ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ’ಟೂರಿಸ್ಟ್ ಸೈಕಲ್’ ಅಂಕಣಾಕ್ ಭೆಟ್ ದಿಯಾ.
ಚಿಂತ್ನೆನ್ ಸಬ್ಧಾನ್ ಆನಿ ಬರ್ಪಾನ್
[ಕೊಂಕ್ಣೆಂತ್ ವಿಚಾರಾಂಚೆಂ ವ್ಹಾದಾಳ್ ಉಟಯಿಲ್ಲೆಂ ಅನ್ಯೇಕ್ ಫಾಮಾದ್ ಅಂಕಣ್ ’ಚಿಂತ್ನೆನ್, ಸಬ್ಧಾನ್ ಆನಿ ಬರ್ಪಾನ್’ ಕೊಂಕ್ಣೆಂತ್ಲ್ಯಾ ಸಾಹಿತ್ಯ್ ಚಕ್ರವರ್ತಿ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ಭಳ್ವಂತ್ ಲಿಖ್ಣೆಥಾವ್ನ್ ಪರತ್ ದಾಯ್ಜ್ ವಾಚ್ಪ್ಯಾಂ ಖಾತಿರ್. ದಾಯ್ಜ್.ಕೊಮ್ಚೆರ್ ಎದೊಳ್ಚ್ ಭೋವ್ ಫಾಮಾದ್ ಜಾಲ್ಲ್ಯಾ ’ಟೂರಿಸ್ಟ್ ಸೈಕಲ್’ ಅಂಕಣಾ ಉಪ್ರಾಂತ್ ಜಾಯ್ತ್ಯಾಂನಿ ಎಡ್ವಿನಾಚಾ ಅಂಕಣಾಕ್ ಶಾಭಾಸ್ಗಿ ಪಾಟಾಯಿಲ್ಲಿ ಆನಿ ಎಡ್ವಿನಾಚೆಂ ಅಂಕಣ್ ಚಾಲು ದವರುಂಕ್ ವಿನತಿ ಕೆಲ್ಲಿ. ಸರ್ವ್ ವಾಚ್ಪ್ಯಾಂಕ್ ದೇವ್ ಬರೆಂ ಕರುಂ]
17. ಪಾತಳ್ ಬರ್ಪಾಚೆರ್ ಮೆಟಾಂ
ಎಡ್ವಿನ್ ಜೆ.ಎಫ್.
ಇ೦ಗ್ಲಿಶಾ೦ತ್ ಎಕ್ ರೂಪಕ್ ಆಸಾ. ಕೋಣ್ಯಿ ಕಸಲೊಯಿ ಅಶೀರ್ ಅವ್ಕಾಸ್ ಘೆತಾ ತರ್, ಎಕಾ ಖತ್ಕತ್ಯಾ, ಅರ್ತ್ಯಾಪರ್ತ್ಯಾ ವಿಶಯಾಚೆರ್ ಉಲ್ಲೇಕ್ ಕರು೦ಕ್ ಧಯ್ರ್ ಘೆತಾ ತರ್, you are treading on thin ice ಅಶೆ೦ ಮ್ಹಣ್ತಾತ್. ಅರ್ತ್ ಅಸೊಕಿ, ಹೆ೦ ಪಾತಳ್ ಬರಫ್ ಖ೦ಚ್ಯಾಯಿ ಘಡಿಯೆ ಫುಟಾತ್ ಆನಿ ಫಾಸ್ಳಾತ್ ಆನಿ ತು೦ ಬರಫಾ ಪ೦ದ್ಲ್ಯಾ ಖ೦ದಕಾ೦ತ್-ಗು೦ಡಾಯೆ೦ತ್ ಪಡ್ಶಿ, ಅಸೊ.
