಾಗ್ಲಿ.
“ನಾಂಗೆ ಮಾವ್ಶೆ ಹಾಂವ್ ಮ್ಹಳ್ಯಾರ್.. ಆಮಿ ದೊರಿ ಕಾಣ್ಘೆವ್ನ್ ಯೆತಾನಾ ತಾಣೆಂ...ಮ್ಹಳ್ಯಾರ್ ರೊನಿನ್ ಭ್ಟೆ ಭ್ಟೆ ಲಡಾಯ್ ಕೆಲಿ. ಮ್ಹಜೆಕಡೆನ್ ರಾಗ್ ಕರ್ನ್.... ತಾಚಿ ಮಾವ್ಶಿ ವೊಮ್ತಿ ಉದಾರಿ ಪಡೊನ್ ಹಾಸಾಲಾಗ್ಲಿ.
“ಅಯ್ಯೋ ತುಮ್ಚೊ ಮೋಗ್ಗಿ? ತೊ ರೊನಿ ಚೆಡೊ ಜಾಂವ್ಚಾ ಬದ್ಲಾಕ್ ಚೆಡುಂ ಪುಣಿ ಜಾಲ್ಲೊ ಜಾಲ್ಯಾರ್ ತುಮ್ಕಾಂ ಕಾಜಾರ್ ಕರ್ಯೆತೆಂ. ನ್ಹಂಯ್ರೆ ತುಮ್ಚೆ ಮಧೆಂ ಕೊಣಿ ಎಕ್ಲೊ ಕಾಜಾರ್ ಜಾಲ್ಯಾರೀ ತುಮಿ ಸುಧಾರ್ತಾತ್. ಹಾಂ ಕಾಜಾರ್ ಮ್ಹಣ್ತಾನಾ ಉಗ್ಡಾಸ್ ಜಾಲೊ. ಮ್ಹಜಾ ಭಯ್ಣಿನ್ ಬೆಂಗ್ಳುರ್ ಥಾವ್ನ್ ದೊಗಾಂ ಚೆಡ್ವಾಂಚೊ ಫೊಟೊ ಧಾಡ್ಲ್ಯಾತ್. ರಾವ್ ಹಾಡ್ತಾಂ ಮ್ಹಣ್ತಾನಾ ಜೊಕಿಚೆಂ ಸೈರಾಣ್ ಚುಕ್ಲೆಂ. “ಕಾಜಾರ್ ಮ್ಹಜಾ ಮೊಡ್ಯಾಕ್ ಕರ್ಗೆ... ಹಾಂಗಾ ಮ್ಹಜೊ ಜೀವ್ ಇಲ್ಲೊ ಇಲ್ಲೊ ಉಬಾತ್ ಆಸಾ, ಹಿ ಮೊಟಿ ಮ್ಹಜೆಂ ಕಾಜಾರ್ ಕರ್ತಾ ಖಂಯ್!"
“ಅರೆರೆ, ಚೆರ್ಕ್ಯಾಕ್ ಕಿತೆಂ ಜಾಲಾಂ? ಮೊಡಿಂ ನಿದಾಂವ್ಚೊ ಗ್ರಾಯ್ಕ್ ಆಜ್ ಸ್ವತಾಃಚೆಂ ಮೊಡೆಂ ಪಡ್ತಾ ಮ್ಹಣ್ತಾ.!"
“ಮಾವ್ಶೆ, ರೊನಿ ಬಾಂಯ್ತ್ ಪಡ್ಲಾಗೆ!"
“ಬಾಂಯ್ತ್? ರೊನಿ? ಕಸೊ ಪಡ್ಲೊ? ಕಿತ್ಯಾಕ್ ಪಡ್ಲೊ? ಕೆದಾಳಾ ಪಡ್ಲೊ? ಬಾಂಯ್ ಖಂಯ್ಚಿ?"
“ವಯ್ಲ್ಯಾ ಮಾರ್ಗಾರ್ ಕಾಟೆಂ ನಾತ್ಲ್ಲಿ ಬಾಂಯ್!"
“ಮಾಗಿರ್ ಹಾಂಗಾ ಕಿತ್ಯಾಕ್ ವರ್ಧಿ ಹಾಡ್ನ್ ಆಯ್ಲಾಯ್? ತಕ್ಲಿ ಖಾಕೆಂತ್ ಆಸಾರೆ? ಪೆಂಟಾಚಾ ಬೊಲ್ಸಾಂತ್ ಆಸಾ? ಫಾಯರ್ ಬ್ರಿಗೆಡಿಕ್ ಫೊನ್ ಕರ್ರೆ!
“ಫಾಯರ್ ಬ್ರಿಗೆಡ್! ಜೊಕಿಕ್ ಮತಿಚೆರ್ ದಾಟ್ಲ್ಲೆಂ ಕಾಳೆಂ ಮೋಡ್ ಎಕಾಚ್ಛಾಣೆಂ ಪಾಶಾರ್ ಜಾಲೆಂ ತಶೆಂ ಭೊಗ್ಲೆಂ. ತ್ಯಾ ನವ್ಯಾ ಉಜ್ವಾಡಾಂತ್ ಫಾಯರ್ ಬ್ರಿಗೆಡಿಚೆಂ ನಂಬರ್ ಝಳ್ಕಾಲೆಂ ನಾ."
“ವ್ಹಯ್ಗೆ, ಫಾಯರ್ ಬ್ರಿಗೆಡಿಚೆಂ ನಂಬರ್ ಕಿತ್ಲೆಂ? ತಾಣೆಂ ಮಾವ್ಶೆಕ್ ವಿಚಾರ್ಲೆಂ. ತಾಚಾ ಮಾವ್ಶೆಕ್ ಕಳಿತ್ನಾ ಮ್ಹಣ್ಚಿ ಸವಯ್ ನಾ. ನಿಜಾಕಿ ತಿಕಾ ನಂಬರ್ ಕಳಿತ್ ನಾ. ತರೀ ಚೆರ್ಕ್ಯಾಕ್ ಪಳೆತಾನಾ ನಂಬರ್ ಕಳಿತ್ ನಾ ಮ್ಹಣ್ ಕಶೆಂ ಮ್ಹಣ್ಚೆಂ? ದೆಕುನ್ ತಿಣೆಂ ಸಟ ಸಟ ಕರ್ನ್ ನಂಬರ್ ಸಾಂಗ್ಲೆಂ,
“112244 ಜೊಕಿನ್ ಮೆಜಾರ್ ಆಸ್ಲ್ಲ್ಯಾ ಬೊಲ್ ಪಾಯಿಂಟ್ ಪೆನ್ನಾನ್ ಹಾತಾರ್ ಬರವ್ನ್ ಕಾಣ್ಘೆಲೆಂ, “112244 ಬರವ್ನ್ ಜಾತಾನಾ ಜೊಕಿಕ್ ಫಾಯರ್ ಬ್ರಿಗೆಡಿಚೆಂ ನಂಬರ್ ಎಕಾಚ್ಛಾಣೆಂ ಉಗ್ಡಾಸಾಕ್ ಆಯ್ಲೆಂ. ಹಾತಾರ್ ಬರುಲ್ಲೆಂ ನಂಬರ್ ಮಾವ್ಶೆಚಾ ಪಾಲ್ವಾನ್ ಪುಶಿತ್ತ್ ಬೊಬಾಟ್ಲೊ,
“112244 ತುಜಾ ಪಾಗುರ್ ಮಾಂವಾಚೆ ನಂಬರ್ಗೆ. ಗೊತ್ತುನಾ ಜಾಲ್ಯಾರ್ ಲಕ್ಷಣಾನ್ ನಾ ಮ್ಹಣ್. ತುಕಾ ಕಾಂಯ್ ಮರ್ಯಾದ್ ವಚಾತ್ ಮ್ಹಳ್ಳೆಂ ಭ್ಯೆಂ ನಾ. ತುಕಾ ಖಂಯ್ ಆಸಾ ಮರ್ಯಾದ್? ಮ್ಹಣಾತ್ ಭಾಯ್ರ್ ಧಾಂವ್ಲೊ.