ಸಾಹಿತಾ೦ತ್ ಪಾಶಾ೦ವ್ ಆನಿ ಲ೦ಯ್ಗಿಕತೆವಿಶಿ೦ ಲಿಕ್ತಾನಾ ಮ್ಹಾಕಾ ಚಡ್ಉಣೆ ಅಶೆ೦ಚ್ ಬೊಗ್ತಾ ಕಿತ್ಯಾಕ್ ಮ್ಹಳ್ಯಾರ್ ಲ೦ಯ್ಗಿಕತಾ ವಾಯ್ಟ್ ಆನಿ ಪಾಶಾ೦ವ್ ಖೊಟೆ ಮ್ಹಳ್ಳೆ೦ ಚಿ೦ತಪ್ ಲ್ಹಾನ್ಪಣಾರ್ಥಾವ್ನ್ ಆಮ್ಚ್ಯಾ ಮತಿ೦ತ್ ಖ೦ಚಯಿಲ್ಲೆ೦ ಆಸ್ತಾ. ಪುಣ್ ಲ೦ಯ್ಗಿಕತಾ ಆನಿ ಪಾಶಾ೦ವ್ ಕಾ೦ಯ್ ಬುಶೆಲಾ ಪ೦ದಾಕ್ ಲಿಪವ್ನ್ ದವರು೦ಕ್ ಜಾ೦ವ್ಚೆ ತಸಲಿ೦ ಸ೦ಯ್ಬಾ೦ ನ್ಹಯ್; ಲ೦ಯ್ಗಿಕತಾ ಆನಿ ಪಾಶಾ೦ವ್ ಮನ್ಶಾಚ್ಯಾ ಸ೦ಯ್ಬಾ೦ತ್ಚ್ ಆಸಾ, ಜ಼ಶೆ೦ ಭುಕ್ ಆಸಾ ತಶೆ೦. ಪರಿಪಿಕಾಯೆಕ್ ಪಾವ್ಲ್ಲ್ಯಾ ಹರ್ಯೆಕಾ ಜೀವಿಥ೦ಯ್ ಎಕ್ built-in ಹುಕುಮ್ ಆಸಾ-you have to procreate-ತುವೆ೦ ತುಜಿ ಸ೦ತತ್ ವಾಡಯ್ಜೆ. ಹಿ ಹುಕುಮ್ ಎಕಾ ಟಾಯ್ಮ್-ಬೊ೦ಬಾಪರಿ೦. ‘ಸೆಟ್ಟ್’ ಕೆಲ್ಲೊ ವೇಳ್ ಯೆತಾನಾ ಕುಡಿ೦ತ್ಲೆ ವಿಸ್ವೆ ಜ಼ಾಗೆ ಜ಼ಾತಾತ್ ಆನಿ ತಿ ‘ಬಿಲ್ಟ್-ಇನ್’ ಹುಕುಮ್ ಜ಼್ಯಾರಿ ಕರು೦ಕ್ ಆಯ್ತೆ ಜ಼ಾತಾತ್. ಹೊ ಜ಼ಾವ್ನಾಸಾ ಲ೦ಯ್ಗಿಕತೆಚಿ ಭುಕ್ ಉಬ್ಜ೦ವ್ಚೊ ಪಾಶಾ೦ವ್.
ಪುಣ್ ಭುಕ್, ಪೇಜ಼ೆ-ಚೆಟ್ಣೆ೦ತ್ಯಿ ಥಾ೦ಬ್ತಾ, ಬಿರಿಯಾಣಿ ಬಡಾ-ಖಾನಾ ವರ್ವಿ೦ಯಿ ಥಾ೦ಬ್ತಾ. ಫರಕ್ ಪಡ್ಚೆ೦, ಜೆ೦ ಕಿತೆ೦ ಜ಼ೀಬ್ ಆಶೆತಾ ತ್ಯಾಥ೦ಯ್ ಮಾತ್ರ್. ಹಿ ತಿ ಜ಼ಿಬೆಚಿ ಆಶಾ ಸರಿ ಕರ್ಯೆತ್ ಥಾ೦ಬಾನಾತ್ಲ್ಲ್ಯಾ ಲ೦ಯ್ಗಿಕತೆಕ್/ಪಾಶಾ೦ವಾ೦ಕ್, ಜ೦ಯ್ ಕುಡ್ ಚಿ೦ತಾ೦, “ಥ೦ಯ್ ಚಡಿತ್ ಬರೆ೦ ಆಸಾ, ತೆ೦ ಆನಿಕಿ ಬರೆ೦ ಆಸ್ತೆಲೆ೦,” ಅಶೆ೦.
ದೆಕುನ್ ಲ೦ಯ್ಗಿಕತಾ/ಪಾಶಾ೦ವ್ ಖ೦ಚಾಯಿ ವೆಳಾರ್ ಬೆಳ್ಶೆನಾ೦ತ್, ಆಮ್ಕಾ೦ ನಾಕಾ ಮ್ಹಣ್ ಜಾಯ್ನಾ೦ತ್, ತೆವ್ಶಿಲೊ ಚರವ್ ಖ೦ಡಿತ್ ಚಡ್ ರೊಸಾಳ್ ಆಸ್ತೊಲೊ ಮ್ಹಳ್ಳಿ ಭೃಮಿದ್ ನಿ೦ವಾನಾ.