ಇತ್ಲ್ಯಾರ್ ವೊರಾಂ ಬಾರಾಂಕ್ ತೆಂಕ್ಲ್ಲಿಂ. ಘರಾಂಚಿಂ ದಾರಾಂ ಧಾಂಪ್ಲ್ಲಿಂ. ಪೆಟ್ಯಾಂಚೊ ಸಾಂಕ್ಳಿ ಸುಟ್ಲ್ಲ್ಯೊ. ದಿಸಾಕ್ ತಾಕಾ ಪಳವ್ನ್ ಶಿಮ್ಟಿ ಹಾಲಂವ್ಚೆ ಪೆಟೆ ಆತಾಂ ವಳಕ್ ನಾಸ್ಲ್ಲೆ ಬರಿ ಘೊಂಕ್ತಾಲೆ, ಕೊಣಾಯ್ಚಾಯ್ ಘರಾ ರಿಗ್ತೊಲೊ ಕಸೊ? ತಾಕಾ ಬರ್ಯಾನ್ ಭಿತರ್ ಆಪಂವ್ಚೊ ತಿತ್ಲೊ ಮೋಗ್ ಕೊಣಾಕ್ ನಾತ್ಲ್ಲೊ. ಹರ್ಎಕ್ಲ್ಯಾಕಡೆ ಏಕ್ ಪಾವ್ಟಿ ಪುಣಿ ಜೊಕಿನ್ ಶಿಪಾಯ್ಗಿರಿ ಕೆಲ್ಯಾ. ದೆಕುನ್ ತಾಣೆಂ ರಾಜ್ರಸ್ತ್ಯಾರ್ ಆಸ್ಚಾ ಪಬ್ಲಿಕ್ ಫೊನಾಕ್ ವೆಚೊ ನಿರ್ಧಾರ್ ಕೆಲೊ. ಜೊಕಿಚೆ ಪಾಯ್ ದುಕ್ತಾಲೆ, ದೆವಾಕ್ ಖಂಚೆಯ್ ಎಕಾ ಹಳ್ತಾನ್ ದೀಂವ್ಕ್ ಕಳಾಂಚ್ ನಾ. ಕಷ್ಟ್ - ಸುಖ್, ಬೆಸಾಂವಾಂ, ಶಿರಾಪ್ ಇತ್ಯಾದಿ ಇತ್ಯಾದಿ ವಯ್ರ್ ವಯ್ರ್ ದಿತಾ.
ಸಕಾಳಿಂ ಫುಡೆಂ ಸ್ಕೂಟರ್ ಪಾಡ್ ಜಾಲೆಂ, ಕಾಮಾಕಡೆ ಲಡಾಯ್ ಜಾಲಿ, ಘರಾ ಯೆತಾನಾ ಘರಾಕ್ ಬೀಗ್, ಭಂವ್ಡಿ ಮಾರ್ನ್ ಪಾಟಿಂ ಯೆತಾನಾ ಪಂಪು ಪಾಡ್ ಜಾಲಾ, ಕೊಳ್ಸೊ ಬಾಂಯ್ತ್ ಪಡ್ಲಾ, ದೊರಿ ತುಟ್ಲ್ಯಾ, ರಾಂದಾಪ್ ಜಾಂವ್ಕ್ ನಾ, ನ್ಹಾಂವ್ಕ್ ಉದಾಕ್ ನಾ. ತಾಚೆ ವಯ್ಲ್ಯಾನ್ ರೊನಿಕ್ ರಾಗ್ ಆಯ್ಲೊ, ತಾಣೆಂ ಲಡಾಯ್ ಕೆಲಿ, ತೊ ಬಾಂಯ್ತ್ ಉಡ್ಲೊ....ಆತಾಂ ಜೊಕಿ ಧಾಂವಾಲಾಗ್ಲೊ. ಪಬ್ಲಿಕ್ ಫೊನಾಲಾಗಿಂ ಪಾವ್ತಾನಾ ತೆಂ ಬಂಧ್ ! ಪಬ್ಲಿಕ್ ಪೋನ್ 24 ವೊರಾಂಉಗ್ತೆಂ ಆಸ್ಚೆಂ ಬಂಧ್ ಕಿತ್ಯಾಕ್ ಮ್ಹಣ್ ಚಿಂತ್ತಾನಾ, ತಾಚೊ ಆಜೊ ಮೆಲಾ ಮ್ಹಣ್ ದೊನ್ಪಾರಾಂ ಕೊಣೆಂ ತರಿ ಸಾಂಗ್ಲ್ಲೊ ಉಗ್ಡಾಸ್ ಜಾವ್ನ್ ತೊ ಪಾಟಿಂ ಘುಂವ್ಲೊ. ರಸ್ತ್ಯಾಚಾ ದಿವ್ಯಾಕ್ ಹಾತ್ ಉಕಲ್ನ್ ವೊರಾಂ ಪಳಯ್ಲಿಂ,