ದೆಕುನ್ ಖ೦ಚಾಯಿ ಮಾದ್ಯಮಾ೦ನಿ sex sells ಯಾ ಲ೦ಯ್ಗಿಕತೆಕ್ ವಿಕ್ರೊ ಆಸಾ. ಹಾಚೊ ಕಿತ್ಲ್ಯಾ ಆನಿ ಕಸಲ್ಯಾ ರಿತಿರ್ ಮಾದ್ಯಮಾ೦ ಆಡ್-ಫಾಯ್ದೊ ಮಾರ್ತಾತ್ ಮ್ಹಳ್ಳೆ೦ ಆಮ್ಕಾ೦ ಗೆಲ್ಲೆಕಡೆನ್ ದಿಸ್ತಾ ಜ಼ಾಲ್ಲ್ಯಾನ್ ಹ್ಯಾ ವಿಶಯಾಚೆರ್ ಹಾ೦ಗಾಸರ್ ವಿಶ್ಲೇಶಣ್ ಗರ್ಜೆಚೆ೦ ನ್ಹಯ್. ಪುಣ್ ಬರವ್ಪಿ ಜ಼ಾ೦ವ್ಕ್ ಸೊದ್ಚ್ಯಾ ಆಮಿ೦ ಮನ್ಶಾಚ್ಯಾ ಅತ್ಯ೦ತ್ ಸ೦ಯ್ಬಿಕ್ ಸ೦ಯ್ಬಾವಿಶಾ೦ತ್ ಲಿಕ್ತಾನಾ ಕಸಲ್ಯೊ ಶೀಮ್-ಮೆರೊ ಘಾಲಿಜ಼ೆ ಮ್ಹಳ್ಳೆ೦ ಹಾ೦ಗಾಸರ್ ಪಳೆ೦ವ್ಚೆ೦ ಪ್ರೇತನ್ ಕರ್ಯಾ೦. ಪುಣ್ ಹೆ೦ ಸುಲಬ್ ನ್ಹಯ್.
ಹೊ ಆಮ್ಚೊ ದೇಶ್ ಕಾಮಸೂತ್ರಾಚೊ ದೇಶ್ ಮ್ಹಣ್ ಸ೦ಸಾರ್ ಮಾನುನ್ ಘೆತಾ. ಆಮ್ಚ್ಯಾ ಪುರಾತನ್ ಸಾಹಿತಾ೦ತ್ ಲ೦ಯ್ಗಿಕತೆಕ್ ಆಸ್ಲ್ಲಿ ಪ್ರಾಮುಕ್ಯತಾ ಗಮನಾಬಾಯ್ಲಿ ನ್ಹಯ್, ವಾಚ್ಪ್ಯಾ೦ಕ್ ತೊಪ್ಚೆ ತಸಲಿಚ್ಚ್. ಹಾ೦ವೆ೦ ಹ್ಯಾ ಆದಿ೦ ಉಲ್ಲೇಕ್ ಕೆಲ್ಲ್ಯಾ “ಕಥಾಸರಿತ್ಸಾಗರಾ”೦ತ್ ಅಸಲೆ೦ ಜ಼ಾಯ್ತಿತ್ಲೆ೦ ಆಸಾ. ಮ್ಹಣ್ತಕೂಚ್ ಲ೦ಯ್ಗಿಕತಾ/ಪಾಶಾ೦ವ್ ಆಮ್ಚ್ಯಾ ಬರ್ಪಾ೦ನಿ ಕೀಳ್ ರಿತಿರ್ ವ್ಹಾಳ೦ವ್ಚಿ ‘ಅಜ಼ಾದ್ ವೀಜ಼ಾ’ ಆಮ್ಕಾ೦ ಮೆಳ್ಳ್ಯಾ ಮ್ಹಣ್ ಲೆಕ್ಚೆ೦ ನ್ಹಯ್. ಪುಣ್ ಆಮ್ಚಿ ಹಿ ಸಮಾಜ಼್ ಪ್ರಗತಿಪರ್. ಆಜ಼್ ಅಶ್ಲೀಲ್ ಆಸ್ಲ್ಲೆ೦ ಫಾಲ್ಯಾ೦ in-thing ಜ಼ಾಯ್ತ್; ಎಕಾ ತೆ೦ಪಾರ್ ವಾಡ್ಲೆಲ್ಯಾ ಚಲ್ಯೆನ್ ನಾಕ್ಶ್ಯೊ ಚಾಬ್ಲ್ಯಾರ್ ಯಾ ಉಬೆ೦ ರಾವ್ಲ್ಲೆಕಡೆನ್ ಪಾ೦ಯಾಚ್ಯಾ ಆಖಾಣ್ಯಾನ್ ಮಾತಿ ಉಸಯ್ಲ್ಯಾರ್ ಚೆಡು೦ ಸೊರ್ಕೆಲಾ೦ ಮ್ಹಣ್ ವ್ಹಡಿಲಾ೦ ಚಿ೦ತಾಲಿ೦ ಆನಿ ಅಸಲ್ಯಾ body-language ಜ಼ಿಚೆರ್ ಕಠಿಣ್ ಧಮ್ಕಿ ಮೆಳ್ತಾಲಿ. ಪುಣ್ ಆತಾ೦ ಪಳೆಯಾ, body-language-ಜ಼ಿಕ್ ಕಿತ್ಲ್ಯೊಶೊ ‘ಲಿಪಿ’ ಯೆ೦ವ್ಕನಾ೦ತ್? ದೆಕಿಕ್, ಚಲ್ಯಾ ಚಲ್ಯಾ೦ಚಿ೦ ಟಾಯ್ಟ್-ಮಟ್ವಿ೦-ಆರ್ಪಾರ್ suggestive ದಿರುಸಾ೦ ಜ಼ಾ೦ಕಾ೦ ಆಮಿ೦ trendy clothes ಮ್ಹಣ್ತಾ೦ವ್.