ಪಾವ್ಣೆ ಏಕ್! ದೆವಾ ಮ್ಹಜಾ ಹಾಂವ್ ಕಿತ್ಯಾಕ್ ನಾಚ್ತಾಂ? ರೊನಿ ಎದೊಳ್ ಬಾಂಯ್ತ್ ಮೆಲಾ ಆಸ್ತೊಲೊ. ತಾಚಾ ಕಾಳ್ಜಾಂತ್ ದೂಕ್ ಭರೊನ್ ಭರೊನ್ ಆಯ್ಲೆಂ. ಆಪುಣ್ ಖಂಯ್ ಆಸಾಂ ಮ್ಹಳ್ಳೆಂ ವಿಸ್ರೊನ್ ವ್ಹಡ್ಲ್ಯಾನ್ ರಡ್ಲೊ. ಕಸ್ಕಸೊನ್ ರಡ್ಲೊ ಆನಿ ಮಾಗಿರ್ ಪಾಯ್ ವೋಡಿತ್ ಘರಾ ಪಾವ್ಲೊ. ಘರಾ ದಿವೆ ಪಾಲ್ವಯಿಲ್ಲೆ. ದಾರ್ ಧಾಂಪ್ಲ್ಲೆಂ. ಕೊಣಾಯ್ಕೀ ಉಟಂವ್ಚೆಂ ಧೈರ್ ನಾಸ್ತಾನಾ ಸೊಪ್ಯಾರ್ಚ್ ನಿದ್ಲೊ. ತಕ್ಲಿ ಭರ್ ಚಿಂತ್ನಾಂ ! ರೊನಿ ನಾಸ್ತಾನಾ ಹ್ಯಾ ಗಾಂವಾಂತ್ ಕಶೆಂ ರಾಂವ್ಚೆಂ? ತಶೆಂ ಕಿತೆಂ ತಾಕಾ ಇಷ್ಟ್ ನಾಂತ್ ಮ್ಹಣ್ ನ್ಹಂಯ್, ಇಷ್ಟಾಂಚೆಂ ಸೈನ್ಂಚ್ ಆಸಾ. ತರೀ ರೊನಿ ತಸಲೊ ದುಸ್ರೊ ನಾ. ಅಸಲ್ಯಾ ಉಮಾಳ್ಯಾಂನಿ ತಾಕಾ ನೀದ್ ಆಯಿಲ್ಲಿಚ್ ಕಳಿತ್ ಜಾಂವ್ಕ್ ನಾ.
ದುಸ್ರೆ ಸಕಾಳಿಂ ದೊಳೆ ಸೊಡ್ತಾನಾ ಉಜ್ವಾಡ್ಲ್ಲೆಂ. ದಾರ್ ಉಗ್ತೆಂ ಆಸ್ಲ್ಲೆಂ. ಲೋವ್ ಭಿತರ್ ಗೆಲೊ. ಎಕಾ ಬೆಗಾಂತ್ ಮುಸ್ತಾಯ್ಕಿ ಚೆಪ್ಲಿ, ಪಯ್ಶೆ ಕಾಣ್ಘೆಲೆ, ಸಂಸಾರಾಚ್ ನಾಕಾ ಮ್ಹಣ್ ಭೊಗ್ತಾಲೆಂ. ತರೀ ಎದ್ದೊ ಸಂಸಾರ್!! ಖಂಯ್ ಗೆಲ್ಯಾರೀ ಸಂಸಾರ್ಚ್ ಸಂಸಾರ್!!! ಕಸೊ ಸೊಡ್ಚೊ ಮ್ಹಣ್ ಕಳಾನಾಸ್ತಾನಾ ಗಾಂವ್ ಸೊಡ್ಚಾ ಸೊಂಪ್ಯಾ ನಿರ್ಧಾರಾಕ್ ಆಯಿಲ್ಲೊ.
‘ಅಳೆಗೆ ಹಾಂವ್ ಚಲ್ತಾಂ ಮ್ಹಣಾಲೊ ಆವಯ್ ಲಾಗಿಂ. ಆವಯ್ ವೊಗಿ ರಾವ್ಲಿ.ತಾಣೆಂ ತಶೆಂ ಭಾಯ್ರ್ ಸರ್ಚೆಂ ಆನಿ ಮಾಗಿರ್ ಬೇಗ್ ವಿಸ್ರೊನ್ ಪಾಟಿಂ ಯೆಂವ್ಚೆಂ, ತಿಕಾ ತಶೆಂ ಘರ್ಚಾಂಕ್ ಸದಾಂಚೆಂ ಜಾಲ್ಲೆಂ. ತಿ ವೊಗೀ ರಾವ್ಲಿ.