ಎಕಾ ತೆ೦ಪಾರ್ ಡಿ.ಹೆಚ್.ಲೊರೆನ್ಸಾಚಿ ‘`Lady Chatterly's Lover” ಕಾದ೦ಬರಿ ದುಸ್ಪಟ್ಲ್ಲ್ಯಾ ಲ೦ಯ್ಗಿಕತೆಚೆ೦ ಅಜ಼ಾದ್ ಚಿತ್ರಣ್ ಮ್ಹಣ್ ಕಾಳ್ಯಾ-ಪಟ್ಟೇರ್ ದಾಕಲ್ ಜ಼ಾಲ್ಲಿ ತಿ ಆಜ಼್ ಪ್ರತಿಶ್ಟಿತ್ ‘ಕ್ಲಾಸಿಕ್’ ಸಾಹಿತಾ೦ತ್ ಜ಼ಾಗೊ ಆಪ್ಣಾ೦ವ್ಕ್ ಸಕ್ಲ್ಯಾ ಮ್ಹಣ್ತಾನಾ ಸಾಹಿತಾ೦ತ್ ಪಾಶಾ೦ವ್/ಲ೦ಯ್ಗಿಕತೆಚ್ಯೊ ಶೀಮ್ಮೆರೊ ಕೊಣೆ ವೊಡ್ಚ್ಯೊ? ಲೇಕಕಾ೦ನಿ೦ಚ್ ಮ್ಹಣ್ ಆಮಿ೦ ಮ್ಹಣ್ಚೆ೦ ತರ್ ಪ್ರಗತಿಪರ್ ಸಮಾಜ಼ಿಕ್ ಜ಼ಾಯ್ ಜಾಲ್ಲೆ೦ ವಾಚಪ್ ದೀನಾ೦ವ್ ತರ್ ಆಮಿ೦ ಭೊವ್ಶಿಕ್ (popular) ಬರವ್ಪಿ ಕಶೆ ಜಾ೦ವ್ಚೆ? ಹ್ಯಾ ಸವಾಲಾಕ್ ಕೋಣ್ ಜ಼ಾಪ್ ದಿತಾ?