ಪುಣ್ ಜೊಕಿ ಆಜ್ ಬೇಗ್ ಘೆವ್ನ್ಂಚ್ ಗೆಲೊ. ಗೇಟ್ ಉತ್ರೊನ್ ಚಾರ್ ಮೆಟಾಂ ಕಾಡ್ತಾನಾ ಮುಕ್ಲ್ಯಾನ್ ದೊರಿ ಖಾಂದ್ಯಾರ್ ದವರುನ್ ಯೆಂವ್ಚೊ ರೊನಿ ದಿಸ್ಲೊ. ಜೊಕಿ ಪಳೇತ್ ರಾವ್ಲೊ. ಸಗ್ಳ್ಯಾ ರಾತಿ ಮತಿಚಾ ಪಡ್ದ್ಯಾರ್ ರೊನಿಚೆಂ ಮೊಡೆಂ ಪಳವ್ನ್ ರಡ್ಲ್ಲ್ಯಾ ತಾಕಾ ಇತ್ಲೊ ಸಂತೊಸ್ ಜಾಲೊ ಕಿ ತಾಚಾ ಹಾತಾಂತ್ಲೆಂ ಬೇಗ್ ಸಕಯ್ಲ್ ಗಳ್ಳೆಂ. ರೊನಿಚಾ ಖಾಂದ್ಯಾರ್ ಹಾತ್ ದವರುನ್ ಮ್ಹಣಾಲೊ, “ಮೊರೊಂಕ್ ನಾಂಯ್ರೆ ಪಾತ್ಕ್ಯಾ?
“ನಾ ರೆ, ತುಕಾ ಸೊಡ್ನ್ ಕಶೆಂ ಮೊರ್ಚೆಂ?
“ಮಾಗಿರ್ ಬಾಂಯ್ತ್ ಆವಾಜ್?
“ತೊ ಫಾತೊರ್ ಪಾಯಾಕ್ ಲಾಗೊನ್ ಬಾಂಯ್ತ್ ಪಡ್ಲೊ. ತುಕಾ ಕಿತ್ಲೊ ರಾಗ್ ಆಯಿಲ್ಲೊರೆ ಕಾಲ್? ದೊರಿ ಉಡಯಿಲ್ಲ್ಯಾಕ್ ತುಂ ಮ್ಹಾಕಾ ಮಾರ್ತಾಯ್ ಕೊಣ್ಣಾಂ ಮ್ಹಣ್ ಭಿಯಾನ್ ಲಿಪೊನ್ ಬಸ್ಲೊಂ. ತುಂ ಆಜ್ ಸಮಾ ಆಸಾಯ್ರೆ?
ರೊನಿನ್ ವಿಚಾರ್ತಾನಾ ಜೊಕಿನ್ ತಾಕಾ ವೆಂಗೊನ್ ಧರ್ಲೆಂ, ಪುಣ್ ಸಗ್ಳೆ ರಾತಿಂ ಆಪ್ಣೆಂ ಭಗ್ಲ್ಲೆ ಆಟೆವಿಟೆ ಮಾತ್ರ್ ಸಾಂಗ್ಲೆನಾಂತ್. ಉಪ್ರಾಂತ್ ದೊಗೀ ಜೊಕಿಚಾ ಘರಾ ಗೆಲೆ.
ಗೇಟಿಚೊ ಆವಾಜ್ ಜಾತಾನಾ ಜೊಕಿಚಾ ಆವಯ್ನ್ ಭಾಯ್ರ್ ತೀಳ್ನ್ ಪಳೆಲೆಂ. ಮುಕಾರ್ ತಿಚೊ
ಝಗ್ಡ್ಯಾಂಕೊರ್ ಪೂತ್ ಹರ್ಧೆಂ ಆನಿ ಹರ್ಧ್ಯಾಚಾಕೀ ಪೊಟ್ ಮುಕಾರ್ ಕರ್ನ್ ಹಾತ್ ಪಾಯ್ ಕಾಡ್ನ್ ಉಡಯಿತ್ತ್ ಚಲೊನ್ ಯೆತಾಲೊ. ಪಾಟ್ಲ್ಯಾನ್ ರೊನಿ ಖಾಂದ್ಯಾರ್ ದೊರಿ ಆನಿ ಹಾತಾಂತ್ ಬೇಗ್ ಕಾಣ್ಘೆವ್ನ್ ಯೆತಾಲೊ. ತಿ ಲಾಂಬ್ ಸ್ವಾಸ್ ಸೊಡ್ನ್ ಭಿತರ್ ಗೆಲಿ.
*****
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