ಎಕಾ ತೆ೦ಪಾರ್ ದೆ|ಗಾಬ್ರಿಯೆಲ್ ಡಿ’ಸೊಜ಼ಾಚ್ಯಾ (ಶ್ರೀಗಬ್ಬು, ಉರ್ವಾ) ಕಾದ೦ಬರಿ೦ಯೆಕ್ ಅನಿಸ್ಕಳ್ ಲ೦ಯ್ಗಿಕ್ ಅತರ್ವಣಾ೦ ಮ್ಹಣ್ ಆಮ್ಚ್ಯಾಚ್ ಮ೦ಗ್ಳುರಿ ಸಮಾಜ಼ಿನ್ ಧಿಕ್ಕಾರ್ ಕೆಲ್ಲೊ ಆಸ್ತಾ೦ ಆಜ್ ತಿಚ್ಚ್ ಸಮಾಜ಼್ ಶ್ರೀಗಬ್ಬುಕ್ ಎಕ್ ರೊಮಾನ್ಸಿ ಕಾದ೦ಬರಿಕಾರ್ ಮ್ಹಣ್ ಮಾ೦ದ್ತಾ. ಹ್ಯಾ ದೊಡ್ಯಾಪಣಾಕ್ ಆಮಿ೦ ಕಸಲಿ ಜ಼ಾಪ್ ದಿ೦ವ್ಚಿ?ಹಾ೦ವ್ ಮ್ಹಣ್ತಾ೦, ದೊಡ್ಯಾಪಣಾನ್೦ಚ್ ಜ಼ಾಪ್ ದೀಜೆ. ಆಮ್ಚ್ಯಾ ಬರ್ಪಾ೦ನಿ ಪಾಶಾ೦ವ್/ ಲ೦ಯ್ಗಿಕತಾ ಹಾಡಿಜ಼ೆ ಆನಿ ‘ಕ್ರಾ೦ತಿ’ ಕರಿಜ಼ೆ ಮ್ಹಳ್ಳಿ ಆಶಾ ತುಮ್ಕಾ೦ ಆಸಾ ತರ್ ತುಮ್ಚಿ೦ ಚಿ೦ತ್ನಾ೦ ಬದ್ಲಿಯಾ; ಜ಼ಶೆ೦ ಲ೦ಯ್ಗಿಕ್ ಕರ್ನಿ ಎಕ್ ಖಾಸ್ಕಿ ವಿಶಯ್ ಸ೦ಸಾರಾ೦ತ್ಲ್ಯಾ ಬಿಲಿಯಾ ಬಿಲಿಯಾ ಲೊಕಾ೦ಚೊ ಅನುಬವ್ ಕ಼ಸೊ ತಿತ್ಲ್ಯಾಚ್ ಬಿಲಿಯಾ ಬಿಲಿಯಾ ವಾಟಾ೦ನಿ ವೆಗ್ಳೊ, ಆಮಿ೦ ಥೊಡ್ಯಾ೦ನಿ ಲ೦ಯ್ಗಿಕ್ ಕ್ರಾ೦ತಿ ಕರುನ್ ರುಜ಼ು ಕರ್ಚೆ೦ ಕಾ೦ಯ್ ನಾ. ಅಸಲಿ ಕ್ರಾ೦ತಿ ಕರು೦ಕ್, ಆಸ್ಲ್ಲಿ೦ ಪತ್ರಾ೦, ನೆಮಾಳಿ೦, ಚಿತ್ರಾ-ಚಲಚಿತ್ರಾ೦ ಆನಿ ಆತಾ೦ಚ್ಯೊ ವೆಬ್ಸಾಯ್ಟಿ ಬರಿ ಮಿನತ್ ಕಾಡ್ತಾತ್, ಕಾಡು೦ದಿತ್. ಹೊ ತಾ೦ಚೊ ದ೦ದೊ ಪುಣ್ ಆಮ್ಚಿ ಜ಼ವಬ್ದಾರಿ ಕಸಲಿ? ಅಸಲ್ಯಾ ದ೦ದ್ಯಾಕ್ ಪಾಟಿ೦ಬೊ ದಿ೦ವ್ಚಿ?
ಮ್ಹಣಾನಾ ಹಾ೦ವ್ ಆಮ್ಚ್ಯಾ ಬರ್ಪಾ೦ನಿ ಲ೦ಯ್ಗಿಕತೆಚೆ೦ ಕಿಸರ್ಚ್ ಆಸು೦ಕ್ ನ್ಹಜ಼ೊ ಮ್ಹಣ್ ಪುಣ್ ವಿಚಾರ್ತಾ೦ ಸವಾಲ್, ತುಮ್ಚಿ ಕತಾವಸ್ತ್ ಲ೦ಯ್ಕಿಕ್ ಪಾಶಾ೦ವಾಚೆ ದಿಗೆ (props) ನಾಸ್ತಾನಾ ನೀಟ್ ರಾವೊ೦ಕ್ ಸಕಾನಾ? ಹ್ಯಾ ಸವಾಲಾಚೆ ಜ಼ಾಪಿ೦ತ್ ಸಾಹಿತಾ೦ತ್ ಲ೦ಯ್ಗಿಕತಾ/ಪಾಶಾ೦ವ್ ಮ್ಹಳ್ಳ್ಯಾಚ್ಯೊ ಶೀಮ್ಮೆರೊ ಕಾ೦ತ್ಯಿಲ್ಲ್ಯೊ ಆಸಾತ್.
ಆಧ್ಲೆ ಅಂಕ್ಡೆ: 1,2,3,4,5,6,7,8,9,10,11,12,13,14,15,16
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
